ديوانـ الشاعر : عبدالله العليوي

[نــجــم]

عبدالله عبالعزيز العليوي

الشاعر عبدالله بن عبدالعزيز العليوي رحمه الله تعالى ......
وهو من مواليد عنيزة عام ١٣٧٣ّه
وتوفي يوم الخميس الموافق ٢-١١-١٤٢٤ ه

وهو أحد أبرز شعراء منطقة القصيم . الشاعر عبدالله العليوي تلك الأسطورة التي سيتوارثها أجيال الشعر حيث نشأ نشأة بسيطة في بيت نجدي متواضع ذلك البيت الذي زج لنا بإبداع شاعر وشعر الإبداع عبدالله العليوي اسم لامع في عالم الشعر ونجم ساطع في حصد الإعجاب ، قد لا أكون مبالغا في الوصف إن قلت إن عبدالله العليوي جامعة تضم في جنباتها الرقة والشجن والحزن وهو شـاعـر كبيـــر
شـاعــر ينتمــيـ اليــهـ الشعــر
شاعر كتبـ عنـ الجرحـ والخيانهـ وكتبـ عنـ الحزنـ وكتبـ عنـ الحبـ
شاعر فقدنا شخصهـ ولمـ تفقد شعرهـ
صدر له ديوان مطبوع جاء تحت عنوان ((بقايا شوق)) ضم أكثر من ٧٢ قصيدة وقد طويت بموته صفحة تعتبر من اهم الصفحات الشعر الحديث رحم الله الفقيد واليكم من ديوانة هذه القصائد الجميلة

[نــجــم]

راجع تبي قلبي

راجع تبي قلبي عقـب ماتندمـت
راجع تبي قلبي على خبرك العـام

العام انادي ياهوى البال وين انـت
واليوم حبك ينتظر حكـم الإعـدام

على الجفاء من طول صبري تعلمت
والجرح في قلبـي تداويـه الأيـام

خلك بدربك لو مشيـت وتعثـرت
مسكين ياباني قصـورك بالأحـلام

مجبور أبيعك لو بكيـت وتأثـرت
وش حيلتي حظي تـردى ولا قـام

ما عاد لي بالحب مثلـك تغيـرت
يازين حبك ينتظر حكـم الإعـدام

[نــجــم]

جروحي تسليـك

مدري متى صارت جروحي تسليـك
عقب الوفاء وشلون غرتـك دنيـاك

يا من علي اليـوم كثـرة طواريـك
نهايـة الغـدار مـاظـن تخـفـاك

في حبك الثاني عسـى الله يهنيـك
حنـا مـع الأيـام ندلـه وننسـاك

كنت الرجاء واليوم خاب الرجاء فيك
أرخصت ماضينـا وغيـرت مبـداك

وين الحنان اللـي مقـره موانيـك
وين الضمير اللي عن الغدر ينهـاك

غال الدموع أرخصتها لك وأنا ارجيك
ابني لـك بدمعـي وتهـدم بيمنـاك

يكفين ما قاسيـت منـك و تغليـك
منتب علـى قلبـي وصـي ومـلاك

[نــجــم]

يشهـد الله فقدنـاك

يا للي مسافر يشهـد الله فقدنـاك
تعال باسم الحب جرحـي خطيـري

أنا غريق بالهـوى هـات يمنـاك
في زحمة أمواجك تعـذر مسيـري

مشتاق لك بالحيل يا كـود فرقـاك
عن ذكريات الحب ويـن المٍطيـري

أرفق بقلـب تالـي الليـل نـاداك
وقتي حداني في هـواك استجيـري

نسيتنـي و إلا تناسيـت ممشـاك
و إلا أنت مشغول برجاء حب غيري

يا مستريح البال و شلون ننسـاك
والشوق ناره تشتعل في ضميـري

خذ روحي اللي هدها الشوق تفداك
عسى الفلـك لأخذتهـا يستديـري

[نــجــم]

يا مخيـب رجانـا

منك انهتينا يا مخيـب رجانـا
الصبر طال وعذبتنا المشاويـر

في موت حبك يجبر الله عزانـا
*** بيدك رميته لا تقـول المقاديـر

لـولاك حنـا ماتبـدل غلانـا
كل الوفا منا ولا منـك تقديـر

قلنا سحابه صيف تعبر سمانـا
وتزول ماله في سما الحب تأثير

غدرك على نسيان حبك حدانـا
هذي سواتك ما تفيد المعاذيـر

عفناك واللي عالم فـي خفانـا
البعد عنك ارحم وقلبك مع الغير

تبيعنـا واليـوم تبكـي هوانـا
لايا عديم القلب فرقاك لي خير

[نــجــم]

ارخصتنـا مـا تبينـا

يعني خلاص ارخصتنـا مـا تبينـا
نقطع رجانا منـك مـره وننسـاك

قفلـت بـاب المعرفـه وانتهيـنـا
وش عاد لو نسمع مع الناس طرياك

لو رحت عنا اليـوم باكـر تجينـا
لولاك ما عشنا مع الحـب لـولاك

أنت الحبيب اللـي بهجـرك بكينـا
يا ما تلوعنـا علـى أيـام فرقـاك

وين الليال اللـي بقربـك قضينـا
يوم أنت مرضيني وأنا أقوم برض

[نــجــم]

أنا تقبلت العزاء

أنا تقبلت العزاء بك مـن العـام
كن العزاء في موت حبك تهانـي

يا ما سهرت الليل لا غبت ما نام
ترقد وأنا ازرع في رجاك الأماني

واثر السعادة في رجاء حبك أوهام
لا طاب جرحٍ صابني منك ثانـي

جارت على قلبٍ شقا فيك الأيـام
أشكيك للي فـي غـلاك ابتلانـي

سهرت عليك عيون ماظن تنـلام
ذاك أمس ولا اليوم ماجا كفانـي

إفرح بطيشـك والغرابيـل قـدام
يا طاك من وقتك مثل ما وطانـي

[نــجــم]

