.. || .. ديـــــــــوآن .. المبــدع // نآيف صقـــــر .. || ..

[شيهانة نجد]

http://www.t1111t.net/up/uploads/0963074a67.jpg (http://www.t1111t.net/up/)

صبـــــآحكمـ // مســــآئكمـ

سووكر

العذب .. نايف صقر
علم في رأسه نار فب عالم الشعر النبطي
متميز شعرا و أسلوبا و معنىآ و ألقاء خاص

أترككم مع مقتطفات من ديوانه

.
.






يقولون الشعر وصل القلم والصفحه الطرقى = وانا اقول الشعر قدح الخيال ونار صوانه
حبيبي والبحر سور التراب ودفتر الغرقى = لو اني ماكتبتك لامني ملحه ومرجانه
حبيبي لاهمت حبر العروق الغيمه الزرقا = على رمل الورق دمي سحاب هل هتانه
حبيبي كل ماذعذع جفاك وناحت الورقى = يتل البال قلبي واهدي السجات جنحانه
حبيبي وانت مرقاب الشجون وهاجس المرقى = ترى كلٍ يموت الا الوفي بعيون خلانه
حبيبي والجروح اللي سببها ليلة الفرقا = ضما يدها الوصال اليا ظما المحروم حرمانه
حبيبي لو يسامحك البحر وتبيحك الغرقى = أنا ما اسامحك لو لامني ملحه ومرجانه


.
.

يتبع ,,,

[شيهانة نجد]

القلب عود يفوح والطيب من مكسره = تحته من الجمر مايوقد سكات الرماد
والعين مغرورقه بالدمع ومبعثره = بين الصور والرسايل والدجا والسهاد
حنا اليا حسبنا مازرعنا الذره = قل للعصافير تتركنا وقل للجراد
البارحه جف في غصن الملام ثمره = عقب البياض انكسر ضلعه وسال السواد
والناس خلان قبل الريش والمحبره = شعوب وفخوذ واحباب وصباح وهجاد
هذا الجمل لو سنامه سامك فـ ظهره = ماله عزوم يقوم بها ولا له شداد
ياذيب عيد على قلبه وفج نحره = دامه رغى عقب هدراته وشم الحماد
تمخض الوكر والقرناس عن حمره = في راس قشعه لعب فيها الظما والنفاد
يوم النحاس انصدع لونه وذاب أصفره = غنيت للسنبله كل اغنيات الحصاد
مايدفي الا الوبر والوصل والمقدره = لازاد شوك الشتا في راحتك والفؤاد
ولاصار ما لك اليا منك ركضت اغبره = شوري عليك اترك البيدا .. وكب الطراد

.
.


يتبـــع ,,

[شيهانة نجد]

صاحبي عذبتني صاحبي وريتني = في لقا ساعه بعض حلم وسنينٍ قادمه
ياحبيبي كان ماسميتني .. سميتني = ليت روحي منك ياعذب الموادع سالمه
جيتني لولا الليالي جابتك ماجيتني = والليالي جابتك مثل القدر كل الظروف تسالمه
آه ماخليتني ثم رحت ماخليتني = في دروب طوال مهزمه معاك وهازمه
كن في عينك من العشره اليا باريتني = شي اقل من الحيا بعيون ضيف وعازمه
ليتني لاجابو اسمك ياحبيبي ليتني = تشرب الذكري بعض عيني وعيني حازمه
انت لودليتني فرقاك .. مادليتني = دام حبك في جبين الليالي واسمه
لك بكي جرحي قصيدي وانا ما أبكيتني = آه ياحر الوجع في النفوس الجازمه.
.

يتبع ,,

[شيهانة نجد]

أقدر هذي القصيدة حيييييل :)

.
.



الموت حظ القلم والمجد للدفتر = حبر القلم غلطتي وايامي اوراقي
الخوف يجتاحني وجه الطريق أسمر = راح اكثر العمر ياخوفي على الباقي
ياجرح رافقتني للناس لاتظهر = وان عشت في نظرتي مامت باعماقي
ياصوت لاتلتحف صمتي ولاتصبر = قل ماتبي واترك الهقوه على الهاقي
والخطوه اللي عن آخر سكتي تقصر = ماهيب من طبع رجليني ولاساقي
مانيب من عاش لايربح ولا يخسر = ولاهو ضرري تكون أفعالي أخلاقي
ثراي ماينشد الغيمه متى تمطر = مادامها في سماي تحن لاغراقي
رح وين ماتشتهي رح قد ماتقدر = أنا اول الناس في قلبك وانا الباقي
يكفيني انك تعذبني وانا اتفجر = قصايدٍ تنتظرها كل عشاقي
وانا قصيدي يجي مختارني مهجر = وأنبت عشانه نخل وسنيني الساقي.
.

