_.. ديوااان الشاعر الكبير ناصر الفراعنه .._

[الديـــم]

.
.
بين يديكم ديوووان الشااااعر الكبير
نااااصر بن محمد بن فاارس الفراااعنه السبيعي
.
.
ابدأ بهذه القصيده الرااائعه لهذا العملاااق

جعل يسقي دار غضّ العود صيّب = ياغريّب صاحـبٍ يذبـج جمالـه
صاحبٍ زينه لابن يومـه يشيّـب = خلّ عاد اللي عمر عشرين طالـه
ابو عيـنٍ يـا تعيّـب يـا تغيّـب = بنت عمّ الموت مدري بنت خالـه
وابو رمشٍ لو تشوفه يـا غريّـب = متّ ما كمّلت لـو ربـع البيالـة
وابو خدٍّ صفحته صفحـة كتيّـب = كنّ زهر الورد نقشٍ فـي ريالـه
في محل البدر حـلّ ولا تهيّـب = والقمر ما كلّ خـدٍّ جـاء بدالـه
من يشمّه مات عمره مـا تطيّـب = وش يبي في الشيح والعنبر حلاله
وابو عنقٍ عن حشا صدره تسيّـب = يا حياة الشرّ يـا عنـق الغزالـه
وابو نهـدٍ لا يخيْـب ولا يخيّـب = تقْل فوق الصدر يُلقي لـه مقالـة
وابو قـدٍّ لارقـص مـا ينتعيّـب = وصف دابٍ ينفخ الساحـر قبالـه
وابو خصرٍ لا حضر ردفه تغيّب = من عصا موسى على وصفه دلالة
وابو ردفٍ ما يجيبـه ردف ثيّـب = قومته ما قامها صاحـب جلالـة
يوم شفتـه لا بعيـد ولا قريّـب = لعنبو جـدّه تقِـل يمشـي لحالـه
ان وقف لا هو دقـاق ولا دبيّـب = وان مشى كنّه يطالع في ظلالـه
ولّ مشية ما مشاهـا الا الحبيّـب = كنْ يمينه ربّطوهـا فـي شمالـه
صاحبي لا قلت شـيٍّ قال:طيّـب = اطوع القلبٍ يحبّـه مـن خيالـه
:
:

سلّمي يا روح ما من حبّ حلـوات البناجـر=غير قطعة خام غيـرك ياليتيمـة مـا وجدهـا
آه ما أكبرها فضيحة عجزت أطراف الخناجر=لا تموّتّنـي ومـتّ بنظـرةٍ واهـيٍ جهَدْهـا
العيون اللي تسوّي في القلوب سْـوات فاجـر=يحلفون أن الدواهي هي وأنا أقول إنها أدهـى
من سحاية لا جلست قْبال ساجيْـة المحاجـر=ما دريت أنـا صغيـر اخوانهـا والا ولدهـا؟
الهنوف اللي تلملم غيّهـا فـي ثـوب هاجـر=وين روحي في هواها يا عرب ربي قرَدْهـا؟
يوم أجيها ضلوع سرجوفي من الغيرة تشاجر=كلّ ضلعٍ ما يبي شوف الهنـوف الا وحَدْهـا
اتعب رْضاهـا سبيـعٍ والدواسـر والهواجـر=الولـد منهـم ولدهـا والبلـد كلـه بلَـدْهـا
لا مِشَت من عذرها الأرواح تاقف في الحناجر=كنّ عود الخيزرانـة يقطعونـه مـن جِسَدْهـا
وان عدَت يدجر بروحي من عبير الطيب داجر=كنّ دهن المسك لا عَرْقَتْ يِقَطّـر مـن نهدهـا
لو تشوف البيض من حسنٍ على (هاجر) تناجر=مْعَذوراتٍ ,أُمّها وهْي أقرب النـاس تْحَسِدْهـا
شيب عيني كان أنا ماني على صبري مواجـر=ويل ويلي والله اللي رحت يـا خالـد بيَدْهـا
والله اللي قام يسجرني من الخفـرات ساجـر=ويش عذري في عيونٍ من عمل يدْهـا رمَدهـا
هاجرٍ عن ما سواهـا حاجـرٍ للعيـن حاجـر=عيشتي والله ما تسـوى ربـع قـرشٍ بعَدْهـا
ما حسَدْته نزلته قصرٍ مـن الياقـوت تاجـر=لا نزلت الفيضة اللي نقّضـت فيهـا جعَدْهـا
ولّ يا بنتٍ على الطرْيا تجرّ اقصى الحشاجـرّ=فتنة المفتون فيهـا مـن مهَدْهـا اليـا لحَدْهـا
:
:
:

قد بغيتي تطّلعيـن الـروح وانتـي ماشيـة=أحمد الله ربي إنك مـا وقفتـي يـا هنـوف
من يقول إنـه يشوفـك مـا تجيـه الغاشيـة=ودّي آوقّفْه قدْمِـك لحظـةٍ وحـدة واشـوف
كان ما جت دمعته مثـل المـزون الناشيـة=ما سقتني من لبنها بنـت حاميـن الصفـوف
يا أمان قلوب ناسٍ فـي المواقـف خاشيـة=من لغيرك نشتكي جور الليالـي والظـروف
ما طلبت المجد من سور الخـدم والحاشيـة=اطلبه من كفك أنتي يا سما كـل الوصـوف
كـلّ نعمـة حـيٍّ الا نعمـتـك متْلاشـيـة=وكلّ عينٍ ما تشوفك ما تشوف ولا تحـوف
الجوارح في جروحك لـو غـدت متْعاشيـة=حربةٍ من كفّ نايف وقّعت في قلـب نـوف
اسعفينـي دامهـا بيـن الرشـا والراشيـة=اسعفينـي دامهـا بيـن النواهـد والكتـوف
مثلك أنتي مـا عليهـا مـن غيـورٍ واشيـة=ولا عليها من معسّفْة الجمال بْخيـط صـوف
تقصر القـالات دونـك واللـوازم ماشيـة=لو بغيتي من السيوف كفوف حطّوا لك كفوف
:
:
:

