ديوان [الشاعر تركي الديحاني]

[نــجــم]

ديوان [الشاعر تركي الديحاني]


السلام عليكم ورحمة الله وبركاته


سوف أطرح مجموعه من قصائد الشاعر الإعلامي المعروف / تركي الديحاني أحد الشعراء

المعروفين في الساحه الشعرية...

وأتمنى أن تنال إعجابكم ...


بسم الله نبدأ


قصيدة عــطــور اجــمــل


ياحبي نيلك كثـر ماغبـت فـي عيـدك
شف وش كثـر غيبتـك بالعيـد يامهمـل
كملـت فـي كـل شـي الا مواعيـدك
صحيح من قال عمـر الزيـن مايكمـل ؟
جرحتنـي كثـر مشـتـاق العناقـيـدك
والجرح يدمـل وجـرح الخـل مايدمـل
اصبحـت حـدي ثمـل سبـة مواريـدك
وانـا اتحـدى مـن يشوفـك ولايثمـل ؟
محـدٍ يقـاوم شعـرك الثايـر وجيـدك
وعيونـك الناعسـه وخـدودك المخمـل
وعطـرك طبيعـي واذا زوّدت تنهيـدك
اقول راحت عليكـم ياعطـور اجمـل !
مهمـا اوصّفـك يبـن النـاس ماجيـدك
انت اكبر امن الوصايـف كلهـا واشمـل
قطعت ساعـة زمـن وادمنـت ترديـدك
وان غبت تبقى جميل واليا رجعت اجمل ؟
فراقنـا صعـب ؟ لا بيـدي ولابـيـدك
واثنيننـا عالفـراق الصعـب مانصمـل

[نــجــم]

قصيدة تجارب الدنيا

الشعر موعـد فكـر مابيـن الحقيقـه والخيـال
يجسـد الواقـع وتاريـخ العـرب وحروبـهـا
غالي مثل صرف الذهب واحن من شوق الوصال
واحر من شمس الكويـت اليـا بـدى لاهوبهـا
وقصديتي طرقى بتـول وكـل مافيهـا جمـال
عشاقهـا واجـد وانـا مـن بينهـم محبوبـهـا
ماكنهـا الا بنـت عـودٍ مارزقـهْ الله عـيـال
يبسـط لهـا كـف الحنـان وتبشـر ابمطلوبهـا
ولو كل شاعر في قصيده يوصل الحـدْ الكمـال
ماشفـت نـاسٍ تبهـر الدنيـا ونـاسٍ دوبـهـا
وتجارب الدنيا تعلمنـا الجـواب امـن السـؤال
واهل الردى لجـل مصالحهـا تمـوت قلوبهـا
الرجل ودّك كـل ماجالـه مـع العالـم مجـال
يقـول كلمـة حـق والهرجـه بحلـو سلوبهـا
بعض البشر ماتعترف بالطيب وتحـب الهـزال
من قال كلمـه طايشـه لـو بالغلـط طاروبهـا
ياكم صميدع راس بالمجلـس سريـع الانفعـال
تمسك عليه المخطيه لـو كـان ماهـو صوبهـا
في هالزمـن مايقهـرك الا خفافيـش الرجـال
اللـي تعـذرب بالبشـر ولاتشـوف عيوبـهـا
الستـر نعمـه واكثـر الانعـام تاليـهـا زوال
ونـاسٍ سترهـا ثوبهـا نـاسٍ فضحهـا ثوبهـا
الصيت دنيـن الرعـد والفعـل بـرّاق الخيـال
والشمس ماتحجب ابد حتـى ابوقـت غروبهـا
والصدر صندوق الهمـوم اللـي بهدنيـا تشـال
ولو الامـل ماخفّـت همـوم البشـر وذنوبهـا
والعقل ميزان الرجـل والقلـب ساحـه للقتـال
ودايـم عناويـن الرجـال تعمـلـكْ مكتوبـهـا
ماهو صحيح ان الولد طيبه يجيه امـن الخـوال
يطيب لامـن صـارت افعالـه علـى ماجوبهـا
اقولها من تجربـه يـوم التجـارب راس مـال
واخطي مثل حال العـرب ساداتهـا وشعوبهـا
والادمـي لـو ماتعلَـم واستفـاد امـن الليـال
مثـل اللـذي فـي ديرتـه ولايعـرف دروبهـا
يـارس سقهـا للسمـا معـاد للصبـر احتمـال
وانـت مثـل حـرٍ تعلّـى والوسـاع ايجوبهـا
خابرك ياطيـر السعـد دايـم تبشّـر بالجـزال
وترجع علـي باللـي حلاهـا زايـلٍ عذروبهـا
حتى ليامن انشدوني ويش جبـت امـن الثقـال
اقول جبـت اللـي بعيديـن النظـر حسبوبهـا
قصيـدةٍ جمعـت فيهـا الواقعـيّـه والخـيـال
وصلتهـا بسهـل طريقـه واعتمـدت اسلوبهـا

[نــجــم]

قصيدة سجن انفرادي

الحب مثل الجسد والشوق الادمـان
وان جيت اعاند ماينفعنـي عنـادي
يافارع الطول ارفق قـدر الامكـان
ابهتنـي لـو دقيقـه فـي رقـادي
سجنتني في غلاتك وانـت سجـان
والمشكله مْحبتك سجن انفـرادي ؟!
ماقـول احبـك ومتولـع وهيمـان
احس هذا الكـلام اليـوم عـادي !
انت اكبر امن المشاعر يطرق
البان والمدح في حضرتك شي اعتيـادي
والشاعر اللي يشبّه فيـك غلطـان
فرقت فرق البياض امـن السـوادي
معاك اعيش الهوى والبال طربـان
حتى لو اني في وادي وانـت وادي
اذكرك لاطار طيـر وهـل هتـان
ولا غنّى بو نوره ودنـدن عبـادي
ملامحك قدم عينـي كـل الاحيـان
وشلـون ابنسـاك ياملحـي وزادي
عالي مكانك وتسكن وسط الاعيـان
ثابت واذا طحـت مكانـك فـؤادي
الحب دايم ينرفـز قلـب الانسـان
لكن معك صار طبع الحـب هـادي
وان كان حبي لشخصك كبوة حصان
الله على الكبـوه ومطيـب جـوادي
تعال وخل الاماكن شعـر والحـان
شهرين اصوّت على اسمك وانـادي
ماحسْ بالغربه وتوديـع الاوطـان
لاصرت وياي وعيونك بـلادي

[نــجــم]

قصيدة الـوصـيّه !!


ذعذع النسناس والنسنـاس لاذعـذع حزيـن
ويوم الربوع اثنينه وعشرين من مارس غبـر


خلاك ترحل عن حبيبك بس ماعلّمـت ويـن
من يومها ياراعي الغيبـات لاحـس وخبـر


والمشكله انّي دايم محافظ على حبـك واميـن
وغـلاك شبّـر مهجتـي شبـر شبـر شبـر


علاقتي ويّاك مبطي يالغضي واعرفْـك زيـن
حبك تربّـع بالحشـا اليـن ماشـاب وكبـر


متسلسلن حبّك بخفاقـي علـى مـر السنيـن
مثل سلالة اطيب الاشيـا وذود ابـن صبـر


وفي شوفتك تضحكلي الدنيا وكل هـمٍ يزيـن
وفي غيبتك من شافني يقول ذا مدمـن خبـر


غنيتلك حسبي علـى الايـام والحـظ اللعيـن
وانا قبل في شوفتـك غنيتلـك يسمـر عبـر


تعال اسكن وسط قلبٍ نبضه اشـواق وحنيـن
وابيك تجبر خاطر الخفـاق مبطـي ماجبـر


اكتبك من دم الوريد بكل وقـت وكـل حيـن
القلب صفحة ذكريات الحـب والـدم الحبـر


اصبح غلايه درسْ يدرس في صفوف العاشقين
وانت تعرف تركي عدل مابه غرور ولاكبـر


اخذتٍ من دنياي علم يرجّح العقـل الرزيـن
واخذت من شلفا هدبك اليا رمش درس وعبر


بعيد واليا احتجتني بينـي وبينـك خطوتيـن
ماكنّـك الا ساكـن الدمـام يـاراع الخـبـر


واصبر على جور الزمن والله يعين الصابرين
بس انت لامن غبت لا والله ماعنـدي صبـر


عندي وصيّـه والوصيـه كلبوهـا حاجتيـن
اما تعال ابقى معي والا انـت تحفرلـي قبـر

[نــجــم]

