ديوان الشاعر بندر المطيري

[نــجــم]

ديوان الشاعر بندر المطيري


ياسلام الله على من يطرق بيوت(ن) هزيله
يوم شد القاف وزنه صار يسرق كـالحرامي


جاك جيش الجزل مني وأعتلا الخيل بصهيله
كل بيت(ن) من بيوتي يعتزي بمليون رامي


مقند(ن) راس القصايد وبالضمير يفوح هيله
من كرم جود الأيادي ورث من خال وعمامي


هلّ هلّ الشعر مزنه وأغرق الوادي بسيله
لين بِلتّ كل عروق الشوق في صدر الملامي


وأنجلا وجه الظلام اللي أسرني طول ليله
وأنكشف وجه الحقيقه وأزهرت عقب المنامي


ديرة اللي ماتركها شاعر(ن) عابر سبيله
ليت مامر بطريقه يوم شاف الجو حامي


من غرامه قد جبرني أقتنع بالمستحيله
يوم ذوقني سموم القيض والخفّاق ضامي


جيت كلي في يدينه مزبني وانا دخيله
وجاا كله في يديني وأبتدت قصة غرامي


ينطق بحلوّ المشاعر وأنطق بمافيك حيله
وأن سكت سلهم عيونه وضاع بي أجمل كلامي


شوف عيني والغيوم بكل دار(ن) له تجيله
ماتشب الا غرام ولاتهل الا هيامي


يبقا بالخافق خليلي وببقا بالخافق خليله
ياأحلا أحلا ماكتبته وياأحلا مابه الشعر هامي


وأنت ياللي من رداة أليا رداة أليا رذيله
أسمي أرقى من مقامك وأن خذا فيك أهتمامي


ويش نقصك يوم تجمع من حصادي لك حصيله
ويش زودك قول وشهو دام بك هالعقل طامي


لا تباها في حقوقي ولاتمادى في قليله
مايموت الذكّر حتى لو غدا جسمي عظامي


كل بيت(ن) من بيوتي يمتطي خيل(ن) أصيله
ماعسفها غير خيال(ن) على الجزلات سامي


وكل قول(ن) قد فعلته وكل علم(ن) له جميله
وكل رجم(ن) قد رقيته وعزتي تبقا حزامي


لو حصلي ماحصلي ولو يقولو طاح حيله
ماوقعت الا بوقوفي ولا نظرت الا أمامي


أترك أحمول(ن) خفيفه وأفرح بشيل الثقيله
وأفزع أليابعد صحيب(ن) فزعة اليامي ليامي


مانطقت الا بجزيله ولاسكت الا بجزيله
ولاركعت الا بصلاتي ولاعطشت الا بصيامي


إيه أسمع كان تسمع غاية الشاعر وسيله
خلها دايم في بالك تبطي ما توصل مقامي


مايناسبني كلام(ن) شاع بالوادي مقيله
والأسامي لو تشابه أنشد بفعل الأسامي


جاك جيش الجزل مني ،، ومالنا ومال الطويله
مايوفر عن كلامي غير يافاشل ،، سلامي

[نــجــم]

حيّ القصايد لـ اعتلى الجو وحلوّ
الأرض أرضي لو تبي الجو جوّك


رفرف عسى مايلحقك صاحب السوّ
ياللي يتباها في سموّك سموّك


وأن شفت وسط الأرض من صاحبك ضوّ
فـ ابشر ترا مادوّ في الأرض دوّك


واللي يتدارا في خفوقه ورا لوّ
قله ترا لويّ ماهو مثل لوّك


أتعب على مجدك ولو قلت لك توّ
مجدك كما النيران داخل عدوّك


مادام طيرك معتلي بك ويعلوّ
فـ أفخر ترا كل مـ أعتلى من علوّك


وانا ترا لا قيل لي صاحبك هوّ
أحس كن الأرض تحتي تشوّك


من قوّ فخري بك عجز قوها قوّ
وكن المرايا تعكس شعاع نوّك


ياللي بشعرك تجذب السمع في دوّ
وياللي بأسمك يطرد الليل ضوّك


طيرك يطير بهالفضا مالك الجوّ
لا تقول تويّ ..ولا انا أقول توّك


صاحبك مادام بقصايده يزهوّ
فـ ابشر ترا مادوّ في الأرض دوّك

[نــجــم]

