ديوان الشاعر راكان بن بدن السبيعي

بسم الله ابدا وآتعوّذ من ابليس

وانقى الكلام اللي من القلب طاهر

بعيد عن زيف الفتن والوساويس

و الفلسفه و البهرجه و المظاهر

(الآدمي كتلة مشاعر واحاسيس)

مابين خافي حس وإحساس ظاهر

يبقى خفوقه مدهلٍ للهواجيس

ويابخت من قلبه بالأذكار زاهر

ياعابد الدنيا و ياحادي العيس

الخاسر اللي لأذنب الذنب جاهر

الله ولا عرف الوجيه المفاليس

عميان الأريا بالنزاهه تظاهر

تغنيك عنهم خوّتك للفواعيس

مثل المعادن والدّرر والجواهر

انقى واميّز واعرف العلم واقيس

الذيب دايم يقضي الليل ساهر

ولجل الرفاقه ابذل الجهد والكيس

واقوم لو الظرف قاسي وقاهر

قدم الملا ماجيت خلف الكواليس

شاعر وصيتي مع هل الشعر شاهر

وأن عودت صيت ورجوله واحاسيس

في كلهن والحمدُ لله ماهر

__DEFINE_LIKE_SHARE__

لاتشغليني بالمراسيل يانوف

من طول صبري ضيّق الوقت بالي

ماني على رد المراسيل مكلوف

ليتك عرفتي يالغلا وش جرالي ؟

لي ساعةٍ واقف على باب معيوف

وأنا جنوبي والمعزّب شمالي

يا ام الجديل اللي على المتن مردوف

ياويل حالي منْك ياويل حالي

مثلك عليّ يغار ويحنّ ويروف

وأليا حصل تقصير يرفا خمالي

ياغاية العشاق يافتنة الشوف

فيك الدلع مجبول والذوق عالي

الله عطاك وصوف ووصوف ووصوف

لاجيت اعدّدها يقصّر مقالي

دمثة نحر والخصر ضامر وملهوف

مدموجة الساقين وصفك خيالي

نظرة عيونك كنّها رماح وسيوف

تطعن خفوقي بالنظر ماتبالي

مع خدّك الوردي على ثوبك الموف

يعمل عمايل في زحول الرجالي

والشفّه اللي لاحكت تدغم حروف

من تحت سلّة سيف ياهملالي

غيرك من الخفرات لعشق ولا أشوف

فيك الغنج والملح والريق حالي

أي والله أن القلب فالحب مشغوف

يفز لامنّه طرالك مجالي

وعن غيرك الخفاق يابنت مصروف

ماغيرك احدٍ يسكن القلب غالي

رسايل العشاق مظروف مظروف

تبهج خفوقي كل ماضاق بالي

عز الله أني بعض الأحيان ملقوف

بس آتحمّل يالغلا ماجرالي

حسبي على معيوف وأشغال معيوف

زعّل عليّ أم الحلا والدلالي

__DEFINE_LIKE_SHARE__

بدايةً
السلام ورحمة الله والتحيّه
...........................مبتدا فيض المشاعر والمعاني
والشحم والطيب بعد الشاذليّه
...........................ماتساق ألا على طوال اليماني

,’
ابيات من قصيده صقر العروبه موجهه للملك عبدالله بن عبد العزيز اطال الله في عمره
عليك آمال العرب والمسْلمين
...........................من غيرك اللي بعد ربي لجوبه
بدرك سطع نوره على العدل والدين
...........................غصبٍ على اعداءً تمنى غروبه
أنت الرضا وأنت السعد للمجلّين
...........................وأنت الذي لأعداء الأمه عقوبه
من وقفتك ترجح جميع الموازين
...........................ريف البلاد وسيّده ومحبوبه
نفخر بوقفاته بكل الميادين
...........................ياقايدٍ بأنظارنا نلدّ صوبه
شعبه وداره مع قضيّة فلسطين
...........................أوضاعهم دايم عليه امحسوبه
ماقال لاجت حزّة الضيق بعدين
...........................كن الشعوب اللي تألم شعوبه
لسان حال الشمل لاصار شملين :
...........................نحتاج وقفاتك ياصقر العروبه
,’
ياسيّد المجد واعنانه ومرباعه
...........................ياخادم البيت والساعي بتوسيعه
زرعت حب الوطن في شعبك زراعه
...........................حتى انطقوا بالكلام اللي لك انذيعه :
على الوفا والولا والسمع والطاعه
...........................انكرّر العهد وانجدّد لك البيعه
,’

خبر عاجل ((سلطان بن عبدالعزيز ))
وشلون اببدا واسم سلطان مسك الختام
...........................مجرّد اسمه يكفّي عن عباراتها
متى يجينا خبر عاجل وحصري وهام
...........................وينِقل على كل دوله في قناواتها
الناس في حب سلطان الكرم ماتلام
...........................حبّه تِعدّه ركيزه بإعتقاداتها
رمز الكرم والزعامه والفخر والسلام
...........................اطيب صفات العرب يسبح بغبّاتها
في شوفتك ياولي العهد عالي المقام
...........................تدعي لك أمة محمد في صلاواتها
أنت السعد والسند وأنت الذرا والسنام
...........................وأنت الوزير لبلدنا في دفاعاتها
وأنت الوفا وأنت حلاّل الأمور الجسام
...........................يازارعٍ للملاهيف ابتساماتها
,’

