المساعد الشخصي الرقمي

مشاهدة النسخة كاملة : ديوان الشاعر عبدالله بن سعود الدغيثر ,,, ضرماء


كحيلان العنزي
28-12-2007, 08:40 PM
بسم الله الرحمن الرحيم
هذي مجموعه من قصائد الشاعر / عبدالله بن سعود الدغيثر
من محافظه ضرماء حيث استأذنته بأن اضع بعض من ابياته في الشبكه العنكبوتيه
ومنتديات عيال الحمايل منتدى يستاهل يكون اول من ابدا بوضع ديوان شاعرنا فيه
نبدا مع القصائد :
القصيده الاولى :
خشوم طويق
عند ما سأله احد اصدقائه من اهل سكاكا الجوف عن اسم هذه الجبال
فرد عليه شاعرنا بهذه القصيدة :

هذي خشوم طويق ياجاهل طويق = هذي الخشوم اللي يذري ذراها ‍
هذي الخشوم اللي تفرج عن الضيق = لازادت هموم المعنى رقاها ‍
ولاضقت من وقتي على رجمه أويق = ويطرد عن النفس الشقية شقاها ‍
كم مرةٍ عديتها وخاطري ضيق = وحولت منها ساليٍ من عناها ‍
وكم مرةٍ جريت فيها الطواريق = وإليا رفعت الصوت جاوب صداها ‍
وكم حي عداها على فكة الريق = وكم واحدٍ تحت الثرى قد وطاها ‍
وياما تعلوو في حجاها التفافيق = للصيد يوم الصيد ياطا ثراها ‍
احبها حبٍِ يخج المعاليق = لو كانها صّمٍ يروّع حصاها ‍
حبٍ قديم معتّق الود تعتيق = واكبر ويكبر وسط قلبي هواها ‍
ومن لامني في حبها دون تبريق = معذور حيثه ما تعلا حجاها ‍
ولابطيت عن هاك الرجوم الشواهيق = كني مظيّع حاجةٍ مالقاها ‍
وجعل الخيال اللي بروقه شواعيق = لاجا على ذيك النوايف سقاها ‍
يسقي مداهيل الرجال المطاليق = اللي فعايلهم بعيدٍ رداها ‍
هذا جوابي يوم تنشد عن طويق = وينبيك عن عالى حجاها ذراها ‍
وسلامتكم ........
عبدالله بن سعود الدغيثر
................
القصيدة الثانيه :
الحب