نٍٍٍٍوٍّ رهش لي موحشٍٍ مرهٍـش جِِِِـش=هتّـاش عتّـاش ورشّـاش طشّـاش
ناشي من المنشا يشـادي لياارهـش=جيوش حبشيٍّ على الشـرق نطّـاش
شهلال شهلوله على القاع الـى رش=شهلال شلفٍ في النخاشيـش هتّـاش
رشّ مطـشّ هايـشٍ شـايـشٍ وش=جيّـاش نـوّه بالقناطيـش طــوّاش
ينشر نواشيره علـى هشهـشٍ نـش=يغشاه من قشـع الشخاتيـر غـوّاش
يرهش ويربش يوم قش الشجر قـش=قلب الشجاع اللي تنغمـش تنغمـاش
كن راعده لاجهش شجـاعّ تشوبـش=قام ايتخطرش دون الاشهب تخطراش
يحيي هشيمٍ عقب شوف اربـع كـش=وينعش نشاش مشلهب عقب الانشاش
نـوٍّ بشـوش يـوم جـرّش وبـرّش=يشفي بشوفه بوش بـدوانٍ اعطـاش
طرش على عشب الشمال ايتجهّـش=قام ايتخطّش شوك شبكـه تخطّـاش
شوف الشمطري والشجر منبته هـش=شفّي وشفّ امنشنـشٍ حالتـه مـاش
والشف الاول شوف غـرو تقـروش=غرو هبشني هبـش حـب بمهبـاش
البارحة كني علـى ريـش الاريـش=من شان شيٍ بالحشا يجهش جْهـاش
همٍ حشا حشّي يحش الحشـا حـش=حشّة حشيش غطرشوا به على طاش
فيا شوع قلبي شوع طيرٍ على عـش=اخذ فرخه وخرفش على العد خرفاش
فيـا نشّتـي نشّـة خلـوجٍ تنشنـش=شالوا ضناها وهي تشوفـه يعمّـاش
لاشرقوهـا شـرق شـام تنـقـرش=قامت تشمشم من شذا الريح مهنـاش
هي شومها شومي على ناقل الغـش=راع الجديل اللي تعكـرش تعكـراش
ابـو ثليـل فـوق متنـه تعـكـرش=شملول شهلول بـرد وابلـه طـاش
وابـو خـدود مرهشـات همـلّـش=لا شال برقعهن تقـل شعّـة فـلاش
يـا مـا عليهنّـه شجـاعٍ تطربـش=اصفى من الياقوت وابيض من الشاش
صدر من الشيراز كاسيـه رشـرش=نور مـن البلّـور كاسيـه رشـراش
ابـو ثمـان كنهـا الطـش والـرش=هـشّ هشاهيـشٍ تبهّـش تبـهّـاش
كـن ريقهـن در البكـار الحبشبـش=ولا حليـب ناشـع فيـه خشخـاش
مزيون من شـر العيـون يتخشّـش=على مشفشف شفّته جانـي خْـراش
ياشبـه خشـف ذيّـروه المـخـرّش=كنّه يحوشه عن شبا الريـع حـوّاش
خشف عفيف الشان حـرّك وتبلـش=عوده ليا هب الشمال ارعش ارعاش
عليه لا جاء مـن يميـن آتـدروش=وعليه لا جاء من شمال ارهش رْهاش
مانيب مربـوشٍ ولا نيـب هشهـش=ولا شاربٍ غرشا ولا نيـب حشّـاش
لا شك شوقي شقّ الاجياب واربـش=واصبحت مربوش على كور مرباش
يالايمي فـي حبّـه اش اش ثـمّ اش=لابو هشاش المرجلـة لابـو قطّـاش
:
:
:

العيـون مسكتـه والخـدود مسكتـه=ياسلام الياكشف وان تغطـى ياحـرام
لا بغيت اوصفه جـت لسانـي عكتـه=كل عضو من حبيبي يقول اسكت ونام
من يشوفه مات جن الهوى مـا فكتـه=كيف اجل لوهو يشوف اربع حدر اللثام
جادل لا شلـح الثـوب داخـل دكتـه=ما بقى جدار من البيت ما صلى وصام
فتنته مـن ضحكته,الـف عـام بكتـه=اقطع من السيف وآرق من ريش النعام
من توصت فيه روس الاسنـة وكتـه=وش عليها شيخ ولا بعـد تـوه غـلام
من عذر ثوبه على الردف جود ضكته=شاه اللي ما بعد شاهده لو في الحـلام
دوب بس الساق لحظـة يمـر بسكتـه=والله ما يمديه يركض قبل يـوم القيـام
اشهـد انـي مكتـه ان بغانـي مكتـه=واشهد اني بيته من الحجر حتى المقام
يا حبيب فيه كـل الوصـوف مسكتـه=فيك قلبي ميت وضربك الميت حـرام
:
:
:

قال عيب وقلت مـا جيـت ارتجيـك=لعنبـوي ان حدنـي دونـك سحـى
خلفـك العشـاق ديـك شـاف ديـك=ومن يشوفك ضيع الطاسـة ضحـى
ويل ويلـي منـك يـا ويلـي عليـك=انـت مجنـون وانـا جانـي وحـى
يالصغير جعـل مـا جانـي يجيـك=لبن تعطينـي مـن الروضـة طحـى
قـال مـيـلاد المليـكـة للملـيـك=والحلا واجـد لـو الماحـي محـى
قلـت الا فـي ذمتـي منـك واليـك=ينتهـي سـر الجـمـال الاصبـحـا
من يذوقك صـد عـن هـذي وذيـك=وان هجرتـه جـب ثوبـه والتحـى
ومن تسوقه كاسـة الخمـري يديـك=يتبع العـام الـف عـام مـا صحـى
لوتخـرع برقعـك عـن وجنتـيـك=ما بلش في عتمـة المسـرى جحـا
منك مبـدى النـور واالمنهـاه فيـك=لو نحى من صوبك لصوبـك نحـى
اخذني مـولاي فـي ضفـك مليـك=حب من عندي عسى ومن عندك رحى
.
.
وللجمااال بقيه
.
.

[الديـــم]

.
.


