ديوان الشاعر اسعد الروابة

قرّب العيد وحدي في شموس الكلام
بالمراقيب اغني وآنا توّي جريح

الفضا ضايق ٍ بي جيت افج الزحام
والمبــاني قبور اتْضم الاحيا وْتْصيح

في زحام الشوارع لو ينوح الحمام
الهديل المُعّتَق يسمعونه فحيح

كيف ابلقى عيوني والأماني ظلام؟
وكل نجم عشقته قبل اضمه يطيح !

قمت ادوّر بوجهي عن زمان السلام
وبالوجوه الغريبه عن مكانن فسيح

ريحة الطين وجهك, وجهك اللي ينام
في (قواويش) حزني , بالمكان المريح

ابدويٍ خـــذتّه... فلسفات الرخـــام
راح يصنع زخارف بالكلام الفصيح

عنده العيد ..فجر,ودق نجر,وخيام
سكر احمر , وعطره ديدحانٍ وشيح

خص يومٍ يغازل راس عليا غمام
أو يصافح قدمها عشبٍ اخضر وريح

قرب العيد مدري من متى وْكم عام
واجمل الشعر يصبح عند حسنك قبيح

باكر العيد مدري وين طار الكلام
من بساتين قلبي وآنا توّي جريح

يعني العيد باكر ! كيف اصدّق وانام ؟
عيد من دون وجهك..كذب ماهوصحيح

2010 __DEFINE_LIKE_SHARE__

كثر البشو ماحبوا الشيخ زايد

• عيني تقول وكل مابي لك ايْقول
• .............. ...اعلنتها لك بالحكي والقصايد
  
  احبك افهم ماتبي السالفة طول
• ............... ...وانت الذي طولتها بالوعايد
  
• 
  تبي دليل الحب يافارع الطول
• .......... ...وانت بصدر شيخات شعري قلايد
  
  شفني من الحول بطواريك للحول
  
• ................. كتبت فيك من القصيد الفرايد
  
  والفرحه اللي يوم الاقيك مدلول
  
• ...............وايضاً دليل الدمع فوق الوسايد
  
  كم عيد مر ومرت احلام وايْحول
• .............. ... الخوف عن لانلتقي ونْتعايد
  
  ادري تبيني بس انا صدق مذهول
• ............. ...دوم تْخَذلني بالكرب والشدايد
  
  اليا متى وانت بنواياك مجهول
  
• ............. نوب اتّْبسم .. نوب عني تْحايد
  
  وانا احبك وارفع الصوت وآقول
  
• ....................حبك تسيّد كل ماكان سايد
  
  يعني احبك حب ماهوب معقول !
• ............. ...لو انشره تضيق فيه الجرايد
  
  ولا ابالغ اليا قلت احبك يــ مجمول
• ............. ... كثر البشر ماحبوا الشيخ زايد

2008

__DEFINE_LIKE_SHARE__

قلبي وش يرده

عادتي ليّـن معـه واحيـان قاسـي
ارخـي الحبـل بهـواه وثـم اشـده

قال تنسانـي وقلـت الحيـن ناسـي
اختبرتـه بالمـزاح وجـاب جــده

طاح ماكنّه علـى القـاع مْتواسـي
قال من عذب الكـلام وقـال ضـده

ليـن ضجـت طاولتنـا والكراسـي
بحت سدي وانتفضـت وبـاح سـده

وصحت به يكفي ترى (صدّعت راسي)
وموعـدٍ ياثقـل دمـه قلـت عـدّا

وافتقدته وافتقـدت احلـى الأماسـي
وفرْحي اللي منْه انا كنـت استمـده

وانتظرتـه ليـن ماوصّلـت ياسـي
ووصّـل الصبـر بْمعاناتـي لـحـده

واتصلـت وردلــي ردٍ سيـاسـي
قال صوتـك ماسمعتـه صـار مـده

ليتـه اللـي قـال اباذوّقْـك كاسـي
ليتـه معّصـب علـي والا تـحـدى

قلت راحت نبرة الصـوت الحماسـي
وبكْيَك اللي مـن علامـات المـوده

قال لي ياخـوي غالبنـي نعاسـي !
وكنـه اللـي وقّـف انفاسـي بيـده

كان ينبيني مثـل عقلـي حْساسـي
صدتـه هـذي مهـي بّايـات صـده

قلت رد لصاحِبَـك يـا اعـز ناسـي
قال لو رديـت ..قلبـي وش يـرده!

