روايتي ( سارة و بدر )

قبل البدء بكتابة الجزء الاول ارجو التثبيت ....

__DEFINE_LIKE_SHARE__

بسم الله الرحمن الرحيم

السلام عليكم ورحمة الله وبركاته ...

بعد ان تم الله علي بنشر روايتي ( امراء الحب ) بفضله ومنته هذا انا اعود اليكم بروايتي الجديدة ( سارة و بدر ) .. تعتبر رومانسية جميلة و درامية و مشوقة
لما يحدث فيها من امور تمر في حياتنا العادية فيها ماهو سعيد و ماهو حزين و اليم ومبكي ...
و ادعو الله سبحانه و تعالى ان يوفقني على اتمام هذه الرواية وان تحقق نجاحا مبهرا كما حدث في روايتي ( امراء الحب ) ...

-- ( سارة و بدر ) --

شخصيات الرواية بحسب الابطال ..

عائلة سالم

الابن الاكبر ( عبد الله )
الأخ ( ماجد )
الاخت ( سارة ) ( البطلة الرئيسية )

الاب ( سالم ) - ابو عبد الله
الام ( منيرة ) - ام عبد الله

عائلة ابراهيم ( اخو ابو عبد الله الاكبر غير الشقيق )

الابن : بدر ( البطل الرئيسي )
الاخ : خالد
الاخوات : شروق - وفاء - وعد

الاب : ابراهيم ( ابو بدر )
الام ( فاطمة ) ( ام بدر )

الصديقات : مروج - ليان - نورة - حنين
الاصدقاء : عادل - عمار - عبد المجيد - فواز - عبد الرحمن ..

سعود - شخصية مستقلة

(--البارت الاول -- )

تعريف ب شخصيات الرواية

توفى ابو ابراهيم ... ومرت ايام العزاء ... والحين جا وقت توزيع الارث ...

طبعا ابراهيم اخو سالم الاكبر بس كلن من ام ... ابو ابراهيم تزوج على ام سالم و كان يفرق بينهم وهم اطفال ماكان يعدل بينهم ولا بين
زوجاته وكانت المشاكل بينهم توصل للسما .. كانت الاولوية تروح لابراهيم و امه و سالم وامه و اخواته كانوا يمرون بأوقات مايحصلون الاكل ولا الشرب ..

طبعا ابراهيم تعلم الطمع والشجع و الانانية وحب المال ... و عمل المسسستحيل فقط من اجل انه يحصل على كل الارث والاراضي والاملاك الخاصة بأبو ابراهيم بدون مايترك
اي شي لاخوه سالم ... وسالم ضعيف الحيلة و قلبه طيب ... وكان بينه و بين اخوه ابراهيم مشااكل بسبب انه يبي يحصل على حقه الشرعي من الميراث لكن ابراهيم كان يتصرف معه
بحقارة كبيرة واوقات يسجنه بتهم باطلة وغير صحيحة و يظلمه غير الام توكل محامي دفاع عن ولدها مما خلاها تبيع ذهبها و اثاث البيت اللي هو حيلتهم الوحيدة و بقدرة قادر كان يطلقوا سراحه ...
فما كان من ابو بدر الا انه ينتقل بالميراث والاملاك من الرياض الى جدة وتغيير ارقام التلفونات عشان ابو عبد الله لا يقدر يتوصل له ...

و سلم ابو عبد الله امره لله ... و توفت امه و خواته في حادث عنيف جدا وهو ربي نجاه من الحادث لكنه فقد قدمه والان يمشي بعكاز ...

و انقطعت الاخبار عن الاخوين ابراهيم وسالم وصارت لكل منهم حياة ,,,

توظف ابو عبدالله بوظيفة تمكنه من انه يكمل نصف دينه ب أحدى الوزارات .. شهادته الجامعية ساعدته في انه ينقبل بالوزارة و الحمدلله صار مكسبه متواضع من الوزارة و فورا فكر بالزواج و عرض عليه احد الاصدقاء
انه يتزوج اخته لان لقى فيه الصفات اللي يتمناها كل شخص لاخته ... طيب ويخاف الله و مقيم الصلاة في اوقاتها ,, و شديد العزم و الاصرار رغم الاعاقة ..

