ديوان الشاعر راكان بن بدن السبيعي

بسم الله أبدا باديٍ ضرب الأمثال

ربٍ ليا خاب الرجا نلتجيله

سبحانه منزّل تبارك والأنفال

فضايله دايم علينا جليله

مبداي بسم الله على كل الأحوال

واكتب من المعنى بيوتٍ جزيله

ماجور يامن للثقيلات حمّال

يامن ليا جار الحمل ترتكيله

سلامة اللي للمشاكيل مدهال

راع الصفات المكرمات النبيله

مقدام ربعه للصعيبات حلاّل

فكّاك عسرات الأمور الثقيله

شال الحمول اللي على غيره ثقال

يوم أن غيره ماقوى الحمل حيله

هذا مثل واضرب على مثله أمثال

رجّال قدره وازنٍ له قبيله

ياسعْد منهو صرت له خال ياخال

يفخر بطيبك بين ربعه وجيله

لك في مزار الطيب يابوي منزال

ولا كل من قاد الركايب يجيله

الله يحرسك من بلا سوّ الأهوال

تبقى لنا مجد وملاذ ودليله

يارب عبدك مابعد صار ملاّل

في طاعتك ياقل منهو مثيله

أسعد خبر لامن سمعت المرض زال

ليت المرض ينزال عنك وازيله

بأمر الذي نزّل تبارك والأنفال

صعب الأمور تهون والمستحيله

__DEFINE_LIKE_SHARE__

(صك البلاد) اللي بليّا عناوين

قرّرت اجيبه لو تقوم الرقابه

ياقلب لاتحزن ولاتسهر العين

دام الثرا خدّي وعيني سحابه

جرحٍ برا والجرح الآخر له سنين

تكثر سنينه ويتجدّد صوابه

جرحٍ تمكّن فالحشا والشرايين

يرويه دمّي والخلايا زهابه

ليت السبب من صدّتك ياادعج العين

ماكان خفّاقي فراقك درابه

إلى متى وأنّا كذا (بين قوسين)

سؤال هيّن والبلا وش جوابه

متى على الله نقضي الدين بالدين ؟

حتى العدو منّا يحسّب حسابه

ونرجّع أيامٍ خوالي بحطّين

نطلب رضا ربي ونخشا عقابه

حتّيش لو أنّا عددنا ملايين

عدد بدون عتاد وش ينبغابه

حسْب الحديث اللي ورد فالصحيحين

عْن البخاري سطّره في كتابه

معناه نصبح في زمنّا ضعيفين

مثلْ غُثاء السيل لكن غَلابه

يابنت مهما تشتكين وتنوحين

الوقت هذا مايسرّك شبابه

ماتت ضمايرهم ولوكان حيّين

حياتهم والموت صارت تشابه

روّح زمان المعتصم ناصر الدين

وقفّا زمان الأنبيا والصحابه

والله ورب البيت منّا براضين

صارت بلدنا للنصارى نهابه

تريّثي والله يعين المساكين

وجرّي على جرح الزمان الربابه

تصبّري حتى تحرر فلسطين

وألا يجي ذيبٍ يهْجد الذيابه

وتقرّ ياقلبٍ شكت همّك العين

حتى اصبحت من جور همك سحابه

__DEFINE_LIKE_SHARE__

ليت الظـــــروف تزين ويزين فــــالي ..**.. وأشــوف خلّي وأتمتــــع بلقيـــاه

اللي سلب عقلــي وفكـــري وبالي ..**.. العيــن تبكــي والمـــدامع تمنّـــــاه

تـــوّه صغيـــــر الســـــن فيه الدلالي ..**.. قلبي معه وشلـــون بجحد وبنســاه

عايش بوســط النــاس كنّـي لحالي ..**.. روحــي معـه والقلب في كــف يمنـــاه

لاصـــار هو مثلـــــــي يحـب ويبـــالي ..**.. بس البـــلا صـــارت ظــروفه تحــداه

أجيــه في بالــي كــلام(ن) يقـــــالي ..**.. لاشفــت زوله ضــاع ماكان بقـــراه

يالله زيّــــن مقبــــــلات الليـــــــــالي ..**.. محتــال أعيـــش أيــام والله بليـــاه

يانــــاس خلّــوا كل غـــالي وغـــــالي ..**.. خـــلوا صـــــويب الحب يفــرح بدنيــاه

