المساعد الشخصي الرقمي

مشاهدة النسخة كاملة : ديوان الشاعر الكبير // الامير خالد الفيصل


الجوهره
03-02-2007, 02:51 AM
نبذة...حياة الشاعر سمو الامير خالد بن فيصل بن عبدالعزيز آل سعود




من مواليد مكة المكرمة في الخامس عشر من محرم 1359هجرية
درس المراحل الابتدائيه والمتوسطة والثانوية في المدارس النموذجية بالطائف
واكمل دراسته في هان اوف بريستونفي أمريكا
حصل على بكالوريس في الاقتصاد السياسي من جامعة أكسفورد
تزوج عام 1964من العنود بنت عبدالله بن محمد بن عبدالرحمن ال سعود ولة من الذرية
ثلاث ابناء بندر و سلطان و لؤلؤة

قصيدة....حدّني وقتي


*
*
حدّني وقتي على شيٍ جديـدي =السهر ماهوب من عادة عيوني

أبعدوني عن هوى بالي وسيدي =ومنعوا عنّي خطوطه ياصلوني

شطروني عنه في دارٍ بعيـدي =حسبي الله كانهم منه قطعونـي

صارت الفرقا لنا علـمٍ وكيـدي =ليتهم راحوا وانا عنده نسونـي

عاقني عن صاحبي سورٍ حديدي =دونه البحور حـرّاسٍ ودونـي

الرجا بك يابو خالد يا عضيدي =لا تخلينـي تراهـم عذّبـونـي

الجوهره
03-02-2007, 02:55 AM
قلبي اللي

قلبي اللي لواه مْـن الصواديـف لاوي =جرّحته الليالـي و الحظـوظ الرديّـه
و الله أنّي بوسط الناس كنّـي خـلاوي =من يلوم المفارق عقـب فرقـا خويّـه
أشهد ان المفارق من عظيـم البـلاوي =ميـر هـذا نصيبـك يالعيـون الشقيّـه
أتجلّد و أقول أنّي علـى البعـد قـاوي =و الله أعلم بقلبٍ فيـه الأشـواق حيّـه
كيف راحت يابو تركي حياتي شقـاوي =وين درب السعـاده و الحيـاة الهنيّـه
ليت لأهل الهوى و الحب قاضي دعاوي =كان أداعي عيون اللي فراقـه خطيّـه
كنّي المبلـي اللـي قطّعتـه المكـاوي =كلّمـا جـظّ بالـونّـات زادوه كـيّـه

الجوهره
03-02-2007, 02:57 AM
يا صقر

ياصقر و اهنيك لـك جنـاح تطيـر = لى طرى لك نزعت وطرت يم الهوا
بين قلبي وبينـك فـرق والله كبيـر = لى كفخت انطلقت ولى كفخت التوى
انت حايم وانا بالقاع دوبـي اسيـر= في صحاري زماني ذيب ليلي عوى
فوق جوك سحاب وحدر جوي هجير= القدم فوق رمضا والخفـوق التـوى
الحذر يا صقر لا يشبكونـك اسيـر= ويل صقرٍ يتله مربطـه لـى نـوى
برقعته اللّيالي فـوق وكـرٍ قصيـر= عقب صفقه جناحه بالهوا لى اهتوى
كل حرٍ الى ضاق انتهض للمطيـر= حومتـه بالسمـا ساعـة لقلبـه دوا
واعذاب الجناح اللّي يجـره كسيـر= كّلما فزّ مكسور النواهـض هـوى

الجوهره
03-02-2007, 03:00 AM
في غربتي

في غربتي ، عارضت أنا ركب الأغراب= أشـد.. وأنـزل .. والليالـي ركايـب
أضداد .. وأقران وعدوان .. وأصحاب= متناقضات الخلـق .. ماغـاب غايـب
أسهر معـا تهويـم نجمـات الأحبـاب= حتى يصيـر النجـم بالصبـح غايـب
أصبح على فجرٍ ضحـوكٍ ..وعجـاب= وأمسي على همسات، ستـر العجايـب
وقامت تجاذبني علـى درب..الأسبـاب= نفـس الشباب..يحدهـا عقـل اشايـب
مشيت فـي رمضا..وسنّـدت بهضـاب= وعارضنـي سيـول ،وهبّـت هبايـب
وأمسيت في صحرا..و قيّلت في غـاب= ومن طاول الغربات،شـاف العجايـب
مرتني الدمعـه، بهـا الوجـد مـاذاب= في غربة الأشـواق ، راحـت هبايـب
مرتني البسمـه، تقـل فوقهـا حجـاب= وراك خجلـي يـارسـول الحبـايـب
والحب.. مريتـه غريـبٍ علـى بـاب= عقب القصور ..أمست قصوره خرايب!!
بغيت أسلي خاطره .. عقـب ماشـاب= لقيـت مـالـه بالتسـلـي طـلايـب
أقفى مع المقفيـن .. وجـلٍ ومرتـاب= على عقـوق الوقـت ،بالحيـل عايـب
في غربتي.. مريـت رجلـي وركـاب= أرزاق .. من رب الخلايق ، وهتايـب

شيهانة نجد
03-02-2007, 03:01 AM
خالد الفيصل .. كعلم ٍ على رأسه نار ُ

شاعر .. رسام .. قبلها .. انسان قدير

احيي فيك استاذتي الجوري ذووقك الرفبع لاختيارك

:

تقبلي مروري ,, مذيلا بشكري

الجوهره
03-02-2007, 03:02 AM
بنت الكحيله ..




بنت الكحيله ..


بنت الكحيله مهــرتي

وخيالتي من كل اصيل

ألقى عليها طربتي

بين المعنـــــــق والشلــــــــيل

صدر وقطاة فلـــوتي

العنــــق والســـــاق الطويــــــــــــل

وقع الحـــوافر نغــــــمتي

وحــــداتنا رجـــــــع الصهيـــــــل

أبوي وجدي قدوتي

لو ما لهــــم عنــــــــــدي مثيل

بالدين تفخر عزوتي

والرمح والسيف الصقيل

ماكر حرار ديرتي

ما في هل العوجا ذليل

الجوهره
03-02-2007, 03:03 AM
علامك ..


قالوا علامك قلت ما بي خلاف

ما بي بلا يا كود فرقى المحبين

الحب لو يجحد عليله يشاف

يدري به اللي عارف لوعة البين

شئ يشاف وشئ بالجوف خاف

عشر تبين وخافي منه تسعين

الجوهره
03-02-2007, 03:04 AM
يا طـــــــــــــــــــارد


يا طــــــارد اللي راح خــله ومــلوه

ما يستــقيم الظــل لا عـــوج عـــــــــــــــــوده

ولا ينفــــع النـــدمان قولــة حــولاه

جـــحـــــــر لـــــــدغ يمنـــــــاك لا لا تعـــــوده

مد النظر في خلق ربي تمعناه

إلى انتقص من حال حال يزوده

الله جعــــل للمبتــــــــلي داه ودواه

وكل على عزمات قلبــــــــه حدوده

الجوهره
03-02-2007, 03:05 AM
من بنات الريح ..




من بنات الريح لي صفرا جفول

كنها ظبي الفلا بجفالها

منوة الخيال عساف الخيول

زينها في دقها وجلالها

زينها ما شفت وصفه بالمثول

الله اللي بالجمال اصخى لها

تستذير كحيلتى من كل زول

ما يصخرها سوى خيالها

اذكر الله كل ما قامت تجول

و احمد الله خصنى بحبالها

كنها تمشي على قرع الطبول

فتنى اللي خافقه يبرى لها

ظافي القصه على الطرف الخجول

تنكسر شمس العصر بظلالها

وصفها وصف السحاب اللي يحول

كل عين تستخيل خيالها

او كما طاري على الخاطر عجول

صاحبه حقيقته ما طالها

كل رجل في حياته له ميول

والهوايه تمتلك رجالها

الجوهره
03-02-2007, 03:06 AM
لو نسيت ..




لو نسيت العمر ما انسى دمعتك

صرخة ذابت من عيونك دموع

ترتعش مرتاعة في وجنتك

وانتفض قلبي لها بين الضلوع

أزعجت صمت الليالي عبرتك

بالخفا ثوره وبالظاهر خشوع

تسكب الدمعه وتظمى نظرتك

مشهد النظرة وهي تظمى يروع

يا ضياع العمر ضيعة بسمتك

ضاع معها خافق مثلك جزوع

ليت من يمتص جارح لحظتك

والفرح يشعل دياجيرك شموع

الجوهره
03-02-2007, 03:08 AM
من شمال ..

هب نسناس الهوا لي من شمال

حامل ريح الخزامي والنفل

من فياضٍ ظبيها يلعب دلال

لى لمح ظله من النشوه جفل

يذبح العشاق صعاب المنال

كم شطير بالقناصة قد قتل

مثل شمس العيد فضاح الجمال

كل نجم لا ظهر نوره افل

خصني بمواجه السحر الحلال

واشهد ان السحر في قلبي نزل

ضاري بمقابل فحول الرجال

وارتعش قلبي من الفتنه خجل

قلت راح العمر من دون الوصال

قال لو حاولت يا القاطع حصل

قلت لوني طامع لو بالخيال

كان بدلت التوجد بالأمل

يا ندى الغيمه على ورد الجبال

يا عبير زهور ريضان السهل

اجتمع حسن الحلا بك والجلال

ما تبدل بك مع العالم بدل

الجوهره
03-02-2007, 03:12 AM
حنا العرب

حنا العرب يـا مدعيـن العروبـة==و حنا هل التوحيد وانتم له اجنـاب
و حنا شروق المجد وانتم غروبـه==وحنا هل التاريخ و أنتم به أغراب
يوم الفقـر شلتـوا علينـا عيوبـه==واليوم عقب النفط جيتوا لنا أنساب
ويوم الفقر فينـا البـداوة سبوبـة==واليوم صرتوا مثلنا بدو واعـراب
لو الهـوى منكـم منعتـم هبوبـه==لا شك رزاق الملا رب الأربـاب
و لو المطرمنكـم منعتـم صبوبـه==لا شك رزق الخلق من عند وهاب
جيش الحسد سقتوا علينـا حروبـه==كل يبي يزرع على جسمنـا نـاب
حرب على المحسن تراها عقوبـة==بالله عساكم مـا تفيـدون حـراب
يامـا عطينـا مـا نـدور مثوبـه==الا من اللى من ترجاه مـا خـاب
و ياما نصرنا صاحب ضيقوا بـه==عاداتنا نقدم الى مـا لـردى هـاب
و ياما نصانا مـن تعثـر دروبـه==يدخل حمانا من تعذرها الأصحـاب
حنـا بنينـا دارنـا مـن طيوبـه==و انتم سلبتوا داركم كل ما طـاب
الله سقانـا مـن بحرنـا عـذوبـه==و انهاركم مثل البحر هدر تنسـاب
حنا زرعنا الحب بارض خصوبـه==و أنتم زرعتوا كره الأجيال بتراب
وحنا دعينا السلـم نوبـه ونوبـه==وانتم حمام السلـم بعتـوه بغـراب
يا من دعا للحرب ما ادراك خطوبه==لا تحسب أن الحرب تهديد وخطاب
من شب نار الحرب يصلى شبوبـه==ومن ثور الفتنة تعرض للأسبـاب
ما يستر الرجـال ملبـوس ثوبـه==الدين وافعال الكرامـة لـه ثيـاب

الجوهره
03-02-2007, 03:13 AM
جرح القصيده ..