بان الزراق وودعّ الليل بالنور
واتنفّست عقب المسا صورة الضي


من غردت فوق الشجر عدة اطيور
والورد عم بريحته أخر الحي


الضيق له في داخل الصدر دستور
والصبر يمحي به ولا غيّر بشي


الحظ مات بدفتر العمر مقهور
والهم صار بخافقي ينطوي طي


البارحه يثور بي الهم ويثور
وعجزت اقاوم ضيقت(ن) ماهي شوي


يومي سريت بدرب الأصوات مجبور
على طريق(ن) كان به صاحب(ن) حي


أزريت أصدق ماحكو.. ماتت شعور
وعجزت أرد بمسمعي كلمة(ن) زي


هو مات هو مامات ؟ مصدوم مذعور
تعبت ولاكنها على الأرض رجلي


ذهلت ولاكني سوا أنسان مكسور
النفس تدها والعطش مطلبه مي


العين تذرف دمعها كنه ابحور
والحزن كنه ياكل اللحم بي ني


قبل أمس كنا نضحك ومابنا جور
واليوم نار الهم تكوي بنا كي


يالله ترحم من رحل خلف هـالسور
مخضوع راسي لك ورافع لك أيدي


الدور من يدري على منهو الدور
ماغير وحده الخالق الباقي الحي


تب تمتلي هالأرض وتب تشبع قبور
سوا تكون بذي أو ذي أو ذي


أعمل لما باقي من العمر للحور
وأقم صلاتك ماتفيدك سوا هي

[نــجــم]

ياغايب(ن) ماسمعت الصوت لمنادي
أمسى يردد لهيب الشوق في جوفه


حتى طوته الهموم وجرحّه أزدادي
من يوم ضاع الكلام العذب بحروفه


يامل قلب(ن)يزيد الشوق بعنادي
ويهز جرحه البعاد ويسكنه خوفه


ويثور موج الغرام ابحره الهادي
ويكسر مجاديف عشقه..الهجر ويحوفه


لو قلت عادي غيابه ماهو بعادي
مجبور أكابر وأصبّر نفس مشغوفه


انا أشهد انه عديل الروح..ومرادي
وافتات قلب(ن) يزيد النبض بطيوفه


غرون تمادى بعيني وعاند ارقادي
وأزريت أغمض عيون(ن) هايمه بشوفه


من لامني في غرامه ينشد فؤادي
حكيه جواهر وصوته أنغام معزوفه


في نظرته نور برق(ن) يسبق رعادي
والليل من روعته غافي على كتوفه


خده كما بدر(ن) بنص الشهر بادي
ونجوم جفنه تلئلئ من سنا شوفه


يااعجب رواية غرام(ن) صعب تنعادي
ضاع المؤلف مابين اهاته وأووفه


يامصدر(ن) للغلا ماجاك ورادي
يسوق عذر الغرام بكامل ظروفه


خوفي يمدد غياب العشر بالحادي
وأعيش أحاسب بقايا العمر بحسوفه


ياديرة العشق ياملفاي يابلادي
سبحان من صوركّ في كامل وصوفه


أشعلت في يوم حبك شمع ميلادي
وقدمت لك من ورود الشعر مقطوفه


ياسكر أيام عشق المغرم الغادي
تبقا عيوني على شوفتك ملهوفه

[نــجــم]

زرعت في صدر المعاناة معلوق
ونبضت نبض الشوق وسط المحاني


وأشرقت في ليله من أنفاسي شروق
ورسمت في وجهه بقايا الأماني


ووصلت دم بدم وعروق بعروق
وخليت كل مالان بالحب لاني


قبل أمس ضاق الشوق ياعالم الشوق
والنفس حارت بين مجني وجاني


للي رحل وأقفى وراه قلب محروق
وستصعبت كل الحروف بلساني


خنقتها وانا أعترف حيل مخنوق
مابين هجر وبين لعب الزماني


ناديت له ولاكن بيّ الصوت منطوق
ولوحت له ولاكن عيونه تراني


ياضيق صدري عقب ماغابت بروق
وجفت بوسط الصدر حلو المعاني


يانفس عزك فوق أياّت مخلوق
ولازعزعك في عالم الغير داني


الغيم لامن مر ثم أرتفع فوق
رزقي يجيني مايجي شخص ثاني


تبقا الرجل كنها على القاع طابوق
ويبقا الشموخ وباقي العمر فاني

[نــجــم]