قصيدة فديت زولك يابعد كل الازوال


فديت زولـك يابعـد كـل الازوال
مشاعري ويـاك ماهـي شحيحـه
غيرك يبي من صادق الشوق موال
والا انت هاضت معك كل القر يحه
لك بالحشا هيبه وتقديـر واجـلال
وغلاك مثل طويق محـدٍ يزيحـه
شاعر وشعري في وصايفك يختال
ويح القصيد ان ماكتب فيك ويحـه
كلي فدا العينييك مع حبّـة الخـال
اللي طرف من شفتـك مستريحـه
واغليك في كل الليالي والاحـوال
وعلى مدار الوقت ونّـه وصيحـه
عليك ياللي خاصرك كـل مامـال
ضاقت علي كل الفجوج الفسيحـه
انا اقـول الحـب موجـود لازال
وانتـا تقـول الحـب الله يبيحـه
وتقول طاحت قيمته صـار بريـال
ولاعاد اميّز اجملـه عـن قبيحـه
واقولّـك تعلّقـت كـل الامــال
فيك انت ياطب القلوب الجريحـه
والحب ماعذرب مطاليق وارجـال
لو ان حب الوقت طيحه وطيحـه
وانا اعترف ربع المحبييـن عقـال
وثلثينـه المتـرديـه والنطيـحـه
وانا من اللي حبهم يشـرح البـال
ولا حب يعطي والمحبـه نصيحـه
ماني من اللي شاف محبوبه وقـال
فجّرتنـي تفجيـر غـزّه واريحـه
اهم شي مـن بيننـا ود ووصـال
والصـد انـا طالبـك لا تستبيحـه
بهّرتلك من دلـة الشـوق فنجـال
وفنجالها يعجبـك نفحـه وريحـه
لكن قطعت الصوت لك اربع اليال
وش جاك ياسيد الوجيـه المليحـه
دامك كذا وشْهوله اشيـل جـوال
جننتني ورفعت ظغـط الشريحـه
دايم مع طاريك في هـوش وقتـال
وخليتلـك ذود المشاعـر منيحـه
وان قلت ماحبك على نفسي احتال
وان جيت اكابر فالملامح فضيحـه
ياوجد حالي وجد من كان مدهـال
بيته وكـل ليلـه يحصّـل مديحـه
جوله بني عمه وهو بصعب الحال
ولا في مخباتـه فلـوس الذبيحـه
ياما التغلي خيّب ظنـون وامـاال
ابختصر موضوعنا فـي نصيحـه
من يعشقك خله على طول بالبـال
وان ماحصل خل العرب مستريحه

[نــجــم]

قصيدة العيد


لا تتصل وتقول مبـروك بالعيـد
تعال عايد دام تسمـح ضروفـك
العيد ماهو تتصـل وانتـه بعيـد
العيد والله يبتـدي مـن اشوفـك
ساعة تجي ومصافح الايد بالايـد
وكفّي على طول اللقا في كفوفـك
من لهفتـي ويـاك ياسيـد الغيـد
مو ناقص الا تضمني في كتوفـك
مايجتمع في الحب خوف ومناقيـد
ان عاش معك الحب بيموت خوفك
وانا ادري ان الحب في قلبك ايزيد
باين من عيونك وكثـرة كسوفـك
ومدامنا في العيد وصرنا مو اعيد
ابتغزل يالغضـي فـي وصوفـك
زودٍ على حلياك يافـارع الجيـد
توقف جميع الناس حزة وقوفـك
تدري متى بتجيب في تركي العيد
لا قلتلي عيدك مبـارك واشوفـك

[نــجــم]

قصيدة الــقــيــمــه

اطلبك يارب لا تخيّب رجـاي
وبين خلـق الله تكبّـر قيمتـي


الخطا وارد واذا زدت بخطـاي
فـوق زلّاتـي تسيّـل غيمتـي


القى جرحي بس مالقـى دواي
والزمن ناوي علـى تقسيمتـي


وانتصر وتْلاعب ايدني سمـاي
وللجسـام مضـرّيٍ عزيمتـي


والهزيمه لو تجيني من اعـداي
بفْضل اعدائي ابـي هزيمتـي


اخسر اقرب ناس واتحمّل شقاي
المهم انّـي مااخسـر قيمتـي


وكل ماحسّادي تتْزاحـم وراي
اكبر بعينـي واحـس بقيمتـي

[نــجــم]

قصيدة المجامله

صاحبي مهما تعدى فـي خطـاه
بالـغـلا ابـاشـره واعامـلـه


كل مايخطي عليه ؟ مـن غـلاه
اضحك ابوجهه غصب وجامله !!


يامر وينهـى وانـا كلـي فـداه
ماعليـه الا يشـوف الصامـلـه


اعشقه وغليـه واتنفـس هـواه
بالمحبـه امواصفاتـه شامـلـه


دايـم المزيـون مايكمـل حـلاه
بس محبوبي وصوفـه كاملـه !!


لا سكت كن العسل مات ابشفـاه
ولا غمز رموش عينـه خاملـه


والقلـم نفسـه اذا شالـه معـاه
ذاب حبره من لمـس اناملـه !!


ناعـمٍ متـرف يشـد الانتـبـاه
لو يمر الشيخ فـز وقـام لـه !!


من عرفتـه ذقـت لـذاة الحيـاه
فـدوه العينـه السنيـن الهاملـه


ماكتبت الشعـر الا مـن غـلاه
والله اني صاج ماهي مجاملـه !!

[نــجــم]

قصيدة الساعه ام السيور والسلساله


يامحمد استمـع لـي لا تقـول التوبـه
وكيف اتوب وصاحبي تبرق علي اخياله
والهواوي في يدين صويحبـه لعبوبـه
يكسر الخاطر وحاله بالهـوى يرثالـه
من سبايب متـرفٍ محبتـه محسوبـه
مثل ماتحسب بقلبـي هيببتـه وافعالـه
والله انه من حشايـه قطعـةٍ منسوبـه
والله اني صرتله اقرب له امْن ضلالـه
وين ماوجّه وراح يشوفني في صوبـه
وحافظٍ اسمه ورقم البيت مـع جوالـه
اتبعـه ويـن ماوجّـه ودل دروبــه
الربوع البيت عمه والخميـس الخالـه
وافيٍ قلبـه معـي ماقصّـر ابماجوبـه
في طبوعه غير يحرجني حلو استقباله
الجمال اليوسفي عـن بكرتـه مندوبـه
كاملٍ والكامـل الله مـا لقيـت امثالـه
الحلا زاده وسحـر البابلـي مشروبـه
والبلا في طلّته والمـوت حبّـة خالـه
ناعم اليا مشـى يتعبْـك دوبـه دوبـه
تاصل البيتك وتـوّه ماوصـل للصالـه
امتلكنـي بالكـلام العاطفـي وسلوبـه
واحتوانـي بالدلـع والنظـره القتالـه
يوم ينظر نظرتـه مسكّتـه وعجوبـه
ترتعش يدّي وقلبـي يعلـن استبسالـه
واثني الركبه وكنّي بمعركـة مشذوبـه
يوم ربعي تدحـم الفرسـان والخيالـه
ياوجودي كل ماحتظنت يدينـه كوبـه
جيتله مستعجـلٍ والـراس زاد هبالـه
وصبّلي من دلّتـه وقهوتـه مشروبـه
ولايقنّـد راسـي الا هيلـه وفنجـالـه
واشرب الفنجال وقهوته حـلا وعذوبـه
كيف ماتغري قهوتـه والـدلال دلالـه
يسرق انظار الخلايق وكرهووه قروبـه
وليه لا ؟ مادام وياهـم تقـول الحالـه
ازين من الزين نفسه والدلـع محبوبـه
واحلى من بيتٍ يقوله فيصل ابْن طواله
اااه يالبـا كرستالـه وزمّــة ثـوبـه
وخاتمه والساعه ام السيور والسلسالـه
يامحمـد بعـد هـذا لا تقـول التوبـه
وكيف اتوب وصاحبي تبرق علي خياله
من طلبني يارفيقـي يبشـر ابمطلوبـه
بس خلي مانسيتـه لـو يشيـل عيالـه

[نــجــم]

قصيدة حاجه صغيره

اشغلتني يالغضي في طـاري فراقـك
تبي تشـوف الجفـا وشلـون تأثيـره


وادري كلامك ماهو من داخل اعماقـك
الله يرحـم اهلـك ْ تفضّهـا سـيـره


من يوم ماجيتنـي انكشفـت اوراقـك
ادناة حاجـه اشـوف الشـك والغيـره


ولاهو ضروري تسولف لي عن اشواقك
الحب بايـن علـى وجهـك تعابيـره


اصبحـت يالغيـم رعـادك وبراقـك
وهـذا وتـوْ العلاقـه بيننـا قصيـره


اقدر علـى رفعتـك واثبّـت ارواقـك
واقدر اضيّـق عليـك الـدار والديـره


ودك تخطف الحشا واصبحت سراقـك
البعد والصـد دوّرلـك حكـي غيـره


اهـم حاجـه معـي تظبّـط اخلاقـك
وان قلت ابوادعـك اموادعـك خيـره


متهز شعـره براسـي لحظـة فراقـك
لاني اشوفك بعيني حاجـه صغيـره !