قصيدتي منك مجروحه

اخلفتني واختلف شعري

يا ونتي منك مبحوحه

لو ما طلع صوته عذري

ذي رايتي منك مطروحه

طرحتها وانت ما تدري

شف دمعة الشوق مسفوحة

والوجد في ملحها يسري

مواجع القلب مفتوحه

داريتها واحترق صدري

حمامه الوصل مذبوحه

يا خوفتي قبرها قبري

الجوهره
03-02-2007, 03:20 AM
كل ما نسنس




كلما نسنس من الغربي هبوب حمل النسمة سلام

وان لمحت سهيل في عرض الجنوب .. عانق رموز الغرام

لك حبيب ما نسا .. كلمته دايم عسى

اطلب الله وارتجيه .. صبح يومي والمسا

كل زين اشهاده وانتم بعيد منوتي ليتك معي

وان سهرت الليل اهوجس بك واعيد هل لاجلك مدمعي

وانت هاجس خاطري .. وانت فرحة ناظري

يا قريب ويا بعيد .. فيك امس وحاضري

نشوتك تلعب مع قطر المطر .. وانتشى قطره معك

والسحاب يطاردك بين الشجر خالق الزين ابدعك

الندى في وجنتك .. صار عطر بلمستك

والهوى غنى طرب .. تستثيره بسمتك

كلما ضمت عيوني منك طيف يا بعد كل الطيوف

قلت ما مثلك على الدنيا وصيف لا حشا مالك وصوف

لا سحاب ولا مطر .. لا نسيم ولا زهر ..

لا طيور ولا زهر .. ولا مع باقي البشر ..

الجوهره
03-02-2007, 03:21 AM
سمرت ..






سمرت بصحبة حروف القوافي

احملها تناهيت خوافي

اشكل بالحروف الوان صوره

احركها من المعنى بصافي

اشيل الحرف من معنى لمعنى

واجاري ما زهر واظهر بخافي

والى منى عطيت الحرف ونه

بها حرفي على النجمات طافي

يقوم كل نجم من منامه

أنا ما نيب اسامر نجم غافي

يجيني كل نجم منه معنى

ولا قد قلت للنجمات كافي

تصور لي دموع وابتسامه

من عيون تقصوت ما تشاف

ألا يا نجم يا عالي تبصر

شف بعين المحبه عين وافي

وخبرني عن علومه وحاله


عسى قلبه مع الأشواق دافي

ولو ممشاي في جمر يفيده

مشيت بجمرها كنه عوافي

ولكن وش يفيده لو ذبحني

ومن يوصف جماله عقب قافي

الجوهره
03-02-2007, 03:22 AM
طال السفر ..



طال السفر

والمنتظر مل صبره

والشوق با محبوب في ناظري شاب


رد النظر

خليت بالكف جمره

سعيرها في داخل القلب شباب


عز الخبر

والمهتوي ضاق صدره

يا من يرد العلم عن هاك الأحباب


طيفه عبر

ما أرسل مع الطيف عذره

هو خاطره من لوعتي ما بعد طاب


هو ما ذكر

أن الجفا فيه كسره

للخافق اللي من هوى صاحبه ذاب


يا ما سهر

طرفي على حبس عبره

اردها والوجد للدمع جذاب


دمعٍ حدر

جاله على المنع جسره

عظيم وجدي للدمع شرع الباب


يوم وشهر

عزاه والعمر مره

والناس واجد لكن الولف غلاب

الجوهره
03-02-2007, 03:25 AM
ساعة الفرحة ..




يا ساعة الفرحه تشوقت للعيد

عيد العيون وعيد قلب الصبابه

رد الجمال لشوفتي يا اتلع الجيد

واسحب على حرفي لحون الربابه

حرفي بصوتك يا اجمل الصوت تغريد

يا رمز حبي هاك رمز الكتابه

يا صبح عمر فيك للعمر تجديد

وحبك يجدد كل يوم شبابه

للعين والقمرا وحسنك مواعيد

وليل الهوى شرع للأحباب بابه

ياما زعجت الصوت باسمك تراديد

وياما نسيم الوجد يمك سرابه

وياما تمنيتك على باقي الغيد

واقول مثلك يا غلا الروح ما به

ابيك تهوى مثل ما اهواك وتزيد

يا من خفوق القلب حسنك غدا به

يا قطرة الغيمه على يابس البيد

رد الحياة لخافقي يا ذهابه

الجوهره
03-02-2007, 03:33 AM
ساري الهاجس ..



ساري الهاجس حضرني وشلت لحونه

كل ما غنيت صوت يرد الثاني

كل شاعر تستضيف الخيال عيونه

ما ينام الليل من هاجسه سهران

كل نجم ساري يستهيض شجونه

واعذاب الشاعر المغرم الولهان

الجوهره
03-02-2007, 03:35 AM
لا يطول غيابك ..




لا يطول غيابك ثم اخذ عليه

لو تخليت عني عنك قلبي تخلى

العذر والتعلل والحكي ما نبيه

من تحرك فواده بالهوى ما تغلى

طبعي الصبر لكن وش عليه ارتجيه

من طويل الصبر يعقوب وايوب ملا

دامني حي عطني وش بقى نحتريه

ما بي دموعك اللي عقب موتي تهلا

ما بقى بالعمر مقدار ما راح فيه

كل ما زل يوم يوم بالعمر ولى

ما يعرف الجمر مثل الذي يكتويه

احد يدفا بناره واحد فيه يتصلى

يا من القلب حطيته براحة يديه

ما رضى له مكان غير كفك محلا

كم تعذر وعيا عن هوى مهتويه

لين طاح بيمينك بالغرام وتجلى

الجوهره
03-02-2007, 03:41 AM
في سحــــــــابه


في سحابه ..

على متن التمني

شفت عمري

خيال في سحابه

يا ذهابه ..

تعدى ما ارجهن

كن عامه

نهار يا ذهابه ..

من غدا به

ربيع العمر مني

حسبي الله

على وقت غدا به ..

إلتوى به

رجا قلب يون

ويل قلب تعلق والتوى به

في شبابه ..

حبس نشواه عني

ما تهيا لذيذه في شبابه

ذا صوابه

عقب ما هو طعني ..

لو نسيته يذكرني صوابه

من هقابه ..

يخيب كل ظني

واعذاب الخفوق اللي هقابه

رد بابه ..

زماني وامتحني

يوم ثور عجاجه

رد بابه

يا ربابه ..

على المسحوب غني

من قصيدي

بكى قوس الربابه

الجوهره
03-02-2007, 03:42 AM
ياطارد

يا طارد اللي راح خله وملوه
ما يستقيم الظل لا عوج عوده
ولا ينفع الندمان قولة حولاه
جحر لدغ يمناك لا لا تعوده
مد النظر في خلق ربي تمعناه
إلى انتقص من حال حال يزوده
الله جعل للمبتلي داه ودواه
وكل على عزمات قلبه حدوده

الجوهره
03-02-2007, 03:43 AM
دستور

دستور يالساحل الغربـي
فلّيت في بحرك شراعـي
ياموج هوّن علـى قلبـي
داعيه من شطّكم داعـي
اللي لهـا مبسـمٍ عذبـي
رعبوب و عيونها وساعي
مملوحـه زادهـا ربّـي
لفتة ظبي يـوم يرتاعـي
لو ما تهيّت على دربـي
لقتنـي بدربهـا ساعـي
حنّيتها من حمـل ذنبـي
لى مت وعيونها تراعـي

الجوهره
03-02-2007, 03:45 AM
مدوّر الهيّن

يامدور الهيّن تـرى الكايـد أحلـىو
أسأل مغنّي كيـادات الطروقـي
الزين غالي لكـن الأزيـن أغلـى
و الكلّ شرّاي ٍ بضاعـة وسوقـي
النوّ عالي و السمـا فوقـه أعلـى
و لا فاق علم ٍ جاه علـم ٍ يفوقـي
الصعب هلاّ قلت يا صعـب سهـلا
دامك تبيني فأنت يا صعب شوقـي
أحب اعسف المهرة اللـي تغلّـى
و أحب أروّض كل طرف ٍ يموقـي
و أحب أسافر مع سحـاب ٍ تعلّـى
و أحب فوق الغيم لمـع البروقـي
و أحب أساهر بدري اللـي تجلّـى
و ارسم شعاع الشمس عند الشروقي
يا من علـى ثايـر فـؤادي تولّـى
خلّك على قلب الكرامـه شفوقـي
أكـرم عزيـز ٍ بالعمـر مسـتـذلاّ
يسوق عمـره للمشاريـف سوقـي
اخترتك من النـاس للقلـب خـلاّيا
حيثك مرادي و كيفـي و ذوقـي
ما رحت أدوّر كـل زول ٍ تحلّّـى
لولاك تسوى ما عطيتـك خفوقـي