لاصــار حب أثنيــــــن مابه وصـــــالي ..**.. كل(ن) يبــي خــلّه ولاهـوب ويـــاه

شفت المخيــل وردّني في خيـــــالي ..**.. كل الظــروف اليــــوم تسعــى لفـرقاه

القـــلب يشكـــي والحبيب أشتكـــالي ..**.. درب الهـــوى والحب ياصعــب ممشــاه

وألا الزمـــان اليــوم قفّـــــــــى بحــالي ..**.. الحب والفــــرقى وهـــم المعـــــــاناه __DEFINE_LIKE_SHARE__

آخر دوى المرضان قد قيل بالكي

وبعض العرب مافاد طبّه وكيّه

ماجيتك ابغى شي ياحاتم الطي

ريّح ملايكتك وسْرج العبيّه

مدام أنا راسي يشمّ الهوا حي

هبّي عليّه يالهبوب العذيّه

ياللي كلامك غي ومشاهدك غي

اضيع أنا مابين هذي وذيّه

سلّمت لك روحي على راحة ايْدي

واهديتني منْك التجافي هديّه

لولا الشرف والدين والهاجس الحي

والحاجه اللي في خفوقي خفيّه

ماكان يمنعني عن امقابلك شي

الفرق واضح بين شمسٍ وفيّه

ارفق عليّ شوي واستلطف شوي

ماعاد فيني للمواجع بقيّه

غيرك طويته عن هوى خافقي طي

واهدرت لك دمّي خليّه خليّه

ومادمت معتبرك لي الزاد والمي

يعني بوجودك تصبح الروح حيّه

تعال محصول الغلا ناقصه ري

اروه وفا مابين روحه وجيّه

أما كذا وألا على ماطرك عي

ويغنيني الله من سحابه وريّه

وأنت انتعم بالعز والظل والفي

وأن شفت زولك قلت : يالله حيّه

صحيح بأن آخر علاج المرض كي

بس البلا من نقّض الجرح كيّه

__DEFINE_LIKE_SHARE__

البارحه مابين ضاحك ومزّاح

كلمه لفتني من رفيقٍ سنافي

لايحسبن قدره بعد كلمته طاح

ماتستشك ألا النفوس الضعافي

لو أنّها من قاصر العرف ياصاح

ماكان مرّتني وراحت عوافي

لجرّعه كاس الغَبن سمٍ اذحاح

حتى يقول لغبر الأيام كافي

الحر مايكفخ على كل ملواح

فرقه وفرق البوم ماهوب خافي

والله خلق والله فرق بين الأرواح

احدٍ مريض القلب واحدْ امتعافي

حنـّا ليا هِز الرشا والدلو ماح

نفعل مثل فعل السيوف الرهافي

ياليت لأفواه المخاليق مفتاح

حتى نسكـّر فم من كان هافي

وعن كثرة هروج المهابيل نرتاح

اللي سوالفهم تبذ الخوافي

كثر الحكي محدٍ جنا منـّه ارباح

ألا الخساير والعنا والتجافي

يالله عسى كبار الهواجيس تنزاح

عن خافقٍ فيه الطواري ياْكافي

اهموم وقتٍ داخل الصدر تجتاح

هذي مقابيلٍ وهذي مقافي

يارب يارزّاق ياخير فتـّاح

ندعيك فالمسعى وعند الطوافي

فالآخره نهنا ونسعد ونرتاح

ونشوف وجهك يوم كشف الخوافي

__DEFINE_LIKE_SHARE__

ماجور يافكري من الهم ماجور

ماجور من كثر الفتن والبلاوي

مهما حصل منتب عن القاف معذور

دامك على مد الجزيله رهاوي

سق الركايب واردع الظلم والجور

من موقفٍ كثرت عليه الحكاوي

خبر سمعته فالإذاعات منشور

ومسجلٍ وسط الصحف والمطاوي

الله يشلّ ايديك يا كاتب الزور

يالمنحرف راع البدع والرشاوي

حتيش لو أنّك مفكّر ودكتور

فكرك ملوّث من جميع النحاوي

منبوذ مالك فالوطن يالردي دور

دامك على هدمه تحث الخطاوي

وينك ووين حقوق الإنسان ياثور

تدعو لْتبرج لابسات الغطاوي

لاصار لاغِيره ولاعندك شعور

ماهي غريبه ياخبيث الدعاوي

اعمى وتتبع منهج العمْي والعور

في موطن التوحيد ويش أنت ناوي !!