و تقدم سالم ل منيرة .. بنت حلال وطيبة وتخاف الله و تزوجها و حبته من كل قلبها بعد زواج تقليدي وموافقه ابوها واخوانها ..

و رزقه الله سبحانه وتعالى ب اطفال مثل الورود ... ولدين و بنت يشبهون امهم الجميلة في كل شي .. وحبهم سالم و حس ان الدنيا ابتسمت له بعد ماكون عائلة صغيرة وكانت السعادة بالنسبة له ماتوسعها
الكون .. سماهم ( عبد الله ) و ( ماجد ) و البنوتة سماها ( سارة ) على اسم امه المتوفية ...

عبد الله يكبر اخوه ماجد بسنتين و خالد اكبر من سارة ب ثلاث سنوات ,,

اما ابراهيم ف تزوج من فاطمة بنت احد كبار رجال الاعمال في جدة و رزقه الله ب بدر و خالد و شروق و وفاء و وعد ..
وكانت عيشتهم كلها ترف و رفااااهية يعني فوق الريح و ب اموال بعضها مو من حقهم لكن الابناء ماعندهم اي علم ان ابراهيم عنده اخ عايش و اكل حقه في الميراث
كل اللي يعرفوه ان اخوه مات في حادث سيارة مع انه يدري انه عايش و يرزق لكنه اخفى عنهم هذي الحقيقة ... فقط اللي كان عندها علم انه عايش هي فاطمة زوجته و محذرها تحذير
شديد من انها تتكلم .. والا راح يحرمها من حقها في ابناءها ... ومن حقها في الترف و الرفاهية ...

و مرت السنوات ومرت ..

و كبروا ,,

عبد الله الان في اخر سنة بالجامعة و يحضر للدكتوراه .. عمره ( 26 سنة )
ماجد الان تخرج من الكلية العسكرية و عينوه فورا في المباحث الجنائية .. عمره الان ( 24 )
اما سارة الان ف كبرت وصار عمرها 20 سنة .. تدرس في الجامعة و حابة انها تصير صحافية لانها تعشق هالمجال ..

عبد الله شاب وسيم و جميل يملك بشرة حنطية ... طوله 176 و جسمه متوسط ماهو سمين ولا نحيف ... قلبه طيب وحنون لكنه شوي عصبي بعد ماعلمهم ابوهم عن حقيقة عمهم ابراهيم
وصار تفكيره بس كيف يتوصل له ومايدري وينه ف اي منطقة في السعودية عشان يروحله و يتفاهم معاه ...

اما ماجد ف جسمه شوي رياضي و يملك بشرة حنطيه و يشبه اخوه لدرجة كبيرة جدا ... بس ماجد شوي اطول من عبد الله ... رومانسي وحنون وهو بعد عصبي شوي نفس حال اخوه يبي يتوصل
لعمهم الطماع

سارة بنوتة جميلة جدا .. بشرتها فاتحة و جسمها رشيق و عيونها واسعة وشعرها اسود و طويل و نااعم جدا ... تعشق السفر وتتمنى تزور دول اوروبا .. رومنسية و
طيبة جدا و تمتلك حنان كبير نفس حنان امها ...

اما سالم الاب ف ماكبر كثير يعني وصل عمره ل 54 سنة و ظهر الشيب في راسه و وزنه زاد شوي مع مرور الزمن .. ومازال يمشي على العكاز ..
و منيرة صار عمرها 50 و تتمنى تزوج عيالها و تشوف عيالهم هذا مناها الوحيد قبل لا يوافيها الاجل بحسب تفكيرها ...

نتعرف الان على ابناء ابراهيم ..

بدر صار عمره 27 .. تخرج من كلية الحقوق و صار محامي كبير مشهوووور في حل القضايا الصعععبة والعسيرة ومطلوووب عند الجميع ... متميز بحماسه
الشديد لمهنته وحبه لها .. جسمه حلو ومتناسق بالنسبة لعمره .. كل البنات يتمنون
انهم يملكون قلبه بسبب وسامته وملامحه الهادئة ... و لهم محاولات معاه لكن ماشاف من اي وحدة فيهم البنت المناسبة عشان ياخذها حبيبة له و بعدين يتزوجها ... ابوه يبي يزوجه ببنت احد وجهاء
المجتمع لكن بدر رافض هالفكرة لانه يبي يتزوج انسانة من اختياره يعيش معاها قصة حب لانه مايحب فكرة الزواج التقليدي ...

