ديوان صالح الشادي .. ورحلة الهجرة إلى الخيــال ..! [الأرشيف]

نــجــم

06-04-2011, 08:01 AM

د. صالح سبأ أو الشاعر صالح الشادي .. أحد الشعراء المبدعين الذين ساهموا بشكل فعال في رسم ملامح الشعر العامي المعاصر من خلال تجربة شعرية ثرية جداً خاضها عبر رحلة سنوات طويلة .. انقضت بشاعرٍ لايمل تنسيق الورود في روحه لـ يهديها باقات أنيقة مختلفة لـ متذوقيه ومتابعيه بكل أشكاله الموسيقية .. العمودي - التفعيلة .. الغنائي .. وبكل رؤاه النفسية المتشظّية بين القصيدة الوطنية والاجتماعية والعاطفية بل والمغناه تلك التي تنساب بين الأضلع .. لتنظّم فوضى النبض .. وتنتزع التناهيد .. وتطرب لها الذائقة .. من خلال أصوات كثير من الفنانين الخليجيين والعرب .. يغذيها ويساهم في رسم ملامحها ولعه بالموسيقى وحبه للفن التشكيلي ..

صوت الشادي الإبداعي يمتد .. منذ بدأ النشر في الصحافة من أوائل الثمانينيات ميلادية لكنه توّج حضوره الإعلامي بكتابة أوبريت الجنادرية السابع .. في العام 1996 كتب "كفاح أجيال" وفي العام 1998 كتب " أوبريت المعالي " في العام 2001 قدم أوبريت "مليك القلوب" بالعربية الفصحى وهو في قمة عطائه الشعري الثري في أبعاده الانسانية .. والاجتماعية .. والمشحون بـ همّ قضايانا الوطنية والقومية .. إلى وقتنا الحاضر ..
قدم أمسيات شعرية كثيرة في مهرجانات أدبية خليجية وعربية أهمها .. مهرجان هلا فبراير الكويت 2002 م ومهرجان الشعر العربي عمان 2003 م ومهرجان الدوحة الثقافي 2004 م

رحلة الشاعر صالح الشادي الحياتية .. يدعمها روافد معرفية عديدة .. مما يجعل فهمه للحياة أكثر عمقا واتساعا .. حيث كان لنشأته المبكرة في "القريات" القرية الشمالية البدوية المنفتحة على ثقافات أخرى مختلفة وإن لم تكن بعيدة كل البعد عن جوهر موروث الشاعر الحضاري أثرا بالغا ومهما في تشكيل جوهر رؤية صالح الشادي الشعرية.. ورسم ملامحها الأساسية .. ثم إن إنتقال شاعرنا إلى مدينة جدة ملتقى الثقافات والعروق الإنسانية المتعددة .. ورمز انصهار الحضارات والتعايش السلمي مع الآخر وقبوله .. أثر لا يقل عن أثر القريات في تعميق هذه الرؤية وإعطائها أفقا أوسع .
أما على الصعيد الأكاديمي والمهني فقد حصل على البكالوريوس في التاريخ الحديث والمعاصر من جامعة الملك عبدالعزيز بجدة .. عمل في حقل التعليم الثانوي كأستاذ لمادتي التاريخ وعلم النفس حتى العام 1993 م
وحصل على درجة الماجستير في فلسفة التاريخ من الجامعة الأردنية .. نال على أثرها شهادة الدكتوراه في هذا المجال.. ولا شك أن ذلك أثّر في الوعي المعرفي لدى الشاعر وعمّق تنظيراته الفكرية عن الوجود .. ومكّنه من التوغل في القضايا التأملية.. ومحاولة فك شفرات الأسئلة الكونية العظمى من خلال بعض الكتب التي أصدرها الشاعر والتي تناولت ما وراء الطبيعة.

كل هذه المعطيات إنعكست بشكل مباشر أو غير مباشر على قصيدة الشادي .. لـ تمنحها خصوصية وبعدا وجدانيا مؤثرين .. ولتجعل هذه القصيدة متفردة برؤيتها وعطائها الإبداعي ..

معاً نبدأ الرحلة مع الشادي صالح .. وموسم الهجرة إلى الشعر / الفن / الفكر / الخيال ..

نــجــم

06-04-2011, 08:01 AM

(1)

الفرات النيل

__________

الفرات /النيل /نهرُ السين / شط الدردنيل .
والضحى ..
والموت في ضوءيكِ لمحا
والنخيل .
والمجازات التي كانت أغاريد المسا
ومقام الهمس ..
والإنشاء
واللا مستحيل .

أنتِ يا عفراء ..
يا سمراء ..
يا قمراء ..
يا عنفوان الطيشِ في العقل المُكنى( بالجليل) !
كان ليلا ..
آهِ ماذا .. من أنا يا صاحبيّ ؟!
كائنٌ عفٌ ، قليلُ الطهر ، أو بعض نبيل .
كان ليلا ..
قد سقاني ما سقاني
من سقامي ..
من سقوطي للسقوف الساقطات الزنجبيل .

كان دفئا
شتويا
أنثويا
نرجسيا
مطريا بين أحضان نخيل .
أزهرت فيه شجيراتي
بآلام القلوب الظامئات ..
لبحر من يُدعى (الخليل ) .

(2)

أنتِ ..
من سواّك ..
من أشقاك ..
من صاغ بهاك العذب ..
من حدّر ماكِ الكوثري السلسبيل ؟!
كان إطراقا
وإنصاتا لترديد نشوى الروح
والتسبيح في فجر جميل .
قدك المياس يا عمري..
وتهتز خصورا ..
وتختال سيوف الهند ، والليل صهيل !

أتسامى ..
كنتُ طفلا ( يتنامى )
حيث لا يتنامى لي ملاما ..
كنت حيا وقتيل .
كنت جباراً..
حنون الطعن ..
حبار
أحيل الحبر
شعراً وغناء وهديل .

(3)

بأبي أنت وأمي ..
يا بن عمي ..
جدنا آدم لم يعصم ..
فهل .. إلى (العُصم ) سبيل ؟!
شاع في الأصقاع أني كنت رثا ..
رغم أني ابن أنثى ..
تطأ الخلد وفردوس ظليل ! .
أنتِ ، يا أواه يا بلواه
واشكواه كبدي ..
شُق كبدي ..
آه ما أقسى الرحيل .

وطنٌ ..
أو هكذا أبدو ، اغترابا
جائع يطرق باباً ..
واحتفاءا ت بإشراقٍ بخيل .
إقرأيني كيف أني صرت أنشودة حزنٍ
يتبع الغاوون آثاري ..
وأشلائي دليل .
قسماً بالله لم أذنب ..
ولكني ضعيف الطين ..
والدنيا على كتفيَ
والحمل ثقيل . !

تتوارى في تضاريسي فصول البؤسِ
والعزة خضرا لازالت ..
ومازلت أصيل .
إن أكن أفنيت بعضي ..
فلبعضي كل ما أفنيت ..
فالمؤمن للمؤمن ، أزرٌ ومُعيل .

احفلي بي ..
عندما ألقاك يا أنتِ
عروساً ..
ذات حين غائم الُأنس مُهيل .
واجبري كسر ي ..
إذا ما شعشع الخاطر عكازاً
وصار الكبر نعلا ..
يلثم الأرض ذليل .

(5)

كان ليلا ..
لم يكن( هارون) يلقاه ..
ويلقاه فؤادي كالسلاطين ..
كأبناء السبيل !
قائم الأركان ..
ما أرخيت إلا شطر جفني
لعطا الرب شكراً..
وثناءً للجميل .
أنتِ ، يا عطر الأماسي ..
ما الذي أهرق كأسي
أهو السُـهد ، أم الشهد ، أم الطرف الكحيل ؟

جَل من جلّاك جُلباباً من النور ..
أشهى من سنا الشمس
ومن برقٍ يخيل .
أترامى مثل صحراء بلادي
عندما يطرق أبعادي منادٍ ..
هل لذا الحسن مثيل ؟
قاب قوسين أنا من آخر الأصحاب ، قبري ..
هل وداع منك يا أنتِ ..
وهل فيك مقيل ؟

كنت قد أذويت عمري
في عتامات الخنادق
في الوثائق ..
حيث لا قال
ولا قالوا
و قيل .
عشت في إيوان كسري
شعلة تطفئها- بالرغم من كثرة وقادي -
(سرا يا شرحبيل ) .

(6)

كان ليلا ..
قد بدا فيه هلالي ..
وتصلى يانفعالي ..
وأضاء الأرخبيل ! .

آه يا مجنون ليلى ..
قل لـ ليلى :
كان ذاك الليل أحلى
من نقوش الماء
في الصخر الصقيل .

آه يا مجنون ليلى ..
قل لـ ليلى :
كان ذاك الليل أحلى
من تراتيل رواة الشعر والإنجيل .

آه يا مجنون أنثى الأرض ..
يامن عدت صبا و هزيل .
أمقيمٌ بالهوى ..
أم أنت مثلي..
ظل ضيف و نزيل ؟!

لعنة الله على النسيان
إن حل بوادي العشق ..
واستعذب مني نفح إحساس ٍعليل .

لغة الحب
إذا ما غالبتنا في المنابر
لن ترى في الأرض فاجر
أو عتيٌ لا يميل .

1990

نــجــم

06-04-2011, 08:01 AM

أبتِ … أبتِ …
يُرعبني المدفع يا أبت
والصوت القادم من خلفي
والنار هنا لك يا أبت !
البرد القارس لا يرحم
والدفء بحالي لا يعلم
والريح تعاند (أجنحتي) .