الجوهره
03-02-2007, 03:50 AM
http://4nw.net/upload/72e72363a8.jpg

الجوهره
03-02-2007, 03:52 AM
http://4nw.net/upload/e62a54142d.jpg

الجوهره
03-02-2007, 04:03 AM
http://4nw.net/upload/165b747b4b.gif

الجوهره
03-02-2007, 04:08 AM
حب الخشوووم


ما ينسينا الخطـا حـب الخشـوم
ولايطهرك المطر عشرين عـام
مخطي ترضى لنا ظلـم الظلـوم
ومخطي ترضى على شعبك يضام
بايع شاري على شعبـك تسـوم
مايهمـك بالحـلال وبالـحـرام
لاجل شعبك بيننا كنـت محشـوم
لكـن الحشمـة خسـارة باللئـام
يوم فشلنـا صواريـخ الخصـوم
رحت ياوجه الفلس ترمي كـلام
من شمال ومن جنوب أمسيتو قوم
وانت تنخى كل مجـرم بالظـلام
واتفقتوا خذكـم الله يـا الرخـوم
تطعنون الجار وظهـور الكـرام
لاحيـا فيكـم ولانفـس تشـوم
غركـم فينـا محبتنـا الـسـلام
كـل غـدار تجهـز للهجــوم
من طمعكـم ماحسبتـوا للمـلام
المعـارك ماخـذت ليلـة ويـوم
سلموا جند الخطـا مـا بالحـزام
وعود الغازي من الغزو مهـزوم
وامست دياره من افعالـه هـدام
وطاحت قصور التماني والحلـوم
واكتفيتوا في طلب ظـل الخيـام
نحمد الله شيخنا راعـي عـزوم
والعظايـم مالهـا غيـر العظـام
قام والي يطلـب العليـاء يقـوم
ماينوم اليـا بغـى غيـره ينـام
انتهض مثل العقاب الـي يحـوم
لين جات صقوركم مثـل الحملـم
شيخنا قـرم تحـدر مـن قـروم
الملك ابـن الملـك ابـن الامـام

الجوهره
03-02-2007, 04:09 AM
...خلّها يا باعث الفرحـات فلّـة
مابقى بالعمر كثر الّلي مضى لـي
...عطني من الحب سقوه ثم علّه
تزهـر الأيـام وتشـع الليالـي
...من بغى دربٍ سأل عنه ودلّـه
ما يرد المهتـوي صعـبٍ وغـالِ
...اطلق الخفّاق مـن قيـدٍ يتلّـه
كسّر الجنحان مقصـور الحبـالِ
...تبري الّلي صار به تسعين علّه
من نظر حالي نشدني كيف حالي؟!
...مابقى لي حال نشّ الحال كلّـه
الله يعديك ظلم الّلـي جـرى لـي
...كل شهر للقمـر هلّـه وطلّـه
وانت لك عامٍ وبدرك ما بدا لـي!!

الجوهره
03-02-2007, 04:10 AM
فهذه القصيدة أهداها شاعرنا لأمير نجد صاحب السمو الملكي الأمير سلمان بن عبد العزيز....





...سريت ليل الهوى لين ابلج نـوره
امشي على الجدي وتسامرني القمـرا
...طعس وغدير وقمر ونجوم منثورة
وانفاس نجدٍ بها جـرح الدهـر يبـرا
...يانجد الاحباب لك حدر القمر صوره
طفلة هلال وبنت اربع عشـرا بـدرا
...حبيبتي نجد عيني فيـك معـذوره
معشوقة القلب فيهـا للنظـر سحـرا
...فضة شعاع القمر في نجد مسحورة
من شاف لمعة قمر في خـدةٍ سمـرا








ونيابة عن سمو الأمير سلمان بن عبد العزيز كتب سمو الأمير بدر بن عبد المحسن هذه الأبيات، محاكاة لقصيدة "سريت"





...يا ساري الليل شعرك جسّد الصـورة
زينّت بنجـوم حرفـك صفحـة الغـدرا
...بعض السّما من بعضها اليوم مقهورة
عذرا زهت من قصيدك وزْعلـت عـذرا
...فرحت بك هضاب نجد وضحكت زهوره
وحنّت طرب في المضامي بكـرةٍ عفـرا
...والوادي الّلي شهود امجـاده قصـوره
يامير هو عشقنا في ما مضـى وبكـرا
...لو كل شاعر كتب من صادق شعـوره
شفت الصخر والمسايـل تكتـب وتقـرا

الجوهره
03-02-2007, 04:11 AM
غلا الناس (سلطان بن عبدالعزيز)


ليـت المـرض ينقـل عـن اللـي نـودّه
والله لاشيله عن غلا الناس سلطان
شـيـخ جمـيـع الـنـاس ذخــر تـعــدّه
إن ضـاقـت الأيــام واشـتـدت أزمــان
ملجـا الرفيـق ومـن بعـد كـان ضــدّه
حتى العدو ينصاه لي ضاق به شان
محد(ن) وصل بالجود والطيـب حـدّه
وانا اشهـد إنّـه أكثـر النـاس إنسـان
كم واحد(ن) عـن لحظـة اليـاس ردّه
حتـى زرَع لـه بالأمـل روض بسـتـان
أمّـا الشجاعـة فاسـأل الـلـي يـنـدّه
وعـزّي لمـن لاقـاه سلطـان غضبـان
يمـنـاه إذا هـمّـت بحـصـن(ن) تـهـدّه
ويسـراه يـامـا عـدلّـت راس غلـطـان
وكل(ن) عطاه الله مـن الحمـل قـدّه
ونصيـب ابوخالـد هــزع كــل مـيـزان
وتضحـك لـهـا عيـنـه وسـنـه وخــدّه
ما كنها إلا ريشة(ن) شالهـا حصـان
يـــاالله يـاربــي مـــن الـعـمـر مــــدّه
كـم عيـن محـتـاج ترجـلـه باحـسـان

الجوهره
03-02-2007, 04:12 AM
هذه الابيات بينه وبين الامير محمد السديري (رحمه الله)اذ قال دايم السيف :








ياقلبي اللي من هوى البيض معتاذ
واليوم اشوف الوجد والشوق بذه
حسبي على اللي للمواصيل جـذاذ
حبل الوصل من بيننا البعد جـذه
يسقـي منـازل ليّـن العـود رذاذ
يلقى بها ظبي الطعاميـس لـذه
الصاحب اللي عن هوى القلب ما لاذ
لا قلت دوك القلب يازيـن غـذه
ولا نيب من هرجه كثيـر وهـذاذ
ما شاف في ليله نهـاره يهـذه
عساك تأتي لي يابـو زيـد نفـاذ
قلب ٍ تحذّى الشور ياخوك حـذه









وقد اجابه الامير محمد السديري - رحمه الله - رغم صعوبة القافية :









أسهر طوال الليل واغضي على الحاذ
وعن الصديق القلب ما فيه شذه
شكتواك خلت بسـرة القلـب تخـاذ
ولا عاد في قلبي من الصبر فذه
اللي يا بو بندر جعـل قلبـك افـلاذ
مشربك يا ممدوح الأفعال عـذه
طفل ٍ سهم عينـه بالاعمـاق نفـاذ
والحق عليك بقذة ٍ عقـب قـذه
ان كان مالك فيـه مدخـل ومنفـاذ
له الشبك في مدهل الصيد بـذه
وإليا دخل وسط الشبك يابن الافـذاذ
غوجك لساعات المهمات حـذه

الجوهره
03-02-2007, 04:13 AM
يا ولد عوّد لا هاليك مـا تقـوّى
لوعة الفرقا سطت فيك مسطاها
لا تهقوى مـا بالابعـاد سلـوى
المحبه ما سلم من شرب ماها
من بلي مثلك فلا يبري البلـوى
كود شوفة من بالأوطان خلاها
الذي بك يا ولـد بالـذي تهـوى
ياولد عوّد ترى شفاك بشفاهـا

الجوهره
03-02-2007, 04:14 AM
.........اسرج حصاني........

اسرج حصاني و عطني قوسي وسهمي
ما دام انا في فلاة العمر رحّالي

اصور العمر في شعري وفي رسمي
و عاداتي آسافر الايام بلحالي

اطارد الصيد في روض(ن) عقب وسمي
و اجاوب الورق في غصن الهوا العالي

و اساهر النجم ألين يذوب بي نجمي
و اعانق الشمس اذا شعاعها مالي

و اكتب على الغيمه اللي تستخيل اسمي
و ارسل غرامي مع النسمات للغالي

حبيبي اللي مثل وبل المطر يهمي
على خفوقي سحاب الود همّالي

حبّه بروحي و في نفسي و في دمي
هو بدر ليلي و هو في شمسي ظلالي

انا احمد الله غدا سيد العرب قسمي
من يوم شفته و انا طير السعد فالي

لو شمسها تجهر و لو ليلها يعمي
و لو طالت الدرب ما فكرت في حالي

اسوق رجلي و اقوي بالامل عزمي
و اكسر الشوك حتى الورد يصفى لي

الجوهره
03-02-2007, 04:17 AM
لقيت الحزن في عيون طفلة خطا مرسوم
قضى دمعها والعين تبكي ظلايمها

لفظها رصيف العمر في شارع مزحوم
تزاحم عيون الناس والهم زاحمها

ترد النظر لعيون من ناظروا مهزوم
إلى شافت العينين فيها هـزايمـها

على هامش الدنيا رضت همّها المقسوم
وراحت تمرغ بالندم روح ظالمها

على هامش الدنيا وبالدايره مغروم
عزّل واعتزل روحه وخسرت غنايمها

لهم رحمة الإسلام ما باقي معصوم
عسى يقدي من غدا في عوالمها

الجوهره
03-02-2007, 04:19 AM
المهل ساعة عسى البسمة تـدوم
ظامي(ن) للحب من يومك أصوم