بيدي رميت

بيدي رميت القلب في وسط نـارك
و أقفيت يا ظالم وأنا فيك مفتـون

إنهد حيلي فـي عـذاب إنتظـارك
وأخفيت جرحي مابي الناس يدرون

أرمي سلاحي واعترف بانتصـارك
ابكيت من يضحك على اللي يحبون

متـى تخفـف لوعتـي باعتـذارك
اشوفكم مره علـى الحـب تبكـون

أنهيـت قصـة حبنـا باختيـارك
وين الصبر يا قاسي القلب وشلون

يازين قلبي من هـواك استجـارك
حبك عسرني ماطوى القلب بالهون

[نــجــم]

مسرف الخطوه

تذكرتك وقلبي مسرف الخطوه يبي فرقـاك
وفي نفسي بقايا من جروح العام مدفونـه

تذكرتك وفي عيني مواري حزن من ذكـراك
تلفت يمك الخافق وجـاك خطـاه مجنونـه

وجيتك ثاير العبره احبك من يقول انسـاك
غيابك نار من يقوى يشيل النـار بعيونـه

هلا با ايامك السوداء هلا بالحزن في دنياك
رضى قلبي بتعذيبك ابـد مايطلـب العونـه

متى تفرح بك ايامي متى وشلون كيف القاك
متى هالليل في شمسك يذوب ويختلف لونه

تعبت من التعب وينك تعال ومد لي يمنـاك
حياتي لا خلت من شوفتك ماهيب مضمونه

[نــجــم]

لا تزيد الجرح

لا تزيد الجرح ماقصـر زمانـي
شايلٍ بالقلب أحـزان السنيـن

لاتزيد الجرح مافينـي كفانـي
لا تصير اليوم مع وقتي معيـن

ياحياة الروح ربي بـك بلانـي
بالحشاء لك جرح يالغالي مكين

في زمانٍ فات يالغالـي ترانـي
أخفي الأحزان والعبـرة تبيـن

مندفع لك جيت شوقي لك حداني
جيت أبي نظرات عطفك والحنين

عمري اللي ظاع باحلام وأماني
شوفتي لك يوم والفرقا سنيـن

[نــجــم]

حاولت أعزي

حاولت أعزي مثل غيري من الناس
لقيت نفسي أستحق العـزاء فيـه

يا موت مالك قلب ما عندك إحساس
ما شفت حال اللي فقد شوف غاليه

يا موت ما ترحم طوى حالي الياس
قلبي جريحٍ ما لقى مـن يواسيـه

يا موت لو تشرب من الهم لو كاس
ترحم وحيـدٍ هـم قلبـه يباريـه

قالوا مقدر قلت يا نـاس لا بـاس
أصبر وهمي في حشا القلب مخفيه

أمرٍ قضاه الله على العين و الراس
خلوني أنسـا لا تجيبـون طاريـه

[نــجــم]

قضى العمر

قضى العمر يا ظالم وأنا أقول عنك اقفيت
والا شفت زولك بالصدف هلت اعيانـي

مشى القلب في ظلك يباريك لو صديـت
ولو عفت حبك يوم مـا عفتـه الثانـي

أنا ما قويت أنسـى حنانـك ولا ظنيـت
سألتك بربـك ويـش كلفـك نسيانـي

وأنا أشـوف زلاتـك بعينـي إلا زليـت
وش اللي يفيد الشوف والقلب عميانـي

أخذت العزاء مني ولا قلب لـي خليـت
وأنا من هواك اليـوم حبيـت حرمانـي

عطيتك حياتـي يـا قمرهـا ولا رديـت
أبي منك لو نظرة ترى هجرك أشقانـي

أبي قلبك القاسي وراضي بمـا سويـت
تعاتـب وتجرحنـي وتامـر وتنهانـي

لك الحب مشاني أنا في هـواك إبليـت
أحبك ولـو صديـت يـا كـل خلانـي

[نــجــم]

ترانـا سلينـا

خلاص لا ترجـع ترانـا سلينـا
ما كنت أصدق يوم اني أبنسـاك

في بعدكـم يامـا عليكـم بكينـا
واليوم ماتطري على البال طرياك

وأنا ادري انك رغم صدك تبينـا
لا شك ناسٍ ضدنا تقصر اخطـاك

من سكرة الحب الصناعي صحينا
حتى المجالس عفتها خوف ذكراك

خل اللذي غيـر حنانـك علينـا
يعطيك من قلبه ربع ماعطينـاك

وش عاد لا صار السلام بيدينـا
قلبي وقلبك بينهـا دارت افـلاك

ودعت ماضـي حبنـا وانتهينـا
وقلبٍ نسيته يوم لا بـد ينسـاك

ذكـراك ياغـدار هانـت علينـا
حتى دموع العين فرحة بافرقـاك

حبٍ جديـدٍ غيـر حبـك لقينـا
حديتني جعـل الليالـي تحـداك

[نــجــم]

تعلمت الجفاء

أنا تعلمت الجفاء مـن تغليـك
ومن المذلة والخضوع انتهينـا

من كل قلبي يشهد الله ناسيـك
غير الضياع بحبكم وش لقينـا

ابحتفظ في عزة النفس مابيـك
بالناس نلقى اللي نبيه ويبينـا

مما معي زينت للنفس ماضيـك
في درب حبك ليتنا ما مشينـا

هديت عرش الحب يازين بايديك
من بحر حبك بالنجـاة اكتفينـا

ذاب الحنين بعين قلبٍ تراعيـك
مثلك على النسيان والله قوينـا

أنهيت قصة حبنا فـي تغليـك
أمسح دموعك بالجفاء ما بدينا

[نــجــم]

