السلام عليكم ورحمة الله وبركاته
يسرني ويشرفني .. بأن اطرح امامكم ديوان الشاعر منادي المشرف العام لمنتديات عيال الحمايل
نويت اصمم الديوان على شكل صور لاكن الصور لها مده معينه وتنحذف
....
[ نزف الجروح ]
على نزف الجروح اللي بوسط الخافق المجروح = وعلى ماتشتهي ياسبة جروحي ومشقيها
ابيك تبعثر اوراقي وبعثرني بصمت وبوح = وابيك تلمني في لحظةٍ ضاعت معانيها
انا بعطيك كلي وانت كلي ياعديل الروح = بلحظة ضعف غاب الانس والشيطان يحييها
والى من فاح عطرك من جسدك الطاهر المفضوح = ابردد فديت العطر والضمه وراعيها
على الطوفان ياربي يعينك ياسفينة نوح = عواصف تبعد الربان عن مرسى موانيها
الى من داعب النسناس خدك والعطور يفوح =اضيع بلحظةٍ ماتلومني لو شفتني فيها
[ قلب العنا]
ان كان لك في ماضي الوقت تذكار =خل الوصل بين المحبين ممدود
لايغوص هوجاسك بغبات الافكار =مادام انا في عالمك شي موجود
قلب العنا يامحرق القلب بالنار =ينبض غلا والحب من زود في زود
استشعرك واكتب جزيلات الاشعار =واستلطف الابيات في عيونك السود
واتذكرك واقول لو صار ماصار =القلب يرقا سنود والحب مسنود
حب(ن) على وضح النقا سر واجهار =حب الشرف مافيه ناقد ومنقود
اخذ العهد والوصل في تالي آذار =اصلك لو دونك متاريس وجنود
كلمه ولا معها مشاريه واعذار =يعني اعتبرها ملزمه كلمة سعود
[اشهد ان العذارى يقهرن الرجال]
كل ماقلت طاب الكيف والهم زال =شب في وسط جوفي نار تصلاه صالي
(آآآآه) لو قلتها مليون مره محال =تبري جروح قلب(ن) مالها اول وتالي
كل هم(ن) يطاولني بطول الليال =وكل ليل(ن) خذا مني الفرح والتسالي
ياعلي اثر نوب يصير صدق الخيال =ولابدنياك شي(ن) ياعلي مستحالي
كنت راسم لها صوره بروعة جمال =وطابق الأصل رسم الصوره اللي ببالي
شفتها وقلت هذا الحلم مابه جدال =وكل حبل(ن) من الشكه قطعته وزالي
لاتمايل بعوده ملت والقلب مال =ولاخزرني بعينه قلت ياسم حالي
والهواء يستثير الشعر روح وتعال =غير صدره وخصره وغير (لالا ولالي)
اشهد إن العذارى يقهرن الرجال =في مكيدة عيون(ن) تودع العقل خالي
يذبحن المتيّم دون هوش وقتال =في سهام المنايا والدلع والدلالي
في غنجهن يهدن الرواس الجبال =كان حنا حديد المشنقه هن حبالي
وانت فاهم وعرفك فيه يضرب مثال =وين قيس الملوح يوم جاله مجالي
ياعلي شد حيلك وشد معه الرحال =الحق اللي دنا موته وطبه محالي
واخذ مني عهد لامشي بعدها عدال =مدة ايام لين اشوف حلمي قبالي
قاله اللي ليا منه نوى القول قال =يم ابن دمخ روحي يالمعاني وتعالي
[تغريــد]
هيضني الوسمي بترديد الاشعار =وسليت سيف الشعر لعيون تغريد
ياعيون جدي يابعد كل الاخيار =يالهفة المشتاق ياباشة الغيد
ياوردة(ن) تسوى بساتين وازهار =تنبت بقلبي عن سموم وهواء البيد
استوطنت بالقلب ماخافت النار =نار الهوى والعشق والاسر والقيد
فاضت مشاعرها كما فيض الانهار =واروت ظماء العطشان من غير تحديد
القلب توجها باكاليل من غار =تستاهله يامجسد الحب تجسيد
ارفق على قلبي ولاتصير جبار =بشويش عطني الحب وان زدت بازيد
لو صار في قلبي من الوجد ماصار =انت السبب يامسدد الموت تسديد
ياحلو لامنا تبادلنا الاسرار =في صحصح(ن) ماطبه عبيد وسعيد
وياحلو لامنك بديتي بالاعذار =وانا قبلت العذر من دون تنديد
وياحلو شوفك يابعد نجد والدار =وسط السنه عيدين ومشاهدك عيد
[استبدي ياهجوســي]
استبدي ياهجوسي واكتبي بنيّه .. ونيّه =في زمانٍ تختلف فيه النوايا والهقاوي
