ديوان الشاعر : سعد براك

[نــجــم]

لاتكبر براسك الفرقا

لاتـكـبـر بـراســك . الـفـرقــا وتـنـسـانـي محـدن عـرف قيـمـة الغالـيـن وأهـدرهـا
تـذكــر انــــك لـيـامــن ضــقــت تـلـقـانـي مـا احتـاج اذكـرك هـذى وانــت خابـرهـا
حـبـيـب روحـــي حـيـاتـي كـــل وجـدانــي بعـدك عـن العيـن حاجـه مــا اتصـورهـا
مـانــي مـشــارك بـحـبـك واحــــدٍ ثــانــي انــت اول احـبـاب قلـبـي وانـتـه اخـرهــا
ما امداني انسي خيالك صدق ما امداني جلـيـسـي الـبـارحـه والـعـيـن مسـهـرهـا
يـارهـبــة الـعـاطـفــة واعـــــز خــلانـــي خذني ( قصيدة توجـد ) وانـت شاعرهـا
يا اسهل من السهل وانت بهرجة لساني واصعب من دموع عينـي فـي محاجرهـا
يـا مصـغـرٍ فــي عيـونـي ظـلـم عـدوانـي عليـك اسـوق الخـواطـر وانــت جابـرهـا
اشتـقـت لــك والـغـيـاب يـزيــد حـرمـانـي قـوافــل الـوصــل مـــا هـلّــت بشـايـرهـا
اصابـنـي مـــن فـراقــك هـــم واضـنـانـي واخطاني الصبـر .. والصدمـات مقدرهـا

[نــجــم]

جنيـه الـذهـب


سبحـان رب المـلا والكـون سبحـانـه الحـمـد لــه والثـنـا والشـكـر والمـنّـه
الواحد اللى تخضع الروس من شانه نطلـبـه فالرشـد.والأصـلاح .والـجـنّـه
مـرّت بـى البـارحـه والعين.سهـرانـه والقلب من هاجسه يقرع كما الشنّـه
أراجـع العلـم.مـن سـاسـه وعنـوانـه وأجر مـن واهـجٍ وصـط الحشـا ونّـه
كـن المشـاريـه راحــت مالـهـا خـانـه حتـي جنيـه الذهـب مـا عـاد لـه رنّــه
علمـي بطيـرى كفـخ ويـرف جنحـانـه يا أهل المقانيص من رد الخبـر عنّـه
قرنـاس بكـرٍ حمـر مـاهـوب شيهـانـه أبعدت عنه الخطر وأثـر الخطـر منّـه
ياكيـف راع الأحسانـي ينكـر أحسانـه ماهيب فالشـرع والمعـروف والسنّّـه
ياكبـر هـم الصحيـب وغلطـة ألسـانـه ألـيـا تـمـادى بطيـشـه وأختـلـف ظـنّـه
أقفـى وعـاف المكـان وصــك بيبـانـه وأنــا عــن المخطـيـات أدراه وأحـنّـه
مـاكـن ديــوان راع الـعـرف ديـوانــه ولا كـن هيـلـى كـرمـه وطيبـتـي بـنّـه
شوف المعاليق من فرقـاك عطشانـه ضامـى وفوقـي لرعـاد المطـر حـنّـه!
صديت والنفـس مـن صدتـك خسرانـه أضحك وأظـم الوجـع فالصـدر وأكنّـه
البـيـت ماينبـنـى مـــن دون عـمـدانـه ثــن الخـبـر لاسمـعـت السالـفـه ثـنّــه
والـرجـل دربــه مــع خـالـه وعمـانـه مـحـزمـه فـالـلازمـات وفـنـهـم فــنّــه
الـعــلــم لاواجـــــه الــديـــان ديــانـــه وأقفيـت تبكـي وغيـرك ضاحـكٍ سـنّـه

[نــجــم]

عابر سبيل

كان ضـاق المكـان اللـي مـن أول مكـان أطـرقـى يـاقـدم رجـلـى . دروب الـرحـيـل
ليه أساير وأجامل . فـي هـروج اللسـان أحـسـن البـعـد . والله فــي عـبـاده كفـيـل
قـبـل تظـهـر خـفـيـات الـخـواطـر . بـيــان مابـديـنـاه . بـــن وهـيــل . تـالـيـه هــيــل
مـا جـزا مــدة الاحـسـان غـيـر الحـسـان سلمى وسلم . جدانـي . وسلـم . الاصيـل
دورت الوقت . حكمـة واضحـه . للعيـان يطوى الليل صبح .. ويطوى الصبـح ليـل
كــل شــيٍ يـهـون ألا فـــراق . الـخــوان وأكبـر الـهـم . نـكـران الـخـوى للجمـيـل
التجـارب مـدارس . والزمـان . الـزمـان والمراجل . صعيبه . والمكاسـب حصيـل
والجـدي نجـم ثـابـت لــه مكـانـه وشــان لكن النـاس . تفـرح عنـد مطلـع . سهيـل
وأنــت يـاذيـب لاتـنـزل شعـيـب الـطـمـان بيـن ضلـعٍ قصيـر . وبـيـن ضـلـعٍ طـويـل
فـيـك هقواتـنـا .وقــت القـسـا . واللـيـان وكـل هقـوه جزيـلـه . مالـهـا الا الجـزيـل
أنتـبـه ماعـلـى الدنـيـا . ثـبـات وضـمــان لاتـقـول الكثـيـر. يـعـوض فـيـه . القـلـيـل
أعـتـبـر ياصحـيـبـي .. والله المـسـتـعـان مـال وادي النخيـل الا شـمـوخ . النخـيـل
وكان ضاق المكان اللي . من أول مكان جيت عابـر سبيـل .. ورحـت عابـر سبيـل

[نــجــم]

شرايد فكر

مايفعـل الرجـل يبقـى لــه وينـسـب لــه وأنـا علـي مسهمـى وأعـرف معـدالـي
والغصـن مايحمـل الجـذع أيتسـرب لـه والغصـن لاهـب ذعـذاع الهـوى مـالـي
واللـيـث لاراح عـمــره يـارثــه شـبـلـه حـكـمـة ودورات بـقـعـا مـالـهـا تــالــي
عـديّـت فــي مـرقـبٍ كـنـت أتـرقـب لــه والله . يامسـهـبـات الـمـرقـب الـعـالــي
فــي ليـلـةٍ كـــن داجـيـهـا فـقــد سـبـلـه وأنــا عـلـي سهـرهـا رجِـلـي وخـيـالـي
أضـيـف بـيـت القصـيـدة وأتـعــزب لـــه وأجِــر مــن واهــجٍ بـالـصـدر مـوالــي
أغـنــي الـبـيـت وأسـلّــم وأرحـــب لـــه زادت علّـي الـطـواري وأشغـلـت بـالـي
شـرايـد الفـكـر والـهـرج أتحـسـب لـــه بنـات فـكـر القصـيـد الــوان وأشكـالـي
تـهـزنـي لـسـبـب لــيــن أتـسـبــب لــــه وأفـطـن عليـهـا بمخـراجـي ومـدخـالـي
وأفـنــد الـعـلـم مـــره وأتـعـصــب لــــه وأتابـع الــدرب لـيـن أشــوف مدهـالـي
وأمــد حـبـلـي وأعـقــده وأتـكــرب لـــه وآرد علي جمّتـه وأشـرب مـن أحبالـي
الطـاري اللـي مــن البـعـد أتـقـرب لــه وأنـا علـي نيتـي وأمـشـي عـلـي فـالـي
لاصـب بالفـكـر مــا غـيـر أتصـبـب لــه وأسقيه من صلب راسي هيـل فنجالـي
أراجـعــه وأتـقــرا فـيــه وأكـتــب لــــه وأهـــم لـــه وأتـعـمـق فـيــه وأهـتـالـي
والجـادل اللـي بوسـط أعيونهـا الذبـلـه أشــوف فيـهـا نـمــط حـلّــي وتـرحـالـي
يكـبـر غـلاهـا ومنهجـهـا منـاسـب لـــه هـي مامـضـى مــن سنـيـن وماتبقـالـي
مـا كنّهـا الا عـروس وعـهـدي الدبـلـه وخصـومـهـا هـــم عـدويـنـي وعـذالــي
عنقا يخضب لهـا السيـف وتخضـب لـه خـونــدة الـزيــن سـبـحـان الله الـوالــي
سمـحـت محـيّـا عليـهـا رسـمـة القبـلـه فـيـهــا تــزيــن الـقـصـايـد والـتـغـزالـي
أخــاف للـوقـت ينشبـهـا وتـنـشـب لـــه وأخــاف لاتجـمـع الأول عـلـي الـتـالـي
وأخــاف لاطـيـش زمرتـهـا تحـبـب لـــه وتـروح مـا بيـن نيبـان أشهـب الـلالـي
أشّــرق العـلـم وأجِـنـب وأتـغــرب لـــه وأشّمـل وأسـج القـدم فالفنتـق الخالـي
من يعرف الذود مايرخص حليـب أبلـه والـلـي يـسـوق الجـمـال يـقـال جمـالـي
ولاكـل واحـد سمـان الحيـل تقصـب لـه ولايثبـت الهـرج غيـر بطـيـب الافعـالـي
والـلـي يـقـول المـهـنـد يـرشــد الأبـلــه قولوا له إن الدلّي تضرب علي الجالي

