ديوان عبدالناصر حجازي [الأرشيف] - منتديات عيال الحمايل

العنيــــدهـ

06-07-2011, 07:14 AM

مشغولين بالمونديال

ونسينا

غزة

آه ياغزة

كل غارة فوق سماكى

كل طلقة تسيل دماكى

فجرت فى عروقنا دمك

كبرت فى قلوبنا همّك

كترت ليكى المعزة

آه ياغزة

إنتى زهرة ف وش ريح

قلبك الطيب جريح

انتى أمة مستفزة

آه ياغزة

دباباتهم فوق سريرك

لطخوا الدم ف حريرك

دبحوا ولادك بلذة

آه ياغزة

ياللى وقت (الكورة)

مابتحقن قلوبنا بدم بارد

ابنك المدهش بيكشف صدره قدام البنادق

ويداريكى ف ضهره ويقول للدخيل

مانتاش معدّى

بين شوارعى بين بيوتى

مانتاش معدى

مهما هاتهدد بموتى

مانتش معدى

غير على قلبى اللى شايل لك سلاح

على جتتى الديناميت

على لسانى اللى بيغنى تراتيل الوطن

وهامنعك تدبح بلابل فرحتى

وتوقف الغربان على نخلى

وشوية الدم اللى حيلتى

هاغرّ قك فيهم

وارفع فى وشـّـك من ضلوعى رماح

مانتاش معدى

غير على دراعى اللى شايل لك سلاح

إلا أرضى،

إلا عرضى ،

إلا دارى ،

إلا شمعة بينخلق من ضلعها فجرى ونهارى

لو تقرب من حدودى ،

ولاّ هاتهدد وجودى

يبقى شيىء واحد فاضللى

يا الشهادة

يا انتصارى

بسم التاريخ

بسم العروبة

بسم التحدى

مانتاش معدى

العنيــــدهـ

06-07-2011, 07:15 AM

الحقوا دمى

دمى السايل بين شجرات الآرز وتحت جبال بيروت

الحقوا دمى-- قبل مانقطة ف نقطة أموت

أنا جايّّّة لكوا وسايبة ولادى تحت القصف اللى على بلادى

جاية بانادى وانادى وانادى

حسّوا بهمى والحقوا دمى

دمى السايل بين شجرات الآرز وتحت جبال بيروت

الحقوا دمى--قبل مانقطة ف نقطة أموت

----------

أنا باستنجد بالانسان

اللى سامعنى ف أى مكان

يقف جنبى بقوة ويصرخ

ويقول لأ لأ للعدوان

أنا باستنجد بالبشرية

تحمينى م الهجمة الهمجية

وباقول لكوا وبأعلى مافيّا

الحقوا دمى

دمى السايل بين شجرات الآرز وتحت جبال بيروت

الحقوا دمى--قبل مانقطة ف نقطة أموت

--------

لبنان يعنى مسيح وسلام

لبنان يعنى نور الاسلام

لبنان كل سلاحها الحب

لبنان مش محتاجة غير حب

وعشان ربى وربكوا واحد

وعشان دمى ودمكوا واحد

بسم الواحد بسم الحق

اقفوا جنبى وقولم لأ

للهمجية وللعدوان

لأ للشر وللضغيان

أنا باترجى فيكوا الانسان

حسوا بهمى--- والحقوا دمى

دمى السايل بين شجرات الآرز وتحت جبال بيروت

الحقوا دمى-- قبل مانقطة ف نقطة أموت

العنيــــدهـ

06-07-2011, 07:16 AM

الحرب ع الابواب

بس أحنا عاملين طرش

مطنشين خبطها

عايزينها ما تدخلش

ولو فضلنا كتير

قافلين قبالها الباب

هاتخبطه برجلها

وهاتفسخه وتخش

وهاننتصر

هاننتصرلو احنا وفـّــينا بعهودنا وبالقسم

هاننتصر ----لو احنا بالحبل الالهى هانعتصم

هاننتصر

برغم عتمة دربنا

رغم اختلافنا ف أمرنا

وبرغم سيفنا اللى انكســر

هاننتصر

لو شلنا من روحنا الغبار

وزرعنا فى قلوبنا الخضار

أو باختصار

لو كل واحد هد ّ أصنامه اللى حاجبة قبلته

لو كل واحد فينا رجع صوت بلال لمدنته

لو كل واحد فينا بص لنفسه لحظة فى المرايا واعتذر

هاننتصر

هاننتصر

هاننتصر

العنيــــدهـ

06-07-2011, 07:16 AM

إعترافات
قالولى ايه ثروتك؟
قلت إنعدام الجاه
قالوله ايه اسمك؟
قلت إبتديت أنساه
قالولى فين روحك ؟
قلت الجسد باعها
قالولى ايه حزبك ؟
أنا قلت حزب الله

العنيــــدهـ

06-07-2011, 07:18 AM

لسه واحد م الصحابة فوق جبل لبنان

بيحرس ضيعته ،

ويرصد خطاوى الليل

وطول الليل بتبحث عنه ميت موتة

ولاتلاقيهوش

برغم انه

محضّر من زمان كفنه ،

وبيدوّر على موتة --

تعيده لعالم الأحياء ،

ومتشبث بقلبه فى الجبل،

مانزلش يجمع فى الغنايم زيّـهم ،

ماجراش ورا الدنيا الازاز

واقف ينشّــن ع الهدف،

ياخد بتار حمزة

ونفسه يموت عشان يلحق جنازته ،

والملايكة تصلى ع الاتنين

فى كل آدان بيوهب للوطن دمه

عشان يتوضّى ويصلى الفروض وياه ،

وساب الناس فى أحزابها

وفضّـل هو حزب الله

وكل أباطرة العالم بتطلب من زمان دمه ،

وقرب مشاعره م المصحف مقوّيها ،

مخلّـيه ع الجبل ثابت

ينام فى ماسورة المدفع --

ويترجّى الوطن يضغط على زناده

وآه لو فى الوطن حبّـة رجال منه ،

وآه لو ع الجبل حبّـة رجال وياه

ماكانش الدود ياكلنا بالحيا ،

ولا كان عيالنا تاكلهم الجنازير

لكنه عارف انه وحيد ،

وماشى لوحده بيلمّ العيال الهرد من تحت البيوت ،

ويحطّ روحه سلّمة --

تطلع عليها للعلا بيروت

ولما الدانة هتمزّع فى أشلاؤه

هانسبقه كلنا وهنموت

العنيــــدهـ

06-07-2011, 07:19 AM

شيخنا انتصر

وعدوه هو اللى انكسر

رغم العتاد ،

رغم العدد ،

رغم المدد م الأمريكان،

وبرغم جيش بلده اللى خان

وماحد ّ عارف كان لإمتى هاينتظر

شيخنا انتصر

وفرحنا بيه

فرحة الليل الطويل

بالنجمة لمّـا بتنولد

وبدر ( تالتة ) بتنكتب ،

ودم أطفالنا اللى سال

غسلنا بيه وشّ العروبة ،

وشيخنا رجّـع للتاريخ خالد وعمرو ،

وشقّ فى عيوننا اللى قرقضها الديدان

طاقة بصر ،

ومن النهارده هانبتدى نشيل حكاياتنا العجوزة

من على لسان التاريخ ،

وهانكتب الخبر الصبى

( شيخنا انتصر )

العنيــــدهـ

06-07-2011, 07:19 AM

اللى مات -- مات واندفن ،

والحكومة ( الله يكافئها) سدّدت حق الكفن

والمصابين ع السراير مرتاحين ،

والملايات النضيفة ،

والكبرتات الجديدة بتتفرش --

لجل تبقى الصورة حلوة ع الشاشات

كل لحظة نشوف وزير بيقول خلاص الأمن أصبح مستتب ،

واتنظح دم الضحايا م البرك ،

والنشاط الوقت عادى فى (السكك)

كام وزير ( الله يعينهم) قدّمولنا احصائية عبقرية باللى ماتوا ،

واللى لسة ،

وبفصايل دم كل المتصابين،

وبعدد كل اللى شافوا الحادثة من فوق السطوح

كام وزير ( الله يعينهم ) ---

كل حبّة يغيّروا فى الإحصائية

مرة حذف وألف مرة بالإضافة

و (التضامن لاجتماعى ) حددت كام ألف لولاد القتيل ،

والمصاب رح يتعفى من دفع حق القطن والشاش والفتيل

و (المواصلات ) قالت ان الأمر عادى وكل واحد له قدر

واحنا عوّدنا المواطن ع الخطر

من حريق( قطر الصعيد ) ،

و (كفر دوارنا ) السعيد ،

للى جاى لسة ف سوهاج أو فى السويس أو بورسعيد

الأمور عادية جدا والحكاية باختصار :

ان القطار---

كان شقى وطول عمره بيحب الهزار

بصّ شاف فيه قطر سادد سكته ،

قام بحسن النية ناطط من وراه فوقه ووثب ،

و (الرئيس ) عمّال يتابع ( عن كثب ) ،

والجميع عايزين يشوفوا النطّـة هاتخلّف ضحايا أدّ ايه

يا جماعة الأمر محزن ،

والسؤال :

