رجع خالد من برا و هو يصارخ ينادي الشغالة ... طلعت له الشغالة من المطبخ و بيدها المنشفة مبللة شكلها كانت تنظف ..
قالها : بسسسرعة اكويلي ثوب وشماغ ...
وطلع فوق مسرع ... شافته امه كيف مستعجل و استغربت ... وقعدت تفكر اكيد وراااه شي مخليه كذا مرتبك ومستعجل ..
سمعوا شروق ووفاء ووعد صوت باب غرفتهم ينطق و لملموا الاشياء بسسسرعة من قدامهم وخشوها تحت السرير ...
وراحت وعد فتحت الباب ... الا يشوفون خالد يدخل ...
شروق مستغربة وهي تقوم عن السرير بعد ماسوت وضعية الجالسة تذاكر في كتابها : خالد .. مبكر اليوم ولا انا غلطانة ...
تحرك بسرعة وفتح الباب وتأكد ان مافيه احد عنده ورجع قفله وقال للبنات : بسرعة ابيكم في موضوع ضرووووري ...
وقعد فوق سرير وحدة منهم وتجمعوا حوله وقال بصوت واطي : اسمعوني ي بنات ... انا ابقولكم موضوع مهم جدا جدا ...
ويكون بيني و بينكم ... مابي امي ولا ابوي يدرون لين اتمم كل شي ...
في هالاثناء وصلت ام بدر لين باب غرفة خالد وحطت اذنها عالباب تحاول تسمع اذا في شي مهم مخبيه عنها .. ماتدري
انه في غرفة البنات ...
شروق متحمسة وبصوت واطي : قوول .. واللي تقوله ماراح يطلع تطمن ...
خالد : ابي رقم ابو حنين اذا تقدر هي ترسله لك ..
شروق : وليش ؟؟ وش صاير ؟
خالد : ماعليك مافيه شي يخوف .. و ابتسم ...
من ابتسامة خالد البنات فهموا خالد وش يبي ...
شروق قامت ومسكت الجوال و كتبت وارسلت ...
وصلت رسالة بعد دقيقتين و همست ل خالد : تقول ليش تبين رقم ابوي ؟؟ صاير شي ؟؟
شروق كتبت : خالد يبيه يقول ضروري ...
بعد دقيقة ارسلت الرقم .. وعطت الجوال ل خالد ..
نقل خالد الرقم لجواله .... ورجع الجوال لأخته ...
ثم قال : بنات ... انا اشتريت بيت جديد ...
طالعوا البنات في بعض مستغربين ... و كمل هو بصوت واطي : هذا البيت بتزوج حنين فيه ...
كلهم البنات فتحوا فمهم من الفرحة وقفلوها بأياديهم و فرح خالد لفرحة خواته الا وفاء تقول : يعني صديقتنا بتصير زوجتك ..؟؟
خالد يمسكها من وجهها ويقفل فمها مرتبك : هششش هششششش وش قاعد اقول انا ارخي صوتك لاتطب امي علينا وتصير سالفة ...
شروق وهي تقرب من اخوها وتهمس : بس كيف ... امي وابوي ؟؟؟
خالد : ماعليكم انا اللي بكلم ابوها وانا بتزوجها بالسر .. امي وابوي ماراح يدرون لكن الزواج بيصير مثل اي زواج ...
ابتسموا البنات فرحانين وقالوله : بنروح زواجك و امي ماراح تدري ...
قالهم مستانس : اكيد اكيد زواج صديقتكم هذي ماراح تفوتونه ... اتركوا بس الامور علي طيب حبيباتي ؟
ابتسموا ووافقوا ...
قالهم وهو يوقف : اجل كملوا هبالكم واقفلوا الباب لاتجي امي ترميكم في المسبح ... انا بروح الحين اتصل في الرجال واطلب منه موعد ...
يوم طلع من الغرفة شاف امه ملصقة اذنها ومتوصية في التلصيق ..