[نــجــم]

أتحمل غيبتك

ياحـبـيـبـي يــــا ســنــا الـصــبــح يـاغــايــة مــنـــاى والله إن امــفــارقـــك هـــــــم ومـــلاقــــاك عــــيــــد
ويــن . رحــت ؟ وعقـبـك الــراى يـصـدم كـــل راى ويـــن . رحـــت ؟ الله يـجـازيـك . يـالـعـقـد الـفـريــد
غـبــت ‍‍! وغـيـابـك قـهــر وأنـــت . يـاكــل أخـدنــاى من .. مغيبك .. غاب الألهـام عـن .. بيـت القصيـد
لــيــه ؟ تــهــدم مــــا بـنـيـنـاه .. وتـخـيّــب رجـــــاى لــيــه ؟ تــرحــل وأنــــت الأول وفـالـقـلـب الـوحـيــد
بـــــارك الله فــيـــك .. يــاجـــرح قـلــبــي يـــــادواى غيـبـتـك .. مــاهــى قـلـيـلـه وأنــــا مــانــي سـعـيــد
ياحبيـبـي .. يــا أصـــدق الـنــاس يـاسـبـة . عـنــاى الـمـشـاعـر .. بــعــد غـيـبـتــك .. عــيّـــت لاتـهــيــد
أذكــر إنــك .. كــل مــا قـلــت لـــى يـسـعـد مـســاى هيـجـنـت .. لـــب . القـصـايـد . وسـجـلــت الـجـديــد
معك .. واضح في مزاياى .. وأحسب لك .. خطاى كــل خـطـوه .. فــي طريـقـك .لـهـا عـنـدي . نـشـيـد
قاصـدك .. مانـيـب للغـيـر .. لــو عـنـدك .. قـصـاى عـاشــقــك .. والــشـــوق رذراذ . والايـــــام بـــيـــد
منتهـى بـك .. مبتـدي بــك .يــا صـوتـي يــا صــداى ما معى .. ياغير .. دعوى .. عسا عمرك .. مديـد
أتــعـــذر فـالــزعــل . مــنـــك وألـقــابــك رضــــــاى وأتـرضـى بــك .. زعـــل خـاطــري . وأقـــول زيـــد
ضحـكـتـك قـــدام .. عـيـنـي ..وهـمـسـاتـك .. وراى ونـظـرةٍ .. تـرسـم لــى الــدرب .. كـالـراى السـديـد
كـنـت . أورد عــد الأحــلام وأقـطـع بــك . ضـمــاى كـنــت . أعـانــد فـــي محـبـتـك .. وابـقـابــك عـنـيــد
كنـت . تعنـى لــى مــدى الـحـب وأنــت أبـعـد مــداى كـنـت.. أفـيـدك عـشــق وأنـــا أدرى أنّـــى مستـفـيـد
كـنــت . فـــي عـيـنـك أدوّر عـلــى مـعـنــى غــــلاى كـنـت .. فـيـك أهــرب مــن الـهـم وأبـعـد بــك بعـيـد
كـنـت . فـيـك أقــرب هــواوى وأطــرز بــك هـــواى كنت . فيني . تزرع . الحـب . وأشواقـي .. حصيـد
كنت . شوفـي .. فالهـوى . يـوم يذبحنـي .. عمـاى كنـت . أقـيّـد لــك مشـاعـر .. فــؤادي . قـيـد . قـيـد
والله أنّـــى بـعــد .. غيـبـتـك .ضـايــع مـــن جـــداى مــا بـقــى .. غـيــر الهـواجـيـس .. تـفـعـل مـاتـريـد
اتـحـمـل غيـبـتـك .. لأجــــل مـاتـضـحـك .. عــــداى وأبــتــدى لـلـشـعـر .شــكــواى . وأعــــده عـضــيــد
لـيــه. أحـطــك مـرحـلـه . وأنـــت مـخـلـوقٍ مـعــاى يكـفـى .. إنــك . فالقصـايـد . وفــي حـبـل . الـوريـد

[نــجــم]

يافهد


الله الــدايـــم ولا غـــيـــر الله الـمـعــبــود دايــــــم جّـل شـان الـلـي يـعـز الـنـاس وإن راد أيحقـرهـا
الله اللـي فيـه ألـوذ امـن الخـطـر صـاحـي ونـايـم مـا ألـوذ الا بوجـهـه مــن بــلا الـنـاس وخطـرهـا
والله إن الـطـيــب سـمـعــة والـغـنـايـم بـالـعـزايـم والله إن الـمـرجـلـة صـعـبــه ولا كـــــلٍ قــدرهـــا
مايحـوز المرجلـة شخـصٍ عــن الـطـولات شـايـم كــل مــا حـانـت لوازمـهـا خـطـا رجـلـه قـصـرهـا
والــرجــل مـايـلـحـق الـدنـيــا تـحـســاف ونــدايــم يفتـكـر مــن واقــع الدنـيـا ويـاخــذ مـــن عـبـرهـا
والـمـواقـف عـنــد اهـلـهــا فـالـجـديـد وفـالـقـدايـم وصفهـا وصـف العنـود وطعنـة الساطـي مهـرهـا
والـكـرم مـثــل الـبـنـا والـبـخـل مـذمــوم وهـدايــم البـخـل يـهـدم وجــود النـفـس كالسـيـل ايعـمـرهـا
والـــردى بـيــت الـخــراب وكـــل سـكـانـه زلايـــم والـــزلايـــم مـاتـمــيــز بـطـنــهــا وألا ظــهــرهـــا
جـعـل يفـنـي راعــي الـهـزلات ملـعـون الـرسـايـم مـن علـي الدنيـا ويبقـي مـن قطـف جـزلا ثمـرهـا
والفخـر مـاهـوب فــي كـبـر السـوالـف والعمـايـم الـفـخـر نـومــاس فـعــل وطــولــةٍ كــــل ذكــرهــا
يـافـهــد يــاخــوي لاهــبـــت ذعــاذيـــع الـنـسـايــم ذكرتـنـي فــي غــلا هــاك السنـيـن وفــي قمـرهـا
واحـــدٍ قــســم معـالـيـقـي عــلــي حــبــه قـسـايــم مـاش ضـلـعٍ فالضـلـوع الـعـوج مـامـر وعبـرهـا
كـن مرباعـه حشـاى وواســم اضلـوعـي وسـايـم وفـوق هـذا فالمشاعـر مرتهـي واشـواقـي أرهــا
والله إنــــه فـالـغــلا والــحــب مـايـلـحـقـه لايـــــم زلـتـه تـدمـح وعـثــرات الـهــوى مـنــه اعـذرهــا
منـه فــي درب الـغـلا والـحـب يــا حـلـو الهـزايـم الهزيـمـه مـنـه نـصـر وكـسـرة الخـاطـر جـبـرهـا
مايجـي صوبـه مـن اقصـي القلـب لـوم ولا تهايـم سامحتـه العـيـن لــو حـبـه سـبـب كـثـرة سهـرهـا
مـن عفافـه والحيـا تـوخـذ مــن اطبـوعـه عـلايـم عـنــه يـابـعـد الـشـكـوك وكـــل ريـبــه محتـقـرهـا
وش علـيـه أمتـمـمٍ شـعـري عـلــي حـبــه تـمـايـم والقـصـايـد هـــو معانـيـهـا وهـــو سـيّــد بـحـرهـا
بس غاب وصرت عقبه عن هوى الخفرات صايم كـل طرقـة حـب مـع غـيـره تـرانـي مــا أعتبـرهـا
غاب وأنـا فـي هـواه امـن الولـع والشـوق هايـم الله يسامحـه فــي فـايـام السنـيـن وفــي شهـرهـا
والله إن اغيـاب مـن تهـوى مـن أكـبـار الجـرايـم الـفـراق أحـيــان يـهـلـك نـفــس ويـعـجـل قـدرهــا
والله الــدايـــم ولا غــيـــر الله الـمـعـبــود دايــــــم فـي رجـاه ألـوذ مـن شـر السنيـن ومـن خطـرهـا