يتبع ,,,

[شيهانة نجد]

يابير طيك طي واعماقك اعماق = ويعيش بك داب وحمامه وعصفور
فاضت عيونك ماك وابتلت احداق = وتنهدت منك محاله الناعور
يوم انبطت روحك سجدتي لخلاق = وعقب ارتفع جمك ضحكتي مع النور
ويوم انهمر دمعك خضعتي على ساق = ويوم انكسر حجلك زعلتي على الحور
ياما بك الرمان زهر فـ الاوراق = لين اكتنز في حلق نحله ودبور
وياكم وردك وصدرك ضين ونياق = وياكم بهج جمك بعارين وصدور
وياما رطب نخلك تعسل فـ الارياق = وياما طحين ارضك تقسم على الدور
وياما وهبتي جل وافنيتي ادقاق = وياما هماجك حل في الخصب والبور
شفتك وانا قلبي على صلدك ارقاق = وحسيت في حنجرتي عظام وكسور
.
.

يتبع ,,,

[شيهانة نجد]

من سريتك عرفت ان الظلام = خيمه سهيل وديار الجدي
ليلة البرد ما ادفاني الثمام = وصلك انت الدفا ياسيدي
جيت مقبل تهادى والغرام = ينتهي في هدبك ويبتدي
عطرك اقبل ونم بك الحمام = ياهلا فيك والقاع احمدي
لايمي في مطر تغرك يلام = عاذلي فيك للفال الردي
ودي ارقد على ذراعك وانام = وانت تحكي ويدك في يدي
وان غشاني من انفاسك غمام = ازهر العشب في كل جسدي
وان سقيت الحشا برد السلام = ماشكاك الظما غصنٍ ندي
وان ضحك لي هدبك المستهام = طاب لي كل قاعٍ جرهدي
القصايد عن وصوفك صيام = عذرها إنك جمال سرمدي
وصفك ارضٍ بها خيل الكلام = ملت الركض واتعبها العدي
من كتبتك عرفت ان الظلام = خيمه سهيل وديار الجدي.
.

يتبع ,,

[شيهانة نجد]

يانية النسيان موتي داخلي غيظ وظما = عليك من حبي لها في داخي موت وسياج
حبيبتي نجمه تغنت في ملامحها السما = حبيبتي صرخه على الوقت الرمادي واحتجاج
حبيبتي جمله عتب مزمن على شفة عمي = حبيبتي شوكى غصون الورد لأيام العجاج
حبيبتي غصن اخضر .. لين على دربي نما = لو كسرتني في كفوف الوقت تكسير الزجاج
لعيونها كل الجروح استعذبت نزف الدما = ولعيونها جفن السهر صارت له الدمعه مزاج
أسترجع الماضي واناديها تعالي لى كما = غيثٍ يبشر بالحيا سيله وسيعات الفجاج
والا تعالي لي مثل طيفٍ تهادى وارتمى = داخل عيوني لو يسافر بين رمشي والحجاج
حتى تعيش الخطوه اللي رافقت درب الظما = وانا اجعلك للهامه اللي مانحنت للناس تاج
.
.

يتيع ,,

[شيهانة نجد]

طلت البندري مثل النهار الجميل = ياهلا بالعيون السود واجفانها
كنها مهرة شقرا صغيره واصيل = عزوة اخوانها وعيال عمانها
عين حرٍ يهدونه ورمش طويل = من عشقها غدا بدروب سلوانها
ماعليها ولو قالواقصيرة جديل = من بهاها القلوب يهج بيبانها
.
.