كل ما فاضت عيوني نجـر ابـن حربـان دنّـا=في ضلوعي يسمع اللي مـن ورا بغـداد دنّـه
يوم ابن مدعث لنا سـن الوجـود الحـق سنّـا=وا فوادي كن دود الارض يرعـى فـي مسنّـه
وا فوادي لو تضنّى يابـن مدعـث مـا تضنّـى=كنّّـه المجـدور عقـب الجـور مرمـيٍٍّ بعنّـه
اشعل التنبـاك مـن خلقتـه مـا شبّـه و كنّـا=مير كنّّه من عجـاج فـاح مـن صـدره يكنّّـه
وا وجودي وجد من هو عـضّ بابهامـه وحنّّـا=واحدٍٍ شـاف الثـلاث البيـض سـودٍ مستجنّـه
شـاف قـدّام الخيـام خشيـف ريـمٍ مرجهنّـا=وثوّر البندق يبي صيـده وراغ الخشـف عنّـه
اطلق اربع عقبها اربع ثم سمـع صـوتٍ يونـا=واثرها امّه صابها طلقـه و طـار العقـل منّـه
واتهمـوه بذبحـة امّـه ليلـة العيـد و تجـنّـا=اتهمتـه النـاس و صـدوف المقاديـر اتهمنّـه
قالوا اخوانه تـرا منّـا بمنـك ولا انـت منّـا=يفرق الله بيننـا و بينـك عسـى مالـك مظنّـه
لك ثلاث ايام من ذلحين و ارحـل مـن وطنّـا=عقبها تخطر علـى راسـك مضاريـب الاسنّـه
ودّع مريتـه وتـو بنتـه صغيـره مـا تحـنّـا=توها ام اربع شهـور و فـي لحمهـا زود لنّـه
ركب غوجـه و انقلـب قبلـه بليـلٍ مـا تونّـا=والحمايا مـن خلافـه ارخـوا حبـال الاعنّـه
المطايـا و السبايـا مــن خـلافـه عمـدنّـا=والمنايـا سـجّـدٍ قــدّام عيـنـه يحتـرنّـه
كل ما عنّـز علـى قـومٍ وطـن الـراس طنّـا=قالوا اذلف ذابح امـه لعـن ابونـا لـو نحنّـه
ذابـح امّـه لـو زبنّـا عـدّه انّـه مـا زبنّـا=لعـن ابـوك بيـوت قـومٍ ذابـح امـه زبننّـه
الجمالـه مـا تجمّـل فـي ولـد حـرٍ تـدنّـا=ميـر دوّر غيرنـا وانحـش بقلبـك لا نـدنّـه
وانقلب من عندهـم كنّـه علـى محمـاس بنّـا=يمّة اهل الغـوص عجـلات الركايـب وجهنّـه
ركب بابـور البحـر و دمـوع عينـه يذرفنّـا=فـوق خـدّه كنّـهـن اذواد بــدوٍ مرثعـنّـه
يـوم حـل الليـل اشرعـة السفينـه دودلـنّـا=والهبايـب مـا يخلـن محبـلٍ مـا دودلـنّـه
قـام ربّـان السفينـه قـال: يـا نـاس امتحنّـا=قوموا ادعوا ربكـم عـلاّم مـا وسـط الاجنّـه
قـال شيـخٍ منهـم الا عنـدي الـراي المطنّـا=ضحّوا بواحـد عسـى الله ينقـذ ايديـنٍ رجنّـه
و طاحت القرعه على اللي ذابح امّـه مـا تتنّـا=ثم رموا بـه فـي ظلمـات البحـور المستكنّـه
و ادبحوا عنّه وهـو فـي غبّـة المـوج يتثنّـا=ثم عرض له من وحوش القرش جرجورٍ و صنّه
عض جرجور البحر ساقه و صايـح و استجنّـا=ابك لولا الله كـلاه القـرش مـا يسلـم مطنّـه
وفي ديارٍ من بـلاد الهنـد بيـن انـسٍ و جنّـا=من فضل ربي عليه اطراف الامـواج احذفنّـه
ومثل ما قبل امـس متهـومٍ بذبـح امـه معنّـا=اتهمـوه بذبـح سلطـان الـبـلاد المطمئـنّـه
و في السجون المظلمه خمسة عشر عامٍ قضنّـا=مع ثلاث مـا قضـنّ الا عقـب حالـه قضنّـه
لا سمع ورقـا تغنّـي جـرّ مسحوبـه و غنّـا=وكل مغنى يزعجه غصـبٍ يجـي تاليـه ونّـه
ولا طرته بيـوت قـومٍ فـي الخلايـا يرفعنّـا=دار دولاب الدبـا الدالـوب دولابـه و زنّــه
وكل ما برقٍ سرى شرقٍ صـدوق الغيـث شنّـا=كـن قلبـه فـوق سبـق طيـور بـرٍّ شطرنّـه
عقـب مـدّه جـاه مـن داره نذيـرٍ مرثعـنّـا=قـال انـا جيتـك بعلـمٍ والله انّـه والله انّــه
حرمتك ماتت لهـا عشـر سنـواتٍ قـد ظنّـا=والبنيّـه معمـسٍ تقـرع عليـك قـراع شنّـه
عمّها عـزّر بهـا فـي وسـط بيتـه مـا تهنّـا=خادمـة نسوانـه الثنتيـن و الـلـي ضيفـنّـه
ثـم زوّجهـا لبـو سبعيـن عـامٍ مـا انقصنّـا=شايبٍ يطرب خفوقـه لا سمـع للقـرش رنّـه
يوم سمع هروجهم فاضـت عيونـه و ازحرنّـا=وسط سجنه كنّّه اللي ساكـنٍ لـه فـي مجنّـه
قال يا ربعي افزعوا لي مـن سجـونٍ غيضنّـا=و قبر قلبـي الدمـدم آغـادي يديكـم يظهرنّـه
قالوا انّـا وش لنـا انّـا والله انّـا مـا شحنّـا=غير بنتك والاّ مثلك مـا بقربـه بقـرب جنّـه
وانتحـوا وعيـون قايدهـم جـنـوبٍ خايلـنّـا=وهـو ورا سجنـه عيونـه كـلّ نجـمٍ خايلنّـه
وعقب عامٍ من مجيْ ربعه و سـنٍّ عـض سنّـا=اعفوا الكفّـار عنّـه مـن عقـب سـودٍ دهنّـه
يوم فكّوا قيـد رجلـه وانطلـق خاطـرْه منّـا=و انفلت يبغـى ديـارٍ مـن ورا نجـد اشحننّـه
حثّ ساقـه مـا يشـوف الا بنيتـه يـوم قنّـا=من عقب عشرين عامٍ في وطـن قـومٍ مصنّـه
ومن ردى حظه نهار اغضن عيونـه وارقدنّـا=فزّ من نومه عقـب عضّـه حنـش دابٍ بسنّـه
ومن اثر سم الحنش يونـس ضلوعـه يطبخنّـا=و طاح عزّي لواحـدٍ سـود الافاعـي طيحنّـه
يـوم اهـو فكّـر ولا فوقـه نجـومٍ يبرقـنّـا=وشاف بكيـة بنتـه اللـي جـاء يبيهـا بينهنّـه
قال يا نجوم السما تكفين روحي صـوب اهلنـا=علمي بنتي عن اللي صـاب ابوهـا واستسنّـه
اشهد انّا مـا بحلنـا فـي الليالـي اشهـد انّـا=مير حظي خانني ثم مـات مـا بـه مـن يقنّـه
ذاك وجده وجد حالي فـي وطنّـا مـن عطنّـا=من هنـوفٍ خدرهـا بيـض الهنـادي يحتمنّـه



:
:


ياللي على شان شـيٍّ فـوق منديلـي=زعلت !! تحسب يتيمة دمعتي حُمـرة
اركد وعن رقـم خطـي لا توصّيلـي=راجع شفاهك وتلقـى فوقهـا النمـرة
لا يا بعد ما يقـال وبعـد مـا قيلـي=حبك غمرني وغمـرة حبكـم غمـرة
يا ويل ويلي عليك ومنـك يـا ويلـي=لا حجّـةٍ دلّهـت عنكـم ولا عُمـرة
الطرف لا شفت هاك الطرف باديْ لي=يا هوّ سكران يا مخلوق مـن خمـرة
طرفٍ بلا صوت يدعيني ويدعي لـي=وانفسي اللي سبـب دعوتْـه منْدمْـرة
والرمش لأغضى هَدَبْه الأسود الليلـي=يا موت, يا إن ملاك الموت تحت امْره
رمشٍ بلا يدْ يصافحني ويومـي لـي=سبحان من سلّّ سُمره من سنا سًمْـرة
أسود سـواده بـلا كحـلٍ ولا مِيلـي=كنهّ خذا من سبيـب عْبيّـةٍ ضمْـرة
في غير خدك يملحق حيلتـي حيلـي=ما اذكر إبِه تمرةٍ خاوت على جمـرة
يا جمرةٍ فوق صافي الخدّ عزي لـي=يا لعنبوك احرقيني وارجعـي تمـرة
و... ليـا ذبّـت الشيلـة يلبّـي لـي=يطمر عدامة حشاي وطمرتـه طمـرة
دامه لحاله فأنا عـن ذبحـه مْشيلـي=أحـبّ ذبـح (,,,,,) زُمْـرةٍ زُمْـرة
من مرّ ما شافكم يـا لابـس النيلـي=ما فات نصْ عمره ألا فات كلْ عُمـره



:
:



تقول خير منيـن بالله يجـي خيـر=وانا معك قضيت عمـري بلاشـي
اصبحت مثل اللي مراده لبن طيـر=وانا مرادي بوسـة وانـت ماشـي
عنك ارفع الكفين حشمـة وتقديـر=شيمة حرار مـا تـرب العشاشـي
ولا فانا المجنـون حكمـة وتدبيـر=وقبلك جلابيب الرعابيـب شاشـي
لو ودي افعل ما فعل سالـم الزيـر=والله لاخيط مـن جديلـك فراشـي
لا شك ابيها منـك فزعـة مناعيـر=ووصل الاحبة ما يجـي بالهواشـي
فكان المراد انساك ياصاحبي طيـر=والله لاموت وعلتك وسـط جاشـي
كل شي الا نسيتـك يمكـن يصيـر=لو جابـت الناقـة ثلاثيـن حاشـي
لولا دموعي فيك ما ترجـع البيـر=وللغيث ما ينشي على نجـد ناشـي
بالله كيف انسـى هذيـك النواويـر=وسود العيون المسكرات الغواشـي
ولا ثنـيـن قطـعـن الازاريــر=ومن الحريـر يصيبهـن ارتعاشـي
ولا ثنيـن مثـل بيـض القواريـر=شفت ازرق الما بينهن يوم طاشـي
ولا ثنيـن يفضـحـن الحمـاريـر=حمر الطعوس اليا صبغها الرشاشي
ادخل على الله مانت مضبوط يصغير=ولا فكيف انسـاك وانتـه معاشـي
وان لمتني يا وش بقى عـاد للغيـر=الغيـر واجـد والملامـة بلاشـي

:
:



وين أسج وكن في جوف الحشا شيخ ٍينادي=لابغيت أسج عن حلو المحيـا قـال هيّـد
يا كثر ما قد عرفنا من العذارى يابن بـادي=مير قلبي بسلك صفرا مع هل الفيضه متيّد
ويل ويلي لوتشوف خدودها بيضٍ تشـادي=قشطةٍصبوبهـا ذوب المربـى ياعـويّـد
والمبيسم سكر دقـوه مـع نكهـة زبـادي=من يشوفه قبل لا يبدي هلال العيـد عيّـد
والنواهد واقفـاتٍ كنهـن عسكـر بـلادي=او كنيسة راهبٍ من حـب ياقـوت تشيّـد
لامتى ذبح البشر عند العيون السود عـادي=لا متى والموت حدر رموشها السود يتصيّد
والحواجب سيفهن ما يطعن ألا في الثنادي=آمـراتِ ناهيـاتِ جازمـاتِ مـا تحـيّـد
والجدايل فوق عاتقها بياض مـع سـوادي=تقل عبدٍ قام يومـي بالمهفـه فـوق سيّـد
لعنبوها يوم هزت ردفها عاشـر وحـادي=كن قدمها من ثقيل الردف لا سارت مقيّـد
والنحر كنّه فيافـي رقـة ًفيهـا حمـادي=فوقها لبّى الملبّي وأجهم الماشـي وسيّـد
والخصر لميّلتبه حيـة فـي جـوف وادي=يا وسع باله على عظم على ردفـه تعيًـد
فيه لا منه مشى هيبـة مفـرّج والمهـادي=من يشوفه يلعن ابو خامسه لو كـان جيّـد

:
:


ان قلت سولف يسولف لي بتسبيلـة=وان قلت بالله يقسـم لـي بسلهامـة
يا ويل حي تولـع فيـه يـا ويلـه=كم من شهر مرّ لا صامه ولا قامـه
حي يشوفه وشاف الرمش يومي له=ادخل على الله كيف تشيله عظامـه
من ناعس الطرف ذباح العرب غيلة=كم واحد صافح المـوت اول ايامـه
خّلى بياضه بياضي عبد عّـزي لـه=بسْ ما عليّه حـلاة الخـد بالشامـة
طفل وتوه صغيـر السـن ياحليلـه=يا ميت يا ميت مـن يلقـاه قدامـه
توْه يسالم على الترويض باقـي لـه=في عالم الحب زرفالـه ودرهامـة
يمكن بعـد ليلتيـن ويمكـن الليلـة=بس اتأكد واشوفـه شـق هندامـه
يا وش يهمه وانا ما نيب من جيلـه=من عام الاول وهو ريمٍ وانا رامـة
حياة من لا عشق شرواه وش هي له=لا وا خسارة يليلٍ مـرّ مـا نامـه
عليه كفـي يحفـر القبـر ويهيلـه=واخالط الناس بس عقـال وعمامـه
لو بيـن مـزّة وتعميـرة وتعسيلـة=يا وين انا والورق والنرد والدامـة
سيد العذارى يوصّي لي واوصّي له=وقبلي خواله عليه توصي اعمامـه
وان ذبت انا فيه قبلـي ذاب منديلـه=ولو ذاب حتى عليه الثوب من لامه
ومن يفتتن به ترى مااحد يراعي له=فتنة هل السبت من قامه ومن هامـه
مفتون في طفل توّه ما لبـس شيلـة=اجل وش يصير بي لو كمّل اعوامه


وللجمااال بقيه

.

[الديـــم]

.
.

