-- ( الجزء الرابع ) --
في الساعة 3 الفجر ..
وصلوا بنات ابو بدر مع اخوهم خالد للبيت وكلهم ميتين رعب لا تقفطهم امهم وهم داخلين الفيلا ... مشى وراهم خالد وهو يهمس : ولا وحدة تطلع صوت كلكم اطلعوا غرفكم
وانتم ساكتين ... وهم طالعين ويمشون ع اطراف اصابعهم سمعوا صوت عالي : بدري .. كان تأخرتوا للصباح ....
كلهم تروعوا وتصافقوا ببعض ..
خالد : يمة ..!! انتي للحين مانمتي ؟؟
ام بدر منقهرة : انام ..؟؟ وشلون انام وبناتي سهرانين برة البيت ؟
خالد متصبر : يمة اللي يسمعك يقول سهرانين بكباريه ولا كازينو ...
ام بدر : وانت عبالك اني راضية اصلا يسهرون برا بيتي ...؟ وين ماكانت السهرة انا مابي بناتي يتعودون انهم يخرقون قوانيني وقوانين ابوكم ...!
خالد : خلااااااص يمة خلااااص هذاهم رجعوا محد اكلهم ...
ام بدر : وهذي ااااااخر مرة تسهرون برا البيت ولو عرفت في يوم ان لكم تواصل مع هالبنات والله لا احرمكم من المصروف اليومي ومافيه لا اسواق ولا جوالات ولا اجهزة ..
-- البنات يطالعون في امهم مستغربين وخالد معاهم مستغرب ...
شروق : ليش يمة .. وش سوولك هالمسكينات ..؟؟
امها بنبرة عالية جدا : انطمي ي بنت ... لمن انا اتكلم بهالبيت ترخين عيونك بالارض وتسمعين اللي اقوله ...
تحجرت الدمعة بعيونها وتمت ساكتة ...
خالد للبنات : خلاص ي بنات اطلعوا غرفكم وارتاحوا وانا اتفاهم مع امي ...
طلعوا البنات و خالد يناظر في امه ومايدري كيف يغير لها افكارها الغريبة ...
خالد : يمة .. ارفقي على هالبنات ... انتي كذا تخلينهم يكرهونك ...
ام بدر وهي تناظر ولدها ومعترضة ع تدخله في تربيتها لخواته : هذا بدال مايشكروني اني ادورلهم الزين والخير ...
خالد يمسك جبهته ويمسحها ويرفع عيونه لفوووق : يمممة اي زين في الموضوع ..؟؟ وين الزين فهميني اقنعيني ...!!
ام بدر تقرب من ولدها : انت بعد المفترض تشكرني على اني حريصة عليهم ومو تاركتهم مثل بنات هالايام كلن تتصرف ع هواها بدون حسيب ولا رقيب ...
انا ابي لهم مستقبل حلو يناسب مستواهم اللي هم عايشين فيه .. يختلطون في ناااس من مستواهم من طبقتهم ... وش فيهم بنات ام فاضل و بنات عبير ...؟ -( صديقات ام بدر و اغنياء جدا )
ليش مايختلطون فيهم ..؟؟ ليش مابينهم اي احتكاك الا الرسميات اشوفهم كيف يسلمون عليهم بدوووون اي نفس ... و بعدين يرجعون لغرفهم ..
خالد : بكيفهم يمة بكيفهم ...! بنات صديقاتك هذوول قمة في التكبر وكن مافي احد مثلهم ... ماجازوا لخواتي ... احترمي حريتهم في الاختيار .. اتركيهم يختارون الصديقات اللي يبون ...
ام بدر تصارخ : خير خير ..؟ اتركهم يختارون ع كيفهم ..؟ ليش عيوني ؟؟ عشان وقت المناسبات تطلع منهم حركة تخلي راسي بالتراب !
خالد : والبنات اللي كانوا عندهم وش فيهم ؟؟ يوطون راسك في ايش فهميني ؟؟
ام بدر : ماااا احبهم .. ناس فشلة مو شايفين الخير واتوقع عاقدين صداقة مع خواتك مو عشانهم عشااااان الفلووووس .. نرمي لهم كم من ريال عشان يولون عننا ويتركون بناتي
في حالهم ...
خالد ياااائس تماما : هذا انتي يمة .. ماراح تتغيرين ابدا ...
طالعت فيه وماردت ...
خالد : تصبحين على خير ..
ورقى الدرج بسسسسرعة لانه مخنوووووق ...
دخل غرفة خواته لقى التوأم شروق ووفاء نايمين ...
قفل الغرفة و راح لغرفة اخته دلوعته وعد وهي بعد لقاها نايمة ...
