المساعد الشخصي الرقمي

مشاهدة النسخة كاملة : ديـوان الشاعر المرحوم // غازي الميموني


دانــه
29-03-2010, 04:13 PM
السلام عليكم ورحمة الله وبركاته

جمعة لكم ما استطعت جمعه من قصائد الشاعر المبدع المرحوم غازي الميموني


اتمنى لكم الاستمتاع,,,,,



((الــحــب ذبـــــاح))



ياللي تقولون الهوى ضحك ومزوح
ترى الهوى مايعرفه كل مزاح
اصل الهوى معناه روحين في روح
به تندمج كل المشاعر والارواح
حتى يصير الباب للقلب مفتوح
بابن له شعور المحبين مفتاح
والقلب يمشي له على غير مصلوح
يتبع هوى مغليه من وين ماراح
وانا هوى بالي معي وين ماروح
طيفه معي باحزان عمري والافراح
ياكثر مايخطي وانا اقول مسموح
كل الزعل لاقال لبيه ينزاح
انا اشهد ان الحب لوعات وجروح
وانا اشهد انّي منه ماني بمرتاح
لكن ياللي كل مافيك مملوح
ارفق على حالي ترى الحب ذباح
يابو جديلن فوق الامتان مطروح
ياللي جبينك كنه النور وضاح
خدك بليلٍ مظلم ولامعه ضوح
اليا لمحته كنه البرق لا لاح
اشوف خدك في دجى الليل بوضوح
نوره ليا باين ولانور مصباح
وعينك دواء قلبي ليا صار مجروح
ورموشها تجرحني بشلف ورماح
شفت التناقض كيف ياغاية الروح
تجرح وتذبح وانت دكتور جراح
عزالله اني عن شقى الحب منصوح
لكن قلبي ماسمع كل نصّاح
اثر الهوى يودعك في سدك اتبوح
وفيه الخساير فوق ضعفين الأرباح
لاتحسب الخاطر من البعد مشروح
تراي اجاوب نايح الورق لاناح
حبك بنى في قلبي ابراج وصروح
وسيطر على قلبن للأسرار ماباح
واسرني وخط احرف اسمي على اللوح
اسير حربٍ مابها جيش وسلاح
حربٍ ضروس ولابها دم مسفوح
لو ان فيها سيف ساطي وسفاح
اول ضحاياها بلاحق مذبوح
قلبن يجازي صادق الود بانصاح
قلبي عليه ظلوعي تصيح وتنوح
واقصى الظلوع يزلزل الأرض لاصاح
لكن ياللي كل مافيك مملوح
ارفق على حالي ترى الحب ذباح





يتبـــــــــع //

دانــه
29-03-2010, 04:14 PM
((ســـوآد رمــوش))


الا يالعيون اللي تنوش الظماير نوش
جروح القلوب المزمنه من يعالجها
جروحن نشت من حب صافي مهو مغشوش
تمادت ولادري وش عواقب نتايجها
سبايب هنوفن بالضمير اسمها منقوش
تدرج هوى قلبي وقلبي يدرجها
غنوج وعيونن ناعسات وسواد رموش
وخذتني بسحر عيونها وبتغنجها
جميلن نباها والحلا فوقها مرشوش
يبين الخجل بعيونها يوم اهرجها
وفكري بها غنى وقلبي لها مفروش
ولكن دورات الزمن بان ناتجها
وانا اللي من الوقت الغبر خاطري مخدوش
ونفس الشقي بعد المواليف يحرجها
وقلبي بعدها صايرن كنه المنعوش
وعيني تكن دموع ودموع تزعجها
بعد وقفوا من دونها محتمين البوش
وهذي قوانين الحياه ونماذجها
حدوني وحطوا دون قلبي حشود جيوش
وغاب الأمل والطايره في مدرجها
ولاعاد تنفع فيه حتى حكومة بوش
تعجز الحكومه لو ترسم برامجها
ولكن يجيب الوقت بعد الطروش طروش
وابا انساه والكربه عسى الله يفرجها