لمحت شق النور في صدر الأدماس
وسقيت كل حرف(ن) بدا في بريقه


وجرعت مر الصبر من كاس لى كاس
حتى أزهرت في جوف روح الحقيقه


أبيات شعر(ن) صاغها الوقت بحساس
من نفس ماتت في بحوره غريقه


الشعر نومس بالعرب ناس وأجناس
وكل(ن) ببحره عارف(ن) وش طريقه


أحد(ن) بشعره يجلب الضحك لـ الناس
وأحد(ن) يسولف بالجروح العميقه


وأحد(ن) بربعه عد بالشعر نوماس
يوم يتفاخر في قصيده رفيقه


رميت حلم(ن) ماتزعزع به الساس
وقلبّت بالتاريخ قصه عريقه


لـ لله دره كل مازارني ياس
وقامت تحاذف بالصدر ألف ضيقه


سلام ياللي موطنه وسط الأنفاس
بعداد نبض الشعر لـ أبتل ريقه


وبعداد نيران الفكر وسط هالراس
وشيء(ن) تعوفه النفس وشيء(ن) تطيقه


أسنين أحرث بالأمل وأزرع الباس
وأكسب من الأيام لو هي دقيقه


هذا وحلمي زارعه وسط قرطاس
وأنزف عليه الحبر من قبل أفيقه


أشرق وهب الشعر بالفكر نسناس
وسقيت كل حرف(ن) بدا في بريقه


عله يسولفبي على ألسان الأحساس
أو هو يبيّن بالمحبه رقيقه

[نــجــم]

لاتصوّر الذكرى على باب الأموات
ولاتطري الفكره اذا الجرح طابك


أجمع شتات اللي يلملم بك أشتات
وأقنع خفوق(ن) ماقتنع في غيابك


وأصدق معاي ولو من الوقت لحظات..!
لاتطفيّ اشموع الأمل عند بابك


لد النظر..يالعنبو الحظ لو مات
يحييِ جميع الخلق ويموت مابك


على طريق اللي تثاقل به أوقات
شابت قوافي الشعر من راس شابك


لاصار بالخافق تناهيت وأهات
نثرت في روح القصايد عذابك


ذكرك وصوتك واللقا والمسرات
شوقك ووصلك والغلا يوم صابك


شيء(ن) يفوت وشي ما قد بعد فات
ياللي تباها من جمالك ثيابك


في بسمتك..ضاعت نجوم ومجرات
وفي نظرتك..غاب القمر من جنابك


أليا سكت..أعيون تحكي بلا سكات
وليا حكيت..العطر فاح بخطابك


ياريحت العنبر..ويامسك الأبيات
أشعلت لك قلب(ن) على الكف ذابك


قلب(ن) على باب الأمل يدفع الذات
وغصب أتمسك بالأمل يوم غابك


وصحيح أردد قولها عد مرات
(ليت الذي وداك يازين جابك)

[نــجــم]

عز الرفيق اللي يجيلك على الدين
ماهو من اللي رفقته لك خساره


كف الزعل ياصاحب العسر واللين
ياللي يمينه تسبقه في قراره


قبل أمس كنا أثنين إيه أجمل أثنين
بس الزعل من بيننا شن غاره


جرحي يروغ بخافقك وأنت جرحين
منهم تغيّر خاطري عن مساره


ماكان ذا طبعي بطرد المقفين
وياكم غيرك يحترق وسط ناره


لكن علمي واضح بوسط هالعين
لو شفتها تفهم معاني العباره


كـف الزعل لابو الزعل كان بعدين
ينذل عزيز القوم في وسط داره

[نــجــم]

البارحه والدم ضاق بعروقه
وهموم صدري بانت بوسط عيني


يوم(ن) ظلام الليل ينطر شروقه
وانا أتحاشى ضيقته ياضنيني


جريت صوتي بالحنين وشفوقه
على طريق(ن) صار بينه وبيني


أقبل وكنه مقبل(ن) دون شوقه
قصده يموت مابقا من حنيني


يوم(ن) أجيه بكل شيء(ن) يروقه
ويصدني بالجرح كن مايبيني


وسريت ليلي بالقصيد وطروقه
وأصبحت أدوّر وين هو صار فيني


الخد من همه تباين شقوقه
والجرح في جوفي يعانق ونيني


جعل الذي متسبب(ن) يوم عوقه
يقبل عليه الهم في كل حيني


اما انا من باعني بوسط سوقه
بعته ولو كان الثمن به سنيني


وبكره يردد والندم في خفوقه
(فرصه وضاعت للأسف من يديني)

[نــجــم]