تروع و بصوت عالي : ييييممممة ...!!!! وش تسويين هنا ؟؟؟
ابتعدت عن الباب وقالت : وش عندك في غرفة البنات ؟؟؟
طالع في خواته وقفل الباب وراه وقالها مستغرب : يعني ظنك وش اسوي ؟؟؟ حتى هذا ممنوع ؟؟
قالتله : مو ممنوع ... لكن وش عندك تتكلمون بصوت واطي ...؟ وكنكم ماتبوني اسمع !!
رفع خالد عيونه فوق واخذ نفس طويل وطلعه ثم قال لامه : يعني وش عنه بنتكلم .... يمة لاتسوين ان اهل البيت عصابات على بعض ....
دخلت عشان اسلم ع خواتي ... و كلمتهم عن دراستهم وعن حفلة التخرج اللي بيسوونها ... قولي لا مو هذا الموضوع !!
طالعت فيه ساكتة مو مقتنعة ...
قالها : انا وراي كم شغلة بخلصها والليلة معزوم على زواج خويي ... لاتدوريني ...
و راح لغرفته ...
طالعت امه في الباب و ثم التفت لباب غرفة شروق ووفاء وكانت بتدخل عشان تستفسر لكنها تراجعت و لفت ونزلت ...
شروق طلعت نفسها بعد ما ارتاحت وقفلت الباب بالمفتاح وقالت وهي ترجع سريرها : راحت راحت .. طلعوا الفضايح يالا ...
خالد وقف عند سيارته والجوال بأذنه ويوم سمع الخط يرتفع قال : السلام عليكم ...
ابو نايف ( ابو حنين ) : عليكم السلام ورحمة الله ..
خالد : وشلونك عم ابو نايف ... عساك طيب ...
ابو نايف : والله بخير ي الطيب ... ماقلتلي من معي ...
خالد : معاك خالد ابراهيم ال (.....) ... اخو شروق ووفاء ووعد اذا عرفتهم ...
ابو نايف يرحب بقوووة : يااااااااااااااااااااا هلاااااا ويااااااامرااااااحب بك والنعم والله فيك يا الاجودي ...
حس خالد بهالترحيب انه الموضوع ان شاء الله بيتم ...
قاله فرحان : تسسسلم تسسلم عمي ابو نايف الله ينعم بحالك والنعم بك ملايييين ..
ابو نايف وهو يقعد بعد ماكان منسدح وحنين جنبه جالسة ومو فاهمة شي وتقشر برتقالة : والله اسعدني اتصالك ي وليدي ...
دام خواتك يجون بيتنا تمنيت اني اتعرف على احد من اخوانهن واشكره بقوة لان بناتي عندهم صديقات طيبات ومتربيات صح ...
خالد مستانس : الله يسعدك ي عمي تسلم والله من طيب اصلك ... سكت شوي ثم قال : عمي ... انا ابيك في موضوع مهم جدا .. ولازم اشوفك ..
ابو نايف : اكككيد اكيييد ي وليدي حياك بأي وقت ... بس وش هو موضوعه ... ان شاء الله خير .؟
خالد : الا كل الخير ي عمي ... اقدر اجيلك الحين ولا فيه احراج ولا مشغول ؟؟؟
ابو نايف يطالع ساعته لقاها 9:30 ...
قاله : والله ي وليدي مادري انت وش رايك ...
خالد : الموضوع بالنسبة لي ضروري وما يتأجل ... بس انا الحين بدخل فيه يعني عشان لايصير اي تفكير و خوف وتوتر .. انا طالب يد بنتك حنين على سنة الله و رسوله ...
تفاااااجأ ابو نايف وانصدم وطالع في حنين اللي مندمجة في تقطيع البرتقالة وتسولف مع نورة اللي كانت ممسكة بالايباد وتلعب ...
وقاله وهو مرتبك : والله ي وليدي فاجأتني الصراحة بهالموضوع ماتوقعت انه يكون فيه خطوبة ..
هنا حنين رفعت عيونها و نورة نفس الشي وتموا يطالعوا بأبوهم باهتمام شديد ومنصدمين من اللي انخطبت فيهم ...
خالد : ابتسم وقال : والله ي عمي انا قلت الموضوع ضروري وما يتأجل .. حبيت اعطيك العلم من الحين ...
ابو نايف يطالع ب حنين و قاله : بس انت تعرف ان البنت تدرس الحين و قرب موعد تخرجها من الثانوية ..