ولّي خلوجٍ علـى سمـرا فَمِـي تـرزم=كـلْ هـمٍّ اقفـى تـردّه جـاي وتْعَزمـه
اوّل زمانـي وانـا همّـي ثـمـان ارزَمّ=واتلى زماني وكلْ رزمـة مِيَـة رزمـة
من شطّ (قزوين) اجاوب شاطي (القلـزم)=واطراف ريشي بعـوق سْبـوق منْلزمـة
يا ساق لو صيّرك حذف الطغـاة احْـزَمّ=غيرك عرب وانت عودٍ من عَرَضْ حِزمة
وقتٍ تمرسـل قفـا علبـاي كـود ابْـزم=وانا متـى مـا بزمـت البزمـة البزمـة
فياللي تراني (قزم) عيني تـراك (اقـزم)=ومن آهَلِك مـن تعـوّض قربـك بْكَزمـة
عن (موميا مصر) بحثي في (حصا زمزم)=وعلم(الجَبِـر) دارسٍ قبلـك خـوارزمـه
ما احدٍ عن (الشُبْط) ينشد (كنّـة المـرزم)=لا قـد تخـاون ولا جـاء بينهـن لِزمـة
يا سعود من كلّ ذو عـزمٍ نبيـك اعْـزم=واحرص ماكلْ عهدٍ بْه اعْـداك ملتزمـة
وان شفت لك حازمٍ مسّ الحـزام احْـزم=خبلـك لمـا تحتـزم والقـوم محتزمـة
الحرّ يغضب والى شـاف القهـر يجـزم=والعبـد مـا حسّتـه قولة:علـى جزمـة
يا سعود مـن لا نِصَـرْه الله يبـى يهـزم=وصيّور منْتَصْـرِةٍ يـا سعـود منْهزمـة
اعزم والى مـا عزمـت ايّـاك تستعـزم=خلْ ردّها في اكبرٍ ما هوب فـي عِزمـة
ما لازم الاّ ويجيـك الصبـح منـه الْـزم=ومن آهَلِك من عـدوّك شـدّ بـه عَزمـه
كم خشم لـولا خشـوم ربوعـه بْيِِخـزم=يأمن وهو يـا كثـر نـاس تبـي خزمـه
ما كلّ رجلٍ طعَم هرجـه حلـو محـزم=وحلو الحكي في الشدايد ما يفـكّ ازمـة
من دون قولـة (نِعِـم) سبعيـن مستلـزم=ما استلزم الفعل في( نصبه) وفي (جزمه)
:
:
:

علمـوا ياسـر بسلـم كـذيـا لا يحـلـم=ماخبرنـا صـار سلـم بـلا حـرب ودام
من متـى والسلـم يوخـذ بتوقيعـة قلـم=يا دعاة السلـم شـدوا محازمكـم شمـام
كـل سـلام جـا بقرطـاس لـذة محتلـم=والسلام اللي كذا اسمه سـلام ايـة كـلام
مثل من هو يطرده مثل مـن يطـرد وهـم=مثل من قرب سحلته يبـي حلـب الحمـام
من يبي سلم بـلا حـرب بيبطـي عظـم=السلام بحربة الرمح الاشهـب والحسـام
سبحانك اللهم محيـي بـن آدم مـن عـدم=نطفة ثم مضغـة باللحـم تكسـي العظـام
صرخة يهتز مـن هولهـا سـور الحـرم=صوت الركـن اليمانـي وجاوبـه المقـام
العـذارى تغتصـب والعفـايـف تتـهـم=لعنبونـا اللـي ولا واحـد شمـر وقـام
كم وكم عذرا عـلا صوتهـا (وامعتصـم)=بس ما كل معتصـم معتصـم ولا عصـام
معتصم آخر زمن معتصـم بـس بالاسـم=لقبـوه المعتصـم بـس لكثـرة لاعتصـام
امة شفنا بهـا الـروس توطـى بالجـزم=سالفتهـا عـودت سالفـة بنـت الحـرام
امة من سور صنعـا الـى بـاب العجـم=مجدها يعيده لها طفـل فـي سـن الفطـام
امـة تعدادهـا فــاق تـعـداد الامــم=وللاسف في وزنها ما تجي واحـد جـرام
كونوا من مجلـس الامـن للعالـم صنـم=فاتخذنـاه(و)الاه(ن)فـحـل الانـتـقــام
يا عرب آخر زمن يا حـواس بـلا جسـم=من عـذر كـل توطاكـم اطيبكـم خمـام
يا شعـوب ميسـم الـذل واسمهـا وسـم=فـي شعـوب ابنائهادقـت الذلـة وشـام
شكلها واحد تبـي مـن خـلاف او قـدم=قرب راس من ذنب قرب خف من سنـام
لعنبـوه الـذل خلـى مـن السـادة خـدم=العمـام هـم العبيـد العبيـد هـم العمـام
هيه يا مهدي هل القـدس معزوفـة نغـم=منه جايبنا ورا الاانـت واشكالـك حـرام
لا تقل (نحن العرب) قل (اجل نحن الجلم)=واثنها (نحن البهم) لجل اقلـك يـا سـلام
كنت اقول الذيب لا يمكن ان يرعى الغنـم=لين شفت الطفل (ياسر) بحضن (اسحاق)نام
:
:
:

توّ ماجيتـي وخلّيتـي العاشـق وطـي"="كيف لو ترخين عن نور خـدّك برقعـه
والله انّ الزين غيرك ولو زان خرطـي"="لو كبر مثل اربعه نقّصوا منهـا اربعـه
ياهنوف الروح ممـا عطـاك الله عطـي=عاشق كل مابغى يذكـر اسمـه ضيّعـه
احمر التفّاح والا مـن الحلـو اصفطـي=لمخطوف من عظم فرحته عضّ اصبعـه
واقلطي في مجلس الصدر يا بنت اقلطي=لعنبو من لا فرش لك من الصدر اضلعه
وفي بساط من حنايا ضلوعـي بسّطـي=مجلس ما نجتمع به لابـو مـن جمّعـه
ونشّطي روحي بذايـب أنينـك نشّطـي=قالوا ان الميت يحيى عقب مـا يسمعـه
ورقّصيني فوق خصرك وهدي وامغطي=ويش فيها لالتوى والتـوى قلبـي معـه
واعصري لي من قراح الشفايف واخلطي=زنجبيـل سلسبـيـل علـيـل منبـعـه
واكتبيني كلمة فـي ثمانـك واشخطـي=وكان جرحي مابرى عقبها وش ينفعـه؟
مابغيت آصدّق اني معـك رايـح وطـي=لين شفت العين ترسمـك ظـلّ وتتبعـه

:
:
:

ليلةٍ ما بيـن مسفـر وابـن عمـه مقيـم=العرب من هولهـا صلّـوا المغـرب عصَـر
يـا مِقِيْـم ابسألـك عـن مُقـيـمٍ مستـديـم=ما ذكر في يوم صلّـى صلاتـه مـا قصَـر
ووش وزيرٍ فاق في سلطتـه سلطـة زعيـم=وهـم رعايـا الدولـة الواحـدة فيمـا ذُكِـر
يـا مقيـم ابسـألـك راحــلٍ والا مقـيـم=قـال :ألا راحـلٍ قلـت: وان قلنـا: صبَـر
قال: ما بـاقِ ألا أنـا قلت:وافهـم يـا فهيـم=قال: بإيدي لا بيدْ عمـرو يـا شاعـر مُضَـر
لي عـن أهـل الخيزرانـة صـراطٍ مستقيـم=قلت:بـرّ وقـال: ألا بحـر وامحـق بـحـر
غصن زيتـونٍ للاطيـار مـن فوقـه رنيـم=باترك الورقـا تغنّـي عليـه :اسمـر عبـر
ولا تعيش الرمّـة الا علـى الشـيّ الرميـم=كالطيور اللـي علـى اشكالهـا توقّـع حـدر
النوَر تشبـه بعَـض والطبايـع (سيـم سيـم)=ولـو تغيّـر اسمهـم .. النـوَر تبقـى نـوَر
ولو بهم واحـد فقـط مـن طبايعهـم سليـم=كان ما صار اسمهم _عندأهـل مصرٍ_غجـر
احمد الله ضربتي ما تجـي الا فـي الصميـم=وكلمتـي وحـده ولكنّهـا تـسـوى عـشـر
قلت:وسّـع خاطـرك خابـرك دايـم حليـم=مـا تهـزّك كلـمـةٍ جابـهـا وجــهٍ ودر
الحليم اليـا سمـع هرجـةٍ جـت مـن لئيـم=ابتسم .. وشلون أجل لا سمعها مـن بـزر!!
انتبه تزعـل . تـرى أسعـد أيـام الخصيـم=يوم يلقى للزعـل فـي وجِـهْ خصمـه أثَـر
ب(جاه ربي) باطلبـك ثـمْ بجـاه بـن اليتيـم=قـال كـلا ألـف فـي ألـف كـلا لا وزر
يـا مقيـم أرجـوزة البغـي مرتعهـا وخيـم=وقبّـة الطغيـان مهمـا علَـت ترجـع قبـر
قال:سين (انت ابن من في الرجال) وقلت :جيم=( ابـن مـن لا أنجبـت حُـرّةٍ مثلـه ذَكَـر)
لي مـن الأمجـاد مـا فـاق آفـاق السديـم=ولي مـن الطـولات مـا لا تطاولهـا بشـر
قال:طيّب .وش تبي في شرابٍ مـن حميـم؟=وكلّ قـدٍّ مـن قبُـل صـار قـدٍّ مـن دبُـر
وش تبي في خمّةٍ سمّـت الباشـق .. عديـم=لا نخوا سلتوحهـم جـاك مـا صـدّق خبـر
يا مقيم أدري بكـلْ شـيّ انـا مانـي غشيـم=وادري ان اسمـي لهـم صايـرٍ علّـة نحـر
وادري اهل الكهف هم نفسهـم أهـل الرقيـم=بسّ مالي مـن ورا كشـف عورتهـم أجـر
عـورةٍ لـو خيّطـوا فوقهـا سلـك البريـم=بيّنـت كالشمـس والساعـة الوحـدة ظهـر
من دعى لـه والـده بيـن زمـزم والحطيـم=ما يهمّـه سيـل أهـل الحسَـد مهمـا كبـر
ما انقطع لي في (هوازن) وصَلته في (تميـم)=ولا يمـوت احـدٍ ولـه كاتـبٍ ربـي عمـر
القهر ما هـوب هـذا .. ابـك والله العظيـم=ما مثل قهر الرجُـل مـن بنـي عمـه قهـر
كـم ولـدٍ عـمٍّ لـو آجيـه ظميـانٍ سقـيـم=مـا سقانـي شَرْبَـه ولـو ترجّيتـه شـهـر
احمد اللـي عزّنـي مـن وانـا ورعٍ فطيـم=عـن مثـل هـذا وعـن كـلّ مبـدولٍ غبـر
اقطـع الفرجـة لحالـي مـع الليـل البهيـم=يوم ولد اللاش ما فاخت أمّـه لـو .. شبـر
للهمـم ربـي خلَـق _يـوم يخلقهـا_ هميـم=وللقمم يصعد من القـوم كـلْ صاعـد نظـر
بالألف والـلام والميـم لـي صـوتٍ رخيـم=يوقـظ النايـم قبـل يـذّن الـمـذّن فـجـر
شرهة (الروح بن مريم) على (موسى الكليـم)=والردى في أهل الردى لا تـدوّر لـه عـذر
حسبي الله في رجـالٍ مـن الداخـل حريـم=وضعهـا دايـم خطيـرٍ ولا منهـا خـطَـر
مثل ابو وجهين ما شفـت فـي العالـم عقيـم=لا انكشف أفلس مـن اثنينهـا بطـن وظهـر
يا كثر ما جنّةٍ فـي الأصـل كانـت جحيـم=وكم كسر سـاقٍ إلـى زاد عـن حـدّه جبـر
ما لنـا ألا الظاهـر .. وبالخفايـا الله عليـم=سنّـة الله ليـن يـذن حمـارٍ فـي هجـر
ويش ترجـي مـن عتـلٍّ بعَـد ذلـكْ زنيـم=ما يطيـب ولـو تشيلـه علـى متنـك دهـر
ووش لـي بهمـاز لمّـاز مــاشٍ بالنمـيـم=مع كثر ما يسرح الصبـح مـا ضـوّى بعَـر
حالـفٍ مـا دام لـي راسٍ يـشـمّ النسـيـم=ما اتلحّق مقفـيٍ لا بِ(خيـر) ولا بِ(شـر)
جاهلٍ من يحسب (القدس) هي نفس (أورشليم)=كالسهل عكس الصعوبة وهو عكـس الوعَـر
هيه لو صيد (البواشق) مثل صيد (الظليم)=شفت في (البومة) عوَض واحدٍ ضيّعْ (صقر)
لا وسيـم ألا وسيـم السجايـا يـا وسـيـم=والفقـر فقـر المراجـل إلـى قالـوا فقـر
والدميـم الصـدق ياللـي تقولـون الدمـيـم=واحدٍ يفخـر بماضيـه والحاضـر (صفِـر)
مَن يزاعل صاحبه لجْل يِرْضي خشـف ريـم=لا تثق به لو فرَش لك علـى السكّـة زهـر
ما انقطع رزقي ولي فـي السمـا ربٍّ كريـم=ولا يضيق بي الفضا ولي عيون ولـي بصـر
من أقام النـار فـي يابـس العشـب الهشيـم=قـادرٍ أن يخـرج المـاء مـن حصبـا قفـر
كيف نشحذ والسما غيمهـا مـن فـوق دِيـم=عيب والله عيب والشمـس مـا معهـا قمـر
ما يضيم بـن آدمٍ مثـل ضيـم الحـظّ ضيـم=من ردى حظه وهـو مـا بعـد سـار يْعَثُـر
عزّتـي للـي سواتـي علـى وجهـه يهيـم=لا معـه حـظٍ يعينـه ولا عـنـده ظـهَـر
قلت مـا لا قالـه العـود (لقمـان الحكيـم)=بالشعر .. بسّ أنّ حظي صفق بي في حجَـر
وغيري اليا قال كلمة ولـو هـي حلـم نيـم=اكتبوا لـه مـن عظيـم الثنـاء مْيَـةْ سطـر
ورغم هـذا مـا تشائمـت والحـادث جسيـم=في رجـا نصـرٍ مـن الله ولا غيـره نصـر
من (خميس مشيط) ثمْ من (تبوكٍ) في (القصيم)=يـا كثـر مـا طـال ليلـي عليّـه يـا كثـر
غربةٍ تحت السمـا .. غربـةٍ تحـت الأديـم=غربتيـن مــا لابــن آدمٍ منـهـا مـفـر
ما نوفّي ربـع معـروف عـارف يـا مقيـم=خلّ عاد إني اجحده !! والوفا عـوده خضـر
قد حفظنا حقّ جربوع فـي العصـر القديـم=فكيف ما نحفظ لذي الحـقّ حقّـه يـا بشـر
ديننـا فـي صْحِيبنـا ذلـك الديـن القـويـم=ما نجي مع غِرّتـه يـوم ولـد الـلاش غِـر
ربّنـا لأهـل الوفـا حطّنـا جـنّـة نعـيـم=وللردى واهل الـردى حطّنـا مـوتٍ حمـر
بسمـك اللهم ذي الطَـوْل رحمـنٍ رحـيـم=لا تخيـب واحـدٍ طـقّ لـك بإيـده صـدر
طالبـك يالله فـي كــلّ شيـطـانٍ رجـيـم=منـه لا تبقـي عليهـا جـنـود ولا تَــذَر
يالله انـك لا تخلّـي علـى الدنـيـا ذمـيـم=ويالله أنـك تلعـن اللـي إلـى قفّـى غـدر
يـا مقيـم اليـا اجتمعنـا نديـمٍ مـع نـديـم=مَن بظنـك يربـح .. ومَـن بظنـك بِيْخَسَـر
وجاه من أحيى بِ(غَيْمٍ) ومن أهلك بِ(غيـم)=غيـر ركعـة تالـي الليـل مـا شـيٍّ يسُـرّ
فـي نهـارٍ ساعتـه مالهـا حــدٍّ و قـيْـم=لا انتصب منها صـراطٍ علـى حفـرة سقَـر
لا نجى سـاق السليـم وزلَـق سـاق الأثيـم=يـا جنـانٍ خضـر يـا ذات ألـواح ودُسُـر

