ديوان الشاعر راكان بن بدن السبيعي

ماعاد باقي للقصيده غير نظرات الوداع

يافكر سقها والزمن بين الرجال يسوقها

والله لجنّبها عن الزلات ودروب الضياع

وأني لحفظ حقوقها مادمت اعْرف حقوقها

وأن كان ماتروي ضمى عطشا ولاتشبع جياع

ماني وأنا راكان عاشقها ولا معشوقها

سمْت سمْت لين اجزمت بأن البسيطه دون قاع

وراحت سواة الغيمه اللي تستلج ابروقها

لها من العين ومن الإذْن النظر والإستماع

ومن العقول أهل الفكر وأهل المروّه ذوقها

والها علي اروي عطشها فكر .. قدر المستطاع

عهدٍ على نفسي وأنا عيب العهود أبوقها

وأن كان ماتحمل هموم أمّه ولاحل النزاع

لاهيب من طرقي ولاني بادعٍ طاروقها

سلام منّي ياأمّة الإسلام في شتى البقاع

يا أمةٍ تِقهر وتَضحك للعداه اشدوقها

تشبّعت بالذل لين أحساسها بالنصر ماع

ولا صمد فيها لو أنّه عرقٍ امن اعروقها

وتغلغلت فيها ثقافة " عش ترى الدنيا متاع "

حتى تلاشى فعلها بعد اتساع حلوقها

أليا متى ووجيهنا تدمن على لبس القناع

ورغم المذلّه ألسنتنا تفخر بمنطوقها

وأليا متى وجروح الأمّه كل يومٍ باتساع

وحنّا نعْرف أن كل يدٍ يد ربي فوقها

وأليا متى وأفضل وسيله للهجوم أنك دفاع

وأليا متى طعم الخساره كل يوم انذوقها

احقوق الأعداء تنتزعها أعدائنا غصب انتزاع

وحنّا أمّةٍ عجزت تجيب احقوقها من عوقها

ياليتها تاخذ من الماضي وقود الإندفاع

يوم الفعل يحما مواردها ويحما نوقها

ويوم الخطر لامن تقدّم شبر تمشي له ذراع

وأرواحها لادندن الحرّاب يرخص سوقها

هناك .. ماسادت سياسات القهر والإنصياع

وهناك .. كان النصر للأمّه هو أعظم شوقها

مايبعث أمجاد الشعوب الها سوى القلب الشجاع

وأصعب من إفلاتت مكانات الأمم لحوقها

والدين طرس .. وكل مجدٍ ينثني دونه يراع

والعين مايصفا نظرها .. لين يصفا نوقها

والمجد قلعه .. ساسها يُبنى بطوب الإجتماع

وثوابت الأمه درر .. واسلامها صندوقها

وكلّش يهون .. ألا الكرامه لاتداس ولاتباع

أمّه بلياها عباةٍ ماتخاط افتوقها

وأكبر دليل أن التخلي عن مبادينا ضياع

وأن الزمن كفيل يظهر للرجال افروقها :

صرنا بعد كانت أوامرنا ليا قلنا تطاع

جنايزٍ رز الزمن نصايبه من فوقها

__DEFINE_LIKE_SHARE__

ياناشدٍ عنّي بعد غيبتي وين ؟

وتسأل عن أسباب البطا والقطاعه

أن كان تسألني بعد زل شهرين

فاخذ الجواب اللي يسرّك سماعه :

مرتاح ومريّح وحالي كذا زين

على مدار اربع وعشرين ساعه

اشفق على عِرف الرجال الميامين

وعن رفقة الهافين عندي مناعه

لاصرت متعافي 00 ونهجي على الدين

وارجي من الله الرضا والشفاعه

ومساندٍ ربعي على العسر واللين

ومرضٍ أبوي 00 ومفتخر بالجماعه

ماهمّني لو يرهق امتوني الدَين

المرجله والدِين راس البضاعه

وأغلا من كنوز الذهب والملايين :

كنز الرضا والعافيه والقناعه

وماغير ربّي 00 ثم ولاة الحرَمين

اقول لامن قال سمعٍ وطاعه

صحيح ربّي خالق الناس من طين

ومرّوا بتسع شهور قبل الرضاعه

لكنّ ميّز بينهم فـ الموازين

وكلٍ حسب عقله ونجدة اذراعه

مايستوي قدر الردي واحمر العين

ولايستوي طبع الحيا والبشاعه

مايقهر الرجال ياغير ثنتين

وماله على تعديلهنّ استطاعه

لاصار وافي شور وفعول ويمين

وطاح بزمن مايعترف بالشجاعه

المال كم وطـّا ونزّل سلاطين

وكم طال به قاصر وزاد ارتفاعه

هذي تصاريف الزمن بالبراهين

وكلٍ يترجمها بحسب إطـّلاعه

والحين اضنّك فاهمٍ حالتي زين

قل قالها راكان ماهيب اشاعه :