خالد : كل شي اعرفه ي عمي خواتي يكلموني عن موضوع التخرج من يومين و قالولي في احتفال بيسوونه عندك في البيت ..
ابو نايف : ايه ايه قالتلي البنت .. سكت ثم قال : طيب ي وليدي اول شي لازم اشاورها هي واخوانها واخذ رايها .. و تصلون الاستخارة عشان ربي يختارلكم الخير ...
فففرح خالد وقال : يعني ي عمي انت موافق ...؟؟؟
قاله مفتخر : القى مثلك لبنتي و اقول لا .. اكون غلطان .. رجال ومعدنه اصيل وشهم واخلاق ... يكفي اني اعتبر صديقاتهم مثل بناتي ...
خالد : وهم بناتك مو مثل بناتك ...
ابو نايف : افتخر والله واتشرف ..
خالد : عسى الله يطول لي في عمرك ي عمي ويسعدك ... طيب متى تحب اجي اتقدم رسمي ...
قاله ابو نايف : تعال بكرة الساعة 7 و نتفق ان شاء الله .. انا بشاور البنية و اشاور اخوانها الحين ...
خالد : على بركة الله ي عمي .. يالا اتركك الحين ... مع السلامة ..
ابو نايف : مع السلامة الله يوفقك ...
قفل ابو نايف جواله وطالع في حنين مبتسم ولقاها مبححححححلقة وساكتة هي ونورة ... ابتسم وقالها : جالك معرس ي حنين ... اتوقع تعرفين من هو ...
حنين منصدمة وتتنفس بقووووة ... و نورة تطالع فيها ثم قالت لابوها : من جد يبة ..؟؟ خالد ابراهيم ال ( ... ) ماغيره ..؟؟؟
ابو نايف : ايه هو حبيبتي ... ثم طالع في حنين اللي كانت تتنفس بقوة وتطالع بالارض و قالها : سمعتي الحوار ي بنيتي ... انا قبل لا اشاور اخوانتس بشاورتس
انتي ... وش رايتس ؟؟
حنين كل شي كان قدامها اختفى وتشتت تركيزها و تمت ساكتة ماردت ..
نورة حركتها : حنين ... وش فيك ؟؟؟
ابو نايف مبتسم : منصدمة حبيبتي ... الحين تهدا .. صبي لها قلاس موية ...
راحت نورة عشان تجيب الموية ... هنا قالها ابو نايف : حبيبتي حنين .. وش قلتي ... انا ادري ان خالد رجالن طيب واجودي وكل اب يتمناه زوج لبنته ..
وعطيته موافقتي مبدئيا ... الباقي الحين عليك .. اذا ماتبي تردي الحين ... لك اللي تبين .. صلي الاستخارة واطلبي الخير والتوفيق من الله ...
طالعت في ابوها وقالت : يبة انا موافقة ...
فرح ابوها وقال : اجل بالمبااااارك بالمباااارك ... يارب يختارلك الخير ي بنيتي ... قومي .. قومي توضي وصلي الاستخارة يالله ي قلبي ...
ابتسمت وطالعت في ابوها وباست راسه وقامت من مكانها ...
تم خالد قدام سيارته واقف يفكر و كل فرحته ماتوسع الكون ...
بعد نص ساعة شاف سيارة اخوه داخلة الكراج ... يوم وقفها وطلع منها قال لخالد : خير وش عندك واقف هنا ...
خالد : ولا شي ...
قفل بدر سيارته بالمفتاح و بيده اوراق كثيرة ... وقاله : شف هذي كلللها قضايا انا مستلمها يبيلها دراسة و ابوك مستلمني
بموضوع زواجي من بنت ابو محمد ....
خالد مستغرب : الحين مو انت ملكت ع ذي بنت ابو محمد ... ليه ما عطوا ابوي صفقته ...؟
بدر يتريق : الظاهر الرجال مو واثق يخاف ابوي ياخذ الصفقة وانا اترك بنته .. مفهووم الوضع مايحتاج له تفكير ,,
خالد : الله يعينك من جد على اللي انت فيه ... انا بروح اشوف الشغالة خلصت من الكوي عشان
انا الليلة معزوم ع زواج واحد من الربايع ..
