امّا خذيــت الحــــق يا راعي الجيش
ولا تـرى الموضـوع يكثــر نقاشه

عليـك يـا وقـت(ن) عثـا فيـه درويش
وقت(ن) عليم الله صعب(ن) معاشه

وانا غريب(ن) بيـن ربع(ن) مباطيش
ذباحـــــة(ن) لـلاش ساعــــة طياشه

نسل الرجال اللـي على راسهم ريش
امــــا ملـك .. ولا اميــــر(ن) وباشه

من قـدم ربعـي تخمش اللاش تخميش
وان قلت هبْـس . القلب زاد ارتعاشه

اليـا تعانـــق صامــل الشيش بالشيش
ينســـى ذليـــل اليـــوم لــــذة فراشه

عزّاه من ذكر(ن) غدى فيـه تشويش
صـار الـردي يهــرج ويكثــر حراشه!!

من قـال لــك حــق الرياجيـل تهميش؟
ناطــى علــى غاربــه حــزة هواشه

لكـــن قســم بالله لــو قلــت لـي ويش
ناس(ن) تزيـــد الجــو عــجّ وغباشه

يـالله فـي نـــو(ن) يســوق المراهيش
نــو(ن) عليـه الظلـع سهـل انتعاشه

يدرج شعـاب(ن) مدها السيل بشويش
حتــى ينــــش الورد عقــب انكماشه

يرخي علــى ستــر الغناديــر تنقيش
وينحـت علـى كبد المولع نقاشه

واليا غــدى في ســرة القلــب توحيش
ادخل علـى الله لا تصيـب الغشاشه

وانسى ترى ذا الحزن ما وكلك عيش
واذكر عشير(ن) واهج الشوق جاشه

وين انـت يـا خــدر العيـون المراييش؟
جفنــي على شوفك يزيد اندهاشه!!

ام اللثـــام اللـــي مزايـــــاه مـا حيش
والله ستــــره مْــن الحلـــوق النهاشه

يمشي كمــا مشــي المهــار المداغيش
حر(ن) يشيّــد وسـط قلبي عشاشه

غر(ن) عليـه الصبر اولى من الطيش
ويضفي على حزن الليالي بشاشه

واللي ينعّــش راعـــي الفكــــر تنعيش
واللـي تتــل القلــب ومضـة رماشه

واللي عسفت القــاف لأجلــه بتنشيش
شاعر ولي في كـل وادي نشاشه

لا ضـاع حقـي بيـن ضابــط وشاويش
أمـره مطـاع ومنزلـه فـي عراشه

ولا انــت مطراشــك نـرده بتهشيش
قدرك وكل من جاد يقبض معاشه

رد الجــواب الآن يــا راعي الجيش
ولا تـرى الموضـوع يكثــر نقاشه!!