بلّـل القـاع اليبّـاس الميّـتـه
إحيها من ديـم هتّـان الغيـوم


أقرب أضمـك بجنحـان الهـوى
أقرب أورّيك رقصـات النجـوم


وخلّني ألفّـك بطيـف الشعـاع
فوق مزن(ن) بالهوى دايم تحوم


ألمس بكفـك مواجيـع الهـوى
واطرد من القلب وخزات الهموم


بيني وبينك من العشـق اجملـه
أطعمْ واشهى من طيوف الحلوم


استضافتنـا الّليـال العاشـقـة
اشعل الضيّان واصحى لا تنـوم


لا تفوّت فرحـة العمـر القصيـر
الغثا متوفر(ن) في كـل يـوم

الجوهره
03-02-2007, 04:20 AM
عوى الذيب ياساري ..عـوى ذيبهـا حـذرا
يـرد الظـلام عـواه ..لضلوعـه صياحـي


ترى الليل قمّـاري ..وعقـب القمـر غـدرا
ومن طاولـه مسراه..زهّـب لـه .. سلاحـي


أحد بالخفا .. داري ..وأحـد بالخفـا.. يـذرا
تشيل الدروب خطاه ..والصبـح .. فضّاحـي


طويلات .. وقصاري ..ويمنى لهـا يسـرى
يخاف القـدم ماطاه..ماقـام .. مـن طاحـي


عن العين .. متواري ..توارى .. ورا غبـرا
يبيه النظـر وأخطـاه .. مـالاح .. لوّاحـي


على نهرنـا الجـاري ..نوايـا تبـي مجـرا
مصبّه ... شكى مبداه .. في بحر .. الأملاحي


شمال؟ ..الهوى عاري ..جنوب؟.. الرمل جمرا
مثل وسم ينثر ماه بصخـر ارض الأسياحـي


اذا ماالصقر طاري .. عـلا بالهـوى قـدرا
وطنه السما .. وحمـاه مخـلاب .. وجناحـي



هواجيسي .. أشعاري ..ولا للشعـر .. عـذرا
كتبته .. لمن يقرااه .. للصاحب .. الصاحـي

الجوهره
03-02-2007, 04:21 AM
اخلفتني نظرة عيون الهنوفه

خلفة الصقار لا شاف الحباري


واقت النظره على قلبي تشوفه

واشعل بقلبي كما البرّاق ساري


صد عني طاغي النظره مروفه

ظالم(ن) قلبي وهو بالظلم داري


ياحبيبي صدتك عني حسوفه

ارسل سهوم الذوابح لاتداري


ارسل رماح الهوا وارسل سيوفه

يشتهيك القلب في كل الطواري


عيني لحسن الذي غيرك عيوفه

في عيوني غيرك من الحسن عاري

الجوهره
03-02-2007, 04:21 AM
..امسح الدمعة ترى ضعفك قوي
انهزم قـدام ضعفـك ياغـلاي

..امسح الدمعة بعمري لو تبـي
عطني احزانك وخذ مني هناي

..امسح الدمعة قبل تقضي علي
دمعتك تغرق صباحي في مساي

..لاتروع مثل روعات الظبـي
روعتك ياروعة ايامـي بـلاي

..كل ليلٍ مع نهـارك ينجلـي
يابدايـات الهـوى يامنتهـاي

..ياوطن قلبي وغربة ناظـري
ياحتياري ياصوابـي ياخطـاي

....يابنات الفكر غني وارقصي
عند خلي وانشدي له من غناي

واسعي صدر الحبيب واطربـي
طربتي له كلما ذعـذع هـواي

الجوهره
03-02-2007, 04:22 AM
يا من سلامه لي هلا يا حبيبي
و الله هلا بك يا محبّة عيوني

هلا هلا يا لون شمس المغيبِ
يا نسمة الليل العطوف الحنونِ

يا بدر لا هلّيت لا عاد تغيـبِ
ترى سواد الليل كحّل جفونـي

انا دخيل الرّمش خلّك قريـب
يا اللي بقربه كل شي يهـونِ

الجوهره
03-02-2007, 04:23 AM
من رياض المجد لامجاد الكويت
من ثبـات العلـم للعلـم الثبـات
جيت أصافح بالتّهاني كـل بيـت
للشّهيـد الخلـد والحـي الحيـاه
فوق غيمة شوق من أبها مشيـت
من نداها فزّت الصّحـرا نبـات
سيّرتني نشوة الحـب وسريـت
للكويت الّلي هويت أكتـب غنـاة
في غناتي للشّرف صوت وصيت
ومن غناتي يرفع الفارس حـداة
وللكرامة عرضة في كـل بيـت
والسجايـا بالشهامـه نايـفـات
ياالكويت الّلي على الباغي عصيت
يوم بعض الرّبع ينسى المكرمات
يوم بان الغدر قلنـا لـه خسيـت
كل شيطـان رجمنـاه بحصـاه
دارت الدنيـا عليهـم واعتليـت
وانهزم جيش النّفـوس الخاينـات
يالفهد عند الوعد قلـت ووفيـت
طاغيات الرّوس عادت صاغرات
مااختلفت ولاذخـرت ولاشكيـت
شامخ مثـل الجبـال الراسيـات
دلّـك الله يالسنافـي واهتـديـت
والنّصر من عنـد رب الكاينـات
مايغـط الحـق رجـال بخيـت
مانسينـا يالكويـت السابـقـات
يوم عز بدارنـا حلـو المبيـت
إستضفتونـا زمـان النّايـبـات
لين ابو تركي ظهر من فوق هيت
واصطفق من نجد لجبال السّـراه
يرفع القرآن والسيـف الصليـت
واسترد الحكم من عقـب الفـوات
ياالصّباح وياالسعودي لى انتخيت
عزوتك عنّاز راعـي الطّايـلات
ويالامير الّلي على العليا نشيـت
جابر العثرات محمـود الصفـات
في بـلادك كـل تكريـم لقيـت
والنشامـى ماكتفـوا بالواجبـات
بالكويت أعطاني الشعر وعطيـت
وبالكويت الشعر له طعم وحـلاة

الجوهره
03-02-2007, 04:24 AM
أنـــــا والـصــحــاري
أنا والصحاري والمطر والفرس والطير
ونبت الخزامى والظبي والشعر خـلان
بنيت البيوت من الشعر والشعر تعبيـر
عن الماضي الحاضر وعما يكون وكان
أحب القنص بارض قفر ما وطاها الغير
وصهوة فرس كل الكرامه لها ميـدان
ومنظر غدير ترتعش فيه شمس عصيـر
وطعس حمر عقب المطر ما مشاه انسان
وشوف القطا سرب تواقع وسرب يطير
وفزة ظبي حذر بها غافـل الغـزلان
شمس مضت بدر ظهر والنجوم تسيـر
وريح النفل هيض شجوني وأنا ولهـان
وبالليل أشب الضو مع ضيفي التفكير
وبالفكر تقدح لمعة النجـم والضيـان
أقلب جمر ضوي وبي مثلهـا تجميـر
شرار و شرار وليل ومولـع حيـران

الجوهره
03-02-2007, 04:24 AM
الـــــزكـــــمـــــه
تجيني على موعد ومن غير موعد جت
وأنا ما دعاني للوصل شوق ومشتـاق
تجيني متى شاءت لها كل وقت وقـت
تهز البدن والروح ما دونهـا واقـي
وإذا ما هقيت أني من معاشرتها مـت
تفهق وأشـوف بقـى بالعمـر باقـي
وفاها معي يذبح ورا ما تخون وخنت
أبا أسمح جعله اتلى مواعيد الأشـواق

الجوهره
03-02-2007, 04:25 AM
..كلٍ يعـوّد لاصـل جـدّه ومربـاه
راعي الشرف يشرف والانذال يهبون

..الفْرع من عوده شرابـه ومسقـاه
والحنظلة مرّه ولو تشـرب مـزون

..الطّيـب كايـد والمناعيـر تقـواه
والهون هيّن تدنع النفـس وتهـون

..ناسٍ على كسب المراجل مضـرّاه
وناسٍ على كسب الفشيلة يضـرّون

..هذا على وضح النقا كـل ممشـاه
وهذا الـى شافـوه ربعـه يصـدون

..لا تامن الخوّان لو زخـرف حكـاه
من خان بك مرّه يبي باكـر يخـون

..وافطن ترى زول الرّجاجيل تـوّاه
كم واحدٍ يعجبـك زولـه وهـو دون

..يا طيّب الشارات من يـوم منشـاه
احذر عدوّك لايغـدرك علـى هـون

..ترى عدوك غايتـه فيـك ومنـاه
يزرع بصدرك من قنا رمحه طعـون

..والّلي رضع لبـوة عـدوّك توقّـاه
الجرو ولد اللبـوة الّلـي تعرفـون

..للطّير يالصقّـار بالرّيـش مغـواه
الجاهل الّلي باكثر الريـش مفتـون

..للحُـر والشبـوط ماكـر ومجنـاه
والفرق بالافعال لـو هُـم يطيـرون

الجوهره
03-02-2007, 04:26 AM
..قام يرغي عقب هاك الهدير . . . كافر الدين . . كذّاب العرب

..لاذ خلف الرهاين يستجير . . . يوم ثارت عواصيف الغضـب

..يزحف الموت و اللحظه تسير . . . موعد عصابة الغدر اقترب

..كل خاين ترى حبله قصير . . . دام للحـق طـلاّب و طلـب

..لا تعدّى حدودك يا غرير . . . سيفنا صَلب و سيوفـك خشـب

..ما لكسرٍ كسرنا بك جبير . . . من هوى سيفنا فوقـه عطـب

..ياصغير تشبث في صغير . . . الذنب كيـف يتبـع لـه ذنـب

..ما بقى لك على الباطل نصير . . . شف تبيعك تنكّر و انقلـب

..من فهد جاك يا جابر بشير . . . قاد لك مجلس الامن و حرب

..و ارسلوا يم صدام النذير . . . طـاع ولاّ غصبنـاه انسحـب

الجوهره
03-02-2007, 04:27 AM
صاحب الحاجه ولو طالت لحوح
وصاحب الحلم القديم يغازله
واعذاب القلب من كثر الجروح
كم سيف بالعذاب ينازله
أخفي الطّعنات وعيوني تبوح
كن الاوجاع بهدبها نازله
غايتي بليل ظلامه مايروح
بيني الايّام وبينه عازله
كل ما مشيت له عنّي يروح
وعيّت الخطوه تجي منازله
والهوى بالقلب وهّاج يضوح
لو يسوقه للمنايا جازله
كل ياس يطرده فيني طموح
وكل عزمٍ خافقي ينحازله