هى روح المصرى آخر حاجة نهتم بها ليه

العنيــــدهـ

06-07-2011, 07:21 AM

مش هاشكى منك للبشر

أنا هاشكى منك .. بس ليك

واقول وصاياك العشر

تهدمها ليه انت بإيديك ؟

وابنى اللى مات تحت الهدد

ومعاه ولاد مالهاش عدد

إبنى الرقيق

ملاك برىء

لحظة ما جسمه بينفجر

ماصعبش بس ازاى عليك ؟

مش هاشكى منك للبشر

أنا هاشكى منك .. بس ليك

***

كان ذنبه إيه؟

عصفور وديع نايم فى عشه ؟

كان ذنبه إيه؟

الورد لمّا جيت تحشّه ؟

كان ذنبها إيه البيوت؟

وصبايا بيروت والولاد ؟

فى كل بيت دم وبكا

والمقبرة بطول البلاد

والدمع سايل م الشجر

ومفيش دموع باينة فى عنيك

مش هاشكى منك للبشر

أنا هاشكى منك .. بس ليك

***

يرضيك كده دم الملايكة يسيل ؟

يرضيك كده على كل حجر قتيل ؟

ليه؟ ليه؟ ليه؟

طب حط نفسك مطرحى

وقوللى رح تشعر بإيه

لو شفت بعيونك ضناك

والبيت بيتهّدم عليه

ويفيد بإيه لو تعتـــذر ؟

ويفيد بإيه إني أشتكيك ؟

مش هاشكى منك للبشر

أنا هاشكى منك .. بس ليك

***

مش هاشكى منك للبشر

أنا هاشكى لإله البشر

واشكى ليسوع

وابعت لموسى عنّيا بتغرغر دموع

تشهد عليك

وابنى البرىء

هاصعد بدمه للسما وادعى عليك

من ظلمك اللى بينتشر

شدة القسوة اللى فيك

مش هاشكى منك للبشر

ولا هاشكى منك تانى ليك

***

العنيــــدهـ

06-07-2011, 07:22 AM

فى غزة وف لبنان

مفرفرة روحنا

شايفين نذير الغرق

ومكذبين نوحنا

يامين يصحّـينا

م الموت

ولو بـالسيف

ويدلّــنا

عنّــنــا

ويقول لفين رحنــــا

يمكن نعود تانى

لـنفسنا التايهة ،

ويدلّـنا دمّـــنا

ع السكة

لجروحنا

***

العنيــــدهـ

06-07-2011, 07:22 AM

قال له الصبى : أشرب

العسكرى قال :لأ

قال له الصبى :أشرب

العسكرى قال :لأ

قال له الصبى :أشرب

العسكرى قام زقّـّه ع الردم القديم

سحب الصبى بضوافره قالب طوب

ولمّّّـّا سال الدم واتملت البرك ..

بدأ الصبى يشرب

العنيــــدهـ

06-07-2011, 07:25 AM

تنولد تانى

فى عام (الألف) فيــل

مشتاقين

للفجر يطلع من جبينك،

محتاجينك

تحفر(الخندق)تشيل

من قلبنا

(كوم التراب)

هجمة(الأحزاب) على

(خندقنا) أقوى من (الحصون)،

و(الكتاب) مغروس فى جنبه

ألف رمح،

والقبيلة

فى انتظار لحظة شروقك ع الملأ

تشعل الشمع الالهى فى النفق،

نلتمس فيك السلام

محتاجين فعلا نصلى

بس تبقى انت الامام

تنولد شمس الخلاص

جوّة سرداب النفوس

انطفى ف ايدنا الفانوس،

والليل دلق حبره ف سمانا،

والنهار بعدك مليّـّـل

كل هبـّـة ريح بتكسر فينا ضلع،

كل يوم بيموت فى حجر الأمةعيّّــل،

واللى فاضل من هدومنا

مش ساترنا

فانتبهنا

اننا سيبناك وتهـنا

عز مااحنا ....محتاجينك،

محتاجين لك

ترمى حفنة من تراب

فى عيون أعاديك اللى رجعوا يعسكرولك

لمّــا سمعوا بموت على

بس لمّـا يقرّبوا منّـك خطاهم

هايلاقونا كلنا

نايمين مكانك فى الفراش

دا الكتاباللى ف ايديهم مااتقراش

لو قروه

هايلاقوه مكتوب بنورك،

ويلاقوك

نايم فى أحضان المسيح،

راضع معاه من صدرمريم

بس عين الجهل دايما نورها مطفى،

والقلوب العميا صعب تلاقى ع الأرض السلام،

صعب توهب للحياة و الناس مسرّة

محتاجين لك ألف مرّة

نكتب البيعة الأخيرة ونعشقك،

نستنشقك،

تبقى شمس قلوبنا واحنا

نبقى ضلّـك

داحنا فعلا

محتاجيـــــــــــــــــــن لك

محتاجيـــــــــــــــــــن لك

محتاجيـــــــــــــــــــن لك

العنيــــدهـ

06-07-2011, 07:28 AM

أنا الجاسوس اللى انتوا بتحاكموه بتهمة إتصاله بالعدوّ

وكل واحد فيكوا حضر" لى القرار والمشنقة

من غير ما تلسع قلبه نارى ،

أو يعيش لحظة فى مرارى ،

أو يحسّ بأزمتى

لو قلتوا قبل ما تتشنق نفسك فى إيه ؟

هاقول : تدوّى صرختى ،

تدّونى فرصة اصرخ واقول لكوا كلمتى

بعدين تحطوا المشنقة ..

فى رقبتى لجل احصل على ( حريتى )

أنا الجاسوس اللى اتصل بعدوّكم ..

لما اكتشفت .. إن انتوا أعدائى الأشدّ ،

انتوا الوحوش المصّة دمى وآكلة قوتى

انتوا اللى بتتاجروا بحياتى ولسه هتتاجرم بموتى

إسمعونى .. يمكن ابقى لحدّ من أحفادكوا درس من الدروس

أنا الجاسوس اللى النظام لعب بأحلامى الإزاز

ومشيت فى وسط الاحصنة مركّب جهاز

ضهرى الخسع .. سّبب لبطنى الضرب من كل اتجاه

نهرى الفقير .. ممنوع يصبّ فى بحركم ،

ممنوع يكون لى زيّكم ضلّة وشجر

بتزرعونى ف لحظة الشهوة الحرام ..

وبتقطفونى فى العطش ،

بتخصخصوا حريتى ..

وبتخطفونى بالقانون

وبتلغوا عقدى مع الحياة بطلب إحاطة

سلّمتوا أحلامى للصوص العولمة ..

وقبضتوا حقى بالدولار

ضحية بين شاشات إباحة .. شيوخ بلاستيك .. كل أشكال القمار

ع الزيرو 900 حقق حلمك الميّت وكرّر لاتصال

وتحوّلوا الحلم لحسابكم فى البنوك

أنا عبدكم ... وانتوا الملوك

أنا الحرس ... وانتوا النيام

أنا القيام ... وانتوا الجلوس

أنا الجاسوس ...

اللى اتعمل لى ألف جنحة وألف محضر ...

يوم ما فكرت انى ابيع فاكهة وخضار ،

وكفرت بالحج اللى عارضاه الحكومة .. للى يكسب فى القمار ،

أنا الفقير المستحى ،

أنا النجيل المستباح

بيتّهمنى المرتشى واللص والقواد ..

عشان ماليش ضوافر أو حشف

احكم بسرعة يا قاضى قبل ما تنكشف زى الرفاق

احكم بسرعة أنا فى اشتياق اروح لقاضى بجدّ عادل

هوّ اللى أعلم بالنفوس

أنا الجاسوس اللى انتوا جوّعتوه لحدّ ما عضّكم

اللى اترمى فى الحجز لحظة ما اللصوص طلعم براءة ،

بعت صوتى ع البطاقة بحق فرخة ..

وانتخبت اللى استباحنى ،

اللى يوم العيد دبحنى ،

واشتكانى لما زاد وجعى وصرخت

وقلتم ان الثّورة أنهت ع الفوارق

الفوارق فى ازدياد ،

وكل خرم فى مصر بيفيّص فساد ،

وفيه طبقتين فى البلاد :

الأولى بتهيّأ حريمها للخديوى ،

والتانية بتشحّت عرابى قلوبها حاف

الأولى بتضاجع عدّوى ..

والتانية بتحّميها بدموع العيال

تلاتين سنة وبقبض تراب ..

فى مصالح المغضوب عليهم

المحرومين من أى ميزة وأى ( كادر )

أما اللى كرشه بيشغى دود ..

اللقمة من إيده بحلل

هو اللى يسرق واتحبس دايما مكانه ،

هو سلطاننا فى زمانه

أما انا ...ع السلّمة الواطية افضل احبى

واشدّ فى هدوم الرغيف

ولو مشيت عكس اتجاهكم ...

يتعمل لى مخالفة وأتّاخد تحرّى ..

واصرخ ما فيكم حدّ فكّر يلتفت

وغصب عنى بتحلمم ،

وغصب عنى ليلاتى يرعبنى الكابوس

أنا الجاسوس اللى انتوا من ستين سنة بتستعبدونى

تضحكم دايما بدونى

بس وقت اللطم بتحنّوا لخدودى ،

بتسرقوا الخطوة اللى رجلى محوّشاها

رجلى اليتيمة الماشية تئزح ع البارود

أما انتوا رجليكم بتضغط من زمان ..