[نــجــم]

قصيدة السفر والصيف والحبيب


خل السفـر يارفيقـي مالـك ومالـه
وهيّف على خافقي يابو الدلـع هيّـف
القلـب مـن سبتـك يازيـن يرثالـه
وانت ماهمّك ياكود تـروح وتصيّـف
ان كان قصدك مغير الجـو واحوالـه
اسكن ابصدري وحط بصدري مكيّف !!
ماتدري انك طمـوح القلـب وامالـه
وانـي علـى شوفتـك اروق واكيّـف
الله عطـاك الحـلا وعيـون قتـالـه
وزودٍ على امواصفاتك ذرب ولطيّـف
خليـت قلبـي خفيّـف ياهـوى بالـه
وانت تعرف صاحبك ماهوب بخفيّف !!
من قلت اسافر وقلبـي حالتـه حالـه
ماتدري اني رومنسي حيل ورهيّف !!

[نــجــم]

قصيدة عــبـاة الــراس !!


الا ياصغير السن تبطي تجيـب الـراس
هذا راسـي اعرفـه مايتبـع مخاييلـك
عنيدٍ ومتربّـي علـى العـز والنومـاس
انا اقطعلك ذراعـي اذا فكّـر ايجييلـك
غرامك ماينفعني ولايرضـي الاحسـاس
تراجـع ولا تتبـع ركابـك ولا خييلـك
انا كل ماقلت ابتعـد ؟ قلتلـي لابـاس ؟
تقول الهوى غلاب !! واقـول يحلييلـك
انا عشقتي صعبه على طابخيـن الفـاس
وقلبـي نـداويٍ مايطلـع علـى جييلـك
ياشرّابة الكوكتيـل لاتقـرب المحمـاس
مايشفي عـوار الـراس بنّـك ولاهيلـك
لو تسوّي ماتسوّي ترانـي قـوي البـاس
وحتيّش لو تلبـس بناطيـل ماجيلـك ؟!
ترى مايجيب الـراس الا عبـاة الـراس
ابنصحـك يالغالـي توفـر بناطيلـك !!
واظن الصراحـه ماتزعّلـك ياحسـاس
لا تطبخلـي القهـوى وتمـلا فناجيلـك
مدام انّي منيشـن علـى قمـة النبـراس
انا وش لي ابصبحك وانا وش لي بليلـك
لو الزير في وقته رضى عن خطا جساس
لايخطر على بالك اصوّت وانـا دييلـك
توكل على ربك وفارقني يبـن النـاس ؟
ولاتكرّر الجيّـه واذا جيـت ياوييلـك !!

[نــجــم]

قصيدة صدقت والا جعل عمرك ماصدقت !!


لا قلتلـك اغليـك لا تسئـل شلـون
وانت ولا عمـرك تعنيـت واشتقـت
وارجع اقـول انـي متيّـم ومفتـون
في حضرتك وتقول تبطي ماصدقت !!
رفعت ظغطي من كلامـك يامزيـون
الظاهر اني فـي غرامـك توهقـت
صغير سن ونظرتـك دون فـي دون
تـوّك جديـد وبالهـوى ماتعمـقـت
عظمك طري وتضيع بالشكل واللون
والا انـا حبيـت فبلـك وفـارقـت
دايـم تسمّـع فـي وكالـة يقولـون
ماذقت من طعن الهوى ربع ماذقـت
يعني احبـك لازم اصيـر مجنـون
واقولك غربـت فينـي وشرقـت !!
واكلمـك صبـح ومسـا بالتلـفـون
ولا غبتلك يومين مت وتضايقـت !!
ترى حلاة الحـب لاصـار مـوزون
ماهو ضروري انسفـه لا تعلقـت !
ياخي احبك بـس لا تنشـد شلـون
صدقت والا جعل عمرك ماصدقت !!

[نــجــم]

قصيدة ( غيابك ايحز بالخاطر )


شهرين ماتتصـل ماهيـب معقولـه
شهرين وانا اراقب غيمك الماطـر


علومـك الباقيـه عـادي ومقبولـه
الا غيابك علي ايحـز بالخاطـر !!


لا صار فيني بلا صدتـك مسؤولـه
القلب ذايب وله والدمـع يتقاطـر ؟


قرب ولا تعتـذر العـذر وشهولـه
ماتدري اني اعرفك زين ياشاطـر


نسيت اللي يحبـك كيفهـا فعولهـا
ياكثر ماكان لجل عيونك ايخاطـر


سافر على راحتك من دوله الدولـه
( بقعد اغني على شانك انا ناطـر )


وان جيت من سفرتك قول اللي تقوله
الا خلاص انتهينا تحز بالخاطر ؟!

[نــجــم]

قصيدة الحب من طرف واحد



الحـب بايـن يافهـد فـي عيونـك
الظاهـر اللـي تعشقـه راح خـلاك
وكثـرة تفاكيـرك وكثـرة ضنونـك
ولعبّـك التفكيـر واصبحـت شكـاك
مشغـول وعيونـك علـى تلفـونـك
واشغلت كل اللـي حواليـك ويـاك
واللي يخـون اهلـه اكيـد ابيخونـك
نصيحتـي وفّـر غـلاك وعطايـاك
صعبه تلاقي شخص وافي يصونـك
ريّـح ملايكتـك والاحبـاب تفـداك
صاحبك مستانـس وعايـش بدونـك
وانت اتقلّـب بيـن همّـك وبلـواك
ماقـول غيـر الله يخفـف طعونـك
والحب تدري ويش ايسوّي اذا جاك !!
تزعل ويركب فوق راسـك جنونـك
ومن القهر تضرب يمينـك ابيسـراك
وتحس كل الكـون ضـاق ابعيونـك
اذا حبيبك حـب غيـرك وخـلاك !!

[نــجــم]

قصيدة بـنـت الـخـبـر


الجادل اللـي علاقتهـا معايـه شهـر
تودنـي بـس انـا يانـاس مـاودهـا
تبا تورينـي النجمعـه بعـز الظهـر
ومن شان تشبع غروري جايبه حدهـا
بالظبط موعد لقانا كان عقب العصـر
ومكحّلـه عينهـا ومحنّيـه يـدهـا !!
وتقول ماجيتك الا ودّي اسمـع شعـر
وقـول لبيـه واخذهـا علـى قدهـا
وانا فؤادي مع اللـي ساكنـه بالخبـر
لو تطلـب عيونـي الثنتيـن ماردهـا
هذيك حتى العطر ياناس حتى العطـر
لارشّته ياخذ اسبوعين فـي خدهـا !!
اشوفها في عيوني غيـر كـل البشـر
حتى حليمـه حليمـه ماتجـي ندهـا
فيها عوابة بدو علـى مياعـة حضـر
ووصوفها اتضيّع الشعار فـي عدهـا
والقذله اللي ليا طاحت تجـي للنحـر
تكدنـي بنـت ابوهـا كـل ماتكدهـا
واللي يهايط علي يقول لو هـي تمـر
في هالشنب لو تمرّه راح مع يدهـا !!
كل همّها في الحياه العافيـه والستـر
ماعذربت سمعـة ابوهـا ولا جدهـا
والهم والمالبـورو والعنـا والسهـر
صارولي روتين يومي والسبب صدها
شاعر وجيب الدرر اليا نزلت البحـر
واحترت في جزرها واحترت في مدها
قالولي خلها وخلها قلـت بالمختصـر
اهد كل البشر بـس هـي ماهدهـا !!

[نــجــم]

قصيدة فوق الثلاثين ولا تخلي حركاتها !!



كل مايزين الهوى ويهب معه النسيـم
عطيت ظهري غثا الدنيا ولوعاتهـا


دنيا تغشك ولو ممشاك دايـم سليـم
وتضيع في ذيبها وتضيع في شاتهـا


اقولها للمـلا واللـي سواتـي فهيـم
ولا حسّب حساب بلواها وصكاتهـا


حتّيش لو اصبحت بقعا عدو وخصيم
رحت اتوطّـى عقاربهـا وحياتهـا


وياليت حظّي ولو مره يجي مستقيـم
واميّـز صـدور خلـق الله ونياتهـا


لو كل رجلٍ كريم يصير اسمه كريم
ماشفت بعض اللحـا تفتـل شنباتهـا


والجادل اللي غلاها وسط قلبي يتيـم
راحت ولا ادري متى ياناس جياتهـا


وان جيت يم الغلا والحب حظي سقيم
حبيت مير المحبـه خـاب هقواتهـا


الله بلاني بهنوفٍ غير كـل الحريـم
عطيتهـا وجـه واذتنـي بدقاتهـا ؟


تدق دقه ؟ ودق ؟ وتحط عبدالحليم !!
فوق الثلاثين ولا تخلي حركاتهـا ؟!