[نــجــم]

صوتك للغلا نبره

مـن لاعتبرنـى ليامـن جيـت مـا اعتـبـره هـاذي طبوعـي وهــاذي كلـمـة السـانـي
جربـت فالوقـت لـيـن اخــذت لــى خـبـره مـن دور عــوج السنـيـن الـلـي تحـدانـي
انــا لـيــا زاد هـــم الـقـلـب مـــن كـبــره اطـلـقــت لـلـريــح خـفـاقــي وجـنـحـانــي
مـؤمـن وضـيـق الـجـوارح قـاطـعٍ دبــره عـاقـل وكــن السـعـه بـيـتـي وريـضـانـي
دورات بقـعـا وصـكــات الـزمــن عـبــره والــدايــم الله وعــمــر الادمــــي فــانــي
تـبــى تـعــرف الـفـتـي فـالـشـدّه اخـتـبـره لاجـــــات شـداتــهــا يـظــهــر بـلـيـهـانـي
يــذرع مـعـك فالقـسـا ويـمـد لــك شـبـره ويـقـول عــدوان مــن رافـقـت عـدوانــي
وإلاّ الـــردى فالـشـدايـد يفـتـقـد صــبــره يقصـر عـن الطايـلـه ويـمـوت خسـرانـي
الــــذل بـيـتــه وقــــل الـمـرجـلـه قــبــره يرقـص علـي شاربـه تسعـيـن شيطـانـي
اهـل الـردى والجـحـود ابـخـوت منثـبـره واهـل الكـرم والوفـاء للطـيـب عنـوانـي
ويـن انــت يالـلـي بصـوتـك للـغـلا نـبـره عـقـبــك تـغـدانــي الــوجـــد وتـعـشـانــي
اشعـب ذلــول الـطـواري واكـتـم العـبـره اخـــاف لا أعـيــون حــســادي تـقـرّانــي
كسـر الخواطـر بهجـرك واللـقـاء جـبـره تـعـال وأجـبـر بوصـلـك كـسـر هجـرانـي
اسرع ترى الجرح جرحك فالحشا وأبره عـالــج جــروحــك ودورّنــــي وتـلـقـانـي
وان كـان مافـاد فيـك الشعـر مـع حبـره ريّــح ضمـيـرك ولا تتـعـب عـلـي شـانـي

[نــجــم]

الـبـارحـه حــســةٍ فـالـصــدر وانـسـاقــت يالله بـعــفــوك وغــفــرانــك وسـامـحــنــا
امـــن المـقـاديـر جـــا للـنـفـس مــالاقــت اعـمــارنــا درس والـدنــيــا مـسـارحــنــا
لو ضاقت الارض قلنا الارض ما ضاقت مــاغــيّــرت دورة الــدنــيـــا مـلامــحــنــا
يالصـاحـب الـلـي يمـيـنـك عـــز مـابـاقـت تـفــرع بـهــا سـاعــة الهـيـجـا وتفـرحـنـا
رفـاقـتــي مــعــك مــازلّـــت ولا هــاقـــت الا ســنـــود الــعـــلا تــرقـــاه وافـلـحــنــا
مـانـيـب جـاحــد فـعــول الـطـيـب لاتـاقــت الـجــحــد نـقــطــع يـديــنــه مايـصـافـحـنـا
حـنــا دمـحـنـا خـطــاك ونـفـسـنـا راقــــت حــرصٍ عـلـي عـشـرتـك قـــدام تدمـحـنـا
يالـيـت عيـنـك بـصـدري فالخـفـى واقـــت قـــدام فـــي خـنـجـرك تـطـعــن وتـذبـحـنـا
الواجـب إنـك لـيـا شـفـت الـعـرب حـاقـت تـوقـف لـهـم واجـــب الـرفـقـة وتمـدحـنـا
وإن قلت غلطـة وحـق النفـس مـا ذاقـت ويـــن الـثـقـة قـبــل فـالـبـارود تـقـدحـنـا؟
ياصاحبـي لــو تـتـوق النـفـس واشتـاقـت لـلـي مـضـا قـلــت لـــك مـاعــاد تربـحـنـا
ارجـوك والنفـس شالـت فـوق مـا طاقـت خــــلّ الـسـوالــف بــصــدرك لاتـجـرحـنـا
وإن شفت شرهة سعد فوق الحكى فاقت قــــل عــذرهــا رزقــنــا وإلآ مصـالـحـنـا
الـيـا انثـنـت خطـوتـك فـالـدرب وانعـاقـت قـلـنـا ســـلام الـمــوادع وانـــت بـايـحـنـا

[نــجــم]

عاد الايام حمل والليالي شهود

ذخـر يالصبـر مفتـاح الفـرج والـخـلاص لكـن احيـان ياصبـر الـعـرب لــك حــدود
ليه نصبر على ضرب القنـا والرصـاص دامـنـا ســادة المـوقـف لـيـا هـــب نـــود
حان وقت الكلام وحـان وقـت القصـاص بعـد طـاح الـرّواق وبـعـد طــاح العـمـود
مـا لـك الله عـن ادروب المقـدّر مـنـاص يـاحــدور الـوطــا والا الـعــلا والـسـنـود
بـهــر الـدلــة الـشـقـرا ومـــد الـخــلاص يافـهـد بـعـد مــا بـاحـت كـبــار الـســدود
يابن ابويـه عضيـدي حـاول الامتصـاص ثـورتـي غاضـبـه وانـــا لـهــودي لـهــود
راح ركـب الرفاقـة بــاص يقـفـاه بــاص ســوّد الله وجــه ابـلـيـس الايـــام ســـود
كيـف يلحـق عـلّـو الشامـخـات انتـقـاص جعـلـك الـويـل ياعـيـن الـعـدا والحـسـود
مايـوصـل نـمـاص الا طـريـق الـنـمـاص بيـن هـاك الجـبـال وبـيـن هــاك الحـيـود
يعني الوضع خصص والعلوم اختصاص يحـددانـا تــرى مــا كـــل شـــي مـحـمـود
اذهـنـوا قولـنـا يـــا مبـعـديـن الـخــراص كـل عـودٍ ولــه دخــان والطـيـب عــود ؟
قبـل تـردون حــوضٍ حـاشـه الاختـبـاص اشعـبـوا ركبـكـم عـلــي قـــراح الـعــدود
لاتبـيـعـون قــــدر الـغـالـيـة بـالـرخــاص ماتـعـوّض هـبـوط اهـــل الحـمـيّـا نـقــود
خـلّـوا الصـيـد لـلـي يـعــرف الاقـتـنـاص عـــاد الايـــام حـمّــل واللـيـالـي شـهــود

[نــجــم]