على بقّى والأمر السيادى : اسكت وبوس

أنا الجاسوس ..اللى ان ديدان البلهارسيا تحشّ كبدى ..

ما لقاش فى مستشفى الأميرى ..

غير شريط طباشير ما يسوا التذكرة ،

والطيارات محجوزة للرقاصة تتعالج بأمر من الولي

ساذج وصدّقت الولي ..

فى يوم ما قاللي: همنع الدرس الخصوصى ..

لجل تلقى للعيال تمن الرغيف ،

و ف يوم ما قال ان المناصب والمراكز والمجالس ..

من هنا ورايح هتبقى للشريف ،

وف يوم ما قال شجر العدالة هيرمى ضله على الضعيف

وما خدت من مطر الوعود الا البخار ،

واستسلم الكبش الضحية للرحيل

هموت بدلكم وانتوا تحيوا نيابة عنى

مانا عشت عمرى اعرق بدلكم وانتوا تقبضم الفلوس

أنا الجاسوس

حبيت اجرب مرة حق الإختيار

حبيت اجرب وأنتخب مرة بإرادتى ..

فانتخبت عدوكم ..

واختّرت ابيع العمر للّى يدفع أكتر

ادبحونى واشحنوا بدمى الموبايلات اللى جايّة لكم ( كادوه ) ،

أو فوّلوا بدمى الرخيص السيارات آخر موديل

أو اشنقونى واقطعم ديل الخيانة

مع إن كان مفروض عليكوا تبدؤا بقطع الرؤوس

أنا الجاسوس اللى حساباتى كلها طلعت غلط

جيت اختبر حريتى قلت لآمون :

العهد طوّل ..

والرعايا نفسهم يمشوا فى جنازتك

قام حالفلى ما يمشى غير لو ساب وريث .. ياخد عزا كل الرعايا !

فمشيت وراه ساكت ..

ورغم سكاتى سابنى فى الطريق ..

وتهت علما ان انا صاحب الفانوس

أنا الجاسوس .. وكلكم جواسيس

بتتقابلم مع الأعداء فى نص الليل ..

بتتفقوا .. وتتواصلوا ..

وبتتاجروا .. وبتفاصلوا ..

وتتساهلوا ف تمن دمى ،

بتنسوا ( قضية الأسرى )

وتفتكروا اللى من قهره استجار بالريح ..

وحاول يلقى فى الليل العقيم طلق الشموس

.......................

آدى الدفاع عن نفسى وادى التبريرات

حضّرتهم ..عشان اقولهم لو صحيح ..

القهر زوّد أزمتى ،

ولقيتنى مضطر انى اكون .. فعلا .... جاسوس

العنيــــدهـ

06-07-2011, 07:30 AM

أنا زيّكم

بفرح ساعات و احزن كتير

أنا منّـكم

من حيّـكوا الشعبى الفقير

لابس هدومكوا الباهتة من عرق الشقا

نايم معاكوا ف قوضة باردة ضيّقة

باكل رغيفكوا المحشى جوع

فارس و لكن بعت م الحوجة الدروع

و باحارب الهكسوس بآخر حتـة من عضمى

و بارفض تتنصب ..

فى مشاعرى خيمة لحتلال

لسايا باحبي عالصابون

لسه الورق مارضعش من سن القلم

سرسوب كلام

شعرى المكسّح

ماشى بيدوّر على إزازة دوا ..

لهشاشة الأحلام

يا هلترى .. علاجى هالقاه عندكم ؟

بحلف لكم

و حياة تشابه جرحنا

و حياة مرارة قمحنا

أنا منّكم

العنيــــدهـ

06-07-2011, 07:30 AM

من قبل ريح الاستكانة ..

ما تقلع الوتد العفى

طلق الحياة

طردنى من سجنى الصغيرّ

لابتدايات اعتقالى

نزلت خايف م المكان

و بدهشة حاوطونى الجيران

قالم معانا يا غريب أو ضدّنا ؟

و اللى انت عايزه عندنا …

أو فى التراث ؟

فتحت عين الاحتراس

لقيتها مش أرضى ،

و لا وطنى ،

و لا أهلى

لقيت إله الخوف بيندهلى

عيونه قرصين شمس

و دراعه … لسان أفعى

و متحاوط بميت سيّاف

و خفت لاحسن اخاف

وقفلت بوّابة ودانى

و نزعت عن فرسى العنيد …

كمامة الطاعة

و صرخت .. قاللى ياغريب …

شرط الإقامة سكوت

صرخت تانى ..

قال باقيلك صرختين و تموت

صرخت تانى بصّ لى ..

و باندهاش …

قاللى بلاش تركب دماغك يا غريب

لسه باقيلك صرخة واحدة عندنا

حاول تعيش على نهجنا

دا الخوف أساس الحكمة وسكوتك خلاص

دارت في راسي الذكريات

يوم ما انولدت و يوم ما بويا فرحبى

و يوم ما علّمنى على …

هرد الإزاز احبى

عزقت تفكيرى بفاس الاختيار ،

وطردت من عيني الصور ،

غمّضت عينى ،

و فتحت قلبي للحياه

و صرخت صرخة …

كتبت لى عمر جديد

العنيــــدهـ

06-07-2011, 07:32 AM

دهست أفكاري اللي ماشية ع الرصيف ،

و بتتبع كل البنود الواردة في كتاب المرور ،

و شلت من إيدها الكلبشات العجوزة …

و الحواديت الغبية

إكتشفت أن الجواز من يومها باطل ،

و العلاقة بين لساني و فكرتي …

مبنية دايما ع الخيانة

قمت شايل من على .. شباك لساني ..

ستاير الليل البليد ،

و ادّيت لأفكاري الجريئة ..

الحق في المشي المخالف للمرور

عشان لقيت أفكار كتير ..

حطت شرفها ع الصينية و قدمتها للضيوف

حرضت أفكاري إنها تعدي …

بدون ما تبص لإشارة المرور

أو تنزعج من صوت كلاكسات الموديلات القديمة ،

و السرينة المتحفية ،

و قلت لازم تكسري ازاز الـ ( فيميه )

عودتها …

ما تدوسش يوم على الفرملة ،

تسبق تمللي المرحلة ،

توصل لأطراف المجرة

يكفي إني غلطت مرة ..

لما طلّعت لـ لساني يومها رخصة للكلام ،

و ختمت أفكاري بشعار الجمهورية

م النهاردا …

ها قطع الرخصة اللي ياما سبّـبت ..

للناس حوادث

و امشي عكس الاتجاه

العنيــــدهـ

06-07-2011, 07:34 AM

مولود كفيف

ما بين مخابز حلمى باتسوّ ل رغيف

ساند على اكتاف الأمل

عاوج دراع الصبر إيد عكّاز

يمكن عمايا يكون سبب جهلى

ورثت عن أهلى جدار مهدود ،

وحمل تقيل على اكتافى

مولود انا حافى ...

فى دولة كلها مسامير

بارضع فى صدر الجوع ...

وباشرب من عكار البير

مكتـّـفانى الأسئلة ،

حزّة فــ رقبتى السلسلة ،

عطشان غنا ،

وجدارى محتاج للبنا

وعشان كفيف

العتمة بتحرّض وطاويط أزمتي ع العربدة

وخطوتى العرجة إستجارت م المسير

والذنب مش ذنبى ،

ولا بإيدى انولد حافى ....

فى دولة كلها مسامير

العنيــــدهـ

06-07-2011, 07:37 AM

أنا اتعميت ...

و لا الوجود فاضي ؟

شايف قصادي فراغ …

ما لوهش حدود

هو الوجود ...

فعلا كده فاضي ..

و لا السبب إني …

منيش موجود ؟

جدر الحواس ميت

و الحي بس الخوف

بفتح قوى عنيا

لكن بدون ما بشوف ،

و ادخل بلاد روحي

بعصايتى و اتحسس

ألقى العمار منهار ،

و خرابها متأسس

لانا اللى جوايا

و لا حتى ناس تانيين

و اسأل كتير نفسي

أنا نفسي و لا … مين ؟

يمكن أكون مولود …

ما زحفش لسه الدود ..

على قلبه و اتمدد

يا جهلي ما تحدد

لانا بوجودي سعيد

و لا بالعدم راضى

أنا اتعميت بصحيح ..

و لا الوجود فاضي ؟

العنيــــدهـ

06-07-2011, 07:39 AM

إتخبطت ف خطوتى ،

ووقعت من سطح المتاهة

فانكسر لى ضلع كنت معشّـمه ...

أعمل به حوّا

و حبّـة الضحك اللى انا حــوّشتهم ...

أتدلدقوا من قلبى ساعة ما انكفيت

وفضلت الملم نفسى من بين الحصا ،

وارمى .. بحملى عالعصا ،

واشعر بجوع بيعض روحى ،

ودعوتى العاقر بتزعق فى السّما

لكن بدون ما " المائدة "

تنزل على .... قلبى الجعان

يمكن عشان ناقض وضوئى ،

أو عشان سايب فى قلبى كام صنم .....

ذكرى ...... من الشّرك الاخير !

يمكن عشان سلّـفت نفسى للطغاة ،

وادّيت حواسى للعدم !

محتار .....

ومش عارف سبب ......

حزن السما منّى

وقرنى الحادى والعشرين بينكرنى ،

ومش لاقى .. دليل واحد ..