الحب ماهو بستطاعة هل الحب = الحب شيٍ يبعثه رب الارباب ‍
في قلب منهو في دروب الهوى شب = وعلى دروب الغي ومطارده شاب ‍
وإلى سطى في قلب رجلٍ تعذب = ورجله يعّيها على كل مرقاب ‍
واللي مشى بالحب لابد يتعب = ولابد من بيض الغنادير ينصاب ‍
وقلبه كما غصنٍ عليه الهوى هب = يميل لاذعذع نسيم الهوى الهاب ‍
وعينيه منها صافي الدمع ينصب = لاصار من يهواه عن ناظره غاب ‍
وترى المودة ياعرب مالها طب = خطرة ولا ينفع بها طب الاطباب ‍
والشوق يذبح لاتمكن من الصب = اللي شكى فرقا الولايف والاحباب ‍
يقوله اللي بالمحبة مجرب = جرب ولكن مالقى غير الاتعاب ‍
ولاصفى له من هوى البيض مشرب = واليوم عن طرد الهوى قفّل الباب ‍
وسلامتكم ....
عبدالله بن سعود الدغيثر
................................
القصيدة الثالثه :
الـــطير
ياخالـد الطـير ناشتـني مخـاليبه = في ثومة القلب اونـس حر مضرابـه
باقصى السراجيف يامقشر مضاريبه =ادمى صـوابي ومكـن فيّ مـخلابه
يامـا قصرة العيون وقلت مـاليبه = والقلب ياما نهيتـه خـوف يـبلابه
لاكن قلـبي تولـع في هـناديبه = واليـوم اشـوفه خـذا قلبي وقفابه
تله من اقصـاه واقفـابه يمـاريبه = داله وهمـه يـدير الـحوم فـالغابه
وانا اتوجد وفي روحي مشـاهيبه = واصبحت كني دخيـل شاف حرابه
وقلبي هشاش وطيور الجو تسري به = والـهم خيّـم عـلي كله من اسبابه
اثر الـولع يخلف الرجال ويـعيبه = يودع رجـال الـوفا والطيب مرتابه
مدري متى العين تسلا من تعاجيبه = ومدري متى القلب ياصل حد مطلابه
ومدري ياخالدمتى الاقـدار تاتيبه = ياليتـكم ما وقـفتوبي عـلي بـابه
وياخالـد انخـاك وصلي مكاتيبه = وصل علومه لنا قـدام نشـقى بـه
وحذرا الحواسيد والانذال تدري به = ما غيرك احـدٍ عرف وكره ومرقابه
وياخالـد الله يكـافينا عـواقيبه = الطــير والله بلانـا وابـتلينابـه
وسلامتكم ...
عبدالله بن سعود الدغيثر
......................
القصيدة الرابعه :
الحلم
بالحلم شفت الزين سيد الغنادير = شفته وانا في لذة النوم غافي
شفته وسلهم بالعيون المخادير = وارخى اللثام وبان ماكان خافي
قال السلام وقلت مسيت بالخير = وشفيك ياسيد الغنادير جافي؟
قال الزمن غدار وابغى المعاذير = صحيح جافي لكن اليوم وافي
قلت العذر ماينفعك توّك صغير = اصبر تعلمك الليال العجافي
قال العواذل دبّروا لي تدابير = وطاوعتهم حسبي على كل هافي
واليوم جابتني صدوف المقادير = وابشر بقلبٍ صادق الود صافي
قلت الله اكبر عقب ذيك المشاوير = توّك تجي عقب القسى والتجافي
ماجيتني يوم الليالي معاسير = مابيك مادام الليالي عوافي
في مامضى نتعب على دربك السير = واركض على دربٍ مشيتوه حافي
وارجيك رجوى راعي الطير للطير=اللي غدا طيره بجو الفيافي
واخترتكم من بين كل الطوابير = وكم واحدٍ لجلك تركته خلافي
وكنت اعترف لك بالغلا دون تقصير = وغيرك تمنى شوفتي واعترافي‍
يازين مالك عندي اليوم تقدير = حل بمحلك واحدٍ عنك كافي‍
ماعاد والله فيك ادير التفاكير = غلاك عندي نوره اليوم طافي
وجلس ودمعه فوق خده شخاتير = يبكي على ذيك الليال المقافي
وفزيت من نومي واردد عسى خير = والله من حلوم الليالي يكافي‍
وتعبت ماحصلت للحلم تفسير = لاعاد حلمٍ جابه الليل لافي
وسلامتكم .....
عبدالله بن سعود الدغيثر
...............................................
القصيدة الخامسة :
هرج القفى