2011 كانون الثاني

__DEFINE_LIKE_SHARE__

في دار زايد
في دار زايد فرايد عاجز اكتبها
.... لوّ انّ الافكار تْتْزاحم وتبرالي

ماهي غريبه على قلبي واعيش ابْها
.... من أول العمر كانت قبلة آمالي

ولانيب هايب خيول الشعر لاهْذبها
.... بس الأمارات أكبر من سكن بالي

كم يعطش الشعر لاوصّل مشاربها
....بالشاعر اللي شرب من ميّها الغالي

عروسة المجد والتاريخ يخطبها
... في كل صفحة لها رتبة ومنزالي

وش يكتب الشعر عن سبعة كواكبها
... وعن سبعة اقمار صفوة قوم ورجالي

مرحوم ياللي بحنة طيب خضّبها
...جدايل العز ..واضحت مضرب امثالي

فرّق حدود الوهم ..وحدّ مضاربها
... عسى بقبره نسايم طيب وظلالي

وبيارق العز رفّت عقب صاحبها
بكفوف قرمٍ يسوم العالي العالي

خليفه اللي رقا واعلى مراتبها
...لين اول المجد حازتّه الى التالي

ياعل شمسٍ بها ماشوف مغربها
وتبقى منارة امل يارب ياوالي

ياعل شمسٍ بها ماشوف مغربها
..وتبقى منارة أمل يارب ياوالي

2011

__DEFINE_LIKE_SHARE__

تجار الذهب

ياصاحب الظل المُِنيف
.....حزين انا وانت السبب

بالهون ياراع النصيف
........اقصر مسافات التعب
احس بظلوعي وحيف
... برد اصْفري , مدري لَهَبْ

صار الشعر مثلي نحيف
..........وهذا دليل انيّ أحب

ياليت مامرّ الخريف
...........وذبّل عناقيد العِنَب

مفتون واحساسي رهيف
.....والحب في عرفك شَغَبْ

أحساس يجعلني سخيف
......لاقلت لي يمكن ! حَسَبْ!

احساس ختيارٍ كفيف
......بيته ورى ((قلعة حلب ))

ياقف على جال الرصيف
........ والناس ملهيها الطَرَب

يستجدي العالم رغيف
...........واتْصّد تجار الذهب

ياصاحبي عبداللطيف
......... قله غَلَبْني وانْغَلب

بس اشكره عنّي وضِيف
....... بيتين أو كلمة عتب

لو انّْ جرحه مايخيف
..... ماحرّك الريح القصب

والشعر صدقني نزيف
..... والجرح للشاعر سبب

يصبر على الجرح الخفيف
..وقد ماكُبَر جرحه كتب!



2011صيف __DEFINE_LIKE_SHARE__

كل الامور محلولة

شقول مدري عنك.. ياراهب الصمت
حيرتني والليل يرخي سدوله

(عكاضتك شبرين) من يوم سلمت
سويتنا بين المحبين (هوله)

لا بشّ وجهك للقا ....ولاتكلمت!
والليل ثاوي والخطاوي عجوله !!!

والله لو منت بخفوقي تيتمت
وانك وحيده .. من زمان الطفوله

لاقول لك من قبل تقعد توهمت
منت الذي كنت آترجى وصوله

وش فيك حتى عن سحور الحكي صمت !
ماكّن به ما بيننا .....ما نقوله

وانا الذي ياما معك همت وحْلمت
بنّا سوى نبني من الحب دوله

خابرك لاضاقت عليك وتألمت !
تقتل عصافير الغرام بسهوله

بالمختصر لارف جنحك ولاحمت !
وايديك في صدر الكلام مغلوله

خل الزعل لاتْعكر الجو بالصمت
افرد حجاجك ياعريب الحموله

بالله قلي وش يصير ان تبسمت؟!
بس ابتسم.. كل الامور مْحلولة
__DEFINE_LIKE_SHARE__

تثاوب الصبح

تثاوب الصبح ..ماللدرب من تالي
يا آخر الدرب خلصني من اولته

لازلت احايلْك وآمالي هي آمالي
والجرح شلته وبعده مثل ماشلته

راح اكثر العمر ضيعته من هبالي
مابين حملٍ ثقيل وحلمٍ اولته

واللي يزيد قْهري ويقطَع اوصالي
بالقلب نصف الحكي للحين ماقلته

آحاول ارقى عن الذكرى وترقالي
آحاول اقرب من النسيان ماطلته

ويسريبي الوجد احس برجفة ظلالي
مايخجل البرد جمرٍ بالحشا اشعلته

يافاخر الحسن من حدوك عذالي
هانت عليك الدموع وجرحي اهملته

وتركتني في مهب الشوق ولحالي
بلا وداع وعليك الدمع سيلته

ارد مني العزا عني ...وتبرالي
قطعان حزني حنين القلب واسألته

قلبي ...ويبقى العتب وان قال لك غالي
من وين جبته ..وشف ولوين وصلته

ياطاير الشوق وش جابك على جالي
رميت عشك على جرحي وثقلته

فتحت باب ٍ يجيب الريح في بالي
وشلون مدري ؟ وانا يادوب قفلته

شفني بنصف الدرب والآخر قبالي
لا قادر ارجع ولالي في مواصلته

تقول دربك وعر وآقول عزالي
اشوف يومك تبي بيديك سهلته

والا عزيز النفس يالمترف السالي
ماذلته فرْ قِتًك لو كنت ذللته

والنخل ماينحني ويموت بالعالي
وش عاد لو سْعفه للقاع ميلته

الشمس نامت وبانت وحشة التالي
يا آخر الدرب ..رجعني على اولته


2008 الشهر 9 __DEFINE_LIKE_SHARE__