كنّا من أول نوفي العهد ونصون
...........................وشموخنا محد يتجرّا يهزّه
ومن عقب بوش وكوندليزا وشارون
...........................ماعاد باقي للعروبه معزّه
صرنا نهان ونقبل الذل والهون
...........................ووقفاتنا ماهيب في كل حزّه :
أكبر دليل اللي تسوّيه صهيون
...........................فالمسجد الأفصى واريحا وغزّه __DEFINE_LIKE_SHARE__

الروس تبقى روس وادّاحم الروس

غصبٍ على اللي ماحلم بالرياسه

وألا أنت طول العمر تابع ومريوس

ما انته من اللي يقدح العلم راسه

حطوك لعلوم المناعير دبّوس

عايش على علم الردا والنجاسه

لاصار خفاّقك من الحقد متروس

بتموت ماعمرك شعرت بوناسه

دعايتك كذبه ، وأمانيك كابوس

مالك هدف بيّن ولالك سياسه

الله خلقنا نقدح العلم ونروس

ما الله خلقنا نعيش عيشة بساسه

ناطا على روس الثعابين وندوس

ونعلّم الجاهل ليا اخطا مقاسه

كلٍ وله مبدا ومرجع وقاموس

الدرس واضح مايبي له دراسه

أحدٍ يلدّه موس ويطوّعه موس

وأحدٍ قوّي الباس .. ماهز باسه

الحمد لله نرفع الراس ناموس

والرجل وش هو لو تراخا حماسه

تبقى الكرامه تاج والطيب ملبوس

وكلٍ على قدره يفصّل الباسه

وأن كان عادك تاخذ بعمرك دروس

خذ كلمة اللي يقدح العلم راسه :

الروس تبقى روس واطوّع الروس

غصبٍ على اللي ماطمع بالرياسه

__DEFINE_LIKE_SHARE__

يا مبعد الهقوات لا تبعد الشوح

ما قدّر المولى على العبد آتي

يضيق صدري بعض الأحيان ويفوح

وتروح مني ضيقتي في صلاتي

اجاري الورقا على النوح وانوح

واخفْي عن انظار البشر تضحياتي

واقول ياوقتي لو اخطيت مسموح

منّك يكفّيني فقط ذكرياتي

لو يعلم الإنسان ماكِتْب فاللوح

ماقال للي فات ياليت تاتي

الصمت يغريني على منهج البوح

والبوح يكشف لك عظم سيئاتي

أحيان احس أنك معي وين ماروح

وأحيان احس أنك غريب بحياتي

منّك ومن قلبي والأقدار مجروح

كل الثلاثه رافضين أمنياتي

لولا الرضا بالموت والنفخ بالروح

لأختار في لقياك .. ساعة وفاتي

__DEFINE_LIKE_SHARE__

للشعر باب وللطواريق دستور

وكلٍ حسب تمكّنه واقتداره

من لاخذا من ثاقب المعرفه شور

بيلوم نفسه لأتضح له قراره

ياللي تدوّر من ورى الشعر جمهور

اسمح لي اهديلك مجرّد عباره :

افضّل ابقى بين الآلاف مغمور

ولاظهورٍ مايسرّ انتشاره

أما قصيدٍ ينبض احساس وشعور

وألا بلاش من الشعر واحتكاره

حتيش لامن صرت بالشعر مشهور

يالعنبو الشهره بليّا نعاره

مثل الذي يتعب على بنية السور

والسور خالي مابوسطه عماره

المدح والتمجيد بالكذب والزور

بدال ماهو مدح يصبح عياره

بعض الكلام بدافع الصدق محظور

والكذب في بعض المواقف شطاره

يالله جمّلني معَ كل منعور

في ماقفٍ تشعل سنا الطيب ناره

الماقف اللي يدحر العمْي والعور

ويبيّن الطيّب ويرفع وقاره

يامحلا والقاع يافهيد ممطور

والعشب مكتسحه زباره زباره

في خايعٍ خالي من الناس مهجور

ومن باب معرَفة النشاما تجاره :

معك رفيقٍ فالمهمّات مخبور

على النقى والطيب يقدح شراره

واسع مَعرفه للوفا وافي شبور

مافتّح عيونه على عيوب جاره

هذي الطراة ولامخاواة معثور

أقولها ويكفي من العلم شاره :

الصمت في بعض المواقيف له دور

والفوز في بعض المواقف خساره

__DEFINE_LIKE_SHARE__

ياليت مابيني وبينك مسافات

حتى ليا منّي بغيتك لقيتك

واسلّي عيوني بشوفتْك ساعات

واروح ،، واليا اشتقت مريت بيتك

شوفتك ترسم للوجيه ابتسامات

يامسرفٍ فالعاشقين إتيكيتك

من زود حبي لك افكر بحاجات

لو أنت توكل من غلاتك كليتك

اتوق لك من بدة الخلق بالذات

واكذب ليا من قلت لك ما هويتك

اشتاق لك شوق الشقي للمسرّات

ولوتطلب عيوني وروحي عطيتك

أنا بدونك حيّ بعداد الأموات

والله لو يسمح لي الظرف جيتك

واعاتبك بإحساس وانسيْك مافات

واضماك شوق ولاشربتك رويتك

واشب قنديل السهر واشعل الذات

واثبت لك أنْ مافيه لحظه نسيتك

واسمّعك زفرات ترديد الآهات

واعلّمك معنى : لعلّك ياليتك

ليتك تجيني واسهر الليل ما بات

وانسيْك حيّينك و انسّيك ميتْك

مرّات احس بلهفتي لك ومرّات

اكذّب احساسي واصوّت : فديتك

ياليت مابيني وبينك مسافات

وياليتني لامن بغيتك لقيتك

ْ __DEFINE_LIKE_SHARE__