كـايـده


يامنـاديـنـي مـــن الـبـعـد والـقـلـب وهــــواه مابقـي فالعقـل هـاجـوس بـيـتٍ مــن قصـيـد
مـيـر دوبــك دوب والقـلـب لاتلـحـق قـصــاه اعتبرنـي فــي سكـوتـي وقـلـت الـلـي تـريـد
مايفيـد الهـرج والقـلـب ضـايـق مــن جــداه يمكـن ألقـي فـي سكوتـي سعـة شـيٍ مفـيـد
وكـان ودك تحفـظ العلـم وتـصـون الـوصـاه لـقّـنــي بــالــك وســجّــل لـعــلــك تـسـتـفـيـد
ولاتقـاطـعـنـي بتـلـمـيـح وأقــــوال الــــرواه العـلـوم أبـــلا بـراهـيـن ماتـحـسـب رصـيــد
ليـلـنـا لـيــل الـسـهـر قبـلـنـا مـحــدٍ ســــراه والسهر مخطر على العيـن والطـاري مديـد
قـــوم بـهــر دلـــة الـكـيـف يـامــال الـغـنــاه وشـب نـارٍ سمرهـا سـمـر وأوقـدهـا وقـيـد
ولاتــزل الـبـن عـجـلان لـيــن يـفــوح مـــاه ودنــا فنـجـال يبـعـد خـــوا الـــراس ويـهـيـد
ياخـوا راسـي مـن الوقـت لينـه مـن قـسـاه والقـدر يطـوي مـن العمـر وأشغالـي تـزيـد
ميـر لــولا رحـمـة الـلـي تـعـلاّ فــي سـمـاه فــي عـبـاده كـــان يـمــدي عزايـمـنـا تـبـيـد
جــل شـانـه عـالـم الغـيـب مانـرجـي ســواه والمشـاعـر عــن منـاجـاة جـــوده ماتـحـيـد
مـاحـدٍ غـيـره تعـفـر لـــه أخـشــوم وجـبــاه فالثـرا مـن سجـدة الفـرض لـلـرب الحمـيـد
طـاعـتـه عـــزه وتنـفـيـذة أحـكـامــه نــجــاه أحـمــده وأشــكــر عـطـايــاه رزاق الـعـبـيـد
يـارفـيـق الـــدرب والـلــي ورا قـلـبـي وراه لاتـقـارب خـطـوة الــدرب والمـسـري بـعـيـد
لاتــقــول الــلــي بـديـنــاه وصــــل مـنـتـهـاه وأنت لـك صولـه وجولـه ووقفـات وعضيـد
أعتبرهـا كبـوة أحـصـان مــا خــارت قــواه تجـربـة مــا يـفـقـه أدروسـهــا قـلــبٍ بـلـيـد
وأعتبرنـا سيفـك اللـي علـي روس الطـغـاه سلّنـا فـي ساعـة الضـيـق وأبـشـر بالاكـيـد
كـــل جـــرحٍ يـاعـريـب المـجـانـي لـــه دواه وأنت زوماتـك دوا الجـرح والـراي السديـد
شفت ذاك اللـي يـدور علـي شقـرت عصـاه فـوق راسـه نشقـر العلـم بكـره مــن جـديـد
هو سوات أمقيط وأمقيـط راحـت بـه رشـاه سجلوبـه مـضـرب أمـثـال مــا سـجـل فقـيـد
وأنـت لـو ترحـل فقيـده لربـعـه مــع اعــداه جعل عمرك خير وان مت في موتـك شهيـد
مارميـتـه مـيـر ربــك عـلـي الغلـطـه رمــاه فأصبعـه يـطـرف عيـونـه شـقـيّ ولا سعـيـد
غلطة الشاطـر علـي احمـاه دربالـه حصـاه وبعـد كبـرت جـاك يضـرب براسـه فالحـديـد
حـب نفسـه والتملـك عـلـي الضيـعـه حــداه جـاريٍ بـه ماجـرا الــدم فــي حـبـل الـوريـد
راكـب الـلـي يـطـوى الــدرب لامـنـه وطــاه منـوه الضرمـان للـوصـل والــراس العنـيـد
ذاخــره وقــت المـلازيـم يــوم إنـــه شـــراه لا طـرا الطـاري وجــا يــوم تنفـيـذ الوعـيـد
لاتـسـاوا فــوق كـشـنـه وثـبــت فـــي يـــداه كـنــه الـمـيـراج بالـفـعـل والـطـرقـات مـيــد
وارد السـايـر ولـكـزس ولا يكـشـف غـبــاه شيـكـوه امـــن الـوكـالـه وسـمــوه الـفـريـد
جيـب وجهـه كنـه الـذيـب والطـرقـة عـشـاه ولا يعـومـس راكـبـه كــن هزعـاتـه نـشـيـد
الرسـالـة مـعـك والـخـط يحـمـل مــا حــواه مـعـك امـانـه وصــل الـخـط للـقـرم العمـيـد
ابـن ناجـي راعـى الجـود يفـرح مـن نصـاه مامـشـي درب الـمـهـازل ولا حـولــه نـقـيـد
فزعة الصاحب للاصحاب طيب وفرض جاه وبورت الصاحب فالاصحـاب كالـذل الشديـد
كيـف مافـزع والرفـاقـه لـهـا حــق وطــراه والرفيـق اعـداه نوقـف لـهـم مـثـل الضـديـد
ماتربيـنـا عـلـي الــذل مــن شـــان الـحـيـاه ماربيـنـا ألا عـلــي الـعــز والـمـجـد التـلـيـد
أن فعلنـا نضـرب الـروس وتـهـاب الـرعـاه وإن عفينـا مـن تواضـع وديـن ويـوم عـيـد
والله أنّــا فالمـواقـف كـمـا أجـبـال الـسـراه وكـــان ردت للقـصـايـد صـنـاديــد الـقـصـيـد
يابـن ناقـي راعـى الطـيـب مايلـحـق جــزاه وانـــت راع الاولـــه كـــل مــازدنــا تــزيــد
مـن رقـى مرقـاب الامجـاد مايرغـب وطــاه وانـت مرقابـك مـن المـجـد حـيـدٍ بـعـد حـيـد
والله إنــك حـافـظ الطـيـب حفـطـك لـلـصـلاه وراثـن مـجـدك مــن ابــوك وابــوك العقـيـد
ماخـسـر فــي ربـوتـه يــوم شـرواكـم ربــاه واصـلٍ فالـحـق وان قـالـوا الصـيـده تصـيـد
اشهـدنـك تـعـرف السـلّـم يــا حـامــل لـــواه والشـهـادة حــق مـاهــى رسـالــة فالـبـريـد
مـــا نـجـامـل فالحـقـايـق ولا نـاخــذ زكــــاه يشـهـد التـاريـخ بالـعـدل يالـسـاس الـجـويـد
ولانـحـط الـذيـب فالـقـدر كـنــه فـعــل شـــاه وانــت ذيــبٍ للفعـايـل وسـيـف أبــن الولـيـد
كـل طيّـب عـرف يفـزع اذا الـواجـب دعــاه مـايـقـصـر خـطـوتــه فالـمـواجـيـب ويـعـيــد
الـنـعـاره فالريـاجـيـل نـــوع امـــن الـغـنــاه والشـدايـد تـظـهـر الـرجــل والـزايــد يـزيــد
ويامنادينـي مــن البـعـد والـصـوت وصــداه أعتبرني في صدى الصوت قلت اللـي تريـد

[نــجــم]

صداقة وخوّه

آمـنــت بالله حـامــى الـديــن والـبـيـت وتـبـعـت نـهــج آخـــر نـبــي فـالـنـبـوّه
ويممـت وجهـي صـوب بيتـه وصليـت سبحـانـه الـلـي معـتـلـي فـــي عـلّــوه
انـا بشـر يـا كـثـر ماصـبـت واخطـيـت مااحتـاج عـن بعـض الدعـاوى انــوّه
كــم ليـلـة فــي راس مـرقـاب عـديـت واقـــول تـــو الـعـمـر والـوقــت تـــوّه
وفــيّــت يــاواقــع حـيــاتــي وكـفّــيــت جـاريـتـنـي وانــــا كـسـبــت الــجــروّه
علـى جـروحـك يــا زمـانـي تسامـيـت والـرجـل تـعـرف هيبـتـه مــن سـمـوّه
انشـهـدنـي يــــوم خــاويــت خــاويــت الصـبـر فــي طـيـش الـزمـان وهــدوّه
بـورة رفـيـق الــدرب مـثـل الدنامـيـت أليا انفجـر يحـدث علـى الوصـل هـوّه
ياصـاحـبـي والـيــا دلـهــت وتنـاسـيـت دربك خضـر واللـي علـى البـال سـوّه
مانـيـب تـابـع خطـوتـك كــان صـديــت الـيــا احتـمـيـت انـــا كـبـيـر الـحـمـوّه
الـيــا تـغـشـلاك الـغــرور وتغـشـلـيـت بـيـت الخـيـال أكـسـر عـمـوده وطــوّه
افـطـن تــرا مهـمـا وصـلـت وتعـلـيـت لازال وضــعــك بــيــن لـتـيــه ولــــوّه
لاتــاخــذك نــعــرة كــبــرت وتـقـويــت مـاتــوخــذ الـدنــيــا مـكــابــر وقـــــوّه
ويـاك عـن شـذب العراقـيـب لااقفـيـت شـــذب الـقـفـا لـلــى قـلـيــل الــربــوّه
عيب الفتي اللي يذبح الطيب والصيت لابــاع ربـعـه لاجــل يـرضــى عـــدوّه
واعـرف تـرا طبـع الرجـال العناتـيـت الـيــا نـــوت تـلـجـم لـســان الـمـفــوّه
لارحــت مـانـي نـاشـدك لـيـه ماجـيـت وإن جـيـت تـبـشـر فالـنـقـا والـمــروّه
لــو فـيـه فالديـنـا شــرور وطواغـيـت لازال فـالـدنــيــا صـــداقـــة وخـــــــوّه