هي تحسبنّي على النيّه وتوّي غشيـم
واموت في حبها وشفـق النظارتهـا


مانيب فاضي احب مانيب فاضي اهيم
وقول ويلي على الجـادل وشوفاتهـا


اما تجيني وثالثنـا بليـس الرجيـم
والا توفّر على الهاتف مسجاتهـا ؟!


ماهمها الا المغازل والدلع والرجيـم
امحق مـره ليتهـا تربـي بنياتهـا


من وين مارحت تتبعني وجرحي اليم
وصد عن شوفهـا وقطـع علاقتهـا


وتقول حبك ياروحي ساكنٍ بالصميم
وقول منتي هوى نفسـي ومشهاتهـا


وفكّرت ابلغ اهلها وطلعو سيم سيـم
ولقيت الاعبر ربايعها وخالاتهـا !!


المجتمع راح فيها من جحيم الجحيـم
الظاهر ان القيامـه قـرّب اوقاتهـا


الذيب عند الغنم والنار وسط الهشيـم
واخوان بدوى تخالف بيـض نياتهـا


هذا زمن روبي وشعبان عبدالرحيـم
ودنيا تسـوق الاوادم فـي ملذاتهـا


ستايلك يازمن ياليـت يرجـع قديـم
الفين وسبعه تخوّف في بداياتهـا !!

[نــجــم]

قصيدة فـرصـه سـعـيـده


على سما الخفـاق بـرّاق ورعـود
والقلب سال الشـوق داخـل وريـده
وكل ماتهب الريـح ويذعـذع النـود
جيتي فـي بالـي يالهنـوف العنيـده
بمشاهدك كني مـع العيـد موعـود
ياراس مال القلب واغلـى رصيـده
ومن دونك الدنيا تجـي مابهـا فـود
وتصبـح حياتـي كلهـا عالحـديـده
يافاتنه جيتـك مـن ديـار وحـدود
واقـول سبحانـه محلّـي عبـيـده
طول وشعر واحجاج ورموش وخدود
امواصفـاتـك يالكحيـلـه فـريـده
والموت كله داخـل عيونـك السـود
لا سلهمتلـي قلـت فرصـه سعيـده
انا دخليك صرت ماخـوذ مجحـود
وراع الهوى بعيون الاحباب صيـده
اما قطفـت التـوت عنقـود عنقـود
والا تركـت القلـب بربـاط قـيـده
مضهود من سبـة فعايلـك مضهـود
بـس اتـوجّـد والتـوجّـد نقـيـده
من بيننـا عشـق ومواثيـق وعهـود
انا الاصل وانتـي الهنـوف الاكيـده
ماجاب راسك لا سبنـدي ومقـرود
محشومةٍ عن قـول صيـده جديـده
ماجاب راسك غير تركي بن سعـود
خـلاك يابنـت الاجـاويـد سـيـده
لو الغلا بالشلف اصبحـت صاهـود
واصلك واجيبـك لـو انـك بعيـده
على غلاتك عندي صكـوك وشهـود
وتشهد لك اشعاري قصيـده قصيـده
مبطي غلاتك داخل القلـب موجـود
سنيـن وانتـي بالحنـايـا وحـيـده
محبتـك يابنـت الاجـواد فـي زود
الحب لـو ينقـص غرامـك يزيـده
واليا ارتفع ارقى معـه دايـم سنـود
وهيـم واغنّـي ابـجـوّك نشـيـده
وذا قربتك صـارت سهـود ومهـود
وتشوش في راسي الجنون المريـده
واخش هنا وهنـاك وهنيـه واعـود
وارجع واخش هنـاك واروح سيـده
واقول ضميني على القلـب ياجـود
ايـوه هنـا ياجـود ضمّـي الوليـده
اللي على شانك وطى كـل نمـرود
واحرق على شانـك قلـوبٍ عديـده
تفداك مـن حبـة حمنّـي وعبّـوود
اللـي صورهـا دايـمٍ بالجـريـده
سعديةٍ تمشـى ورى درب مسعـود
بـلـيـدةٍ الله رزقـهــا بـلـيـده
وانتي سليلة مجد وانسـاب وجـدود
في نظرتك شفـت العلـوم المجيـده
تدرين دايم احـرق نفـوس وكبـود
واحـط حسّـادي بجمـر الوقـيـده
كل ماانادي ورفع الصـوت ياجـود
وقلتي هـلا واهليـن يغلـى وليـده

[نــجــم]

قصيدة الـطـعـنه


ابصعد المرقاب واشـب ضـوي
مدامني ضاري بعـال المراقيـب
ماقـول ياليتـي ولا قـول لـوي
اتعب على الطالات وادور الطيب
اخذ قراراتـي بصمـت وتـروي
ماني من اللي يجزي العيب بالعيب
واكبر مثل بـن الزمـان متلـوي
تضيع مابين العـدو والاصاحيـب
كنت اتحرى طعنتي مـن عـدوي
لكن جتني من ولد عم وقريـب !!
مانيب قايل بعدها ويـش اسـوي
مشيتها من قبل تدري الاجانيب !!
ماهو على شانه ولا هـو متقـوي
كله على شان اللحى والاشانيب !!
ماقول له يافلان عكـرت جـوي
لا والله يبشر بالهـلا والتراحيـب
ماهمنى حكي العـذول المهـوي
يموت مايلقـى عليـه مقاضيـب
اللـي مثيلـه ماينـزل عـلـوي
تركي انـا ياشاذبيـن العراقيـب
ارقى على القمه ويرقى سمـوي
مالي ومال مدوريـن المطاليـب
كوي يانكبـات الغرابيـل كـوي
يبقى ولد عمي كما الزير وكليـب
لو كان نجمه كـل ليلـه يضـوي
ياخذ على جو السما ايام ويغيـب
الشيخ هو الشيـخ مهمـا يسـوي
لابد مانلقـى بشخصـه عذاريـب

[نــجــم]

قصيدة المطيري عند وهك بالملاقى والحميّا


يارفيق الدرب تكفى لا تضايق في زمانـك
ولا تهمّك هرجة الهافـي وطعنـاة القفيـاّ
كل مابرقّت عالـي مالمحـت الا مكانـك
ويش جاب اهل الثرى يامسندي عند الثريّا
ماعليك امن الكلام ومعتلي قدرك وشانـك
ماينـزّل هامتـك هـذا ولا ضنـي هذيـاّ
اتضايق من يجيب اسمك ويشككّ في بطانك
وينفجر شريان دمي مثل تفجيـر المحيـاّ
لانّك كحيلان طيب ووقفتك تثبـت كيانـك
دون ربعك ياسليل المجـد تنخـى وتهيـاّ
كل ماضاقت عليّه مذكر اني قلـت وانـك
دايمٍ عنـدي هنـاك ودايـمٍ عنـدي هنيـاّ
جعلني ماذوق حزنك وعتبرني من اخوانك
وحطّني دايم على يمناك ياسمـح المحيّـا
بالرخا مانيب حولك بس بالشـدّه اوزانـك
وقتها لو اتعـذّر راسـي المطنـوخ عيـاّ
والله انك لو تجيني شايش وراكب حصانك
ماعلى السانك سوى حوض المنايا قلت هيّا
ابشر بعزّك تمنّى قول لايـردك السانـك
المطيري عند وجهك بالملاقـى والحميّـا
اتِمَسّك في عناني واتمسّـك فـي عنانـك
واتفياّ في ضلالك وانـت بضلالـي اتفيـاّ
افزع المثلك كذياّ حتى لو عشرك ثمانـك
من غلاتك يارفيق الدرب افزعلـك كذيـاّ
بس اانا طالبك تكفى لا تضايق في زمانك
ماعليك امن الثرى يبقـى مكانـك بالثريـاّ

[نــجــم]