امس الضحى عديت نايف هضابه = وسجلت في راس الـطـويله مكاتيب
وابعدت عن ناسٍ تحب الـحرابه = اخير مـنهم نـايفـات المـراقيب
ناسٍ لها على الرفـيق انـقـلابه = اللي على المقفي تشيـل المـشاعيب
ناسٍ بوجهـك يظـهرون الحبابه =ولاقفيت عنهم يلحقـون المشـاهيب
ناسٍ يحـبون الحـكي والعيـابه = ظارين بالنمه وشـذب العـراقيب
كـم واحـدٍ منهـم كلامٍ لـفابه = وعيبٍ علينا نسمع اهروجهم عيب
هرج القفى لونسمع اللي حكـابه = كان ابتلشنا مع هل الشك والريب
هرج القفى لو نطرد اللي سعى به = شرهو علي ناسٍ تعرف المواجيب
ياما سمعنا في القـفى من سبابه = ولاهمنا هرجة كبار اللـغابـيـب
وفكري ترى هرج القفى ما شقى به = وانا احمد الله ماعليّـه مـقاضـيب
والظلع راسي لـو تـنابح كلابه = ولا زحزحه صفق الهوى والهباهيب
وراعي النميـمه عل يفـقد شبابه = وعسـاه في عرضه يورا له العيب
ولعل ياتـيه الصـقه والعمـى به = ويظيع في طبه جمـيع الاطـابيب
وعـساه بالدنـيا بـهم وكـأبه = وبالاخرة عله بوسـط اللـواهيب
لكـن ابنـصح من يحب الذرابه = نصـيحةٍ مـاريـد مـنها مكاسيب
كب الردي لو هو من ادنى القرابه = تراه مايعرف حقـوق الاصـاحيب
لياطالت الطـرقه يبين الـردا به = وعليك يصـبح من كبار الـعواقيب
واحرص على اللي بالقـا ينغزابه = قرمٍ ولـد قرمٍ سلك مـسلك الطيب
وسلامتكم ....
عبدالله بن سعود الدغيثر
..........................
القصيدة السادسة :
مامن جديد

يامن نشدني عن جدايد قصيدي ‍= مامن جديد وكلمة الحق تنقال
لي مدةٍ ماقلت نظمٍ فريدي ‍= قد لي ثلاث سنين عن بدع الامثال
مبطي ولكن مانسيت النشيدي ‍= انساق له سوق العسيفة لجمال
حب الشعر متغلغلٍ في وريدي ‍= وصديت عنه وخاطري فيه لازال
ولاهوب ودي مير وقتي عنيدي ‍= تلعب بي الدنيا على كل مـوال
خذت القلم واحظرت طرسٍ جديدي = وبنات فكري شرّفت نايف الجال
واسترسلت وتقول هل من مزيـدي = وخذيت انقيها عن هزال وسمال
‍مانيب والله يوم اغني سعيدي = ‍مكلوم وهمومي عريضات وطوال
ماودي ابديها تظايق عظيدي = وتفرح بها العدوان وتسر الانذال
والوقت مشاني على مايريدي ‍= واساير الدنيا وفي الرجا طال
وهديت طير الحظ علّه يصيدي = وطار وتعلا وارتفع فوق الاقذال
وهب الهوى ثم قام عجٍ عتيدي ‍= ولاعاد لي حيله ولا الطير يحتال
واصيح له وارجي صياحي يفيدي = ‍وظاقت بي الدنيا وظاعن الامال
ورحت اتنشد عنه مثل الهويدي = ‍عقب تجلا العج وانزاح وانزال
ثم ذكر لي طايح وريشه بديدي = ‍على الصفا دونه صلافيح وجبال
هذي هي الدنيا تغر العبيدي ‍= تمسي بحال ونصبح الصبح في حال
ونكبر ومعنا هم بقعا يزيدي ‍= ومن طال عمره شاف بالوقت الاهوال
ويالله عفوك بالنهار الشديدي ‍= في الموقف اللي فيه تنعرض الاعمال
وسلامتكم ..........
عبدالله بن سعود الدغيثر
...................
القصيدة السابعة :
يا شوق