ليتك تعيش

ليتك تعيش بواقع الحب لو يـوم
و الا تشوف لوضعنـا ذا نهايـه

بالحب أنا يا غاية النفس مظلوم
محتاج يا لغالي لعطف ورعايـه

لي السهر ولعاذلي لـذة النـوم
من شان حبك ما سهرنا هوايـه

ما صابني من نظرة العين مقسوم
أسيـر حبـك لا تحطـم رجايـه

ما كل عين تجرح القلب بسهـوم
و ما كل من يرمي يجيد الرمايـه

أنشهد إني منك يا زين محـروم
معك ابتديت وفي هواك النهايـه

فات الأوان و لا تزيدون باللـوم
الصبر بيدي يوم قلبـي معايـه

بالاسم والمعنى و ما قلت مفهوم
يا شمس عمري يا بدر في سمايه

[نــجــم]

لا تحاربنـي بصـدك


مع زماني لا تحاربنـي بصـدك
خلني بالعمر اضحك لـو ثوانـي

كان لك قلبٍ على غيـري يحـدك
وش ترى في قلبي اللي لك حداني

بالجفاء ياصاحبي عديـت حـدك
ما وصلني منك يالغالـي كفانـي

اشتكـي لـك لا تعذبنـي بـردك
لا تصد ارجوك يـوم الله بلانـي

ليت حب ضاع للذكـرى يشـدك
تذكر اللي راح منا فـي ثوانـي

ليتني مرتاح من قلبـي وحبـك
ليت لي يازين مثلك قلـب ثانـي

[نــجــم]

عفت أنا الدنيا

عفت أنا الدنيا إلا جار الصديق
كل واحد صار بالشكوى يضيق

من يدور له بذا الغابه رفيق
ينقضي عمره ولا يلحق مناه

دمعتي تجري ولا أحدٍ لي بكى
عندهم شكواي ماتلقى صدى

ياوجيه الغدر وين أهل الندى
أبعدوا عني ترا عفت الحياة

كم انا مخدوع فيكم من سنين
عشت أنا المظلوم وأنتم ظالمين

لي خفاياكم ورا توه تبين
يوم دار الوقت وأظهر لي رداه

كنت أشارك في هموم الكل منكم
كم تمنيت أحمل الضيقات عنكم

لو دريت أن الوفاء وهم بنظركم
ماقضى عمري وأنا أزرع في صفاة

[نــجــم]

العهود الوثيقة

ياللي تناسيت العهود الوثيقة
ماعاش من قبلك بدنياه مرتاح

لابد من يومٍ وتلقى الحقيقة
تشوف لوعات الزمن كيف تجتاح

وتعود لي طيرٍ مضيع فريقة
وأقول يا غدار عهد الوفاء راح

تغيرت حتى الوجيه الصديقة
والقلب الأبيض أصبح اليوم سفاح

يا ما تحملت الجروح العميقة
والشوق بعيوني الا أقفيت فضاح

فيما مضى روحي بحبك غريقة
مثل السفينة بالبحر دون ملاح

واليوم أنا قلبي تغير طريقة
مايرجع الماضي بالأعذار يا صاح

في خاطري عبرات همٍ وضيقة
وشلون مات الحب في عز الأفراح

[نــجــم]

تبين الصدق

تبين الصدق
لو كانت محبتنا وفاء وخلاص

وقصة حب ........... ما مرت على مخلوق
أنا و ياك ما نقوى نغير صفحة الواقع

صبرت أكثر من اللازم ...................
سهرت الليل ................. رعيت سهيل

وشفت الحل

[نــجــم]

دور بدالي حبايب


دور بدالي حبايب
مثلي يحبونك ... ما عاد لي بك رجاء

اليوم عندي تساوت
فرقاك ولا رجوعك

من حبنا وش بقى
لا تلتفت لي تراعي ... ما شوف للحب داعي

والحب ذاك إنتهى
لا تعتذر لا تشره ... يازين شفت المضرة

ما منك غير الشقاء
واليوم عندي تساوت

فرقاك ولا رجوعك
من حبنا وش بقى

[نــجــم]

وقفة خواطر


اللي حصل وقفة خواطر وطالت
بيني وبينك وأنت زوتها زود

سحابة مرت سمانا وزالت
هذا اعتقادي كنت لرضاك مشدود

وأشوف زلاتك علينا توالت
تخطي و أسامح بس ما شفت مردود

يا ما عليك النفس يازين شالت
هم لجا في خاطري مــــــا لــــه حدود

معك الليالي يوم صديت مالت
صارت عقب فرقاك أيامنا سود

رغم الظروف اللي عن القرب حالت
يا زين أحبك والأمل فيك مفقود

[نــجــم]

أيام ضاعت

لو ترد أيام ضاعت في رجاك
ماسهرنا في غيابك نرتجيك

داري بالجرح جرحي ماخفاك
تدري ان الحل والله في يديك

خل جرح القلب يرفع مستواك
غيرتنا مثلك الدنيا عليك

بالجفا والصد يوم الله بلاك
ليت ربي بالموده مبتليك

لا تعاتب والخطا كله خطاك
بعت منهو في حياته مشتريك

ابتعد لو كان قلبي مانساك
قلتها مجبور ابعد مانبيك

[نــجــم]

