ياصاحبي معيوف مسيّت بالخير

الشعر شعر المصلحه والعلاقه

كانك تبي تنعدّ ضمن المشاهير

اهل السلوك الناعمه والدقاقه

جمّع بني عمك وناد الجماهير

ولكل صاحب شان ارسل بطاقه

وسو أمسيه وحده ولوكانت عصير

وحاول تكوّن فالصحافه صداقه

واصهل مثل جسّاس وكليب والزير

واشهر على الشعّار موس الحلاقه

وامدح وسب وغن لجل الغنادير

سب الوفي وامدح من الناس عاقه

وخذلك لقا وسط النياق المغاتير

جنب الرحول وماسكٍ راس ناقه

واجلس على المركى وقدّامك الطير

وبيت الشعر خلفك يهبهب رواقه

وصوّر مع اهواة القنص والصقاقير

وجمّع حوالينك شويّة رفاقه

هذا يقنّد فالدلال المباهير

وهذا يتبسّملك ويرخي شقاقه

وهذا حلب لك من حليب المصاغير

وهذا على مدحه يزوّد نفاقه

واجلس على الروض الخضر والنواوير

وزوّد برستجيك وهرجك لباقه

وصوّر على الشاطي وصوّر على البير

واطلع بكامل رونقك والأناقه

كذا تجي شاعر وسيّد شواعير

لو كان ماتقطف من الشعر باقه

الوقت غير وطابعه يالشلي غير

راحت تقاليد العرب والعراقه

وين القصيد اللي يهز الطوابير

مثل البحر موجه يزيد اصطفاقه

اللي ليا عدّوه عند المناعير

ثم سمعه السامع يزيد اشتياقه

تبدّلت كل الصور والتفاكير

وصرنا نتشفّق للفرايد شفاقه

في ساحة الشعّار للوضع تفسير

كم شاعرٍ كلّت من الركض ساقه

ما اعم أنا لاشك فيهم هوامير

تفتح على المعنى ثمانين طاقه

اهل المعان الوافيه والتعابير

جلّه خذوه ولا شقْوا في دقاقه

هذا وحبْك الشعر مازاد توقير

الرجل من فعله يبين انطلاقه

الله يوفّقنا لحسن التدابير

ويصدّنا عن مهتوين الحماقه

هذا هو الموجز وباقي التقارير:

الشعر شعر المصلحه والعلاقه