ديوان الشاعر الكبير // محمد بن خلف الخس (البستان)

[الهاوي]

اخواني واخواتي اعضاء منتديات عيال الحمايل

يشرفني ويسعدني ان اقدم لكم هذا الديوان البسيط الذي يعتبر
قطرة من بحر البستــان محمد خلف الخس
ولكم فائق تحياتي وتقديري
.................................................. ...
قصيدة شاعرنا في رثاء المغفور له بأذن الله
الملـك فـهـد بــن عـبـد العـزيـز :
.................................................. ..




ياعين هل الدمـع صـافٍ غزيـرا=مـن فجعـةٍ جتنـا سمعنـا نباهـا
تكسّـر العبـرات فـوق النظيـرا=يـوم الاذاعـة بثـت اول نـداهـا
نـداٍ يخلـي فكـر الامـه يحيـرا=ويكـدر العالـم ويزعـج هـواهـا
فجيعـةٍ فيهـا يحـيـر البصـيـرا=علـى جميـع المملكـة وصدقاهـا
ساعة سمعنا العلم حـاس المريـرا=ورتجـت العالـم وبيّـح خفـاهـا
تقول شعب المملكـة فـي حشيـرا=يومٍ بـه المرضـع تضيّـع نماهـا
الشعب كله فـي صيـاح وزفيـرا=يبكي ويبكون العـرب مـن وراهـا
في ساعـةٍ فيهـا النّفـس مايسيـرا=وعيون كـل الشعـب ينهـل ماهـا
مات الذي مثـل السـراج المنيـرا=سلطان نجد اللي عمرهـا وحماهـا
ابـو اليتامـى والعمـاء والفقيـرا=وابو الشعوب اللي رفـع مستواهـا
وابو صغير السـن وابـو الكبيـرا=وابو العروبه مـن شفاهـا إللفاهـا
خلا فقير الشعـب يلبـس حريـرا=ويعيـش عيشـه فالعمـر مانساهـا
هـو الفهـد مالـه سمّـيٍ خشيـرا=زعيم كـل العـرب رأس زعماهـا
وليا جاء على الاسلام شئٍ عسيـرا=تحيـر فيـه شعوبهـا وروسـاهـا
خـلا العسيـر بقـدرة الله يسيـرا=خلّـص مشاكلهـا وطمّـن عداهـا
وايضا وراء الشعب السعودي سهيرا=لابانـت الخلّـه عليـهـم رفـاهـا
لو أمدحه كبر السمـاء المستديـرا=وكثر النجوم وكثر الارض وحصاها
ما حصيت فيه خصاله اللي يديـرا=اللـي فعلهـا فالحيـاه وقضـاهـا
كـم دولـةٍ عمّـر بناهـا تعميـرا=عاشت إبفضله ونجحت فـي بناهـا
قبله وهي في هـول نكـر ونكيـرا=لينه عليهـا ارخـى يـده وحتماهـا
خلا دول الاسلام فـي كـل خيـرا=يصرف له اشياءٍ عند ربي جزاهـا
وكم واحـدٍ مظلـوم جالـه ثويـرا=ويديه مـن خيـرات ربـي ملاهـا
وخيله على الاصحاب ماهي تغيـرا=وإلا العـدا يلعـن لـك الله ثواهـا
حتى عـدّوه فالسمـاء لـو يطيـرا=في قـدرة الله نزّلـه مـن إعلاهـا
يخضع حدر رجله ضعيفٍ حقيـرا=يجـي مثـل صـدام فـي منتهاهـا
يومنـه أخطـأ دربـه المستنـيـرا=جمّجمّتـه بنعـول رجلـه وطاهـا
خلاه يرغـي عقـب ذاك الهديـرا=حتـى معالمـه الكبيـرة محـاهـا
خـلاه يرغـي كارغيـان البعيـرا=في غرفـةٍ فيهـا بلاهـا وجلاهـا
هذي فعول مظيـر الخصـم ظيـرا=فهد الفهود الليـث مقعـد صغاهـا
ويوم انتهت ماعـاد عنهـا مطيـرا=اقفـى عـن الدنيـا وخـلا غثاهـا
عساه فـي جـاه البشيـر النذيـرا=في جنة الفـردوس يسكـن ثراهـا
والشكـر للـرّب العزيـز القديـرا=والحمد له حيـث المصيبـه رفاهـا
قـاد السفينـه فـي محلـه خبيـرا=اللـي ليـا قـاد السفينـه قـداهـا
عبد الله اللـي مايخـون الضميـرا=تبشر بعـز المملكـة يـوم جاهـا
لعلّـهـا تنـعـم بحـكـة كثـيـرا=وسكانهـا عسـاه يكسـب رضاهـا
تصير فـي عهـده ربيـع وغديـرا=والشعـب يلقـى نعمـةٍ ماشراهـا
ولي عهده جعل ما أجلـه قصيـرا=الله يجيـره مـن مصايـب بلاهـا
القايـد الوجـه البشـوش السفيـرا=ريس ركـون المملكـة ووزراهـا
بجـاه رب البيـت مغـن الفقيـرا=وبجاه أبونـا ادم وموسـى وطاهـا
تعز الاسره مـن كبيـر وصغيـرا=والمملـكـة تعـزّهـا وتحمـاهـا
يالله يالـلـي للهبـايـب تـديــرا=يامنشئٍ مـن غـر الامـزان ماهـا
تحمى السعود من أي شـرٍ شريـرا=حيث انهم شجـرة يـذرّي ذراهـا
يعيـش حـدر ظلالهـا المستجيـرا=من صكته سمـر الليالـي نصاهـا
ال السعـود اللـي تعيـش الفقيـرا=لعـل ربـي مايـفـرّق عصـاهـا
وهـذا وصلـى الله وسلـم كثيـرا=على نبيّن كل الامه هداها

[عطر الليل]

قصيدة شاعرنا بمناسبة عودة الشيخ
جابر الصباح من رحلته العلاجيه
فـــي اغـسـطــس 2005
-----



فالسنه عيدين والثالث قـدوم الشيـخ جابـر=يوم عاد من المرض سالم على الديره واهلها
مرحبا عـداد مايـذّن علـى روس المنابـر=او عدد ماهلّت المزنـه مـن الماطـر هللها
فيك يانور الوطن واهل الوطن والكل خابـر=انّك العرق المغـذّي للبـلاد ومـن دهلهـا
جعل ربّن يبعـث اللـي ميّتينـن فالمقابـر=عنك يرفع صدمته وينـزّل الصحـه بدلهـا
ياحبيب الشعب كل الشعب متكـدّر وصابـر=من مرضك نفوسهم مرضا يشايلهـا زعلهـا
من ولاهم لك وحبك جعل شرّك عنك عابـر=تهتف امتّك الذي عدلك عـن الميلـه عدلهـا
لك محلّن فالقلوب من الصغار اليا الاكابـر=حيث وصّلت الوطن واهله حياتن ماوصلهـا
من يبا ينسا جميلك من جميع الشعـب ثابـر=وانت لولا الله ثم لولاك كان الشعـب اكلهـا
شلت عن شعبك احمول الظيم فأيّامن غوابـر=مايشيل الكايدات مـن الحمـول الا جملهـا
عشت ياشيخ البلاد اللي على الصكّات صابر=شايلن هم الجميـع وكـل صكّـه محتملهـا
يوم جتنا قـوّة اللـي معتـدي دقّ الاشابـر=واقفن في وجهها كالليـث ليـن الله خذلهـا
بالسياسه والصبر شلته مع المطـلاع دابـر=ثم رحل من فضل رب البيت ماكنـه نزلهـا
كن جيشـه ماتمركـز بالمهاجـع والعنابـر=قوّتن مثل الجـراد المنتشـر ربـي فشلهـا
التقت في جيش داس خشومها هي والصوابر=ضربتن يصبح بها الشايب ولد ظافن سبلهـا
يوم صار القصف والماص الحمر جاله تنابر=اعذر الطمّاع وايدينه عن الطمعـه غسلهـا
ثم غدا كبر الذبابـه عقـب تفتيـل العظابـر=قادها الله قود لين انه رمابـه فـي وحلهـا
في قيادتك الحكيمه عنـه سدّيـت المعابـر=مالقا دربن يعبره مع سهلهـا ومـع جبلهـا
عشت ياامير البلاد اللي بك الشعب امتجابر=راضي (ن) في دبرتك وعيون حسّاده كحلها
جعل نفسن ماتحبك مالهـا فـالارض قابـر=وان حصل يوم الحساب الله لايحسن عملهـا
قلتها من قلب مخلص ماقصد نتف الاوابـر=والسلام ختام وايـام الفنـا يـدرج عجلهـا

[عطر الليل]

بالله ياهل البيت لاتشلعونه


-----


بالله ياهل البيت لاتشلعونه=خلوا عيوني من حبيبي تروى
ثم لاتهوزونه تبا تضربونه=جعل اليدين اللي تطقه تكـوى
جلده حريرٍ لو تبا تلمسونه=مثل النفل لو تلمسه لمس ذوى
غروٍ نياشين الغلا في عيونه=يضحك ويشرلي على القلب جوى
يقول هذا لك ولايقربونه=وابو الذي يزعل بعشرين ضوى
وانا مليك ارضاه ماجوز دونه=قلبي معه في يديه من حيث موى
حيث اني افهم ماخفى من ضنونه=وادري بقلبه من قديم وتوى
واخشى عليه من العرب ينضلونه=انا اشهد ان اللي مسويه سوى
نبنوب موزٍ مايلات غصونه=عرقه من الجم الزلال يتقوى
والخد براقٍ تكاشف مزونه=مثل المشاعل في مقاديم نوى
عنق الغزال مخلعاتٍ متونه=والثوب من فوقه عليه يتطوى
في خاطري مافالبشر مثل لونه=مما خلق ربي من ادم وحوى
الله على من شد مجمع قرونه=واكنع عليه وفي رقبته تلوى