يتبع ,,,

[شيهانة نجد]

ذكراه تشعلها عصافير واجراس = بس المحه فـ .. اجمل زوايا كياني
الغايب اللي كن في عينه نعاس = أخاف اموت من الظما ماسقاني
ياما عصيت انزف على كل قرطاس = وياما الوله لاحباب عيني نعاني
والله ما ابغي من ورا الترف نوماس = أنا القصيد إبليت به وابتلاني.
.

يتبع ,,,

[شيهانة نجد]

ليت لي ذود يدك البيد واحداله لحاله = كان ماوالله علي خلاف في نجد العذيه
جفت اقلام الغرام وطول المحبوب باله = والله اني ماهقيت ان الغضي يقسي عليه
وش خطاي الا المحبه وش رجاي الا وصاله = وش يبي غير الموده والغلا والمقدريه
دللوه اللي ربوه صغير واسرف بي دلاله = ليت لي قلب يطيق الصبر وعيون خليه
والغضي لو لاعه التحنان وبقلبه عداله = ماغذت من دونه القيعان جردٍ جرهديه
وان تشره قايد الغزلان ماله بي جماله = لعنبو من خان خلانه وجنب عن خويه
عن جنوبه والوله والشرق يغنيني شماله = صد ياقلب الجفا لاصد وضاح الثنيه
ماانت ياالخفاق عبد له ولا انت اصغر عياله = انت خفاق الضلوع العوج والخيره خفيه
.
.

يتبع ,,,

[شيهانة نجد]

خلص كل الكلام ولابقي غير القصيد اعتاب = نشف وجه الجراح ولابقي غير السهر راحه
سلاماتٍ تطولك لاتجيني خايفٍ مرتاب = ترى لك وحشه مثل الظلام ان مات مصباحه
ترى لعيوني اكثر من صديق وللخفوق احباب = اشوفك تختصرهم في خفوقي يااول جراحه
على هونك .. ترفق ياشتاي البارد الكذاب = تراها.. قفلتين .. الطعنتين ان قلت ذباحه
بشوفك .. بلمحك .. بتذكرك لاغابو الغياب = وأبا اصرخ من حشاي ورحله الغفران تفاحه
ألا ياكبرها وانتى وانا واثنينا الاغراب = على قلب خساير غيرته في ذمه ارباحه
رهنت لغيبتك ظلٍ نحيل ودمعتين وباب = على قلبي قفلته والوفا همه ومفتاحه
تفضل نعمه النسيان ما ابغي لاابتعدت اصحاب = عطاياك القديمه والجديد الياس وارماحه
بقي طيفٍ باحرسه في عيوني لك عليه اهداب = ولاني حاجبه ياوجهته لاهداك مرواحه
خلص كل الكلام اهديت لك لون الوداع اخضاب = مهر كفٍ دفاها من عذاب مصافحي راحه

.
.

يتبع ,,

[شيهانة نجد]

ياحبيبي والبكا .. هم المحاجر = بالدموع ابرد مناديلي كويته
آه من صوت ترك كل الحناجر = وانتثر في دفتري شعر وقريته
كل هذا .. وانت قاسي قلب هاجر = ماهداك الله واخذت اللي عطيته
صاحبك لين حشا والحسن فاجر = من لمحته قلت جاك اللي بغيته
من غرامك في غلاك ارحل واهاجر = وان ضواني ليل من يمك سريته
لاتزيد طعوني أوجعت الخناجر = مابقي عرقٍ بقلبي ماثنيته
لو عيوني غيم واهدابك محاجر = ماظما رمشك تحت دمعٍ بكيته
.
.

يتبع ,,

[شيهانة نجد]

العشب الأزرق سامر الشيح و القمح = عقب سْقتَه عذب السحايب بَرَدْها
و الجادل اللي طولها كنّه الرمح = كل الرّغَد و الخيزران لجسدها
هي بَسمةٍ يشقى بها الجمر و الصّبح = و تغار قطعان النّحل من شهدها
عن ملحها ياما البحر حدّث الملح = و ياما الحرير اشتاق لعناق يدها
شيهانةٍ لا بيّنَت وجهها السمح = تذبح يا أهل شقر الحرار و هددها
قلب الوله و قلادة التيه و المدح = يستاهله عنق الجفول و نهدها
ليت الجفا زلّة و أدوّر لها دمح = و ليت الغرام جروح و انسى عددها
و أنا قتيل البرد يا وادي الطلح = كان المزون أضناك صاخب رعدها.
.