الفكر حاير والمشاعر تحراك
والعمر لحظه وأنت تدري وش أتكون


لاصرت تنبض في خفوقي ولا ألقاك
وأساير أوقات المشاريه بالهون


وأنطرك بالموعد على باب طرياك
مابين زحمة صمتك وحكيّ العيون


وأضيع..وأسرح..وأتمناك..وألقاك
من خلف باب الفكر تقبل ومن دون


وأعاتبك..وأعاندك..وأطلب أرضاك
وأقلب حياتك لون وأردها لون


وأجيب طاري الجرح وتقول وشجاك
وأقول جرحك غير..لكنك أتمون


حتى أتغنى كل بسمه على اشفاك
وأقول شفت الكون يفداك هالكون


ثم..أبتعد..وأصد..وأقول بجفاك
ثم ألتفتلك..وأبتسم..ليه مجنون


لايكون صدقت أن أنا يوم بنساك
وأنتَ مكانك..قلب..وعيون..وجفون


أقرب..تعال..وشوف..كل مابي يهواك
أقرب تنفس هالغلا وأحرق أشجون


ماتدري ان العمر ضايع بلياك
ولـ أقبل خيالك ينمحي كل مكنون


لاصرت انا وياك ولانيب وياك
لاعاد تنشدني عن الحال وشلون


هذا ترا حالي على باب طرياك
ولـ أقفيت يقفي كل مافيّ مغبون

[نــجــم]

صفحه وطواها الوقت..وأحساس مغليك
راح وتشتت بين خايب وصايب


مات الغرام وبس ماعاد يمديك
النفس طابت منك..والجرح طايب


شد الرحال وروح والله مابيك
وذنبك مع الأيام انا منه تايب


قفلتّ باب السمع في وجه طاريك
ونوخّت للفرقه جميع الركايب


بالله قلي وش ربحت أبتغليك
هذا أنت جيت وحظك اليوم خايب


لو كنت تدري بالنهايه بخليك
مافاح عطر اغياب وقتك هبايب


ماوحيت صوتي يوم انا كنت اناديك
حتى غدا شمع الغلا منك ذايب


أمشي وأدوّر وأسأل الناس وشفيك
وطفل الغلا يشكي به الراس شايب


أسمع صدى هجرك من أيام وأبكيك
واحنّي أكفوف العذر وأنت غايب


إلى متى وانا أنتظر عذر ينجيك
ودوامت أغيابك بها أكبر مصايب


لا واحسافه جبت لي الهم بيديك
وانا أحسبك للقلب كل الحبايب


كفكف دموعك ماحصل منك يكفيك
عساك من دربي لدرب الصعايب


لاتقول (أحبك) روح والله مابيك
ماعاد ينفع لو غدا الماي رايب

[نــجــم]

يقول من رد الحكي من سمعبه
خله يثرثر دام هو شخص مجنون


يوم(ن) كل(ن) مقتنع..ماقتنعبه
وما مره الا بيت بالشعر مدفون


طبعي كذا ولو جابهك يوم طعبه
ولاتسري الا بدرب به ناس يسرون


حتى تميّز بين نوره ورعبه
وتلقا مردك وين من تطلب العون


الصدر ضايق..والسواليف صعبه
والخافي أعظم كان مابحت مكنون


يالله تستر كل جرح(ن) خضعبه
وتفرج هموم(ن) ناحت بقلب مغبون


ياهيه لو كان الهوى بيوم لعبه
وشلون حالي بذمتك قلي شلون


كنت أحتمل هالشوق لو أستطعبه
أو يجهل التفكير طاريك ويهون


والا الجسد مايشعر بيوم تعبه
وينعس طرف مر السهر وسط العيون


يالايمي والحب كل(ن) رثعبه
شف حال من حبو وكانو يهيمون


اللي على بحر الغلا مندفعبه
واللي كتمه من خوف ناس(ن) يحسدون


ماني من اللي كل شيء(ن) طمعبه
ولاني من اللي لـ الندامه يعرفون


ياهيه لو ضاق الحكي ماوسعبه
شيء(ن) يعيش ابوسط ناس(ن) يموتون


مير الحقيقه كل حرف(ن) سطعبه
نورك يانور العين ياأجمل الكون


انا الوطن ياغايتي وأنت شعبه
والا الوطن من دون شعبه وش يكون

[نــجــم]