اما خالد فهو بعد يدرس ف الكلية العسكرية .. عمره 23 سنة ... يحب السباحة كثير و يعشق افلام الرعب و كان طموحه يصير ممثل تلفزيوني لكن ابوه
رفض هالفكرة ف اتجه للمجال العسكري .. طيوب جدا و راعي حق وواجب ومستحيل يفكر في يوم انه يظلم او يسبب بذرف دموع اي احد ... يعني جدا خلوق ومتواضع .. و وسيم
لكن مو بنفس وسامة بدر ...

البنوتات شروق ووفاء ( توأم ) ووعد ..
مازالوا يدرسون ... شروق بتخلص الثانوية هي ووفاء .. ووعد مازالت في المتوسط ... البنات اهتماماتهم وحدة .. مكياج و اسواق و حب للموضة و
الاشياء المعروفة اللي يحبونها البنات و الاغاني والرقص والكشخة ..

الاب ابراهيم .. وصل عمره ل 60 سنة ... شاب الشعر و صار صارم اكثر واكثر مع ابناءه في قوانين في البيت .. مدلع بناته ويحبهم جدا ويخاف عليهم من اي نسمة هوا ...
ويلبي كل طلباتهم بدون اي اعتراضات ... لكنه شديد شوي مع بدر و خالد ..

اما فاطمة ف تعشق الاناقة ومتهتمة بجمالها و لها وعندها صالون تجميل خاص لها بفيلتهم اللي يسكنون فيها فيها مجموعة بنات من اندونيسيا محترفات في التساريح والمكياج ..
وشايفة نفسها حيل حيل مو اي احد تعقد معاها صداقة الا الحريم اللي لهم مكانة كبيرة في المجتمع .. وتتمنى تشوف بناتها في يوم وصلوا لمستواها في الاناقة لكن بناتها حياتهم
مثل حياة اي بنت يعشقون انهم يعيشون حياة الفلة و الوناسة مايحبون اي تقييد ..

ندخل الان في احداث و تفاصيل رواية ( سارة و بدر )

دخلت ام عبد الله غرفة سارة و شافتها وهي تقلب في مجلة وقالتلها : سارة ابيك في موضوع مهم ..
قفلت سارة المجلة وطالعت امها باهتمام شديد و بابتسامة ( امريني يمة وش بغيتي .؟ )
قفلت ام عبد الله الباب و جلست جنبها فوق سريرها الصغير والمتواضع و طالعتها بابتسامة كبيرة وهي تمسح على شعرها ( الحين ي بنيتي انتي ماشالله عليس صرتي عروس
وش زينك ... و اتوقع انك عجبتي وحدة من الحريم يوم رحنا عرس ولد ام فايز جارتنا ...
سارة مستغربة : يمة ... وش فيك ؟؟؟ مب قايلتلك انا الموضوع هذا مابي ينفتح .؟؟ لين اخلص دراستي واتخرج ؟؟
ام عبدالله .. حبيبتي وش بلاك اصبري اكمل كلامي وبعدين تكلمي ..؟
سارة وهي تطلع انفاسها من صدرها بصبر : تكلمي يمة .. اسمعتس ...
ام عبدالله : تعرفين ام حسن ..؟ اللي كلمتنا تبي مننا نروح بيت بنتها عشان نرتب الدبش اللي شرته بمهرها في بيتها الجديد .؟؟
سارة باستغراب : ايه وش فيها ...؟؟
ام عبدالله تمسك كتف بنتها وهي مستانسة : طلبتك مني قبل شوي لولدها سعود على سنة الله و رسوله .. ابوك موافق بس قال ناخذ رايك ..؟
سارة فتحت عيونها وهي تحذف المجلة على السرير : يمممة ... هماني قايلتلك للمرة الالف وهذي المرة ال 1 بعد الالف انا ما افكر في الزواج ...؟؟ وش فيكم علي انتي وابوي تبون الفكة مني ؟؟
ام عبدالله مصدومة بس متوقعة ردة فعل بنتها : حبيبتي يا بنيتي انتي يا قطعة من قلبي ... انا ابي اشوف عيالك قبل لا اموت تكفين ..
سارة متروعة : اسم الله عليس يمة اسم الله عليس .. عسى الله يطول في عمرس .. باقي انتي صغيرة و العمر قدامك ... لكن انا مأجلة فكرة الزواج لين اتخرج من الكلية ... وبعدها يحلها
رب العالمين ...
ام عبد الله : والنعم بالله يابنيتي .. لكن انا متمنية اني اشوف عييلتس وانا امتس وهم يراكضون حولي و الاعبهم ... اشتقت اضم طفل على صدري .. تبين تكسرين بخاطري ؟؟
سارة وهي تناظر امها و الموضوع مرة مو عاجبها .. : طيب يعني والحل يمة ؟ انا عندي شهادتي اهم من الزواج .. و ابيها اكثر من اي شي ثاني ...
ام عبدالله : طيب طيب .. عندي لس فكرتن زوينة .. وش رايتس ي حبيبتي تشوفين المعرس .. شوفة شرعية .. منها تتعرفين عليه ومنها اتوقع تغيرين رايك .. وانتي تعرفين سعود ماشالله عليه
كامل والكامل الله سبحانه وتعالى .. - قربت منها و مسكت كتوفها - ها حبيبتي وش قلتي ..؟؟
سارة وهي مستسلمة ومو عاجبها : اتركيني افكر يمة .. لكن لاتتفاجئين اذا رفضت ... بدون ضغط يمة تكفين ...
ام عبدالله مبتسمة : على خير حبيبتي على خير ... ان شاء الله يتغير رايتس و توافقين ..