يتبع ,,

[شيهانة نجد]

حبيبي لآتعــــــــــــذّر ..



حبيبي لا تعذر ما على صدق الحبيب جدال = رضت عنك العيون وهاك قلب فز بأعشابه
على وعدك تجيني يا حبيبي صاخب الميصال = عليك من اليدين وناسها هرجه وسبابه
هلابك وين ما يشرق نظرك الناعم القتال = هلابك وانثنى غصن الزمان وطار باسرابه
عذاريبك قليلة يا حبيبي كايد العذال = ولكنك بقلب من سكنته حارسك بابه
عيونٍ شافتك عن قرب قرب يهمها تختال = على بعض العيون وكل طير يحب مرقابه
انا اللي سلمك قلبه دلو عشق وغلاك الجال = وتليته بحبل من جفاك وضاق بأسبابه
فداك اللي تبي هاك الجمل والحمل والجمال = جلب تلك السنين وكل سوق وطيب مجلابه
يا الطف من طيوفك في عيونٍ للسهر مدهال = لجني خايفات وكل طيف احلى من ثيابه
احبك كثر ما ينسى زمانه مستريح البال = واحبك كثر ما قلب المسافر حنّ لترابه
شبيه الشمس لو مالك مثل شمس السنين ظلال = ترى كلن يموت الا قصيدٍ يبكي احبابه
وانا ليلي قصايد او قصيدي ليل لا تحتال = هذا بعض الغلا باقصى خفوقي جاك باعشابه
.
.

يتبع ,,

[شيهانة نجد]

صحيـــــــــــــــــت جمرررهـ ..!!


كل الشوارع تمرّك يالحرير الحر = يا تل قلبي على لاماك من تالي
صحّيت جمرة .. و ذاب الشمع و السكّر = وشلون ما اتذكّرَك و تمر في بالي
في بسمتك يضحك الرّمان للمرمر = و بعد يغار الشهد من ريقها الحالي
و يحق لك يا صغير السّن تتكبّر = إلاّ على اللي يحبّك يا بعد حالي
يا كثر حبك بقلبي و الغرام أكثر = و تخيّل وش كثر أحبك و انت غربالي
يا خلطة المسك و الرّيحان و العنبر = الريح تستاذنك يالطّيب الغالي
رح وين ما تشتهي رح قد ما تقدر = أنا أول الناس في قلبك و انا التالي
و العاشق يعلم الصبّار يتصبّر = على الظما لا تغطرس و أشهب اللالي
.
.

يتبع ,,,

[شيهانة نجد]

آل سعود

.
.



سنين العمر صبر و سفر و الحياه مراس = من اول نفس و صراخ يبدا به المولود
بلا صاحب الطرقه تعب و الرقاد نعاس = لعينٍ سراب التيه قدّامها ممدود
رجع بي الزمان ازمان لأيامه الدّراس = مسافات و سنين و فصول و ليالٍ سود
طريقي وعر و اشباح و اقدامي الهواجاس = زوادتي فيها نجوم الجهات سجود
من قبور رويان ثراها الي اليبّاس = وصلت لجدود احفادهم من زمان جدود
تعديتهم لطويق باقٍ معاي انفاس = عليها الصدر لا شحّ ما يلحقه منقود
وراي الظما و الجاهليه و صحرا الياس = و عمرٍ تقهقر و الزمن ينفهق و يزود
وصلت الرياض و كان لدهام ابن دواس = على آخر هزيع من الدجى و العباد رقود
و مر الصبا نسمهَ براد و سفر نسناس = رسايل عتب للطين كان و غرام نجود
صحوا بي وانا نشوان في دروبها الحرّاس = عليهم رصاص في مجاند و اشوف فرود
دعوني بعد سلّمت للكيف و المجلاس = على ضو نارٍ و لّعت في يباس العود
يسامر سناها راعي النجر و المحماس = وصفراً يطيب لبنهّا الخاطر الملهود
بعدها السوالف عن هل الطيب و النوماس = بعضها تقاود من بعض و الصدور ورود
رواها بحسره صاحب القفل و الترباس = قصص في جثثها الذيب يشبع و يرعى الدود
على قوم((ابن غلاّب)) ((ريف النظا)) ((عفّاس)) = غزاهم على وضح النقا و البرا مردود
على شان صفراً ما لها في البلاد اجناس = رباعٍبغرتها الرجا و النصر معقود
خطبها بأصايل غير هجنٍ تقول أقواس = وعيّا يبيع حبالها بالغلا مسعود
وجاهم بقومٍ يلبسون الحتوف لباس = سرايا على حافز وخف الولد و العود
واخذها بحد مفرقات المتن و الراس = و مسك حبلها و انكف بها فزعة المضهود
وابو زيد عاثوا في قطينه عيال دباس = سبو نوق ربعه و ذبحو زيد في صاهود
وصيته غصين الراك و المطرق المياّس = عذاب القلوب و كل ذي نعمةٍ محسود