طول ليلك


ياللي علينا تشتكي طول ليلك
ياما سهرنا ماشكينا لك الليل

ياما تحملنا عذابك وميلك
وياما زرعنا مارجينا محاصيل

دامك تقول إن الجفاء هد حيلك
هذا الجفاء ياللي تظنه تعاليل

منول أنت الروح منهو بديلك
عن هالخطايا كنت أشبهك باسهيل

من يوم شفت العين ظاقت بشيلك
عذرتها شافت من أيامك الويل

ماعاد تخدعني بشلال ليلك
لا عاد من حبٍ ولا عاد من ليل

[نــجــم]

لا تعتذر فات الأوان


لا تعتذر فات الأوان
ما عاد أبي نظرة حنان

مليت من كثر الحلول
ما باقي إلا نفترق

مكتوب نبعد عن بعض
وش فايدة لو نعترض

مليت من كثر الحلول
ما بقى إلا نفترق

طالت مشاوير العذاب
ماشوف داعي للعتاب

مليت من كثر الحلول
ما باقي إلا نفترق

أول بدايتنا خطاء .......
وأخر بدايتنا خطاء

خلاص ملينا الحلول ......
والحل لازم نفترق

[نــجــم]

ردتني الشوفه

ردتني الشوفه إلى زمان أول
أيام كنا صغار وأحلامنا أصغر

ردتني الشوفه إلى بيوت الطين
وعيال حارتنا والدور والبسطه

أيام كنا صغار وقلوبنا بيضاء
ردتني الشوفه إلى زمان أول

يوم الزعل مايوم بقلوبنا طول
كنا لبعض نشتاق من غير ماندري ..

ردتني الشوفه لسوقنا الضيق
وتفكيرنا المحدود تفكيرنا الضيق

أيام كنا صغار وقلوبنا بيضاء
ذيك السنه تدرين مانعرف الغيره

والحب ما جاله في بالنا سيره
ردتني الشوفه ورديت للماضي

لقيت نفسي غصب تبكي على الماضي ...
تذكري في يوم قلتي نبي نرحل

نبي نروح بعيد نبعد عن الحاره
وصرخت دون شعور وشلون لا رحتي

ياشين هالحاره هذا وحنا صغار
وأحلامنا أصغر يوم الرحيل أذكر

نزل علينا السيل ولا فرحنا به
أول إلا جاء السيل كلن فتح بابه

اليوم صرنا كبار دار الزمن فينا
صار العذاب اكبر زاد العناء فينا

اليوم صرنا كبار وعذابنا أكبر
تغيرت فينا ملامح الطيبه

نقول جيل اليوم وقلوبنا سوداء
من زيفها سوداء حتى بعز الشمس

ادروبنا سوداء فينا الوفاء ضايع
فينا الأمل ضايع حتى الزمن ضايع

ونقول جيل اليوم ياغاليه تدرين
وش اللي غيرنا الوقت هو بالنفس

واليوم مثل الأمس حنا على اللي فات
اللي تغيرنا ياغاليه ياليت

يرجع لنا الماضي نرجع لدار ( الطين )
للدور والبسطه لأيام كنا صغار

وقلوبنا بيضاء

[نــجــم]

لو تكرمت

حاول تقدر موقفي لو تكرمت
من شان ماض راح تسمع دفاعي

قبل الزعل ليتك لوضعي تفهمت
ما بيننا عشرة عمر لو تراعي

تراك في حكمك علينا تسرعت
خلك حليم ولا تصير اندفاعي

كان الخطى مني فأنا لك تعذرت
قلبك عطوف و ما يسرك ضياعي

دامك بقلبي من إسنين تحكمت
ما شوف لهروج تجي منك داعي

كل الهموم أنساه لا من تبينت
أهواك أنا مهما تكون اندفاعي

[نــجــم]

قلبي لقى غيركم

قلبي لقى غيركم شخصٍ يهلي بي
يشفق علي وأنا بالحيل مبلي به

أرجوك لا تعتذر يكفيني اللي بي
والله يسامحك منك العذر مالي به

من واهجٍ بالحشا شقيت أنا جيبي
ومن لامني بالهوى يصلى لواهيبه

لولاك للناس مابانت عذاريبي
يا ما تجاهلت حبي وأنت تدريبه

يوم أنت مرتاح في همي وتعذيبي
ماقلت لك يوم ... تفقدني وتبكي به

يازين ماشوف لك عندي مطاليبي
حبيت غيرك وحبك ويش أسوي به

[نــجــم]

بعيد هناك يالغالي

بعيد هناك يالغالي
بعيد ... وين أنا وياك

أنا وش عاد
وش بيدي

ما غير أشكي ما غير أبكي
على قلبي على حبي

على ذكراك
كلام الناس يالغالي ...

يعذبني ويجرحني
إلا قالو ... نساك وراح

شغل بالك وهو مشغول
عنك بواحدٍ ثاني

[نــجــم]

ذكرتني حبك
ذكرتني حبك وأنا أقول ناسيه
جرحت جرحك يوم قرب يطيبي

في شوفتك شديت قلبي لماضيه
يوم أنت عني ساعة ماتغيبي

يا للي تلوم القلب بفراق غاليه
ليتك بدنيا الحب تأخذ نصيبي

تمشي بدرب ما تحسب تواليه
ماتدري إنك بالنهاية صويبي

تذكر حبيبٍ راح تبكي لياليه
دار الزمان وكل شمس تغيبي

بيديه قلبي يا عرب كيف أخليه
من حبه الظالم تعذر طبيبي

[نــجــم]

غاب القمر

عن ديرتي غاب القمر
ما عاد أشوف بالسماء !

مدري القمر ؟؟
رافق حبيبي بسفرته !!

مدري القمر ...؟؟
في غيبته يبكي عليه

الكل منا ياقمر .
يتمنى والله شوفته .