بدر مارد و تم يمشي داخل .... ولحقه خالد ..
قعد بدر على الكنب بالمجلس و بسرعة فتح الملفات عشان يقرا القضايا اللي قدامه ...
دخلت امه وهي تقفل جوالها و قالت : بدر حبيبي .. كيف دخلت وانا ماحسيت عليك ؟؟؟
قالها وهو يقرا بملف : كنتي تتكلمين بالجوال يوم انا دخلت ..
قالت : كنت اكلم ابوك ...
ماهتم و قعد يقلب بالملف و العقود ثم قال : ادري
قالتله : ابوك يبيك تتزوج بنت اللي ماتتسمى و يقول لازم يستعجل ...
حط بدر الملف فوق الطاولة بأقوى ماعنده لدرجة ان تحفتين كبار تحركوا وطاحوا بالارض وانكسروا ...
وصارخ بكل عنف : الظاهر انا بترك اشغالي واتفرغ لبنت الكلب ابو محمد ...
تروعت امه اول مرة تشوفه معصب كذا ... قالتله : وووش فيك ترفع صوتك علي انا نسيت نفسك قدامي ؟؟؟
وبعدين ترا مهوب عاجبني انك تتزوج هالبنت لانها مو داخلة مزاجي لاهي ولا امها ... هذي رغبة ابوك وش تبينا نسوي ... ننتحر ؟؟
مسك راسه وقعد يستغفر ربه و سكت ...
حزنت عليه ثم قالت : استهدي بالله ي ولدي ... اسمعني وش بقولك ... تزوجها ... واذا ابوك مسك الصفقة ..
طلقها فورا .. انتم بدون الصفقة ماراح تتفقون ولا انا راح اتفق معاها ولا راح احبها بتصير مشاكل بيني وبينها للسما ...
ابوك ماهمه االااا هالصفقة ام 60 مليون مدري كم .. بتمر السالفة انت لاتزعل ...
بدر : يمة .. يمة بالعقل بنت ناس هذي حتى لو اني ماحبيتها ولا ارتحت لها ... بتم حوبتها برقبتنا .. لاتنسين ان عندي خوات ...
قالت ببرود : بسم الله عليهم بناتي ان شاء الله حظهن يطلع مثل حظ امهن ...
سكتت ثم قالت : اسمع كلام ابوك ي ولدي وفكنا من الحنة والزنة تراني مليت من جد ... تزوجها ولي طلعت الصفقة واستلمها
ابوك ساعتها رجعلهم بنتهم ...
حنين الان في عالنم ثاااااااني ...
في حالة انها تتخيل نفسها عروس و زفتها مع خالد ...
وتحس انها وهي لحالها بالغرفة تفكر ان حب خالد حولها يحوم .. ورفعت عيونها للسما
وقالت : ياارب توفقني معاه وتعينني ع اسعاده ...
تعشى سعود مع سارة و عايلتها عشاء دسم و لذيذ من يدين ام عبدالله ...
قال : اكرمكم الله ,, تسلم يدينس عمتي عالعشا الطيب ...
ام عبدالله مبتسمة : جعله عافيه ع قلبك ي وليدي ...
ابو عبدالله : وش فيك ي سعود مامداك تجلس الا شبعت ... ما اكلت شي ؟؟؟
سعود وهو يمسك بطنه : الله مير يسلمك عمي سالم .. الحمدلله شبعت جعله بيت عامر ان شاء الله ...
ابتسم وقاله : بالعافية وانا ابوك ي وليدي بالعافية ...
سعود : الا وين الحمام ؟؟
ام عبدالله : من هناك ي وليدي .. قومي ي سارة دليه .. تحركت سارة وقالتله : يالا معي ...
يوم وصلته الحمام قالها انتظريني هنا ..
ابتسمت وقالت : وليش ؟؟
ضحك : هههههههههه ... اخاف ...
سارة : هههههههههههههههههههههههههه ... طيب بنتظرك ..
دخل الحمام وقفل ع نفسه ... و بسسرعة طلع من جيبه شريط دوا و بسرعة اخذه وبلعه مايحتاج يبلع وراه موية ...
