ديوان الشاعر : خالد بن سكران

كنت أسامح




بعد ماقلبي تولع بك وحبك تهجريني
تتركين مع جروح الحب وسموم الهبايب
تتركيني ساهر الحالي وظنك ترقديني
ماوطيتي جمرة العشاق يوم القلب ذايب
مارحمتي قلبي العاشق ودمع وسط عيني
والحزن والهم والغربال للفرقا ضرايب
ياحياة الروح بالله لو سمحتي صارحيني
ويش غيّر منهجك من دون ذنب ولا سبايب
ليه دايم لازعلتي بالخناجر تطعنيني
وأنتي أدرى في غلاك ومنزلك بين الحبايب
بعت كل الناس لأجل أنك تقربي تشتريني
مادريت أنك على قبري ترزين النصايب
ولادريت أنك بسرعة تقلبين وتجحديني
وتسمعي هرج العواذل في حبيبك والقريب
كنت احسب أني ملكتك يوم كنتي تعشقيني
والدليل أني عطيتك قلبي العاشق وهايب
كنت أسامح غلطتك دايم ولا ارضى تزعليني
وأنتي دايم تحسبين الحب مزحات وطلايب
تجرحيني لازعلتي وان رضيتي تجرحيني
لين حالي من عنادك راح ياعمري نهايب
ويش ذنبي في غلاك ويش يطلع في يديني
كل ماتخطين بتحمّل خطاياك المصايب
يمكن أنك مع مرور الوقت بكرة تندميني
تعرفين اني بقولي يوم أعاتب كنت صايب
وتعرفين أن الغلا ماهو بضحك ودمعتيني
الغلا شي من الله يحيي قلوب عطايب
اذكريني اذكريني اذكريني اذكريني
لا حيا بستان حبك ومطرت فوقه سحايب
واذكريني عاشق مغرم على مر السنيني
دام حبك في عيوني ثامن السبع العجايب

__DEFINE_LIKE_SHARE__

أقبل الخير



اقبل الخير الوفير وقيد ابليس اللعين
يوم حل الضيف شهر الله علينا بالسلامة
شهر «تنز يل الكتاب» من الولي للمسلمينا
فيه بان العلم نوره وانجلا الجهل وظلامه
شهر فتح «أم القرى» للمؤمنين الغانمينا
أعتلت به «راية الاسلام» من فوق الغمامة
شهر ترتيل وعبادة في رياض الصالحينا
التقى يكرب حزامه في صلاته مع صيامه
فيه ليلة خير ليلة في السنة للمؤمنينا
«ليلة القدر» الفضيلة ثابتة ولها علامة
أغنم الفرصة وجاهد نفسك وربك يعينا
لا تطاو ع شور شيطانك وتلحقك الملامة
ثابر وصابر على كل الفرايض لا تلينا
الاجر محفوظ تب تلقاه في يوم القيامة
«الفجر» بالك تنام ألا تصلي ركعتينا
ركعتين تحفظك بأمر الولي من كل هامه
والظهر والعصر فرضك صلهن لا تستهينا
المنافق يرتخي عنهن ويبشر بالندامة
ولأذن المغرب تعجل في فطورك يا الذههبينا
سنة الله عن لسان المصطفى وتبع كلامه
والعشاء بالاجر وافر بالوتر والسجدتينا
بالركوع وبالسجود اخشع ولا تسبق أمامه
وقوم ليلك ثلث ليلك واطلب الله واستعينا
ينزل الله للسماء الدنيا ويغفر لك قيامه
واعتكف واطلب من الله مخلص للوالدينا
هم رعوك وهم غذوك ويرتجون لك استقامه
احفظ لسانك ولا تطعن بعرض المحصنينا
عورة المؤمن مصونة تلزمك دوم احترامه
والنظر غضه ولا تنظر يسار ولا يمينا
دينك الاسلام فرق في حلاله عن حرامه
وعاشر الاخيار بالك للردي تصبح عوينا
كل مسلم خليله ينعرف وش هو نظامه
والدروس احضر لها واسمع كلام المخلصينا
لجماعة خير والفرقا شتات وضعف قامة
واعتمر في شهرنا هذا ولك اجر سمينا
حجة مع خير شعب القبلتينا وفي تمامه
ونصحك لله مخلص لا تنتهي الشهر الثمينا
لا تكاسل عن فروضك تفرح أبليس وعمامه
أذكر الموت المقدر لا حضر موتك يقينا
ما تفيدك توبتك والوقت يعلن لك ختامه
وختم أبياتي بقول الله يعين الصابرينا
ويرجع الشهر الفضيل بخير وبعز وسلامه __DEFINE_LIKE_SHARE__