على ... ملكيّـتى لنفسى ،

وراكب مركبى الكرتون

ومش قادر .. على النوّة

عشان ضلعى اللى كنت معشّمه ...

اعمله به حوّا ...

إنكسر ،

وحبّـة الضحك اللى أنا حوّشتهم ......

إتدلدقوا من قلبى ساعة ما انكفيت

العنيــــدهـ

06-07-2011, 07:40 AM

دلدلت نفسى …

لجل اطول الأرض …

و لقيت المدى … واسع

كأن الأرض مش عايزانى احصّلها

بقيت محتار …

ما بين باب السما المقفول ،

و بين .. خطوة .. بتطردنى

معلـّـق … بين طلوع الروح ،

و بين .. الخلد .. فى البرزخ ،

و مختلّ التوازن …

بانكفى … فوق خطوتى ،

و باختفى .. عن عينى .. خلف الأمكنة

تلعب بكوم قشّى .. الرياح ،

و الصرخة تبلعها السّحب ،

و ملامحى تبهت …

من غبار الأسئلة

لحد إمتى هاعيش رهين المرحلة ؟؟

واقف على الأعراف …

بادوّر …… عالمصير

يتبلّ ريق روحى …

بطعم الاحتضار ،

و عيونى تتزغلل …

بأشباح الرؤى ،

و لمعة الضلمة ،

و ادوّر .. تحت رجليّا

على مربع ثبات ..

أدق فيه … وتدى ،

و دايخ ،

و ابتديت اشعر …

بسرسبة الحواس ،

قلقان … على روحى …

لا تتعب برضه من بعدى ،

و ترفضها السما

و تنطرد … م الأرض ،

و يتم اعتقالها و تنصلب …

زيّى … على الأعراف

العنيــــدهـ

06-07-2011, 07:44 AM

وف كل ما اطلع سلّمة ..

ألاحظ ان الارض لازقة ف رجلى ،

وبتطلع معايا السلّمة

وفى النهاية

بالقى نفسى ..

لسه باتنفس تراب ،

ورجلى لما اتحّركت ..

كان باقى جسمى أسير ،

وكنت يا دوب ..

باقلـّـب نفسى جوّة المصيدة

ما قدرتش اسلخ جلدى واهرب ..

من خيالى ،

واكسر القالب لأنه بجدّ ضيـّـق ،

والهوا اللى ف صدرى حادق

مستحيل تفضل مفاصلى العمر كله ..

زوايا حادّة

لا اقدر افرد إيدى اطول ..

بيها النجوم ،

ولا امدّ رجلى للوسع

كل المعادلات ..

والرموز الكيميائية اتدلدقت ..

فى المعمل اللى تجاربى فيه متأجـّـلة ،

واللحظة مش عاطيانى فرصة ..

أنى أرسم " بورتريه " للكون ،

ولا اقطم لقمة من خبز الضياء السرمدى

ما باصدق افرح ..

لمّا اشوف الشمس راسمة هيكلى ،

إلاّ والاقى المغربية بتشطبه ،

والف جوّة الدايرة ادوّر ..

عن خطوطى المستقيمة ..

فاصطدم .. بالمنحنى ،

وارجع لأوّل سلّمة ..

ما طلعتهاش

سكة سفر طويلة ،

والعقل الهزيل ..

هوّ الحصان ..

اللى اشتركت به فى السبق

يادى المسافات البعيدة ،

والمحطات المشابهة لبعضها

حاسس كأن القطر شايل ..

جتـّـتى وطايح ،

ولمّا ابصّ م الشباك ..

باشوف .. نفس الصور ..

نفس المكان

والاقى رجلى ..

لسه غارسة .. فى التراب

العنيــــدهـ

06-07-2011, 07:46 AM

بدأت أحس ان ف دماغى ...

تختة مكسورة ومفيش ...

سبورة تشرح للبليد المسألة

كل الزوايا اتمرّدت ع المنقلة ،

والحسبة حالفة إنها ...

ما هتبقى صح

عمّال أحقق فى المناظر ..

اللى لسه ما شفتهاش

والكون كبير

لكنه أضيق من قميصى ،

وعينى أوسع م الصور ،

والرحلة محفوفة بمخاطر ، وبقلق

واقف طابور ..

مستنى دور لجل اتخلق ،

وبرضه حاجز ليّا دور ..

فى طابور موازى لجل اموت

بهتت على بعض المعانى ،

والكلام أصبح محيّر ،

والكتب مش قادرة ترمى لعقلى لسه ..

طوق نجاه

تايه ما بين أحياء بيغتصبوا الحياه ،

وميّتين بيشوّهوا شكل القبور

والشوك فى دقن الارض ..

كرّهنى انى ابوسها ،

والسما بتمطر ملل

وكان نصيبى من البلل ..

بيعادل الباقيين

وعشت العمر باتأمّل فى لوحة ..

قالوا عنها ..

مش ناقصها الاّ الرتوش

لكن لقيتها يا دوب رتوش ..

ناقصها لوحة ،

واختلفنا فى المسمّى ،

واتّفقنا كل واحد يبقى ليه ..

رأيه الأحادى

ماحنا دايماً ..

بين عقولنا .. واليقين

سكة سفر ،

والغربة لاحسة .. من جلودنا ..

ألف راقة

كل ما بنوصل لروحنا ..

إيد تقيلة تشدّنا ،

وتشق بيننا ،

وبين ذواتنا ..

بحر هادر

نفسى اعدّى البحر شايل جوّة قلبى ..

كوم سفنج ،

والحق الروح اللى بتدحرجها قدّامى الرياح

نفسى ابنى خيمة ف أرض خالية من العناكب ..

والصقور

تحمينى من أحياء بيغتصبوا الحياة ،

وميّتين بيشوّهوا شكل القبور

العنيــــدهـ

06-07-2011, 07:49 AM

فيه كلب مسعور … جوّة جسمى ..

لسه بيهوهو ،

و بيجرجرنى ويّاه … أشتهى …

عضم العـبث

مولود معايا ف طلق واحد ،

و ابتدا … يحتل مملكتى …

بوضع إلإيد ،

و يجبرنى …أشاركه

فى الحياة و الموت ،

و يقطع لى … حبال صوتى ..

و يزرع جوّة حنجرتى …

تقاوى نباح

نبحت معاه … على روحى

لحد ما روحى خشّت عالغرق ،

و استنجدت بيّا و شدّتنى …

من الحبل اللى ف رقبتى .

بدأت ابكى وحدفت الكلب ..

بالعضم اللى لمّيته ،

و لاقيته …خشّ جوايا ، استخبىّ …

فى انحناءاتى

يحرّضنى …على نفسى ،

و يرمى اللحمة لعيونى الجعانة ،

و الصراع يشتد بين روحى و بين …

كلبى اللى مش بالسهل إنه … يتهزم

العنيــــدهـ

06-07-2011, 07:53 AM

قمت خايف

أجرى ع الشباك .. ولكن ..

ما لقيتوش ،

والمكان ..

أضيق م القبر بــ تلت تربع حياه ،

والسّما عاقر ..

مفيش فوق حجرها الاسود ..

هلال ،

والنجوم كانت مسافرة

كنت انا .. فى الكون لوحدى ،

والضلام حاطط عنيّا ..

جوّة عبّه ،

والمكان مش لاقى فيه ..

جذع نخله يهزّه قلبى ..

لجل ترميله الأمان ..

ولا نار ..

ترجم ضلام ..

كونى بــ " قبس "

فجأة .. طلّت من عنيّا ..

نظرة لسه فيها نبض

شفت نقطة نور بتلمع ..

فى المازوت

واما ركـّـزت انتباهى ..

شفت خرم النور بيوسع ..

حبّة حبّة لحدّ ما اتحوّل ..

لخاتم ..

قمت راشق فيه صباعى ،

وابتديت ..أفتح شبابيك الرؤى،

وارمى عينى ع السكك

شفت مارد

لأ ماهوش مارد عشان ..

ما ابقاش با بالغ

شفت حاجة قريّبة .

من شكلى خالص

بتناولنى شمعة مطفية وتقوللى :

خد عشان تعرف تشوف

أو تقابل نفسك اللى بتشتهيها

لجل تسحب جتّتك ..

برّة النفق

قلت لكن شمعتك ...

قالت أحسن من مفيش

مش فاضل لك ..

إلا ّعود كبريت تمللى تضيّعه

لو تفتـّـش ..

جوّة روحك ،

هاتلاقيه

العنيــــدهـ

06-07-2011, 07:53 AM

روحي آيلة للسقوط ،

والشروخ اللي في جداري ...

كل يوم بتمدّ لما حصلت أطراف ضوافري ،

واتحاصرت بكل تجار الفرايا والهدد

في انتظار لحظة سقوطي المدهشة ،

وانتشاري في السما شويةغبار

كل يوم باشعر دبيب الزلزلة ،

كل خطوة تهز فيا اربع حيطان

فـ ابدأ امسك ( فيا ) جامد ،

واجري واتعلق في روحي

تنتشلني من المزاد ،

وانتشلها من السقوط

واكتم الآهة اللي بتراود مشاعري ع الصريخ ...

كل ما اقطع لحمي ارمّم بيه شروخي ،

كل ما اخطف روحي من إيد الهدد ...