طلعت ام عبدالله من غرفة سارة و انشغل بال سارة من جديد .. جلست تقلب في المجلة وهي معصبة وتقول : يعني امي وابوي مستحيل يغسلون اياديهم مني ..
مليون مرة اقولهم ما افكر في الزواج الحين ومصممين اني اطس بيت رجلي .. وش هالحال ياربي ... لكن هالمرة برفض ماافيه اي مجااااال ...

بعد اسبوع ...

دخلت ام عبد الله غرفة سارة وهي معصبة : سااارة ... و بعدين معاك .؟؟ الحرمة امتحنتني كل شوي متصلة ها وش راي بنتك وافقت ولا ماوافقت ..
يابنيتي لانعلق الحرمة ولانعلق ولدها خلي هالموضوع ينتهي على خير ... ؟؟
سارة متفاجأة وفرشة الشعر بيدها : يمة انتي ليش مصررررة اتزوج ..؟؟ يمة انا والله العظيم ما افكر في الزواج لا من سعود هذا ولا من غيره .. انا يالله اشيل هم نفسي تبين اشيل هم غيري ..؟
ام عبدالله : قلنالك يمة شوفة شرعية شوووووفة شرعية وبعدها قرري تبينه او ماتبينه ... ماهي بهالصعووبة هذي ؟؟؟ ليش مصعبة الامور انتي ؟؟؟
الحرمة تبي قرار الليلة و بكرة يجي سعود يشوفك شوفة شرعية ...
سارة وهي تطلع هوا من صدرها بصبر : خلاص يمة خلاااااااااص .. قوليلها طيب لكن لاتتأملون مني شي .. من الحين يمة اقولك لاتتأملون مني شي ...!
طالعتها امها بصبر وقالت : خير ان شاء الله .. خير ... وطلعت وقفلت باب الغرفة ...
جلست سارة فوق السرير وهي تردد : لاحول ولا قوة الا بالله .. لاحول ولا قوة الا بالله ...
طالعت جوالها و قررت تتصل على وحدة من صديقاتها ( مروج )
ردت مروج : هلا سارة
سارة : هلا بك مروج .. كيفك عيوني شخبارك
مروج وهي قدام المكيف تحاول تشم هوا منه لانها شامة ريحة البيت طبخ دسم لحم و زفر وهي تكره الاكل الدسم : الحمدلله بخير ومو بخير ...
سارة وهي تضحك : ههههههههههههههههههه .. ليش مو بخير سلامات ..؟؟
مروج وهي تقفل خشمها : يا بنت هلكوووني بهالريحة مدري وين اروح ... الريحة ذبحتني ذبح .
سارة : ههههههههههههههههههههههههههههههههههههه .. ريحة زفر اكيد ...؟
مروج : ايه والله ريحة قااتلة ...
سارة : طيب اطلعي الحوش ولا روحي عند جارتك ليان ..؟
مروج : مو ليان الزفتة عندي ومستمتعة بالروايح ... ( ليان تضضحك )
سارة : هههههههههههههههههههههههههههههههه بعد !! لا لا حالتك صعبة جدا يبيلك منوم
مروج : وش السواة بس انا اكره العزايم تصير في بيتنا بسبب هالروايح .. و تذكرت مروج : سارة وش فيك ترا حاسة
صوتك مهو عاجبني .. وش صاير معتس علميني ...؟؟
سارة : انخطبت ...
مروج مستااانسة : اححححلفي ..؟؟؟
سارة : والله العظيم و بكرة الشوفة الشرعية ...
مروج : ومن هو سعيد الحظ اللي بياخذك لعالمه الرومنسي ...؟؟
سارة وخدودها حمرا ومقهورة : مروج عن الهبال ...! اكلمك من جد ..
مروج : طيب من سعيد الحظ .؟؟
سارة : اسمه سعود .. يصير ولد وحدة رحنا زواج ولد جارتها وشافتني وعجبتها ...
مروج فرحاااانة : نيالك نيالك ي البي .. ان شاء الله يطلع يشبه شاروخان
سارة وهي فاتحة عيونها بقوة : نننننننننعععععم ؟؟؟ مالقيتي الا هذا تشبهيه في المعرس ..؟؟ تعرفيني ماحب الهنود ..
مروج : بالعكس شاروخان فللللتة .. رهيب وحليو وابي اتزوج واحد يشبهله ..
سارة : طيب طيب انقلعي وراي الحين شغل بروح اخلصه ..
مروج : لاتنسين الاستخارة .. صلي استخارة وتوكلي على الله ..
سارة : والنعم بالله .. يالله مع السلامة
مروج : مع السلامة ..

ليان : وش فيها سارة
مروج وهي تهف بالهوا صوب وجهها : انخطبت , و بكرة شوفتها الشرعية ,,
ليان : غريبة مع انها كم مرة ترفض لكن اهلها شكلهم مصرين خايفين تعنس ...؟؟
مروج : امها متشققة تبي تشوف احفادها ..
ليان : يالله ان شاء الله ربي يوفقها ويسعدها مع اللي تقدملها ,,