والكل منا ياقمر !
في غيبته يبكي عليه

في ديرتي ... كل العواطف له ثمن !
حتى القلوب اليوم صارت من حجر

والحب بين أثنين ...
ما والله يكون ...

عن ديرتي ... غاب القمر

[نــجــم]

لولا الوفاء

لولا الوفاء ما شدني لك جمالك
لا يخدعك وقت الندم لو صفالك

إخلاصك الوهمي كشفناه تالي
هديت كل اللي بنيت بخيالك

غروك ناسٍ يدعون الوفا لك
حديتن أبعد يالغضي عن مجالك

ما طاع قلبٍ يبتعد قال وشلون
وشلون قلي تبتعد عن ضلالك

في عزتي للنفس يا قلبي بعته
ما ظنتي يا قلب يلقا بدالك

أختار درب الشوق يا قلب خله
يا قلب إنساه واذكر اللي جرالك

[نــجــم]

مابي حياتي

مابي حياتي لا خلت منك تنعاف
وش الليالي لاخلت من قمرها

جرحتني واليوم ماعاد تنشاف
عيني تمنى شوفتك يانظرها

ياصاحبي قلبي على جال ميهاف
الروح يالغالي تزايد خطرها

ماترحم اللي للشقاء صار ميلاف
لك فرحة الدنيا وحنا كدرها

تبكي عليك الدار يازين الأوصاف
ليت النهاية ماتبين خبرها

أيام قربك يالغضي مابي خلاف
راحت ليالي حبنا ياقمرها

[نــجــم]

الصيف قرب

الصيف قرب وا عذابي من الصيف
يبي يروح الزين ماعاد ينشاف

لا غاب عن عيني حسين التواصيف
عز الله إني للشقاء صرت ميلاف

العام جرحي داخل القلب ماشيف
واليوم أخاف جروح فرقاه تنشاف

قلبي معه والدرب يمه صواديف
ليته بجنبي كان ما عندي خلاف

ياصيف ... لا تبعد قلوبٍ مواليف
ارفق ترى قلبي على جال ميهاف

في بحر حبه ما تفيد المجاديف
انشهد ان الدار لا غاب تنعاف

[نــجــم]

خايف عليك

خايف عليك ومنك بالحيـل خايـف
عزي لقلبي يجمع الحب والخـوف

خليت قلبي والشقـاء بـك ولايـف
قلبي عمى وش عاد لو عيني تشوف

عمري قضى ماقلت لك واحسايـف
عندي نهايه درب الاشواق معروف

جرحت قلبـي يا عديـم الوصايـف
ماظن تشرح ما بقلبي لـك حـروف

قلبي لغيـرك لـو تغليـت عايـف
حبك ملك قلبي ونسانـي الخـوف

[نــجــم]

لو طال صبري

لو طال صبري يا هوى البال له حد
ماودي إنك توصل الصبر حده

رسمت لك شكواي والدمع يشهد
عقبك خطير القلب ينباح سده

كيف أحتمل ياعزوتي عيشة الصد
أعطيك روحي والشقاء لي تمده

حاولت كتم الشوق والشوق يشتد
أرحم رحمك الله تراني بشده

لا تجرح المشتاق في قاسي الرد
قلبي عن الفرحه معك لا تلده

قلبي معك والله ماخنت لك عهد
ليت الحنان اللي مضى لي ترده

[نــجــم]

أنا عرفتك بالهوى

أنا عرفتك بالهوى ألف خداع
وأنا بنظرات الوفاء منك مخدوع

لا واحسايف عمري اللي معك ضاع
لا صار لك قلبٍ على الغدر مطبوع

تركتني وحدي على الدرب ملتاع
أخذت عمري والعطاء منك ممنوع

تبي السموحه وأنت لي صرت بياع
وما زال قلبي من سواياك مفجوع

يا ما نهيت القلب لاشك ما طاع
وأنا أشهد إني مابعد شفت لك نوع

ما نيب لا عذار تجي منك سماع
يكفين ماعشته بدنياك مخدوع

[نــجــم]

دموع الندم

امسح دموع الندم يفداك من راعك
عنك انشغل فيك وانت اللي على بالي

فرشت لك قلب ليتك تنثر اوجاعك
عن زمهرير الشقا لك في وظلالي

الله عطاك الغلا ماخذت بذراعك
خذها حياتي عساها مالها والي

من يمنعك لا حكمت بقلب ملتاعك
حاولت ابنساك لكن ماتهيا لي

قصايدي كلها وحي من ابداعك
وشلون عني بعيد وانت تبرالي

مهما حصل منك معك القلب ماباعك
مازلت الأول على هالقلب والتالي

[نــجــم]

أشوفك ما سئلت

أشوفك ما سئلت وقلت طول
عسى ماشر زولك ما نشوفه

عسى قلبك لغيري ما تحول
ما دام إنك بقلبي لا تلوفه

عذولٍ بيننا قال وتقول
تجي وتروح والعين مخطوفه

تذكر في ربيع العام الأول
تذكر قبل تجرحك الحسوفه

لجا في خاطري هم وتجول
وأنا أرجي من وراء الظالم مروفه

بقلبي حب لو صابك تهول
تعرف الحب يمكن من حروفه

[نــجــم]

أول سبب أنت


أول سبب أنت ...
وآخر سبب أنت ...