أبتِ .. أبتِ ..
ما هذا الأحمر فوق قميصك يا أبت ؟
لمَ تصمت قل لي يا آبت …؟
لم عينك تنظر لا تبصر ؟
ولمن ولمن .. هذا الخنجر ؟
أيخصك هذا يا أبت ..؟
أبت .. أبت …
ويضيع الصوت ..
كما ضاعت وحدتنا فوق المشرحة .

هذا طفل ..
لم يبق منه سوى الطفل ..
افتقد العزوة والأهل ..
وترعرع بين الأضرحة .
هذا شبح ..
يقتات على جثث الموتى
ويصيح متى ومتى ومتى ..
تُفتح أبوابك مدرستي ؟
ومتى أعرف طعم الحلوى
وجميع الأشياء الحلوة
تلك الأشياء المبهمة .!

أين الأطفال
وأين الدور
وأين (الطابة) والغابة ؟
استيقظ (لطفاً ) يا أبتِ .
أكمل يا أبتِ ( الحد وته ).
وأجب عن باقي أسئلتي
أبت ..
أبتِ .. ؟!

1988

نــجــم

06-04-2011, 08:02 AM

1)

وتسأل عن صديقاتي
صديقاتي ..؟
كثيرات صديقاتي
كثيــرات رفيقاتي
عديدات محطاتي
طويلات حكاياتي
ولكني .. وعهد الله يا أنتي
صريح في بداياتي
عفيف في علاقاتي
وهذا الشعر يشهد لي
وأقلامي
ومشكاتي .

سَلِي معنى الحروف ..
سَلي .. وضوحي وانفعالاتي .
سَليها عن أناشيدي
سليها عن معاناتي .
وكيف خرجت للدنيا
وكيف خرجت من ذاتي .. !
وكيف مشيت في الدرب المغادر ..
من قراراتي .!
طريقا لست أنكره ، به وزعت راياتي .
فككت به رموز العشق و استدركت زلاتي
زرعت على جوانبه زهوراً من حديقاتي .

(2)

وتسأل عن صديقاتي ؟!
صديقاتي ..
جميلات صديقاتي
خلوقات رفيقاتي
أمينات محطاتي
طريفات حكاياتي .
حكايات مبعثرة على أطراف واحاتي
حكايات لها صلة بما قد فات والآتي
رأيت بها جمال الكون ..
والفلك المنيرات

سمعت بها ..
نشيد بلابل الغاب الصغيرات
شعرت بها ..
بفرح الخلق متحداً بذراتي
لمست بها ..
معاني الحب وهي تدير دفاتي
صرخت بها ..
بعالي الصوت ما أشهى سويعاتي
شدوت بها..
بألحاني بشعري وإبتهاجاتي

(3)

وتسأل عن صديقاتي
صديقاتي ..؟
وفيات صديقاتي
خجولات رفيقاتي
كبيرات محطاتي
عظيمات حكاياتي
وأنتي نهاية المشوار ..
دفء شتائي الشاتي .
وموطن قلبي الأوحد
وشاطئ بحري العاتي .

إليك ِحبيبتي عمري
مساقا مع طموحاتي .
إليك حبيبتي أهدي
رفيف الروح في ذاتي .
دروبي كلها كانت
تمد إليك خطواتي .
تعالي وأسكني جسدي
وتوهي في متاهاتي .
تعالي وأحكمي رمقي
وخوضي في مساحاتي .

تعالي وأطرقي الناقوس
في أعماق إنصاتي .
تعالي وأشربي كأسا
عصرت بها ملذاتي .
غرامك أنتِ ..
أوردتي
شراييني
ودقاتي .
وحبك أنتِ
مدرستي
وفكري ..
واتجاهاتي .

(4)

وتسأل عن صديقاتي
أيا أغلى صديقاتي
ويا أحلى رفيقاتي
ويا أعلى محطاتي
ويا أسمى حكاياتي
لك الأبواب مشرعة
وأنتِ ختام آياتي .
أحبك يا رحيق الزهر
يا سحر الجميلات .
أحبك يا عبير الورد
يا حلم (المخيلات)ِ .

سأحمل حبك الأبدي ..
في أبدية الذاتِ .
وألقي فيه أشلائي
وألقى فيه مرساتي .
سأنقش وشمه
في الشمس
في قعر المحيطات
سأنسجه على كفني
على (أوجان) راياتي
سيبقى حبك الخالد
وساماً في بطولاتي

نــجــم

06-04-2011, 08:02 AM

دعيني

دعيني دعيني أحرر ذاتي ..
من الوهم ..
من آهتي وأنيني ! .

دعيني فلست ليمناك ملكاً
ولست بعبد ، لكي تشتريني ! .

أنا سيدٌ ، قد خلقت لنفسي ..
لأملكها ، لا لكي تملكيني .
لم الحب ..
من شرّع الحب قولي ..
لم الصمت يا (إبرة البنسلين ) ؟

سأخرج من ذل قربك هذا ..
لأحيا البقايا بجوف عريني .

سأخرس أنشودة الشوق حتى يذوب الكرى ..
وحشة بعيوني .

سأغلق أبواب قلبي ..
وأنسى سخافات أمسي ..
فلا تذكريني

سئمت الغرام
وأهل الغرام
ومن يحتذي (سنّة) العاشقين ِ .

مللت من السعي خلف النحور
وخلف الصدور
وخلف ظنوني .

كرهت الرغاء
وعشق النساء
ونشوى اللقاء
فهيا أكرهيني .

يقولون قف لسمو المحب..
فتبا له ..
ولما يُسمعوني .

يقولون كن لحبيبك طوعاً ..
( لقد هزُلت يا ابنة الياسمين )
يقولون (قيس ) بليلاه جنّ ..
ألا رحــم الله مني جنوني ! .

ليكتب شـاعرنا في الهيام ..
كلاماً يؤرق نبض الوتين ِ .
ليصرخ آهٍ وآهٍ وآهٍ ..
لكَم في الدياجيّ هــــاجت شجوني !
ليصدح يا هاجرين تعالوا ..
أحبـــاء روحي ألا ترحموني ….؟!

دعيه يعاني ..
ليخلق معنـــــــــــىً ..
ليغتال فيك الوفا لتخوني !
دعيه يدغدغ فيك الأنوثة ..
بالذوق، بالشـــــوق حتى تليني .
دعيه يصارع موج اليمين وموج الشمال ..
إلى أن تهوني .
دعيه يزلزل صرخ شبابك مثل ( البقية ) ..
ثم دعيني .

نــجــم

06-04-2011, 08:02 AM

التعازي لسيدي شيخ المسيرة

في سراديــب الحزن مليون ديرة
وكل ديرة في حداد وفي وجوم
هزنا وقع الخبــــر، والأمر خِيرة
وفوق رحمات الرحومين ،الرحوم
كالحة من سطوة الوجْد السريرة
والقدم من ثقلهــــــا عيّت تـــــــقوم
افتقدنا من غَمر هالأرض خَيره
وافتقدنا سيفنا، صلْـــــد العزوم
وافتقـــدنا راعي اليُمنى وطَيره
وافتقدنا نبضه.. بليلة ويوم !.

ولْ ياشين النبـــا ويـاقُـوْ ضَيره
هَمْ.. ضاعت فيه جزلات الهموم
لوحكى موج البحروأتعب هديره
مـاسقــانـــا علم من غبـــة علوم
(الفهَــد ) تــاريخ مانقـــــرا خشيره
ولا توفيــه المــــراثي والرســوم
سيّدٍ ساد المعـــــــالي في مسيره
وافتخر في سيرته ســــادات قوم.

يا الرياض احكي عن النظرة الأخيرة ؟
ويا الفياض احكي عن رياح السموم ؟
وكيف صار الموت معدوم ضميــره
هدّنا في كشـــــــرته وأقفى جُهــــــوم
وكيف صار الجو في عــز الظهيــرة
من غــــــلاة اللي رحــل عنّا عَتــــوم
وكيف صار القبر ميــــلاف وعشيرة
هيبتـــــه صفّت على جــــاله قـــــروم
وكيف صار الدمع يرسـل من غزيره
وكيف غطتنـــــا سحــــــابات الغموم

آآآهْ ثم ٍ آآآهْ... صار الحــــــزن سيرة
روّحت بين العطاشى والغيوم
موسهل هالبُعــــد ، والفرقا عسيرة
موسهل.. هذا الرحيــــل اللي يدوم.

البقــــــــا لله، ربٍ نستخيــــــــره
والبقا في راس أهَلنـَــا والعموم
والتعازي لسيّدي شيخ المسيرة
خادم البيتين والشهم الصروم
الحكيم اللي نجيــــه ونستشيــــره
والعظيم اللي تهادنْهْ الخصوم
والتعازي لوافِيَ العهــــد ونصيره
الكريم اللي بنى جـــوده تخوم
العضيد أبو المراجل والبصيرة
والحميم اللي تَحَار بْهْ النظوم
والتعازي للوطــــــن وأهل الجزيرة
وللمداين والكواكب والنجوم

نــجــم

06-04-2011, 08:03 AM

المجانين باعوها

اعتبرتك من سيوف الحق..
جيت أستنصرك
ياصلاح الدين وينـــك ..
ياصلاح الدين وين ..؟

ليه ماتفزع ..
وينفــــــــع خنصرك بنصرك؟
ليه أبعد ، وأنت تبعد ، ليه نبعد خــــــــــايفين ..!

