【 علي عسيري 】

[ لا تـسـافــر ]



لاتسافر

قلتها وبقلب صابر
قلتها لأني مهدد
وانتظر بعدك مشاكل



أنتظرك بخوف قلبي
ورعشه تسكن بالكفوف

انتظرك وماي عيني
لمعها مثل السيوف


وآتحرق
وآتشوق
واتحرى جيتك
رغم الظروف


ياغناتي
ياهواي وصافي الود بحياتي
ياطفل مولود ساكت


لو تغيب
أعلن مماتي!




أعرف إن العاطفه
كانت سلاحي

والعواطف في زمنّا
للأسف أضعف سلاح



أعرف ان العاصفه
إنت وجراحي
والعواصف والسفر
عمق الجراح



لاتسافر
لاتسافر
لاتسافر

مااظن بعدك
بتشرق زهرة ٍ
تعبد صباح


أنا ماودي تسافر
لأن

طاري السفر
سمي
لأنه يالغضي
همي



وصرت أتنفسه حسرات
وصرت أخاف من بعدك
من أول مره كلمتك
عرفت إني أبيع النور
واهدي لخافقي آهات



وهذا ماكفى قلبي
ولكن ضمّك بلهفه
وسوّى خطوتك بسمات



وإنت اليوم
أو باكر

تبي تسافر!!

تبي تخلي الفرح فيني
جريح ويكسر الخاطر


أنا ماودي تسافر


السفر خلّى المشاعر
تنتطق بحلو الكتابه

والسؤال الصعب دايم
تنتحر فيه الاجابه

اسألك بالله
ياللي تمنح لقلبي عذابه

لاتسافر




السفر
ضيم المودع

السفر
هم المودع

السفر
طعم الكآبه

السفر
خطوة مفارق
ضيعت درب بشبابه


والسفر
ياروح روحي
واقف ٍ حظي ببابه

واعرف ان الحظ ضدي
حتى لو صادفني مره
ينقلب مرات ضدي

وش بلاه بجور يحكم
ياخذك لو كنت عندي
اطلبك ياحظ مره
خلني أبقى معاه

ماأبي مره يفكر
في السفر لو هو حياه
والسفر ماهو حياه


السفر موت وتجني
ينكتب فوق الجباه

السفر هو ظل عاشق
مات في نشوة صباه

وانا عاشق لْـ خطاوي
قلبه وعينه عصاه

وماأظن االدنيا تحلى
إلا لو إنك معاه




لاتسافر

مابعد تشبع عيوني
مابعد أروي ضماي
مابعد يرتاح خاطر
يسكن بعالي سماي


لاتسافر


السفر
ماهو ضروري

السفر
يلغي شعوري

السفر
خلاك تبعد
حتى في لحظة حضوري


ماأبي يازين تبعد
أو تغيب
ماأبيك تروح عني
كون ياعمري قريب



كون جنبي
كون حلمي
كون حربي
كون سلمي
كون كل العالم
المصلوب
في شباك همسي



لاتسافر


ماأبيك ضيوم صيف
وماأبيك تكون ضيف

ودي ياعمري أعيشك
لاتقول الحين كيف!!؟

ترجم الاحساس صرّح
قبل ماتنوي تروح
لاتخليني معلق بالهوى
ثمن تروح!!




من عرفتك والاغاني
تعزف الحزن وتنوح

من عرفتك
كل همي هو خيالك

والخيال
أصبح طموح



ورغم هذا
ورغم عني
أطلبك مابي تروح


ولاتسافر

حتى لو أصبح خيالك
بس هو كل الطموح



لاتسافر

لاتسافر

لاتسافر

__DEFINE_LIKE_SHARE__

[ مـانـي حـجـر ]

خلني معك ابتدي
اول خطاوي رحلتي
واشعر مثل باقي البشر
إني بشر ..



لي قلب يحلم ينتظر
لحظة لقا ..
وانا بعد مثله
أبي أدفا بلقا


ماني حديد
ولاحجر ..!!



ودي تفكر تقترب
وانا بشعوري أقترب
والقاك مره واستريح




بس اقترب ودي أعيش
لحظة لقاك

أو

تلتفت يمي برضا
لو من بعيد



تدري شيصير لو تلفت؟



مافيه طير بهالسما
يرضى بضما في رحلته

أو

يشعر إنه مغترب



بس اقترب

وانا أخلي هـ اللقا

غيمة لقا
وديرة شعر
مامرت بخاطر احد

إلا لقا
من يلهمه فيها
أكيد ويفهمه
واكثر بعد
من أي شي تتصوره!!