قصيدة بوكيه ورد

ازعل على كل البشر الا انت ماازعل عليـك
حتّى ولو منـك الخطـا ماتنّسـى جمايلـك
فوق الخطا ياصاحبي من دون مااشعر اجيك
وجايب معي بوكيه ورد استسمحك واحايلـك
انا واحاسيس الهوى والشوق يالمترف نبيـك
كلٍ يبي ايطولك وانا غصبٍ عليهـم طايلـك
اموت من دونك واذا شفتك اروح اموت فيك
ومابين جينات الدما وعـروق قلبـي شايلـك
تكفى طلبتك خلنـي مابيـن جمـرة شفتيـك
واذا حرقتني شفتك انفـض علـي جدايلـك
ومابين خصرك لا انثنى قدمي وسلهامة عيينك
تكفي عليّه خصلتين اشـوف مـن خصايلـك
ياذرب ياتكييـت ياجنتـل يامتميّـز ياشييـك
ياللي بنات الهاي هـاي ايقلـدوون استايلـك
ولا هلّت مزون الحيا والجـو غيّـم يامليـك
على مشارف قوس قزح اتخيلـك واخايلـك
من وين مالديت عيني يالغضي تنظـر اليـك
وحتى تلفونـي مايستقبـل سـوى رسايلـك
ايوّووه ياكل الغلا اقسم قسـم مالـك شريـك
نام وتطمّـن والـولا لا تستشـك ولاي لـك
ياليت ربي في غرامـي لـو دقيقـه يبتليـك
واعلمك كيف القسـا وفعـل مثـل فعايلـك
وسهّرك واتعّبك وان رحت ترفـع حاجبيـك
اقول لك طبـق الاصـل عمايلـي عمايلـك
ان جيتني مشكور والرحمن يرحـم والديـك
تعال في قلبي ونوّخ فـي الحشـا رحايلـك
ولا تعتذر وتقول لي مبطي وانا ادوّر عليـك
تلقى رقـم موبايلـي موجـود فـي مبايلـك
ارفع تلفونـك ودق وقـول ياتركـي ابيـك
واقول سكّر ياحلـو خمسـة دقايـق جايلـك
واجيك وآمدّلك يديني وانته اتّمد لـي يديـك
وتقعد تحايلني على اللي صار وانـا احايلـك

[نــجــم]

قصيدة بـنـت الـريــاض


اجيك لـوّك بالحسـا واجيـك لـوّك بالريـاض
الصاحـب اللـي يشبهـك امـوت وانـا ادوّره


ارد على الموت الحمر وارد على كل الحيـاض
والليلـه اللـي جابتـك يغلـى بشـر مـنـوّره


منوّره دامك معـي ياسيـد ترفـات الغضـاض
من دونك الدنيـا تجـي بـلا طعـم ومـزوّره


ارتب شعوري شعر واسمعك مـن يـوم هـاض
واذا قصيـدي معجبـك نـذرٍ علـي اطــوّره


اخذ حمار امبيسمك وخـذ مـن الخـد البيـاض
واذا رفـعـت مجـدلـك اتخيـلـه وصــوّره


وعيش حزتها فـرح كنـي ابمداهيـل الفيـاض
واقـول فرفـش وانبسـط دام الليـال مــدوّره


متى تحسّس صاحبك انه من النـاس الحضـاض
تعال وادخل فـي الحشـا واذا دخلـت اسـوّره


جِسَدك مِن قطن وحرير وفوق هذا لا اعتـراض
لكن اخاف امن الهوى كـل مايهـب يعـوّره !!


وتدري متى حسيت انك ساكن ابوسط الريـاض
من يوم ماجيت الرياض وشفت الرياض منوّره !!

[نــجــم]

قصيدة الكويتي


ياهجوسي عقب كيـف الشاذليـه
اطرقي القيفان يوم انـك رويتـي


لك مهابـه يالهجـوس ومقدريـه
استوت كل المشاعـر وستويتـي


شاعرٍ مطنـوخ وابياتـي قويـه
والشعر يامسهله لا قلـت بيتـي


كنه المسبـاح لا طـاح ابيديـه
العبي يابنت فكـري لا اشتهيتـي


ابدعي المسحوب والا السامريـه
والهلالـي والهجينـي والخبيتـي


الشعر عن بكرتـه منـي وفيـه
ومعجب ابشعر النصافي والثبيتي


وعقبها ياشعـر لا تبخـل عليـه
وعلم دياري وقول انـك وفيتـي


ديرةٍ تسكـن مـع قلبـي هنيـه
يابعـد حيـي وحيّانـي وميتـي


يابلـد قـدرك تعـدّا الجاذبـيـه
فوق رووس الشعب يادار اعتليتي


واحمـدالله وشكـره رب البريـه
يومني مسلم وجنسيتـي كويتـي


اتفـاخـر بالـبـلاد الحاتمـيـه
ديرتي ارضي وناموسي وبيتـي


علمـي كـل الديـار الاجنبيـه
علميهـم كيـف فـن الاتكيتـي


الايطالـي والفرنسـي والبقـيـه
مثل قبرص واليوناني والسوفيتـي


يوم غيرك عاش وقت الجاهليـه
انتي ابعهد الحضـارات ابتديتـي


ولايهمك شعب هيه وهـاي هيـه
تيتي تيتي زي مارحتي وجيتـي


وباقـيٍ كلمـه وسميهـا وصيـه
اسمعوا ياناس وييش ايقول بيتـي


لا لقيتو شخـص مامثلـه وزيـه
اعرف ان الشخص جنسيته كويتي

[نــجــم]

قصيدة حليمه والهام الفضاله !!


المبوبايـل دقتـه دقـه قديمـه
ماتسـر امكالماتـه واتصـالـه
دام مابه شوف والضمه حميمـه
البقا في راس مضمون الرسالـه
للوصال نقـول يامـال الغنيمـه
وللفراق نقول الفيـن استحالـه
ومل قلبٍ علته داخـل صميمـه
من عشق والحال ماهي بي حاله
دايم دروبـي عواقبهـا وخيمـه
وين ماوجهت حظي خاب فالـه
اتذكر مـن لهـا قـدرٍ وقيمـه
جادلٍ في زينها كـل الاصالـه
بنت بدوٍ فـي شرايينـي مقيمـه
حبها حـب وسلالتهـا سلالـه
يوم تقبل ذكرتنـي فـي حليمـه
ويوم قفت كنها الهام الفضالـه !!
ثغرها لا من تبسم بـرق غيمـه
وجمرها لا سولفت زاد اشتعالـه
ورمشها يذبح وشامتهـا يتيمـه
ولا تهزع خصرها بلوى لحالـه
من نظرها راح يلعن في حريمه
كنها سـوّت سـوات البرتقالـه
لوّها عنـدي اسويلـي جريمـه
دام قلبي حبها والخـوف شالـه
مير بعض البعد للعاشق غنيمـه
لو على كيفه يزوّد فـي هبالـه
مترفه وطعونهـا فينـي اليمـه
وجرحها الذباح مـادور بدالـه
فوق كل الطعن وجروحي سليمه
والكلام المنعـوج مالـي ومالـه
والعذول اللـي يـدوّر للنميمـه
لا حكى ودّك ترصّـه بالبيالـه
عاشق مجرم ولا حب الظليمـه
كود لامن جات بالزين ودلالـه
وبنت ابوها في مواصلها غشميه
ماهي ابمثلي المواصل راس ماله
والموبايل احسبـه دقـه قديمـه
وصرت اشفق في كلامه واتصاله
وصار لاشوفه ولا ضمّه حميمه
يذكرج بالخيـر ييّـام الرسالـه

[نــجــم]

قصيدة الـضـيـاع


لا شفتني ساكـت لا تنشـد علامـي

======اعرف تراني من سبب نظرتك ضعت


جايع وحصّل في عيونـك طعامـي

======لا تحرم عيونك عيوني اذا جعت !!


تصدق انك صـرت كـل اهتمامـي

======اكذب عليك ان قلتلك ماتولعت


الحب طبعه بيـن الاحبـاب سامـي

======وعن حب غيرك ياحبيبي ترفعت


الشوق حامي ليتـك تصيـر حامـي

======من بارد احساسك تراني توجعت


من ويـن مالديـت تلقـى غرامـي

======على دروبك ياغرامي توزعت !!


محبتـي فطـره وعفـوي كلامـي

======من بد خلق الله معك ماتصنعت !!


اسمك محى عندي جميـع الاسامـي

======كنك على الساني ربيت وترعرت!!


جيتك على درب المواعيـد ضامـي

======ولمحت طيفك بالطريق وتسرعت


عن حب غيرك صرت معلن صيامي

======من يوم شفتك ارتويت وتشبعت !!


الحـق علـي وضمنـي ياغرامـي

======يمكن اموت من الوله لا تراجعت !!

[نــجــم]

قصيدة الا مــاكـن !!