وش عقب هاللي تشوف من المهانة ببْصرك
من يقول إنا على قيد الحيــــــــاة ،
وسالمين؟!

الجهل ..
في كل حـــــــارات المحبة يحصرك
والمجانين باعـــــــــوها .. وعادوا عاشقين!

غيروه الدين ،
خلوا الدين وشلون أخْصرك
وكيف لاشفتك تبي النجدة
أحوطْك بكمين!

وكيف لاشفتك على هام الشموخ ،
أقصّرك !
وكيف لا شفتك حقير..
أكبّرك بالعالمين؟!

وكيف لاشفتك بدين المصطفى ،
أنصّرك !
وكيف لاشفتك بلادينْ ،
أمنحَك عهد ويمين؟!

أي دين اللي يذلك/ يجرحك/ أويعصرك
ياصلاح الدين ماهو دين ..
هذا قِلْ دين

نــجــم

06-04-2011, 08:03 AM

إرهابي

يعين الله على دفع البـــلا ، بالزند والساعد
وعلى الدنيا يعين اللي خلقها وقّدّر مصابي

إذا هي بالمروّة ، بالمروّة جيتها صاعد
وإذا هي بالدقارة ، مالها درب على بابي

لياليها مثل قدر الخلايق ناقص وزايد
تطيّرني فرح نوبة ونوبة تحرق أعصابي

أطاوعها ليا طاعت وإذا ما طاعت أعاند
ولاعندي بها .. دنيا ولا تستاهل إعجابي

أنا والموت من حزة صراخ الطفل متواعد
ولافكرت بأهْله ، والعمُر ماهو من حسابي

ولا يزعجني إجحاف الغمام وبرقه الراعد
ولا توجعني أسوار الكلام وكثرة غيابي

ولا أزعل على من يخلف الميعاد ويواعد
ولا أرضى على قلبي أبد ، لو يظلم أحبابي

بلا هذا التساؤل في عيونك ، كُف يا ( ماجد)
أشوفك عاتب النظرة ، تعال وكفكف عتابي

تعـــال آريّحك مادمت لا مقفي ولاقــــــــاعد
تعال أشرح لك اللي صابني من شلعة اطنابي

لعب فيني الهوى ياخوك وتيار الهوى كــــايد
وعزالله ..مامثـــل الهــــــــــوى جلاّد وارهابي

نــجــم

06-04-2011, 08:04 AM

كثير

قالوا كثير ..
واستفحل الموضوع بين العََود أبو لحية ..
وبين اللي بحجر أمه .. غرير .

وبين الشاعر (الطيب ) أبو الطيب (تبعنا ) ..
وبين أبو الطيب ( تبعهم ) .. وللأخير .

قلت : ياهذا السفر ..
وشفيك .. أشغلت البشر وابلشتهم ؟
يكفيهم اللي في (جماجمهم) من التفكير .

والله لا منفى، ولاغربة ، ولا تغيير.
الأمر في كل بساطة ..
رحت واحد ..
وجيت .. مع بعضي كثير .

(*)
فوق سفح من السفوح الهايمة بالشام ..
طاب للشاعر مقام .

وش يضر الشعر هذا (الاندحار ) إلى المعالي ..؟
والمعالي .. من مطاليب الكرام !

وش تبي هالناس مني ..
ليه أغني ،وليه أصحى ، وليه أنام !

الفتى هاجر وقلبه.. ماتعدى حارته ..
والراس ،
ماوجّه سوى لله والبيت الحرام .

وكل شي مكتوب ..
حتىإسألي ،المرزوق في هذا المدى ..
سرب الحمام .

والثرى كله ذلول .. (الله يقول )
والملا هذا ضعن .. وهذا تريّح في المقام ! .

لاتقولي : وش يصير ؟؟..
الأمر في كل بساطة ..
رحت واحد ..
وجيت مع بعضي .. كثير .

(*)
في الدفاتر دوريني ,,
ودوريني في الهوامش .

في بيوت من الورق .. موجود أنا ولازلت عايش .

مع شعاع الشمس أدخل كل صبح من الدرايش ..

وفي المسا ..
أرحل كما المعتاد .. واشق الغبايش .

فوضوي ..
يمكن أكون !
أو أكون العكس ماني فوضوي .
في براكيني سكون
وفي سكوني طفل (أزعر ) منزوي !

والقوي الله ..وفوق أقوى مخاليقه قوي .
له تطيح الهامه بليل وهجير ..
وفي ظلاله نستجير ..

والأمر في كل بساطة .
رحت واحد ..
وجيت مع بعضي .. كثير ! .

نــجــم

06-04-2011, 08:04 AM

مقام

(1)
من زمان ..
كنت آتسائل وأقول أم الغلا .. ماهي تمام !

فيها زعل ..
لكن .. على إيش الزعل ..
ماكنت أعرف بالتمام .

كانت إذا طل الصباح بعينها لحظة ، تغيب !
ويصيبها شي غريب ! ولا كلام .

تصمت ..ولكن ثرثرة نظراتها ماتنتهي ..
ولاتمنح الغمد الحسام ..!

وأقول يا أم الغلا ..
وش في عيونك ياعيوني من حكي ..؟
وش في صحاريها.. من أسرار الثمام ؟

وأعيد.. يا أم الغلا ..
يالعنبوه اللي يكدر خاطرك لو هو أنا ..!
لا كنت في الدنيا أنا ..
لو أرسم بوجهك قصيدة من عتب ..أو من خصام .

إنتي على قلبي سلام ..
تدرين وش يعني السلام ؟
يعني ملاذي من دمار الأرض هذي ..
وفلسفات الانهزام .

يعني دخيلك إفرديها ..
واتركيني أذكر الله..
كل ما شفت الرضى يستوطنك والإبتسام .

واتركيني أشهقك ..
وأتنفسك عشقة ..
وأشمك روح ترفعني إلى سقف الغرام .

أما التمادى بالزعل .. والله حرام .

(2)

هل تسمعين ؟
أباقلب احساسي إلى الفُصحى ..( لعلك تسمعين !
ولعلني أقتص من قلقي عليك ، فأستكين ..!
ولعل ، أو لربما .. يُجلى الغمام !

هل تسمحين لشاعر النغمات أن يستد من شفتيك ..
مازور المقام ؟

هل تسمحين لبعض بعضك..
أن يثور على تنسكه، ويقتحم الصيام ؟

من أغلق الأجواء ، قولي كيف كُفْهرت السماء ..
فلا فضاء أو حمام ؟ !

لستِ التي كانت هناك معي ، قُبيل تألقي وهجًا بها.. ذات ظلام !!

لستِ التي كانت هناك معي ، قبيل الحُلم تَسهرُنِي ..لأنعم في منام . !

لستِ التي كانت تعاقر أحرفي تيها.. وترويني نِدام .. !

ما الخطب ياشهد الأنوثة ..
ما الذي ألقى على وجناتك الزُهر اللثام ؟

أهو الهوى .. ؟
أم أنها النار التي فيها اكتوى العشاق .. صليا وضرامْ ؟!

أم أنها أنثى أتت ، ثم دنت ، ثم اختفت ، وعلامة استفهام ؟)

قومي اصلحي مابيننا ..
ولا تتركي غيمة وجع تمطر على خديننا .
قومي .. قوام .

أما التمادي بالزعل .. والله حرام .

نــجــم

06-04-2011, 08:05 AM

من غير ليه ..!
(1)

ليه شاعر.. ؟
وانت ، وش مزعلـْك منـّه ؟!

خلي هالانسان يعزف..
خله ينزف..
وينثر أوجاعه وفـنـّه.

وش عليك من احتراقه..
ومن مذاقه.؟!
ومن تناهيد الوجع واللي يكنـّه ؟!

ليه يكسر.. ؟
ليه يسرف بالحداثة ؟
ليه مايوزن همومه.. ؟
وليه يكتب فوق سِنـّه ؟

ليه ينثر.. ؟
ليه ماكمّـل (حراثة ) ؟
ليه جددها (هدومه ).. ؟
وسن في (التعبير ) سُنـّة ؟

يا أخي : من غير ليه ..!
إنت بس اكفيه شرّك..
وحِل عنـّه ! .

(2)

ليه شاعر ؟
ماعجبـْك إسكت ..
ترى غيرك يحِس وله مشاعر.

والبشر كومة مشاعر ..
من جنوب الأرض لأقصى ماخلق ربك مشاعر .

والقصيدة ..
زفرة احساس فريدة ..
تبتدي قبل الكلام ..
وتنتهي لكن .. دواير .

والقوافي
زخرفة موج ومرافي
والبحر انسان صافي ..
لا يهين ولا يعاير .

والضماير
كل هالدنيا ضماير
من شواهيد القبر لين المناير.

ومن كتب بالطرس ونـّه
أو أمانيه اخذلنه..
ولا قِدر يرضي جنابك !
لاتخيب فيك ظنه..
وحِل عنـّه.

نــجــم

06-04-2011, 08:05 AM

(على العتبة .. )

على العتبة ..
ولا أدري عن اللي خلف هذا الباب من دنيا ..
ومن أحلام .

وصلت آخر ثلاثيني قبل أيام ..
فيا فرحي !
قدرت أعارك الأيام ..

وقدرت أصبر على اطباعي
وعلى اللي يشبهون الناس ..
من ربعي ..
ومن الأصنام .

ويافرحي !
قدرت أعاند أوجاعي ..
وأعدي الف موجة حب ..
بلا كسر،
وبدون حطام .