يتبـــــــع//

دانــه
29-03-2010, 04:16 PM
(( صــوت الاصــلآح ))



مافي سماء الاحزان منزل للافراح
ولاينفع اللي فات لو ندعيبه
وش حال الامه بعد مامجدها راح
ماباقيّن غير الجروح العطيبه
اقفى زمان اهل الفتوحات وانزاح
اللي لهم رهبه وسطوه وهيبه
اليا التقى الجيشين بسيوف ورماح
منهم كتيبه تهزم امية كتيبه
بفعولهم شبوا للاسلام مصباح
نور الهدى كل البشر تقتديبه
الروم بيرقها من فعولهم طاح
دكوا مواقعها وراحت حطيبه
والفرس يوم منادي المعركه صاح
هانت ولانت واسلمت بالغصيبه
هذي فعول اللي يبيعون الارواح
مايسكتون ويقبلون الغليبه
امّا يجي نصرن له النفس ترتاح
والا الشهاده تنكتب من نصيبه
وقتن مضى نلبس منه تاج ووشاح
تاج البطوله والفعول الرهيبه
لكن يبقى الحزن للقلب ذبّاح
لان الفرح مافيه شيّن يجيبه
اليوم اشوف صفوفنا سدها باح
وتصبر على جمر الزمان ولهيبه
قامت جيوش الكفر تمشي وتجتاح
والمسلمين جيوشهم مستصيبه
كم في فلسطين الخساير والارباح
وكم يركزون بكل ليله نصيبه
والا العراق اللي به الدم فواح
في كل ليله ثايرن به مصيبه
من بعد مابغداد للمجد مفتاح
مهد الحضاره كيف تنزف صويبه
في كل ليله نسمع صياح ونياح
حتى لذيذ النوم مانهتنيبه
الامه بوضعن محد منه مرتاح
وكل النفوس بوضعها مستريبه
استسلمت وانهارت وسترها زاح
ودموعها مثل المزون السكيبه
مغير هم وضيم وغبون وجراح
واتدور ايّا مسلمن تلتجيبه
حتى ظهر صوتن ينادي للاصلاح
منشاه من قلب الرياض الحبيبه
صوت الشجاع القرم كسّاب الامداح
العاهل اللي يعرف الكل طيبه
عبدالله اللي لصعيبات نطّاح
لاقام بامر الله تهون الصعيبه
طاريه برقن فوق روس العرب لاح
وكل العرب وقت الدرك تنتخيبه
رايه على عدواننا سمٍ ذحاح
بندق شجاعن رميها بالضريبه
ومبادراته كنّها النور وضّاح
من يوم يرسمها هدفها تصيبه
دم العروبه في شرايينه انساح
وغير النصر مافيه شيّن رضيبه
ولنصرة الاسلام والعدل طماح
ومنه المواقف ذي ماهي غريبه
يدعي لعقد القمه بصدق وانصاح
ومن شذ عن جمع العرب وش نبيبه
حكام الامه جابهم عزم والحاح
فالمملكه دار العقول اللبيبه
وجنّد جنودن للمقابيس قداح
تحسباً لايّات حاجه مريبه
واستبشروا فيهم وعطر اللقاء فاح
واستقبلوهم بالصدور الرحيبه
واتجهت انظار امةٍ مجدها راح
للمملكه والصوت واللي يجيبه
وكل يرجون لحظات الايضاح
من حاكمن كل الشعوب تحكيبه
ومن كلمته عادت على الناس الافراح
وتباشروا بوعود نصرن قريبه
وتذكروا مجدن مثل نور الاصباح
في سيرة امجاد الجدود العريبه
ويالله وعدك اللي ذكرته بالالواح
ومن يخذل الاسلام تردي نصيبه
وتحفظ مليكٍ لصعيبات نطاح
وتعز الامه والدعاء تستجيبه


يتبـــــــــــع //

دانــه
29-03-2010, 04:18 PM
((صوره من واقع مجتمعنا))