ياطول ليل(ن) راح طيفك سهيره
وانا أحسب اللحظات لايغيب عني


أسكت وأراقب ساعتي المستديره
لاينكشف وجه السما بصوت وني


وأضوي شموع أغيابك أبكل حيره
وأسوقلك كل القصايد تغني


وأنسج من الأعذار.. وأقول خيره
وأكتم بقايا بوح.. لايفضحني


بعض الجروح اللي تهاوت كبيره
تلعب عليها بفن ماهو بفني


كم لي وأردد قول (الله يجيره)
وأعيدها والمشكله اليوم..أني؟


تعبت انا أسكن غربتك وأنت ديره
وعجزت انا أوقفبك ثواني تمني


أروح مع دربك ولا أود غيره
وأعود مابحت أبسواليف كني


ـــــــــ



أستاحشك غربه وشوق(ن) وغيره
وأستوجدك فرقه لو تمل طعني


وأستبعدك أنسان ميّت ضميره
وأستقربك عن ضيقتي تنتزعني


وأستودعك بعض الخواطر كسيره
وأستقبلك لو كل جرح(ن) منعني


وأخايلك في كل درب(ن) أسيره
وأحايلك من لهفتي..لاتدعني


ـــــــــ



ياموطن أحساس الغرام وسفيره
يامرتوي أحروف الغلا اليوم مني


والبارحه والليل طيفك ينيره
من دون شمع(ن) ذاب في وسط ذني


أحرق هموم الجوف ثم أستخيره
وأجيب باقة شعر بسمك تهني


وأهيم بك بأحلى الكلام وعبيره
وأعيش بك لحظة تأني.. وتأني


خايف ينام الليل وأصبح هجيره
وأصحى بصوت أحروف شعر(ن) بكني


وأستدرج اللحظات وأرجع وأديره
وأقول ضني خاب.. ماخاب ضني!


يعني حكاية شوق ماهي صغيره
والعقل ضاع ولاحصل به تدني


أشوف هجرك وأستفزه وأثيره
وأعاندك في وّهم وأنت أمتهّني


خل الكلام ينام في وسط بيره
وخل الجروح ابيوم تب تستكني


والليل راح ومابه أيّات سيره
مدري سهيره طيف..أو كان جني

[نــجــم]

الجرح دامي والسوالف حكني
والقلب عاشق ميت(ن) في غرامه


ياطول ليل الجرح حتى بكني
بنات فكر(ن) ودعن بالسلامه


انا الغريب اللي عليه أرتكني
أهموم وقته وألتوّت في عظامه


لو كنت أكن أهمومها وطال كني
رميتها في وجه ليل وظلامه


....



ياصاحبي دام الخطاء منك لاباس
أدمح خطاك وطيب الأجواد ماقيس


وأرد حزنك وأنتزع أخر الياس
وأصب في جوفك جميع الأحاسيس


أسمع خطاب(ن) جاك من صادق أحساس
وأفهم وانا بكرّس القول تكريس


ماهي غريبه إنسان يخطي من الناس
ولاهي غريبه الناس تخطي من أبليس


ألومك أن كان الخطاء ماله أقياس
أما خطاء واحد مع الطيب ماقيس


......



ياقلب قلت أتوب وأزريت لاأتوب
منه عسفت الشوق ولارحت منه


شد القصيد وجر بالصوت مسحوب
وأعزف على وتر المحبه وغنه


وثم أدبل الخطوى وترا الوقت محسوب
هذا ترا خلك ولا فيه منه


وأقبل عليه وكل مافيك بيذوب
أليا نظرة بعين من غبت عنه


.......



ود وعطايه شوق بالقلب تسأل
لاجيت أبنثر هالعمر كيف أفله


وليل(ن) نزف به جرح وأحساس مهمل
وأنا أدور وسط دنياك حله


تعبت أنا أصفق كف الأيام وأحمل
غصن(ن) من الأشواق دونك تدله


يابسمة أيام الهنا ليه تخجل
سيف الغلا لاجيتلك يوم سله


ياللي جبينك نور هالكون وأجمل
وياللي بعيونك كل عين أتحله


وياللي الجمال يزمهلك وأتزمهل
وياللي النجوم أبوجنتينك تسله


وياللي سترتك في عيوني عن الكل
وأمرت رمشي ظل ..وأقول ظله


خوفي عليك من المخاليق تذبل
ياوردة(ن) يبخل بها الوصف كله


مرت علي أيام وانا أنتظر حل
وانا كلامي ماتعدا محله


أن كنت ناوي تذبح الشوق فمهل
قلب(ن) يبيك امن المخاليق خله


المشكله لاقلتلك يوم ابرحل
زاد بعناده القلب لاقلت خله


خوفي على دمعك من العين ينهل
لارحت مقفي وذابح الشوق غله


ماباقي الا سراج هالشوق تشعل
والا تريّحني من القلب تله


وأذا تركته كيف بالله ..تجهل
قلب(ن) يبيك وصاحبه اليوم مله


أبنشدك لو مات هالشوق ! أو مل
وشهو مصير القلب ..أو قول (من لـه) ؟

[نــجــم]

