خلوني احكيكم عن اشياء في حياتي
طبعا بيت اهل زوجي كلهم احبهم اخوات زوجي اعتبرهم خواتي اللي ماجابتهم امي ..
بس نختلف في اشياء من ناحية اللبس او الاكل او اسلوب التعامل مع الناس
طبعاً اخوات زوجي مايطلعوا عند احد ولايزوروا احد كذا العوايد عندهم الا في حال كان عندهم
زواج لصديقتهم الوحيدة او احد من العيلة يطلعوا لكن اماكن ثانية لا ، و انا غير عنهم اروح و اجي
واروح زواجات وللجيران و اعرف لكل صغيرة و كبيرة تصير في حياتنا حتى قبل لا اتزوج .
طبعا من ناحية الاكلات فيه اشياء انصدمت منها مررررة وسبحان الله ماتوقعت ابدا انهم
ماياكلوا الكشري او المحاشي زي الكوسا و البذنجان و الطبخات اللي ماهي سعودية زي
المنسف الاردني و التبولة ولحم البقر والحاشي وتخيلوا القهوة التركي يكرهوها كررره مو طبيعي بس ثنتين منهم
حبوها لمن جيتهم اول مرة في حياتي وشربتها قدامهم وكانوا يطالعوا فيني مستغربين كيف اقدر اشربها
ولمن ذاقوها حبوها بنتبن من اهل زوجي والبقية مجرد مايشموها يدوخوا ما ادري ليش سبحان الله
وحتى بنات خالة زوجي والله سويتلهم هي مرة في المخ ولمن جو يجربوها وجيههم كيف مترددين
زي لمن احد يتردد عند دقة الابرة ..
طبعا انا اتعرفت ع اكلات الديرة اول مرة تمر في حياتي ماكنت اعرفها
زي الخميرة و الثريف و الفتة بالحليب وزيت السمسم كذا عوايدهم يقدموها للضيوف اذا احد جاهم
او اذا الحريم الكبار في السن راحوا يزوروا احد ياخذوا من هذي الاكلات و صرت اسويها لزوجي
من ناحية اللبس و المكياج فكلنا مانحب اللبس العاري وانا ضده تماما والحمدلله متفقين من هذي الناحية
انا و اهل زوجي بس عند المكياج يصير اوقات نقاش بيني وبينهم يعني مثلا انا خبيرة مكياج يعني ميك اب ارتست
درست التجميل والحمدلله عندي خبرة في هالمجال واعرف كل وحدة ايش يناسب بشرتها والالوان اللي تناسب اللبس او
شكل الوجه يعني يستشيروني و اعطيهم رأيي ..
العيد السنة اللي فاتت اجتمعنا انا واهل زوجي في بيتهم عشان نتجهز و اخت زوجي طلبت مكياج ناعم و حددت لها
الالوان اللي راح احطها لها قبل لا ابدأ وهي وافقت وبما انها تحب البرونز فأخترت لها درجات البني و الذهبي و روج احمر
جاف مطفي بس مو غامق . وربي طلعتها تجنن تجنن تجنن بمعنى الكلمة وطالعت نفسها في المرايا وحسيتها مو فرحانة بمكياج احترافي و طنشتها وسويت لخواتها كلهم وطلعوا ماشالله تبارك الرحمن كل وحدة تقول
للثانية الجمال عندي وانصدم باللي سويت لها اول وحدة مغسلة وجهها وجاية ومادة بوزها وزعلانة وعمتي ام زوجي
صرخت عليها ليش تسوي كذا قالت مو مكياج عيد هذا مكياج زواجات وانا سكتت ماقلت شي .
وبعد ماجهزت شعور البنات طالعتها لقيتها حايسة في حواجبها مو عارفة تضبطها وحزنت عليها ..
اكملكم في الرد اللي بعد ...
__DEFINE_LIKE_SHARE__