ياوقت ياللي منحني كنك القوس
من سبتك شوف المعاليق يباس
في كل ليل يدق بالقلب هاجوس
والهم ياخذبي مع الوقت مرواس
ماضاق بك صدري من مصادم الروس
ولابيدوا حيلي بعيدين الارماس
بك عالمن تمشي على كل قاموس
وعلومهم ماتنحصر بين الاقواس
شبوا لهم من منور الكذب فانوس
وحطوا لهم من جاحد الحق نبراس
والطيب ثوبن للمشاكيل ملبوس
والاالردي ماهو على العين والراس
مرافق الرديان مافيه ناموس
ماينفعونك لاصبح الوضع حساس
والضرس لامنه دخل وسطه السوس
كل الضروس تلج ويصدع الراس
ولاني مفتش في خفى كل مدسوس
ولاني براعي صحبتن مالها ساس
اخذت من وقتي تجاريب ودروس
وعرفت وشلون التعامل مع التاس
محدن يعزك كان ماعندك فلوس
واسمك مع اهل المصلحه بنك الافلاس
لو انك مفرق جمع كل كردوس
ومن روس قومن تلبس الدرع والطاس
هذا زمانن كل مافيه معكوس
حتى الرجاء ياقف على بابه الياس




يتبــــــع //

دانــه
29-03-2010, 04:20 PM
((حـــآن الوعـــد))