:
:
:

علم والا حلم يـا قلـبٍ حشـاه عويـد سمـرة=كـنّ مـن بيـن اضلعـه جنّيّـةٍ تصفـق يداهـا
قلبي اللي من سطر مابه تقـل غاشيـه خمـرة="يوم فيه قلوب شـق الثـوب مـا كـدّر كراهـا
قم يمانع فوق وجْناً من خيـار الجيـش ضمْـرة"=وصف شقـرا ربّهـا دون المليحـة مـا نحاهـا
بنت هرشٍ كنّ قـرن العامريّـة وصـف وبْـره"=وكنّّ نيبـان السبـاع الضاريـة تنهـش حفاهـا
ابن مدعث لجل عينـه نقـرن الحجّـة بعمـرة"=ابن من همّل مجاهيمـه علـى البصـرة وجاهـا
لا تحسّر دام باقي في صليـب الـراس قُطْـرة"=يا ابن مدعث والضلوع العوج داها فـي رداهـا
لا وربي ما نقلنـا السيـف ابـو حدّيـن بطْـرة"=كود لعيـون الصبـيّ الدوسـري نطعـم شباهـا
يا ابن مدعث ما نلومك في الهوى لو شفت عُزْرة"=الهـوى قبلـك غدالـه بأمّـةٍ بِيْـضٍ لحـاهـا
ما أطال النوم في عمر الفتـى المكتـوب فتـرة"=والسهر ما قصّـر اعمـارٍ كتـب ربـي بقاهـا
زمّ نفسك والهوى سكرتْه عـن مليـون سكـرة"=لو حصل منها سلامة ويـن تسلـم مـن نماهـا
نركض وتركض وما نجمـع بأيادينـا نِخَسْـره"=الليالـي دوْل والدنيـا رحـول اللـي مشـاهـا
تالي الدنيا يخالـد حفـرةٍ فـي جـوف حفـرة"=نطـرد الدنيـا ولا نفـرق خطاهـا مـن قداهـا
هيّ وش هي؟ هيّ من هي؟ هي ثمانٍ كان عشرة"=البواشـق قرنسـت وام الكبـايـر ذا جـزاهـا
مير اخذ من دنيتك (صاحب) و(بارودة) و(خفرة)"=زبـدة الدنيـا ثـلاثٍ عانهـا واتـرك سـواهـا
اترك اللي يطـرد الدنيـا يبـي عـزٍّ وشهـرة"=كيف يبغاها تعـزّه وهْـي مـا عـزّت ضناهـا
يا ابن مدعث لو عرا جسمك بمشلحهـا تغمـره"=لا لقت غيرك تِحَذْفك حذفـة الجاهـل حصاهـا
رايعت من لا بنى مـن شامـخ البيتيـن وكـره"=ولعوزت كل ابن حـرٍّ بـأوّل الهجـرة عطاهـا
وصفنا وصـف ثْمَـرَه والزيـن فـلاّحٍ بغمـره"=يعتنيها وان حداه الجوع ما اسـرع مـا كلاهـا
يا ابن مدعث لا رعت بين الجهام السود عفـره=حاجةٍ تقضي عقب سن الصبا وش هو قضاهـا؟
ابعـد الله دار مـن يبعـد ثنيـنٍ كـان قصـرة=امّـة لا شافـت الشمـل اجتمـع جاهـا بلاهـا
لا سقى الله فيضةٍ فيهـا سميـن الصيـد قُعْـرة"=كل دِحْـلٍ واجهـوا بـه حيّـةٍ تلحـس جماهـا
عزّتي للي بقـى بينـه وبيـن المـوت شعْـره"=روحه اقرب للمنايا السود مـن حذفـة عصاهـا
طال وقتك يا ابن مدعث بين لا تطريـه واطْـره"=حيّ ابو مجناك وين الله شلع بـك فـي فضاهـا؟
شدّها من خدّها واقطر علـى المركـاز صفْـرة"=والحمى ما احدٍ حماها كـان ربّـي مـا حماهـا
انت مثل اللـي يـدوّر للوسايـد وسـط خُبْـرة"=وخُبْرة الروض ايتحمّل ما يجيـه اللـي رباهـا
نقطن الواد المخيف ونضـرب البيـد أمّ جُفْـرة"=لعنبو بعض البني يـا مـا لحقنـا مـن هواهـا
ما لقينا من يقول: ابطـى بهـاك السيـل كُبْـره"=طالت المـدّة وخالـد فـي رجـا دورة رحاهـا
الوجيه البيـض سفْـرة والوجيـه السـود ودْرة"=وجثّةٍ ما سرّت الصاحب علـى ويـش انغذاهـا؟
هيه ياللي في فؤادك من عسـام الوقـت نفْـرة"=طالت الدعوى ولا ادري وش حجَلها من قطاهـا؟
آخر المنصوب فتحة وآخـر المجـرور كسْـرة"=حطّهـا نـذرٍ علـيّ انّـي لأليّـن لـك قساهـا
واجمع اوّل حرف من كل بيت تلقى بيت شطْره"=عقّب اللي مزنته مـا يـروي العطشـان ماهـا

:
:
وللجمااال بقيه
.
.