ديره وقوة شعبها مالها حد
وناس(ن) تقول أذياب ليل وتعاوت


وصوت(ن) حكى عن قصة إنسان وأمتد
من خلف سور أهل المدينه تراوت


وطفل(ن) فقد في واقعه أخر الجد
وحروف في حب الورق كم تهاوت


أسنين نحرث صبر الأيام ونعد
وأيام تاخذ صبرنا وأتفاوت


تدرين وشمعنى المفارق ؟ ماهو الصد
معناه موت بمن له النفس أوت


وتدرين وشمعنى الأمل يوم ينهد
صاحب وفيِ وضنون حوله تخاوت


المشكله هالنور من دونه السد
والناس معظمها بهالقول لاوت


والمشكله ماعاش بك شخص منحد
ألا وأحاسيس(ن) بنفسه تحاوت


عل وعسى في جوف الأوراق تنشد
والا مع كل الزوايه تزاوت


قمة عطايه الشوق.. تلقالها رد
وقمة حزن تاريخ.. قصه تطاوت


وعلى جدار الشوق برسم له الود
وأبروزه باخر جروح(ن) تداوت


وأعلمه أني من الجد للجد
حرا(ن) يمينه لعزها كم تقاوت


وأن ماكسبته ود لاتحسبه نِد
مايوم قيل أن الأصابع تساوت

[نــجــم]

يالله عفوّك من صدوف المقادير
لاروحّت بين الخطايه خطايه


يالله عسى طول الصبر يثمر بخير
وأن ماجنيت الخير خفف بلايه


وأغفرلي أذنوبي قبل ياقف الطير
من فوق قبري والعرب في عزايه


ياجار مع درب المساء سير واسير
وبمثل ابدوري لك أغرب روايه


الوجه أبيض والنوايه مغاتير
مهما أبخلت كف الزمن بالعطايه


أرضي عجاف وحالها دايم امحير
ولامر بي مزن(ن) وعانق سمايه


كم لي أدور للحكي أي تفسير
لامن فعل شفته ولاشفت غايه


تسعة سنين أتجابه النفس تعسير
ولاحطم أطموحي ولاأطاح رايه


صحيح وسع الصدر ماياسعه بير
ول الصبر فيني ماتلاقي نهايه


ألزم علي أقوم في كل تقدير
ووجب أضيوفي ولو به شقايه


وأرقى بعنادي ظلم الأيام وأنير
باقي السنين وتنكشف لي نوايه


يوم(ن) بعض الناس يشري بي الغير
والبعض الأخر كل همه رضايه


يالله تفرجها .. وعليك التدابير
ويالله يسّر .. مابقا من بقايه


ماكل من يخطي يجيب المعاذير
وماكل من فضفض يبوح الخفايه


ياجار راح الليل تصبح على خير
فضفضت ماعندي أبحجة حكايه

[نــجــم]

أشعلت نار الشوق في صدر الأوراق
وأبكيت من حبر الغلا عازف الناي


ووحيت من ردد معي كل ميثاق
وأرخيت سمعي له بعد طول مشقاي


قلت أحتمي بالصمت حتى ولو فاق
وأشد عزمي كل ماتتعب أخطاي


فيني شعور(ن) مايروّق ولا راق
وفيني كلام(ن) ماحكيته على أشفاي


حشمت صمتي بمن حوى شعره أدقاق
وأثبت نفسي في غيابي ومبداي


ل الناس أذواق(ن) ول الشعر ذواق
ومن الصعوبه أرضيّ الناس برضاي


شعار نطمح نعتلي فوق الأفاق
وكل(ن) على مايهتوي يشرب الماي


وكل(ن) بشمس الشعر يدخل بمشراق
لكن منهو يجتمع حوله الراي


ولا أنت ياللي بالشعر خاطرك ضاق
وش يزعلك لامر الأحساس سلواي


وش يزعلك لامر غيرك ولا ذاق
من كاس شعر(ن) مانحنى دونه أضماي


مايعني أن قلت العنا تفهم أفراق
وماهو ضروري بالحزن أقصد أبكاي


ماسقتها والساق ماتلحق الساق
أضرب وتدها حول دارك وملفاي


مابي أتقلد شكك اليوم بعناق
ولابي تحط أنجوم غيرك بدنياي


أحبك أعظم من سكوت(ن) معي لاق
وياكبرها في غيبتك حيل بلواي


جيتك ولاني عاشقك .. جيت عشاق
تجمعو في غيبتك داخل أعضاي


أفهم غيابك ماهو عادي وينطاق
كنك تقول الموت في كف يمناي


وألحين خل الحب مع كل الأشواق
وأسمع خلاصت قولي وكل مخفاي


بعض السكوت يقول لك حيل مشتاق
لكن والله ميت(ن) شوق بحكاي

[نــجــم]