[نــجــم]

بوح


امــوتــك وأعـيـشــك بالـحـنـايـا حـنـيــن وبـــــوح وآلاقـــيـــك بــــــادن فـالـتـفـاصـيــل وأنــفــاســـي
أحـسّـك عـديــل الـــروح مـــدرى بجـسـمـي روح بعـيـنـي .. بقـلـبـي . فالشـرايـيـن . وإحـسـاســي
أنــا أحـتـاج ضحـكـك طيبـتـك صـوتـك المـبـحـوح إلــــك . بــحــةٍ مـنـهــا يــوقــف شــعــر راســــي
علـيـك الأمــان وكــل طيـشـك . مـعـي مـسـمـوح أعـذرك . وأسـامـح وانــت بالـحـب . يــا قـاسـي
تـصــدق حبـيـبـي لـــك بـوســط الـفــؤاد صـــروح بناهـا الولـع . والـشـوق واحساسـهـا . سـاسـي
بـعـد كــل هـــذا . ويـــن رايـــح ولـيــه . تـــروح فـراقــك . وصـــدك. سـبــة الــهــم . واتـعـاســي
لاتستـعـذب .. الهـجـران مــا بالجـفـا . مصـلـوح وبــاب الـوصـل .. مفـتـوح يـالـدالـه .. الـنـاسـي
ومهـمـا تغـيـب .. يـظـل بــاب الـوصـل . مفـتـوح وثابت .... على وصلك كما . الشامخ . الراسي
لـو إن الزمـن يجـري . وصـدر . اللقـا مـجـروح وأخـاف الامانـي .. تنتـحـر فــي .. فـضـا يـاسـي
اببـقـا . عـلـى عـهـد الـوفـا والقـصـايـد .. بـــوح وأسجلك .. في شعـري .. وأحفظـك .. بكراسـي

[نــجــم]

مقبرة حزن

كل ماتطرى علـى البـال يـا الريـم الفـروع اكـتــم الـونّــه بــصــدرٍ لطـعـانـتـك وطــــن
اشهـدنـك غـبـت عـنــي وغيـبـاتـك تـــروع واشـهـدنـك غـالــيٍ مـاتـقــدر فــــي ثــمــن
امحلـت ريضـان قلـبـي وضـاقـن الضـلـوع بــارك الله فــي فـراقـك وصـكـات الـزمــن
يـا مطـوّل فـي غيابـك وانـا مانـي خضـوع كـاسـبٍ مــن جــور فـرقـاك مـاهـد الـبــدن
لاتـطـوّل فــي غيـابـك وأسـمـيـك الـقـطـوع المشـاعـر كنـهـا خـيـل والـطــارى رســـن
انتشلني من عنا الحـزن واسبـاب الدمـوع كـن عينـي (مقبـرة حـزن) وجفونـي كفـن
رحـت والواقـع بعـد رحـت خلانـي جــزوع والسنـيـن اتـمـر غـبـرا ولا فـيـهـا حـســن
استمـد الصبـر يومـيـن والضيـقـة اسـبـوع مـا بقابـي حـيـل ورمــاح هجـرانـك سـطـن
كـل ماتطـري علـى البـال ولّعـت الشـمـوع واستـكـن اشــواق قلـبـي وقلـبـي ماسـكـن
ضاميٍ وصلك واباموت ما أعلنت الرجوع عنـك .. لـو هـم التفاريـق فـي قلبـي قطـن

[نــجــم]

بـرق غيمـه

ليـه تبطـي والبطـا مذمـوم فـي سـلـم الـولايـف ياعـديـمٍ مكسـبـي مــن جــور غيبـاتـك هزيـمـه
رحت والروحه هى الروحه وخلّيـت الحسايـف تـاخـذ القـلـب الحـزيـن بدربـهـا مـثـل الغنـيـمـه
فاح صدري والمشاعر جيش ياعذب الوصايف كــل ماصـفـت عـلـى التفكـيـر ذبـيـت الخريـمـه
يــا معـودنـي عـلـى حـبـك وهمسـاتـك طـرايـف لا تجـر القلـب مـن نعمـة هـواك الـيـا جحيـمـه
لاتصيّـف فـي مصـر صيّـف بقلـبٍ لـك مصايـف عيش في نبضه وحط هموم قلبك فـي صميمـه
دام لـك فالقلـب ياعـيـن الـرضـا مـنـزال نـايـف اطعن الهجران في سيف المواصـل والعزيمـه
صاحبك ماهوب من دور الزمان الشين خايف القنـاعـة كـنـز والمـقـدار عـــز وراس شـيـمـه
خايـف إنّــك تستـلـذ البـعـد وأشــوف الكـلايـف وانـت تـدري بالجفـا مكـروه وطعونـه عظيـمـه
عود لى فالبعد عنـي وش حـداك ويـش شايـف مابقابـي صبـر وابعـادك عـن عيـونـي جريـمـه
رد لـى عجـزت اكـيّـف خـاطـرٍ مـاهـوب كـايـف كـن تحتـى زلزلـة واهـس وفوقـى بـرق غيمـه

[نــجــم]

من باب الفضول

يا مفارقني وانا من فراقك ويش اقـول غيـر يالله يـا معيـن القـلـوب الصـابـره
يامسـوى شـي يذهـل وهجرانـك ذهـول يامعلّقـنـي بطـيـف الـهـجـوس الـعـابـره
انت وينك رحت يـا عـلّ بعـدك مايطـول ياخى ارجع واترك الهجر واقطع دابره
لاتخلّيني على الظـن وأنصـاف الحلـول والله ان الصـبـر ملـيـت وأنـــا اكـابــره
طـال مشـوار التجافـي وزادن الحمـول كـيـف تجفـانـي وقــدرك بقلـبـي خـابـره
يابتـول التيّـه وانتـه مـن التيّـه البـتـول لك غـلا يـذرع فـؤادي وعشـقٍ شابـره
اعتبرنـي لاتوجـدت مـن بـاب الفـضـول لاتعاتـبـنـي وطـاريــك فـكــري ســابــره
انت مذهلنـى وملهـم قصيـدي والميـول كــل معـلـوقٍ بقـلـبـي غـرامــك قـابــره
فارعٍ يرتع بك الحسـن وطغـاك القبـول بعـدك امحـطـم فــؤادي وقـربـك جـابـره
يارواية حلم الاعماق في كـل الفصـول شوفتـك تلغـي همـوم السنيـن الغـابـره

[نــجــم]