[عطر الليل]

يامرحبا يااللي لك القلب مفجوج

يامرحبا يااللي لك القلب مفجوج=عداد نسناس الهبايب ليا فاج حطيت ريع بوسط القلب هجهوج
ياعين حر بالخضيرا ليا راج حبك طفح بي طفحت الساج بالموج=ماعاد لي عن حبك اليوم مخراج اودعتني لاشرب ولاكل ولادوج
ولاستطعم المنطوق من كل هراج لاغبت عني دق بي كل دالوج=قامت تواردني هواجيسي ازراج قلبي يجيني نوج واضيعه نوج
يجيه من فرقاك سجه وسوهاج كن البنات الشقر عندي من الهوج=ماكن به غيرك على الارض دواج عندي جميع السن بنات العرب عوج
الا لسانك فيه لي طب وعلاج في هرجتك شئ من السحر ممجوج=والنور من غرتك يطلع وينباج وليا ضحكت بذبل مابها فلوج
مثل البرد من مزنة تلعج العاج واغضيت في سودن بها السحر مدعوج=ترسل سهوم الموت من حجره افواج تنثرن شقر مثل كاسي الغوج
تاصل اليا ردف كما حزف ديباج جاني بلا فالقلب يسوجني سوج=يتلني يمك لك الروح تنعاج كني اليا شفتك على انهار وبروج
والاملك شعبٍ على راسي التاج واليا بديت بضحك وهروج واغنوج=قلبي غدا زبده على صالي الصاج او مير كني بين الاضلاع مخجوج
بشلفا مثل شلفا غنيم بن فراج غنيم بن شبلان مخلن له سروج=ليا صاح في تالي الرمك راحت امراج تبا تخليني من العقل ممروج
على العمر شامان تدرجني ادراج ياروح روحي كان مامنك منتوج= خف الغلا لاعاد تحرجني احراج خليتني يازين الاوصاف محروج
صليت فيّه شرق ماعاد يحتاج لو قلت سير وخذ عندنا روج=جيتك على الاقدام ممشى ودفلاج
اجي وانا مبهوج واروح مبهوج=ليا حصل لي منك لو رفة احجاج

[عطر الليل]

سبحان من سوى الاوادم من الحور



سبحان من سوى الاوادم من الحور=انا اشهد ان الله هو اللي يسوي
زولٍ خلق من نور وبخدته نور=نورٍ من الخالق ماهو نور ضوي
ادعج غنج خده به الملح منثور=تقول بدرٍ بان بفتوق نوي
وعيون تذبح بالهوى كل منعور=سودٍ مضاليلٍ على القلب سوي
نيشانهن رمانة القلب ياسرور=وحرابهن من دم جوفي تروي
هو مسرفٍ فيه وانا فيه مجبور=حبه ملى قلبي وجوفي وجوي
من زود حبه كن كل البني عور=لاغاب عني قمت ادوج واهوي
ابوجديل اشقر على المتن منثور=واهني من بيديه فيه متلوي
ان كان شدو يم وسمية الثور=واحسرتي لاقالوا البيت طوي
وان مت من مركوز الانهاد معذور=اللي عليه هالزمان متكوي
ولو هو عطاني صاحبي كبر الاظفور=قلت الدواء منك وعلى الله بروي

[عطر الليل]

الله من قلبٍ عوى عويت الذيب




الله من قلبٍ عوى عويت الذيب=ذيب عوى لجت ضلوعه ولجي
عليك ياراعي العيون المهاديب=سودٍ مضاليلٍ وساع ٍ وبجي
سودٍ تشذب بسرة القلب تشذيب=طحت بخطرهن يالله انك تنجي
سهومهن تسطي على القلب وتصيب=تخج صندوق المعاليق خجي
ياصاحبي حبك لقلبي عواقيب=ارفق علي شوي قبل استلجي
يا اللي عليك عيون الامه مراقيب=تقول بين شفاك درٍ يمجي
والخد براق المزون المهاضيب=اللي رعوده رجت القاع رجي
يامنوتي مافيه شك ولاريب=منساك كود انسى صيامي وحجي
يابو نهودٍ شلعن مقدم الجيب=كمشمشٍ عرقه من الماء ينجي
من فوقهن شقرٍ تغذى على الطيب=ريح الشمطري في طرفهن يعجي
ذيل اشقرٍ ينسف خلاف العراقيب=تطلب عياله بالمهر والترجي
هزه وزرفات السبايا جناديب=لوما شليل السبر والمال هجي
ذبحتني ياسيد كل الرعابيب=فجيت قلبي يأريش العين فجي
فجن مثل مضراب شلفاء تراحيب=شلفاءاً تخل الدم الاحمر يكجي
لا وردة من كف مرو المغاليب=والخيل كاسيها ضبابٍ وعجي
ياعاذل المشتاق مابالهوى عيب=ماذقت لذاته عسى امك تدجي
لو ذقت من حلوه ومره تجاريب=مالمت طراد البني الغنجي
نجل العيون مزعلات الخطاطيب=شعوٍ عذاب مقطعين الفرجي
لو يحصل ليديك فيهن مقاضيب=مالمتني في حبهن والتهجي
يم الحبيب اللي هروجه تعاجيب=ياعين لديله ويارجل سجي

[عطر الليل]

ياناس خلوني تراني تفجرت




ياناس خلوني تراني تفجرت =ماطيعكم مير اقصروا الحكي عني
ياعاذلي كثرت حكيك وكررت=نصايحٍ لاشك مايقبلني
مهما حكيت وقلت واعلنت واسررت=اذاني الثنتين مايسمعني
انا بسكراتي من الحب مافكرت=وانته تبي تشره علي تعذلني
لو يتهيا لي بوسط الفضا طرت=سويت لي جنحانٍ يساعدني
واليا بغيت اصل هوى البال سيرت=مراكز التفتيش مايمنعني
اجيه لو اني على عمري اخطرت=وربي اليا منه رحمني ظمني
ياصاحبي من زود حبك تدهورت=منك الهموم الجايرات اضهدني
نقلت حملٍ لو يحمل على الفرت=شفته على الواحد بحمله يحني
عزرتبي يازين الاوصاف عزرت=وانا بن عمٍ لك ومسلم وسني
يحقلك ذبحي لو اني تغيرت=واليوم ذبحي وش تبي فيه مني
اعطف علي شوي في ماتخيرت=شيٍ يخلي خاطري يرجهني
لو هو بشوفك بس مناك لاسرت=والا العلوم الباقية يقمحني
يامورد الخدين من عمري اعذرت=واسبابها سودك اليا سلهمني
هاك العيون اللي اليا شفتهن حرت=تقول فيهن كهربٍ يجذبني
اليا شفتهن هللت لله وكبرت=اللي مسويهن وفيهن فتني

[عطر الليل]

راكب اللي تقول مذيّر ذاعرينه



راكب اللي تقول مذيّر ذاعرينه=سامعٍ صقعة البندق وهو مارمقها
يوم فز وتشمحط للمبندق بعينه=حاذفٍ صفرة البندق وهو مافهقها
وانصفق مقفي تاصل لحيّه يدينه=لو يباري القطاه اللي تقلب سبقها
اشقرٍ من نسل شقران متخيرينه=من حرارٍ يعرفون الرجال معمقها
اوصله شاعرٍ كل العرب خابرينه=كم بيوتٍ مثل نظم الجواهر طرقها
هو حميد الرشيدي كلكم عارفينه=المعاني مع اهل العرف يفتح نفقها
سلم الله رجاه وسلم الله يمينه=حيثه الكلمة العوجاء ماعمره نطقها
باغ ٍ اخبره في علم بيني وبينه=الامانه غدت وامينها اللي سرقها
لو حلف لي بوجدانه وربه ودينه=ما أقبل العذر لو انه بغيره لصقها
وانت تدري لاشك الحق وينه ضمينه=وين حلال مشكلها ومدّي رفقها
ياحميد الطرب والانس راحت سنينه=مع سنين ام خمس اللي تشاعل فشقها
في يدين الذي مضرابها حافظينه=عند تال الركاب اليا تناضح عرقها
في نهارٍ يفر المرء من والدينه=تذهل المرضعه عن حملها من رهقها
يظهر الحق هاك الوقت لمدورينه=كانها طارت الابصار مما طرقها
واكرم الناس بالذمه يهّمل جنينه=لو يبا كبر حبة خردله مانشقها
يالله العن ابليس وعالمٍ تابعينه=عالمٍ ماتراقب ربها اللي خلقها
الزمان اختلف والخلف من وارثينه=والضمير انعدم والناس اخذها وذقها
لو تطالب بحقٍ والعرب شايفينه=قيل لك فاتت الدعوى وشربت مرقها
واصبح الحق في وسط البحر حاذفينه=وان تكلمت يالرجال طالت شققها
وانفتح باب حسادك على مصرعينه=واركبت حصنها العالم وهدت سلقها
يامكافي تكافي شر الارض ودفينه=وإبعض الناس ليت الله سحقها ومحقها
كود من فيه خيرٍ جعل ربي يعينه=والبشر خلق ربي مير ربي فرقها
فيه من ينفع العالم ويندا جبينه=وإبعض الناس ماودك تعرض شبقها
مير با قول بأعلى القيل ياسامعينه=واطلب اللي خلق سبع البحور وفلقها
جعل ربي يعز الدار مع حاكمينه=ديرةٍ كل من جاها شبع في شنقها
من فضل قايد الدولة وما سابقينه=شبعت الناس وارتاحت وربي رزقها
والحسد والنكد يرجع على فاعلينه=والقلوب الغشيشه جعل يابس ورقها