الجوهره
03-02-2007, 04:28 AM
ابريت التوحيد

أبــــــريــــــت الـــتـــوحـــيــــد

عبـد العزيز...يـا منيـة الأبطـال فـي الـيـوم العظـيـم
عبـد العزيز...يـا دعـوة المظلـوم فـي الليـل البهيـم(1)

يـا باعـث الأمـل البعيد...يـا طلـعـة الفـجـر الجـديـد
يـــا مـسـتـرد الـمـلـك ..والـمـجـد التّـلـيـد(2)
مـن يـوم التوحـيـد الأول ...أعلنـهـا دعــوة صــلاه
مـن يــوم التكـويـن الأمثل...أعلنـهـا مـبـدأ حـيـاه
لا إلــــــه إلا الله مــحــمــد رســــــول الله

رايتنا...دعوتـنـا.....غـايـة مـنــهــج أمّـتــنــا
لبّينـاهـا ردّدناها.....ونشـرنـا فــي الدّنـيـا صـداهـا
ورغـــــم الـحـاســد....ورغــم الــحــاقــد
بالتّوحيـد اتحّديـنـا متحديـنـا ... جـاوزنـا الصـعـاب
بالتّوحـيـد اتعدّيـنـا متعدّيـنـا ... طاولـنـا السـحـاب

وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن

** ** ** ** ** **
نـجــد أنــــا والـفـخــر والـمـجــد أنــــا
مــا أبــي (3) غـيــر مـــن رأســـه عـزيــز
دونــــي الــمــوت والـسّـيــف وقــنـــا(4)
مـــا أبـــي إلا أنـــت يـــا عـبــد الـعـزيـز
ولاح فــــي نــجـــد بـــــرّاق الـبـشـيــر
يـــوم قــيــل إن أبــــو تــركــي مــشــى
إن شـهَــر(5) كـــل صـقــر مــــا يـطـيــر
وإن مـشــى كــــل ذيــــب لــــه عــشــا
يـــا ريــــاض الــعــرب غــنّــي طــــرب
ويـــا قـصـيــم الـسّـعــد جــــاك الــوعَــد
واقـبــلــت حــايـــل تـــــرد الـنـشـيــد
فــي هــوَى الّـلـي عـلَــى الـكـايـد(6) عـنـيـد
يــا راعــي البـيـرق(7) تـقـدم لاتـعـوق المسـيـر
لا تـاقـف* إلا عـقـب توحـيـد الـوطــن والـسّــلام
حنّـا هــل العـوجـا لـنـا بالـحـرب يــوم ٍ كبـيـر
عاداتـنـا لَــى ثــوّر الـدخَّــان مـثــل الـظّــلام

وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن
** ** ** ** **
أنـا الحـسـا أنــا النخيـل...أنـا العـيـون الجـاريـه
مـا للهوَى يمّـك(9) بديل....يـا ابـن الأسـود الضّـاريـه
وأنا موجة خليج ..عبـر بهـا شيـخ القبايـل والفريـج(10)
من الساحل الشّرقي إلىَ السّاحل الغربي...لها عطـر وأريـج
وأنا الكنز الدفين علَى موعد مع التوحيد والتاريخ والملك الأمين

يـــا مـرحـبـا تـرحـيـبـة الـعـيــد الـجـديــد
بـالّـلـي رقَـــى ســـور المـعـالـي وانـتـصــر
يــا مرحـبـاً يـــا جـامــع أطـــراف البـعـيـد
يــا غـاســل قـلــوب الـمــلا عـقــب الـكــدر
مـلّــيــت مـــــن حـــكـــم الــغــريــب
مــلّــيــت بـــوقـــات (11) الـــسّــــروق
يـــامـــا نــطَــرتـــك(12) يـالـحـبــيــب
قـلــبــي عــلَـــى وصــلـــك يـــتـــوق

وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن

** ** ** ** ** **

أنـــــا الـجــنــوب دربـــــي عـســيــر
وأصــبـــح لأبـــــو تــركـــي يـســيــر
مـرحـبَّـا ألـفـيـن(13) يـــا شـيــخ الـشـيـوخ
صافـحـتـك الـــرّوح مـــن قــبــل الـيـمـيـن
شـامــخ والـشّـيـخ مـــن فـــوق الـشّـيــوخ
كــل عـاصــي لَـــى وصـــل عـنــده يـلـيـن
مـــــن قــلـــب الـــرّبـــع الــخــالــي
مـــــــن راس الـــسّــــوده الــعــالـــي
أخـــــذت ضـــيـــم الّـــلـــي لـــفـــا
راعـــــــي الـطّــويــلــه والــــوفــــا
ومـــــن نــجـــران ومـــــن جــيـــزان
وقــلـــب الـبــاحــه لـــــك ولـــهـــان
ورد وكـــــــــــادي وريــــــحــــــان
وفـــــل وتـهــامــه بـــــك فـــرحـــان
الـجـبــل والـسـهــل والـسـاحــل يـغــنــي
والـشـجــر والـمـطــر والـطـيــر طــربـــان
كــــل قــلــب يــنــام الـلـيــل مـتـهـنـي
نـحـمــد الله عــلــى تـوحــيــد الأوطـــــان


وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن

** ** ** ** ** **

أنــا الـحـجـاز ....سـيــدي ولا دونـــك حـجــاز
عـبـد العزيـز...يـا مــن بـحــب الـقـلـب فـــاز
وأنـــا مــكّــه ...أنــــا مــهــد الــهــدى
وأنـــا طـيـبـه ...مـديـنــة مــــن هــــدى
وأنـــــا الـطّــايــف أنـــــا ورد الــهـــدا
وأنــــا جــــدّه عــلــى خــــدّي نـــــدى
قــابــلــنــاك بــــكــــل الــــحــــب
عــاهــدنـــاك بــــكــــف وقــــلــــب
وحــيّـــيـــنـــا روح الــتّـــوحـــيـــد
وأيّـــدنــــا عــــهــــد الــتّــجــديــد
يــــــــا إمـــــــــام الــــعـــــدل
حــقّــقـــت الــعــدالـــة والأمــــــــان
يــــــــا كــــريــــم الأصـــــــــل
أصّـــلــــت الــكــرامـــه والــكــيـــان
أول أمــــــــــــه عــــربــــيّـــــه
فـــــــي الــعـــصـــر الــحـــديـــث
تــعــلـــن دولــــــــة إســلامـــيّـــه
قـــــــــــــرآن وحــــــديـــــــث


وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن

** ** ** ** ** **
أنــــــا الـشـمـال....صـعــب الــمــنـــال
لله(14) أسـلـم للطّلـيـب...لا مــن بعـيـد ولا قـريـب
إلا لاخـو نـوره رضيت...واللّـه فـلا غيـره بغـيـت(15)
لا يـا بعـد حـي العرب...إنـت الهـوى وانــت الطـلـب
لـك يـا العـزيـز الغالـي...يـا طربـتـي يــا فـالـي

تـحـيّـة لـلـغـايـب إلــــى مــنــه حــضــر
احــلـــى مـــــن الـــــروض الـخــضــر
أحــلـــى مـــــن الـطــعــس الــحــمــر

يـاربـيـع الـوســم يـــا ريـــح الـفـيـاض(16)
يـــا رفـيــق الإســـم يــاراعــي الــرّيــاض
فـيــك اجـتـمـع شـمــل الـجـزيــرة كـلـهــا
فــيــك انـعـقــد راي الـمـسـيــره دلّـلــهــا
تبـوكـهـا مـــع جـوفـهـا لـــك تستـخـيـل(17)
وشـعـيـب عـرعــر بـالـمـودّه لـــك يـسـيــل


وبـالـتـوحــيــد وحّـــدنــــا الإلــــــــه
وحّــــــدنـــــــا الــــــوطـــــــن

** ** ** ** ** **

وغـــاب الأســـد ...وخـلّــف أســـود تـــزود
لطّـامـة الـعـايـل* أصـايــل عريـبـيـن الـجــدود
أنـــــا الــيـــوم ...والــيـــوم أنــــــا
عهـد الفهـد أحلـى العهود...جيـل الفهـد جيـل الفـهـود
يـافـهـد يـــا شيخـنـا....فـي يمـيـنـك سيـفـنـا
أضــرب القـاسـي يلين...يتبـعـك شـعــب أمـيــن
شـرعـنـا فـــي ذا الحياه...مـانـخـاف إلا الإلــــه
حـكّـامـنـا مـنّــا....يــا ســائـــلٍ عــنّـــا
الـمـلـيــك المفتـدى...والـعـضـيـد الـمـقـتــدى
عـــزا الـصّـديـق الّـلــي تـحـاشــاه الــعــدا
عبـدالله سهـم الفرسان...والسـيـف القـاطـع سلـطـان
نبـنـي ونعـلّـي البنيان...ونفـاخـر كــل الأزمـــان
نبـنـي المعـهـد ..نبـنـي المصنع..نبـنـي الإنـسـان
واحتـفـظـنـا بالقيـم....واشـتـهـرنـا بـالـشّـيــم
واكتسبـنـا مــن عـلـوم العصر....نـوعـيّـه وكـــم
مـا تبهرنـا لمعـة بـرق...ولا قلّـدنـا غــرب وشــرق
المـبـدأ ثـابـت إسلامي...والمنـهـج واضــح قـدّامـي
واصبحـنـا مـصـدر إشعاع...بالـمـوروث وبـالإبــداع
يا ملاذ الخايـف يـا بلادي...يـا فخـار أجـدادي وأحفـادي
خـــيـــر ونـعـمـه...ورفـعــة ســمــعـــه
وعــلـــى الله تـوكّـلـنــا ...ولله تـوجّـهــنــا
والـمـانــع الــلّــه ...والـمـعـطــي الــلّـــه