واجري بيها ،

ويطاردني الاهتزاز ،

ويساومني ع السقوط ،

واتفاجئت بشيئ قتلني ...

لما باقلع مرة جلدي ....

لقيتني شايل جوة مني حد منهم ...

من مقاولين الهدد

شفته فين ؟ شفته فين ؟

وابتديت اتذكره ..

أيوه هو ..

كل ما امشي في حتة أشوفه يبص لي ،

واخاف انا اتامل عينيه ...

لا يخطفوا مني البصر

فاهرب واسيب له شوارع العالم ،

واكوّم نفسي واتدحرج في شرخ ،

ألقاه في قلب الشرخ قاعد في انتظاري ،

كل ما اسكن حتة يطلع هو جاري

نظرته ... بتهزني ،

سحنته ... خليتني اآمن بالخرافة ،

واما تخبط عيني ف عنيه الإزاز ..

اتجاهله واعمل نفسي ميت ،

أستخبي ف نفسي واهرب من عنيه ،

واصرخ في سري : ( ما اعرفوش )

والنوبادي لما شافني ...

جرّني لقسم البوليس ،

وقام مقدم ضدي دعوي ادخل في طاعته ..

لأني لسه فـ عصمته

واما قاللي القاضي روح ارجع لصاحبك ..

صوته حطم فوق دماغي كل جدران العدالة ،

وقلت : ( آسف ... ما اعرفوش )

الحرس ( بإشارة واضحة ) حط في إيديا الحديد ،

والشهود اتحالفوا ضدي وقالوا فعلاً هو صاحبي

واما حققت فـ وشوشهم ...

اتلقيتها وشوشه هو ،

القاضي هو ،

والحرس هو .. ولقيت ان العدالة برضه هو

قمت صارخ في الوشوش المستعارة :

مش راجع له ... مش راجع له

عشت طول العمر راكع بين إيديه ...

ما اتلقيتش ف شرعه جنة ،

كلت تفاحه المحرم ،

انتهك روحي وعايزني اصلي له ونا ....

متوضي من نهره الجنب ،

إحتلني ،

حط إ سمه تحت صورتي ،

حط صورته فوق ملامحي

إستلفني ورافض انه يردني

مش راجع له ... واسجنوني

يمكن القي فـ سجنكم .... حريتي

العنيــــدهـ

06-07-2011, 07:55 AM

سلّفني عكازك

أحسن نسيت رجلي …

على سرير المرض ،

ونفسى اكون فى الوقت دا جنبك

أنا الحبيب اللى الضباب توّهنى عن قلبك

واقف باراقبك .. من بعيـــــــد

شايفك … وحيد ،

راكب حصان القادسية تآزر " الخنساء " ،

بدمك البنّور بتروى كربلاء ،

و تناول السيف للحسين

من غير ما تسال عنى فين ،

مستكفى بالدم اللى خارج من وريدك ،

حالف ما تكتب غير بإيدك للوطن مواويل ،

و بتخطف الراية من الإيد اللى عاجزة تشيل

وبتجرى خلف الموت ،

واما الوطن اصبح سجين محتل ..

عملت من جتت الحبابيب تل ..

ووقفت فوقه تشد بالعكاز خيوط فجرك

ماهو انت بالعكاز سبقتنا كلنا ،

ورحت تطلب للشجر إيد الربيع

رافض تبيع وردك لتجار الحطب ،

رافض تكون الا العراقى ،

رافض شعار مات الفدائى ..

طول ما انت غارس للوطن جدر الحياه ،

طول ما انت واهب للمدن دمك سبيل

ووشوشنا لما هتترسم ع الغيم ..

هتبقى انت الجميل ،

انت اللى خالى من العكارة ،

انت اللى بتحطم تماثيلنا الحجارة ،

انت اللى رافض من زمان تبيع عزالك ف المزاد ،

وفضلت تتمرّغ فى دمك ..

وانت حاضن بالقوى بغداد

شايل فى قلبك حلمها

وماشى تعرج ع الخريطة تلمّها،

وتكتب لها بدمك نشيد

واقف براقبك من بعيد

وعشان ما تحرجنيش عاطينى تمللى ضهرك

بس صدقنى انى شايل نص قهرك ،

وانت شايف كام مراقب ع الحدود..

مانعيننى ادحرج لك مشاعرى ف قنبلة،

مانعيننى احط عنيّا ف سلاح العروبة طلقتين

بينى .. وبينك .. خطوتين

بس القانون حاططلى فيهم ميت لغم ،

ومش هعدى سليم بدون ما تجيب لى عكازك

سلفنى عكازك ..

أدوس به ع الألغام واعديلك

ينوبنى من نخلك شوية خوص ،

ينوبنى من وردك تقاوى عبير ،

يبقالى ( آية ) فى ( سفر ) إنجازك

سلفنى عكازك

أمشيبه لو خطوة

أحسن مكان رجليّا عطّن م الوقوف

اسلخنى من جلدى اللى مات ،

قشّر مشاعرى …

تلقى جوّاها المدافع ،

تلقى قلبى فى الحصار واقف يدافع …

عن النخلة اللى طارحة المجد

دمك فى ساحات " الخليج " ..

سايل على افخاد العروبة

و فرخة اخواتك فى يوم جوعك …

ما باضيتش غير طوبة

فـ ربطت فوق بطنك بارود

ومشيت تلملم جتتك

مش لاقى إيد تتمدّ لك ،

و تناولك اللحم المبعزق ع الهدوم

وقعت و بترجع تقوم

وتشد روحك من إيدين الدوّامات

و نصّك التحتانى مات

لكن بتزحف عالإزاز ،

و تشبّ فوق كتف السما ،

تكتب بضلع ابنك سطور الملحمة ،

و تشدّ عصفور الوطن …

من بين سنان وحش الفلا

واقف لوحدك فى الخلا ،

والوحش جارر ألف كلب وراه

بيسلّطوا المدفع …قبال الله ،

ونا لسه واقف ع الحدود

راشق مشاعرى ف شاشة التلفاز ،

و نفسى اجيلك …… إنما ……

أجيب منين …… " عكاز "

العنيــــدهـ

06-07-2011, 07:56 AM

رافضة السّنادى هديتى

بتبصّ لى .. بطرف عين الانكسار

و تقوللى حــطـ ّالورد دا ..

على تربة اخواتك

و إزازة الريحة .. ياريت ..

تغسل بها الأشلاء

و قماشة الفستان تفصّـلها …… كفن

و لادى يا ابنى بتندفن و جاى تهادينى ؟

دبل في إيدى الورد

حسّيت بانكماش

و دموعى سالت عالقماش ..

و بوّشت تشجيرة الفستان

لملمت نفسى من الشتات

و سندت فوق كتف الهزيمة

و قلت باستحياء

أنا عايزك .. تسامحينى

الطلقة متحاشة ف مشاعرى

و الريح … كسر لى البندقية

و الليل … دفننى .. فى الهدوم

نفسى أعوم ..

لكن كلاب البحر بيبيعم شواطئى

وف متاهة خطوتى .. بيخرمسوا الفوانيس

وشنطة الأحزان .. على ضهرى اتملت كراريس

هربان من الأحاسيس ..

و جاى عشان اقدّم لك هدية حزن

يمكن يامّه انسّيكى

يا مّه .. أنا افديكى بآخر شفطة من عمرى

دموعك الديناميت بتتفجّر بها الأوجاع

إبنك جرىء يا مّه ..

ما اخافش م الضلمة و لا …

عضّة كلاب الغيط

و عمرى ما وطّيت .. لغير إنى ..

أبوس إيدك

يا مّه افرحى بعيدك

دا لسّه محطة الأحزان ..

ها تستقبل كتير … قطورات

سرب الجراد ..هاجم على غيطك

و ألف فاس بيصدّعوا حيطك

ونا … على … حصو الفلا … حافى

شايل على كتافى ..عيال همّـك

و عساكر الأحزان بتحتل ابتسامتى

حاسس بإيد الأرض بتجرجر فى هامتى

لكن ضرورى .. تضحكى يا مّه

برغم مرارة المحنة ..

و ريشة مسخ بتشوّه ملامحنا

و إيد فاجرة ..

فى كل آدان … تعرّيكى

حاسس أنا بيكى

دم الولاد .. لغمط غناويكى

موتهم على حجرك ميتّم لك مواويلك

و الدمع سايل .. م الفرات ..

على خدود .. نيلك

حاسس بقهرك .

بالخنجر المغروس فى ضهرك

م اللى اشترى بمهرك …

إله … طباشير

ونا فقير يا مّه

ما ملكش حق الطلقة و المدفع

ما ملكش غير تصريح ..

بدفن الحزن جوّايا

حملك تقيل يا مّه

لكن … حبايبك … كل دول … جايّين ..

يشيلوا الحمل ويّايا

العنيــــدهـ

06-07-2011, 07:57 AM

فى ضلمة ليلك الضم لك …

نجومى … تاج .. على راسك

مانا راضع فى صدر الأرض إخلاصك ،

و فارد لك … شرايينى …

سطور ترمح فى كراسك

فى يوم فرحك … تضمّينى

أسافر بين خلاياكى

فى يوم جرحك تلاقينى

أشرشب دم ويّاكى

و اضفّرلك شرايينى …

تكاعيب ضل فوق بابك

و اموت شابك …

مشاعرى ف طرف جلبابك

دنا العش اللى مرجحتيه على فرعك ،

ونا القلب اللى بيصلى على شرعك

باشوف فيكى …

مشاعر ما اقدر اوصفها … ونا شاعر

و لا احكيها ،

ملامح تعجز الريشة …

فى إيد فنان تحاكيها

و بافرش تحت رجليكى مشاعرى نجيل ،

و باصلب لك ولادى نخيل …

يعشش فوق خطاويكى

باغنّيلك .. و قلبى هو منديلك ..