تطمن عليهم و بعدها راح لغرفته ..
اليوم الثاني الساعة 5 العصر ..
ابو بدر وبدر و خالد في ضيافة ابو محمد ...
بعد الاتفاق على كل شي وتحديد موعد الملكة و المهر طلب ابو بدر من ابو محمد انه يعطي مجال لبدر يشوف العروس شوفة شرعية ...
ابو محمد وقف فرحااان : اكيييد اكيييد .. قوم معي ي بدر حياك ...
بدر مخنوووق وبابتسامة صفرا بقووووة يبتسمها : ان شاء الله .. وطالع في ابوه ودمعة متحجرة في عيونه و بعدها وقف وراح مع ابو محمد ...
يوم طلعوا من الغرفة قرب خالد من ابوه وهمس له : يبة انا احس احساس قوي ان بدر ماراح يكون سعيد بهالزواج ...
ابو بدر : اسككككت انت انا ماصدقت انه يوافق الصفقة ماتتفوت ..
خالد : وهذا اللي هامك و ولدك سعيد مو سعيد عادي اهم شي الصفقة .. انت وامي غريبين واحد يبي ثروة كبيرة والثانية مهووسة بالكشخة والاناقة و الطبقات الراقية وهمها
ماتتفشل قدام الخلق .. يبيلكم كوكب لحالكم انت وامي ...
ابو بدر مستغرب ومعصب : ولد .. تأدب ووجع ... وش هالكلام كنك تكلم واحد من اخويانك !!!
تراجع خالد و قال : اسف يبة ..
ابو بدر يتريق : اسف يبة .. وين اصرفها هذي ؟؟
خالد ...... ساااكت وبعدها قال : بس للعلم يبة وحط في بالك للاحتياط .. زواجي ماراح يتم بنفس طريقة بدر فهمت علي .؟؟؟ من الحين اقولك وماراح تناقشني في هالموضوع ...
ابو بدر : وش المناسبة ليش قلت كذا ...؟؟
خالد : قلت لك اقولك للاحتياط حط هالشي براسك ...
ابو بدر : طيب انطم وخلنا نشوف وش بيصير في بدر الحين ..
في ناحية ثانية ...
ابو محمد : تغطوا ي حريم العريس بيشوف العروس ...
الحريم كلهم يتغطون --->>>
ام العروس : تفضل تفضل ادخل خلاص تغطينا ...
بدر بدون نفس : السلام عليكم .. وانصدم ... شاف اكثر من 14 حرمة بالعبايات الا وحدة في النص جالسة وعيونها بالارض ...
الحريم : وعليكم السلام ورحمة الله ...
ابو محمد يأشر : وهذي العروس ... طالعي فيه ي ابتسام ( اسمها )
رفعت ابتسام عيونها و طالعت فيه ولمن شافته رفرفت اجنحة قلبها وطار لين عنده ... اما بدر فما شاف ذاك الجمال اللي يدور عليه .. هي مو شينة جمالها متوسط وواضح شعرها
شوي خشن وخشمها كبير شوي بس واضح انها انيقة .. بدر بس لمحها لثواني وطالع في ابو محمد وقال : خير ان شاء الله .. وطالع في العروس وقال : عن اذنك ...
ومشى قدام وراح صوب مجلس الرجال ...
استغرب ابو محمد من تصرفه واستغربوا الحريم والعروس نفسها استغربت وخافت انها ماعجبته ...
قامت صاحت وراحت لغرفتها وهي تبككككككي ...
رجع بدر لمجلس الحريم وهو ساكت ...
خالد : هااااا .. بشر ...
بدر مارد ولا حرف بس تم يناظر في ابوه يبي ينفجر فيه بس محترم نفسه ومحترم ان هذا مهما كان ابوه ,,, يبي يلومه ليش يغصبه ع شي مايبيه ...
ابو بدر يطالع فيه يبي يسأله بس دخل ابو محمد وهو يطالع في بدر و سأله : وش فيك ي بدر عسى خير ؟؟؟
بدر طالع فيه وسوا نفسه مستانس و حبس الحزن والقهر بقلبه : انا ..؟؟ هه .. وعدل في جلسته : انا ي عمي ابو محمد ؟؟؟ مافيني شي ... عال العال ..
وطالع في ابوه مرة ثانية وسكت وابوه توترت اعصابه ...
ابو محمد : وش فيك طيب مالحقت تشوف عروستك مصرع ما تركت الغرفة وطلعت ؟؟
توترت اعصاب بدر ماعرف كيف يلقى تصريفة عشان ينقذ نفسه .. قال فورا : أ ... أأ .. استحيت.. استحيت وانا واقف قدام كل هالحريم ..