امن العدا مدبّر ومنهي ومامور

ماباقي ألا أنّك تصدّر فتاوي

بإذن الولي خاسر وصاغر ومثبور

بتموت ماتلقى لفكرك حراوي

في هيئة المعروف مانسمع الشور

في فضلهم مُنزل كتابٍ سماوي

يعني لهم مبدا ومنهج ودستور

ماسطّره واحد من الناس غاوي

هم الذرا حمّاية الدار له سور

على الهدى مايخلفون الهقاوي

منصور يالنّاهي عن الشر منصور

من غيرك اللي فالمهمّه فداوي

ثبّت خطاك ، ومن هل الدار مشكور

وارض الولي ثم المليك النداوي

صقر العروبه لادعانا على الفور

لَمره ورَدنا مثل وِرد الظماوي

يجي جميع الشعب طابور طابور

كبيرهم وصغيرهم بالتساوي

لجل الشريعه دمّنا دايم يفور

ثم الوطن نشريه لوهو غلاوي

واهل الظلام اللي تبي تحجب النور

نقولها كلمه لهم مانراوي :

دام(ن) وطنّا مالكم وسطها دور

روحوا وراكم ياكلاب الشواوي

__DEFINE_LIKE_SHARE__

قصّر على صوت الإذاعه يانواف

الصدر كنّه فوق صال المليله

وسوّ لعربسات الفضا لحظة إيقاف

واسمع معي حبْك المعان الجميله

لنّي معك صادق وواضح وشفّاف

جزل القصيد اليوم بطلق سبيله

وبآخذ مع جزال الطواريق محراف

شاعر وتطربني البيوت الجزيله

وعلى المثايل ياتي لفكري شعاف

وانقّحه واسامره وارتكيله

ولانيب أدوّر من ورى الجزله انصاف

اسرجت فكري فوق ظهر الكحيله

شاعر ولي في حزة القاف ميقاف

واثق ولا غرّه مطافيق جيله

مبدا بديته والهدف حسب الأهداف

لامن كتبت البيت راسي دليله

اقطف ثمر صدري لو ضلوعي عجاف

عن مايوسّع خاطري كل ليله

ياصاحبي ذا الوقت من جد ينعاف

اللي به الحصني ركز راس ذيله

لو الردى بوجيه الأنذال ينشاف

ماكان غرّتنا السنين الطويله

طفت البلد لو كان مانيب طوّاف

وحلّلت لأصناف العباد الفصيله

مايرتكي لحمول الأيام خوّاف

في موقف الشدّات دوّر بديله

لا صار مايرقا على راس مشراف

احسنله أنّه يكسي الراس شيله

هذاك ( لامفرّج ) ولاهوب ( عسّاف )

واليا سمعته قلت يسوى قبيله

عن عنوةٍ يمّه تخيّرت الإنكاف

لاصار ماله فالمواقيف حيله

ياليت لأصناف المخاليق صرّاف

نصرف بدال الحنظله زنجبيله

وألا الوفي قدره على روس الأكتاف

دامه يشيل الطيب والله لأشيله

وأن حاول التقليل من قدره ضعاف

عن شر سودان الوجيه احتميله

ولانيب أمازح من روابعهم خفاف

ولانيب أجالس عاشقين الرذيله

ولانيب أعبّرهم ولو كانوا أضعاف

لوينبت براس المهبّل فسيله

قل للردي دامه جهل درب الأشراف

كلمة ( نعم ) مهما طمح مستحيله

لو زار له كاهن وساحر وعرّاف

ماهوب لاقيله عليها وسيله

المرجله تبغى ولد نادر أوصاف

مايمشي ألا في دروب الفضيله

ليت الظماير يالشلي دايم نظاف

وكلٍ يحسّب بالموازين كيله

حتى الوجيه الغامضه قدْمك تشاف

ويبين منهو يرتكي للثقيله

هذا وأنا فالهرج ما احب الإسراف

والشعر يكفي عن كثيره قليله

وأليا تحالا هاجسي بدعة القاف

وكّلت راسي في صعود الطويله

خابرْك ياراسي مرحّب ومضياف

بالذات لاجتك المعان الجزيله

ومسنّدٍ لك دايم أدوار الإشراف

لنّي أعرفك ماتجيب الهزيله

وختامها هذا الزمن جد ينعاف

اللي به الحصني ركز راس ذيله

والحين تابع ما تهيّا يا نواف

والعذر كان أبيات شعري طويله

__DEFINE_LIKE_SHARE__