ويافرحي !
بهذا الصمت ..
بهذا الكم من صبري ..
ومن الأوهام .

الهي .. الف شكر لك ..
على مافات من أعوام .

(2)

على العتبة..
نفضت آخر غبار عالق بنعلي
وجيت أغسل وحول الدرب من رجلي..
وأسبح ربي الأكرم.

غثا كل المحيط، إلا مساحات السجود مهود
أدورها، وأناجي الخالق المعبود..
وأقول: ارحم.

غثا ذاك الطواف بحارة العتمة..
وسبر الليل وأغواره على الفاضي..
وذا التجديف في الماضي
وسماع الغابر الأبكم.

غثا هذا الغرام اللي رماده طاح في عيني..
وسلبني من عناويني
وتوهني..
بين الجرح والبلسم..

غثا ذاك العبث ياعم.

أنا ودعت ما ولىّ من الأحــــلام يا ليلى
وذكرتك روح لكني نسيت الخد والمبسم
وأنـــا والله ما فكرت أخون الود يا ليلى
ولكن السنيــــن اللي تخون وطبعهـــا تقدم
غرير اللي يقول إن الربيع يدوم ياليلى
وغرير اللي يقول ان الرضيع يعيش ، مايفطم

(3)

على العتبة ..
أحس إني سحابة فضفضت وأقفت،
وفيها فضفضة !

وأحس إن المطر باقي ..
على سطح الزمن بعضه،
وفي نفسي بعضه !

وأحس اللي سقيته صار
شجر أو نار ..
وسطر غبار في بالي ،
ولا أقدر أنفضه !

وأحس إني وفي، لبكاي ودموعي..
وللصاحب، وعهد عاشر ضلوعي..
ولا اقدر أنقضه.

تلالا مايفيد الطين..
ولا يبقوا لك الوافين
ولا هذا السراب المغري البراق
ولا هذا النفاق اللي من الله تبغضه.

تلالا وخذ معك من طاع..
ولا تسأل عن الطماع..
ولا عن لابسي القناع
ولا عن واحد يقفي ليَا نال غرضه.

تلالا..
وراقب الشارع.. وشف صخبه
وشف كم واحد ضايع..
وشف كم واحد مثلك..
كظم وسط الحشا غضبه.
على العتبة.

نــجــم

06-04-2011, 08:06 AM

يا .. سلطان

ولاتهتم ، مادامــــــــــك صنيعة ربك الباري
إذا ربي خلق مخلــــوق ماينسـاه، (يا سلطان)!

(ياسلطان) أنا قبلك تعكـّــــــر نهري الجاري
وضاقت بي مساحات الوجود وضاقت الأركان

شقيت أكثر من اللازم غرقت بلجـــة أفكاري
رحلت ولا جنــيت الا اغتراب ٍ، زادني حرمان

حسبت إني باغيّر دفة الأيـــــــام بإصراري !
وحسبت إن الزمن لوحة ،وأنا الألوان والفنان !

ونسيت إني بشر، يعني قدر،ما أملك أقــداري
ونسيت إن الليـــــــالي ساجدات بمعبد الرحمن

(ياسلطـان ) : ربك فوق يدري فيك ، ويداري
ولا ينسى ، ولا يقسى ،ولكن.. يصنعك إنسان!

عسى أن تكرهوا شيئا وفيه الخير..من داري؟
وعساك تحب شي ،وفيه ماتلقى سوى الخسران!

تِذكـّر..وش حصل(لآدم أبوك)،وذنبه العاري!
وتِذكـّـر (نوح) وعقوق القريب،وفزعة الطوفان

وتذكر( يوسف الصديق)،ونجدة محمل ٍساري
وتذكروش حصل(لايوب)،وصبرأذهل الشيطان

وتذكر( يونس) وبحرالظلام ،وحوته الضاري
وتذكر ســـــالفة (موسى) كليـم الله ، والطغيان

وتذكر (صالح )المرسل مع اللي مالهـــم طاري
وتذكرطيب (عيسى)، واليهود، وقسوة الخذلان

على سنة (محمد )،وكـــّـل الله دوم ياجـــاري
(ولن تشقى)،(ولن تبقى )على حالك كذا زعلان

وإذا تنسى ..تِذكـّرني ، تراها تسـّـرك أخباري
طلبت الله .. ولاخيّب رجــاي ، وزادني إيمان

وصارالكون من حولي بفضلـــه يشبه غباري
صغيـر وتــــافه وهيّن ،ولو فكرت به غلطان.

تعدا الهم (يابو قيس ) وخذ شوري ومخباري
وسامح من جفاك ، ولا تهمك عثــرة العميان

مساكين وغلابا ، هالخلايــــق بـايع وشاري
وفيهم بــــايع نفسه ، وفيهم شـــاري الحقران

وفيهم من تعلاّ .. لين طــــــاح وذرّه الذاري
وفيهم من سجن روحه ،بلا سجـن ولا سجان

وفيهم من عرف ربه ، وربي بالخفـــا داري
وفيهم ناس مثلك يشبهون الشمس (ياسلطان )

نــجــم

06-04-2011, 08:06 AM

جامليني

(1)

أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !

أدخلي في أي عرق يخصني ..
واستعمري ذرات روحي ..
وعلميني الإنشطار .

قولي لتاريخ المراجل :
إستريح ..
وإفردي الأنثى على شط انبهار .

إقلبي وجه الحزن عني ..
خنقني ظله البارد
دخيلك.. إمنحيني لونهار .

ذلني هذا السمو اللي رفعني لوحدتي ..
مليت من عد النجوم البيض تحتي ..
لو سمحتي ..
ريحيني من جلاميد الشموخ بداخلي ..
وغازلي كبري بعطر الإنكسار .

إكسري هذا الجدار .

و أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني ..

(2)

كل شاعر يفترس أنثى خياله، في خياله ..
و مخلب الواقع يبدع في افتراسه لا صحى .

وكل شاعر ماسكن مثلك خياله ، شفت حاله
ماصحت شمسه ، على مركا التعاسة للضحى.

والليل ياليلى العصور الغابرة واليوم ..
لو غبتي يجيه النوم ..
ولو جيتي تخلى عن نعاسه ، واستحى .

يعني أحبك ..
منطقيني ، لاوجود لأي ميزان يساومني على الدوزان ..
جيتي .. دوزنيني ..
واعتلي كرسي الرئاسة ،
صالح الشادي انتحى .

الفرح هذا الخرافي البعيد ..
اشتقت له ..
قولي له إرحل من هناك ..
وزور هذا الناحل المطحون مابين السياسة والرحا .

الرحاب تضيق بي
والعمر يستفحل شجر وأغصان ..
والعصفور ماغرد ..
ودستور الوناسة .. إنمحى.

إمحي التعب عني فديتك ..
واكتبي هذا مكاني ..
وكل حي بها الزمن حر بحلاله ..
وكل شاعر يفترس أنثى خياله في خياله .

وادخليني ..
وإطفي الدنيا بحضورك واشعليني ..
....
كيف ؟؟
...
أدري إنك مافهتي شي ..
لكن .. جامليني .. !

نــجــم

06-04-2011, 08:08 AM

لعثمة

(1)

لعثمة ..
كل ما باحه ، وما ودّع (فمه ) .

يجفل (الغرنوق )..
القاه..
ويِضيع إن جيت ألمه ..
ويتبعثر لون خده،
وألثمه .

وأفهمه ..
كنه يقول بصمت : ( يُمه ) !
وآتعوذ من غلاه اللي فتك بي ..
وأرحمه !

مذهول يلقاني ..
يداري دهشته فيني ..
ويشكيني لعيني
وفي الشفايا همهمة !

ما كان موعد ..
كان سلب من الزمن مجلاسنا ..
وأكبر غنيمة عشق .
كان إني أعيشه ، وآتجلى (وأنظمه ) .

ياهوووه .. يا دلوع أهلك
جيت أبا اهلك شوق (لولاك) وحضوره ..
إنت نوره..
كل ما صبّحت فيني ..
صارت الشمس بضحاها معتمة !

(أهواك ) .. ماهي من الهوى ..
يعني ولا نجم هوى ، وشق الهوا ..!
(أهواك) عكس الجاذبية ..
واتجاه الأنظمة !

تعال يابعد الزعل إنت -
وتلعثم بي رضا واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !
لعثمة ..
كل ما باحه وما ودّع (فمه )

(2)

ناحل السرجوف ..
حولك / كم تطوّى زول ؟
كم حول ٍ مضى لك في فنون السرجفة ؟! .

سرجفتني ..!!
شفني طويت ضلوعي بصدري عليك -
وقلت جيتك ..
لا ظلال ..
إلا خيال من كثر جور الوله ..
ماتعرفه !!

الكل يسألني عن اللي حتني ..!
وأسرح ..
وأدندن / راح .. لكن (حتني) .
و الناحل اللي كان يسكني رحل ..
ولا باقي إلا معطفه.. !

ما ألطفه ..
هذا الصغير المكتحل بالموت ..
هذا السكر المفتوت
هذا الانسياب برمشه المفلوت فوق رقابنا ..
وما أعنفه .

أستحلفه باللي خلق سبع طباق ..
يفكني من سيرة الفرقا ..
وحزات انتظاره .
ودي أجلس باقي العمر بفناره..
وأعزفه !

تعال يابعد الزعل إنت -
وتلعثم بي رضا،
واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !

(3)
مخملي الكبريا ..
بك رَزَة أول ماخلق ربي من التفاح ..
عالي .. مُشتهى .. رعبوب .

يبتدي سحر الغروب –
إليا تجَمّرت بحياك .
وإن شرّفت لفتاتك الخجلى شمالي ..
تستلج جْنوب !

البحَر غرقان بك ..
والموج في ساحل عيونك ينتخي بي .
والمنايا عاصفة ،
والعاشق أبحر يا حبيبي ..
والسفر مكتوب .

أسرفت في ذبحي ..
وأقول: إذبح بعَـد ..
واسترسل بهذا التجني وشوف حالك .. !
لا تظن إني بافرّط في دلالك
ولو فدع فيني دلالك ..
عنه لاوالله ، ما أظني بأتوب .

كيف أتوب..
ولامعي من باس موسى ..
ولا رحابة صدرعيسى ..!
ولا معي من حلم نوح ..
ولا صبر أيوب .. ؟!

أهواك ..
وما والله اتنازل عن آخر دُرة جُوَاك ..
لولك ومرجانك حلالي،
وأولك وأقصاك .
أهواك ، توي قلتها ..!
وباعيدها .. لين أفرح بلاماك ..
أو.. لين الجليد يذوب !

تعال يابعد الزعل إنت -
وتلعثم بي رضا ،
واجتاحني باللعثمة .
أصلا .. وش يكون إلغرام ..
إلا سلام .. ولعثمة ..؟!
أهواك كثر اللعثمة !

لعثمة ..
كل ما باحه وما ودّع (فمه ).

نــجــم

06-04-2011, 08:08 AM

تمدّنا

والله ، وتمدّنا ..
وصرنا مانعَـْرف الشاي ..
إلا بثلج !! .
وكن الشاي مزروع بشوارعنا ..
وكن الناس تمشي في شوارعنا ..مع الإترنج .
يابنت كوني واقعية ..
بي صداع ، يحتاج يتبلسم على جالك ..
ولكن ..
مو بهذا البنج .. !
الغنج ساعة وينطفي
وانا اشتهي عمر يشعلل بي رجاف السرج !
زمااااا ن عدّت من هنا.. مراكب الإغريق
وعدّا من هنا ركب المُثنى..
وعدّوا بيض..
عدوا زنج.
العصر ( أذن ) ..
والغروب يلوّح بكفه تعال..
واحتال ..
أضحك على نفسي وأطمنها وأنا أرتج .
ماعاد في نفسي ظما
إلا لبوابة سما ،
أطقها.. وآهج .
النخل إلى منه كبر..
ينسى مواعيد المطر..
والبلبلة والعج !
روحي بتاريخ السحاب..
الله معك..
أنا ب أروح الحج.
(*)
ياغبية..
كل هالأيام مرت..
وانتي انتي..
تزرعين الثلج في جمري..
– بزعمك بانطفي - !
لا واللطيف اللي لطف
ماكان زرع اللي زرعتي..
كان هم ، وضاع فيني..
دوريه..
وإن لقيتيه اقطفي.
إحلمي ..
لكن وش آخر هالتماهي بالهروب..
أتحضّنك..
لكن أحس إنك معي ..
وإني معك.. بس مختفي ؟!
غلطان من يحكم على التغريد..
ماكل تنهيد يلجلج في الحنايا-
محتفي .
يا حالمة..
ماكل من يسكت حليم ..
ولا كل من زارك وفي.
(*)
وش رايك تشقي القناع..
وتمسحي لطخ الدهان
وتنزلي من فوق هالمسرح دقيقة ؟
وش رايك تكوني شعاع
ينبعث لآخر خيال بعتمتي مرة..
أو تكوني حقيقة ؟
مايفرّق هالنسا عن بعضهن..
غير إنهن يتشابهن في كل شي-
الا الطريقة ! .
الصخب والعدل الأعمى..
والمدينة والضجر..
نار وحريقة.
مانبي غصن يبس
مانبي وجه عبس
ولا نبي أصلا .. حريقة
إقربي أكثر من أول
طفلك المجنون الأول
جد شيٍ في طريقة.
بس لين الحين والله ..
في ظمااااااه
طايح ولا ابتل ريقه
..........
بللي ريقه .

نــجــم

06-04-2011, 08:09 AM

ياغزل

(1)
وش آتغزل ياغزل .. !
طاحت سواليفي على حظنك ..
وجفني طاح ..
وإسترخَى كسل .

وش آتغزل ياعسل ..
و(الشهد) نحل الشوق من حُسنك جنَاه ..!
ومن رحيقك..
سافر العطر ورحل .

وش آتغزل والزعل -
إليا زعلتي ،
يستعر فيني زغاريد وطفولة ..!
تزعلي ..
وآموت في (هيك ) مهبولة ..!
يعني مقبولة
ومقبولة
ومقبولة
ولا فيها .. جدل .

(2)

صمتك.. أنا أدري وش وراه ! .
مليون آه ..محاصره في آهتين .
آه .. لعيون الحبيب -
وآه .. من سطوة هواه .

هو صحيح يحبني ..؟!
هذا الجنون اللي على ها لارض يمشي ؟!
أو يساير عقلي الغايب ..
ويلعب من وراه ؟

ياترى .. كم ألف أنثى ذاقته قبلي قصيده ..؟
وكم قصيدة حب فيني صاغها..
وهو (صحيح ) و( جد ) يعنيني ؟
ويعني ماحكاه ! ؟

ياترى ..الطير هذا..
يخونني كل يوم ..؟
ولا.. كل شهر مرة.. ؟!
والله ، لو مرّة وقع بيدي بلحظة (ملعنة ) –
إني لأخرب هالسنة وألعن أبو جد الحياة ؟

يخونني ..؟!
مو على كيفه يخون .
أنا - وإذا فكر بغيري ، أفضحه..!!
أو أجرحه ..
أو أذبحه ..
طيري ، وأنا حُرة بطيري .. ولا أبي غيري معاه ؟!.

(3)
ياهوه .. ياذا الفاتك المزّا ح -
زحزحتني عن ثقل أبوي آدم ،غصِب ..
وأشغلتني ( حسبي عليك ) بحفلة التفاح .
قل : ماتبي ترتاح ؟

قلي : متى تهدا الظنون العاصفة ..؟
ومتى تصدق إن عشقي إنت وأصل السالفة .. ؟
وإنك إذا قررت مرة تحتويني ..
ممكن انك تحتويني ..
وتنفرد بالباب والمفتاح !! .
قل : ماتبي ترتاح ؟

إهدا ، أباشعل فيك صمتي .
أُطرد الوسواس ..وسوس بي ..!
وعشني ،
وروق من عصف الرياح .
وقل : ما تبي ترتاح ؟

إرتاح ياقلبي..
كفاك اللي جرالك من زمان فات ..!
خذني وبلا هذا الشتا ت .
خذني، وحن ياقلبي على روحك..
وريّح هالجناح..!
وإطفيّ المصباح .

نــجــم

06-04-2011, 08:09 AM

يا سعد يا الجحدلي

(1)

ياسعد يا الجحدلي :
صاحبك هو صاحبك ..
مع شعرة بيضا على السالف ..
ودار ..
مابها ريحة (هَلِي )! .

أَوقِد إذا جن المسا ،غصن ٍ يبس ..
وأضوي بذكراك الغلس ..
وأحن لطيوف مضت ..
ومعها مضى (صوت الجرس) ..
وأسامر القفر الخلي -
وأشتاق لي ..!

وأصبح على ضوضا طيور تشبهك
لكن بلا شبك وقفص ..!
وأقرا تحياتك على لون الشفق ..
وأستلهمك ..
لين أشعر إن الكون من حولي رقص -
والا رقص في داخلي ..!
وأشتاق لي .. !

وحدي ، مثل ما كنت أنا وياك
وحدي ، وفوقي الأفلاك ..
ورب يا سعد يرعاك..
ويحفظ لي هلي.

(2)

يامدرسة في (المدرسة )..
طلابنا ، وش حالهم ؟
أقصد، وش أسما اطفالهم -
وشلونهم بالمدرسة ؟

صارت تمام السادسة..
قم وافطر شوية( سجاير)
وانس (ليلى ) و(الظفاير )-
والشعر والهلوسة !
ورح وابتلش بالإنجليزي..
وفي جفاف الهندسة ! .

الحصة الأولى قضت..
والرابعة..
والسابعة ..
والمنعسة..
وتثاوب الدرس الغبي..
وصارت تمام (الخامسة ) .

وشلون تمسي ياالتعب ؟
وشلون تحملك السطور ؟
وش آخر أخبار الشعور -
وهالسنين العابسة.. ؟
قل لي : صفت ، أوما صفت -
بينك وبين الآنسة ؟! .

وقل لي : عسى خف السعال -
وصار عودك ممتلي ..؟!
ياسعد ياالجحدلي .

(3)

لا تظلم الإبداع ماله ذنب .. !
الذنب ذنبك ..
ليه تبدع يا سعد ؟!

ليه احترفت الحب..
ليه أطلقت روحك -
والفضا ، تدري به بروق ورعد ؟!
ليه تبدع يا سعد ؟!

الناس ما خلوك ..
لكن ( قاتل الله البنوك ) ..
وطفرة الجوع الحقيقي -
والأماني واحتمالات الرغد !
والعدد .. !
ليه تبدع يا سعد ؟!

الناس صاروا مصلحة..
والمصلحة..
تقلب وجيه اللي مشوها (ممسحة ) !
واللي تلطخ بالنوايا الموحلة..
أشطب عليه ،وللأبد.