بيمسح من على عنيكى سحاب الهم

و لو عفّر عليكى الريح

أحمّيكى .. و لو بالدم

تقولى الآه .. تلاقينى ..

مشاعرى كلها تتلمّ

تقول مالك ؟

سلامتك من غبار يلزق على ريشك

أدوّب قلبى فوق النار ،

واصبّه بين خرابيشك

و لا تحلى الحياة إلا .. لو اتأملها من شيشك ،

و لو يقسى عليكي الليل ،

و يرسم على الندى جراحك

أرش مشاعرى بودرة حب لجراحك

أشدّ الضلع من صدرى …

و اشكل حوّا أفراحك ،

و لو تجرحني أيام المتاهة السود ..

يطيب الجرح لو ملّس عليه قطنك ،

و ما يزقزقش عصفورى الا فوق غصنك

و لو هتبصّى جوايا ..

ها تلقيني

رسمتك بين خلايايا

عشان لو … متّ فى الغربة .. يعيدم … جتّتى لحضنك

العنيــــدهـ

06-07-2011, 07:57 AM

والشمس خشّت سجنها ..

شايلة على إيديها النهار ,

والخوف من العفاريت رسم ..

فى عيوننا بيت أشباح ,

وخيل الرهبة طاح جوّه البدن ...

يحطّ نطفة خوفنا فى الأرحام

المغرب ادّن والشوارع عربدت فيها الكلاب ,

وستارة الضلمة ..

مخرّمها النباح

وبدأنا نتهيّـأ وشوش الجان

ودستورنا الجبان ...

حدّد إقامة دمنا بّرة الوريد

عوّدنا لمّا .. نسمع المغرب ..

نشدّ عيوننا ونسلـّمها لإيدين العما أمانات

المغرب ادّن ... يا ترى ...

لمّا جنود إبليس هتحتـل المدن ..

هنصلّى فين ؟

ونجيب منين إمام يحرر فجرنا ؟

يحمينا م الضلمة ؟

دا من يوم الإمام دا مامات ...

لقينا الكل قام نقض الوضوء ,

واتحكّمت فيه الخلايا الميتة ,

وبقعة الحبر اللى خرّت من مشاعره ..

لوّثت نهره الحليب ,

واتقوقعت روحه ف محارات العدم

وفين نلاقى إمام ؟

وفين ممكن نلاقى للإمام أنصار

وأهل النار بيطردم الملايكة من البيوت ؟

والمغرب ادّن ... والوطاويط ...

جايّـة تحتل المدن ,

والوقت ضيق والخلاص محتاج سفر ,

ون كنت ما قريتش ( الكتاب ) ..

كنت اسأل العرّاف سؤال جاهل غبى :

مفيش نبى ..

يظهر فى أطراف المدن ؟

يضرب بديل ( بقرته ) جثمان الحياه ؟

يلمّنـا .. جوّة ( السفينة ) ؟

يدعى على وحوش المدينة بالفناء ؟

من خوفى بسأل عن نبى

من إنى عارف إننا ....

خسارة فينا الأنبياء

العنيــــدهـ

06-07-2011, 07:58 AM

من خرم إبرة قلبي بيهجّ انفعالي

أصرخ بصوت عالي ،

و ارشق سهام الصرخة في قلوبكوا الخشب :

لمحتكم ..

و الديب واخدكم تحت باطه ..

لمّا انبطحتوا فوق بلاطه

وشاورتوا بصباعكوا المأتّب ترشدوه ..

عن مخبأ (الأخ الوسيم) ،

و دم اخوكم لسه بيطرطش على قلوبكوا السفنج ،

و قميصه أصبح عرضكوا المفضوح

ما تغسلوش إيدكم عشان الدم وشم ..

عاضض لحومكوا الميتة

كتب التاريخ أسماءكو بالقلم الرصاص ..

من يوم ما شافكم و انتوا عاطيين ضهركم للنهر ..

و تصلوا صلا استقسا ‍

و دمكوا المتعبيّ في المسقة ..

بيسكر دولة الغربان ،

واقفين على .. باب العبث مانيكان ..

تتقاس على جتتكم هدوم العرى ..

و تولوا الوشوش لبيوت بدون حرمة

واخوكم اللي فصيلة دمكوا ف قلبه ..

بيموت فطيس ،

و كل واحد منّكم ..

الديب محضّر له القميص

و الدايرة بتضيق و القفص ..

بيحني ضهر الحلم ،

و الكرباج حفر .. في ضهر كل المرعوبين نفق ..

بيبدأ .. من هرم خوفنا ..

لآخر نجمة حطّت ضيّها ف حجر الضلام ،

و الحفرة واسعة ،

و الجزم .. لازق على انعالها الصابون ،

و اللي بيقع .. يا ويله م السكاكين

لا هيلاقي العدالة بتحتكم لـ ميزان ..

و لا يلاقي حقوق إنسان ،

و مش هيلاقي تحت الشمس إلا مكان ..

يا دوب يبني عليه قبره

ما هوّ اللي اختصر عمره ..

عشان يلحق يموت

و الموت بريء من دم كل اللي انتحر ،

و دم كل اللي اترمى بإرادته في الحفرة

العنيــــدهـ

06-07-2011, 07:59 AM

( عايز تكون لك إيد قوية ؟ و تعيش بدال العمر ميّة ؟

حافظ على .. ضلك عشان .. الضل حقك في المكان

الضل إثبات الهوية )

الـضّـــل

خايف على ضلّي ..

لا تتبعتر ملامحه ،

و السحابة السودة تكنس به الطريق ،

و يدوس عليه حافر هولاكو ،

و أرضي تترّمل ،

و يصبح ورثي في المشتل شوية شوك

بخاف..

لاف يوم ابص ورايا فجأة ..

مالقانيش ،

و ينسرف ضلي ونا مشغول ..

برسم ملامحي ع النخلة اللى ما بتطرحش ،

و القى دمي سايل ع السكك ..

يمسح خطوط عرضي .. و طولي ،

و اتصلب على بّوابات عمري اللي جيّ

أهرب من الخوف الي راكب فوق كتافي ..

و اجري ورا .. ضلي...

بطول الأرض و تخونني ..

هشاشة عضمي و اترنـّح ،

أقع من نفسي وامّد لنفسي إيد واقّف ..

عشان خايف ..

لا إيد العتمة تسرق مني ضلي و اتوه ،

ولازم اخاف ،

و اخلّى الشمس ترسم هيكلي في الكون ،

عشان ما تضعيش من رجلي ..

خطاوي مشوها أجدادي ،

و اسيب لولادي حبّة ضل يحموهم ..

من الصهد اللي جاي م الغرب

العنيــــدهـ

06-07-2011, 08:00 AM

إلى … من استمد الوطن من جسده المشلول "حرية الحركة "

الشهيد / أحمد ياسين

محرّكات تفكيرى عطلت …

لمّا حتّة لحمة من جسمه " القعيد " ..

نطـّت … في عيني ،

وامّا " مخّه " …هدّ سور الجمجمة ،

و ما عادش فاضل منه غير …

لحية ، و عين ،

و حتّة من قورته و علامة …

للصــــلا

ذهنى ابتدا … يرجع لبيته ،

و انحنيت .. عالصورة ابوس …

دمه اللى بقّع …

فوق ملايــة … إحساساتى

يا ترى ..

مكتوب لى اشوف … موتة " عمر " …

لكن فى جسم أحمد ياسين ؟

خارج من الجامع …

و لسه ملايكته حواليه ،

و لسه الفجر بيعكّز على ..

كتف الآدان

واما الضمير …

زحفت على حيطانه الديدان..

اتحالفت " الشياطين "على …

دبح " الملاك " ،

دبح " الكسيح " اللى رفض …

يمشى على … رجلين عدوّه

ما انت يا احمد …

كان لابد انك تموت..

عشان تأكّد للوطن …

إنك من " الخلفة الحلال " ،

و تشيل خطايا اللي احتموا في الخوف ،

و تثبت للتاريخ أن الوطن ..

ياما ها يقعد في ( الصوان ) ..

ياخد في أحبابه ( العزا ) ،

و ألف ( رنتيسي ) و ( ياسين ) ..

هيسلّموا لبعض الكفن

طول ما التتار واقفين على ابواب المدن ..

و عروشنا رهن الاحتلال ..

و الدم شلال الوطن

بس الجميل انك تشوف ..

الدم بيخصّب تراب الأرض و بيطرح عيال

عيال بطعم الشهد و الموت اللذيذ ،

عيال بتصعد للسما بزفة و مواكب

و اللى هيراقب سمانا ..

يشوف غمامة كبيرة زاحفة على الوطن

و عشان كده ..

لابد نبحث عن ( مظلة )

لا السحابة ..

لسه فيها سنين شتا

العنيــــدهـ

06-07-2011, 08:00 AM

رجعت اشبّـه ..