[عطر الليل]

لولاك يالورع الصغير الفروعي



لولاك يالورع الصغير الفروعي=ماجيت من نجعي لهلك متعني
ياصغير الانهاد طيرت شوعي=دايم ورجلي يمكم ماتوني
عليك لونه من امك بشوعي=كن العرب تتنهبك وتغبني
في هرجتك لو هي قليله قنوعي=لو كان هرجك يسلب العقل مني
يوحيك قلبي قبل توحي سموعي=حتى العروق الجاريه يشهدني
حبك تخلخل مع مفالج ضلوعي=حتى بنوم الليل ماغبت عني
وان غبت عني يامليح الطبوعي=قامن دواليب الغرام يحدني
فقعت ثم قامت تسابق دموعي=مثل الخرز من رمشهن يمطرني
واقنب كما ذيب عوى عقب جوعي=واليا عوى معه الضلوع يعوني
لاقام يقنب في طويل الفروعي=ماشاف مخلوقٍ ولاشاف جني
ارض خلا مابه من الناس دوعي=بس الفجوج الخاليات يهوني
الذيب يقنب ماحصل له متوعي=وانا بلاي اللي بحبه شحني
راعي جديل فوق ردفه اشروعي=ذيل اشقرٍ شاف السبايا تعني
لاشافني زعلان ماعاد يوعي=ذولي مقابيلٍ وذولي يجني
يقول انا لك شايمٍ عن ربوعي=واقول مافاد الحكي والتمني
ما أنت متهيٍ لي لو احب كوعي=دونك حجاجير تحن وتوني
الا يجيبك من يجيب الرجوعي=مخلي الفياض الممحله يخضرني
او يأمر الله من يقود الجموعي=عبد العزيز الفيصلي يمتكني

[عطر الليل]

مرت عليَه يوم عيـد رمضانـي



مرت عليَه يوم عيـد رمضانـي=نبنوبتن مثـل الجنيـه ادهشتنـي
قالت صباح الخيـر يامودمانـي=قلت الحيـاه ابغرتـن صبحتنـي
اول سـلام معاقبـن باليمـانـي=بصابعن مثل الذهـب خامستنـي
قامـت تبسملـي بغـر الثمانـي=حتى على الموت الحمر وردتني
تضحك بغرٍ كنـها القحويانـي=بشفيها ذوب العسل لـو عطتنـي
في خدها الموت الحمر له غواني=بعيونها اللي ساحـره كهربتنـي
اموت واحيا بين عشـر الثوانـي=لارقرقـة بعيونهـا واخزرتنـي
خزرة غلا في ضحكتن بغنجانـي=منها حياةٍ لـي وفيهـا اجرحتنـي
تظهر لي رموزن تحشر احشراني=فيهن نياشيـن المحبـه دعتنـي
لا شفتها قلبي يروج اروجانـي=وين اعرضت ليه وين انطحتنـي
لولاه تردعها الضلوع المحانـي=كان الحياه مع العـرب فارقتنـي

[عطر الليل]

صاحبي ناشنـي بالمـوده نـوش



صاحبي ناشنـي بالمـوده نـوش=نوش مسقًا تساعر بوسط الجـاش
تلنـي تلـت الركـب للقنطـوش=يـوم قفوبهـن شافهـم حشـاش
عوص هجنن عليهن مصطر غوش=وجههم كاسبًـا والقفـا منحـاش
لاعني بالهوى لوع فرخ وحـوش=واودع الكبد مـن سبتـه حمّـاش
زين فوق المبيسم ثـلاث رقـوش=فوق خدًا يشادي شقـاح الشـاش
ان نطحه الهوى ضامره منجـوش=وان قفاه الهوى شايفـه ماعـاش
وان ضحك بالرهايف يابو علـوش=مت واعمري اللي خـذاه بـلاش
يوم احلي جديلـه شليـل كـروش=شافت السبر يومي على الادبـاش
ذيل شقرًا تكزه بوجه الهـوش=كـل ماامهلهـا بالرسـن تهتـاش
آه يامشخص الصايـغ المنقـوش=فاصلاً في حماره بيـاض قمـاش
مشخصًا صافيًا ماعليـه عبـوش=كامل الوصف مافيه قولـت مـاش

[عطر الليل]

الحب بلوى وأكثر النـاس بلـوى



الحب بلوى وأكثر النـاس بلـوى=وأنا دليلي يأهـل العـرف عينـي
القلب ماله فـي سميـره وسلـوى=لـو أكثـر العالـم لهـن ميدينـي
مالي بعض الصيد عسـاه يلـوى=ما ينشرح له خاطري لو يجيني
القلب شفه فـي عماهيـج علـوى=نجل العيـون مهلكـات الجنينـي
اللي مجاذبهن من طيـور شلـوى=مرويـن حـد مذلقـات العرينـي
لا جا الدلع يا بوش والحكي حلوى=لو كان قلبك مـن صفـاةٍ يلينـي
ملزوم قلبك يجزل اجـزال دلـوى=لا جتك تمشـي تنعـط عطفتينـي
والرأس ذيل كروش ما جت بفلوى=شقـراً تكـم معيـلات القطينـي
لو قابلت لك في هـدوم سملـوى=تغنيـك عـن نزالـة المشرقينـي

[عطر الليل]

هلا يأم العــيون المظله



هلا ... هلا يأم العــيون المظله = الــلــي بعــيني مـــالـــهن حلايـــــا
فيـهن تـقول طــراد خــيلٍ وسلــه = امـــا هــل الـــردات والا الطنايــــا
لا احـذفـو عــن المـهار الأجـلـه = وردوا لبــيضٍ كنـــهن الحـــنايـــــا
ورداتـهم تشـفي القـلـوب المغلـه =من غـير حـــقرانٍ لــباقي النحايــا
يــا بـنت من ينـطح وجيه المهلـه = زيـــزوم عــيراتٍ ومقـــدم سبايــا
مــع دربــه العـيرات مثـل الأهـله =دايــــم سماريهن تتـــالــى حفايـــا
العــذر مــنك انـي فـلا قلـت زلــه =لا طـــاب حـظ مصورين الحكايـــا
مـا فـيك مـا يـنـقال فــي كـل مـلـه = وعذروب أهلك يعـــدلون السرايا
والزين فيك أحلا الوصايف مدلـه = مـــالك بغضـــات الصبايا تهايـــــا
شمسٍ على روس النوازي مطله =شــعاعها يـــرسل ســـهوم المنايا
لا بــانت الـغـره عــليها اسـم الله = بـــأطـرافها تقل يتكاشف مرايـــــا
مـثل الـبروق بمـزنـــةٍ مستـهلــه = تــوضي وكاسيها أشـقرٍ لـه زوايا
مــا شــفتها الا ساعة مستزلــــه =يوم العياد ويوم ذبح الضحايــــا
فــالماقع اللي شافــها النجع كلـه = تلــعب نهــار العيد بــين الصبايـــا
بحـجاجهـا سيفٍ من الهند سلــه=تشـرق وتــرهق موسعين الهوايـا
فأن كان هذا سب أنا راعي لـــه=يـــــا ســيد كـل مفلــجات الثــنايـــا
وانا ما أسب الناس طبعي جبلـه= لو كان أشوف الناس تمشي عرايا
إلا لـيا جــــاء شــاعرٍ فيـه خلــه = مـضـيــعٍ دربـــه وعــنـده نــــــوايا
اعطيه علمٍ لين دربه يدله=واسنعه بالي يسوق المطايا

[عطر الليل]

هذه قصيدة تعبر عن نفسها



الشيخ لاقام يتهرّب عن الناس = تراه مع ورك المطيّه تدلاّ
لوهو ولد شوخن بعيدين الارماس = اليا استهان بحق الاجواد ولاّ
لاجنّب الواجب ودلبح مع الساس = وانحاز مع بعض الوجيه يتسلاّ
مثل الجمل ماعنده شعور واحساس = اليا ملا بطنه تياسر وفلاّ
واللي يبيله سمعتن ترفع الراس = يرقابها روس العلا ويتعلاّ
ياخذ مثل سلمان بالطيب مرواس = مشرّع البيبان في كل حلاّ
لاجيت بيته شفت من كل الاجناس = تشرب وتاكل والمخابي تملاّ
ينسف على العالم ملايين الاكياس = واللي مكذّبني يجي ويتحلاّ
ذولا مصاديرن وذولاك جلاّس = مثل الورود اللي تعطن وتعلاّ
هذا الذي بالطيب ماهوب ينقاس = اللي على طول الدهر مايملاّ
شيخن نظيف العرض من كل الادناس = مزبّن المظيوم ريف المقلاّ
زودن عليه بقوة الراس والباس = عوق العديم اليا غلض واستجلاّ
الله يجيره من صواديف واتعاس = حيثه علينا مثل قيفن مظلاّ
ولاخطاة الشيخ جعله للافلاس = بخيل ورزيل وجامعن شين دلاّ
اليا ذلف ذلفة دهام بن دوّاس = اللي عن الديره واهلها تجلاّ