حان الوعد ياللي تقول الوعـد حـان
هذا الزمن يطلع خفـى كـل مكنـون

العـز بيتـن لـه مداخـل وبيـبـان
عسر الطريق ولاحدن جـاه بالهـون

ولشعر ماقف مـع طويليـن الايمـان
وانا مع الميقـاف حاضـر وممنـون

من صلب راسي كـل ماثـار بركـان
هز الجبال اللي لهـا حيـود وركـون

لمطيـر حقـن فالقـوافـي والاوزان
يستاهلـون القـاف وافـي ومـازون

افعالهم ترجـح علـى كـل ميـزان
غصبن عن الحساد وابليـس ملعـون

من طيبها يفخـر بهـا كـل ديـوان
عوق الخصوم اللي على الموت يردون

مطير فخر وعز فـي كـل الازمـان
حتى الضعـوف بضفهـم يستعـزون

تشهد لهم كـل المواقـع والاوطـان
كم واحدن عقب الطمـع راح مغبـون

عذروبهم يـوم المغـازي والاكـوان
يـردون للمـوت الحمـر مايهابـون

صلفين بالماقف وبالحـرب شجعـان
واليا اعتزوا عـن دربهـم مايـردون

يتلون شيخـن يعرفـه كـل ميـدان
حتى النصارى في فعولـه يشيـدون

شيخن لياطال اللقاء يقضـي الشـان
شيخ الجموع اللي بالامجـاد يحـرون

من اليمن لاطـراف بغـداد وايـران
ومن الخليج اليا وراء اهرام فرعـون

كلن يهابه لانصـى الجمـع حدمـان
وحنـث علاهـم كلهـم مايروحـون

استسلموا له واعلنوا لـه بالاذعـان
وطاعوا وهم اللـي قبـل مايطيعـون

تاريخه يشرف ولـه سيـف وعنـان
وعن زمرة التحريف والزور مصيون

صيت الدويش ابين من سهيل لابـان
ومطيـر دايـم لاومراهـم يشيشـون

تاريخهم يروي ضمـى كـل ضميـان
دوم الفخـر والعـز فيـه يتبـارون

سطوة عذاب وجمعـن يعـد طوفـان
محدن يلـوم مطيـر يـوم يتباهـون

اهـل ثلاثـن للبـطـولات عـنـوان
يـوم القبايـل فالجزيـره يصولـون

المعجزات اللي لهـا الحـق برهـان
يعدهـا التاريـخ والـلـي يـعـدون

مطير يوم الوقـت والنـاس قومـان
يصلـون حـد خصومهـم ويتعـدون

فارسهم بوقت المزاعـم والاضغـان
يوم الحدب لمزاعـم القـوم مسنـون

يعد فالميـدان عـن عشـر فرسـان
وينكـس اللـي للقـاء يستـعـدون

لوهم قليليـن العـدد جالهـم شـان
يقفون مـن دون الركايـب ويثنـون

تاريخهم فـي نجـد مافيـه جحـدان
كنه شعاع الشمـس للـي يشوفـون

مركاضهم يشبع به الذيـب سرحـان
حيث ان فيه العز والنصـر مقـرون

والعفو عنـد المقـدره مالـه اثمـان
ميزه لنـا يـوم العـداء يستقـرون

والبل لنـا ونقولهـا سـر واعـلان
ماهمنا فالوقـت صاحـي ومجنـون

حنا جنبهـا يـوم روغـات الاذهـان
يوم العرب مـن دونهـا يستميتـون

حامينها بالعمـر والسيـف شامـان
من دونها خطـلان الايـدي يموتـون

واليـا نوينـا فالغزيـه علـى شـان
نكسب ونكسر شوكة اللـي يمـارون

نصبـح اعدانـا مـع النـور لابـان
ونحدهم حتـى مـن المـوت يقفـون

ونبدا بعدهـا بالحـداوي والالحـان
ونقفي على مقهورها في ضحى الكون

ونصـور الاحـداث باشعـار واوزان
ونثني على اللـي للثنـاء يستحقـون

واليوم كل الناس فـي خيـر وامـان
في دولتن فيها العـرب يستجيـرون

فيها الشرع مسنون في صدق وايمان
وحكامها فـي سلـم المجـد يرقـون

واهتموا بشان البـل وحطـوا زيـان
والنـاس قامـوا فالمزاييـن ينقـون

وحنا هل الطالات فـي كـل الاحيـان
ميقافنا كـل العـرب عنـه يـدرون

ندحم بضلعن ساعة الضيـق مـالان
لين الخصوم اللـي دحمنـا يلينـون

واكبر دليل وكلمـة الحـق سلطـان
يوم اعلنوهـا والجماهيـر يوحـون

الفوز بالنخبه لـذود ابـن عشـوان
غصبن عن اللي حاضريـن يتحـدون

وصفر الحداري شاهد وخير برهـان
فازت مع اللـي فالمراكـز يفـوزون

اللي نجبها زيـن الاوصـاف عبـدان
على بعير مطيـر بالوصـف واللـون

اشوش معها وارفع الصـوت طربـان
واقول مركزها مع الصفـر مضمـون

ياطيب ماجد جـاب غاليـة الاثمـان
في ساحتن فيهـا القبايـل يعرضـون

وابن غيام اليا حضـر صـار ماكـان
ماصار فاعوامن مضـت لازم يكـون

نقول لاهل الحمر مـن غيـر حقـران
المـركـز الاول لـنـا لاتـعـنـون

واليوم هابس جاب زينـات الالـوان
وضحن كما نون له نصوب ومـزون

وحط المقـر وحـط لمطيـر ديـوان
وقاموا بنـي عمـه بربعـه يهلـون

صكوا عليه وكلهـم ربـع واخـوان
وقاموا على طيب العلـوم يتناخـون

فوزه تحقق من قبـل يـوم الاعـلان
يوم ان ربعـه فـي محلـه يصكـون

هذا هـو الفـوز الحقيقـي للانسـان
اللـي بنـي عمـه عنـه مايصـدون

سهلن على اللي فالمواجيـب ماهـان
وصعبن على اللي فالحيـاه يتمنـون

ورجلن بلا ربـع وجماعـه وخـلان
خسران لـو عنـده ثمانيـن مليـون


يتبــــــع //

دانــه
29-03-2010, 04:23 PM
((أصدق شعــور الحب))


ياللي لك اصدق شعور الحب يجذبني


في حبي الأول وفي حبي التالي


ادخل على الله بصدك لاتعذبني

لاتحسب اني ونيسن دالهن سالي


ليا سألتك بروح الصدق جاوبني


مليت من كثر ماسمع مالك ومالي


مافيه داعي تهد البيت وانا ابني

ولافيه كاسن يشيل المر والحالي


عزالله انك بهم الحب منشبني


واربع وعشرين ساعه مشغلن بالي


تقول صبرك علي ولاتعاتبني


تراك تسوى عيوني يابعد حالي


وغير العيون النواعس ويش متعبني


حتى وانا داخل المسجدتهيالي


في ذنب حبك عسى الله مايحاسبني


ولايحبط بسيئاتي صالح اعمالي

يتبـــــع //

دانــه
29-03-2010, 04:24 PM
((ياغآلــيه))