والمغني الله -
والفقير اللي لغير الله سجد.

سلم على تراب البلد .

اشتقت لك ..
ما اشتقت لي ؟
ياسعد يا الجحدلي .

نــجــم

06-04-2011, 08:10 AM

لا.. تحزني

لا تحزني .. ؟
هذا أنا من أول أيامي كذا ..
الواحد بزحمة مدن .. !

ماهي بقلة ناس ..
لكن قلة إحساس
وضياق أنفاس وحكاية شجن .

لا تحزني ..
مثلي كثير العايشين بروحهم
وأجسادهم ..
في ذمة الله والنحول مهدهده ..
تقرا تراتيل الكفن ! .

الله ، لو شفتي مداين خاطري ..
وأنوارها ، وأخبارها ،
وذاك السكن ..!

الله لو شفتي الوطن ..
إللي تخيرته أخير.. بعد ما عز الوطن !
ما كان صابتني العيون ..
ولا كان صابك ذا الحزن.

لا تحزني …
أنا سعيد بها النوى وأيامه الصعبه
أنا هنا لا زيف يزعجني ولا كذبه !

بين الطيور اللي تغرد والنشيد ..
أنا سعيد !

أضحك ورا كوم الجليد الهش والغربة.

مالي ومال الهامش المبني من إسمنت وحديد
مالي ومال الغارقين بشبر خوف..
ولا بهم حي يشوف ..
إلا ضرير ميّت قلبه ؟!

أضحك على ذكرى جهل ..
وذكرى هَبل ..
وذكرى رجاجيل ودجل..
وما يشبه الصحبه !

وأضحك على أوهام مضت ..
وقصة قضت ..
كانت على راي (الشِعر) يا كذبتي كذبه .

لا تحزني..
خليني أضحك وانتشي.. في سكرة الغربة .

نــجــم

06-04-2011, 08:10 AM

زمن

(زمن)

يا هلا في يوم (ستة)..
في شهر (ستة) وعام ألفين و(ستة)..

وياهلا، يا آخر العنقود جيتي يا (زمن )..
يا هلا بأخت (الوطن )..
وأعذب إحساس غرسته.

(*)

طلتك والفجر (نور )..
و(رحمة) تملا مداهيلي سلام

طلتك، مسك الحبور..
وغايتي يا طربة العمر و(مرام).

إحتفلت بشوفتك يا شهد روحي
وكل ما فيني سجد لله شكرا..
يا(زمن ) أهلا وسهلاً..
طبتي، وطاب المقام .

(*)

لك عصافير الحشا سرب يتغنى..
والمعنى، يا سواد عيون (بابا)
ما كأنه قبل ميلادك تعنى ! .

إضحكي..
وغصن الحياة الأخضر المياس خليه يْتثنى .

وإشرقي،
وكوني مكان الشمس ما دمتي زمنا.

ذكرينا في براءتنا ، وفينا -
يوم كان احساسنا يلعب علينا..
(ذات صبح ) في وطنا.

نــجــم

06-04-2011, 08:11 AM

دندنة

من أرض الملح واللولو

على موجة شعر جتني

وأنا فزيت أهلّي .

هلا بالملح واللولو

شياطين الشعر جتني

وتصافق بي محلي .

وقووووووف ..

أيها الشعر العمودي النحيف !

وقوف ..

ياتفاعيلي .. أنا كلي تجلي .

(قد أتت ..

كالضوء في ديجور أعمى ..)

ياضمير الحزن مهما غاب عنك الفجر ..

أعَرفه .. مايخلي !

والتخلي مو عوايدها ..

هلا برنة قلايدها

على لحن (التغلي ) .

(2)

على رغم التعب فيني بهاللحظة ...

وعلى رغم الغضب ، مسرور ...!

(فلتُحرق الغابة ..)

أناعندي مساحة طفل ، مسترخي مع ألعابه ..

وطافي من زمان النور .

لذيذ هذا الإنبعاث ..

ولذيذ ياذا الذعر من حيرة هواجسها ..

ومن ذاك الشعور ..

قل يا الصباح ...

وش غرد العصفور .. ؟

وش ماغرد العصفور

تغريدك هو الأحلى ...

هلا وسهلا .. على رغم الجفا والجور .

هلا باللي ترد ولا تولي ..

والتخلي مو عوايدها .

هلا برنة قلايدها ..

على لحن التغلي .

(3)

تحياتي ..

على آخر هنوف تكتب الشعر /الصهيل .

ضوا القنديل من ساعة ...

وأنا من أربع وعشرين شهر ، وخمسة أيام بلا قنديل .

هناك .. أوجاع ممطورة ظما ..

هناك أرض وسما .. ولا ناس !

قولي وإصدحي : يا ناس ...

يمكن يجفل الحراس ...

ويطلع سيل .

هناك حجار ...

ممكن لو رصفناها نسوي دار ..

ونسرج للأماني خيل ! ..

هجوع الخلق يا(قمرة) حياتي ..

والتعب مسحوب من (صنعا ) إلى ارض (الدردنيل ) .

وش اللي تحمل أوراقك من (البلسم) .. ؟

كفاية مانبي نحلم ...

كفاية مانبي تمثيل ..

كفاية ماحصل فيهم ...

كفاية ماحصلي من تخلي !

والتخلي موعوايدها ...

هلا برنة قلايدها ...

على لحن التغلي ..

نــجــم

06-04-2011, 08:11 AM

خوف عادي

(1)

مو نذالة..

مو تخاذل أو تخلي أو جفا..

لكن ظروف.

خوف، يلجم كل صناع الخطابة..

ويْتسلى بالذياب أهل المهابة..

ويحرق أعصاب الضعوف.

خوف يا لبنان ..من شر الختام

ومن غضب شيخ الجميع ،العم (سام )

ومن جنونه.

ومن عفونة شاركتنا في هوانا..

وأقلقتنا -

وأزكمت كل الأنوف.

خوف عادي..

جابه الباشا العزيز.

وكبروه الإنجليز.

خوف من صنع الأيادي -

وطنوه بكل وادي..

وجندوا حوله حتوف.

خوف لكن مو نذالة .

(2)

يوم غابت هيبة (الراعي ) تداعوا..

وقسموا كل القطيع.. !

وافتروا ..

قالوا: غنايم حرب..

قالوا: انتصار..!

وإجتمع (بيكو) و(سايكس)..

مع بُطُل (ويسكي ) ومع (..) .

وبالقلم خطوا حدود .

و خانوا أحلاف وعهود ..

وسلموا باقي (غنمهم ) لليهود !

وزان الإستعمار.

والعرب..

لا حول لا قوة..

ولا حتى مروّة..

سادرين بحفلة استقلال .

شاربين من الوهم لين الثمالة..بالنعال .

وفعلهم وقت الفعل سجات..

في ليل الخوات المومسات ،

وفي نهيق حمار.

من يد (الأتراك) طاحوا بالوراثة..

تحت كوع الغاصبين أهل الخباثة..!

وحبوا خشوم ( الفرنجة).

ومن قدم بغداد حتى راس طنجة..

أصبحوا أحرار، لكن..

عايشين بلا قرار.

عالم من الحزن،

مسلوب الإرادة..

واحد وعشرين ضيق بلا سيادة..!

والفرج مشغول عنهم بالعبادة -

وفي توالي نشرة الأخبار..!

ياوطن..

لو طال غيم الإنتظار..

بينتهي ..

مادام لاحت في المدا عقب السواد بروق .

ويا وطن..

لا بد شمسك ماتعود..

ويشرق الثوار.

(3)

من نلوم.. ؟

وكلنا مهزوم !! .

مابقى فينا على قيد الكرامة من أحد.

والأحد (عطلة ).. !

وفي (الجمعة ) نصّـف رجالنا،

ونسأل الله السلامة والمدد.

وباقي الأيام، نوم.. !

الغضب ينزل،

يزلزلنا صداعه..

والجسد ينزف..

وتنحاش الشجاعة،

ولا طبيب..!

ليش تزعل يا الحبيب ؟!

التشرد والمجاعة..

في قواميس (العرب )..

صارت فخر، موعيب !

والوهن مقسوم.

يذبحون أطفالنا ونقول: أزمة.

وينحرون آمالنا ونقول: أزمة.

ويلعنون أبو أبونا..

ونستحي..

من زود ما فينا من الحشمة ..!

نستحي ..

ونخاف لا يكسر شموخ احساسنا-

لو نطلب الرحمة.. !

وإن رفع فينا أحد راسه..

(ولو هو لاصق بكرسي الرياسة)

صفعوه بألف جزمة.

أو غدى مرحوم ! .

(4)

نصف قرن من الزمان .

وشوفوا (اليابان )،
وذكرى (هيروشيما )..!

وناظروا..

(سلة الخبز ) الشهية، ونهْرنا -

في مصر والسودان.

الفرق ماهو بالزمن..

الفرق بالإنسان.

والعيب ماهو بالوطن..

العيب في الوجدان.

وشلون نمشي بأرضنا..

ومركوبنا..

من (خُردة ) الألمان ؟!

وشلون نحمي بلادنا..

وسلاحنا..

من (صنعة ) العدوان ؟!

وشلون نلبس ثوبنا..

وقماشته.. (جوارب ) الإسبان ؟!

إلى متى هذا الترف هذا القرف والانبطاح ؟!

إلى متى هذا التأخر والتعنصر والنباح ؟!