بعد دقيقتين خرج من الحمام وهو يناظر سارة اللي تشيك ع بشرتها بالمرايا ,,,
قالها : كم مرة اقولك انتي ماتحتاجين مرايا ...
استحت وقالت : ما احس بنفسي وانا اطالع وجهي بالمرايا ...
قام مسك ايدينها الثنتين وباسهم ثم قال : متى نجتمع انا وانتي في بيت واحد ؟؟
ابتسمت مستحية وقالت : قريب ان شاء الله ...
راح يبوس يدها ورا بعض لين ضحكت وقالت : ابوي بالبيت وش فيك نسيت ...؟ لا يجي الحين يشوفنا كذا ..
ترك يدها وقال : ماشبعت منهم بس يالا ماعليه .. كم شهر كذا لين اخلص الشقة ونجتمع انا وانتي ان شاء الله ...
ابتسمت وقالت : ان شاء الله حبيبي ...
سمع كلمة حبيبي وابتسم لها وسألها بهمس عالسريع : تحبيني ؟؟
تروعت من السؤال لانها شايفة ظل من بعيد يقرب وقالت وهي تدفه : ايه ايه احبك يالا قبل لحد يشوفنا ...
و لمن طلع من عند الحمام شافت ابوها يقرب بعكازه وقال لسعود : يالا ي وليدي الشاي عالنار ... روح واجلس وخلنا نسولف ...
ابتسم سعود ماوده يترك سارة و يروح ف قال : ابشر عمي سالم ...
في مكان ثاني ...
وصل ابو بدر للبيت وطالع الساعة لقاها 11 ونص الليل .. يوم دخل عطا الشغالة شماغه وعقاله و شنطة العمل حقته
و دخل المجلس ... جات زوجته ام بدر و قالتله : هلا هلا ابو بدر ... شخبارك ؟
قال بدون نفس : الحمدلله .. وين بدر ؟
قالتله : في غرفته يراجع اوراق وملفات وقضايا ,,,
ابو بدر : وش قال عن الموضوع اللي كلمتك عنه ؟
ام بدر توترت من هالموضوع يعصبها من جد ... قالت : ابو بدر خلاص كلمته وقلتله في حال استلم ابوك الصفقة طلقها ..
سكتت وقالت : ابو بدر ارفق عليه شوي تراه مغصوب لانضغط عليه لا يسوي مصيبة حنا في غنى عنها ,,,
ابو بدر مارد ...
قالتله : الحين اقولهم يحطون الاكل ,,
ابو بدر : لالالا لاتحطين شي تعشيت في الشركة ... بس قوليلهم يسوون لي نعناع ...
قالت : ان شاء الله الحين اكلمهم ..
قالها : ولاتتركين بدر كلميه قوليله يستعجل في الموضوع خلينا نخلص ويرتاح راسي
قالت : خلاص خل هالموضوع علي لاتحر عمرك عشان السكر عندك ...
قالها : ناديلي البنوتات وحشوني ابيهم يقعدون معي ...
قالت : ان شاء الله ...
و طلعت من المجلس عشان تنادي عالبنات ...
بدر الحين في غرفته جالس يفكر في هالمصير الاسود اللي حطه ابوه فيه .. وكل ماتذكر ان البنت اكبر منه
بكثير و شينة تحسسسف كثير والحين ابوه يضغط عليه عشان يتزوجها ... مايدري وش هي الطريقة اللي تفكه من هالزواج الغبي ...
ويقول في نفسه : انا ابي بنت اصغر مني واجمل بكثير مني ... مااتوقعت اطيح هالطيحة !!
فففجأة سمع صوت صراخ خواته جاي ...
بسسسرعة قام من مكانه وطلع من الغرفة عشان يشوف وش سبب صراخ خواته ...
ولمن طلع من الغرفة لقى امه بعد طالعة الدرج تراكض بتشوف وش سبب هالصراخ المرعب ...
جا بدر بيفتح الباب لقاه مقفل بالمفتاح .. قام دقه بقووووة ويقول بخوف : افتحوا الباب ي بنات ... وش فيكم ... ورجع يدقه بقوة و يسمع صراخهم و بكاهم ...