ديرة هوى
ذابت صدق

من عشقها لك
ودها ليله تمر
واحلام قلبي مثلها
في الانتظار
ذبلت
وباقي تنتظر


إنك تجي

أو

تعطي قلبك فرصه
مره يحبني



وبعدها مابي الحياه
بحلوها .. وبمرها
ماتهمني
إنت الأهم !

وقلبك اللي همني
طال العمر .. ولا قصر
مايهمني


مدام قلبك حبني !!
مايهمني !

__DEFINE_LIKE_SHARE__

[ الغربة ]


تعلمني
سنين الغربه واتعلّم

تعلمني
أعيش الصمت ولا اتكلم
ولا حتى
أبوح بسري واتألم

حزين وصوتي شراعي
غريب وغربتي الداعي

خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه
تعلمني !!


أغرب شعور
إنك تحس إنك غريب
والناس من حولك حضور



أغرب شعور
الغربه صارت لي وطن !


مدري أنا وش هالشعور
مااخترت انا هذا الحزن
ومااخترت انا هذي الأمور


خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه

تعلمني !!



نعم صعب الزمن لو فات
بس الغربه الأصعب !


نعم متعب من الآهات
واعرف إن البشر تتعب



نظر لي واقعي مرات
وعيني تحسبه معجب



ألا ياواقع الحاله
ترى عودي نشف حاله



ويشكي هالهموم لمن؟
حزين وحايرٍ باله

وحزنه خيّم بجاله
مساره غربته والظن


خذتني الغربه وياها إلى الغربه
ووقتني ظامني واعلن علي حربه

ألا ياشين هالغربه

تعلمني !!




__DEFINE_LIKE_SHARE__

[ ذنـب المـعـرفـه ]

غرد الحرف وتكوّن
كل غيم العشق
في كلمة [ أحبك ]

فوق صفحة من ورق
فوق صفحة من أرق

عودته الشوق يعزف
لحن حب

للسما
للطير
للنجمات
وخيوط الشفق


وانسكب هالحلم نرجس
قام يهمس ذاب صوته
وانجلت روعة سكوته


يوم غنى للورق

غنْ ياذا القلب غَـنْ
وانثر الشعر وتغنى
لطيبة اهل الريف ونخيل العواطف

للسواقي
للسما الزرقا
وللفرقا على ظهر السفن

للمدن
للقلوب اللي نهشها الإنتظار
وهدّها جور الحزن !



للسواحل غنْ تكفى
يمكن ان الجرح يغفى
ويمكن القسوة تحن !
والعواطف تستجن
وفيك تهدى هالمشاعر
من تعبها ويحتفل بك هالحضن


بس غنْ ولا يهمك
واسرج دموع اليتامى بالتفاؤول
عطّر المنديل ضحك
واحكِ للريح الجروح
ومن يهمك

دام روحك في ظلال الحب
غرّد واستجن



بس غنْ
وهاك لحن الحب مني
عيش فني
ذوق ذنب المعرفه
يوم جرب واعزفه

لاتحبه ... إنصفه !!



ماتحسه في شرايينك
يتمتم منسجم ؟!
مدامه نوى يسمر بدافي هواك
وحسك المترف نجم !



ماتحس ؟
والا ماودك تحس إني بروحك
آنا فيها غصب عنّك
جات منك
وارجعت لك
أمر قلبي منحسم !!

__DEFINE_LIKE_SHARE__

[ وين النـور ]


جيت اشتكي للنور
للريح للعصفور

لضلال بيت منحني
وجناح قلب من التعب
مكسور !

من ينصر الدمع اللي واقف
في مهب الذكريات
وشالها المسحور ؟


وين النور ؟!!

مازارها الضحكة فرح
أو مر يوم من الفرح
بالقاع حسه ضاع


ماشافني بعينه حلم
ينزف ألم مهجور ؟!


لا بالكلام وزيف هالدنيا أعيش
ولاكتبت وماحسبت لأي شي في الكون

غير انّي أكون شاعر وبس
ماقد لبس في دنيته غير الشعور


هذا أنا
وين انت ياكذبة زمن ؟
وين إنت ياذا النور ؟!!