القصيدة بصوت الشاعر (( البستان ))

http://www.dwaihi.com/25nab121.ram

[عطر الليل]

يقولـون قلبـك دايماً للقنص يتوق



يقولـون قلبـك دايماً للقنص يتوق=وانا اقول هـذي رغبـةٍ لـي وعاشقها
انا لـيّ رغبـه والصقاقيـر فـن وذوق= يعرف الصقـار مـن عشقهـا وتشبّقهـا
وانا رغبتي وهوايتي شـي يـا مخلـوق=هوى البر في غـرب الديـار ومشارقهـا
ليا جيت روضٍ فيـه مختلـفٍ الزملـوق=نبانيـب نبتـه ناعـم الريـح يطرقـهـا
مساقيه نوٍ ممطرٍ بـه رعـد وبـروق=تهشـم مزونـه فالوطـا ليـن يغرقهـا
عقب سيلة العشـب يتعلاّ نباتـه فـوق=تشوف الفياض مـن النبـات وتضاوقهـا
تشوف الزبيدي كنه المرو فـالرقـروق= والأشجار ظاهـرٍ الزهـر مـع مفاتقها
ليا دجت فيه عصير والاضحي شروق = يونّسـك شـوف البـرق فيـه وتخافقهـا
وانا فـي يـدي شيهانـة جنسهـا يلـوق=لو الخارم المقفي علـى الخـفو تلحقهـا
ليا ظفت الجنحـان كـن السمـا مشقـوق=سوات السهم والعيـن مـا عـاد ترمقهـا
عليها اطيـارن يبهـر الحاكـي الصـدوق=وفعلٍ يحبـب فـالشياهيـن وطرقهـا
ليا شقّت الداغر علـى القلـب والمعلـوق=تعجّـب ولله العـجـب يــوم تشلقها
اناستك ياراع الولع جعـل مالـك عـوق=لعـل السلامـة فـي حياتـك ترافقـهـا
أخذ فالقنص ياللي تحب القنص غدروق=ترى ونستك فـي آخـر حياتـك تشفّقهـا
يقوله لك اللي ما يبا شربـة المطـروق=عسـى الله يوسعهـا لنـا مـا يضيقهـا
لياجيت قاعٍ عشبه طبوق فوق طبوق=تساقيـه سحـبٍ كـن الأنهـار مدافقهـا
ما والله اغبط اللي يحبون ظـول السـوق=ولا أحـب ادوّج فـي الديـار وحدايقهـا
احب المطر والخيل واحب شوف النـوق =واحب الهنـوف اللـي تكاشـف عواتقهـا
ليا صار مـع جمالهـا عقلهـا ماثوق=ليـا شفتهـا تقـول سبحـان خالقـهـا
عيـون المهـاه وعاتـقٍ مـارقٍ منتـوق=وخدٍ كما شمس الضحـي فـي تشاعقهـا
تبسّـم ابيـض ذبّـلٍ مـا بهـن فـروق=كما الحـص مـن محـارةٍ يـوم تفلقهـا
ليا شفتها قـام يحدانـي عليهـا الشـوق=ولوهو بكيفـي كـان والله مـا فارقـهـا
لجّود معضّ الذيب حاضر ما هو مفهوق=واشم الخدود اللي كمـا الـورد وانشقهـا
هذي رغبتي وهوايتي والاّ العمـر ملحـوق=ولي رغبةٍ فـي الحـر الأشقـر محققهـا
واحب اللذي به لـون من ريشـة الغرنـوق=به الميزة اللي راعـي الصنـف يعشقها
اليا صار فوق الوكـر ماكـن فيه سبـوق=سراويلـه تغطـي كفوفه ذلايقها
عذاب الطيار الخارم المقفي السبوق=ليا شافها مافادها طول سبّقها
اليا من لحقها فالهوى ساق روحـه سـوق=كما سوق ميـراجٍ عطـى النـار سايقهـا
ضربها بمخلابٍ يخلاّ العظام فتوق=فراها ومن حرصه تنكّس وعلّقها
وعطيته من الداغر نسورٍ يذوقه ذوق=علشان يرمز لختها حين يرمقها
ليا صادها اللي لاطرد مرهيٍ بلحوق=بقاعٍ خضاره كل عينٍ يشوقها
هزعت وشعمت النار فالحاجر المرموق=وخوياي ربعٍ تعجبك في طرايقها
نشاماً توسّع خاطر الضايق المغلوق=على المرجله والطيب عجلٍ تسابقها
يجي شغلهم لاهو بنيٍ ولامحروق=تسوّيه أيادٍ جعل الاله يرزقها




قصيدة للشاعر و لكنها ليست بصوته

http://www.dwaihi.com/poem/32qnas6.ram

[عطر الليل]

قصيدة اسندها الشاعر : نغيمش الزويكي لشاعرنا

يامحمـد خلـف يالخـس يالاستشـاري=ياطبيب الهوى البستان وانـت الخبيـري
اسند العلم لمن يسند خصيمـه اجبـاري=والله انـك استـاذ الشعـر والامـيـري
عطني العلـم يامحمـد ووقـع قـراري=انت ونعمسـت الاريـا عليـه شويـري
عطني الكلمـه اللـي ماعليهـا غبـاري=كلمةٍ نعتمدهـا منـك تبـرد ضميـري
من عرفتك تعطينـا القـرار الـوزاري=انت اخوي الكبير وتعتبرنـي وزيـري
انت شاعرمطير وكل مـن كـان داري=مير بعض العـرب تذيـك تاتستشـري
وان تحرك جناح الحر صـارم حبـاري=ليا كفخ في جناحـه خولبـت ماتطيـري
والمقاسيـم يالبسـتـان رد اعتـبـاري=والتجارب تبيـن لـك قليـل وكثيـري
والمقاديـر مقسومـه مهـي باختيـاري=مايقدر على المخلـوق بامـر القديـري
والمغازي بها مهـزوم والا انتصـاري=ودونها الدرب يامحمد غرار وعسيـري
وانت لك وقفةٍ يابـو خلـف واقتـداري=والنشامـا تخـلا للنـهـار الكبـيـري
وانت لك عند كل مطيـر قـدر وقـاري=دايـم الكايـده يالخـس فيهـا قديـري
لاتخلـي رفيقـك ماتفـيـد الـعـذاري=انت من روس علوى ملحقين الكسيـري
من زحازيح ربعـن يامحمـد خيـاري=يذبحون السميـن ويحتمـون القصيـري
يامحمد على الاجواد تجـري الجـواري=ولاتنجت في غيـرك ولالـي سفيـري
يامحمـد بـلا قلبـي علـومٍ كـبـاري=حرقت في ضميري وانت عون وبصيري
ودي اشرح لك القصه بكل اختصـاري=واتسمع مـردٍ منـك جـزل وجديـري
من غلا عيطموسن طال معها انتظـاري=فوق عشر سنوات وش عليـه تشيـري
شاحنـي وابتلانـي بالمحبـه اجبـاري=اجبر القلب فـي حبـه وغيـر مسيـري
شاحني شوحة الورعان لعظيـم سـاري=قام يلعب بقلبـي لعـب ورعٍ غريـري
لاتحليت عيوني فيـه قصـف العمـاري=منين ماجيه واحوفـه جمالـه غزيـري
اليا تمعنت يدخل فـي سمـاره شقـاري=ياهل المعرفه فيـه الموصـف يحيـري
لونه اشقر وفيه شـوي مثـل السمـاري=ياكبر حـظ حواشـه وحظـه كبيـري
ياجمال عليها مـا يوصـف وصـاري=مايخليه من شافه ولوهو فقيري
واهني من قطف منهـا جديـد الثمـاري=ياعيون الوحش والا الغزال الصغيـري
زين ذاك المبيسـم والثمـان الصغـاري=فيه من وصف قيس ومايقول السديـري
ياصغيرٍ ملك قلبي وغير مساري=ناعم بالحضاره حيل واصلـه مطيـري
لو يشوفه عميد الدين صـار انتحـاري=شبت النار في جوفه سـوات السعيـري
صاب قلبه صوابٍ بين الاضلاع فـاري=يودع اللي يصيبـه حولهـم يستديـري
اه يامن خـذت عقلـي وقلبـي جهـاري=الضحى بالنهـار ولال حبـه خشيـري
لاضحك شفت فيه من المحبـه مـواري=وان تكلـم بنغماتـه خلطهـن عبيـري
كـل ماشافنـي عينـه تهـل العبـاري=فوق خدن غشاه الملـح ولونـه نويـري
ومثل ريح النفل لانـج حـول الخبـاري=بـول النبـت واللقـاط يلقـى هبيـري
او كما ريـح عشـبٍ نابتـن بالمـذاري=بان عقب الطلوله صبح والا عصيـري
لو تشوفه قضاة العلـم حـط استشـاري=ولو تجي قاضي التميز عقلـه يطيـري
يختلف مايميـز فيـه تسعيـن طـاري=مايميز قضايا الناس لو هـو شطيـري
وانتهت عد ماهبـت هبـوب الـذواري=بالصـلاه وسـلامٍ للبشيـر النـذيـري