يكذب اللي قال سيّرها ترى النيّه مطيّه =قالها ذيبٍ بداله لازمٍ والليل ضاوي
اما انا بكتب بنيّه مثل ممشى كل حيّه =ومن سألني قلت مدري بس انا ناوي وناوي
ناوي ارجع يا ( ...... ) للعصور الجاهليّه =عند من تبت يداه بنبتدي كل الحكاوي
يوم راع القافله يسري الليال السرمديّه =يبتعد عن بير بدر اللي فرض بامرٍ سماوي
مادرى انه بفعلته اهلك طحاطيح الرعيّه =طاح عتبه والمغيره فوق بيداها متساوي
فيه دمٍ حافظينه وفيه دم بدون ديّه =وفيه وجه بدون دم وفيه رجالٍ حياوي
الزمن لاهل الزمن يوم اللقا والعنجهيّه =ثبتوا تاريخهم وامجادهم مع كل راوي
اما هالحين كلنا نتبع نظام الداخليّه =نحمدالله منعمين وناكل التمر الحساوي
[حي منهو يشتكي لي]
حي منهو يشتكي لي وانا قبله شكيت =دمعته محدن مسحها ولا يرأف بها
إعرف اني فوق هقوتك لامنك هقيت =والسيوف الحدب لجلك رفعنا نصبها
صاحبك وافي على طول يومنك وفيت =بيض الله وجه الايام مجمل لعبها
مانسيت الموقف اللي تقوده مانسيت =عام الاول يوم توقد فتايل حربها
يوم شبت نارها بالحشى منها انكويت =سامح الله من بداها ومنهو شبها
ارقد آمن باكر الصبح من شانك نويت =رحلة(ن) ياعل ربي يسمح دربها
عند شيخ(ن) في التواريخ له مجد(ن) وصيت =لجل عينك يابن شلاح نشرب نخبها
لك علي الجاه والمال واطلب مابغيت =وافقت والا عسى الله ( يلعن جبها )
[ شمس المشاعر ]
البارحه طول ليلي ساهرٍ وارتجيك =طال السهر في عيونٍ طاولت ليلها
ماشفت دمعة عيوني يوم انادي عليك ؟؟ =هلت سحابه وغرّق وجنتي سيلها
يامعذب قلوب ناس وناس تشقى تبيك =وناسٍ تمنى الوصال وناس عزيلها
لو البسيطه تضيق بما رحب يحتويك =قلبٍ يودك ونفسٍ منهكه حيلها
وش غيّرك عقب ماتسعى وانا اسعى إليك !! =يوم المواصل لحن مسحوب ونشيلها
من يوم بانت ملامح قسوة الحب فيك =اغمدت سيف المشاعر وانتحت خيلها
اجرح وقلبي لطعنات الهوى يحتريك =مادام سود الليالي بيّنت ميلها
من غير ماتحبس انفاس الغلا في يديك =شمس المشاعر بقلبي طافحٍ كيلها
من اول اشربك لهفه وانتهي وابتديك =واليوم عفت الدلال وبنها وهيلها
[ حب وعناق ]
كتبت لي قصه على بيض الاوراق =قصة غرام وفالنهايه حزينه
ياليل وين اللي له الروح تنساق =روحي رهينه والمشاعر رهينه
مشتاق له مشتاق مشتاق مشتاق =شوق اليتيم اللي فقد والدينه
امانتك ياليل وصله الاشواق =وانثر عبير الورد في راحتينه
خيّم عليه بلطف وبكل مالاق =لاتزعجه يكفيك سهّرت عينه
خلك معه ياليل في حب وعناق =وامسح دموع الحزن من وجنتينه
وان شفت صدره ضاق والكون به ضاق =عطه العلوم وذكره في ظنينه
قله ترى حبه نقشته بالاعماق =ماينمحي لو غاب باقي سنينه
قلبٍ يحبه بعد فرقاه ماراق =الله على فرقاه ربي يعينه
[ الفتنة ]
العنود اللي تمثل دور ليلى الاخيليّه =جاوبت من حالها ومن بالها محدٍ نشدها
العبت باحوال ربعٍ حالهم حالٍ شقيّه =مرةٍ تقبل ونوب تقول ناسٍ تطّردّها
ادخلت في ملمسٍ ناعم وفي نيبان حيّه =وافتحت فمها تبا سليمان يوم الله قردها
مير ابن داؤد سراها ليالٍ سرمديّه =واطلبت عون المعين اللي تخلى عن مددها
عودت واختارت الريّس ومسؤل السريّه =ونزلت للساحه اللي كل من جانا شهدها
فرعت ماهمها ناصر ولامحمد خويّه =واقبلت في برقها واقفت تزمجر في رعدها
ارقصت في ثوبها الابيض وهي ماهي خليّه =وصفق الجمهور نشوه ورغبةٍ محدٍ جحدها
واثرهم ماصفقوا للرقص وعيون العبيّه =صفقوا يوم استدارت وانكشف فتنة نهدها
__DEFINE_LIKE_SHARE__