امه تناظر وهي خاايفة وتقول : الله يستتتر وش هالصراخ الغريب ..؟
بدر مالقى حل غير انه يكسر الباب ويشوف وش فيهم يصايحون و يصارخون ... و دفتين من كتفه الا الباب ينفتح وبسرعة دخل وشاف
خواته قاعدين في الزاوية وحاضنين بعض و يبكون بكل عنننف ... قرب منهم بسسسرعة وامه بعد وخايفة ..
و سألهم وهو متروع ... : وش فيكم وش هالصراخ ؟؟؟
صارخوا بخووف : فااااااااااااااااااااااااار !!!!!!
ام بدر مستغربة وبقرف : ووووووش هوووووووووو !!!!!!
بدر بسرعة : وووينه وووينه ؟؟؟؟
ماردوا خايفين ويرتجفوا .. قام مسكهم بحنان وقال تعالوا تعالوا غرفتي والحين انا والشغالات ندوره ...
بسسسرعة قاموا معاه وطلعوا من الغرفة وراحوا غرفة بدر ...
وطلعت امهم معاهم لانها هي تخاف اكثر من البنات ... قام بسرعة نادى على الشغالات و طلب منهم يسوون بحث مكثف عن
مكان الفار .. و خواته وامهم في غرفته و حالتهم حالة .. طلع ابو بدر غرفة بناته لانه كان ينتظرهم وتأخروا ... وشاف حالة غرفة البنات
مقلووووبة فوق تحت .. واول مادخل الا يسمع صوووووت ضربة قوووووية و يقول : خخخخذ ي ابن الكلب اجل تخوف خواتي هاااااا ...
استغرب ابوه وقال : وش فيكم وش السالفة ؟؟؟؟
قتل بدر الفار بعد مالقاه ورا التسريحة بعصا كبيرة هبدها عليه قضى نحبه ع قولتهم .. وقال للشغالات : شيلوه وارموه بعيد وبعدين تعالوا رتبوا المكان ...
طالع بدر في ابوه وقال : ولا شي بس فار دخل غرفة خواتي ...
استغرب وقال : فار ... ومن وين جا هالفار ؟؟
بدر يأشر : مدري
ابو بدر وهو يناظر الحوسة : ووين البنات ؟؟
قال : مع امي في غرفتي ..
راح لهم و بدر واقف مكانه و صار يضحك ع شكل خواته وهن خايفات وقال : صدق الانثى ناقصة عقل ..
دخل ابو بدر عند البنات و حضنهم وقال : سلامتكم ي بنات .. خلاص قتله بدر و راح معد فيه فار .. تطمنوا ..
انقهرت ام بدر من اسلوب ابوهم معاهم هي تبيه يكون صارم شوي معاهم ..
قالتلهم بصراخ : ابي اعرف هالفار من وين ددددخل ؟؟؟
وعد بخوف : انا تركت الشباك مفتوح اتوقع منه دخل ..
امها : المنطقة اللي حنا ساكنين فيها خالية من المخلوقات هذي ...؟؟ قولولي الصدق من وين دخل ..
شروق : وش تقصدين يمة من وين دخل ؟؟؟
امها : ماما لو سمحتي وش يمة هذي ؟؟
ابوهم : خلاص ي فاطمة وش فيك عليهم مو كفاية ارتاعوا من الفار ... اتركيهم ياخذون نفسهم شوي ..
قامت ام بدر على غرفة البنات تبي تشوف من وين دخل الفار وش المنفذ اللي خلاه يدخل ..
طالع فيها ابو بدر وتم ساكت وهو يحضن في بناته ويهديهم شوي .. والبنات خايفين انها تشوف الاسرار اللي ممكن تفجر قنبلة عنيفة بالبيت ,,,
قالتله شروق : يبة امي الحين بتشوف شي تكررههه وبتجي الحين تصارخ ... نبي الامان ...
استغرب وقال : شي تكررهه ..؟؟ مثل وش ؟
قالت : شوكولاتات وروايات وقصص و شيبسات ومكياجات كلها بصندوق سري .. اتوقع الحين بتجي هاجمة علينا ...
