شاعر مطيري...!!

[بعيد الهقاوي]

السلام عليكم ورحمة الله وبركاته

على هونكم ترى ماهي هوشه بس ابي خدمه منكم

فيه قصيده للشاعر مطيري يقول فيها
عندي جميع ألسن بنات العرب عوج ........ ألا لسانك لي فيه طب وعلاج
والله مدري وش يقول بعد بس انه يقول في أبياته ...
جاني بلا فالقلب يسوجني سوج....... يسوجني يمك لك الروح نتعاج
ياروح روحي ان كان ما منك منتوج....... خف الغلا لا عاد تحرجني أحراج
لو قلت لي سير وأخذ عندنا روج..... جيتك على الاقدام ممشى وتفلاج
أجي مبهوج وأروح مبهوج....لو ما حصل منك غير رفت أحجاج

واللي ابيه اسم الشاعر تراه مطيري وهذا متأكد منه وابي القصيده
والله لا يهنيكم جميعاً.

تحياتي لكم

[المهاااجر]

هههههههههههههه

تعبتنا ياخوي جينا كلنا ههههههههههههههه

لكن راح ابحثلك عنه أخووي00

المهااااااااااااجر

[ابو وليد]

بارك الله فيك اخوي حسبتك جبت معلومات عن شاعر مطيري

واثاريك تسال خلاص انا ما راح اجاوب ؟؟؟

تلعب باعصابي الله يسلمك




يكفي اخوي المهاجر يجيب لك القصيدة وان ما حصلها عليك بالشلاحي بارك الله فيه

[الشلاحي]

لي عوده على الموضوع بعد البحث

تحياتي

[منادي]

استاذي بعيد الهقاوي
القصيده اللي تسأل عنها للشاعر الكبير // محمد خلف الخس حفظه الله
وهو والد زميلنا واخينا نائب المشرف العام // الهاوي
والقصيده موجوده في ديوانه المثبت في هذا القسم
ومشكور استاذي

و

تحية اعجاب لمن يستحق الاعجاب
منادي

[عطر الليل]

يامرحبا ياللي لك القلب مفجوج


يامرحبا يااللي لك القلب مفجوج=عداد نسناس الهبايب ليا فاج
حطيت ريع بوسط القلب هجهوج=ياعين حر بالخضيرا ليا راج
حبك طفح بي طفحت الساج بالموج=ماعاد لي عن حبك اليوم مخراج
اودعتني لاشرب ولاكل ولادوج= ولاستطعم المنطوق من كل هراج
لاغبت عني دق بي كل دالوج=قامت تواردني هواجيسي ازراج
قلبي يجيني نوج واضيعه نوج=يجيه من فرقاك سجه وسوهاج
كن البنات الشقر عندي من الهوج=ماكن به غيرك على الارض دواج
عندي جميع السن بنات العرب عوج=الا لسانك فيه لي طب وعلاج
في هرجتك شئ من السحر ممجوج=والنور من غرتك يطلع وينباج
وليا ضحكت بذبل مابها فلوج=مثل البرد من مزنة تلعج العاج
واغضيت في سودن بها السحر مدعوج=ترسل سهوم الموت من حجره افواج
تنثرن شقر مثل كاسي الغوج=تاصل اليا ردف كما حزف ديباج
جاني بلا فالقلب يسوجني سوج=يتلني يمك لك الروح تنعاج
كني اليا شفتك على انهار وبروج=والاملك شعبٍ على راسي التاج
واليا بديت بضحك وهروج واغنوج=قلبي غدا زبده على صالي الصاج
او مير كني بين الاضلاع مخجوج=بشلفا مثل شلفا غنيم بن فراج
غنيم بن شبلان مخلن له سروج=ليا صاح في تالي الرمك راحت امراج
تبا تخليني من العقل ممروج=على العمر شامان تدرجني ادراج
ياروح روحي كان مامنك منتوج= خف الغلا لاعاد تحرجني احراج
خليتني يازين الاوصاف محروج=صليت فيّه شرق ماعاد يحتاج
لو قلت سير وخذ عندنا روج=جيتك على الاقدام ممشى ودفلاج
اجي وانا مبهوج واروح مبهوج=ليا حصل لي منك لو رفة احجاج

للشاعر محمد الخس

[الهاوي]

سبقني الاخ عطر الليل في ايرادها
مشكور ياعطر الليل
والقصيده هذي للوالد محمد بن خلف الخس
وشكرا على السؤال يابعيد الهقاوي

[الشلاحي]

وجد طلبك يابعيد الهقاوي من قبل الاخوان

تحياتي

[بعيد الهقاوي]

آسف على التأخير
ياكثركم يالمطران في هالمنتدى ههههههههه

ما قصرتوا وبيض الله وجيهكم وصراحه تحياتي يا عطر الليل لك

وانت يا الشلاحي خابرك يومك سنه هههههههههه

وسجل عندك يا ابو محمد واحد معجب فالشايب واعتبره استاذي من جد واتمنى اني أجلس معه وهذا شرف لي وقله صح لسانك عدد ميزانيه الدوله ولا تكفي بعد .

ومشكورين .

[عــ الهوى ــز]

يعطيك العافية والله


تحياتى لك

[الهاوي]

اعجابك وصل يابعيد الهقاوي
وحياك الله عد عائدات نفط الشرق الاوسط

[ماجد بن عبدالعزيز]

عندي جميع السن بنات العرب عوج== الا لسانك لي فيه طب وعلاج

له سالفه هالبيت بيني وبين الوالد ابو خلف الله يطول بعمره

والحقيقه كل ماذكرته طرت علي هالسالفه

اخوي بعيد الهقاوي
تقبل تحيتي