[عطر الليل]

رد الشاعر البستان على نغيمش الزويكي



يانغيمش يابن تركي كفيـت الخطـاري=يالزويكي عسى شرك ماهو مستطيـري
يابن تركي عن اللي فيك مانـي بـداري=جعل رب السما لك يالسنافـي يجيـري
احسبك قبل تقرا فـي كتـاب البخـاري=واثر عينك على الغالي تهـل العبيـري
عذبنـك بنـات مطقعيـن الـبـراري=مثل ماعذبـن قلبـي وحاسـن مريـري
خلن القلب له بين الضلوع افتراري=مثل ماصاب قلبـك والمقـدر يصيـري
وكم شجاعٍ يحل المشكـلات العسـاري=ان خطرته سنافي وان حربته ضريـري
لو هو يعدل الفرسـان فـوق المهـاري=لاعطنـه محبـه فـر قلبـه فـريـري
وانت مثله تراقـب للنجـوم السـواري=بين حبل الرجا والياس قلبـك حسيـري
سون البيض فيـك الغاويـات النكـاري=خدرنك من الحكـي الرقـاق تخديـري
لك سنين طويله وانت مانتـه بصـاري=مونسٍ لك غلا ماهـو بحـب الدشيـري
تقتلب وانت لابايـع ولاانتـه بشـاري=والسبب ماحصل تقرب حوالا السريـري
يمكن اللي حـداك انـه كبيـر نيـاري=او عجوزٍ ليا شافتـك تزحـر زحيـري
مانت الاول ولاالتالي تصير انحـداري=قبلك اللـي يـردون الكمـي للمغيـري
متعبين الركـاب مقولمـات السمـاري=يم بوش الحفيف اللي مغـب وصديـري
جنهم وارثعن فيهـم بصبـح وغـداري=ناهبات القلـوب مدوجـرات النشيـري
لين خلن بعضهـم فالنـدم والحسـاري=في نهاره يلـوب وكـل ليلـه سهيـري
غير هـذا حـذاري لاترافـق حـذاري=الـذي فيـه شبهـه لاتحطـه عشيـري
كان حبك فهو حبـه سـداري مـداري=لو يبا يقدرك هلفـاك فـي كـل بيـري
رافق النشمي اللي مثل طيـر الغبـاري=يذبـح الدارجـه والطايـره ماتسيـري
وكانك اعلنت يانغيمش ببعض الطواري=ماتوقـف ولاخليـك هـذاك غـيـري
مايخلـي رفيقـه تفترسـه الضـواري=كود خطوا الحمار اللي يعـط النثيـري
اجزم اني معك لو هو بضرب الشبـاري=والعدو ياولد تركـي ضعيـفٍ حقيـري
واكتم السر بعض الناس مالـه ريـاري=ماسمع منـك قالـه جعلـه الله غضيـري
لاتخلي عدوك منك يضحـك شغـاري=الزم الصمت لين انـه يقـر القريـري
وبعض الخيل يقصر عن قودها المباري=ماتهيا لشوخ وحظ رجل فغيري
ماتهيت لخو جوزاء وبرغش وضـاري=ولاقضب حبلها ابن سويط شيخ الضفيري
والعرب خلوا النعرات هـي والحمـاري=واكثر الناس رد السيف وسط الجفيـري
وام خمس تركوها الاولـه والسـواري=وام ركبه ودهـم يزعجنـي الذخيـري
قبـل مافيـه لاندكـروز والا سفـاري=فيه شلفـا علـى قبـن لهنـه عريـري
يوم توحي بطـراف السبايـا الثمـاري=فـي نـهـارٍ عـبـوسٍ قمطـريـري
وبعض البيض في مركاض ابوها تماري=يطلق الوجه عنـد معطفـات الدريـري
والضعون يحماها من جميع الخطـاري=والسبايا ليـا جاهـا تقافـا صريـري
وعقبها رغبتـي وهوايتـي وافتكـاري=يصبح الجو هـادي مايطيـر الذريـري
والشعر مثل نهرٍ دايـم الـدوم جـاري=ماتعبـره سبابيـح مداهـا قصـيـري
احـدن يقطـع الانهـر بليـا كبـاري=واحد كل شعره مثـل حيـري وديـري
كل من يسمعه عليه عليـه ناقـد وزاري=مير من يقنعه حيث انه اعمى بصيـري
يبلش الناس في كثر الحكـا والهـذاري=ادمي مير قلبـه مثـل قلـب البعيـري
ان نصحته بلشت وهو من العقل عـاري=وان تكلم ليـا بيـن الرغـا والهديـري
والمثل قال بعض الناس خيبـة دبـاري=لايضرك ولاينفعـك عظمـه هشيـري
وعادتي من قبل ماحب كشف المعـاري=من عرفت الحيا والشعر هـذا مسيـري
وكلمةٍ تزعل الاصحاب يابـو مشـاري=مانبيهـا ولافيهـا مــن الله خـيـري
والسنافي على راسي ماأحطـه يسـاري=وان تغير مسيره قلت يارجـل سيـري

[عطر الليل]

قصيدة الشاعر المرحوم : مفرح الظمني التي اسندها على عدة شعراء ومن ضمنهم شاعــــرنــــــا




الله من قلبً همومه وطنه=كنه يسمر في ضلوعه مسامير
ياطارقاً نجر الهوى لا تدنه=جورك عليه يكسر القلب تكسير
واعزتي لسعود من كبر سنه=عنه انتحى عصر الصبا والغنادير
في مامضى غيد الصبايا يبنه=واليوم ماله من وراهن مشاوير
حتى ابن هادي بالعيون احربنه=تغيرت لفتاتهن والمضاهير
ماكنهن عقب الغلا يعرفنه=راحن على ريف النشاما مناكير
والخس في قلبه من الحب لنه=مركز دفاعه بين هدمن وتعمير
والى نشدته قال قلبي خذنه=يامن ذكر لي وردهن والمصادير
وصحن الى شفته مع الناس كنه=بين الرجا والياس يرسل مداوير
يطحن غرامه والهموم طحننه=يشكي على دبيان بعض التدابير
اقفى جديد العمر مافيه منه=اقفاي عشب جاه صيف ومعاصير
كنت مزونه والسمايم شونه=وابعد ثراه ويبسن النواوير
ليت الليالي ماخذن رجعنه=ينشاف زمل مدوجرات البواصير
يوم الحطب بحبالهن يجمعنه=بين الفياض وسانحات الدواوير
راع الهوى لو مايجيهن يجنه=والشك زايل والطوارف مسايير
والى لفاهم طارشاً ينشدنه=عينت ماعينت من غير تقصير
والى تلافن من ربيعاً قضنه=تقابلن مقطانهن بالتباشير
والعصر غالي لبسهن ينشرنه=بين البيوت وبين ورادت البير
يازين صب الدلو بقدورهنه=قدام ترو مرزمات المعاشير
مافيه رادو بالغنا يسمعنه=وإلا جهازً يختلف بالتصاوير
بس المدوه يوم للبوش حنا=وقولت ياراع السانيه بالمحادير
راع المحبه بالنظر يشغلنه=تنشق دلوه بين روس المناعير
كم عاشقً بخدودهن صوبنه=ومعكرشاً فوق الردايف دعاثير
على العبس ومن الشمطري غذنه=ماقصصوهن عاملين الكوافير
واليوم وقتاً يوذي الناس فنه=عشق الهواتف والصور والمزامير
وسعود صاح وتالي الصوت ونه=ومحمد اخفى صيحته بالمعاذير
أبو خلف عجف السنين محلنه=يومين وألا يذكر البيض بالخير
طشوا كلايف جيشهم والأعنه=ماعاد قالو درجوهن مغاوير
يارب بدل نار الايام جنه=واغفر ذنوب اهل الوجيه المسافير

[عطر الليل]