مرتاح ومريّح 00 ولا اشكي من البين

وذي حالتي 24 ساعه

__DEFINE_LIKE_SHARE__

شغل الفكسار أنا يافهيد ناوي

نيةٍ مالي سواها اليوم نيّه

اشهد أنه منوة القلب الهواوي

لانوى قطع الفجوج الجرهديّه

مركب اصحاب المعالي والعزاوي

ماركبه اللي رصيده دون ميّه

لو وصفه اللي على وصفه رهاوي

تنتهي فيه الحروف الأبجديّه

كن وجهه لامشى وجه النداوي

يوم شالوا برقعه والشمس حيّه

ثم تعلاّ فوق خرب وجاك هاوي

حرٍ اشقر من حرارٍ صيرميّه

والإضاءه كنها برقٍ سناوي

لاح في كبد السما وقت العشيّه

ولون بديه بين الأزرق والسماوي

والمراتب لونها لون برديّه

والخطوط تقول من كثر الملاوي

كن في نص البدي مطبوع حيّه

وأن ركبته عزتي لأم العراوي

كنْك داخل في قصور الفاخريّه

لا تزيد ولا تعيد ولا تراوي

ألا كنّك وسط برج الفيصليّه

وكن حسّه لأشتغل حس السحاوي

العنود اللي سوالفها نديّه

وأن تهادا للخطوط السود طاوي

خطرٍ أنْه يطير لولا الجاذبيّه

ذا خويّك كان تبغالك امخاوي

أشهد أنّه ماتردى في خويّه

لااستوى فالخط والخط امتساوي

زان بدعك ياللحون السامريّه

بدع شاعر محترف ماهوب هاوي

شاربٍ لإبداع شرب الشاذليّه

نص خطي صوب شعّار النداوي

وخص أبومبارك وسلمْه الوصيّه

ياسلامي عد ما غنّا الخلاوي

وعد ماهبّت رياحٍ موسميّه

وعد ماذيبٍ رقا المرقاب عاوي

وعد مابالصوت ناحت راعبيّه

يالرفيق اللي على الجزله نحاوي

وفالشرايد لك شهاده عالميّه

وش تقول بحالة المليون غاوي

والشعر عقب العصور الأوليّه

شوف حاله لاطبيب ولامداوي

ماتشالا لوكوي مليون كيّه

ابتلوه اهل الحكي واهل الرشاوي

كلّن يهدّف ذلوله والعبيّه

عنده أن ماله على الجزله امساوي

كن ربي ماخلق مخلوق زيّه

هذا وضع الشعر في عصر البلاوي

في زمان البلبله والعنصريّه

صار راعي الذود يامعيوف شاوي

والشواوي صار يملك له رعيّه

والختم ياصاحبي حل الدعاوي

مالها ألا الدوسري زبن الونيّه

__DEFINE_LIKE_SHARE__

ياحسين السجايا يافريد الخصال

الغلا تستحقه لنك اصلا هله

جل شان الولي اللي وهبك الجمال

وحطلك دون غيرك فالصدر منزله

ياقريب الوصال ويابعيد المنال

شوفتك مشكله ومفارقك مشكله

عايشن في نعيم وعايشن في دلال

بين آمر وسم ووش تبي وازهله

لك بصدري عن شموس العواذل ظلال

ادهله كل ماضاق الخفوق ادهله

هاتفي لالفاله من جهتك اتصال

كنه يقول ذبت امن الغلا والوله

سعد منهو تهقوا في وصالك ونال

مايلام الخفوق اللي بحبك دله

وسعد من ضمك بصدره كذا بالحلال

وصار بينك وبينه بالمحبه صله

كن قبري يقول اليا لمحتك تعال

لانظرك المولع بالدلع تقتله

ما تدوم المحبه دام مابه وصال

وكان عندك كلامن غير هذا قله

إتصل هاتفي لاجاه منك اتصال

قال أنا وأنت ذوبنا الغلا والوله

__DEFINE_LIKE_SHARE__

ياللي تحلّل وضعنا بالبراهين

امْن الخليج اليعربي لا محيطه

تبغى تعرف شلون قلب الموازين

وكيف الدول من حولنا مستشيطه

الغرب يرسل من جنوده ملايين

وحنّا نقول ان مشكلتنا بسيطه

ياربعنا ماهيب لحية فلسطين

الشرق الأوسط مابقاله خريطه

شارون راح وقبله إسحاق رابين

والحين رايس فالتئآمر نشيطه

وحنّا على موال ياليل ياعين

وأليا انتهى الموال نقلب شريطه

ونخضع لقول المعتدين الشياطين

وعلى بعضنا ألسنتنا سليطه

أكبر هموم المجتمع بين قوسين

(ماعندنا همّه ولا فيه حيطه)