شاعر المرقاب

الا يالـغـزال الـمـتـرف الـرايــق الـجــذاب عليـك القلـوب وحـدب الاضـلاع مكتـوفـه
سمّـى الظبـي يـا سـارق الـلـب والالـبـاب انــا البـارحـه مـابـيـن طـاريــك وطـيـوفـه
اسامـر خيالـك واتمنـى واحسـب احسـاب لـو ان الرجـل بأمنـاه مـا يلحـق اشفـوفـه
ليا مرّ طيفك قلت يا ( ثـورة الاعصـاب) والا غاب فاض والوجد وألحقته احسوفه
احــطـــك بـقـلـبــي وتـلــقــاك فــالاهـــداب تكـلـف فـــؤادي فـيــك والـعـيـن مكـلـوفـه
لـك السبـق فـي تأكـيـد يـاحـب يــا غــلاّب ولـي سبـق فـي دوامـة الـوقـت وظـروفـه
بعد غبت عن عيني وقلت الغيـاب اغيـاب بـدا فالقصيـد اشـعـاف والــروح ملهـوفـه
انـا مـن غيـابـك ياحبـيـب الـغـلا منـصـاب صـواب علاجـه منـك بالصـوت والشوفـه
فتح بَعد عينـك عـن عيونـى دروب وبـاب وركّــز فـراقـك خـنـجـر الـبـعـد وسـيـوفـه
بقـلـبٍ علـيـك الـيـا طــواه الحـنـيـن وذاب كمـا جملـة مـن صفحـة اعـراب محذوفـه
لايلحقك لومي من غيابـك وراسـي شـاب ويصـبـح فـراقـك رمــز للـوقـت وحـتـوفـه
بـلاش الغيـاب الله يلومـك بــدون اسـبـاب مالك حق مير ارجع وديـن المحـب اوفـه
يكفيك سهري بوح شعـرى مـع الاعجـاب علـى رغـم بعـدك فــي معانـيـه وحـروفـه
وانا يكفي انـي شاعـرٍ مـن هـل المرقـاب يسجـل علـى صفـحـات الابــداع معـزوفـه

[نــجــم]

استحوا ياصحافه 2


قـولـوا لـسـرّاق المواضـيـع حـتـيـش سرقـة جهـود الغيـر عيـب وسخـافـه
اللـي يـدور مـن ورى سرقتـه عيـش نكسـر عظـم سـاقـه ونـطـوى لحـافـه
نفـعـل ولانلـحـق ورى فعـلـنـا لـيــش مـانـتـبـع الايــــام غــبــن وحـسـافــه
وأن عوّدت للسيف والخيل والجيـش حـنــا عـلــى روس المـعـاديـن آفــــه
نـشـرب شهالـيـلٍ مـطـرهـا نـقـاريـش مـــن مـدلـهـمٍ زافـــةٍ عـقــب زافــــه
ماهو عطش ولا الضمايـر معاطيـش الآ الـفـخـر والــعــز ورث وخــلافــه
الحـر الاشقـر للعـلا ينهـض الـريـش ولاتـعـلّــق فــــي رقــبـــة الــزرافـــه
فـي عالـي المرقـاب والآ الدراويـش ضـاعـوا مابـيـن التـافـهـه واللـقـافـه
مـرقـابـنـا وقـفـاتـنـا مـالـهــا قــيـــش ماهـيـب قـــص ولـــزق ولا خـرافــه
نبنيـك فـي جـهـد العـيـال المداغـيـش ربـعٍ عـلـى الـطـولات فيـهـم صـلافـه
هيضك ذهب مثل المزون المراهيش وغيضـك يغيـض مـدوريـن الطـرافـه
مرقاب ابو زيد المسمى عن الطيش لبـسـت بـشـت المرجـلـه والنـضـافـه
السبق لك واهل الطراشه مطاريـش يقولـهـا الـلـي يحـتـمـى بـــدع قـافــه
بـعـض معـديـن الصحـافـه خفـافـيـش الـلـيـل سـتــره والـنـهــار انـكـشـافـه
ان كان شهرتهـم بسـرق وبخاشيـش حــنــا خـذيـنـاهــا بـجــهــد وكــلافـــه
السـرق والتزيـيـف ماوكـلـوا عـيـش ماهي ميانه (واستحوا يـا صحافـه)

[نــجــم]

كبيرة بحقي

سـقـا الله طـيــفٍ كـــل مـبـغـى لـذيــذ الـنــوم تـهـادى عـلّــى وطـيّــر الـنــوم مـــن عـيـنـي
علـيـك العـتـب والـحـق والـلـوم يتـبـع لـــوم يــا راع الـثـمـان الـلــي غـيـابـه مقاصـيـنـي
هــذا الـحـول حــلّ وكـــل يـــومٍ قـفـيّـه يـــوم وانـــا بــيــن ذاكــرنــي حـبـيـبـي ونـاسـيـنـي
ياشـيـن الـطـواري والهواجـيـس للـمـحـروم تـقـول انـهـا تـاكـل وتـشـرب مـــن اسنـيـنـي
يــاراع الغـيـاب الـلــي عـلـيّـه تـزومــه زوم عـسـا مـنـت نــاوى عـقـب ضحـكـك تبكيـنـي
ماغيـر أتهجـى (مالنـا الله عـن المقـسـوم) وانــــا والله ان الــهــم والــوجــد طـاويـنــي
عـلامـك بـعــد قـرّبــت يـمــك بـعـيـد الـحــوم وانــا فــي غـرامـك كـــن قـلـبـي موصـيـنـي
طعنـت الـفـؤاد بسـيـف فـرقـا مـاهـو مثـلـوم وضيـقـت صــدري لـيــن ضـاقــت شرايـيـنـي
كبـيـره بحـقـي يــوم سـمـت المـفـارق ســوم وانـا كنـت اراعـي لــك واحسـبـك تراعيـنـي
زمـــانٍ مـضــى واشـواقـنـا كـنـهـن الــتــوم لـيـا عــاث بـــي شـــوق الـتـولـع تواسـيـنـي
وهالحـيـن كـنـك مـنـت فــي واقـعـي مـلـزوم تـغـيّـرت عــنــي عــقــب مـنـتــه مصـافـيـنـي
تبي الصدق ضعت و ضيعتي ضيعة المنجوم لـــعـــل الـلـيــالــي فـالـمـقـابـيـل تـرضـيــنــي
بعـد مـات حبـك وانتـهـي قـلـت لــه مـرحـوم غـــرامـــك تـــوفـــى والــبــقــا لاتـعــزيــنــي

[نــجــم]

قيمة الشعر

مـايـقــدر قـيــمــة الـشــعــر . عــبّــاد الـنــفــوس قـدر بـيـت الـشـعــر تـلـقــاه فــي قـلــب الـجـزيــل
شــاعـــرٍ تــوخـــذ قــصــايــده عــبـــرات ودروس مـاتـصـنــع فـالـهـجـيـنــي ولا الـبــحــر الـطــويــل
لا تــأمــل ســبــك قــافــه بـعــيــديــن الــرمـــوس صـفـقــوا لــه كــن مـالــه عـلــى الـدنـيــا مـثـيــل
كـن حـبـكـه لـلـمـعـانـي عـلـى الـجـزل مـغــروس شــرّد افـكــاره تـوصّــف عـلــى الـظــل الـظـلـيــل
مـابـحـث عـن شـهـره اعـلام وأغـرتـه الـفـلـوس غـيـر قـدره رايـة الـطـيـب والـسـيــف الـصـقـيــل
فــارقٍ والـفــضــل لــلــه حــيــث الـــروس روس فـيــض مـوهـبـتــه لـحـالــه يـمـثــل شـعــر جـيــل
يـا مـسـاعـد يـخـوا الـراس مـن كـثـر الـهـجـوس والـسـنــيــن تـــروح والـعــمــر مـابــاقــى ذبــيــل
الـرمـاح اوقــوف واجـروحـهــا مـثــل الـجـلــوس كــن قـلـبــي مـرتــع الـجــرح وعـروقــي مـقـيــل
طـالــت الـطـرقــة وغــرّات دنــيــاي الـعــســوس طـيـشــهــا مـســمــوم وزنــادهــا يــقــدح فـتــيــل
لـيـلــة الـبــارح مــع الـوجــد والـحــظ الـعـبــوس لـيــت لـحـظــوظ الـريـاجـيــل يــا مـسـاعــد بـديــل
كـل مـايـطـرق عـلـى الـبـال طـيـف الـعـيـطـمـوس يـتـضــح لــى خــف نـفــســي وانـــا والله ثـقــيــل
عـشـت يـاسـرٍ بـقـلـبـي عــن الـنــاس مـحــروس حـرز عـن عـيـن الـحـواسـيـد وهــروج الـهـبـيــل
مـاعـلـيـك اشـعــب ركـابــك ودوس الـبـعــد دوس مـا انـتــه اول مــن طـعـنــي بـنـكــران الـجـمـيــل
واذكـر انّــى حـانــى الـغــدر عـنــك حـنــو قــوس لاتـشــايــلــك الــروابـــع وغــــدرك مـسـتــحــيــل
مـابـذرتــك فـالـحـشــا بـــذر والـتـفـكــيــر كـــوس بــاذرك بـــذر الــوفــا فـــي مـواقــيــف الاصــيــل
رح وخـل الـقـلـب سـالـمـك يـا حـرب الـبـســوس واعـتـبـرنــي مــنــك مـقــتــول والا ابـــك قـتــيــل
وانـتـبـه .. حــدّ الـطـمـوحــات كـنــه حــد مــوس لاتـغــيّــرك الـمــظــاهــر ويــجــرفــك الـمــســيــل
لاتـعـيــش الـــدور كــامــل وتــاخــذك الـطــقــوس ثــم تـرجــع تـالــى الـوقــت مـاعــنــدك حـصــيــل