الجوهره
03-02-2007, 04:29 AM
قصيدة عمري

يا قصيدة عمري اللي تكتبينـــي
كل يوم حرف من نغمة هــــواك
ارحميني يالهوى والا اذبحينــي
لا تخليني معلق في سمــــــــــاك
كل ما اخذتي عمر مني عطيني
لحظة من ساعة داخل حمــــــاك
الحياة آشوفها والموت فينــــــي
واعذاب اللي بغاك ولا لقـــــــاك
اسهر الليل وقمر طيفك بعيــني
والشعاع الصبح يوقظ بي رجاك
أن حدى حادي تولاني حنينــي
وإن عرض طيفك على طرفي بكاك
كيف هذا من هوى قلبي يجيني
يا أرق الناس قولي وش دهـــــاك
لو تماديت بملامي سامحينــــي
قد تماديتي بذبحي من طغــــــاك

الجوهره
03-02-2007, 04:30 AM
أحب الليل و نجوم الليالي
حبيباتي أساهرهن لحالي

لقيت بصحبة النجمات سلوى
عقب ما فارق الخفّاق غالي

ألا يا ساريات الليل سيري
على واديه مع مسرى خيالي

تجلّي في سما خلّ المودّه
و قولي للحبيب وش جرالي

هنيك يا نجوم تناظرينه
و انا مالي على النظره مجال ِ

و لكني ولو شابت عيوني
أحب الليل و نجوم الليالي

صبرت و كل حي لو تصبّر
إلى مالت ليالي العمر مالِ

الجوهره
03-02-2007, 04:31 AM
الحزن في صوتك ازعج ساكني
لين صار الكون من حولي حزين

غصب عني حزن صوتك هاجني
لين خلّى عاصي المعنـى يليـن

وامتثل حرف القصيـد وعادنـي
وانسكب شعرك على حزني حنين

شلت انا صوتك وحزنك شالنـي
اكتم الصرخه وينسـاب الأنيـن

شفت حزنك كيف حزنك شافنـي
كيف داهم خلوتي فـي لحظتيـن

طير انا مثلك زمانـي ضامنـي
جرحتني مثلك سيـوف السنيـن

صابك اللي من زماني صابنـي
في معاليق الحشا جرحـه دفيـن

كلّمـا ودعـت هـم زارنــي
من عذاب الوجد بيـاح الكنيـن

الفرح عقـب الصداقـه هابنـي
خافت البسمه على وجهي تبيـن

طير ياللي صوت حزنك صابني
الله اللـي ينتصـر للصابـريـن

الجوهره
03-02-2007, 04:32 AM
ســـــــــــــــافَــــــــــــــــرَت
خمسيـن عـام مـن الـزمـان
هـــــــــــــي عـــــــمـــــــر؟
والاّ عـلـى هـامـش زمــان؟
هـــــي حـقـيـقــة عــلـــم؟
والاّ هــــــــي ســـــــــراب؟
هــــي مـواجـيــع الــدهــر؟
والاّ حـــــــــــــنـــــــــــــان؟
فـــــي عـــجـــاج أيــامــهــا
دربــــــــــــي يـــــــــــــذوب
تـــــاهــــــت الـــخــــطــــوه
وضـــيـــعـــت الـــمـــكــــان
أنــــــــــشـــــــــــغـــــــــــل
عـن عـمـري بعـمـر آخـريـن
وانـــــــــــتـــــــــــبــــــــــــه
فــي لحـظـة غـيــاب الأوان
مَـــــــــــــرّت الــــدنـــــيـــــا
وأنـــــا ارســـــم لـوحــتــي
أرســـــــــــم الـــفــــكــــره
عــلــى صــهـــوة حــصـــان
مـــــــــــــرت الــــدنـــــيـــــا
وأنـــــا شـــعـــري طـــفـــل
مــــــا عـــصـــرت الـــــــروح
فــــــي حــــــرف الــبــيــان
مـــــــــــــرت الــــدنـــــيـــــا
وأنــــا حـلــمــي ســحـــاب
فــــــوق ســــــرج الـــريـــح
مـــطـــلــــوق الـــعــــنــــان
مـــــــــــــرت الــــدنـــــيـــــا
ولا ادري وش قـــضــــيــــت
مــــن حــوايـــج خــاطـــري
ذكـــــــــــــر وعـــــــيـــــــان
الــــعــــمــــر يــــنــــقــــص
وحـــاجـــاتــــي تـــــــــــزود
عـقـب مــا هـــي أربـــع(ن)
صــــــــــــارت ثــــــمـــــــان
سَـــــــــــــــافَــــــــــــــــرت
كـن الصـحـاري مــا ازهــرت
والمطر ما كنّه أنبت قحويان
سَـــــــــــــــافَــــــــــــــــرت
كــن الليـالـي مــا أقـمــرت
مــــــــــــــــا تــــــــقـــــــــل
سـامـرت نجـمـات حـســان
مـــــــــــاتـــــــــــقــــــــــــل
غـنّــت حـمـامـه بـالـهـديـل
والـــــــــــــــــهـــــــــــــــــوا
مــاهــز عـــــود الـخــيــزران
سَـــــــــــــــافَــــــــــــــــرت
كــن الـحــوادث مـــا جـــرت
وأصــبــحـــت ســوالــفـــي
كــــــانـــــــت وكـــــــــــــان
يـــــــــــــــا زمـــــــانــــــــي
حـاجـتـي فــــي ركـعـتـيـن
غـــــيـــــر ربّ الـــــوقــــــت
مـــالـــي فـــيـــه شـــــــان

الجوهره
03-02-2007, 04:32 AM
في غربتي ، عارضت أنا ركب الأغراب
أشـد .. وأنـزل .. والليالـي ركايـب

أضداد .. وأقران وعدوان .. وأصحـاب
متناقضات الخلـق .. ماغـاب غايـب

وقامت تجاذَبني على درب .. الأسبـاب
نفس الشبـاب .. يحدهـا عقـل شايـب

أصبح على فجرٍ ضحوك(ن) .. وعجاب
وأمسي على همسات ، ستـر العجايـب

أسهر مـعَ تهويـم نجمـات الأحبـاب
حتـى يصيـر النجـم بالصبـح ذايـب

مشيت في رمضا .. وسنّـدت بهضـاب
وعارضني سيول(ن) ، وهبّـت هبايـب

وأمسيت في صحرا .. و قيّلت في غاب
ومن طاول الغربات ، شـاف الغرايـب

مرتني الدمعـه ، بهـا الوجـد مـاذاب
في غربة الأشـواق ، راحـت ذهايـب

ومرتني البسمه ، تقـل فوقهـا حجـاب
وراك خجـلا يـارسـول الحبـايـب

والحب.. مريته غريب(ن) علـى بـاب
عقب القصور .. أمست بيوتـه خرايـب

بغيت أسلي خاطـره .. عقـب ماشـاب
لقيـت مـالـه بالتسـلـي طـلايـب

أقفى مع المقفين .. وجـل(ن) ومرتـاب
على عقـوق الوقـت ، بالحيـل عايـب

في غربتي .. مريـت رجلـي وركّـاب
أرزاق .. من رب الخلايـق ، وهايـب

الجوهره
03-02-2007, 04:33 AM
نفسي عيوف يا اريش العين تجزع
ما تقبل الحقران لو من عشيري
إلى متى في طلبتك باتخضع
وأسأل متى يوم الوصل بي يصيري
لو كان قلبي في هواك يتقطع
خله لعله بالقسى يستخيري
أنا جزمت أنساك يا زين وانزع
اللي بقى من حبكم في ضميري
مثلي عزيز النفس عنك يترفع
دور هبيل فواد مثلك غريرِ

الجوهره
03-02-2007, 04:34 AM
..إرفعي سهم المنايـا يالعيـون
مابقى فينـي مكـانٍ للطعـون
.. كل شبرٍفـي حياتـي إنجـرح
و الذي شقّوا خفوقي يشتكـون
.. يا العيون الطاغيه خفّي علـي
كبرت اللّي باوّل ايامـي تهـون
.. في عيونـي دمعتيـن واقفـه
ردّت الايـام دمعـي بالجفـون
.. بالغَت فينـي تباريـح الهـوَى
و أستبدّت بي مواجيع الظنـون
.. خبّريني يـا غـرام العاشقيـن
كيف يستهوي هل العشق المُنُون
.. إرحمي قلبٍ تجاريبـه قسـت
في زمانٍ ماعرف يـومٍ حنـون
.. اللسان يخون و البسمه كُذُوب
و اصدق التعبير نظرات العيـون

الجوهره
03-02-2007, 04:35 AM
..إن رضوا وإلا عساهم ما رضـوا
..مالـنـا إلا حـقـوق إسلامـنـا

:

..وان حكوا وان هاجموا وان هدّدوا
..مـا تركنـا – لوهلكنـا – ديننـا

:

..ما نساوم بالمبـادي لـو بغـوا
..لـو نمـوت كْتابنـا دستـورنـا

:

..بيعـةٍ بارقابنـا جــدٍ و أبــو
..نفـتـدي بيعاتـنـا بـأرواحـنـا

:

..خابرين القصـد لـو ماصرّحـوا
..قصدهـم نشـر الرذيلـة بينـنـا

:

..ليه نقبـل كـل شـيٍ صـدّروا؟
..ليـه نخسـر لأجلهـم شيماتنـا؟

:

..ليه نقبـل كـل كـذبٍ روجّـوا؟
..ليـه نتـرك لأجلـهـم عاداتـنـا

:

..ليتهـم بْحقوقهـم مـا بشّـروا
..وليت بعـض ربيعنـا مـا باعنـا

:

..للأسف معهم عريـبٍ هرولـوا
..واشتـروا فسـادهـم بأخلاقـنـا

:

..اجمعوا على الفسـاد وصوّتـوا
..زوجـوا المثليـن بحقـوق الخنـا

:

..يا شهود النـاس عنـا خبّـروا
..شرعنـا الإســلام والله ربـنـا

:

..لا ولا ولا ولا لــو كـثــروا
...غير شرع الله فـلا شـرع لنـا

الجوهره
03-02-2007, 04:36 AM
انا شاقني بالحيل منظر حمام شهار

. . . صلاة العصر يوم انحدر بأسفل الوادي

لحظني شبكني ثم قفّى وانا محتار

. . . دفعني غرامي له على غير معتادي

تطاير حمام الشوق والقلب مني طار

. . . تلاعب جناحه بالهوى لعب بفوادي

أنا امّا حصلي يا سعد يمهم مسيار

. . . تراهم سبب ذبحي إلَى جاك نشَّادي

الجوهره
03-02-2007, 04:38 AM
ضايق الصـدر بالله وسـع الخاطـر
دنيـاك يازيـن ماتستاهـل الضيقـة
الله علـى مايفـرج كربتـك قــادر
والله له الحكـم فـي دبـرة مخاليقـه
حلو العيون استهانت دمعهـا الحـادر
كف العباير حزيـن الدمـع ماأطيقـه
حرام كيف الحزن يغشي وجهك الطاهر
والورد في وجنتـك حـرام تجريحـه
يفداك قلب علـى ماتشتهـي حاضـر
يفداك باللي بقـى لـي مـن معاليقـه
مافـات خلـه ولاتهتـم مـن باكـر
واغنم مـن اليـوم ماساقـت توافيقـه

الجوهره
03-02-2007, 04:39 AM
للدار وحشة عقب سِيد هَل الجـود
وعيني غشاها عقب شمسه ظلالي
مالوم رجلك لو شكَت كايد الكـود
أتعبتهـا ترقـى سنـود المعالـي
للجسم حد وغايتك ما لهـا حـدود
ظلمت نفسك من قديـم(ن) وتالـي
تمشي وعرها كنه سهـود ومهـود
لله دّرك مـا تغالـيـت غـالـي
ماتنتظر للجـود ياشيـخ مـردود
تشرب مرار وتسقي الغيـر حالـي
ماينثني عزمك خطير على الـزود
من عالي تجمح على راس عالـي
يا طيّب طابت لك البيض والسـود
أسرت في حبك قلـوب الرجالـي
يفوح مع ذكرك شذى الورد والعود
وكل(ن) ينعم لك إلى جـا مجالـي
مرضك يمرضني وسعدك لي سعود
يا ليتي أنقل عنـك ضيـم الليالـي

الجوهره
03-02-2007, 04:39 AM
مـــا هـقـيـت إن الـبـراقـع يفتـنـنّـي
ليـن شفـت ظبـى النفـود مبرقعـاتِ

الله أكـبــر يـــا عـيــون(ن) نـاظـرنّـي
فاتنـات(ن) ناعـسـات(ن) سـاحـراتِ

في هواه(ن) يا سعد كيف اطرحنّي
راح عـمـري فـــي مـودتـهـن فـــواتِ

كــان مـمّـا صـابـنـي مـــا عالـجـنّـي
الـوكـاد أنّــي خـطـيـر(ن) بالـمـمـات

يـا سعـد خبـرّ ظريـف الطـول عـنّـي
كـان ودّه لـي بعمـر(ن) فـي الحيـاةِ

من نظرني بس أهوجس بـه وأونّـي
ما تركنـي هاجسـي لـو فـي مبـاتِ

الجوهره
03-02-2007, 04:40 AM
ارفـع راسـك انـت سعـودي...طيبك جاوز كـل حـدودي

مالـك مثـيـل(ن) بالدنـيـا...غيرك ينقص وانت تـزودي

فـارس و اجـدادك فــوارس...و اصبحت لـبيت الله حارس

مغـروس بالمجـد و غـارس...في ميـدان العـز شهـودي

علمـك غانـم وجـارك سالـم...يخشى مـن هيبتـك الظالـم

راعـي صملـه دايـم والــم...سيف و قلب وفعل زنـودي

بالعالـم مـا مثـلـك مسـلـم...دايـم بالفضيلـه مـحـرم

الخـايـف بــدارك منـعـم...وعن دخيل حمـاك تـذودي

دايـم سيفـك بـيـدك سـلّـه...مـا تغمـد سيفـك منذلّـه

و حجـاجـك دايــم منفـلّـه...وأنت بنصر الله موعـودي

فهـد القائـد فـهـد الـرائـد...فهد الصقر الحـر الصايـد

و العيـد بـعـون الله عـايـد...وسعودك ياوطني سعـودي

الجوهره
03-02-2007, 04:41 AM
تنشد عن الحـــال حالـــي كيف ماشفته
وانا احسب انك قبل ذا الوقت تدري به
فـي خاطـــري لك كـــلام مــير ماقلته
اجنبــــك مايحسك لــو حياتي به
هـــمٍ جديد علـــى الاول تحملته
عنك اتحــمل كبير الهــــم وامــشي به
رحــت اتمثل بطبـــع لــك تعلمته
لى صــار لــك غــالــي لياك تشقي به

الجوهره
03-02-2007, 04:43 AM
http://4nw.net/upload/bd5b00c1e1.jpg

الجوهره
03-02-2007, 04:44 AM
ياشيــــــــــــــــــــخ

ياشيـخ اشوفك شارد الذهن مشغول
الله يعيــنك يانـطيح الثقيـله
مثلك جعله الله على الخلق مسـؤول
من فوق حمله حمل غيره يشيله
ومثلك يذب الريًع والحمل منقــول
يقطع به الفرجه ولوهي طويلـه
ومثلك كمـا سيـف شطير ومسلول
لى كبرت القاله فصلها فصيـله
ومثلك يفتـح بالرجًـا كل مقفـول
ضحكة حجاجـه كل همٍ تزيـله
لاتشغل الخاطـر ترى العبد مكفول
عادات ربًي في عبـاده جمـيله
حكمه عزيزٍ جاعل الغيـب مجهول
والله جعـل في كل قلب دليـله
آمر ترى لازمك حاصل ومزهـول
بـارواحـنا نشريه لوهي قليله
من راد بك شر دحرنـاه مخـذول
ومن راد بك خيرٍ نردً بمثـيـله
يجـزاك ربي عن سجاياك بقبـول
كم ناصـرت يمناك معدوم حيله

الجوهره
03-02-2007, 04:45 AM
إستكثرك وقتـي علَـيْ وغـدا بـك
عـادة زمانـي كلّمـا طـاب هـوّنْ

ليت الـذي ودّاك يـا زيـن جابـك
تشوف عقبـك كيـف الايّـام سـوّنْ

شرق(ن) مشيت وغرب وقتي مشىَ بك
والقلب ما له لايـم(ن) فيـك لـوْ وَنْ

عقب الهنا بـك ذاق لوعـة عذابـك
تلـونّـت دنـيــاه ولا تـلــوّنْ

طويتني طـيّ الـورق فـي كتابـك
حتّـى معاليـق الحشـا لـك تطـوّنْ

إشتقت لأيّـام الهـوَى فـي جنابـك
يوم الشّموع بليـل الاحبـاب ضـوّنْ

واشتقت أقول لهاتفـك مرحبـا بـك
واشتقـت لغيـوم الصحـاري تكـوّنْ

عوّد ترَى داعي الهـوَى عنـد بابـك
واروي القلوب الّلي بعـد مـا تـروّنْ

غنّيت لـك عمـري ولاجـا جوابـك
واسمـي مـعَ مجنـون ليلَـى تـدوّنْ

الجوهره
03-02-2007, 04:45 AM
لا تــقـــول ان الـلـيـالــي فـرّقـتــنــا
لا تـقــول ضـروفـنـا عــيّــت عـلـيـنـا
الـلـيـالــي يــــــوم ودك جـمـعـتـنــا
يـوم ودك كـل شـي(ن) فـي يديـنـا
ياسقـى الله ليـلـة(ن) بــك عرّفتـنـا
في شعيب شهار عن غيرك سلينا
من مغيب الشمس حتـى طالعتنـا
عــن هــل الدنـيـا نزعـنـا واعتلـيـنـا
لـيــلــة الـعــشــاق والله ورّدتـــنـــا
مــــارد ذقــنـــاه لــكـــن مـارتـويـنــا
لـيـتــهــا .. يـالـيـتـهــا مـاودّعـتــنــا
لـيـت ذاك اللـيـل مـــاراح وسـريـنـا
يــوم همّـلـنـا اللـيـالـي .. هملـتـنـا
كـيــف تعـطـيـنـا وحــنّــا ماعـطـيـنـا
الـلـيـالـي عــــن هــوانــا مانـهـتـنـا
البـلـى حـنّـا عـلـى البـعـد انتهيـنـا

الجوهره
03-02-2007, 04:46 AM
بشروني عنك مـا يـدرون عنـي
ما دروا باللي شغل فكري وظنـي
اتسمّـع للحكـي بـك واتحـفّـظ
خايـف دقـات قلبـي يفضحنّـي
كل ما سمّوك باسمـك فـز قلبـي
والضمايـر والمدامـع شاغلـنّـي
يا حبيبـي يـوم جنبـت الحبايـب
عفت لجلك كل مـن قبلـك فتنّـي
من عرف قربك عرف طعم السعادة
وإن تشطّرت أدرك غبون التمنّـي
في هواك من العسـل لـذّة مذاقـه
لكن حروس النحـل عنهـا حدنّـي
ماعد اسمع بك ولا اوحي فيك عاذل
والعـذارى جهّـل لـو داعبـنّـي
لك عيون فعلها بـي فعـل ظالـم
من عرفتك يالغضي مـا ريحنّـي
إن تفارقنـا تغايـا لــي بليـلـي
وإن تقابلنـا دهـنّـي واخجلـنّـي