ياشوق لاتبطي عن العين يا شوق = وانا على شوفـك يزيـد اشتياقـي
لاغبت عني ساقني يمـك الشـوق= ليتك مثل مانسـاق يمـي تساقـي
نهبتني يا خدر الأعيـان برفـوق = وحملتني حملٍ(ن) جزل ما يطاقي
والنوم من عيني له سنين مسروق = اثر الهوى يا شوق مـر المذاقـي
ومن عقب شوفك رد لي كل مفهوق = وراح السهر من عقب ذاك العناقي
يا زين والله شوف عاشق لمعشوق = ويا زين من عقب الفراق التلاقـي
اثر اللقاء عقب البطى يطلق العوق = يفك عوق اللي من البعـد ضاقـي
واثر اللقاء عقب التفاريق لـه ذوق = ذوق وطراةٍ(ن) عقب طول الفراقي
وسلامتكم ....
عبدالله بن سعود الدغيثر
............................
القصيدة الثامنه :
كشف البروق

النـوّ بانـت يالنشـامـا مـواريـه = أقبل مـن القبلـة تكاشـف بروقـه
مثل الهضاب النايفـة فـي مناشيـه = يفرح به اللي كل بـرق(ن) يشوقـه
ويطرب له اللي كاثرات(ن) طواريـه = حب الصحاري لاجي(ن) في خفوقـه
ويفرح به الشاوي وتكبـر هقاويـه = وينومـس اللـي (مشْقِيَه)1حبنوقـه
وراعي الولع طيـرة بكفـه يخاويـه = الصبـح بالجنـحـان محلاخفـوقـه
عقب المقيض اصبح على كف راعيه = يكشف له البرقـع ويطلـق سبوقـه
يالله علـى نجـد العـذيـة تقـدّيـه = والله علـى ذيـك المفالـي يسوقـه
عساه يمطـر فوقهـا بأمـر واليـه = وينثر على الضلع الموالـي حقوقـه
وتزين سجات القـدم فـي خباريـه = ويطيب قلب(ن) كاثـرات(ن) فتوقـه
والبر يبهج خاطر اللـي مشـى فيـه = لاصـار نبتـه راويـات(ن) عروقـه
والأرض خضـراء مالهـا مايحاليـه = حتى افخم الشيراز واطيـب عموقـه
من فوق جيب(ن) لا عطا الخط يطويه = ذب العـروق الزامـيـة ماتعـوقـه
ماهـوب جيـبٍ ماتـعـدا مبانـيـه = راعيه في وسـط المبانـي يسوقـه
لا والله إلا بالمـسـاري مـظـريـه = وإلى سـرى ليلـه يغنـي طروقـه
يازيـن مغباشـه ومحـلا مساريـه = يشوش راس اللي سرى الليل فوقـه
يدنيك قفر(ن) صادق الغيـث محييـه = ويبعدك عن ضوضا البلد والخنوقـة
وسلامتكم ...........
عبدالله بن سعود الدغيثر
..................................
القصيدة التاسعه :
مزامير الموادع

لجت مزاميـر المـوادع وقفيـت = قفيت والعبرة تسابـق دموعـي
‍ حاولت اخفّي دمعة العين وازريت = هلت على خد المعنـى جموعـي
ومع السلامة قلتها بس مأوحيت = كني من الموقف ثقيل السموعـي
‍ومن عقب ماقفيت بالصوت ناديت = ولا كن يسمعني من الناس دوعي
‍عزالله انـي عقبهـم ماتهنيـت = اسهر وكن اليوم عندي سبوعـي
ورقيت في راس الطويلة وجريـت‍ = صوتٍ يوّقـظ نايميـنٍ هجوعـي
قفوا وانا قفيـت لاحـي لاميـت = هذا الفراق اللي لقلبـي يروعـي
ياما عليهم في دجى الليل ونيـت = وخطرٍ من الونة تصّرم ظلوعـي
‍وياما عليهـم فالليالـي تمنيـت = حل الرحيل وحن قلـبٍ جزوعـي
‍وليّـت ياوقـت الغرابيـل وليّـت‍ = فرقتنا من عقـب كنـا ربوعـي
هذا كلامي يـوم قفـوا وقفيـت = ولاظن من عقب التفرق رجوعي
وسلامتكم ...........
عبدالله بن سعود الدغيثر
.........................
القصيدة العاشره :
فرقا تكسر الخاطر