__DEFINE_LIKE_SHARE__

[ أذكـــــــر ]

أذكر ان فيروز أتعبتنا
يوم غنت

[ حبيتك تنسيت النوم ياخوفي تنساني ]

واذكر بعد إني التفت وقلت لك :
هالبيت بكاني !

رددت انا معها وقلت : [ معقول تنساني ] !?

ناظرتني واهديتني وردة وسِكَـتْ
وانا عرفت إنك تبي تعرف
إلى وين الفكر ياروحي ودّاني

تدري لـ وين ؟
وداني لك


واذكر حبيبي قلت لك : [ خوفي تروح ]
وقلت لي : وش له تخاف ؟

من يومها وآنا اخاف حتى رجعت !

واذكر إني جيت مرّه
قبل موعدنا بساعه
وانتظرت


وكان عقرب هالثواني
يلدغ الوقت وذبحني
وماحضرت !


وصرت أحلم
وصرت اكلم في سكوتي ساعتي
وكل من مَرْ ولمحني صار يرثي حالتي

حتى من نفسي خجلت !



شلت حلم الوعد من عيني
وقمت من مكاني

وكان خوفي
إن فيه مكروه صابك
أو ألم سبب غيابك

واحترقت !




وزاد خوفي يوم دارت في خيالي
فكرة قالت : إن قلبك من مفكرته لغاني
وان فيه انسان ثاني في حياتك وانكسرت !


ورحت بيتي في هدوء
ويوم ثاني بكل برود
جيت إنت ... واتصلت

قلت : آسف مانسيتك
غافلتني عيني أمس
ماعطيتك فرصة نتلاقى
حبيبي ماني داري كيف نمت

قلت : إنس لاتقلي كيف نمت

وافتكرت !




__DEFINE_LIKE_SHARE__

[ لـيــــه ؟ ]


ليه حزن الأرض كلّه
مايساوي وسط قلبي


وزن ذره من تراب
ليه هذا الإغتراب ؟

وليه حزني صار سيرة
ينحكي في كل ديرة

وينكتب بعيون عالم
ماعْرفوا معنى العذاب
مااعرفوني !!


حسسوني وانا معهم
إني والله ماني معهم


جيت ليه ؟
وليه حظي من رداته
بي جمعهم
وانخلقت !

للحزن اللي سكني
للنفاق وللمصالح

في زمن أعمى
طعني وآنا اشوف .




وين بلقى أجوبه
في زمان الصدق
ميّت دوم فيه



والإخوة
زيف دنيا كاذبه

ماتشوف ؟؟




وماسألتو ليه أسأل!!!
والحقيقه
غايبه عن عيون الناس والله
والأماني في زمنهم خايبه


خايبه والله وزمنهم مايبيني
وآنا مثله ما أبيه
ونفسي منه طايبه !




دنيا ماترحم أهلها
ما أبيها
العذاب اهون وأسلم
حتى لو بأرضه ذبلت




ماسألت !
وليه أسأل يالعذاب؟
وانت أطيب من أهلها لو بخلت !!!


والله مافي داعي أسأل يالعذاب

{ وين ماخذني أبد }؟



ليه أسأل ؟
دام كل العمر
ماهو في ايديني
ولو بديت الرحله
مدري تنتهي بأية بلد




هذا هو حال الجسد
ينتهي بأية بلد ؟؟؟



أوقف بوجه العواصف
لاتهدك هالظروف
وتنحني ويشيخ صبرك



ياولد قوم يالله
وهات حزنك وانثره
فوق جيد الصبح يالله بعثره
لاتخاف من المشاعر ياولد

موت في حب البلد
واللي ساكن هالبلد



وان ملكت الناي
إعزف
للطيور
وماتبقى من شعور
ضايع بأية جسد !



يالله اعزف
لايتوقف لحن حزنك


لاتخاف
مو ضروري يسمعونك
دامهم مايعرفونك


غرد لنفسك واعزف
لحن حبك للبلد



يكفي نبضك في سماها
وفي حضنها الدافي قلبك


ليه خايف ياولد؟

لاتخاف
لاتخاف
لاتخاف

__DEFINE_LIKE_SHARE__