قمت اشوفك يالغضي بكل الاماكن
طيفـك الجـذاب مايبخـل علـي

لو تجيني بالمسـا والليـل داكـن
نور وجهك يقلب الظلمات ضـي

يوم غيري صاح وعيونه تباكـن
ماشكيت الحال وانت تحس فـي!!

لو تبي عيني حشا ماقلـت لكـن
تحت امرك يالغضي هذي وذي !!

من عرفتك دايـمٍ والجـو ساكـن
عن سموم القيض والاهوب في !!

مذكر ان عروق شرياني تشاكـن
كيف ابشكي وانت يالمجمول لي !!

والله انك داخـل الخفـاق ساكـن
من عرفتك وانت عندي كل شي !!

كل ماغنى ابـو نـوره الاماكـن
انت والله بس من يطري علـي !!

[نــجــم]

قصيدة الـترف الـصـغـيـر


الصاحب اللي يسكن القلب الكبير
اموت في طيشه علـى شطانتـه
لو خانت الاملاح بالبحر الغزيـر
جوراحي مهما حصـل ماخانتـه
امشي انا وياه في نفس المسيـر
ديانـتـي مطابـقـه ديـانـتـه
جذاب وملكع ومملوح وصغيـر
مبطـي وانـا متحمـلٍ شطانتـه
يامر علي وكل مايامـر يصيـر
انا رهن عينـه وعينـي صانتـه
اتحمله واتحمل الـدرب العسيـر
كلـه يهـون وماعـدا ايهانـتـه
يعني على شانه فقط نسل الوزير
يقسى ويشد الظهر في حصانتـه
مايدري اني من هل الفزعه مطير
اللـي مكانتهـم علـت مكانتـه
مير البلا غالي وحبه غير غيـر
في داخل الخفاق سكـر خانتـه
عامين متعبني وانا بالـي قصيـر
متى يساعدني وشـوف ايعانتـه
في زينه الجذاب ياعالـم اسيـر
ولي الفخر لا صرت من سجانته
عينه ترد الروح وخدوده حريـر
وشفايفـه مثـل مـذاق الفانتـه
من شفت رمانه وانا ماني بخيـر
اصبحت مجنونه سبـب رمانتـه
والشمس لاشافت جبينه تستخيـر
كنـه معاهـا مطـيـحٍ ميانـتـه
وفوق الحلا والملح والزين الوفير
تميـزره عـن المـلا فطانـتـه
لو قالو من حايل او انه من عسير
ماريّة العـارض ونجـد ادانتـه
اغليه مير الحظ ملعـون وحقيـر
حظي واعرفـه باخـصٍ لعانتـه
كبّر علي الزين فالوقت الاخيـر
وصويحبي خوّن وخـان امانتـه
كنت اتمنى وقتها انـي ضريـر
كرهت عيني مـن رأت خيانتـه
دام العشير يخون خفاق العشيـر
ياليت قلبي ايشـال مـن مكانتـه

[نــجــم]

قصيدة الكنــتروووووول


البارحه ضاقت علي ياصاحبي كل الحلول
ودوامة التفكير تاخذني على دوامتك


شهرين ماجتني مراسيلك ولا منك رسول
وعيوني الثنتين ملت تنتظر غمامتك


مانيب طامع يالغلا وابيك يالضبي الجفول
لا تكشر ابوجهك علي مابي سوى سلامتك


سلامتك من كل ماتكره ومن عين النظول
اللي شياطينه تحد الشوف من وسامتك


بسم الله الرحمن يازينك سرق كل العقول
وعلى زعامات الحلا تفوقت زعامتك


انا فدا امبيسمك والعين والرمش الكسول
انك تلحفني الدفا على حلا طخامتك


مليت اهذريبك وطبع المهتوي دايم ملول
الا انت ماملك ويكفي بالحشا اقامتك


ملكتني ياسيد تلعات الصبا عرضٍ وطول
( من هامتك الى اسفلك من اسفلك الهامتك)


يالعنبوا حيك متى اتحبني حسب الاصول
وانسى التعب من يوم ماترخي على سلهامتك


وابطلق الجنحان واجيلك عسى عمرك يطول
ماهمني درب الخطر وان مت من ضلامتك


واسري على درب الهوى والشوق خلاني عجول
( واجيك يالبحرين وعيوني على منامتك)


ترى صداع الراس مايشفيه حب البنادول
سلامته ودواه والله يوم ترخي الثامتك


يالاشقر المملوح مالكني على كل الفصول
من وين ماسج الرجل اسمع شجن حمامتك


انا عليك اقرب من اللي تلبسه والا بقول
انا عليك اقرب من الغمازيتن الشامتك


صرت اتبعك ياصاحبي على نظام الكنترول
دقات معلوق الحشا اتشدها فخامتك


يالله دخيلك افتح الخفاق من شان الدخول
واطلق حجاجك وانبسط واشطب على لوامتك


وخلك معي وانسى الزعل مليت انا ديك الزعول
من سبتك بانت على وجه الشقا علامتك


صرت ابنهايتك جرئ وانت ابدايتك خجول
اذكر ورى لبس الحيا اتكسر ابتسامتك


والحين ياحلو النبا بعد الحقايق والحلول
منت اموافق نلتقي وترفع عليه جامتك!!


طيّب ابي من حضرتك تسمع كلامي ويش اقول
يارب ؟ لا استغفره مابي سوى سلامتك

[نــجــم]

قصيدة مايصح إلا الصحيح .؟


لا تلـد العيـن يمـي يامليـح
العيون السـود للعاشـق عنـا

من تناظرني بعينك رحت ميـح
عند عينك ياحبيبي وييش انا !!

القصايد في وصوفـك تستريـح
وش تساوي عند خصرك لنثنى

ولا انته ابمحتاج يالغالي مديـح
في ثغرك الزين بـرك وانحنـى

لو شهدك اييسيح بالكون الفسيح
صارت الدنيا طواريـق وغنـا

الله اكبر ماحسبتك هـاب ريـح
ماعلى السانك سوى هيـا بنـا

واحزم ضلوعي وعذالي تصيـح
واطلق حجاجي تباشيـر وهنـا

اعترف عيسى ولد مريم مسييح
واعترف بيتـك ومنزالـك هنـا

دون شوفك منكسر قلب وجريح
ودون شوفي تصبح ايامك فنـا


بالنهايه مايصـح الا الصحيـح
المحبـه ماتبـا الا انتـا وانـا

[نــجــم]

قصيدة انت غير الناس

هو جفـا والا زعـل والا غبـا
انتشـي عنـدك وتعلنهـا هجيـر


يالطيف الـروح امـر وش تبـا
انت تدلـل بـس يفـداك الكثيـر


لو تبـي الثنتيـن ياعنـق الضبـا
قلت تستاهل ولا غيرك نظيـر!!


دامها وصلـت الـى حـد الزبـا
من جمالك كل صعـبٍ يستخيـر


الخـدود ورود والـفـم اعنـبـا
والرموش جيوش والحاجب شطير


انت غير الناس انت واحـد ابـا
يشغل العالم وهو تـوه صغيـر؟!


لا تطول السالفـه الصـد ايهبـا
ارسل اشواقك علي مسك وعبيـر


النبـا ياحـلـو ياحـلـو النـبـا
شوفتك جنـه وصـدك زمهريـر


لو يجور الوقت حبك لـي صبـا
ارسل اللهفـه واسابقهـا مسيـر


كثر حزن الناس حبك فـي دبـا
وكثر نوم الخالي مرتاح الضميـر


حبـك بقلبـي حبـا حبـا حبـا
استحل القلب لين اصبح كبيـر!!