إلى متى هذا العمى ..

و هذا الهوان ؟!

إلى متى .. ما أدري ولكن -
إسألوا ذيك الجراح-

اللي كست (وجه العرب) لبنان

نــجــم

06-04-2011, 08:12 AM

تعبان

إنكسارات الظما

يوه ( يا خالة) تعبت..
ولا لقيت اللي يبل الريق..
ريقي جف (يا خالة) ،
ولا كف الظما .

وينها ..
ماشفت أنا (ليلى ) لحد الآن..
يعني من عرفت (الما)
وأنا عطشان ياخالة ..
الى حد العمى .

تلقى ..
وأدورها ..
وتقولي : دوّر وتلقى ..
وأدوّرها ..
ولا غيمة ..
ولا وبلٍ همى .

ماكنها من باقة الحلوات ..
ياما مر من حلوات (ياخالة) –
ولكن ..
مالقيت اللي عليها القلب صبّح ..
أو تريّح و ارتمى .. ؟!

ما أدري قساوة طبع فيني ..
أو حنيني جاوز إدراكي وعيني ..
أوهي سنيني مشت ..
أو كيف ما ..
أو ربما ! .

الله أعلم ..
إنما .. تعبان (ياخالة) كثير ..
من إنكسارات الظما.

(2)

ليلي من أول ما عرفته..
ما تغير..
صمت ،
واحراق ،
وضباب .

ليل يوجعني عبوره ..
لا حضر
او لا تخنجر في عروقي
وصار ينزفني ..
ويسأل عن جواب !

ليل ينشدني -
عن اللي شعشعن في ضحوة أيامي..
وليه اقفن و راحن ..
وأنطفن في ناظري مثل السراب.. ؟!

وعن حبيبة
تو ما صارت حبيبة.. !
وليه ما صارت حبيبة ؟!
وليه غابت ها الحبيبة –
وأقفلت بيني وبين حضورها –
قبل الوعد مليون باب.

وعن سهر عيا يفارقني..
وعني .. !
وعن حقيقة هاا لسفر وسط القوافي -
وعن تفاصيل المنافي –
و الغياب.

ليل يسألني..
ولا يدري ..
وهذي عادته ..
دايم يحاصرني ب (لـِمه ) ؟

الله أعلم ..
إنما .. تعبان (ياخالة) كثير ..
من إنكسارات الظما.

(3)

جيت وحدي ..
مثل ماتشوفين وحدي ..!
مامعي من شوشرة ذيك الدروب..
إلا قبيلة هم .. !

بالجفن شوفيها –
ولا فيها (بشوش ) إلا( الوجع )..
ذاك الوحيد اللي بوجهه دم.

إن صحت: (يا وجعي..)
طلعْ..
وإلا دَمَعْ في هجعة العاذل
وقال: أفبلت لك يا (عم ).. !

كبرت ( ياخاله) بهذا الحزن ..
والدنيا تصاغرها قصيدي..
وذا جديدي ..
شيبتين ،
وطفل مرعبْه الزمان ..
ولا يبي يُفطم .

والشعر ..
هذا حال من خاواه ..
كافر ..
لا يخلي رحمة الله تغسل الشاعر –
ولا يرحم !

والغاويات كثار
لكن ..
وينها ذيك العروس-
العيطموس ..
اللي على راحة يديها الجرح يتبلسم ؟!

يا فرح ماتم ..
ها الدنيا حكاية زايفة ..
وحنا بها..
جوعى وبقايا حلم .

البارحة راحت ..
ولا أدري وش تكون القابلة ..
ولا أدري عن علوم السهر فيها
وعن حال السما .

الله أعلم ..
إنما .. تعبان ياخالة كثير ..
من إنكسارات الظما.

نــجــم

06-04-2011, 08:12 AM

اختلال

اختلال..
في مناخات الفضاء الداخلي..
وفي الشعر..
وأوزان الطريق..
وفي الجمال.

يا صديقي..
يا ابن زيد..
المسافة من مباديكم إلى هذا الزمن..
ترحال.

جورج واشنطن ، كذا قرر .. !
وإذا عندك تساؤل..
أو تفاهم..
إركب الحلم وتعال.

زورنا..
شوف المباني العالية..
والسفلته..
والأرصفة..
وشوف الرجال.

العالم العربي يرحب في قدومك..
يا ابن زيد..
لو حصل عندك مجال.

(2)

اختلال.

فقت من نومي، وأنا توي بأنام..
وشفت حورية..
ما تشبه إلا انتي..
تعاليها..
أنا فيني نعاس.

ارفعي كف العتب..
ثم اصفعي وجه العبوس
المرتكي مابيننا..
أو فارقي هذا اليباس.

العمر قطرات..
ولا باقي إلا قطرتين..
والثالثة..
طاحت قبل ساعة غصب..
واغتالها قرطاس.. !

والظما توّه عبر..
والنزف يصرخ..
إفزعي للجرح كوني
لو قدرتي..
بلسم الإحساس.

المشاعر ناس.

(3)

إختلال.

في أمان الله..
جيت ورحت يا الغالي..
وعسى دربك رغد.

الكل مشغول..
ومثل ماشفت..
ماحولك ولد.

إرجع وسلم على كل النشامى..
وقول: جيت من البلد.

ولا لقيت أحد ٍ أبد.

وأظن كان الوقت في ذاك المكان..
(عطلة أحد )

نــجــم

06-04-2011, 08:12 AM

يقولوا عيد !!

سكون..
ولاضجيج إلا صراخ أطفال باكستان..
ومدافع تقصف (الجيران )..
وجوع يصيح في السودان.

هدوء..
وثكلى مالقت جثت ولدها..
وطفلة تنزع أظفار المنايا روحها..
وتهجر مهدها.
وصداع يهدم الجدران ! .

سلام..
وناس تنام ..
وناس مالقت مرقد ثلاث أيام..
وعين تودع الفرحة ..
وعين تعانق الأحزان.

سلام الله على الأوطان .

(*)

بعد أيام عيد الفطر..
تهانينا بعيد الفطر يا أهل العيد .
تهانينا بنهار الزاد والسكر ..
وطعم العيد .

يقولوا عيد ..
وأقول الله يعين العيد ..
إذا هو بيحتفل فينا ..
وحنا مو معاه .. بعيد ! .

يقولوا عيد ..
وأقول أرجوك ياجاري ..
تحمل كشرتي لوما قدرت أكْذب صباح العيد.

ولو ماقلت لك مبروك
وجيتك حامل همي على وجهي ..
بلا ضحكة و لا تغريد !

وش التغريد ..؟
لاصار الظهرومكسور ..
ولاصار الفرح محذور
ولاصرنا وسط حزن الفراغ ندور ياجاري ..
وش التغريد ؟! .

وش التغريد ..
وانت مو جسد واحد ..
كثير أجساد!
بعضك في يد الجلاد
وبعضك في هرب وطراد
وبعضك عايش الغربة
وبعضك عايش التشريد ياجاري ..
وش التغريد ؟!

تجاوز كذبة التغريد والالحان ..
تجاوزني ..
وتأمل وش يصير الآن ..؟
سلام الله على الأوطان .

(*)

تعالي ..
وين حضنك وين يا الراحة
تعالي..
واخطفي هالياس من حضني .. ولميني .

تعالي ..
وامطري فوق اليباس اللي فدع فيني
وخذيني فوق بهطولك..
ألين الشعر يضويني.

أبيه العالم اللي مابعد شفته ..
أبي وجه الزمن الأبيض ..
وحلم مابعد عشته ..
ولا متعت به عيني .

أبي صبح مثل وجه الحبيبة غير ..
يسابقني عليه الطير ..
يبعثرني ..
وأبعثر به دواويني .

أبي أرتاح من دوامة التفكير في التفكير
من الساعة ..
من الواقع .. من التفسير وأوجاعه ..
وأبي أرتاح من نفسي ..
ومن ويني !؟ .

تعالي ..
وأدري إنك لوتجي ، بيخونك العنوان
لأنه مابقى عنوان للراحة ..
ولا انسان ..
سلام الله على الأوطان

نــجــم

06-04-2011, 08:13 AM

يا طوابير النعام
ادفنوا هاماتكم بالرمل
توّه ،ما بعد حان السلام.

اتركوا عوراتكم
لا تستروها..
دام ساترها الصديق العم سام.

واقسموا هذي الأراضي البائسة
أو اطرحوها
بين سادات الأماني والكلام.

وازرعوها بالكسل
أو الزعل.
أو أجروها لغارسين الحقد..
وأتباع الخواجة، واللئام.

وان سمعتوا من هنا
او من هنا اومن هنا
نبرة ملام .

كسروا الأقلام
واصنعوا الأفلام
واضحكوا - لكن علينا
واشغلوا الإعلام.

واستريحوا في ظلال الجامعة
والرابطة
وسماحة الاسلام.

واتركوا العالم ينام.

(2)

ياطوابير الذياب
اختكم مليون كلب يعضها
ويفتضها ..
وانتم تخافون الكلاب .

خدرتكم ريحة الدم ..
وغديتوا صم ..
من صفق الكفوف ..
ومن كعَب، في (جزمة ) البّواب .

همهمات
ولا وراها غير قلب ٍ ينتفض –
مابه شجاعة ..
أو ضمير نام من كثر الوداعة ..
أو سراب ..!

همهمات
والصلاة والسلام .
واجتماع ..
وربطة أعناق ، وصداع –
ولا سماع ..
ولا خطيب ولا خطاب ؟!