عشمت قلبي بالهنا
حتى تمكنت

فرشت لي درب اللقاء
ورد وحرير

رسمت لي صحراء الظماء
نهر وغدير

واليوم قلبي في يديك
مجروح بالصمت

مشتاق لك بالحيل
عقبك نهاري ليل

اللي على جمرك وطاء
يصيح وين أنت

أسرفت بالتقدير
وأخطيت بالتقدير

أبيك لهمومي غطاء
وأثري توهمت

[نــجــم]

قلبك عمى

يا للي على حبي تبين البراهين
قلبك عمى ما شفتي دموع عيني

أشتاق لك وأنت بلا شك تدرين
هذي مواري جرحك العام فيني

رغم الجفاء بالحيل بالحيل غالين
يشدني رغم الجفاء لك حنيني

يا غالية لولاك ما هلت العين
حسبي على اللي صار بينك وبيني

فيك الوفاء والعطف واللطف والين
لا ضاقت الدنيا عليك اذكريني

الصبر لي عادة من سنين وسنين
غير الصبر وشعاد أنا في يديني

[نــجــم]

جروح الغدر

جروح الغدر في قلبي
تظن دواه في حبك

وفي قولك أنا أسف
عن اللي صار سامحني

تبي نبداء من الأول ....
وننسى كل ماضينا

ولو فكرّت لو مرة
ولو تدري ... من المقتول ... يالقاتل

دريت أن الرجوع أصعب ...
وقلب مخلص بحبك ...

دفنته من سنه وأكثر ...
خلاص اليوم عفنا الحب

من شأنك .... كبرنا في عواطفنا
وأنا ما عاد تخدعني ...

بكلماتك ...
مثل قولك أنا آسف

عن اللي صار سامحني

[نــجــم]

ثار السكون

ثار السكون وبالسماء لمعة بروق
زمة سحابة وامطرت ذكرياتك

هلت مدامع حسرتي وابرض الشوق
ابكي جنوني فيك واذكر ثباتك

فز النهار وكن هالليل ملحوق
والنوم حتى النوم سوى سواتك

ياسارق أحلامي تماديت بالبوق
عني وعن هالوضع طال إلتفاتك

ماللحزن معنى وماللندم ذوق
اللي حصل تعبير عن حسن ذاتك

جيتك بقايا حيل في قلب محروق
وشلون هديت السكون بحصاتك

[نــجــم]

قلبك بعيد

منتب على أول لا تزيد من الأعذار
قلبك بعيد وفي لسانك تعذر

تبي الرجوع اليوم عقب الذي صار
نفسي عزيزة فوق منتب تصور

مشيت في درب الجفاء وأنت مختار
وشعاد بيدي كل هذا مقدر

واصل مسيرك لا توقف وتحتار
غصن المودة في يمينك تكسر

بالقلب جرحٍ من سواياك تذكار
كم ليلةٍ نامت عيونك وأنا أسهر

يامرخصٍ حبي عليك الزمن دار
هذي نهاية حبنا لا تعذر

[نــجــم]

بلا ميعاد

بلا ميعاد بالصدفة ... تلاقينا
ومن عقب اللقاء الأول

على درب الخطاء الأول
تمادينا ........

سهرنا الليل ..... وشفنا الويل
ومشينا دون ماندري ......

على نفس الخطاء الأول
وبالأخر ..... بعد تفكير

نسينا الحب ..... لا والله تناسينا
وقلنا حبنا كله سحابة صيف

حسبنا إن الهواء كله خداع وزيف
وخطوة ..... مالها داعي

وصدفة .... جالك الطاري
وتذكرت اللقاء الأول

تذكرت وعرفت اني احبك موت
عرفت إن الحياة اللي بلا شوفك

تساوي موت ..............
وتمنيت الخطاء الأول .....

تذكرت وتمنيتك ..................
تجي وتشوف ... نهاية شوفة الصدفة

وفينا الوقت وش سوى
وقلبي من قبل ينساك ....

ترجاني .... يبي يرجع
يبي ذاك الخطاء الأول

[نــجــم]

أحاول

أحاول ...
كلما شفتك

برغم اللي حصل منك
أحاول - أعترض دربك

وأشوفك يا شقاء المشتاق
عني تبعد الخطوة ...

وأصوت لك أبيك ترد
وأشوفك تبتعد وتصد

وتقفي ما على بالك
وأحس بكسرة الخاطر ...

وأجاهد عبرتي وأرجع ...
وأقول يا قلب وش حدك

ومن وداك لدروبه ..
يقول الحــب والصدفــه

[نــجــم]

يا مالك قلبي

يا مالك قلبي لنا عنك مده
وراك عنا يا اريش العين صديت

ماذقت من غيرك جروح الموده
غالي علينا يا حلو لو تغليت

يزداد حبي كلما زدت صده
وراك عن القلبٍ ملكته تخليت

ليت النظر يا صاح يمي تلده
ياما قسى قلبك ولا يوم حنيت

وصل الصبر ياقرة العين حده
ومنين اجيب الصبر لا عني أقفيت

ذاك الحنان اللي مضى لو ترده
أقول من قلبي بحبك تهنيت

ما عاد فيني يازمن ماتهده
أبعدت خلي يازمن ويش خليت

[نــجــم]

وقف وقلي

وقف وقلي وش سبب هالتحدي
ابي الصراحة واقطع الشك بالياس

انت وزماني والغرابيل ضدي
ياللي جرحت القلب وينك والإحساس

قلبي عليك ودمعتي فوق خدي
منك اشتكي لك ياغناتي من الناس

لولاك غالي ما تعديت حدي
ليتك بنيت الحب مثلي على ساس

بكيت يوم اقفيت وانباح سدي
شربت منك المر كأسٍ بثر كأس

ليتك بنظرة من عيونك تلدي
محبتي لك يالغضي ترفع الرأس

[نــجــم]

محاولة نسيان

محاولة نسيان حبك وطاريك
أكبر خطاء فكرت به في حياتي

حبك سطابي حطني بين أياديك
صار إندفاعي لك من أبرز صفاتي

ابيع كل الناس يازين وأشريك
وشوف في نظرة عيونك غناتي

ليت الهموم تصيب قلبي وتخطيك
ما اقول قلي من يسوي سواتي

يزداد حبي لك بزايد تغليك
حسيت إني فيك حققت ذاتي

[نــجــم]