والبـلا ماهـو حـلال ولا ربـا
البلا انك غير والاجـواد غيـر؟


ولو تظن ان الهوى اصبـح وبـا
رح لي الله خاطري منك كسيـر

[نــجــم]

قصيدة المــوتــر اليــابـاني


راكب اللي امواصفاته كلها مرسومه
موترٍ فيه المزايا غير وشكلٍ ثاني


لو يشوفه مرهي الدينار يفرق سومه
ماكذب من قال عنه مركب الشيخاني


جيب لكزز يعجبك بقفايته وقدومه
ياسلام الله عليه الموتر البطراني


لا نطحته كنه السلطان قيصر رومه
وان تعدا قلت مشالله وصح الساني


وان ركبته والهوى ضده وشد عزومه
يستريح الرنج والفكسار والالماني


قومته ياسرعها يازينها من قومه
لا مسكله خط كنه عالسفر شفقاني


كل قطعه في حديده ياعرب مهضومه
من بداية مدقره للمدقر الوراني


فتحته مناظره والقصه المبرومه
والكفر ومكيفه والشبك والبيباني


صانعه بوذي خسيس وضايعات سلومه
مايعرف الا شراب الرد والدخاني


منوة اللي مبتلش ثم ضاع وسط هدومه
مثل حالي بس اهوجس واكتب القيفاني


واتنخى موتري واليوم فعلٍ يومه
ساعتين الا وانا في ديرة الخلاني


والله ان مسجله ماتدخله فطومه
مايطبه غير شروى تركي الميزاني


وادخل الديره وجفني مهتنى في نومه
بس تتحرى عيوني سيد الغزلاني


صرت متعلق واحاسيس الوله مصدومه
راحن اسبوعين لا جاني ولا خلاني


مادريت ان الغلا والعشق هذي علومه
ويل حالي من عذاب الحب والوجداني


عاشقٍ مغرم وروحي بالهوى مضلومه
منسجن والحال حاله والغضي سجاني


اتوجد وادعي الله يحفظه ويدومه
مرةٍ يرضى علي ومرةٍ قوماني


فاتنٍ يذبح حلاه ونادرات ارسومه
كل وصفٍ في وصوفه يسرق الاذهاني


عين نجلا طول فارع والحرير هدومه
والبلاوي كلها بالتين والرماني


وول ياقو الرموش اليا طلقته سهومه
كنها وقعه مابين مطير والعتباني


واعذابي صاحبي طلع علي نجومه
ماعلى السانه سوى ماظنتي تلقاني


وان صدفته صارحت الروحه معه مشؤومه
وبعدها يرسل مسج ويسكر الاوزاني


لو فكر في نشر ابياته المعدومه
سلموا على نهى مذيعة الورعاني


اتبعه واعانده واجوده بكمومه
غاليٍ حطم مشاعر تركي الديحاني


طول عمري اعشقه ومحبتي محرومه
ولاذبحني غير ربعي ان طروا النسياني


مانسيته لو كلنتن يسكن القيصومه
ويتزوج بنت ماشع عاصي الحلاني


الله اكبر وين طريته وجبت علومه
من ذكرت الجيب مدري بعدها وش جاني


والله ان اعضاء جسمي اصبحت مقسومه
بين مفتون الملا والموتر البطراني

[نــجــم]

قصيدة الجـــوهـــره


( تعال اسولف لك من الراس للراس )
بعلمك وشهو شعور المحاني

لا شفت زولك شايفٍ در والماس
واليا نطقت اسمك تعطر الساني

ابك انت والله غير عن باقي الناس
انت معاك الحب له طعم ثاني

روح القصيد ومملكة حب واحساس
لذة حياتي دونك العمر فاني

لا مرني طيفك وانا ميتّ انعاس
لا غمضت عيني ولا النوم جاني

اشقر عفر فيك الحلا ماله قياس
ومع البياض مخالطك زعفراني

زينك على كل المزايين نبراس
حرقت كرت الفاتنات الغواني

فرقك ربي عن مجامييع واجناس
وخلاك بعيوني فلان الفلاني

تكبر بعيني كل ماجيت( عساس )
وتصغر بعيني كل ماقلت ( كاني )

واغليك لا من قلت (حاضر ولا باس)
واكرهك لا من قلت( اسف وماني )

الوضع يبن الناس بالحيل حساس
خليتني بين الامل والاماني

لا غبت عني صرت يازين محتاس
وان جيت عندي صرت فلتة زماني

واليا حظنتك واختلط همس وانفاس
تعال دورني وانا في مكاني

من سبتك قمت اضرب اخماس بسداس
جننتني ومنك عشقت الجناني

وفوق التعب والهم والبعد والياس
مقدر اخونك واعشق انسان ثاني

القلب يمنعني اخونك مع الناس
منعت قلبي مثل منع العواني

تعال اسولف لك من الراس للراس
واسمعك احلى الحكي من لساني

[نــجــم]

قصيدة أدعج عنـج .....


اللي بلاني جعـل ربـي يبتليـه
عامين قلبـي محتمـل قساوتـه
فوق القساوه والاذى مغرم وابيه
اموت في عسره علـى نداوتـه


احترت في طبعه وطبعه حار فيـه
اوقات حبـه لا عشـق متفاوتـه


مزيون مامثله مع العالـم شبيـه
حتى سواليفـه ذهـب واكلاوتـه


يغريك لامنـه هـرج الله عليـه
لاقـام ايكسرهـا علـى بداوتـه


ادعج غنج والموت غمازة عينييه
مايستر الغمـزه دبـل غشاوتـه


وشفايفه كيكة حلا مـن سابليـه
لاذقتهـا تدمـن علـى حلاوتـه


مجبور احبه والهوى ماهو نزيـه
حب السنه شاخت معاه افلاوتـه


ياليت ربي ايسخره ثـم ايهديـه
اليـا هـدى الله علـى هداوتـه


مدامني جنبـه ويطلـق حاجبيـه
ماتهمنى بعض العـرب عداوتـه


اهم شي انـي احبـه واحتويـه
اسوق عمري وامتلـك غلاوتـه


واليا حصلي قلت مـشالله عليـه
وان ماحصل اطق مـن قساوتـه

[نــجــم]

قصيدة القــمـــه ؟ !

الا واشيب عيني وحالي يوم اداريه
لعبي الوقت وهم الزمن ياشين همه


يقوله من تحدى ولا بين خوافيه
قوي باس وعينه ترفرف على القمه


اجامل واتسلى على الشعر وطواريه
ولا ادري الا وانا بين الشد والضمه


قصيدي لا قريته جميع الناس توحيه
يعنك اني اورد بيوتي على الجمه


عسى يفدى قصيدي اللي اكبارٍ علابيه
يهب يبن فهره الا ياثقل دمه


بيوته مدلهمه مثل شيفة بناخيه
يسرمد بالسوالف والاوادم تخمه


وانا رجال عاقل ولا ادور مشاريه
لو ان الزمن هذا علومه مدلهمه


زمن الفين قلي ياعاقل وش تسميه
تشوف الذيب حصني وذمه ماش ذمه


مايذبح ابن ادم ويزود من بلاويه
سوى طعنه ابصميمه من اقرب بني عمه


عسى من لامني ربي الرحمن يعميه
علومه كل ابوها مطمه في مطمه


ماهو قاطع معاشي ولا رزقي على ايديه
مثل ماقال بندر في قصيده القمه


انا رزقي على اللي يباس القشع يحييه
يومٍ الاش رزقه ومصروفه من امه

[نــجــم]

قصيدة الــزلـــه


زله وانا معترف وارجـوك سامحنـي
ومثلك يعـذر الخطـا لعيـون غاليـه




معك الامانه يـاروح الـروح تمنحنـي
فرصـه تبيـن صفـاة القلـب والنيـه




جيتك تغنـي عـن العالـم وتفرحنـي
وان رحت راحت معاك الروح موليـه




يكتبي البعـد مـن عقبـك ويمسحنـي
ارجع وخل الجفـا لا تجيـب طاريـه




ياخي...احبك كثر مالشـوق فاضحنـي
استر غلاتـك وكـلٍ شافـك هنيـه!!




والكل والله علـى صدتـك ينصحنـي
رجال هااايب ولا تقـدر علـى بنيـه!




وانا لو انك عشـر مـرات تجرحنـي
كل جرح يزيدك غلا ويقربـك ليـه؟!




واذا انـت نـاوي تعذبنـي وتذبحنـي
الرووح مبطي علـى شانـك فداويـه




ماهمني النـاس تخسرنـي وتربحنـي
مدام طيفـك يساومنـي علـى الجيـه




ابك...انت لو بس في يدك تصافحنـي
كني ملكت الامـل فـي راحـة ايديـه




تعـال لملـم شتاتـي ولا تصارحنـي
انا ادري الحق من راسـي لرجليـه !!




مليون مره اعترف وارجوووك سامحني
ومثلك يعـذر الخطـا لعيـون غاليـه

[نــجــم]

قصيدة ظــابط خــفــر!!


يامالكٍ كـل الحـلا ليـه السفـر
طري السفر كنه هـلاك اقتادنـي




شوق وغلا واحساس مامنـه مفـر
الله وكيلـك ذا غيـابـك بـادنـي




يفداك من عندي كذا ( ضابط خفر )
وقت السفر وموادعك مافادنـي!!




الصد واسبابه على العاشـق كفـر
علمته اسلوب الجفـا ثـم جادنـي




ايه اعترفله باالغـلا حبـه طفـر
وانا لك الله اعشقـه مـن عادنـي




اخر نتيجـه بيننـا عشـره صفـر
سيطر على كل الحشا ثـم سادنـي




طيفـه يخايلنـي نفـر نفـر نفـر
من وين مالديت طيفـه صادنـي!!