لها غرة فيها بدور السنه جلاس = و من ذيل شقرا ما تمّل الطراد جعود
و خشم كما السله توسّط من النعاّس = وفمها مثل خاتم((سليمان ابن داوود))
عروس تقول ان الحرايب طرب و اعراس = تحنّا بها دم و تعطر بها بارود
تجي فالحروب بدون قلب وبدون احساس = تعزوى وجمّ الموت لعيونها مارود
نهار امس طرّت صدرها عن غلا ((محماس)) = بعد صابته شلفا وشقّ نحره عبرود
وكنت اسمع الدم يتكلم وفاض الكاس = بالارواح و الارض امتلت فالكلام لحود
ومما سمعت اشعر بقلبي كمد و اعماس = من حزن فلاّح السوداني و راعي الذود
بعدها طويت عجاف الأيام و اليبّاس = على ليلةٍ تبعد عن اليوم عشر قعود
عصيٍ على التوصيف بارودها القباس = بعد ثار والمصمك خلد فالزمان خلود
ضحاها البشاير عمّت الدور و الأوناس = ونادى المنادي شاملت الدار ل((ابن سعود))
بطلها معزي راع الاجرب عريب الساس = اسد نجد الا نجد ظل الاسياد و المسيود
قبل شمسها كان الرياض النخل و الناس = سؤال على عبدالعزيز و متى بيعود
بعدها حبارى نجد من مخلب القرناس = فمان الله البادي وهيبه يمين الجود
ذهب كن ((ابو تركي)) وكنّ الكلام نحاس = جمل كن ((ابو تركي)) وكنّ الشعر مفرود
ضحوكٍ لربعه و ان حرب للعدا عبّاس = خضوعٍ لربه في ليال الرخا و الكود
عسى زاهر الحوذان و الربل والبسباس = يهلّه سحاب في ربابه بَرَد و رعود
على قبر ((اخو نوره)) ((معزى)) صليب الراس = و يبطي مقيم و يرحم الله قبور ((العود))
.
.

[شيهانة نجد]

انتهىآ

ستة عشر قصيدة مجموع ما أنتقيته هنا للعذب نايف صقر ..
وربما تكون لي عودة بالمزيد .. علها ترتقي لذائقتكم

.
.

ودي .. الشيهآنهـ

[فيصل الفيصل]

الله يا نايف صقر رائع بكل ما تحمله الكلمه من معنى يعجز السان ان يصف جمال قصائد نايف


صح لسانك يا نايف صقر

ولا هنتى على النقل الرائع يا شيهانه نجد


لا هنتى

[ماجد بن عبدالعزيز]

صح لسان ابوصقر

شاعر جميل

واشكرك ياشيهانه

والله يعطيك العافية على النقل المميز

[شارد الذهن]

صح لسان الشاعر نايف صقر

والله يعطيك العافيه ياشيهانة نجد على المجهود الجميل

تقبلي مروري

[شيهانة نجد]

الله يا نايف صقر رائع بكل ما تحمله الكلمه من معنى يعجز السان ان يصف جمال قصائد نايف
صح لسانك يا نايف صقر
ولا هنتى على النقل الرائع يا شيهانه نجد
لا هنتى

صآدق وربي .. و يستاهل أبو صقر :)
صح قلبك أبو فيصل
و لا ندمت
سرتني طلتك هنــآ

[الثريـــا]

صح لسان شاعرنا الراقي
ابو صقر
:
:
لاهنتي عزيزتي الشيهانهـ على هذا الانتقاء المميز
وهذه الرووعه بالقصيد
:
شكرا لك ولك كل التقدير