ابو محمد : هههههههههههههههههه .. هذا اللي خلاك تترك المجلس وتروح ...؟ اذا تبي شوفة ثانية ما امانع .. يمكن انك ماشفتها زين ..
بدر وهو يطالع في ابوه نظرات اللوم والعتاب لكن بابتسامة : لاا لااا .. خلاص شفتها ...
ابو محمد : وش ردك ؟؟؟
بدر : خير ان شاء الله ... الله يتمم على خير .. ,,, كمل بدر هالعبارة وهو مختنق حيييل حيييل البنت ماجازتله ابدا ويجامل ابوه وابوها ويضحي بسعادته ..
وهم في طريقهم للبيت تركوا ابوهم عند ابو محمد :
بدر : اللي مستغرب منه هالحريم اللي مكوشين حولها وكل وحدة بعبايتها ... اعوووووذ بالله تقول انتظار كل وحدة تنتظر دورها عند ساحرة ..
خالد : ههههههههههههههههههههههههههههههه .. وش يبون ... ومن هذوول ؟؟
بدر : مدري والله اتوقع خوات امها او عماتها او الاثنين ...
خالد : وكيف شفت البنت ..؟؟
بدر وهو ياخذ نفس : ماشي حالها .. مو ذاك الزود بس مغطية وجهها بمكياج مهرج ...
خالد : ههههههههههههههههههههههههههههههههههههههههههههههههاا ااااااي .. حلوة هذي .. المهم حلوة ولا مو حلوة وحدة من الاثنين ؟؟؟
بدر : تبي الصدق ..؟؟ اتوقع لو مرت السنين وصارت عجوز بتصير تشبه عادل امام ...
خالد : اووووووووف اجل هي تشبه عادل امام ..
بدر : مدري من بعيد شفتها كذا ... الله يستر عليها .. بس تصدق احسها شوي كبيرة في العمر ..
خالد منصدم : ييييييييييوووووووه يا ردى حظك يا خوي !!! والملكة الاسبوع الجاي ؟؟؟
بدر متضايق ومقهووور : اي والله هذي رغبة ابوي .. انا مابي اعكر مزاجي باصرار ابوي فوق راسي .. عندي الف قضية لازم اخلصها .. ابخلص من موضوع الزواج ذا
عشان اتفرغ لاشغالي ...
خالد وهو يعلي صوت الاغاني : الله يكون في عونك ... طاحت في كبدك بنت الناس هذي ....!
بدر : امين يارب . ما اقول الا الله يخارجنا ...
في ناحية ثانية .. الساعة 6
بيت ابو عبدالله مجتمعين في الحوش ويشربون الشاي ..
عبدالله : لالاااا ماشفتوووها يوم عطته يدها اليسار وهو يقول يدك اليمين .. البنت ضيييعت يوم شافته ههههههههههههههههههههه
الجميع ماعدا سارة تناظره بحقد : ههههههههههههههههههههههههههههههههههههه ,,,
هنا سارة ضربت كتف عبدالله بكل قوتها وهي تصارخ : ي حبك للفضايح ماتعرف تقعد بدون مااتعلق عاللي يصير معاي ...
عبدالله وهو يمسح مكان الضربة : ااااح ي حيوانة شوي شوي علي ,,,
ماجد : بس تبون الصراحة احس هالرجال بشاير خير لاختي ...
ابوهم : ماكنتم مرتاحين له .. سبحان الله تغير كل شي من نظرة اختكم ...
ام عبدالله : ايه والله ماشفتوها كيف كانت معترضة ماتبي هالزواج يتم .. تبي تتم قاعدة ع كبدي لين تعجز .. وغمزت بعيونها مبتسمة لعيالها تبي تقهرها ..
سارة : يمة ... !! من جدك تقولين هالكلام ؟ تبين الفكة مني يعني ؟؟
عبدالله يزكي شهادة امه : ايييييييييه ايييييييه تبي الفكة منك وش عبالك انتي ؟؟
قبصت سارة بكتف اخوها مرة ثانية وتألم وصارخ : ااااايييييي ي حمارة انا وش مقعدني جنبك . وقام ونقل جنب ابوه عشان يتفادى أذيتها له ..
ضحكوا كلهم معدا سارة وعبدالله يناظرون في بعض بحقد ..
ام عبدالله : معاذ الله ي بنيتي افكر مجرد تفكير اني ابي الفكة منك .. انتي حشاشة جوفي وقطعة من قلبي .. مدري وش بسوي اذا خلا البيت منك ..