أليا متى وأنا عن الدين لاهين

ماكنْ حوالينا المصايب امحيطه

تضحك علينا بعد قدنا الميادين

العالم المستعبطه والعبيطه

وصرنا تحت مظلّة الغرب والصين

لين الأمل قصّوا هل الغدر خيطه

تكفون ياهل السيف والحق والدين

تكفون يا اطهر أمةٍ فالبسيطه

نبغى نتوحّد في وجيه المعادين

وجرح التخاذل في جسدنا نخيطه

المشكله ماهي قضية فلسطين

الشرق الأوسط مابقاله خريطه

__DEFINE_LIKE_SHARE__

الله يبيّض وجه ذربين الأيمان

اللي ليا جات المواقف يسدّون

في شاعر المليون للشعر عنوان

وأصدق مثالٍ للملا كان يوحون :

ناصر وإلى منّه وقف وقفة حصان

وعند المواقف ماتجي وقفته دون

لاهان راسٍ يدحم الروس لاهان

فرعون شعر وفالمهمّات فرعون

شاعر ومتفرّد ومبدع وصنيان

مضمون فوزك يا ابيض الوجه مضمون

ربعك هل الغلبا وإلى قلت سبعان

والله ماترْجع وأنت يالقرم مغبون

ربعك مثل عدٍ روى ياكحيلان

وشلون تبلش دامهم فاللقا عون

ماصيدنا المليون والجيب مليان

لكنْ فوزك عن ثمانين مليون

شاعر وطن قالو لفلان وفلان

يحق للي قال واللي يقولون

وحنّا بذلنا للوطن روس فرسان

اجهر بها بالصوت وابليس ملعون

غلبا غلبنا والمواقيف برهان

ومن لا درا يدري والأجواد يدرون

تشهد لنا وقفاتنا يوم الأكوان

لأجدادنا عزٍ لهالحين مصيون

من عهد أبو تركي عسى داره اجنان

عساه فالفردوس يارب ذا النون

لا عهد أبو متعب ذرا كل بلشان

يآمر ولمرَه كلنا مستعدون

صقر العرب ريف البلد عالي الشان

الشعب كله من حسانيه ممنون

وولي عهده منبع الجود سلطان

قايد دفاع المملكه للوطن عون

ونايف وزير الداخليّه وسلمان

وأحمد لاصار الوقت ماهوب مامون

لهم ولانا زاين الوقت وأن شان

طبعٍ لنا ماننتحي عنْه ونهون

وختامها لاهنت ياذرب الأيمان

شعرك يساويله 80 مليون

__DEFINE_LIKE_SHARE__

ياللي تعاملني مثل ساير الناس

تزعل ولاتدري حبيبك علامه

اخذ الخبر مني وبثه عبر واس

وانقل تحيات المحب وسلامه

الهم غادِرني مثل غدر جساس

لكليب يومه غز رمحه وظامه

عطاه ضربه بعدها دقت اجراس

حرب البسوس ولا وراها سلامه

يلجّ قلبي كل ما هب نسناس

في صدري اللي فيه للهم شامه

لاباس ياصدرٍ حوا الضيق لاباس

راعيك لو تشكي مــ/بان انهزامه

صامد واجابه ضيقتي وارفع الراس

كلش يهون ألا تهان الكرامه

اضحك واجامل دنيتي واقهر الياس

واقابل ظروف الزمن بابتسامه

مانيب ضايق لو تقولين حسّاس

رجلٍ مافيه احساس يبقى هلامه

اعوذ بك يالله من كل وسواس

ومْن الخطا والمهزله والرخامه

لاتحسبن الضحك والضيق مقياس

كلٍ تشخَص حالته من كلامه

والله خلق خلقه مقامات واجناس

ليت الردي الله فرقه بعلامه

وأنا كذا ربي خلقني قوي باس

اضحك وصدري به تنوح الحمامه

لكنْ اخذها كاش ماعاش هالراس

أن الغلا لأعطيك ذروة سنامه

والبّسك تاج الوفا در وألماس

وصدق المشاعر لك اقدّم وسامه

هذا وإذا قدري مثل ساير الناس

حاول تجاملني ولو بابتسامه

__DEFINE_LIKE_SHARE__