تذكر انها حارمتهم من هالاشياء وسكت ...
بدر واقف وهو يناظر امه تطلع اكياس الشيبس بمختلف اشكالها والشوكولاتات والكتب الصغيرة كلها روايات بناتية ...
مسكت هالاشياء كلها و بدر يطالع وساكت .. قالت : ووووش ذااااا ... وش ذاااااا ...
بدر ببرود : وش ذا يمة ... اكياس شيبس و شوكولاتات .. وش يعني بتكون .؟؟
صارخت : انا بناتي ياكلون اكل الفقاااااارة ؟؟؟؟
بدر : استغفري ربك هذي نعمة !!
ام بدر شالت الاغراض وقالت : انا اوريهم الحين ...
بدر يلحقها ويقول : يمة صلي عالرسوووول وش تكبير المواضيع هذي ...؟؟؟ ماصار شي يعني لو اكلوا من هالاشياء !!
دخلت غرفة بدر وبيدها الاكياس والكتب وقالت بعنف : ممكن القى تفسير ل وجود هالاكل بغرفتكم ؟؟؟
ابو بدر يطالعها و البنات ساكتين يتحامون في ابوهم ...
صارخت : انا الليل عالنهار اهتم بأمور الصغيرة والكبيرة في هالبيت واتعب تعب لين اقول امين عشان لا اشوف هالاكل المقرف يدخل
بيتي ... تقومون انتي وياها تجيبونه لين عندي ... كييييييييف دخلتوه البيت ابي افهم ؟
ابو بدر : خلاص وش فيك كبرتي الموضوع ؟؟؟
بدر : يمة كله شيبس و شوكلاتات مو قنابل !!
صارخت : لحد يعترض اللي اقوله ... بناتي ماياكلون هالخياس ...
بدر وابو بدر : استغفر الله العظيم
كملت : انا اهلي علموني وش الاكل الصحي من الاكل اللي يدمر الجسم .. وهالاكل يا قليلات الحيا يخرب الجسم
وتبون تخرب اجسامكم وقدام العالم يقولون فاطمة تأكل بناتها اكل مخيس .. كل وحدة فيكم جسمها مترهل ويفشل !
بدال هذا فيه سلطة في فواكه فيه عصيرات فيه اكل صحي المطبخ متروس ... من دلكم على هالاكل .. حنين ونورة و قليلات الادب اللي تعرفتوا عليهم صح ؟؟؟
ابو بدر صارخ : اووووووووووووه ... خلااااص ماصارت هذي تهاوشين ع شوية شيبس وشوكولاتة .. كل بنات في سنهن ياكلن من هالاشياء ...
ام بدر : يعني ترضى بناتك يمشن وكرشتهن مترين قدام !!!!!
طالع في بناته وسألهم : من متى تاكلون شيبس وشوكولاته ؟؟؟
ردت شروق و وفاء : من زمان ...
صارخت امها : من زمان ... من زمان ياللي ماتستحي !!
ابو بدر صارخ : فااااااطمة ... اسكتي .... الحين يقولون لك من زمان .. طلعيلي جزء صغير من كرشتهم الحين ...
و مسك شروق وقال : الحين شروق جسمها مترهل ولا وشلون ؟؟؟ شايفة انتي في شي مترهل ؟؟
ومسك بقية البنات وقال : وين الترهل في الموضوع ابي افهم .. معصقلات ونحيفات !
بدر ماسك فمه مايبي يضحك ...
قالها : لاتكبرين الموضوع وانتهينا .. اكلوا شيبس وش صار يعني ماتوا ؟؟ وحضنهم وقال : بسم الله عليكم ..
امهم تطالع فيهم وقالت : اخر مرة اشوف كذا في بيتي ولا حسابكم عسير معي ! الحين فهمت وش سر قفلة باب الغرفة هذي عليكم وصوتكم
الواطي .. لكن من الحين طالع مافي مفتاح بشيله عنكم وبشوف وش بتسوون من وراي ...
بدر : يمة تراكي مكبرة الموضوع ... خلاص اقصري الشر ...
ابو بدر يبوس بناته : ماعليكم حبيباتي ... بعدين نتكلم في هالموضوع ...