السفر.. ممنوع



ليت (السفر) بين المحبين ممنوع
تحجز جوازات المحبين بالذات
حتيش لو ان (السفر) حق مشروع
المشكلة لأهل الهوى حزن وآهات
لا غاب (خلك) والرجاء فيه مقطوع
لا به رسايل تاصلك واتصالات
الخط مغلق كنه (الكرت) منزوع
من ضيقتك تلعن جميع اشتراكات
تضرب على الكفين والقلب مفجوع
تضيق بك عقبه جميع المساحات
في ليل دامس ضايع ما به شموع
(الفكر) تايه في دروب المتاهات
(العين) تذرف بالدقايق له ادموع
و(القلب) عايش بين حسرة وونات
لوّك تجرالصوت ما هو بـ مسموع
يا طول ما بينك وبينه مسافات
يمكن ظروفه ما مشت له على طوع
ويمكن سلا فكره بروحه وجيّات
سايح بدار (الغرب) والاجر مدفوع
يسرح ويمرح بين سجّة ولذات
الجو صافي بين خضرة وينبوع
وأنت بسموم (القيض) ما به اجازات
الهم مدهالك من اسبوع لاسبوع
لا حل ذكرى الترف هلّيت عبرات
صار (السفر) كلّه مثل حبّة الكوع..!!
جمع الحبايب سابع المستحيلات
بس الأكيد ان (الغلا) فيك مزروع
(الحب) يبقى بالضماير ولا مات
الصدق قلته والزعل دوم مرفوع
وقت (السفر) تبدي كثير لمعانات __DEFINE_LIKE_SHARE__

تعبت أناظر الساعة



متى بالله ترحمني وتطلبني على الجوال
تعبت اناظر الساعة ودقة رقم جوالك
هلال العيد هل وكل عاشق منشرح له بال
وانا للحين اناظر في سمانا ناظر هلالك
امّني قلبي العاشق بوصلك والجروح اهوال
على الله ترأف بحالي وتترك هرج عذالك
وترجع لي حبيبي من بعد فرقا وقطع اوصال
اغنّي لك مواويلي وانا اسمع منك موالك
تعالج جرحي النازف بكلمة منك كيف الحال؟
وتعطني امل لا قلت لي للحين في بالك؟
وجاوب رافع صوتي حبيبي حبكم لازال
ملكت الخافق العاشق بترحالك ومنزالك
حشي لله ما انسى غرامك وانت راس المال
بنوك القلب تخضع لك.. ودايعها لك لحالك
احبك حب صافي مادخل به ياغلاي اهمال
يسج الفكر عن غيرك من العالم ويصحى لك
رسمتك في مخيلة فكري الواسع زهور اسهال
تعيش بنسمة انفاسي واعيش بطارف ظلالك
احسّك تمشي بدمي وغيرك يشبه التمثال
اشوفك شمعة دروبي وغيرك ليلي الحالك
احس الحب نبراته بصوتك يبدع الموال
وصوت الحزن لا منك ضحكت يعاف مدهالك
واشوف الورد لا منك تمايلت بدلع لك مال
ومزن الوسم قطراته تهل بطلت اقبالك
اموت بنظرة عيونك اذا رقت بطرف الشال
واعيش احلا ليالي العمر في قطره من ازلالك
صراحة كاملن زينك وحسنك للبشر قتّال
وعيني ما رأت مثلك ابد في معظم خصالك
قصيدي في وصايفك المثيرة يضرب الامثال
جزيل الشعر ما يبدع ابد ياكود بامثالك
تعال ارجع لخلك ياحبيبي واترك العذال
تعال انعيش قصة حبنا في جو يحلالك
ابقدع من طرف خدك وبشرب بيدك الفنجال
وابنسىپكل لحظات الحزن في صافي دلالك
بتيه بعالم الاشواق وارسم للفرح امال
وودع باقي جروحي حبيب القلب بوصالك
تعبت من الوله والحزن والآهات والغربال
وكلام العاذل الواشي محرّف جملة اقوالك
تطارد بي هواجيس العناء مع سيرة الترحال
تعذبني اذا حل الظلام وطال ترحالك
وانا ادري ان الامل باقي ولو ان الصبر به طال
ولكن روعة اوصافك تصافق بي على جالك
متى بالله اشوف اسمك يشع بشاشة الجوال
تراسلني جوالك ماتقطع دوني ارسالك __DEFINE_LIKE_SHARE__