ع اللى واقف في المرايا يبصّ لي ..

و يقول : نسيـتـني ؟

داحنا بيننا عيش و دم

قلت : انت مين ؟

قاللي : احنا واحد من سنين بس انت ناسي

قلت : أول مرة اشوفك

قال : بتكدب ...

بصّ جوّة ( عنيّا ) تلقى ( نظرتك ) ،

و نقطة العرق اللى ( منّـك ) …

نازلة من فتحات ( مسامي ) ،

التشابه في الملامح و الأسامى ،

و الهوا اللى يخشّ يملالى الرئة …

بتطرده بلفحة ( زفيرك ) ،

قلت : متهيأ لك انك تنتسب لي ،

لو تحقق فيّـا تانى …

تلاقى فيه خط استواء …

قاسمني انا … و انت لروحين

قال : رح نشيله

قلت : فيه بينك و بينى سلك شايك

قال : و ليه بتسيبه يتحكّـم في لحمنا بالحدود ؟

ما هو احنا شركا ف لحم واحد ،

دم واحد ،

روحنا واحدة ،

إنت منى و مش هسيبك ،

مش هتخرج مني غير

و الروح بتهجر جتتك ،

يا الروح بتهجر جتتى

عشان يكون لنا تربة واحدة

إترعبت بجدّ منه و هو بيبرّق …

و بيجزّ بسنانه

بس لمّيت الشجاعة اللى استخبت من عيونه ،

و اندفعت بكل قوة امسك لسانه

و امّا شافني مصمم اخرج من هدومه

قام شاددني من القميص ،

و قبل إيده ما ترفع الكرباج عليّا …

اتحدفت بقوة نحية خلقته ،

و فضلت احطّم في المرايا

العنيــــدهـ

06-07-2011, 08:01 AM

ونسختي الأصلية ضاعت من زمان ،

وماشي بالنسخة اللي كلها تعديلات

قلبي ... ملامحي ... ضحكتي ...

وكل أشيائي المهمة .... مزورة

مافضلش م النسخة القديمة الا الهدوم

و إسم بيني وبينه غربة

أما انا ما اعرفش مين

ونسختي الأصلية من يوم ما اختفت ..

ونا خايف ارفع خلقتي للشمس ..

لا تبان الخدوش والتعديلات

أو ينقبض عليّـا واتحاكم علي التزوير

وماشي غريب ،

وجارر جسم مش طايقه ،

وشايل وش مش لايق علي هدومي ،

ومش عارف لإمتي هاعيش مزيف ،

أو لإمتي... هاا ترعب م الشمس ..

وابحث عن ملامحي في الرماد

برئ أنا من تهمة التزوير ،

ومجبر ... إني اتوه ،

ونفسي اقابل ( نفسي ) اخدها واعدي من ...

شرخ النفق

من أد إيه حاسس بغربة فـ جتتي ،

وكل قوضة فـ جسمي فيها حدّ ميت

كل يوم مليون جنازة بتمشي في عروقي وصويت ...

بيهد جوايا المدن

حاولت اروح التربة ادوّر عن ملامحي

لكن لقيت الخطوة برضه مزيفة

وماشي باسأل ( عني ) كل الأمكنة ،

ومش هاموت مرتاح بدون ...

ما اعتر علي .... وشي القديم

العنيــــدهـ

06-07-2011, 08:02 AM

واما زهقت من القعدة اللي بقالها سنين ...

مستنظر فيها رجوعي

قلت اما ابحث عني بشكل اكتر جدية ...

جوّة حارات الإنترنت

واما كتبت الاسم ودوست بسرعة ( الإنتر )

جاني الرد : ما هوش موجود

قمت مكمّل إسمي وكاتب لقبي السابع ،

جاني الرد : ما هوش موجود

شكلي وسني ... رقم تليفوني ...

وبيتي ووطني وبرضه الرد : ما هوش موجود

مدّيت إيدي ف جيبي سحبت بطاقتي ....

لقيت بياناتها : بياض في بياض

ولقيت صورتي بتسخر مني تقوللي : خرجت ومش هاتعود

الأوراق اللي ف دوسيهاتي بدون بيانات ،

والبيانات الفاضلة ف ذهني كمان مغشوشة

يوم واثنين بتأمل نفسي ،

واعصر ذهني : شفت دافين ؟ شفت دافين ؟

خدت خيالي ف رجلي وقلت هالفّ بلاد الله

يمكن اقبل حد فاكرني ،

واما ينادي عليّا ساعتها اعتر علي نفسي

بس لقيت الناس بتشوفني لأول مرة ،

ونا بالطبع بشوف الناس دي لأول مرة

دمعتي سالت ع الأسفلت ،

إستجمعت باقيت القوة اللي ف حنجرتي ..

وحاولت اصرخ

ف لقيت صوتي ما هوش موجود ،

وفضلت اجري .. أجري .. أجري

شكل العالم كله ساعتها ما كانش عاجبني ..

وهو بينده علي بعضيه ،

واما رجعت البيت مهزوم ..

جاني تليفون

واحد يظهر كان يعرفني

قاللي انا بابحث عنك فينك ؟

قلت اعذرني انا مش موجود .

العنيــــدهـ

06-07-2011, 08:02 AM

الدنيا سقعة ...

ولاّ أنا اللى ماشى عكس الاحساسات ؟

يمكن عشان أنا جلدى مات ...

من كتر نومى ع الحشف

ولا ّ الخلايا ف قلبى ماتت ع الصليب

ساعات باحس ان جناحاتى ..

عاجزة ترفع جتتى من الطين ,

والاقى نفسى باتلاشى ,

وباتحجم فى نقطة ,

وابدأ ارمى البوصلة واختار انى اتوه

مش شعر دا اللى بتسمعوه

دى دمعة من عقل الحكيم ..

اللى اكتشف جهله ..

فى أسهل مسالة

كل العواميد اللى شايلة حكمتى ..

أكل أساسها النمل وجيوش الجراد ,

والتوهة غطت عقلى بلحافها التقيل ,

والعالم الواسع ..

بقى ف عينى ... كقرص الاسبرين

ما بقاش فى عرق الرؤية دم

والمسافة اترهّلت ..

بين مركبى والشط ,

والريح المعاكس فض لى غشاء الشراع

داخل مع النفس ف صراع

وشىء طبيعى ..ان انا ..

ياإما انا اللى هااتهزم

واحّرم احدف فى السما شهبى ,

واشيل من ع الرفوف كتبى ,

واسلّم عقلى للسجان

أنا اتحجمت فى النقطة ,

وحتى النقطة مش لاقيالها لسه مكان

ونا آسف يا نفسى عشانى ..

ما لقيتشى .. لنفسى .. نفس غيرك ,

واتوضعتى .. فى المساحات الغلط

آسف يا روح

ما لقيتش روح ترد روحك ,

وانسجنتى .. فى الزنازين البراح

آسف على لهجة كلامى ,

وارتباكات الحروف

بس اللى عاش نفس الظروف

هايحس ان المعنى أكبر ..

م القواميس البليدة

باكتب عن الحاجة الوحيدة ..

اللى انا مافهمتهاش

رغم اننا

بنبص فى وشوش بعض لكن عمرنا ..

ما شفنا بعض ,

وكل واحد مننا ..

بيبص ع النص المعتم للقمر ,

ويفسر الضلمة بمعانى مضلمة

يعنى الغبار

هو اللى باين فى الصور ,

والجهل ماسك دفة المركب ,

وغارس فى الحشف

يوماتى باتعاطى الأسف

آسف باقولها للهوا اللى ما شمتّوش

لعمر عدى ماعشتهوش

آسف باقولها لنفسى قبل الشنق ..

بشوية ساعات

وخايف القى ان اللى مات ..

واحد برىء .. ما فهمتوش

ما تسألوش.... مانا زيكم

وهو ايه سرّ الأسف ..

غير ان بينى وبين وضوح المسألة ..

دخنة وغبار ؟

غير انى مش لاقى ف هدومى الا البخار ؟

ما عرفتش انى ...

نقطة شاردة فى الفلا ..

غير لمّا بصيت فى المرايا لقيتنى بانفخ ..

فى التماثيل الخشب

ما قدرتش انى اوهب لها لحظة حياة ,

ما قدرتش انى اوهب لها ..

الا الأسف

آسف يا عقلى المستباح

آسف يا روح

ما لقيتش روح ترد روحك ,

وانسجنتى ..

فى الزنازين البراح

العنيــــدهـ

06-07-2011, 08:03 AM

إرميلى طوق

لا الدّوامات بتشدنى ومحتاج لإيد ..

تسحبنى فوق

إرميلى طوق ..

أرجع به تانى لدنيتى

من أدّ إيه عمّال بعافر فى الغرق ،

واشرب فى ملح

وألف مركب رايحة جاية تبصّ لى ..

على إنى ميّت

رغم إن زفيرى بيهز الشطوط

وشافنى يطلع ألف حوت

ما حدّ فيهم حبّ (يبلعنى) ،

وسابونى اغطس واقبّ .. اغطس واقبّ ،

ومن حلاوة روحى باتعلقّ فى كتف الموج ،

واشبّ على الحشف ،

واحدف عنيّا لآخر السكة ومفيش ..

فى مداها ضوء

إرميلى طوق

لا الميّة زى التلج بتجمّد لى نبضى . .