ياغاليه مافيه داعي تغلين
غلاك في قلبي بليا تغلي
اغليك في شرع الهواء والمحبين
قلبي محلن لك وقلبك محلي
لكن مدري ليش عني تصدين
وتقفين عن قلبن بحبك يهلي
عشرة ليالي ماتلدين بالعين
واحاول اسمع صوتك ولاحصلي
مدري ظروفك تجبرك ماتردين
والا على ماقيل مزح وتسلي
خليتي العذال مني قريبين
وقالوا لي ارياء بس ماناسبن لي
ونصحني اللي جرب الشين والزين
والظاهر انه مخلص ومنصحلي
قال العرب مايطردون المقفين
من صد واقفى عنك خله يولي
قلت استريح وجنب النصح ياشين
نبظات قلبي تعرف ظروف خلي
خلك على فالك واذكرك بعدين
لامن عسرات الليالي صفن لي
ترا القمر لابد مانوره يبين
وتعاينه بين النجوم متعلي
واليوم جيتيني وعندك براهين
بظروفك اللي في غيابك طرن لي
وقبلت عذرك قبل بالعذر تبدين
ونسيت كل همومي اللي مضن لي
واجب علي اصدق اللي تقولين
علمك مصدق والخطا جايزلي


يتبــــــع /

دانــه
29-03-2010, 04:27 PM
((قـلب العــنآ))