فرحت سارة لهالكلام بس راحت ابتسامتها يوم سمعت اخوانها يصارخون : وحنا يعني عيال البطة السودا ...
ضحكت امهم وقالت : كلكم ي عيالي عينين براس ... الله لايحرمني منكم قولوا امين ..
كلهم : اااااامين ...
فجأة سمع ابو عبدالله صوت جواله يدق ... طلع الجوال من جيبه وشاف الشاشة .. رقم سعود ..
قال لهم : هذا سعود متصل ...
عبدالله يطالع في سارة وسارة مفهية وخدودها حمرا ولمحته يطالع وقالها بصوت واطي : خقيتي عند الاسم هاااااا ..
حمرت عيون سارة وبغت ترد عليه الا ابوهم يقول : هشششش اسكتوا شوي اشوف وش عنده متصل شكله شي ضروري ...
رد : الووو
سعود : السلام عليكم ي عمي ...
ابو عبدالله : وعليكم السلام ورحمة الله .. هلا هلااا سعود ..
سعود : وش اخبارك ي عمي ؟
ابو عبدالله : بنعمة وانا عمك علمني عنك عسى اخبارك طيبة ان شاء الله ...
سعود : الا طيبة وطيبة و طيبة بعد ..
ابو عبدالله : ماااااشالله ماششالله تبارك الله للاعلا ي ولدي ...
سعود : الله يسمع ويستجيب منك .. عمي .. عندي لك علوووومن زييينة ...
ابو عبدالله : هات العلوم وانا عمك ...
سعود : خلاص قبلوني موظف في البنك توهم متصلين علي ومن بكرة يبدأ دوامي ...
ابو عبدالله مستانس : الحمممممدلله الحممممدلله رب العالمين .. يعني افهم من كلامك انك تبي تسوي حفلة ملكة ولا حفلة خطوبة ولا شلون ؟؟
سعود مستحي ومايعرف كيف يقول : والله ي عمي مدري في النهاية الشور شورك وشور العروس .. بس مثل مايقولون خير البر عاجله .. وش رايك أملك عليها
والبسها الشبكة وكل شي ؟؟؟ و لمن اجهز البيت والاثاث نحدد موعد الزواج ؟؟؟ --( كل الحوار هذا وسارة وامها واخوانها منتبهييييين بشدة ويسمعون )--
ابو عبدالله ميت فرح : انت قلتها ي ولدي خير البر عاجله وانا بس علي اني ادعي ربي يتمم لكم على خير ان شاء الله .. انا بس اسأل البنت وارد لك خبر بعد شوي ..
وش قلت ؟؟
سعود وقلبه طاااير في السما : ايه ي عمي اسأل وشاور خذ راحتك ...
ابو عبدالله : طيب طيب يالا دقايق بس ..
قفل الخط وطالع في سارة مبتسم وسارة تناظر فيه تنتظره يتكلم وجهها احمر وقلبها يهابد داخلها ..
ابوعبدالله : قبلوه موظف في البنك ي بنيتي .. ويسأل اذا توافقين يملك عليك ...؟؟
ام عبدالله : وي ؟؟ مافيه حفلة خطوبة ؟؟
ابو عبدالله : هالشي يقررونه العرسان حنا مانتدخل ..
طالع في بنته وسألها : ها ي بنيتي وش قلتي ..
استحت حيل وماردت ف اللي رد ماجد يوم قال بصوت دلوووع : مووووافقة يبة ابسم بالعشرة ..
عبدالله يكمل بصوت دلوع : احوبه يبة احووووبه مااارا ماااارا ... وااااااي
طالعت فيهم سارة مقهوووووورة وتأشر بيدها : هييين هييييييين ...
ابو عبدالله مييييت ضحك : ههههههههههههههههههههههههههههههههههههه
ام عبدالله وهي تضحك : بس ي عيالي خلاص بتموتونها من الحيا ... وطالعت في زوجها وقالت : خلاص البنت موافقة ..
ابو عبدالله يطالع سارة : متأكدة ي بنيتي ؟؟؟
سارة تحرك راسها بحيا : ايه
عبدالله وماجد يزغردون بصوت يموت ضحك : كللللللللللللللللللللللللللووووووووووشششششششش
ضحكوا كلهم وسارة مبتسمة بس ... ابو عبدالله : اجل الله يوفقك يابنيتي ويسخره لك زوج صالح بإذن الله .. واتصل عليه وبلغه بموافقة البنت وحددوا يوم الملكة الاسبوع الجاي ..
الجزء الخامس قادم بإذن الله .. تابعوني ...
__DEFINE_LIKE_SHARE__
16-03-2015,
02:50 AM
رد: روايتي ( سارة و بدر )
العرض العادي
