يا وقت ماني في حسانيك طماع

عسلك مسموم (ن) ولا به طماعه

العمر فاني وانت كشفت الاوجاع

لا تـوجع الموجــوع وترك وجــاعه

والقلب من كثر الصواديف مرتاع

مثل الغرير ادنــات ما جـاه راعه

ما عاد يرجي من طموحاته اسناع

ولا عـاد به حــيل ٍ ولا بـه منــاعه

اتلا العهد في قوته .. قبل ينصاع

يوم الوليف اقفى ... وشح بوداعه

اقفى وخلا القلب انصاص وارباع

وخلا دلــيل الفــكر يعلـن ضـياعه

ويا وقتي اللي خطوتك تدرج بساع

ليتك وقفت ( لفرحـتي ) ربع ساعه

وليت ( الاماني ) بالدكاكين تنباع

مصفوفة ٍ بالــرف مثل البــضاعه

ما كان شفت الدمع لا هب ذعذاع

ولا شفت قـافي لـلـحزن بنـدفـاعه

(حسبي على هم ٍ له الحظ مطواع

وحسبي على حظ ٍ مسفط شراعه)