رد شاعرنا على الشاعر : مفرح الضمني



ياللي تدن النجر دنه ورنه=خله يجضور من غرامه تجضوير
حنا هله كان اليدين أطلقنه=الى منها قلة عليه المعاسير
مايملكن أيدننا يخرجنه=من قبل لا تكثر علينا الدنانير
لاشك بعض ربوعنا مستجنه=قاموا علينا يطلقون الحناجير
أشوفها من غير لنه وهنه=قامت تفجر بعض الالغام تفجير
جتنابهم خيل الفسق مستعنه=مدري وش المقصد ورا مطير لمطير
حنا نسايرهم على حسن ضنه=ونسامح المخطي معزه وتقدير
والى تجاهلنا خطاهم محنعنه=قالوا بلاهم خوف والا معاسير
الخوف منه قلوبنا مطمئنه=ماهمنا شلفا ابن غانم ولا الزير
أن ألتفتنا للسباع المسنه=تبي تصير الشلف حدر القناطير
أخير للدنيا تجي مرجهنه=قدام راع الكير ينفخ على الكير
أن كان جت بالشعر حنا مغنه=حنا مصخرت التماثيل تصخير
لو نلحق المشقاص قوماً مرنه=فرت بعض ناساً فرير العصافير
الى فتحنا باب شعراً نكنه=يسلمانا الكافر ويركع لنا الطير
والله يالولي خطو رجلاً نحنه=لا اقلب عبى ناساً هنيا مخامير
لا اسن فيهم شي ماحدن يسنه=شياً نجيبه مقطعه من زمهرير
يابعضهم ياعضاه ماينهضنه=وانه لينكل عن جميع التهاتير
لاشك جتنا من ربوعاً مضنه=سوالفاً ماعرف لها كل تفسير
أقربهم مفرح هجوسه عصنه=شغل تماتيكه على غير تعيير
يوم البيوت اللي بنى شجعنه=أذاعها بين الدول والجماهير
وادلى على ربعه بشياً يضنه=يقول اشوف الشيب فيكم مغاتير
والشيب ياراع التماثيل سنه=ماعذرب اللي ينطحون الطوابير
حمّاية القشرى ثبار المدنه=الى قبلن ذولي وذولي مدابير
الشيب مابه عيب لاتحسبنه=العيب من جنب طريق المناعير
من شب شاب ولو سنينه عطنه=والشيب في وجه الرجل زود تقدير
وأن كان به عذروب مافيه منه=أنته نزلت مع الرشا لأسفل البير
عودٍ وجسمك يقرع اقراع شنه=تبي تصيغر وانته اكبر من النير
هرش الحضيره باركلّه بعنه=ثاوي وعينينه بالامه مطايير
الى شاف من تمشط شعرها بخنه=قام يتلفت وارزم ارزامت بعير
يبي السنين اللي مضن فاختنه=أيام ورد الماء ولبس المقازير
يومنهن بعيونهن يفتننه=نجل العيون مزعلات الحجاجير
اللي كما ارقاب المها ارقابهنه=تقول فيهن مثل ماياصف عمير
كن العسل في مفلج عذابهنه=والموت لامن دلعن بالازارير
كنك تشوف الماء ورا حلوقهنه=ونهودهن حمرن وفيهن دواوير
مثل ابو فيصل بالهوى يشعفنه=لاشك اضن الزند مافيه تشرير
واليوم فارقهن وهن فارقنه=لو انه اغلى الصبغ عند العطاطير

[عطر الليل]

شيخة الغزل



انا لي ثمان سنين اجامل وانا مجروح=اكن الموده داخل الصدر واكتمها
يجيني بلاً صندوق قلبي يزوحه زوح=خطيرٍ معاليقي من القلب يصرمها
سبايب مودة جادلٍ مابها مصلوح=تبهذلت منها مابه احدٍ يعلمها
يقول ارحمي روحٍ تبلت لها في روح=هي العوق والاسباب ماني بضالمها
خذتني وجرتني بضحكة غلا ومزوح=تهايفت معها لين طحت بمراحمها
غرقت بغلاها مغرم مثل غرقت نوح=ولاادري عن ايام الغلا وش خواتمها
وانا مبتلٍ فيها ولالي وراها شبوح=مفاتيح قلبي في يديها مسلمها
اليا قلت خفي حبك اللي تعدا الموح=تجيني بنغمات ٍ على القلب ترسمها
تجيني باساليبٍ تزيد الجروح جروح=خذتني بضحك احجاجها مع تبسمها
تبسم بيضٍ كنها اللولو المصحوح=او الدر من بكرٍ سريعٍ ترزمها
عليها الحلا والملح كنك تكوحه كوح= حضيض الفؤاد المسعد اللي لايمها
هاك الغره اللي مثل برقٍ لنوره ضوح=سنا مزنةٍ ترعد وتبرق مقادمها
عن المترفات الضمّرالعقش فيها نوح=تحشر النفوس اللي قويٍ عزايمها
تمريع مثل زملوقةٍ في محير الصوح=عدلها النسيم ورايح الوبل داهمها
اليا شافها راع النظر حار مايروح=تكلم حشى لله ماهي من اوادمها
لاهي حص لاياقوت لاجوهرٍ مطروح=تقل فضةٍ مصبوبةٍ من مناجمها
هوافٍ خواصرها الجدايل عليها سبوح=كساها اشقرٍ ياصل اليا الردف ضايمها
مثل ذيل شقراً ماعليها ثلاث قروح=تكم السبايا يوم تطرخ قوايمها
اليا سلهمت بعيونها عدني مذبوح=تبنجت حتى كلمتي مقدر ابرمها
هذا هو بلاي وهو سبب جرحي المفتوح=من اسبابها افرق هجوسي واليمها
عديت وتعبت وطحت والكبد فيها فلوح=تهيج الجروح ولاش شئٍ يدمدمها
علي الخطر وشلون تلعبي الشحوح=مثل مالعبت بغيرها صرت رايمها
على كيفها تومي بقلبي سوات اللوح=بلاي الغلا اللي بسرة القلب واسمها
حلايا المهاه اللي ذعرها دبش وسروح=وراها تشب النار فيِِِِِِه وتشعمها
ليا جيت ابا ازعل ردني حكيها المملوح=يجيني بلاً حتى عيوني يغمغمها
جدايه جدا ورعٍ جداه البكا والنوح= يبا حاجةٍ مخفيتن امه معالمها
يالولا يالولا ان الخطا فاعله مفضوح=ماعود محيم وعبرة الصدر ازايمها

[عطر الليل]

مجاراة الشاعر : سعود الوسمي لشيخــة الغزل



سمعت الحمام اللي سجع فوق غصن الدوح = جذبني بنغماتن هل الحب تفهمها
تغنا بشعرن من شذاه العطور تفوح = يعطّر مسامع من سمع في ترنّمها
من الشاعر اللي قبل انا لاامدحه ممدوح = وكد قالوا الاجواد ماتهفي ذممها
غنيّن عن التعريف ازيد الوضوح وضوح = تباها به اشعاره يصخّر ملاحمها
عميد القصيد وفي عيون العدا ذرنوح = وهو الاديب ونفسه الرب ملهمها
شعاني وانا قلبي مع اهل الغرام ايتوح = هضمني وروحي قبله الحب هاضمها
جبرني ابوح وعادتي للخفا مااابوح = اداري عن السمعه ونفسي مشيّمها
اجامل وانا قلبي بسيف الغلا مصطوح = اكن العباير في ضميري وكاظمها
هليك ودريك ادوّر من البلال انشوح = وكبدي تفوح وبارد الشرب يلطمها
غديت الغليث اللي يخاف البروق تلوح = يسوج ويلوج ونفسه الغلث مسقمها
سبايب عنودن صار في حبلها ساموح = حرمني محجّرها وهي مثلي احرمها
علامه يفرّقنا لعله ماهو مبيوح = بنينا الامال وحاقد القلب هدّمها
ولاله مصالح بس غاد الجدا مشفوح = مسممّ ونفسه زايد الغيض سممّها
حقود وحسود ومسردن كنه النابوح = وذلوله على كل المغازي يدرهمها
عسى الله يلم الشمل بالصاحب النصوح = وتطيب النفوس اللي محيمه حوايمها
وتليم شفوف اهل الهوى والعدو مكبوح = وتلحق هواها المغرمه لجل مغرمها
تهيّا على وضح النقا دربها مبروح = انال الهنوف اللي ولامي موالمها
ويبرا فوادن من غرام الهوى ملحوح = لحاه الهوى وارثع بروحي وحطّمها
وتخايط جروح بداخل الضامر المشلوح = من الجادل اللي حاكمتني وحاكمها
هنوفن عيوفن من تولّع بها مسموح = كساها الحلا من الراس لاحد مقدمها
غنوجن عنوجن بهرجها للعرب سحوح = فتونن يضيّع كلمته من يكلّمها
بها من مهاة الريم غره وفيها لموح = تذوب القلوب بنارها ماتقاومها
عليها الله اكبر كيف جاحت فوادي جوح = بها النفس مرهونه ولاني بلايمها
تمركز غلاها غصب ماعاد هو ممسوح = ولاعاد لي سلطه على النفس ايممها
انا صاربي ماصار للخس ياملّوح = طواني هوا خلن طوى الحال واعدمها
خليلن تخلخل خل عقلي وشاحه شوح = عزلني عن العالم دها النفس واوهمها
خطاها كبر سنجار مير الخطا مدموح = لعل وعسا ترحم وذا من مكارمها

[عطر الليل]

قصيدة اسندها الشاعر المرحوم : سحلي العواي لشاعرنا



يازين شب النار بأرضٍ بياحي=والزول يزميلي على مد شوفي
والبيت مبني والرعايا ضواحي=وانته تمشى مع نبات الحروفي
اخير من ذبحٍ بليا سلاحي= بقبورت الحيين مثل الضعوفي
ببيوتنا مثل الدجاج المداحي=مغير يم السوق ناخذ ونوفي
يابو خلف مامن تجدد مراحي=متشفقٍ عقب الشداد الردوفي
يابو خلف صاحي ولاني بصاحي=بس اتلفت مثل راس الخروفي
خروفٍ أدلم مايعرف المتاحي=وراعيه جابرته عليه الظروفي
ابكي على وقتٍ حظرته وراحي=اتلاه يامحمد زمان الكسوفي
ياحيف وين موردين الرماحي=اللي نهار الكون ترو السيوفي
يالخس وين مطير هاك النواحي=سلفان مثل مزبرات القنوفي
تسايروا ثم صوتوا بالفلاحي=هيهات ياما فرقوا من شفوفي
خذتهم الدنيا هجاد وصباحي=وحنا بقينا عقب هاك الصفوفي
صار العوض فيهم خطات الضياحي=ياعنك ماكدٍّ عليه مخلوفي
يالخس يومنه تكسر جناحي=ماني على الدنيا كثير الحسوفي
اليوم موتي والحياة متواحي=يابو خلف منكف وعايف وموفي
اليا ماتهيالي غزال البراحي=مالي بصيد مخبطات البلوفي
يابو خلف ذا منهجي واقتراحي=وانته على رد المثايل عروفي