كيكة حلا باالمختصر اشقر عفـر
مـن سبتـه ابـن الملـوح نادنـي




زودٍ على كل الحلا شويـة ظفـر
جعلى فـدا زولٍ غرامـه قادنـي




يقتادنـي لـدروب لاماهـا قـفـر
واصبر على ضيمه وصبري زادني




اطلب من الله ردتـه وانـه ايغفـر
ذنبٍ جنته الـروح ليـن اعتادنـي




القلب بعده من سفـر اليـا سفـر
اشهـد شهـادة حـق انـه بادنـي

[نــجــم]

قصيدة ســيــد الــغـيــد


بـديـت احـبـك وان شـغــل فـيــك واغـلـيـك
غـــــلاك بـالـشـريــان صـــــادر ووارد


يـانـاعــس الـطـرفـيـن شـبـيــك لـبـيــك
كـنـي بــو ســط ايـديــك خـاتــم ومـــارد


اطـلــب وحـتــى الــــروح والله لـتـجـيـك
الـمــوت لـعـيـونـك تــــرى شــــي وارد


احـتـرت مــن زود الـغــلا ويـــن اوديـــك
غـــلاك شـلــع بـــي لـكـوكـب عـطــارد


لـيـتـك تـحــس بلـوعـتـي يـــوم انـاجـيـك
مـاكـان لحظـتـهـا لـــك احـســاس بـــارد


احــن لــك واضـمــاك والـقـلـب شـاريــك
ومهـمـا تـســوي لـــك الاشـــواق تـــارد


اكــذب عـلـى نفـسـي لـيـا قـلــت نـاسـيـك
طـيـفـك يخايـلـنـي ولـــو كـنــت شـــارد


نـــاري جــفــاك وجـنـتــي لمـسـة يـديـك
لــو كــان لمـسـة يــدك حــوض الـمــوارد


والحب مايامن شيوخ ومماليك
ولاهز خفاقك سيوف وبوارد


وهـــذا وانـــا يـاسـيـد الـغـيـد مـغـلـيـك
جيـتـك انـــا واشـــواق قـلـبـي انـتـطـارد

[نــجــم]

قصيدة طــحت مــن عــيني


خلاص انسى غرامك حل عن عينـي
لا بو غـرامٍ مـع العشـاق مايرقـى




مليت اناجي طيوفـك وانـت ناسينـي
تعبت والا انت لا تتعـب ولا تشقـى




محبتـك عفتهـا لا تنشـغـل فيـنـي
مهمـا تسـوي (قسـم بالله ماتبـقـى)




لا تذكر اسمي على السانك وتطرينـي
دور بدالي وانـا اتحـداك اذ تلقـى!!




الفرق واضـح حبيبـي بينـك وبينـي
الارض ماتستوي عند السما الزرقـى



ولا عدت اصـدق كلامـك يامعنينـي
كذاب واهل الهوى في كذبهم غرقى؟؟




كنت اجمل ايام عمري واجمل سنينـي
كنت الوله والشجن لا ناحت الورقـى




وان كان ودك تجي (بعطيـك حلينـي)
اختار ياصاحبي( الفرقا او الفرقـى)؟؟




ملعـون جـد الغـلا كانـه ينسينـي
اسلوم ربعي وسواة الجـادل الطرقـى




خلاص انسى رجوعك طحت من عيني
ماتدري ان المطر لا طاح مايرقـى؟؟!

[نــجــم]

قصيدة اصــعب مــحــبــه


ياقلب جيتـك وافهـم العلـم ياقلـب
اللي تحبه يموت في حب غيـرك !!

كم قلتلك ياقلـب خلـه علـى جنـب
يمكن مسيره يستـوي مـع مسيـرك

الدرب واضح بس لا تجهـل الـدرب
اللـي يحـبـك دايــمٍ يستشـيـرك

ماهو مثل صاحبك عايش على الكذب
وان ماكـذب يمـوت الله يجيـرك !!

تبي الصراحه مالك ومـال هالقـرب
ماهو كفو شـرواه يصبـح عشيـرك

انا ادري انه تـرف وصغيـر وذرب
لا كن مصيره يختلف عـن مصيـرك

لا تحسبـن السالفـه كلهـا لـعـب
اصحى معي من شان يصحى ضميرك

اللـي تحبـه صعبـه شـوي ينحـب
قلـه يـروح وكـثـر الله خـيـرك

تدري وش اللي يذبح القلـب ياقلـب
انك تحـب انسـان ويحـب غيـرك؟

[نــجــم]

قصيدة شاعر غزل


وين انت عجل تعبت اخايـل مزونـك
ثاني شهـر واتحـرى هـل هتانـك


لوكان شفت الغـلا بعيـون مفتونـك
ماغبت حتى دقيقـه بعيـن خلانـك!!


احترت بين الجفا والصـد وطعونـك
بلاش يموت الهوى بسباب هجرانـك


مالي جدا كود اسامر جـرة لحونـك
اليـن ماسمـي الديـوان ديوانـك ؟


اقبل تمشى على هونك علـى هونـك
بشويش لا يقعد من النـوم شيطانـك


ماتدري ان الغلا خلفك ومـن دونـك
ايووووه كانك جهلتـه يادلـع كانـك


افرح ليامن علينـا مالـت غصونـك
وافرش ورود الغلا والقلـب بستانـك


شهرين عقب البطـا ماكنـي بكونـك
تعـال سيـل مداهيـلـك وقيعـانـك


مشتـاق بلحيـل لعيونـك ولجفونـك
نظرة عيونك تبلـل ريـق ضميانـك


ماهي غريبه تموت النـاس بعيونـك
بس الغريبه اوادم تجهـل اعيانـك!!


سولف فديتك ابسمـع كلمـة شلونـك
ماتدري ان السوالـف غيـر بلسانـك


كلك حلا والحلا واحـد مـن فنونـك
كلك بلا والبلا ( تينـك ورمانـك)!!


ايه اتباهى واقـول ان القمـر لونـك
ومصدر شعاعه حبيبي بيـن حجانـك


كذا........غلاتك من الله ثير مجنونك
وانا لك الله لهـز عـروق وجدانـك


والشعر كانه يهمـك جـاك لعيونـك
لابو قصيـدٍ تـردى فيـك ماصانـك


وكان القصايد ترد احسـاس مفتومـك
اصير شاعر غزل كله علـى شانـك


وابشر بقلبٍ على طول المدى ايصونك
لو خانت الناس يموت القلب ماخانـك

[صعبة المنال]

نجم
أج ــمل وأرق باقات ورودى
لموضوعك الجميل وصح لسان الشاعر
وسلمت على النقل
كل الود والتقدير
دمت برضى من الرح ــمن
لك خالص احترامي وتقديري

[نــجــم]

يسعدني ويشرفني مرورك العطر

تقديري لكـ

[يارا العامرية]

صح لسسسـآنه ..
وسسلمت يمنـــآك النجم ع اختيـــــــــآرك ..

[نــجــم]

يسعدني ويشرفني مرورك العطر

تقديري لكـ

[دانــه]

صح لسان الشاعر ولاهنت يانجم ع أيرااااد الديووان الرااائع
يعطيك العافيه .. :m-49:

[نــجــم]

يسعدني ويشرفني مرورك العطر

تقديري لكـ

[فادي الشلاحي]

تسلمً يمينكً علىً هذا الطرحً الراقيً

[نــجــم]

يسعدني ويشرفني مرورك العطر

تقديري لكـ

[شبيه اللول]

اقف احتراما لك ولقلمك الذي يحمل بداخله كل معاني الروح الصادقه
دمت بحب
في نتظار جديدك

[نــجــم]

يسعدني ويشرفني مرورك العطر

تقديري لكـ

[سلطانة]

http://www.halauae.com/uploads/images/alsaher-3814931317.gif

[نــجــم]

يسعدني ويشرفني مرورك العطر

تقديري لكـ

[دانــه]

صح لسان الشاعر ولاهنت يانجم ع أيراد الديوان الرااائع
يعطيك العافيه .. . :m-49:

[منادي]

صح لسان الشاعر تركي الديحاني
اشكرك يانجم على الديوان الرائع
الله يعطيك 1000 عافيه
و
تحية اعجاب لمن يستحق الاعجاب
منادي

[نــجــم]

صح لسان الشاعر تركي الديحاني
اشكرك يانجم على الديوان الرائع
الله يعطيك 1000 عافيه
و
تحية اعجاب لمن يستحق الاعجاب
منادي
يسعدني ويشرفني مرورك العطر

تقديري لكـ

[نــجــم]

صح لسان الشاعر ولاهنت يانجم ع أيراد الديوان الرااائع

يعطيك العافيه .. . :m-49:

يسعدني ويشرفني مرورك العطر

تقديري لكـ