طلبت انا الخـلاق والعالـم رقـود
انـه يلبـي بالليـالـي مــرادي

ياواحدن كل الخلايـق لـه سجـود

ياجاعلـن بالوقـت حـر وبـرادي

يامرسل ابراهيـم ومحمـد وهـود

يدعـون لتوحيـد كـل العـبـادي

ياسايقن غيث الحيا قدمـه رعـود
وبروق تكشف كنها النـور بـادي

تلطف بقلبن كـن يصـلاه بـارود
او كن تحـداه السيـوف الحـدادي

وقلب العنا دوم العنا فيـه موجـود

مافارقـه ساعـه وفيـه متمـادي

وانا اللذي قلبي من الهـم مظهـود

-همن سقط فالقلب واحـرق فـوادي

جاه العنا في تالـي ليالـه السـود

ليل السبات اصبح عناي وهجـادي

وانا عنا قلبي سبـب ناعـم العـود

اللي زهى الملبوس علمن سـدادي

والعين عين اللي على الصيد مجرود

اليـا طلـع لصيـد طلعـه وكـادي

وصغير سن وعاقل وغضت نهـود

واقـول مامثلـه بشـر باعتقـادي

يومن صدفته كان ممشـاه بركـود

مايعتجل بالمشـي ممشـاه هـادي

بغيت اسير الدرب والدرب مسـدود

واخذت لي موقف بعيـد انحيـادي

حاول لطيف الروح لاشـك محـدود

ولاحصل لزيـن وضـع انفـرادي

مع ايسره مقرود ومع ايمنه عـود

وكلن يقول انظـره لاكـود غـادي

اليا قصر بخطاه قالـوا نبـا نعـود

وانا ادري ان القصد بس ابتعـادي

وان كان زاد اخطاه بخطاهم الـزود

وايقنت لن اليوم ضـاع اجتهـادي

واقفوا ولادري حدهم بايـة حـدود

مدري حظر والا من اهل البـوادي

ركبوا على جيبن مشى تقل مطرود

نوعه سفاري وابيض اللون عـادي

واقفوا وانا قلبي مع الجيب مشـدود

ولولا الحيا لصيح لـه ثـم انـادي

وامسيت ليلي من غثا البال منكـود

والعين عافـت نومهـا والرقـادي

باسباب همن داخل القلـب موجـود

من بعد جاني عفت ملحـي وزادي

ولو التمنـي ياجماعـه منـه فـود

كان اتمنـى مـن ربيـع لجمـادي

لاشك مابه فـود والوقـت معـدود

ولا واحدن دايـم بظهـر الشـدادي

والله يجازي من رمى القلب بسكود

ويجنبه درب الخطا اللـي محـادي

والله يكافيهـا بـلا كـل حـاسـود

واهل النمايـم والحكـي والـدوادي

والله يصبرني علـى الهـم ولكـود

صبرن سواة ايـوب والا المهـادي


يتبــــــع //

دانــه
29-03-2010, 04:30 PM
((أسمحيلي))


قالت قصايدك نور الليل وسراجه

يازين نظم القصيده يوم تكتبها

وتقول هالبيت احس النفس تحتاجه

وقالت لي انه من الابيات معجبها

قلت اسمحيلي ياجرح القلب واعلاجه

اكتب قصيده على شانك وارتبها

قالت تفضل وغوص البحر وامواجه

وابدع بيوت القصايد في واكتبها

قلت ابشري في قصيدي والبسي تاجه

لعيونك اسرج خيول الفكر واتعبها

قلبي معك ضاع مدخاله ومخراجه

ولو ابتعد روحي الأشواق تجذبها

تراك لاغبت كني فاقدن حاجه

ماوالله اعيش دنياً ماتعيشبها

حبك مسيطر علي ومحكم سياجه

باسلوبك اللي عقول الناس يسلبها

غنج ودلع والحلا منهجك منهاجه

وعيون ورموش ماتومن عواقبها

سهومها للضلوع الحدب فجاجه

ولو اذبحتني ولاسلطه تطالبها

من حبها بالضمير النار وهاجه

نارن توقد مايبرد حمو لاهبها

لكن صون العهد واتعب على حاجه

اهل الهوى بالهوى عطها مطالبها

وان كان جيت وحصلي شوف وامواجه

ابي اقعد اناظر عيونك واعاتبها

هذي ترا من جديد الفكر وانتاجه

ياللي جروح الخفوق انتي سبايبها

اخذي جواهر قصيدي والّبسي تاجه

والك اتمنى اسعد الّحظات واطيبها

يتبـــــــع //

دانــه
29-03-2010, 04:32 PM
((أهــل النــفآق))