في ناحية ثانية

دخل بدر و بيده اوراق كثيرة ومعاملات وصلته من المحكمة يبي ينهيها ...
عطى الاوراق للشغالة وقالها حطيهم فوق الطاولة بغرفتي وجهزيلي الحمام ابي اخذلي شاور ..
طلعت امه من المجلس وشافته واقف ويقلب بالجوال .. سالته : انتهت القضية ولا باقي .؟؟
بدر : لا والله يمة مطولين شكلنا ... الام تبي ولدها وزوجها رافض يرجع لها ولدها .. توه رضيع محتاج لامه ...
ام بدر : لاحول ولا قوة الا بالله ..
مااااعلينا .. عندي لك موضوع اتمنى انك توافق عليه .. ابوك قالي اكلمك عليه ...
طالع فيها و هو يدري وش الموضوع لكن خاف انه يطلع غلطان وقال : قولي يمة بسرعة لاني مو فاضي وراي الف شغلة لازم اخلصها ...
ام بدر : ابوك يبي يزوجك بنت ابو محمد ال (...) ويقولك فكر ترا الموضوع مايتفوت ...
بدر : البنت ماتتفوت ولا الصفقة يمة ..؟؟
ام بدر تناظر : ..........
بدر معصب : يمة وش قايل انا بالنسبة لهالموضوع .؟؟ ليش انتي وابوي مصرين تتحكمون في حياتي وتختارون لي اللي انا ما ابيه .؟؟
ليش ماتتركوني اختار البنت المناسبة ..؟ في النهاية انا اللي بتزوج مو انتم ؟؟
ام بدر : يا بدر انا هالموضوع طفشني ابي ابوك يقفله ومو راضي يقفله لين ياخذ موافقتك ويقول اذا ماوافقت بالطيب بيخليك توافق بالغصب ...
بدر : خير وش بالغصب ... ترا والله العظيم اترك البيت لكم واشوف لي مكان ثاني ابتعد فيه عنكم ...
ام بدر : وش هالكلام وانا امك ... ماتقدر تسويها ...
بدر معصب : والله اذا قفلت اخلاقي بالمرة توقعي الاسوأ ... ابوي زودها معي ترا !!!!!
ام بدر وهي تمسك يد ولدها : حبيبي انت ساير ابوك ... انت تعرفه اذا حط شي براسه يسويه ..
بدر : يعني عشان الصفقة يروح يغامر بمستقبل ولده ؟؟؟ لهالدرجة انا طايح من عيونه .. لهالدرجة رغباتي و افكاري مو عاجبته ...
بنقالي انا عنده عشان يحرك فيني على كيفه ..؟؟ لاا يمة لاااااا .. قولي لابوي بدر مو موافق و بنت الناس هذيك اذا ابوها مستعجل ع زواحها يدور لها
زوج غيري .. انا ماني لعبة بين يدين ابوي وخويه عشان يلعبون فيني ع راحتهم .. سكت شوي وبعدين قال : عن اذنك بروح اخذلي شاور و اطلع للمكتب ..
امه : تغديت طيب ؟؟
بدر : تغديت وانا راجع شريت لي شاورما ... عن اذنك .. تركها وطلع لغرفته ..
دخل خالد وهي يشيل طاقية البدلة العسكرية من راسه وسلم ع امه بحنان وهي استانست لمن شافته حضنته وتقول هلا بوليدي هلا