أصبح صباح الحياه والحلم في نومه
وأندب على المهتوي في قول هيهاتي


ماغاب نجم المشاعر ياأعظم أنجومه
ولاصاح صوت المنادي وغاب بسكاتي


أن مالحقك قول شاعر صاغ منظومه
أقسم بربي لنكس كل راياتي


ياحلمي اللي عجزت ألقاه وألومه
حطم غيابك طموحي وكل هقواتي


أسوق درب الكرامه وألبس أهدومه
وأرقا سنام القصيد وقمة أبياتي


العام عدا ونفسي منه محرومه
وأطعون هجره تعدت كل مسافاتي


أصفق كفوف الندم واعانق أهمومه
أقفت مراكب غرامه وسط أهاتي


وأن شفت طيفه أدور أخر أعلومه
وارضخ لواقع زماني وأجمع أشتاتي


قصة غرام(ن) على المعشوق مقسومه
وان صاح صوت المنادي أنتهض ذاتي


أقول حلم (ن) سرا ليله مع أغيومه
أرخى ستار المنام وصد شرهاتي


وأقول قلبي عسى ماطاحت أعزومه
وأرمي بوجه الشروق أخر طموحاتي


الحزن وادي وصرخه فيه مكتومه
والجرح يروي ضميره بعض أناتي


والحلم يبقا ومعاه النفس ملزومه
والعلم يصحى بجوفه في نهاياتي

[نــجــم]

البارحه ياحمود.. ليل الدواهي
وشلون مدري.. لكن القلب به جور


لو قلت حالي .. قلت حالي كماهي
لكن انام الليل والقلب مقهور


ماني من اللي عايش العمر لاهي
كم لي وانا أتعب وأخذ العلم وأشور


وأعز نفسي دون مالي وجاهي
وأطيب الخاطر اذا كان مكسور


وأبني ابضعيف النفس عز وتباهي
وصارع الواقع وودعه مسرور


ياحمود وقت المر بالقلب ساهي
وانا على مرقاب هالعشق معذور


تدري وش اللي جد شد أنتباهي
أنه يلاعب ليل ويداعبه نور


وأنه قويّ الباس لو كان راهي
وأنه يغر الناس ولاطبه أغرور


يعني يغيرّ في الحياة أتجاهي
ويزرع غلاه أبخافقي ويحصد أزهور


ياحمود كلمه وأعلِقت في أشفاهي
وأزريت أحرفها مع أيام وشهور


قله ترا قلبي عن الغير ناهي
وأن ماصدق بالود ماهوب مجبور


وأن قال وش حالي.. فقله كماهي
لكن ينام الليل والقلب مقهور

[نــجــم]

يابو فهد لولا الغلا ماتطرفت
يومي جعلت أثياب حرفه لحافي


لو جبتها بالظن والله فلا أخلفت
حتى لو أني .. ألبس أحداد قافي


كل مانطقت امن الجفا بيت .. خالفت
وأرجع وأمد امن الشعر نبع صافي


أبديه قول .. وكم بهالقول شرفت
من كل حرف وحرف حد أعترافي


غاب الفرح .. ولنور وجهّ تسلفت
ضحكه حزينه وأرتمت في أشفافي


أنصفتها وياللأسف ليت مانصفت
من يوم عينه أدمعة بالقوافي


حتى سكنت أبضيقها لين .. ماطفت
من كل بيت وبيت .. صغت أحترافي


أقطف من اثماري غلا له .. وأتحفت
ناس(ن) يبان أحضورها بنصرافي


وليا طرالي باخر الدرب .. خففت
كنه فرش جمره وانا جيت حافي


خطوه بخطوه .. وثم خطوه ووقفت
وحطيت حد ألموقفي وأختلافي


قلت الشتاء عدا وانا ألحين .. صيفت
من عقب وقت بصدر الأوراق غافي


وقلت الفكر يجرح وللحين ماعفت
بيض الورق وأحساس ماقال كافي


لو كان يسقي هالغلا .. ماتجففت
وحبه سكن بين الضلوع .. النحافي


لا يابن عمي كان بمواجها حفت
مهما دفنته لك .. أبيح الخوافي


ماهي غريبه كان في يوم صادفت
من يقبل أبوده وثم صد قافي


ولايزعلك في يوم ضيقي اذا شفت
بانت سموم القيض باخر مطافي


يبقا الشعر بحر(ن) وانا فيه جدفت
ولوهو غدا مابين هالخلق خافي


وأخر معاني صادقه .. يوم حرفت
(وافي وجيت ابوقت ماهو بوافي)

[نــجــم]