[عطر الليل]

رد شاعرنا على الشاعر المرحوم : سحلي العواي



ياسحلي العواي منته مباحي =ياللي تقول انك حوالا صفوفي
الفرق واسع للسنين امتراحي=قدام اجي وانته تغير وتحوفي
لاشك معي انته تحب المزاحي=وزلتك عندي يالسنافي تطوفي
وتقول انا يالخس ماني بصاحي=واقول منته بصاحي ومهروفي
ياللي تبي وقت له سنين ماحي=يوم القبايل بين امانٍ وخوفي
يوم يحدا الخيال قدم الطياحي=والوقت زين وبأهل الوقت نوفي
يوم اصطفاق أمصمات اللواحي=فج الزغون مقولمات الخفوفي
مركوب فرسانِ تبوج الفياحي=دايم لوجه الله عليهن ضيوفي
دايم يتلّون النّضى بالمشاحي=ايضا ومعهم كل قباً شعوفي
اليا طالع السّبار شعل وشقاحي=قالوا عليها ماسمعت المعوفي
مافعلهم بالهندسة والمساحي=بالسيف الاملح فعلهم والكشوفي
كم فارسٍ منهم تجندل وطاحي=اليا جودوا خضر النمش بالكفوفي
مايطلبون الرزق عند السحاحي=الرزق بيدين الرحوم العطوفي
ارزاقهم حدر الدّخن والصياحي=مثل السباع مدورات العلوفي
كم رفرفت راياتهم بالنجاحي=واليوم وقتٍ راح جعله ذلوفي
يابو فهيد اسحب ذلاق الشّلاحي= الجيل الاول له عيالٍ وقوفي
يامابهم من جمّ ماهو ضحاحي=لولا اليدين معقبه للكفوفي
مطير في ديرة طيور الفلاحي=اللي بهم عزّ وذراء ومعروفي
بين السعود وبين نسل الصباحي=في نعمتٍ مامثلها بالوصوفي
شبعة وأمان وراحتٍ وانبطاحي=ومنين ماوجهت جبت الولوفي

[عطر الليل]

قصيدة اسندها شاعرنا لاخيه الشاعر الكبير :
صحن بن قويعان



ياصحن دالهٍ عـن مترفـات القبايـل = لين جاني من أرهقنـي ونكـد عليـه
قام يضحك ويجذبني وجيت متهايـل = ليـن مفتـاح قلبـي ضيعنـه يديـه
مثل ماضاع قلبك بالسنيـن الأوايـل = يوم تشري الهوى بالذمـه العامريـه
انت تدري وعنـدك للمحبـه دلايـل = كل ماخض ماء بالحوض ترد الضميه
لاتسايـل ولاتنشـد وخذنـا القوايـل = رغبة النفس ودتنـا حيـاض المنيـه
ياطبيب الهوى حنـا لقينـا الهوايـل = نظـرةٍ النـاظـر لـهـا جاذبـيـه
ماتميز من الخـده شقـار الجدايـل = اشتعـال البـروق بمزنـةٍ عقربيـه
خده اشقر عليه اشقر للـردف مايـل = فيه نورٍ وبـه نـارٍ تطـارد سويـه
مثل عنق الغزال اللي بوسط الجمايل = يوم فز وتشمحـط موحيلـه اوحيـه
كن جوهر عيونه ياصحن يوم اخايـل = حد سيفٍ شطير او خنجـرٍ نافعيـه
وان تبسم ببيضٍ بين حمـرٍ عسايـل = بايحوني تراني مت ابكتـب وصيـه

[عطر الليل]

و يرد صحن بن قويعان



يامحمد شـداد الحـب صـار متمايـل = اشتريته وبعته يـوم طاحـت عصيـه
كد رقيت الطويل وكد تبعـت المسايـل = اشتهي المشي رجلي عن ركوب المطيه
وانت والله مالوك يوم خلـت المخايـل = كنك المضمي اللـي يابسـاتٍ رويـه
شفت بيض المحاجر والرموش الظلايل = شفت ماشاف بصري يوم تيـه خويـه
مثل ماينفـع العطشـان نشـح البلايـل = انت تنفعك نغمـات الهـروج الخفيـه
كلمة الحـب طـبٍ للقلـوب الغلايـل = هـي علاجـه وطبـه مايبـا صيدليـه
لك سنيـات يمـي مابعثـت الرسايـل = قلت حج وتطـوع واثـر نيتـك نيـه
احسب اللي مضالـك مابقابـه سمايـل = واثر سرحان مايدخل بحـوش الرعيـه
ويـوم طـق الزنـاد وولعـن الفتايـل = اجزم اني معك في كل حسنـه وسيـه
كان مافيـه شـيٍ فـات مانـي بقايـل = الصداقـه قديمـه والعلاقـه قـويـه
دام مافرقونـا بيـن حمـر النثـايـل = ماتخـرب صداقتنـا السنيـن المديـه

[عطر الليل]

قصيدة اخرى اسندها شاعرنا لاخيه الشاعر الكبير
صحن بن قويعان



ياصحن ياكثر زينٍ في سميـره = جل قدرة ربي اللي صورتهـا
لاعريض ولاطويل ولاقصيـره = مع نعومة عودها زين طخمتهـا
لاتحسب حساب هذيك الكبيـره = خالف الديمه سحابه وأدهمتهـا
يوم طبت صار بالملعب حشيره = صفق الجمهور والبيض أزعلتها
خدها شمس العصير المستديره = فرعت والقذله الشقراء كستهـا
كن وسط عيونها خيـلٍ مغيـره = والسيوف الحمر بيدين اركبتهـا
يوم تبلـج بالشفاتيـن المنيـره = هن حمر واللولو الأبيض تحتها
تذبح العشاق بأحرابٍ شطيـره = بين لـدات العيـون وسلهمتهـا
غرةٍ مامثلها وسـط الجزيـره = لا كستها بالذوايـب وأظهرتهـا
برق غراً قهقرتهـا المستثيـره = يظهر الربان من حدر هدبتهـا
كنها عنـق المهـاة المستذيـره = طالعت بأدباش بدوٍ وأذعرتهـا
ذكرتني مثلهـا تلعـا غريـره = قد خذت بسرة فؤادي وانهبتهـا
لو مودتها على قلبـي خطيـره = السنين اللي تقافـت مامحتهـا

[عطر الليل]

فرد أخيه صحن بن قويعان



يامحمد وش قلب وضحاء سميره = وين هاذي عند ذيك وويـن جتهـا
ليه توصفها على اسـمٍ مستعيـره = كل شجرةٍ كود تعرف بشجرتهـا
انت لماً عني اخفيـت السريـره = أو درعت بعالمٍ ماعـرف لغتهـا
نوب اخوك بكل حاجه تستشيـره = ونوب تخفيها وتظهـر مشكلتهـا
جعل ربي مايغيـر لـك بصيـره = لاتغيـر مابـقـى الا خاتمتـهـا
البنات أصنـاف واشكـال كثيـره = والقبايـل كـل نفـسٍ وشهوتهـا
وأكثر الشوفـات مافيهـا بريـره = ودي انـك ماتلولـس بشبكتـهـا
انته مانته من قوانيص الجحيـره = لاتعـلـق نفسـهـا بمواعدتـهـا
عن هواها مكتفيـنٍ فـي منيـره = لو تبي تجلب سميـره ماشرتهـا
اترك اللي وردنا خالف صديـره = رد في عقلك وشف وش مصلحتها
لحقت المقفي على المطلب عسيره = الهوى فاتـت سنينـه واثمرتهـا
سد بيبانه عسـى بالأمـر خيـره = فكنـا مـن طرقهـا ومراقبتـهـا
قد حصلي فيـه وقفـاتٍ شريـره = مانسيت جروح كبـدي وافحمتهـا

[عطر الليل]

اخواني اسعد الله اوقاتكم
يسرني ويسعدني ويشرفني
ان اقدم لكم ديوان البستان
اتمنى ان يحوز تنسيقي على رضاكم
وتقبلوا تقديري

اخوكم

عطر الليل

[لورا]

شكرا ياعطر الليل
تنسيق ممتاز ويستاهل البستان
ميييييييييييييييييييرسي

[عطر الليل]

العفوا لورا وتسلم لي على المرور

[السنافي]

يعطيك العافيه اخوي عطر الليل على التنسيق الجميل

وصح لسان الشاعر الكبير والمعروف محمد بن خلف

تحياتي لك,,,

[عطر الليل]

الله يعافيك

وصح بدنك يالسنافي

[المايسترو]

يارائع









يامبدع






يافنان






ياشاعر





حروفي تعجز عن وصف القصيده ..... فضلت فقط ان اسجل الاعجاب بالقصيده


ولكم مني الود الصادق / المايسترو

[ابو شهيب]