الجوهره
03-02-2007, 04:47 AM
يغار سمعـي و يشـره كـل وجدانـي

لا غاب صوتك نهار(ن) ما بلغ سمعي

ياللي لقيت بنواعـس عينـك أوطانـي

هي ديرتي هي ملاذ القلب هي ربعـي

أملي النّظر من جمالـك يـوم تلقانـي

و احبس خيالك بعيني حبسي لدمعـي

لا شفتك اعيش فـي عيونـك ازمانـي

وآخذ من نجومها وأشعل بها شمعـي

من نورها سالـت الفرحـه بوديانـي

ومن سحرها قام يورق بالذهب زرعي

يا واحد الحسن مالـك بالعـرب ثانـي

عطني شرابك وخذ قرطوع من نبعي

غريب الاطـوار و الغربـات ميدانـي

هي غربة العمر وافق طبعكم طبعـي

اصبحت تغريبتي و اصبحت عنوانـي

يا واحدي بالهوا و اثنينـي و جمعـي

الجوهره
03-02-2007, 04:47 AM
هلا وغلا شيهانه
منوووره يالغاليه

الدلوٍوٍعه
03-02-2007, 04:56 AM
ديووان رااااااائع ومجهوود اروووع
لشاعر اشهر من نار ع علم وغني عن التعريف
الله يعطيك العافيه ولاحرمنا هالتووواجد
دائما مبدعه ومتميزه

ولد العـز
03-02-2007, 05:05 AM
استاذتي الجووري
يعطيك الف عافيه
على الديوان الشعري
لشاعر غني التعريف

الشريف
03-02-2007, 06:26 AM
استاذتي الجووري
يعطيك الف عافيه
على الديوان الشعري
لشاعر غني التعريف

أنسة قلم
03-02-2007, 06:56 AM
الجوري"
تسلم ايدك على ها النقل المميز
للأميروالشاعر صاحب الذوق الراقي والأحساس المرهف
الله يعطيك العافية يالغلا
وتقبلي اعجابي وتقديري ..

دلع وولع
03-02-2007, 06:04 PM
للأميروالشاعر صاحب الذوق الراقي والأحساس المرهف
الله يعطيك العافية يالغلا

فراوله وكرز
03-02-2007, 06:25 PM
مشكوره جوري

عآشق المرجله
03-02-2007, 07:11 PM
ديووان رائع ..

ونقل اروع ..

لشاعر عني عن التعريف ...

تسلمين استاذتي على النقل والجهود الرائعه ..

الله لايهينك

سحر العيون
04-02-2007, 12:09 AM
ديووان رائع ..

ونقل اروع ..

لشاعر عني عن التعريف

الجوهره
04-02-2007, 01:55 AM
الدلووعه

منوووره يالغلااا

الجوهره
04-02-2007, 01:56 AM
ولد العز
منووور

الجوهره
04-02-2007, 01:56 AM
الشريف
منووور

الجوهره
04-02-2007, 01:57 AM
انوووووسه
منوووره

الجوهره
04-02-2007, 01:57 AM
دلع وولع



منوووره

الجوهره
04-02-2007, 01:58 AM
فراوله وكرز



منوووره

الجوهره
04-02-2007, 01:59 AM
عاشق المرجله



منووور

الجوهره
04-02-2007, 01:59 AM
سحر العيووون



منووره

منادي
04-02-2007, 02:17 AM
ديون رائع .. معطر بأجمل المفردات الشعريه
صح لسان الشاعر الامير خالد الفيصل على هذه القصائد الرائعه
واشكرك استاذتي الجوري على هذا انجاز هذا الديوان واخراجه بشكل رائع
جهود رائعه تستحقين عليها الشكر .. اشكرك .. الله يعطيك 1000 عافيه

و

تحية اعجاب لمن يستحق الاعجاب
منادي

ساروونه
04-02-2007, 04:10 AM
الجووري



مشكووره و..
دمتِ بوود

الجوهره
04-02-2007, 06:52 AM
ديون رائع .. معطر بأجمل المفردات الشعريه
صح لسان الشاعر الامير خالد الفيصل على هذه القصائد الرائعه
واشكرك استاذتي الجوري على هذا انجاز هذا الديوان واخراجه بشكل رائع
جهود رائعه تستحقين عليها الشكر .. اشكرك .. الله يعطيك 1000 عافيه
و
تحية اعجاب لمن يستحق الاعجاب
منادي

منااااادي
الاروع مرورك من هنااااا

الجوهره
04-02-2007, 06:53 AM
سارونه
منوره

فايز البراق
27-04-2007, 06:00 PM
صح لسان الشاعر خالد الفيصل مشكورين على الديوان الرائع والمميز

الجوهره
26-05-2007, 04:06 AM
فايز
منووور

كايدهم بقوة
08-06-2007, 04:31 AM
ياسلام عليك يالجوري بصراحه كلك ذوق يالغاليه
خالد الفيصل مميز بجميع كتاباته

لاهنتي

شارد الذهن
19-06-2007, 11:36 PM
صح لسان الشاعر خالد الفيصل مشكورين على الديوان الرائع والمميز

جبــــنة
23-07-2007, 09:23 PM
ديون رائع .. معطر بأجمل المفردات الشعريه
صح لسان الشاعر الامير خالد الفيصل على هذه القصائد الرائعه
واشكرك استاذتي الجوري على هذا انجاز هذا الديوان واخراجه بشكل رائع

مصيره لاذكر يشتاق
30-07-2007, 11:01 PM
يعطيك العافيه

مروان
12-08-2007, 03:49 PM
يعطيك العافيه

♥ sergio-roms ♥
12-08-2007, 09:04 PM
يعطيك العافية

تقبلووو مروري
صح لسانك

الجوهره
13-08-2007, 05:41 AM
نورتونا

ذهب
06-09-2007, 03:09 AM
يسلمووو يالغلا

فجر
23-09-2007, 05:03 AM
مجهود رائع تشكرين عليه

الطيـّر
23-09-2007, 03:30 PM
مجهود رائع تشكرين عليه

الجوهره
28-09-2007, 03:07 AM
نورتوناااااااااا

ريــــم
17-10-2007, 04:24 PM
يعطيك العافية كفيت ووفيت شجوون

الجوهره
24-10-2007, 03:09 AM
نووورتي يالغاليه

سهــم
17-11-2007, 01:17 AM
يعطيك العافيه شجون على المجهود


تقبلي فائق تقديري

الجوهره
20-11-2007, 04:37 AM
سهوووم


نووورت

كلك حركات
20-12-2007, 02:09 AM
يعطيك العافيه شجوون ع الديوان للشاعر الكبير
تقديري واحترامي

الجوهره
31-12-2007, 04:24 AM
حركااااااااات


نووورت

غــــزل
28-01-2008, 08:02 AM
قلبي اللي
قلبي اللي لواه مْـن الصواديـف لاوي =جرّحته الليالـي و الحظـوظ الرديّـه
و الله أنّي بوسط الناس كنّـي خـلاوي =من يلوم المفارق عقـب فرقـا خويّـه
أشهد ان المفارق من عظيـم البـلاوي =ميـر هـذا نصيبـك يالعيـون الشقيّـه
أتجلّد و أقول أنّي علـى البعـد قـاوي =و الله أعلم بقلبٍ فيـه الأشـواق حيّـه
كيف راحت يابو تركي حياتي شقـاوي =وين درب السعـاده و الحيـاة الهنيّـه
ليت لأهل الهوى و الحب قاضي دعاوي =كان أداعي عيون اللي فراقـه خطيّـه
كنّي المبلـي اللـي قطّعتـه المكـاوي =كلّمـا جـظّ بالـونّـات زادوه كـيّـه



آآآآآآآآآآآه

صــــــح لسان الشاعر خالد الفيصل<=== شاعرها المفضل

ولاهنت توته على النقل

المقداد
04-03-2008, 02:39 PM
يسلمو شجون ع المجهود الرائع

نــجــم
15-03-2008, 09:56 PM
صح لسان الشاعر

يعطيك العافيه على النقل المميز

شموخ عزي
15-03-2008, 11:08 PM
http://www.t1111t.net/up/uploads/e33b03c5c1.gif (http://www.t1111t.net/up/)

الجوهره
17-03-2008, 01:18 AM
غزل

نووورتي

الجوهره
17-03-2008, 01:18 AM
المقداد


نووووورت

الجوهره
17-03-2008, 01:19 AM
نجم عنيزه


نوووورت

الجوهره
17-03-2008, 01:19 AM
الدلوعه لمار


نوووورتي غلااا

{.تخُفي غلآإهُـآإ ..!
10-04-2008, 04:08 PM
شجوون
صح لساااان شاعره

ديواان رااائع

يعااااافيك ربي على ايراده

الجوهره
19-04-2008, 01:18 PM
نوووورتي يالغاليه

بنت السعوديه
07-07-2023, 07:20 PM
نبذة...حياة الشاعر سمو الامير خالد بن فيصل بن عبدالعزيز آل سعود

من مواليد مكة المكرمة في الخامس عشر من محرم 1359هجرية
درس المراحل الابتدائيه والمتوسطة والثانوية في المدارس النموذجية بالطائف
واكمل دراسته في هان اوف بريستونفي أمريكا
حصل على بكالوريس في الاقتصاد السياسي من جامعة أكسفورد
تزوج عام 1964من العنود بنت عبدالله بن محمد بن عبدالرحمن ال سعود ولة من الذرية
ثلاث ابناء بندر و سلطان و لؤلؤة
قصيدة....حدّني وقتي
*
*
حدّني وقتي على شيٍ جديـدي =السهر ماهوب من عادة عيوني
أبعدوني عن هوى بالي وسيدي =ومنعوا عنّي خطوطه ياصلوني
شطروني عنه في دارٍ بعيـدي =حسبي الله كانهم منه قطعونـي
صارت الفرقا لنا علـمٍ وكيـدي =ليتهم راحوا وانا عنده نسونـي
عاقني عن صاحبي سورٍ حديدي =دونه البحور حـرّاسٍ ودونـي
الرجا بك يابو خالد يا عضيدي =لا تخلينـي تراهـم عذّبـونـي


خالد الفيصل ❤❤

من اجمل الدواويين الشعريه القريبه لنفسي ❤❤❤