ياليتني ماشفت زولك

ياليتني ماشفت زولك ولا جيت
دربك ولا شافت عيوني عيونك

ليتي معك بالمعرفة ما تماديت
ليت الظروف وسود الأيام دونك

من قبل أشوفك ليتني عنك صديت
قبل تمكن بالضماير طعونك

الوقت ما جالي على ما تمنيت
خلن بحالي ما ترجيت عونك

يا زين من طول المشاوير مليت
يا مشغل قلب شقا فيك هونك

وين أنت أنا لك تالي الليل ناديت
حتى السهر ماله حلاة بدونك

[نــجــم]

ودي بشوفك

ودي بشوفك يا مطول غيابك
بعدك علي الكون ياعزوتي ضاق

أسهرت عيني في رجاوي كتابك
يمكن يهدي بين الأضلاع خفاق

جفت غصون القلب وابطى سحابك
للموت روحي ياهوى البال تنساق

ناشدتك الله لا يخيب الرجاء بك
عساك لي يامالك الروح مشتاق

قلبي معك لو تجرحه في عتابك
لا شك من دونك خطاويه تنعاق

يازين قلبي من هواك التجى بك
لاتجرحه زودٍ على جرح الاشواق

[نــجــم]

قالوا سعيد

قالوا سعيد بالهوى قلت بالحيل
سعادتي مايندرى وش وراها

دربي صعيب وتحسبونه تساهيل
محد شكى من جمرة ماوطاها

كل ٍ مريح ياعرب تالي الليل
وانا بحالٍ يعلم الله شقاها

فكرت لو يطري على الزين تبديل
كيف اقدر الفرقا واعيش بعناها

اهواه من قلبي ومن غير تعليل
لا تجبرون الروح تبدي خفاها

ياماكتبت اسمه على نجمة اسهيل
أصل بنور العين عالي سماها

[نــجــم]

شفتك مع اللي صار عقبي حبيبك

شفتك مع اللي صار عقبي حبيبك
واحتارت العبره بعيني وصديت

مدري هي الصدفه لدربي تجيبك
مدري انا اللي في دروبك تحريت

ملكتني واقفيـت ربـي حسيبـك
ما تعرف الرحمه بقلب توليـت

يا قلب جرحك سبته من طبيبـك
يا قلب ليتك بالوفاء ما تما ديـت

من حبنا كل السعـاده نصيبـك
يا فاقد الاحساس عنـي تخليـت

وش فايده لا قلت عنـي حبيبـك
وانت بحياتك يوم ماظن حبيـت

[نــجــم]

.. بين الرجا والياس ..


ما جيت دربك راضي ٍ باختياري
لك خطوتي تنقاد لا عني ابطيت

أبعد عن اللي لك يجيبون طاري
وان زارني طيفك لزولك تمنيت

لا نتب بعيد ولا طفت منك ناري
فيك الأمل لا هو بحي ٍ ولا ميت

تخطي واقدم عن خطاك اعتذاري
حتى خطاك أنساه ما كنك اخطيت

بين الرجا والياس طال انتظاري
والياس رحمة يا شقا من توليت

أعلنت بالفرقا عليك انتصاري
بالقلب اشوفك مثل غيرك تساويت..

[نــجــم]

أحبك ليه ما ادري


أحبك ليه ما ادري
أحبك وانتهى أمري

أحبك ... لو تروح بعيد
أحبك ... لو تجي جنبي

أحبك ... يابعد من غاب
ولو تبعد وتنساني

وتنسى أيام عشناها
أنا ما أقوى على النسيان

وتسأل ليه
ما أدري؟

تعلمني الوفاء وشلون
وتنسى درس علمته

تقول أحفظ عهود الحب
وأنت الحب ضيعته

وهذا الجرح في قلبي
نهاية حبك ... الكذاب

[نــجــم]

ماجيت يمك


ماجيت حبٍ لك ولا نيب راجيك
ماجيت يمك في رجاء مد يمناك

جيتك مثل غيري بنفسك أعزيك
مالك وجود اليوم مت ودفناك

شربت منك المر واكتم وأداريك
حتى عدوي ما يسوي سواياك

الشاهد الله ما خبر جبت طاريك
وان جاء لك الطاري بخير ذكرناك

عين بكت لك ما تلد النظر فيك
غصبٍ علينا من سواياك عفناك

عواذلي قامت تبيعك وتشريك
ارجوك تبعد عيدنا يوم فرقاك

[نــجــم]

لا تحسبين


لا تحسبين اللي بقلبي لك شوي
لا تحسبينك زول - مر - ونسيته

أنت لي الدنيا ولعيوني الضي
وأنت غناتي والرجا اللي رجيته

حلفت أنا منساك مادامني حي
حتى السهر من شان عينك هويته

كل الثرى رمضا وقربك هو الفي
قربك رخيص ولو بعمري شريته

اخطي وردك للخطى وماحصل شي
أنشهد إنك درب ضاع ولقيته

ولاتحسبين اللي بقلبي لك شوي
درب الغلا توي بعد مابديته

[نــجــم]

داويت بالنسيان


داويت بالنسيان قلبٍ جرحتيـه
دفنت أنا حبي وتبقـى حياتـك

ياللي قتلتي حبنـا مارحمتيـه
أنتي تحسبين الهوى حب ذاتك

ياللي سمعتي بالهوى ماعرفتيه
أنتي تبين الحـب درب لغناتـك

نسيت حبك ضاع كل الرجاء فيه
يكفيك عن حبٍ مضى ذكرياتـك

درب النهاية بختيارك مشيتيـه
لا تذرفين الدمع هـذي سواتـك

عهد الهوى اللي بيننا ماحفظتيه
رماك في بحر الضياع التفاتـك

باقي بقايا حبنا اللي رفضتيـه
ترى المحبه ماتوافـق صفاتـك

مليت أنا مشوار حبٍ رسمتيـه
قلبي يعيش أفراح ذكرى وفاتك

[نــجــم]