والغرق رافع راياته الحمرا فوق عمرى ،

وقرّبتّ ...

رئتينى تتقايا الشهيق

مش وقت ليه أنا جيت هنا ،

مش وقت مين حدفنى من قلبه الخشب

دا وقت فاصل ..

بين حياة بتشد جدرها من عروقى ،

وموت بيغرينى بكفن

والوقت ضيق والهوا ..

بيهجّ من صدرى ،

وروحى استسلمت للريح

باموت .. باموت .. باموت

هاتسيبنى اموت بدون ما ترمى لعمرى قشّاية ؟

بدون .. ما تشّدنى لو " سنتى" فوق ؟

إرميلى طووووووق

إرميلى طوووق

إرميلى طووو ....

العنيــــدهـ

06-07-2011, 08:06 AM

ومش قادر ...

أمدّد رجلي ع الآخر ..

ولا افرد صدري واخد ..

م الهوا ........ شهقة

وضاق الكون علي جسمي

مع إني .... نحيل جداً ،

ومن كتر البعوض اللي افترس لحمي ..

راقات جلدي المكرمش هلهلت ع العضم ،

والضهر المأتب ... مش لاقيله براح ...

في صندوق السما الضيق

ولما عرفت إن انتي السبب ..

وانتي اللي ضيّقتي .... عليا الكون ..

بقيت رافضك ،

ومهما حاولتي تغريني بوعود فالصو مااصدقكيش ،

ومهما هتلبسيلي قميصك الشفاف ...

مفيش بينا احتمالات للخصوبة

والملاحدة اللي انتي عايزاني ابقي منهم واعبدك ..

بيكرّهوني فيكي أكتر ،

حسسوني ان الجواز منك خطيئة ...

بعد مافرشتي البكارة تحت رجلين الخطاة ،

وخفت منك ..

لما حسيت ان وشّي بينسرق من فوق مرايتك ،

والمساحيق الغبية ..

مش مخبيّة الدمامة اللي ف ملامحك ،

واما شفتك ع الحالادي ...

ابتديت اكسر مرايتك ...

لجل احرر وشّي من بروازك الضيق ،

رميت لروحي ( طوق )وفطمت نفسي ...

لمّا حسيت ان صدرك بيساومني ع الحياة ،

وقدرت اخليكي .... علي الهامش

بقيت املك في روحي بلاد ...

تساع الكون

وما استحملتش ابقي سجين ...

في كون ضيق علي جسمي

العنيــــدهـ

06-07-2011, 08:07 AM

أنا جيت لكم مدفوع

ومن يومها ..

ونا .. تايه ،

وببحث عن طريق ..

يرجّعني لبداياتي ..

وارجع حتّة الطين اللي فيّا ..

لـ تاجرة التماثيل ،

ويخرج طيفي من سردابكم الضيق ..

يفلفص .. للبراح

من يوم ما جيت ..

والسكة ناصبة لخطوتي مليون شرك ،

والخطوة شايلة لسكتي لفّة بارود

وتهمتي الأزلية إني غريب ..

و ضيف نازل علي أغراب ..

لا قابلينيّ علي سريرهم ..

ولا سريري بيسلم من خطاياهم

دبح الضباب بيننا الرؤي

فـ غسلت ننّ عنيّا بشوية تراب ،

وعرفت إن مكاني مش بين الرماد ..

ولا في الحارات الضّيقة ،

وفـ هدأة النفس اللي طهّرها الندي ..

طلّقت روحي من حريم الأمكنة ..

( تلت نوبات ) ،

وخايف اعصي ربنا ..

واعيش معاهم في الحرام

ونفسي اسلّم نفسي خالي من الشروخ ..

ومن الصدا ،

واديني بابحث ( جوّة روحي ) ..

عن طريقة للرجوع

ما تفكروش اخترتكم

دنا جيت لكم مدفوع

العنيــــدهـ

06-07-2011, 08:08 AM

نفّضت نفسي من العفار

مالقيتش تحت عفاري برضه الا العفار ،

وريش .. وردم .. وكوم هدوم

فقلعت كل هدومي والآخر لقيت ...

ما فضلش مني ...

غير يادوب اللي اتقلع

فـ عرفت إني ..

كنت لافف نفسي في شوية مفيش

سنين كتير مرت وانا ..

بانظر لنفسي في المرايا القي الضباب ...

مانعني م الرؤية ومفيش فوق الإزاز ...

غير نمنمة ،

أعمل لنفسي إشاعة تحت بنفسجية ...

برضه ما تبيّنش غير حفنة عفار ،

وضلمة بتأكد خطورة أزمتي

أخاف قوي ،

وارجع بضهري لحد ما اخبط في الفراغ ،

والقي الحقيقة اتمددت تحت الرماد ،

وسؤال شرس ...

يمسكني من ياقة القميص ويهزني :

لما انت م الأول عفار ...

طب ليه ما وجهتش لنفسك من زمان نفخة ...

وريّحت الوجود من أزمتك ؟

حطيت لساني في الجراب ،

وبلعت كل الاجوبة

عشان لقيت الاجوبة برضك عفار

دخلت قوضتي وابتديت ...

أبص تاني ف خلقتي ،

وانفخ قوي ... انفخ قوي

بعترت في القوضة العفار ،

وخرجت افتش ( عني ) خارج هيكلي

بس اتفاجئت بالمطر ،

والمية عوّمت العفار ،

والأرض شدتني ف شقوقها الغويطة ،

واتلقيت ...

صورتي اللي تايهة معلّقة ف كل الشقوق ،

فـ عرفت إني رجعت للبيت القديم .

العنيــــدهـ

06-07-2011, 08:11 AM

قاعد مع نفسى

كتفى فى كتفى من الزحام

يهتز بى قطر التأمّل

ينزل حفر .. يطلع تلال

أسرح .. تتوه الفكرة منى فى الجبال

وارجع ألملم . . .

شمل ذهنى من جديد

و المح بعيد ..

الشمس بتجرجر ..

فى ديل فستانها و تروّح

تعبانة ساندة فوق كتاف الغيم ،

بتتطوّح ،

و تسلّم الوردية لليل العجوز ،

و تخشّ قوضة نومها و تمدد

وقع النهار من ع الحصان

مات المكان

جلجل فى ودنى صوت خطاوى الصمت ،

بلعنى حوت الضلمة و لقيتنى

بقشّر نفسى و اتعرّى ،

و بدخل . . . جوّة جوّايا ،

و باخد نفسى من إيدى . . .

و بطلع فوق

أوصل . . . حدود الانسلاخ

تتقطّع الاسياخ و يهرب هدهدى

يطلع لآخر سلـّـمة فى الكون

إستسلمت كل الحواس للنور

خرجت من نفسى ..

اللى كل قوضها كانت ضيقة

و قلت لمّا ارتاح بقى

و نفضت عنى القشر و لبست الغمام

و سندت راسى ع السحاب

و بدأت انام

بدأت انام

العنيــــدهـ

06-07-2011, 08:12 AM

إلى .. نافخى النار ..

فوق حلبة ( صراع الـ .. حضارات )

بنعيش .. بنصّ روح

زاحفة الغيوم ..

ع الشمس تلحس ضيّها ،

و الليل جعان ..

سعران بيبلع في النجوم ،

و الصهد جاي يطردنا من جوّة الهدوم ،

لسه الهباب لازق على حيطان المشاعر ..

يخلق الإحساس من الضلع اللى ناخره السوس ،

و دم قلوبنا ع السكة ..

بيطرح ( شوك آلام )

من كام زمن ..

ونخلة الأحزان بترمي ..

فوق قلوب الناس رطب

رغم الوصايا .. ملينا ( دلو ) المعصية ..

من ( بير ) خطايانا ،

و بعنا ( نصّ روحنا ) للديدان ..

و بنصّ روحنا الباقي بنشحطط جتتنا ع الحشف ،

و نروى أزهار الحياة بالدم ،

و نحطم على اجبال الهدى ( الالواح )

لحد قلوبنا ما اتزحمت من التجاعيد ،

و نص نجومنا تاهت في المجرّة

و ( السلام ) ماتت عصافيره على ..

غصن ( المسرة )

مش بنادى بدين جديد

لكن ياريت .. من كل غيط ..

نجمع سنابله المثمرة و نعجن بهم ..

خبز السلام ،

و نرمى من فوق راسنا ( اكليل الآلام ) ،

و من عقولنا متاهة الأفكار ،

و في السكة اللى ممكن رجلنا تغرس ..

نخطىّ بدون ما نرمى حمولنا ع الألغام

ما دام النبع واحد ……

يبقى لازم نرتوي بالعدل

لا نعكّر لبعض الحوض ..

و لا نصبّ العطش في نهر أحلامنا ..

و لا نراهن خراب الكون ..

على اللى يشيل نعوش اكتر

يا ريت نقدر ..

نعيش في المنطقة البيضا ،

و نتمركز في خط الاستواء ،

نحرق كراكيب المشاعر ..

و السنين المؤلمة

عشان يساعنا الكون و نقدر ..

نمسح الدم اللى نازف م الكتب ،

و نقطع السّمّ اللى في ديول الكلام

ونا مش بنادي بدين جديد

لكن ياريت ..

من كل غيط ..

نجمع سنابله المثمرة و نعجن بهم ..

خبز السلام