بحبيبي الصغير .. شلونك يمة عساك بخير ..
خالد : انا بخير يمة .. انتي وش مسوية ..؟؟
امه : انا بخير دامك انت واخوك وخواتك بخير ..
خالد مبتسم : فديتكم والله ...
ام بدر : ها حبيبي اخلي الخدم يحطونلك الغدا ؟؟
خالد : ياااليت ي يمة حدني بطيح من جوعي ..
ام بدر : يخخخسى الجوع الله لا يذوقه لا لغني ولا لفقير ... الحين السفرة تجهز ..
راحت من قدامه بكامل اناقتها وهو طلع لغرفته عشان ياخذله شاور ...
شافوه خواته وهو طالع قاموا سحبوووووه لغرفة شروق ووفاء .. تفاااجأ هو منهم و لمن قفلوا الباب طالع فيهم وقال : عملية خطف هذي صح ؟؟؟
طالعوا في بعض و فطسوا ضحك مع بعض : هههههههههههههههههههههههههه ...
خالد : يالله لك الحمد على نعمة العقل .. قولولي وش ورا عملية الخطف هذي .؟؟ وراكم بلا والله اعلم ...
شروق وهي تخبي الضحكة : نبي ناخذ رايك في شي مهم ... وخايفين امي تعارض الفكرة ...
خالد : يعني تبوني اكلمها .؟؟
وفاء ووعد مع بعض : ايه ايييييييه تكفى ...
قال وهو رافع راسه لفوق وبعين المتكبر : ووش المقاابل ..؟؟؟
تضايقت الصغيرة وعد : تككككككككفى انا اكثر وحدة ابي هالموضوع توافق امي عليه ..
رفع يده وقال وهو شامخ راسه لفوق : بوسوا يدي بالاول يالا اشوف ...
شروق : وش ذااااا .. تبي تذلنا انت ؟؟؟
رجع يده و قال وهو يتوجه للباب : اجل يالا باي بروح اخذلي شاور ..
ولمن راح صوب الباب مسكوه الثلاثة البنات من يدينه و صارخوا : لاااااااااااااااااااااااااااااااااااااااااااااااا ....
مسك خالد نفسه عن الضحك وقال وهو يرفع يده : يالا كل وحدة تحط توقيع براطمها فوق يدي .. انقهروا وحطوا تواقيعهم ( هههههههههههههههههههههه )
هنا فتح بدر الباب و متروع : وووووش فييكم ووش هالصياح .؟؟ صوتكم زلزل اخر الشارع ؟؟؟
سحبته شروق هو بعد و قفلت الباب و قالتله ادخل بما انك جيت و سألت ف لازم انتم الاثنين تكلمون امي عساها توافق بس ..
استغرب بدر وطالع في خالد وهو يهز راسه بمعنى ( وش السالفة )
خالد : حتى انت خطفوك يامسكين ...
بدر : خطفوني .. الله لا يبلانا .!!
خالد : يقولوون وراهم سالفة كايدة و يبون امي توافق عليها
بدر وهو يناظر خواته وشاف وجوههم البريئة و رق قلبه عليهم و ابتسم وفهم وش يبون ...
قالهم : ماوافقت صح ..؟؟
البنات الثلاثة مع بعض بوجه حزين يحركون راسهم بمعنى ( لا )