فرقا وطول غياب



تعالي واحضنيني من بعد فرقا وطول غياب
تعالي واسقي ورود الغلا من دمع فرحاتك
تعالي نترك الماضي ونفتح للأمل ابواب
وننعش باقي الأيام في همسك وضحكاتك
تعالي نحيي الأحلام عقب الضيم دون عتاب
بعد جيتي بلهفة شوق تسبق مشي خطواتك
تعالي داوي جروحي تعالي ابدعك بكتاب
انا شعري لأجل عينك يذوب بهمسة اشفاتك
انا العاشق انا المغرم انا من حبكم بعجاب
أنا الشاعر وأنا المبدع في وصف ابداع روعاتك
ابوصف لك غلاك ومنزلك في جملة الأصحاب
لأجل تدرين وين انتي مكانك بين رفقاتك
اذا بانت نجومك في سمانا نجم غيرك غاب
ملكتي كوني الواسع بحاسيسك ولفتاتك
بنيت بداخلي بيتك وشديت العمد بطناب
لأجل يبقى على طول الزمن مدهال رحلاتك
وقلبي ما عشق غيرك من الأجناب والأقراب
خفوق القلب ينبض بالغلا مع دق نبضاتك
يذوب الثلج بيدينك وأنا قلبي بحبك ذاب
أموت بلمس راحاتك وتيه بطرف نظراتك
أنا من كثر ما احبك احس انّا كما الأغراب
يراودني شعور يستحي لاطلت بسكاتك
واذا غبتي ولو لحظة أهيم بعالم الأسباب
ادور للخطي فيني سبب يدعي لغيباتك
أخاف رموش عيني تجرحك لارقت الأهداب
وأنا ماقوى على جرحك ولا أقوى سيل دمعاتك
تعالي يا هنا روحي نعود لمنهج الأحباب
تعالي نترك العاذل يموت ولا لمس ذاتك
تعالي واحضنيني من بعد فرقا وطول غياب
تعالي واسقي ورود الغلا من دمع فرحاتك


__DEFINE_LIKE_SHARE__

يافاتنه ياراقيه ياملهمه



كلمة أحبك وأعشقك وأموت فيك
لا.. ما تعبر عن مشاعر مغرمه
لأن الغلا لك كثر حب أمك وأبيك
يصعب وصوفه لو بدعتك ملحمه
كل القصايد بالجزالة تحتويك
يا فاتنه ياراقيه يا ملهمه
أنتي غلا العاشق وروحه في يديك
دنياه من دونك صراحه مظلمة
نبض المشاعر دايم تنادي تبيك
لو غبتي ليله (خالد) الله يرحمه
حبك ملكني لو طلبتي بفتديك
غلاك وسط القلب زايد بأسهمه
إي والله أنك غير يرضى لي عليك
بالزين روعه والمشاعر مفعمه
عرش الجمال العالمي يرجع إليك
بالحسن زينك قلدوه الأوسمه
الخد وردي مثل بستان المليك
فيه الزهور ألوان تنمس مبسمه
حرير ناعم ملمسه مغرور فيك
من شاهده من هول زينه يصدمه
والا العيون السود يرحم والديك
نظرة ترد الروح واخرى تهدمه
سود المحاجر ليل صيفي معتليك
الشوق فيها كل لحظه ترسمه
لا سلهمن موتي على الدنيا وشيك
سهوم المنايا في عيونك مؤلمه
أعذب كلام الحب عانق شفتيك
شفايفك سكر نبتي مطعمه
كل الحروف الابجدية تحتريك
لامن حكيتي كل حرف تنظمه
أبيع كل الناس لأجلك واشتريك
يا عل زولك يا الغلا ما نعدمه
تفداك روح كل ساعة ترتجيك
حياتها في روض حبك منعمه
هذا الصحيح اللي معا النسمه يجيك..!
الشعر يعجز والقلم في المقلمه




__DEFINE_LIKE_SHARE__

أن غبت



أن غبت (ليله) تهل العين لك عبره
و(القلب) توقف على فرقاك دقاته
و(العقل) يتلف و(حالي) ينتهي صبره
و(الصدر) في غيبتك يا كثر ضيقاته
شفت(الوطن) يا لطيف الروح وش كبره
تضيق فيني بعد هجرك مساحاته
كني غريب (الوطن) ما عادلي دبره
ماذوق حلو (الكرى) في كل حزاته
أسرح بفكري وصوت (الحب) له نبره
أفتح كتاب(الغلا) وأقرا ملفاته
حتى قصيدي يعاف (الطرس) مع حبره
أكره لحون (القوافي) وأكره أبياته
شوف (الغلا) كيف وداني على قبره
أنا أشهد أن (الغلا) عايشت صكّاته
يا روح روحي حياتي فيك منجبره
(الحب) عشته معك في معظم أوقاته
أدمنت حبك وصرت (أفيون) و (الأبره)
أرجوك (قلبي) لا تقطع عنه جرعاته
خلّك معي و(الغلا) لا تقصر بشبره
مدام (قلبي) ماخابت فيك هقواته
مدام ماخذ (شهادة حب) بالخبره
مولّعك زيد في دفتر علاماته __DEFINE_LIKE_SHARE__