بانتظار المستحيل ..
وربة الحسن الجميل .
نقرا الجرايد ..
والكرامة من مشاعرنا تسيل ..
والسؤال يلح ..
لكن لا جواب .

وش تبون أكثر ..
تعفر وجهكم ..
وأرض العروبة حولكم ..
ومن فوقكم ، تمطر خراب ؟!

وش تبون أكثر..
تدمر كلكم..
والموت صار أشرف لكم..
من ها لمذلة والمهانة والعذاب.

(3)

ياطوابير العرب ..
يا أهل الأغاني والطرب .
يا أهل الرماح .

يامشغلين الكون بالماضي..
وفتاوي حضرة القاضي..
وقصيد الشاعر الفاضي..
وحفلات النكاح .

ياعاشقين الأمركة،
والشكشكة..
ولم الوسايد للصباح .

وين السلاح ؟
ماعندكم للمعركة يا للأسف
غير المدافن والنواح.

ماشفتوا دموع الثكالى..
وانكسارات الحبالى
والحرام المستباح ؟

ماغاضكم دوس الخنازير بمساجدكم..؟
ماسمعتوها مآذنكم -
وهي تصرخ تعالوا ..
ياعباد الله ـ
خمس مرات على ذاك ( الفلاح ) ؟!

نــجــم

06-04-2011, 08:13 AM

الأخيرة

شيخة الحور وقمرهن
بيضهن واحلى سمرهن
واجمل اجمل من عرفت من العذارى
واكمل اكمل من مشت بين العذارى
والمحال الممكن والصعب والسهل
البعيد اللي وصل
وشهقة الشعر وزفيره
والاخيره
*****
ريحيني من ابو زيد الهلالي
والملوح قيس
اقلبي التاريخ في عيوني تعالي
واشرقي بلقيس .
وامنحيني في الشهر حصة غرام
درسيني في مجازات الكلام
علميني الفرق
بين المبتدا.. وبين الختام
عافوا الطلاب جهلي ، وفكري المسكون حيره
وعفت انا التدريس والحصة الاخيره .
*****
كل مهنة غير حبك يابعد عمري سخيفة
اتركيني فيك اهيّم
واتركي نبضي بكيفه .
رزقتي شوفة عيونك
والهيام اروع وظيفة !!
لاتلفيني بسكوت، ولاتذليني بصمتك
غردي يا لعنبوها خفقة ماصهللت لك
انحرى رقاب الاماني والظنون
صبّحي عيد الجنون ..
وفجري بين العواذل حسرة تعمي العيون .
خبريهم من تكوني ..خبريهم من اكون
ولاتهابين السيوف اللي من الغيره مغيره
دام باقي للامل فرصة اخيرة>
*****
كنك المنوة هملتي
في مرابيع ٍ خلية.
بك تجدد روضي الذابل ، وشال السامرية
ان طلبتك حلم صرتي ..
وان بغيتك واقعية.
بالصحاري ريم عفرا
وبالشواطي ساحليه .
عشتك بكل الحضاره ،وكل ذيك الجاهليه
في ليالي الصخب كنتي، وباليالي الشاعرية .
يابنيه.. يافضا العاشق وطيره
مانسيتك واذكر القصة الاخيره
*****
ازعلي مااقول حدّك
سافري في كل وقت لديرة عنادك وصدك
مزقيني
انزفيني
عاتبيني من يحدك??
اه يازين العتب لامن تحدر فوق خدك !!
واه ياحلو الرضى عقب اشتعالك وشّدك
لولا لحظات التغلي ، والتظلم ، والظليمه
ماعرفتك باالتجلي ولاغدى للانس قيمة
ولولا ذلك يالظما ذيك الظهيرة ..
ماعرفنا قدرها .. القطرة الأخيرة .
*****
في مساحاتك يضيع الهم يرتاع برحَبها
كنه جبال الجليد، وكنك الشمس ولهبها
تزرعي شكواي ،واطلع غنوة يصدح طربها
تمنحي ظلماي صافي نورك الاسنى والابهى
تأخذيني طفلك المطلي شقاوه
تغسليني بالدموع وتمسحيني بالتلاوه
وتبهجي حزن السريره
وابتسم لك .. وأعزف الآه الأخيرة .
******
اعذريني لو بخلت احيان واحيان بكلامي
لهفتي لك ياغرامي دوم تسرقني كلامي
ومسمعي من ثرثرة شوقي يغار
ومن لساني لاتغزل بك يغار
وداخلي ديره وشيبان ٍقدامى
ودهم بالاختصار ..!
والحكي ريح ومراكب لليتامى
ولا على ارضي بحار ..!
والمعاني لص بين الناس بارع
والحرس في كل شارع
وابتهالتي كثيرة
ارتجلها .. بس في اللحظة الاخيرة
*****
من شمال اقبلت اسابق في طموحي
احسب الدنيا طموحي
احسب القصوى طموحي
لين جيتي وابتدا فعلاً طموحي .
انغرستي بين مااشوفه وشوفي
وبين رغباتي وعزوفي
وبين جثماني وروحي .
كنك بصوتي الحروف الابجدية
والملامح والهوية
والتعابير الصغيرة و العشيره
صدقيني ..
انتي اول من عشقت من النسا وانتي الاخيرة
******
كل انثى غيرك بعيني سراب
وكل منفى غيرك إجحاف وعذاب
وكل حب غير حبك سفسطة
وكل درب غير دربك مرمطة
وكل طير ماشدى باسمك كذوب
وكل فجر مااشرق برسمك شحوب
وكل شاعر ماقصد لاجلك لعوب
وكل عين ماقرت حسنك ضريره
سيرتك اغلى كتاب ..
وبيدي الطبعة الاخيرة
******
صورتك، في كل صبح لي جريده
وهجها اسرار واشعار ونشيده
ورحلة فوق السحاب
وسلة ورود جديدة .
ياملاك جاوز ادراك البشر
من سقى الضي القمر
ومن عطى اللحن الوتر
ومن ملا وحشة حياتي
وعطر انفاس الزهر؟
ومن نثر فيني فصوله
ولمني بين الطفوله والرجولة غير طيفك
لادنت حزّة وصوله .. بالمواعيد الأخيرة .
*******
ماعرفت اني ظلالك قبل اعْرفك
مابقت فيني خليه ماتعرفك
ابتهاجاتي تعرفك
انفعالاتي تعرفك
انكساراتي وذاتي واتجاهاتي تعرفك .
ساعتي ..عطري ..مفاتيحي.. وحاجاتي تعرفك
وكل من كان وعرفت، وصار يعرفني يعرفك
ومن سمع عني قصيده لو قصيره
ومن سمع اول قصيده
ومن سمع هذي الاخيره
******
طال عمرك أو قصر .. ماهمني
مادمت أنا عمرك
مادمت أنا أمرك
مادام قلبي لك مكان ..
مادام نبضي لك زمان ..
مادام شعري جلستك .. ودلالك .. وتمرك ..
ومادمتي في عرشي الأميرة ..
كل عام وانتي بخير
وكل عام وانتي الاخيرة.

نــجــم

06-04-2011, 08:13 AM

برد والنجمـــــات مشتعلة
....................والبنات أكثـــر من التفكير
والسهر ، مثل الذي قبله -
....................أيْ شيْ ، ويا صباح الخير.
المطر.. قــومي على وبله
......................دام حــــــانت حزة التعبير
شاعرك ماهوب على مهله
.....................بدعي ، قبــل المزاج يطير
لحظة العَــشــــــاق محتفلة
....................والشعر، ما يحتمــل تأخير.
مالنا ومـــال النظــم وأهله
..................والهدير، ونافـخيــــن الكير
والقَنَص، والشيخ، واصطبله
...................وموجـــــة التغيير والتكفير
سال نهر النيـــل في دجلة
..................وانتهينا، مــــــا نبي تفسير
يا رضاي..استقبـــــِل القبلة
.................ويا هواي.. استقبليــني طير
مرت أيام الســنــــــة عجلة
...............وياعسىالمقبل(هابي نيويير)
وهلني لك شـــوق ( يا عبلة)
.................هلني حتى غديــــــت كثير!
القوافي، شغــلــــة سهلـــة
...................لكن أوزان المشــــاعر،غير

نــجــم

06-04-2011, 08:14 AM

لاهي

في دنيته ..
لاهي
ولاهوب يمّها.

مبلوش بهموم السنين ..
ومختنق في غمّها.

والليل من حوله سراديب وحكايا عابسه ..
والناس فوق اليابسه ..
متواصلين بلا وصول ..
وغارقين بظلمها .

واهمها محبوبته ..
لو درت عن قصته واهمها .

تقول له مرتاح ..؟
يقول إيه ..
دامك معي أكيد أنا مرتاح ..!

مرتاح لك ياللي أحب ..
وخاطري مرتاح ..!

ويسْعل ..
وينفث ما تبقى بالحنايا من سُحب..
وإن أمطرت غنّى تعب..
وان مدّت النظره عليه ..
يمرر البسمه غصب .

وإن زارت العبره جفونه زمّها ..
ثم إنكسر ..
كأن شيٍ طاح..!؟

وإن صادته بعيونها..
قام انحنى -
وقال إتركيني لحظتين..
أدوّر المفتاح.

وإن راح ..
فاح الشعر كله وأزهر التفاح ..!

شاعر ولا عُمره لقى ..
مسكون غُربه وأصدقا
وقته سِفين من شِقا ..
ومِشاعِره مَلاّح .