الحب شيّ(ن).. كلنا مانعافه
وكل(ن) طمع به وللغلا راح ملهوف


والمرجله نسعا لها كالخلافه
وللحرب طبل ول النصر فرح ودفوف


طرىّ علي ابليل قبل أنصرافه
أسم الذي من زوّد الجرح بالجوف


حتى لمحت السرب مر بكثافه
وكنه يغرد صاربك جرح مكشوف


الصاحب اللي عاش وقت الحسافه
من يوم حب وصارله الحب معروف


مبداه لعب وبالغرام أحترافه
قلّة حلا ومعقد الناس بوصوف


من عض أبهام الندم في أطرافه
خله مع اللي باعته ورد بحسوف


هبت نسيم الذاكره بعترافه
ماتنشرى صحبتك بألاف وألووف


وهذي ترا ياخوك ماهي طرافه
يمكن نصيحه زفها الوقت بحروف


وماكل قصه تنذكر هي خرافه
وماكل فعل(ن) ينسا بأية اظروف


ولاكل موج(ن) جابهك بنجرافه
يكسر مجاديفك ولو حافها حوف


من زاد في همه تزايد نحافه
ومن يذكر الله كل هم(ن) به يطوف


ورأي(ن) يخالف رأي أعرف خلافه
وكل اليتامه شيلهم فوق الكتوف


ولاتصك بيبان الكرم والضيافه
أذبح ورحب كل ماأقبل أضويف


وأحذر من دروب الردي وأنعكافه
وأحذر من اللي ينافق بكثّر ألحلوف


وأرضا بقليل الوقت والوقت صافه
كنز القناعه ماحصل عند ملقوف


واللي توسد مامضى مع لحافه
خله مع كل مامضى وفوقها أووف


يازين منهو أنعرف في أعتكافه
اللي ختم قرأن ربي من الخوف


أبيك نجم(ن) ماتعبت أكتشافه
وأبيك شمس(ن) مايمر حولها أكسوف


وأبيك مجد(ن) أنزرع في جفافه
ياأمير كل أشعار (بندر) يابو نوف


وهذي نصيحة شاعر(ن) وسط قافه
زفيتها لك زفة الحبر لحروف


وياخوك ماصاح القصيد أبغلافه
ألا وهوّ يبكي قصايد على أرفوف

[نــجــم]

تعال أقرّب وأستمع للحكي زين
ودي أسولف لك عن أسباب وأسباب


وودي تبرهن لي (مثل) واحسبه دين
(ماضاقت ألا تفرج وللفرج باب)


يامُهجتيِ أياكي من وحدتي حين
أرى ظلام الليّل يأتي بجلباب


من أين يأتي طيّف ذكراّه من أين
ويزجُ همً(ن) في الحنايا كامِخلاب


وانا شعوري في غيابه غدا بين
كلمة أحبه يالغلا وكلمة أعتاب


وأرض السواد اللي من أشهور يازين
شابت وحتى الفكر من دونها شاب


مل الصبر بلسان من قال بعدين
وأزريت أعلق هالأمل والأمل خاب


وأزريت أوقف هالعمر وأسأله وين
اللي تركني وأنقفل دوننا باب


للحين يطعني وانا أقول ياحسين
ماطاب دونه جرح الأيام ماطاب


ماشفت نوره لين ماغمضت عين
صعبه نعيش ابحلم وبالواقع أغراب


أنا دخيله لو بقا بعمري أسنين
إما يحط أحضور أو يعلن أغياب

[نــجــم]

أهلن هلابك كل ماحل طرياك
ليتك تشوف من الغلا حال مغليك
أنسى جميع الناس وألفي لملفاك
ويحرق معاليق الصدر زود طاريك
الحب ماهو كلمة أغليك وأهواك
لو تعرف اللي بالحشا ذاب مافيك
أنا أتعطّش بك غلا حيل وأضماك
ولا أرتوي ياكود من ماي كفيك
وأنا أتوسّد بك وله وأتغطاك
وتغفا عيوني بظمة الشوق بيديك
لايكتب الله يالغلا يوم فرقاك
وياجعل دمع العين مايوم يبكيك
ذابت خفوقي يالغلا في محياك
يانبض حرف الشعر يومه يناديك
أطرب بصوتك وأتنغم مع أحكاك
وأعزف مراسم ضحكتي يوم ألبيك
لبيه ياأحلى القصايد انا أفداك
ويفداك شاعر ماكتب غير مغليك

[صعبة المنال]

نجم
أج ــمل وأرق باقات ورودى
لموضوعك الجميل واختيارك العطر
قصائد رائعه ومجهود اروع منك
كل الود والتقدير
دمت برضى من الرح ــمن
لك خالص احترامي وتقديري

[نــجــم]

يسعدني ويشرفني مرورك العطر

تقديري لكـ

[يارا العامرية]

صح لســآنه ..
واشكرك نجم ع ايرادك ..
تقديري ,,

[نــجــم]

يسعدني ويشرفني مرورك العطر

تقديري لكـ

[العنيــــدهـ]

سسسلمت يمناك على رووعة الإيراد
يعطيك العافيه
!..❥

[نــجــم]

يسعدني ويشرفني مرورك العطر

تقديري لكـ