[نــجــم]

حنا بدو

ســلام يـــا شـعــر القـصـيـد الـفـلّـه مـن بـاب كـيـت الشـعـر والآ كيـتـه
نسنس هوى الغربي يا شعب الحلّه ونـسـاق موصلـهـا عـلــي تكـريـتـه
ويـن انـت سـارح يـا حبيـب الشـلّـه لاصــــــار لاجــبــتــه ولا وديـــتــــه
اركـد لاتـوقـف فــوق جـمـر المَـلـه يــخــصــك الـــرجـــال مـاخـصـيـتــه
احفـظ طرفـك وفــرض ربــك صـلّـه واطـلــب مـــن الله كـــل ماصلـيـتـه
وإن كـــان قـلـبـك ماتـجـيـه الـذلّــه قـلـهـا بـوجــه الــرجــل لامـاشـيـتـه
عـلـيــك بـالـرجــال واتــــرك ظــلّــه دام الـقــدم صـاحــي لـيــا سـجـيـتـه
لاتـلـحـق الــــزلاّت الاولــــي زلّــــه يـامـا نصحـتـك والضـمـيـر ابـريـتـه
حـنــا عـقـدنـا حـبــل وأنـــت تـحـلّـه صـفّـا مـزاجـك وأنــت مــا صفـيـتـه
لـحـظـه ؟.بـغـنـي فـالـغــزل وأتــلّــه يــزيـــن طــاروقـــه لــيـــا غـنـيـتــه
لـبّــا الـعـيـون الـنـعّــس الـمـحـولّـه ولـبّـا الـكـلام الــذرب يـخـرب بيـتـه
ولبّـا الغنـج والمـلـح وابـهـي طـلّـه ولــبّــا اشــقــرٍ نــاعــم ولا كـديـتــه
ولبّـا القصيـد اللـي يجـي فــي حـلّـه خصـوص فـي وصفـك لـيـا سويـتـه
حــنـــا بـــــدو وقـلـوبـنــا مـحـتــلّــه وانـتـي جمـالـك مــاش لــو ولـيـتـه
متفـرعـنـه والـزيــن عـنــدك كــلّــه فالـشـعـر لــــو اكـتـبــه مـاجـاريـتـه
يـافـوح قـلـبـي مـثــل فـــوح الـدلّــه لاجــاب صـوتـك هاتـفـي واوحـيـتـه
الـصـوت هــذا مسمـعـي بـيـتٍ لّـــه مـغـرى بصـوتـك والـفـؤاد اغريـتـه
يـامـرحـبـا تـرحـيــب صــــادق والله يــاواحــدٍ مــــن غـيــرتــه حـبـيـتــه
لايـزعـلـك هـــرج الـعـلـل والـعـلّــه لوهـم بـحـر فــي خنـصـري رجيـتـه
خــلــي كـــــلام الـعــالــم الـمـنـفـلّـه طـريـقــهــم بـــأمـــوت مـامــريــتــه
ولـيــا شـذبـونـي ضايـعـيـن الـمـلّــه قـولـي لـهـم فـعـلـه مـثـبـت صـيـتـه
واخــذي مـثـل بـيـت وعـلـيـه أدلّـــه من فكر( شاعر صح ) يبدع بيتـه
آخـــر قـصـيـد مـحـمــد الــجــار الله (ماكـل شخـص اصادفـه خاويـتـه)

[نــجــم]

http://www.n7bkm.com/vb/images/myframes/3_cul.gifطيحة شجاع

شف عبرة الوقت لاحظ كم سقط من قناع واقنـع .. وخـل القناعـة منهلـك وارتـوى
الـيـا تجمـلّـت قـالــوا حـــاول المسـتـطـاع واليا تكلمـت حـق اتصيـر مـا انتـه سـوى
لاتزبن الضيـق وفجـوج الاراضـي وسـاع ألـو الصعايـب قبـل يـلـوى ذراعــك لــوى
اظروف الايام صـاع وقـلّ الاوفـاق صـاع الي متي ... كـل ليلـة فيـه نجـم يهـوى ؟
ماهزنـي فـي زمانـي غيـر طيحـة شـجـاع شف عاد طيحة شجاع وفي عيون ابدوى
ياصعـبـهـا فالـهـجـوم ومــرّهــا فـالـدفــاع وش عاد باقي بعد طيحة شجاع وخوى ؟
مـا كانـت الريـح هبـة ريـح عنـد الشـراع والبحـر مـا كـان للغـواص صـدر حـمـوى
ملّيـت كـثـر الـهـروج ورغـبـة الاستـمـاع يطـويـنـي الـعـمـر والـغـايــات مـاتـنـطـوى
يـا صاحبـي والـجـواب الـلـي بلـيـا خــداع ابكـانـي الـوقـت مـيـر الله رحــوم وقـــوى
اضحـك نهـار اللقـا واصبـر نهـار الـوداع الشمـس ماتنحـجـب والـحـر مــا ينـشـوى
بـكـره تـهـل الـمـزون ويـرتـوى كــل قــاع وتلقـي علـى كـل نايـف ضلـع ذيـب يعـوى

[نــجــم]

اشواق الغلا

طاريـك واحـداث الغـرام ومـزايـاك وفـرايـد الشـعـر الجمـيـل وسنعـهـا
معـي واحددهـا علـي جـال ذكــراك واقضـم غضبهـا واتهجـى ورعـهـا
لـو كـان صـدك يفلـج بـنـود لقـيـاك دورتـلـك كلـمـة وقـلــت استمـعـهـا
لكـن ؟ صداتـك وهجـرك وجـفـواك ماهيـب لـك بـس العنـاد اصطنعـهـا
بعدين يامتـرف هـل الحسـن ويـاك لا انـتـه بشاريـهـا ولا قـلـت بـعـهـا
محبتـك .. جـيـره وحـيـره ولــولاك ما اغض عينـي والمدامـع وجعهـا
اسايـر الايـام .. مـن بـاب الادراك مـــن لاتـعـلــم سـيـرتــه مانـفـعـهـا
تعال من طيشك ترى القلب ملفـاك وأقلـط علـي مشاعـري وانتزعـهـا
تعال سولـف عـن مقيلـك لمسـراك تـراك فــي بــال الخـواطـر ومعـهـا
مـحـتـاج اغـنــي وتـأمــل مـحـيــاك واختـار لحـروف الـغـلا وابتدعـهـا
وعلمك وش صار لـى يـوم فرقـاك ضـرايـب الفـرقـا خـفـوقـي دفـعـهـا
ميـت مـن اشـواق الغـلا واتحـراك سنـه ونفسـي موتـهـا مــن ولعـهـا
شفني مابين ادناك واراجع اقصاك اجـمـع شـرايـد فكـرتـي واقتطعـهـا
اقـول فـي نفسـي ليـا حــل طـريـاك ان كــان ماطاعـتـك الايــام طعـهـا
انسـاك ؟ قلـي كـيـف بالله ابنـسـاك وصلك دواء نفسـي وبعـدك فجعهـا
ويـلاه ياقـربـك وشـوفـك ولا مــاك قـــدام لاروحـــي تـخـالـف سنـعـهـا

[نــجــم]