العب مع الحب واثر الحـب ياشطـره = وانا أحسب إني قبل لعب الهوى شاطر
أخلف ظنونـي ولا باقـي ولا قطـرة = من دمعي اللي على الأوجان متقاطـر
بعض المواقف على قلوب البشر خطرة = مرت على القلب فرقاً تكسر الخاطـر
الغايب اللي خلقه الله علـى الفطـرة = لجله أضحي وادوس الموت واخاطـر
أموت وأحيا بذكـر السيـرة العطـرة = عايش على الذكريات وصيته العاطـر
غايب وكبدي عقـب فرقـاه منفطـرة = وخذيت مدة على بـاب الأمـل ناطـر
طال إنتظاري وكوني ظاق بي قطـره = أرجيه رجوى البدو للوابـل الماطـر
على أمل لكن سيوف الهـوى شطـرة = وماخاب من يرجي اللي للسماء فاطـر
وسلامتكم ....
عبدالله بن سعود الدغيثر ...
انتهاء الديوان .......
واشكر شاعرنا الكبير على اذنه لي بوضع بعض من قصائده
وتقبلوا تحيات اخوكم :
كحيلان العنزي
والمعذره على القصووووور .......

الطيـّر
31-12-2007, 04:21 AM
صح لسان الشاعر عبدالله

وما قصرت اخوي كحيلاان

الف شكر لك على النقل

الجوهره
31-12-2007, 04:24 AM
يعطيك العافيه ع الديوان للشاعر الكبير
تقديري واحترامي

كلك حركات
31-12-2007, 08:29 AM
صح لسان الشاعر
ولا هنت استاذي ع الديوان الرائع
تقديري واحترامي

الهاوي
03-01-2008, 02:50 AM
شكرا جزيلا على اتحافنا بهذا الديوان
المتواضع بحجمه ولكنه مليء بالقصائد
الرائعه
لاتحرمنا باقي قصائد شاعرنا


لاهنت ...

أجوديه وبالزين مبلية
03-01-2008, 02:53 AM
يعطيك العافيه ع الديوان للشاعر الكبير
تقديري واحترامي

الدلوٍوٍعه
04-01-2008, 06:31 PM
صح لسان الشاعر
ولاهنت اخووي ع هالمجهوود الرائع
الله يعطيك العافيه

كحيلان العنزي
07-01-2008, 02:47 PM
حياكم ربي يا الربع

مروركم يشر فني

فيصل الفيصل
07-01-2008, 10:47 PM
كحيلان لا هنت نقل رائع يا عزيزى والشاعر رائع وكبير لا هنت



فيصل الفيصل

شيهانة نجد
10-01-2008, 01:28 PM
صح لســـــــــانه مليووون
اعجبتني قصائده .. خصوصا هرج القفى
لا هنت يا ولد وايل ع النقل
بيض الله وجهك ,,

ساطي
11-01-2008, 10:35 PM
صح لسان الشاعر
ولا هنت استاذي ع الديوان الرائع
تقديري واحترامي

منادي
19-01-2008, 03:28 AM
ديوان رائع واضافه جميله
صح لسان الشاعر عبدالله الدغيثر .. واشكرك ياكحيلان
جهد رائع .. الله يعطيك 1000 عافيه

و

تحية اعجاب لمن يستحق الاعجاب
منادي

كحيلان العنزي
10-02-2008, 01:05 PM
حياكم ربي

وصح الله ابدنكم

مروركم شرفني

سهــم
01-03-2008, 02:23 AM
لاهنت اخوي على ماقدمت

لك كل التقدير

كايدهم بقوة
08-03-2008, 01:45 AM
صح لسان الشاعر عبدالله

وما قصرت اخوي كحيلاان

الف شكر لك على النقل

نــجــم
15-03-2008, 09:53 PM
صح لسان الشاعر

يعطيك العافيه على النقل المميز