البارحـه مـن قبـل لايطلـع النـور

قدامـي الافكـار صـفـن طوابـيـر

واخذتهـن بالـدور طابـور طـابـور

وسطرتهن بالقـاف مـن بعـد تفكيـر

ولبستهن من شعري احساس وشعـور

حتى غـدن مثـل السيـوف البواتيـر

للشعر والشاعـر مواقيـف وحضـور

ولكـل ماقـف مـفـردات وتعابـيـر

بعـض الليالـي لـو تعـذرت معـذور

وبعـض الليالـي ماتفيـد المعـاذيـر

انحت حجر واسبـح بغبـات وبحـور

وانظم درر واصخـر القـاف تصخيـر

ماروح ادور زور مـن شاهـد الـزور

ولابيـع ميقافـي بحـمـر الدنانـيـر

لي معجبين ولي من النـاس جمهـور

لـو الشعـر ماهـو بكثـر الجماهيـر

كم شاعرن من دون الاعـلام مغمـور

ارهى مـن اللـي واردن جمـة البيـر

بس القصيد اللـي بالاعـلام منشـور

خلى يصير اللـي مهـو لازم يصيـر

لاقاضيـن عـادل ولافيـه دسـتـور

ولو احسـب النقـاد كثـر الصقاقيـر

لـكـن لاســوو ولاجـالـهـم دور

والقافله يدهـن لهـا السيـر وتسيـر

والخافي اعظم واكثر النـاس مجبـور

يساير العالـم علـى الشـر والخيـر

وش وخر اللي يحكم الـراي والشـور

ذخيـرة اللـي يحتمـون المظاهـيـر

ووش قدم اللـي دايـم يلـف ويـدور

اصبح هو اللي يقطع الـراي ويشيـر

الشيخ من عنـده عمـارت وقصـور

ويملـك رصيـدن ماتجيـه المخاسيـر

اصبح يشـب النـار وقـدوره تفـور

ويقول انا عنتـر وانـا سالـم الزيـر

وصكوا عليه اهل الرياء واصبحوا سور

وقالوا له انت اطلق شنـب بالمناعيـر

وصدق ومنهـم كـل ماجـاه مطيـور

ماباقـي الا ينفـض الريـش ويطيـر

يصـرح ويعلـن وفـي زوده قصـور

عشبـن خضـر لكـن مالـه نواويـر

غادي ومـن نهابـة المـال محصـور

دايـم علـى بيتـه ورود ومصـاديـر

ويكـرم ويهـدي وفـي ربعـه يبـور

واهل النفـاق تقـول مامنـك تقصيـر

قدم العـرب بالمـد والجـود مشهـور

واليـا عطـى مـده تعـدى المعاييـر

وان جاله المحتاج يشكي مـن الجـور

عطاه عـذرن مثـل روس المساميـر

ومن شوفته في مجلسـه دمـه يفـور

ولاوده بشـوف الجماعـه مسايـيـر

لو انه اقرب لـه مـن الحلـق لـزور

واخيـر لـه مـن عابديـن الدنانيـر

هو يحسب انه فاهقـن كـل مسطـور

لكـن مالـه عنـد الاجـواد تقـديـر

لاقول لـه صاحـي ولاقـول مسحـور

بـس الاكيـد انـه يسـوق الفواتيـر

وحظي بري ماعـم والعلـم مقصـور

على عظامن جبـرت عقـب تكسيـر

كم تاجرن ماله علـى النـاس منثـور

ريـف الفقـارى فالليـال المعاسـيـر

ماقصده انه يصبـح انسـان مشهـور

يرجـي جزاهـا مـن ولـي المقاديـر

يالله عسى من يفعـل الخيـر ماجـور

والا المنافـق مـالـه الا زمهـريـر

هوى روحي
29-03-2010, 04:51 PM
دانه
صح السان شاعرها
ويسلم يد ناقلتها
شاكرةلك روعتها
حفظك الباري
تحيتي لك وتقديري
هوى روحي

جهز العطاوي
29-03-2010, 05:07 PM
دانه يعطيك العافيه على الجهد المميز

والله يرحم الشاعر وبسكنه الجنه هو وجميع اموات المسلمين

ديوااااان رااااائع

مع التحــيه

دانــه
31-03-2010, 01:14 AM
هوى روحي
العطاوي
الف شكرا لكم

يارا العامرية
15-04-2010, 12:47 AM
اشكرك ع الجهد الرائع " دانة " ..
عافاك الله ..

دانــه
15-04-2010, 12:12 PM
اشكرك ع الجهد الرائع " دانة " ..


عافاك الله ..


الرووعه حضوووك يـاااااارا

العنيــــدهـ
02-05-2010, 06:48 AM
صح لسان شاعرها ولاهنتي ع الاختيار المميز
يعطيك العافيه

كليم الليل
08-05-2010, 01:59 AM
الله يرحمه


1000شكرررررررر على المجهود الرائع

نــجــم
08-05-2010, 02:00 AM
صح لساان شاعرهاا

ويعطيك العاافيه على ايراد الديوان الرائع

تقديري لك ..

شارد الذهن
08-05-2010, 02:01 AM
يامال الجنه يابو ريناد
يامال الجنه يابو ريناد
يامال الجنه يابو ريناد

دانــه
08-05-2010, 12:04 PM
أشكركم حبايبي ع المرور الراائع

الله يرحمه ويغفرله الميموني ياشارد وكلن ويومه ياخوي

سـعـود
03-06-2010, 04:43 PM
يــعــطــيــك الــعــافــيــه عــلــى الاخـتــيــار الــرائــع

تـحـيـاتـي و تـقـديـري

عبد الله
03-06-2010, 05:41 PM
الله يعطيك العااافيه على الايراد

تقديري ..