[الجوهره]

ديوان رااائع لشاعر غني عن التعريف
صح لسان الشاعر
وتسلم يمينك ع الاختيار المميز

[العضيلة]

بارك الله بك , شكراً أخي الكريم

[نــجــم]

صح لسانك يا نايف صقر

ولا هنتى على النقل الرائع يا شيهانه نجد

[شيهانة نجد]

صح لسان ابوصقر
شاعر جميل
واشكرك ياشيهانه
والله يعطيك العافية على النقل المميز

صح بدنك .. تسلم يبو فلاح
يعافيك ربي .. نورت بحضورك ,,

[شيهانة نجد]

صح لسان الشاعر نايف صقر
والله يعطيك العافيه ياشيهانة نجد على المجهود الجميل
تقبلي مروري

صح قلبك .. و يعافيك ربي ع المرور
نورت ,,

[شيهانة نجد]

صح لسان شاعرنا الراقي
ابو صقر
:
:
لاهنتي عزيزتي الشيهانهـ على هذا الانتقاء المميز
وهذه الرووعه بالقصيد
:
شكرا لك ولك كل التقدير

صح قلبك بنوووته .. و لا ندمتي
الروووعة بتواجدك
نورتي ,,

[شيهانة نجد]

ديوان رااائع لشاعر غني عن التعريف
صح لسان الشاعر
وتسلم يمينك ع الاختيار المميز

صح قلبك شجوووونه .. و يسلم غاليك
نوورتي بها الطلة

[شيهانة نجد]

بارك الله بك , شكراً أخي الكريم

الله يبارك بك .. بس أنا أختك :)
تقديري ,,

[شيهانة نجد]

صح لسانك يا نايف صقر
ولا هنتى على النقل الرائع يا شيهانه نجد
صح قلبك نجم .. و لا ندمت
الاروع تواجدك ,,

[مسيّر الحريّص]

الموت حظ القلـم والمجـد للدفتـر
حبر القلم غلطتي وايامـي اوراقـي
الخوف يجتاحني وجه الطريق أسمر
راح اكثر العمر ياخوفي على الباقـي
ياجـرح رافقتنـي للنـاس لاتظهـر
وان عشت في نظرتي مامت باعماقي

يكفيني اني اخذت هالأبيات بس

وطبعا يعطيك العافيه على هالأنتقاء
وهذا من علو ذوقك الله يعلي شانك
والمعذره على حضوري المتأخر لهذا الموضوع
وماقصرتي

فمان الله

6413

[{.تخُفي غلآإهُـآإ ..!]

شيهانة نجد

صح لسان الشاعر

ويعااافيك ربي ع الاختيار الرائع

[شيهانة نجد]

الموت حظ القلـم والمجـد للدفتـر
حبر القلم غلطتي وايامـي اوراقـي
الخوف يجتاحني وجه الطريق أسمر
راح اكثر العمر ياخوفي على الباقـي
ياجـرح رافقتنـي للنـاس لاتظهـر
وان عشت في نظرتي مامت باعماقي
يكفيني اني اخذت هالأبيات بس
وطبعا يعطيك العافيه على هالأنتقاء
وهذا من علو ذوقك الله يعلي شانك
والمعذره على حضوري المتأخر لهذا الموضوع
وماقصرتي
فمان الله
6413


ذآئقتك راااقية ..
صح لســــــــــآنه .. و يسلم ذوووقك والله
ما عليك زووود
لا تعتذر .. نوورت بطلتك ,,

[شيهانة نجد]

شيهانة نجد
صح لسان الشاعر
ويعااافيك ربي ع الاختيار الرائع

صح قلبك دلوووعه
و تسلمين يالغلا ع الطلة الغيرر

[عــ الهوى ــز]

شاعر غني عن التعريف

وديوان كامل والكامل الله

يعطيك العافية اختي شيهانة على المجهود الرائع


تحياتي لك

[شيهانة نجد]

شاعر غني عن التعريف
وديوان كامل والكامل الله
يعطيك العافية اختي شيهانة على المجهود الرائع
تحياتي لك


تسلم عزوو .. يعافي قلبك
الرووعة في وجودك و متابعتك
تقديري ,,