فرقاك نار


عيني على اللي مضى هلت عبايرها
فرقاك نار صلتني في سعايرها

يا من سمع هرج عذالي وعذاله
لك مدة مبتعد وخطاك قاصرها

ظنيت حبك يدوم ودارت الدنيا
سهراتنا اللي مضت هذي عواقبها

أنا معك ماشيا بالسمع والطاعة
محبتي ما بها شئ يعذر بها

وشلون تقفي وقلبي تشتعل ناره
أما انقذ الروح والا فأنت دمرها

خذ من حياتي حياتي وارجع الماضي
وابعد عن النفس ضيقات تحاصرها

[نــجــم]

إنشدوني


إنشدوني عن هوانا قلت ضاع
يوم شفنا الصد راحة للجميع

خلنا نرتاح من هاك الصراع
والسهر والهم في رجوى الربيع

ناوي الفرقا وفليت الشراع
مثلما ضيعتني خلك تضيع

إبتعد بسكات مابي لك وداع
مايبي فرقاك هالقلب الرضيع

تحسب إن قلوب خلق الله تباع
يوم تشريني وبالثاني تبيع

لا تغرك جيتي لك بأندفاع
لو بغيتك عز نفسي مايطع

[نــجــم]

لولا غيابك


لولا غيابك يا هوى النفس ماضاق
صدري ولا بانت بنظراتي الشوق

لي قلب مثلك واسهر الليل وأشتاق
غيرك فلا والله تمنيت مخلوق

بيني وبينك خطوة الرجل تنعاق
حسبي على اللي صار من بيننا عوق

اجرح وقلبي لك على الطول ينساق
رمشك ملكني ساقني للهوى سوق

كمل جمالك والي العرش باخلاق
حتى الجروح اللي تجي منك له ذوق

كيف انتهت ذيك المشاوير بفراق
العام الأول كانت أحلامنا فوق

[نــجــم]

وهم وخيال


اعتبر حب مضى وهم وخيال
واعتبر ما فات كله حلم ليل

لا تقول فراقنا يصعب عليك
لا تقول الذكرى ما هانت عليك

كل ذا منك وهذا اللي بغيت
اعتبرني أي واحد مر صدفة في طريقك

واعتبرني لا تقابلنا غريب
كنت أنا في يوم يا ظالم حبيبك

يا عديم القلب ضيعت الحبيب
كل ذا منك وهذا اللي بغيت

ابتعد يكفين منك اللي حصل
ما بقى في دربنا شمعة أمل

ابتعد عني أنا منك انتهيت
كل ذا منك وهذا اللي بغيت

[نــجــم]

منتب على خبري


منتب على خبري تغيرت بالحيل
مهوب قول الناس شوفة عيوني

مثلت لي دور المحبين تمثيل
رح كمل المشوار هالحين دوني

دامه حصل بالوضع يازين تبديل
في عزتي للنفس هجرك يهوني

ماقلت يوم أقفيت ماطولك ياليل
مابيك دام الغير بك شاركوني

شكيت جرحٍ من سواياك لسهيل
لاشك نجم سهيل زود شجوني

مليت أنا ما عاد أبي منك تعليل
خلك مع اللي في هواك إحسدوني

[نــجــم]

لك شـيٍ كثيـر


بالقلب لك شـيٍ كثيـر
حبك لجا وسط الضمير

الوضع يالغالي خطيـر
ومنين أبلقى العافيـه

حاولت أبشرح لك وأقـول
وأخاف قصتنـا تطـول

وأخاف من كثر الحلول
وأكيد مثلي .. خايفـه

أبني قصـورٍ بالهـوى
تعبـت أدور لــي دوا

واليوم أنا قلبـي نـوى
ينهي فصـول السالفه

مليت من دنيـا الشقـا
وين أنت ياظبي الشفـا

اللـي بقلبـي ماخـفـا
واللي بعيونك .. شايفه

[نــجــم]

شايلٍ قلبي


وجيتك ....
شايلٍ قلبي على كفي

أقول اللي مضى يكفي
عجزت أصبر على فرقاك

تعالي !! ...
ضاقت الدنيا ... وش الدنيا

بلا حبك
وش القمرا ... بلا نورك

وش الذكرى ... بلا ذكراك
وقلتي ...

عفت أنا حبك .
أنا مليت من دربك

وصار فراقنا ... أرحم
من التعذيب في نارك

لغيري ... وفر أعذارك
أنا مليت ذاك الحب

ولا عندي أمل رجعه
نويت أبعد ... نويت أنساك ...

وتلاقت عيني بعينك
لمحتي دمعتي صدفه ... وفي لحظة ...
نسيتي كل ماقلتي

[جهز العطاوي]

صح لسانه

وسلمت يمينك على الايراااد

لكـ الوود

[نــجــم]

الله يسلمك يا عاشق

وشاكر لك مرورك العذب

[الجوهره]

ديوان رااائع ومميز
صح لسان شاعرنا القدير
ويعطيك العافيه ع النقل المميز
لاهنت

[نــجــم]

الله يعافيك غرؤؤر


وشاكر لك مرورك العذب

[بنت السعوديه]

ديوان يفتح النفس تسلم يمناك
الله يرحمه ويغفر له ويسكنه فسيح جناته
دمت بحفظ الباري