خالد يطالع بدر ويقول : يعني انت عندك علم بالموضوع اللي يبوني اكلم امي فيه ؟؟
بدر : كلمت امي البارح .. يبون يعزمون صديقاتهم المسكينات نورة وحنين و الشلة حقتهم هنا .. بيسوون بارتي صغير بمناسبة عيد ميلاد وحدة
منهم ولأن هالبنيات ع قولة امي مو من مستوانا ولا من طبقتنا رافضة استقبالهم في البيت ..
خالد ناظر في اخوه وقال : يعني انت ماتعرف امي ي بدر ...؟؟ همس له : تحس ان محد مثلها في هالدنيا ..
بدر : هي تقول البنات هذول يفشلون و ماعمرهم شافوا النعمة .. واذا دخلوا هالبيت مو عشان البنات .. لا هذول حاطين عيونهم على الخير اللي حنا عايشين فيه ...
خالد : حرام تقول كذا والله العظيم ربي ماراح يبارك في هالنعمة ان ما احسنا استخدامها .. تروح امي تتلفظ بهالكلام الرجعي ..؟ هذا وامي جامعية كذا تقول فلاعتب عالجهال ...
بدر : انا من ناحيتي لاهمتني هالفلوس ولا همتني هالنعمة ولا افكر في هالموضوع ..
انت تدري ان ابوي مصر اني اتزوج بنت خويه ابو محمد عشان لاتطير عليه صفقة ب 600 مليون ريال ... يعني يبي يبيعني ب 600 مليون ...
خالد : لاحووووووووول ولا قوة الا بالله ... يعني ابوي مصر تتزوج بنت هالرجال عشان هالمبلغ .. تبيني اكلمه لك ؟؟
بدر : واللي يرحم والدينك اييييه كلمه ان شاء الله بس يقتنع ويشيل من راسه هالفكرة ...
خالد ابشر .. الليلة اذا قعدت معاه بكلمه .
البنات : تزوجوا حنين ونورة .. ينفعونكم .. - ( خالد يوم سمع اسم حنين خفق قلبه )
بدر : انتم بعد لاتسوون مثل امي وابوي تزوجوني على كيفكم .. اقفلوا على هالموضوع ..
سكتوا و بعدين خالد قال : بنكلم لكم امي ولا يهمكم اذا خلصت منها جيتكم وعلمتكم ..
فرحوا الثلاثة وحضنوا اخوهم مستانسييين حيل ومتشققين من الفرحةة ...

تابعوا المزيد من الاحداث في الجزء الثاني .....

__DEFINE_LIKE_SHARE__

روايه رااائعه وسيناريو اروع
ما شاء الله علييييك مواهب متعدده
بانتظار الجزء الثاني للروايه الجميله
تم التثبيت .. وروايه تستحق التقييم
تقديري __DEFINE_LIKE_SHARE__

قريتها كلمه كلمه
لازلنا في المقدمه وننتظر الاحداث القادمه
تسلم يمينك اشجان وحمستينا
اشكرك __DEFINE_LIKE_SHARE__

شجونه ذكريني اذا نزل شي جديد __DEFINE_LIKE_SHARE__

لي عودة ياشجونة

_ يعطيك العافية
__DEFINE_LIKE_SHARE__

الصامد
اشكرك جزيل الشكر على دعمك للرواية ... انتظر الجديد ...

__DEFINE_LIKE_SHARE__