[شارد الذهن]

ديوااااااااان رائع جدا للشاعر ناصر الفراعنه

الف شكر لك على المجهود الطيب يالديم

تقبلي مروري

[شجاع العتيبي]

صح لساان الشاعر ناصر

قصائد في غايه من الروعه

الف شكر لك الديم على نقل هالديوان الراائع والمجهود الطيب

[الديـــم]

.
.

الشارد

ألف شكر لمروركـ العذب

تقبل تحياتي وتقديري

.

الديــم

[الديـــم]

.
.

شجاع الثبيتي

صح بدنكـ

وألف شكر لمروركـ الرائع

تقبل تحياتي وتقديري


الديــــم

[فيصل الفيصل]

الديم استاذه رائعه كبيره متميزه


انتى اخترتى على من اعلام الشعر والشعر الفرعونى لم سطرت مجلد مدح لا يكفيه ولا يوفيه حقه


وما زاده رونعق وجمال انك انتى يا استاذه من تكرم باتحافنا بهذه الروائع

لا هنت وصح لسان نا صر الفراعنه وصح لسانك ولا هنتى


فيصل الفيصل

[الجوهره]

صح لساان الشاعر ناصر

مشكووره الديم على نقل هالديوان الراائع والمجهود الطيب

[فيصل الفيصل]

يا كثر بدلياتى يالديم سامحينى لا هنتى

[نــجــم]

ديوااااااااان رائع جدا للشاعر ناصر الفراعنه

الف شكر لك على المجهود الطيب يالديم

تقبلي مروري

[الديـــم]

.
.

الفيصل

الف شكر لمروركـ الرائع وكلماتكـ الجميله وذوقكـ العالي الرفيع

وشكراً لكـ مليووون مره

وصح بدنكـ والله لايهينكـ

تقبل تحياتي واحترامي

الديـــم

.._

[الثريـــا]

الديم
:
:
ديوان متكامل للرااائع الفراعنه
شاعر كبير لايستهان بشاعريته ابدا
:
مجهودك يضاف الى دواوين الشعراء هنا
ويتوج بالشكر والتقدير لشخصك الراقي
لك تقديري ولي عوده مراااااااااات
لقراءة الفراعنه ...

[{.تخُفي غلآإهُـآإ ..!]

صح لسانه
ديوووان راااااائع
ولاهنتي ع هالمجهود الطيب
يعااااااااااافيك ربي يالغاليه

[شيهانة نجد]

ديوااااان بمنتهى الروووعة
شاكرة لك أديبتنا .. لمساتك دائما مميزة
تقديري ,,

[ذيب الليالي]

شكراا على المجهود الرائع

[الدلوٍوٍعه]

ديوان رائع لشاعر مبدع
صح لسانه مليوون ولاهنتي ياالديم
يعطيك العافيه ع هالمجهوود

[الترف اللعوب]

لاهنتــــــــــي يالديم ويعطيج العاااااااااافيه على هالمجهووووووود....

وانا سويت كوبي من شان اقرااهم على راحتي ومااكون مشغوووله بشي ثاااااااني.....


تسلمين ويسلملي شااعري المفضل والله يخليه لنا ........

تقبلي مرووووووووووووووووووووري

[الحــلا كله]

http://www.up7ml.com/upfiles/lnB46711.gif (http://www.up7ml.com/)

[انسياب الفكر]

شكرا يالديم...

والفراعنة شاعر جميل وقصائده تدل على تمتعه بالثقافة الواسعة وفيها طريقة لايتقنها الا ناصر...

[سـعـود]

صح لسانك يابو فارس مشكووووووووووووووووووووووووووره الديم

[ملاكــ]

صح لساان الشاعر ناصر

قصائد في غايه من الروعه

الف شكر لك الديم على نقل هالديوان الراائع والمجهود الطيب

[سعود السبيعي]

الديم مشكووره وما قصرتي


الله على الشاعر العملاق
وعلى فرعون الشعر
وعلى شاعر مضر


انت يا ابا فارس ممتع وشاعر كبير


صح الله لسانك ..


اخوك/ سعود السبيعي

[محمد الميموني]

ـأنتقــاء في قمة ـإلارتقــاء

لشاعر الثقلين الشاعر/ ناصر الفراعنه

":":" الديــمـ ":":"

ـإهنيك ع ـإختيارك الجزل وتسلم يمينك

الله يعطيك العافيه

تقبلي تحياتـ ودمتٍ ـي وخالص ـإحترامـ فالوجود ـي

[جهز العطاوي]

يعطيك العافيه يالديم

مجهود راااائع ,,, وصح لسان الشاعر

[هوى روحي]

الـعـيـون مسـكـتـه والــخــدود مـسـكـتـهياسـلام الياكـشـف وان تغـطـى يـاحـرام
لا بغـيـت اوصـفـه جــت لسـانـي عـكـتـهكل عضو من حبيبـي يقـول اسكـت ونـام
من يشوفـه مـات جـن الهـوى مـا فكتـهكيف اجل لوهو يشوف اربع حدر اللثـام
جـــادل لا شـلــح الـثــوب داخـــل دكـتــهما بقى جدار من البيت ما صلـى وصـام
فتنـتـه مــن ضحكتـه,الـف عـــام بـكـتـهاقطع من السيف وآرق من ريش النعام
مـن توصـت فـيـه روس الاسـنـة وكـتـهوش عليـهـا شـيـخ ولا بـعـد تــوه غــلام
من عذر ثوبه على الـردف جـود ضكتـهشاه اللي ما بعد شاهـده لـو فـي الحـلام
دوب بـس الـسـاق لحـظـة يـمـر بسكـتـهوالله مـا يمديـه يركـض قبـل يـوم القيـام
اشـهــد انـــي مـكـتـه ان بـغـانـي مـكـتـهواشهد اني بيته من الحجر حتى المقـام
يـا حبـيـب فـيـه كــل الـوصـوف مسكـتـهفيـك قلبـي ميـت وضربـك الميـت حــرام


صح السان من قالها

[العنيــــدهـ]

يسسسسلموو
أشكررك ويعطيك 1000 عااافيه

[يارا العامرية]

صح لسان الفراعنة
ولاهنتي الديم ع هالجهد الرائع
لك ودي

[عشآنك]

لاهنتي يالديم

[أجوديه وبالزين مبلية]

صح لسان الشاعر


الله يعطيك العافيه

[ريم العاصمه]

شـكــ وبارك الله فيك ـــرا لك ... لك مني أجمل تحية .

[اساور وأغصان]

جايه .. شوق لك يالديم .. يسلمك ربي ..
وصح لسان الفراعنه .. ~ْ