سميّـة المـزن

لبـيـه ... يالـلـي .. تسولفـنـي ... مشاعـرهـا
غيـداءً ... ليـا .. ذعــذع الغـربـي .. تمنـانـي


البارحـه .. سولـف .. الشـعـر .. لمحاجـرهـا
واليوم .. هذه .. دموعي .. وسط .. الاعياني


القصة .. اللي .. عجـز .. شعـري .. يعبرهـا
اخـاف .. لابطـي .. عليـهـا .. ثــم .. تنسـانـي


سميّـة المـزن .. كــن .. الــذوق .. ماطـرهـا
تسـقـي .. بكلماتـهـا .. نبـضـي ... ووجـدانـي


يخضر لهـا الشعـر ... ليـن الفكـر .. يثمرهـا
واقطف .. حروف أسمها .. صح الله ألساني


تـمـد .. عــرق الـغـلا فــي . قـلـب شاعـرهـا
وتمـون .. لاسولفـت .. بأسمـي .. وعنوانـي


في وجه .. الاحزان ... واللوعات .. ذاخرها
الـلـي يـبـدد .. وفـاهـا .. لـوعــة .. احـزانــي


لــو .. ضامـنـي وقــت .. مـاكـدرت خاطـرهـا
مـتـي .. مــا تحتاجـنـي .. تبـشـر .. وتلقـانـي


وشلـون .. ماعزهـا .. واشـفـق .. واقـدرهـا
اللي .. تسوق .. الغلا .. كلـه .. علـي شانـي

[نــجــم]

التجربة قاموس والشعر قاموس


يـدق فـي بالـي مـن البعـد هـاجـوس واجــر صـوتـي بالـقـوافـي وأغـنــيّ
لو إنهـا بالـروس ومصـادم الـروس ضحكة حجاجي قبـل ضحكـات سنّـي
يا خوى لابسني من الحزن ملبـوس كــنـــه تـلـبـسـنـي تـلــبّــاس جــنّـــي
رجلٍ من صدوف المقادير محسوس مانيـب مــع جــور الـزمـان متهـنّـي
احبس بصدري هم والدمع محبـوس وارجي مـن الله صبـر والعـزم منّـي
التجربـة قامـوس والشعـر قامـوس والـلـي يبيـنـي يـاخــذ الـعـلـم عـنّــي
ماتـوخـذ الدنـيـا عـلاقــات وفـلــوس لـو إن نـجـر اهــل المصـالـح يـدنّـي
بكـره يبيّـن كـل مــا كــان مـدسـوس وانــا عـلـي نهـجـي وظـنّــي وفـنّــي
الله يثيـب نـفـوس ويعـاقـب انـفـوس تـغـيـر انـفــوس الـعــرب ماشـحـنّـي
اما الظفـر يابـاري الـروح والقـوس والا الـمـمــات ولا حــيــاة الـتـمـنّـي

[نــجــم]

المعدن الغالي

مــن لايـقـدر رفـيـقـي لا يعـاهـدنـي حتي لو إنه ولد عمي وابـن خالـي
كانـه علـي رفقتـي للقـرم حاسدنـي لاعـاد يطـري عليـه ايــدق جـوالـي
انا انتقي عشـرة الغالـي وتسعدنـي وقت الشدايد يبيـن المعـدن الغالـي
اسنـده فـي حـزة الـلازم ويسنـدنـي ولا تـروّح هقاويـنـا عـلـي الخـالـي
يابو محمد ظروف الوقت تحصدنـي وانـا علـي هقوتـك رجلـي وخيالـي
اجـاهـد العـمـر وسنيـنـه تجاهـدنـي واشرب فناجيلهـا ماشـرب فنجالـي
من خوف لااطيح والحزن يتسيدني احسب لمخراج رجلي قبل مدخالـي
تدري وش اللي مع الدنيـا معقدنـي ومكـبـرٍ حسـرتـي ومـضـيـقٍ بـالــي
إن اقرب النـاس بالهـرج يتصيدنـي وانا ليا ضاق جيته مرخـصٍ حالـي
مـاقـلـتـلـك يـارفـيـقــي لاتـنـاقـدنــي لو شفتنـي بالسكـوت احطـم امالـي
خلك معـي وان طلبتـك فايـدة فدنـي تشابهـة فـي عيونـي كـل الازوالـي
ما الله علي تبعت المقفيـن قاردنـي وانا زحول الرجال اتسولف افعالي
شاعر وربعـي لهـم فخـرٍ مجسدنـي قضـايـة الـلازمـة حـمـايـة الـتـالـي
افعالـهـم هـيـل واسمـاهـم تقـنـدنـي تقول تقطع ضرم راسـي وغربالـي
والله علـي باقـي ايامـي يساعـدنـي ويعينـنـي بالصـبـر ويـكـيـد عـذالــي
ان مـت مـحـدٍ مــع الايــام فاقـدنـي الآ رجال الوفـاء والمعـدن الغالـي

[فادي الشلاحي]

صح لسان الشاعر ولاهنت على هالنقل,,

[العنيــــدهـ]

صح لسسسانه
ولاهنت على رووعة الإنتقاء
يعطيك العافيه
!..❥

[احاسيس مشتاقه]

يعطيك العافيه على روعة الانتقاء

[سلطانة]

http://www.halauae.com/uploads/images/alsaher-3814931317.gif

[نــجــم]

http://www.halauae.com/uploads/images/alsaher-3814931317.gif
يسعدني ويشرفني مرورك العطر

تقديري لكـ

[نــجــم]

صح لسان الشاعر ولاهنت على هالنقل,,
يسعدني ويشرفني مرورك العطر

تقديري لكـ

[نــجــم]

صح لسسسانه
ولاهنت على رووعة الإنتقاء
يعطيك العافيه
!..❥
يسعدني ويشرفني مرورك العطر

تقديري لكـ

[نــجــم]

يعطيك العافيه على روعة الانتقاء
يسعدني ويشرفني مرورك العطر

تقديري لكـ

[يارا العامرية]

سلمت هـ اليمين ع حسن الانتقــآء ..
عافاك المولى وأسسسسعدك ..
تقديري ,,

[منادي]

صح لسان الشاعر
اشكرك نجم على التنسيق الرائع
الله يعطيك 1000 عافيه
و
تحية اعجاب لمن يستحق الاعجاب
منادي

[نــجــم]

صح لسان الشاعر
اشكرك نجم على التنسيق الرائع
الله يعطيك 1000 عافيه
و
تحية اعجاب لمن يستحق الاعجاب
منادي
يسعدني ويشرفني مرورك العطر

تقديري لكـ

[نــجــم]

سلمت هـ اليمين ع حسن الانتقــآء ..
عافاك المولى وأسسسسعدك ..
تقديري ,,
يسعدني ويشرفني مرورك العطر

تقديري لكـ

[๚ פـگآيـۃ ڦـڷپـے ▪▪]

صح آلله لسآنه..
يسلموآ على آلآنتقآء ذوق والله..
http://www.lamst-a.com/vb/images/smilies/kitty%20(120).gif

[نــجــم]

يسعدني ويشرفني مرورك العطر

تقديري لكـ

[سموالذات]

شكراً على النقل

[نــجــم]

يسعدني ويشرفني مرورك العطر

تقديري لكـ

[شبيه اللول]

أشكرك على طرحك المتميز

يعطيك ألف عافية

[نــجــم]

يسعدني ويشرفني مرورك العطر

تقديري لكـ

[نجمة الصباح]

http://smiles.al-wed.com/smiles/13/flowers_221.gif




شكرا لك
والله يعطيك العافية
http://smiles.al-wed.com/smiles/13/flowers_221.gif

[الدلوٍوٍعه]

صح لسانه ولاهنت يانجم ع الديووان الرائع
يعطيك العافيه

[نــجــم]

صح لسانه ولاهنت يانجم ع الديووان الرائع
يعطيك العافيه

يسعدني ويشرفني مرورك العطر

تقديري لكـ

[نــجــم]

http://smiles.al-wed.com/smiles/13/flowers_221.gif





شكرا لك
والله يعطيك العافية

http://smiles.al-wed.com/smiles/13/flowers_221.gif

يسعدني ويشرفني مرورك العطر

تقديري لكـ