هذه قصيده ايضا للشاعر محمد خلف الخس



جينا مع امير الرياض وجنبها=سلمان شيخ الشيوخ مقعد صغاها
اللي لو ان النار يمسك لهبها=الى زعل لوهي تلضى وطاها
ياما من كبار العطايا وهبها=وكم نفس اعتقها على الله جزاها
معه وصلنا ابها ومن طور ابها=جينا بلاد خالد اللي بناها
ركز عليها لين كل رغبها=والا ترا قبله قليل حلاها
لو كان اهلها ناس عال نسبها=عن كل درب شين تكرم لحاها
حموا جوانبها ولا احد قربها=لين ان ابو تركي ولاها وحماها
خلا جميع الناس ما تغتصبها=واضفى عليها الخير يوم اوتلاها
وتطورت يوم ان خالد قضبها=وحارت بها انظار العرب من بهاها
قبل يجيها مابها الا حطبها=وذيابة تقنب بعالي بناها
وشطابة ما ينمش مع شعبها=وجبال مثل الغيم اصم حصاها
قامت بها الدولة وخالد سببها=لولاه كان ابطت وهي في عماها
وجاها ولد فيصل وخلص نشبها=وسوى لها طرق وطور بناها
وكرم كريم القوم وادب صعبها=وعسير في جهده رفع مستواها
حتى الجبال اللي تهول غصبها=سوى بها طرق بعيد مداها
لين انها جت عجبة من عجبها=في حسنها وصلت الى مستواها
مثل العروس اللي كساها ذهبها=اللي تمناها البشر من حلاها
من سبة زعيم تلقا تعبها=خضارها المنتج مغطي وطاها
قطعة من اوربا الفهيم يحسبها=واما هوى لبنان نشعة هواها
حدايق غلبا جني رطبها=وفواكه لا نشتها بش ماها
وختام هذي يابو بندر وجبها=ترفع لك البيضاء الى اعلا سماها
وتستاهل اعلا رتبة من رتبها=من دولتك عسى الاله ايحماها
حيث انها تنفع ويدرا غضبها=ولا فيه فعل مثل فعل زعماها

[السامر]

تسلم ويسلم راسك

[أحــ العين ــمر]

الله يعطيــكم العافـــــــيه جمــــيع


من ساهم بالديوان


وتحياتي لكم





أحــــــ العين ـــــــمر




t1t5

[سلطان ابن معدل]

صح لسان الشاعر الكبير محمد الخس وعزالله انه بحر ما شاء الله عليه وقصائده من الوزن الشعري الثقيل ومادري كان له قصائد دبيان مراسلات ، اخوانيات ، معارضات
اسدحها لنا هنيا الله لا يهينك يا الهاوي ذخر الطيبين
لاعدمتك ،،،،،،،،،،

[هـــو111وي]

الهاوي


يعطيك العافيه


تحياتي

[البرنس]

الشكر كل الشكر


لمن قام على هذا العمل الرائع

و صح لسان الشاعر الكبير (( البستان ))

لكم من البرنس أجمل و أرق التحايا ..

[الجوهره]

و صح لسان الشاعر الكبير (( البستان ))

[سلطان الفرم]

صح لسان الشاعر الكبير محمد خلف الخس
وشكراً لمن قام بتنظيم هذا الديوان الرائع

[الهاوي]

اهلا وسهلا ومرحبا بك يالفرم
مرورك اسعدني جدا ...

[عآشق المرجله]

صح لسان الشاعر محمد بن خلف الخس

الله لايهينكم على هذا الديوان الرائع

[فهاد]

شكراً لمن اتحفنا بقصايد

الشاعر الكبير محمد الخس المطيري



تحياتي

[الهاوي]

اهلا وسهلا بالكل
وانا ان شاء الله اوافيكم بكل ماهو جديد شاعرنا البستان ..

[مبارك المطيري]

الله لا يهينكم على النقل ومشكورين والشاعر
محمد الخس غني عن التعرف وهذا
شاعر البستان وقصيده معلقات في التاريخ
القرن الي نعيشه وصح لساان ابوخلف
مليااارات مره
اخوكم مبارك المطيري

[الهاوي]

اهلا وسهلا بكل الذين
وضعوا بصماتهم في هذا الديوان
وان شاء الله اوعدعكم بكل ماهو جديد لأبوخلف ...

[إمرأه من السماء]

يعطيك العافيه يالغالي عالمجهود الرائع

دمت بخير

[الدلوٍوٍعه]

ديوان رائع لشاعر جزل
الله يعطيكم العافيه ع هالمجهود الطيب

[كلك حركات]

استاذي الهاوي ما قصرت

ويعطك العافيه على هالديوان

[الهاوي]

كلك حركات
اهلا وسهلا
وتواجدك اسعدني انت والجميع ...

[الشلاحي]

صح لسان الشاعر الكبير :- محمد بن خلف الخـس

وديووان رائع ..

ونقل اروع ..

لشاعر مميز و عني عن التعريف ..

تسلم استاذي على النقل والجهود الرائعه ..

ويعطيك الف عافيه والله ..

[ساروونه]

تسلموون على هالمجهوود الطيب


يعطيكمـ ألف عافيه و..
دمتمــ بوود

[ابو شهيب]

تسلم يا الهاوي على الديوان لشاعرنا محمد خلف الخس ولاهنت على النقل

[فايز البراق]

صح لسان الشاعر محمد الخس مشكورين على الديوان الرائع والمميز

[كايدهم بقوة]

الهاوي لاهنت على نقل ديوان الشاعر العملاق ابوخلف
وهذه تعتبر قصائد وليس ديوان نطلب منكم المزيد من ابداعات الشاعر محمد الخس

تقبل تحياتي

[abo harron]

تسلمون على هالمجهوود الطيب ...........


يعطيكم الله ألف عافيه

[الهاوي]

اهلا وسهلا بالجميع
وابشروا بكل ماهو جديد لشاعرنا / محمد الخس ( البستان )

وتقبلوا فائق الاحترام والتقدير ...

[شارد الذهن]

صح لسان الشاعر محمد الخس مشكورين على الديوان الرائع والمميز

[جبــــنة]

ديون رائع .. معطر بأجمل المفردات الشعريه

صح لسان الشاعر محمد الخس


ويعطيك العافية على انجاز هذا الديوان واخراجه بشكل رائع

[مصيره لاذكر يشتاق]

يعطيك العافيه

[مروان]

صح السانك

[♥ sergio-roms ♥]

يعطيك العافية

تقبلووو مروري
صح لسانك

[ذهب]

يعطيك العافيه يالغلا
دمت بود

[فجر]

يعطيك العافيه

[ريــــم]

يعطيك العافية كفيت ووفيت

[الطيـّر]

صح لسان الشاعر الكبير :- محمد بن خلف الخـس

وديووان رائع ..

ونقل اروع ..

تسلم استاذي على النقل والجهود الرائعه ..

ويعطيك الف عافيه والله ..

[الشايب100]

يعطيك الف عافية اخوي ع ماقدمة من رائع

[عذاااري]

مرحبا شلون اشوف الديوان

[ريــــم]

الهاوووي مشكوور لا هنت

[الــداامــع]

[ الداامـــع][`~*¤!||!¤*~`][°ˆ~*¤®§(*§*)§®¤*~ˆ°B]الله يعطي العافيه من تكلف بجلب هالديوان وصح لسان الشاعر الكبير (البستان)[/B]°ˆ~*¤®§(*§*)§®¤*~ˆ°][`~*¤!||!¤*~`][

[؟؟؟؟؟؟؟؟؟]

][®][^][®][الله يجزاك خيرررررررررررررررررررررر][®][^][®][

[فواز الهفتاء]

الهاوي



سلمت


وصح لساااااااان ابو خلف


كل التحايا

[سهــم]

لاهنت اخوي على ماقدمت

لك كل التقدير

[الديـــم]

.
.
http://up5.m5zn.com/photos/00036/ro5df6f2g59b.jpg


الشكر موصول لمن قاام بكتابة هذا الديوان


.._

[نــجــم]

صح لسان الشاعر
ويعطيك العافيه ع النقل المميز

[الديـــم]

.
.

http://www.t1111t.net/up/uploads/5335c16fba.gif

.._

[الهاوي]

اهلا وسهلا بالجميع


وابشروا بكل ماهو جديد لشاعرنا


وشكرا جزيلا على التواجد الرائع ...

[ღعظيم الجرحღ]

صح لسااان الشاعر
تسلم ايدك على النقل الأكثر من راائع
طرح في منتهى الجمال
تحياتي وتقديري ..,

[الحــلا كله]

http://www.up7ml.com/upfiles/lnB46711.gif (http://www.up7ml.com/)

[انسياب الفكر]

الهاوي...

يعطيك العافية على ماقدمت...

والبستان شاعر جزل وغني عن التعريف...

[سـعـود]

الهااااااااااااااااااااااااااااااااااااااااااااااا ااوي سلمت يمناك يالذيب

101 101 101 101 101 معك لاخر خطووووووووووووووووووووووووووووووووه يابو خلف

[AL-AMAER]

السلام عليكم ورحمه الله وبركاته
مشكورين على هالديون الرائع وماهي قريبه على بو خلف هذااا الابداع الشعري وهو شاااعر مطير الاول بددددون منافس بس تمنيت انكم ذاكرين قصيده الى يقول بمطلعها انا لي ثمان سنين اجامل وانا مجرووح وشكررررررررررررررا على الجهود الجباره................

[ملاكــ]

و صح لسان الشاعر الكبير (( البستان ))