الشاعر محمد العجمي .. أسير الحرف ~

[يارا العامرية]

قصيدة غزه طز فينا



( طز فينا ) من بعد ما شفت اخبار الجزيره
( طز فينا ) من بعد ما شفت ( تحت النار غزه )
( طز فينا طز ) دام ان الهمم صارت اخيره..
..في جداولنا و صار العز من راسه نجزه
أي عزه ؟ ما جنينا غير نكسات ٍ كثيره
من بعد نيران غزه .. أي نصر و أي عزه؟
حن فلحنا بالمزاين من مسيره في مسيره
لعنبو رجال فينا صارت نياقه ترزه
وينها ذيك السيوف اللي لها بالمجد سيره
وينها ذيك الخيول اللي لها بالحرب حزه
اه يا فزة عمر لا صار يفتح كل ديره
و الله انه ما بعد فزة عمر ايّات فزه
اه يا ثورة صلاح الدين و جموع ٍ غفيره
و الله ان الخيل بعده ما تحرك من ملزه
اه يا فيصل و تمره مع لبنْه و مع حصيره
تارك الدنيا و هواها لجل ( قدس ) ولجل ( غزه )
لعنبو البترول كانه يقلب الدنيا مريره
ما ورا البترول غير الذل ( و اصبحنا نعزه )
ما بعد شعري مقاصد .. مقصدي ما فيه غيره
اننا ذقنا مذله ما وراها أي رزه
كان شعري ما يثيرك ؟؟ .. ناظر اخبار الجزيره
اقطع يديني اذا ما صابتك بالقلب هزه

[يارا العامرية]

قصيدة تبسمي


يا بنت روفي حالتي ما باقي ٍ فيني صبر
خليني اتكلم شوي ولا خلصت اتكلمي
المسأله سهله ولا يبغى لها كسر و جبر
بقولها لك و افهميها مثل ما انتي تفهمي
ان كنت مخطي فالخطا طبع ٍ تركز فالبشر
محد ٍ بهالدنيا امعصوم الا النبي الهاشمي
اخطي مثل غيري و غيري ما يفكر يعتذر
و انا عشان رضاك بايع كل شي بعالمي
تدرين في قمة غلاك اللي لعب فيني و جر ..
.. كل البيوت الشامخات اللي لشعري تنتمي
يا بنت مابه كامل ٍ الا العظيم المقتدر
والا البشر ترمي بعضها من خطاياها رمي
ان كنت مخطي فوتيها و اجبريها لي جبر
ايه اجبريها يالغلا و فوتيها و اسلمي
ان كنت مخطي فوتيها .. جعل يفداك العمر
ما فيه داعي للزعل .. زعلك يلوي معصمي
ان كنت مخطي فوتيها .. دامني لك معتذر
ماني ملاك من السما .. ربي خلقني آدمي
ان كنت مخطي فوتيها .. لعنبو طاري الكدر
اتبسمي يا جعلني فدوه لابوك اتبسمي
انا تكلمت و شرحت الوضع لك بالمختصر
و الحين دورك كان به عندك كلام اتكلمي

[يارا العامرية]

قصيدة حزن المجمعه


يا حزن يرحم والدينك وش بلا عقلك صقوع
يعني معنّدها كذا الا تروح المجمعه ؟
يا موت يالنقطه الاخيره ليه في فجر الربوع ؟
تروح لاغلى واحد ٍ حنا تصادقنا معه
يا موت يعني عاجبك انك تسيّل لي الدموع ؟
يا موت يعني ما بقى الا ضميري توجعه ؟
انا اشهد انك حق و الله قالها الهادي الشفوع
و صدّقت بانك حق يوم اني سمعت الفاجعه
ما باقي الا ندعي الرحمن بسجود و ركوع
عساه يرحم من فقدناه و بدينا نودعه
يالله ياللي نعبدك نسجد لك بكل الخضوع
ياللي نصلي لك من الثنتين لين الاربعه
ترحم فقيد ٍ غالي ٍ ماله على الدنيا رجوع
و قبر ٍ يضمه للحشر يالله طلبتك وسعه
و تعطيه بالظلمه الكبيره العاتمه نور الشموع
و تسكنه بالآخره جنات خلد مربعه
ما عاد باقي غير شي ٍ ساكن ٍ وسط الضلوع
بيت ٍ اخير احاول اني قد ما اقدر اجمعه
لو السحايب كل ابوها تمطر بصبح الربوع ؟
و الله لاقول ان السما تبكي لحزن المجمعه

[يارا العامرية]

قصيدة لخبطه


سطام تكفى بهر الدله من عويدي و بن
ضبط لنا فنجال مثل اللي يديك تضبطه
احس في راسي صداع و صرت منه مستجن
كل الخلايا في دماغي اصبحت متحنطه
قد لي ثلاث شهور و الافكار عيّن لا يجن
و اوراق شعري و القصايد لخبطه في لخبطه
الحبر متوقف و شعري لا قوافي لا وزن
الفكر ماخذ له اجازه و الحروف مبزوطه
البحر جف و ما بقى بالحنجره أيّة لحن
كل الطواريق البسيطه مرمطتني مرمطه
لا جيت ابكتب للشمال اشوف نفسي في اليمن
ولا جيت ابمدح (سوريا) اروح و امدح (صامطه)
معقوله اني ما عرفت اترجم الاشعار فن ؟
معقوله اني ما عرفت افك شعري و اربطه ؟
و انا الذي كنت اكتب المعنى و تسمع به عدن
و انا الذي و انا الذي ولا بلاش البزوطه
يا عم طير الحين انا شاعر و اعيش اتعس زمن
صار القصيد مشتت و صارت حروفي محبطه
و اليوم كاتب لي قصيده بعد ما حنيت حن
اكتب شطر // و امسح شطر // ثم اوزنه و اشخبطه
مستفعلن // مستفعلن // هذا كسر // هذا وزن
يا لعنبو جد القصيده كل ابوها لخبطه

[يارا العامرية]

قصيدة رزة ال bmw


على هونك ترفق قبل لا يصدمك صدامي
ترفق لا تخربها تراك تسوق لك bm
بغيت ادعمك يوم انك ضربت بريك قدامي
و انا مطفر و تأميني خلص و ارحمني يا مسلم
انا يكفيني انك زدت بي جرحي و آلامي
تسحّبني على وجهي ولا تترفق و ترحم
ذبحت القلب من حب ٍ كأنه حب اجرامي
و انا بالرغم من هذا احبك موت يا مجرم
الا ليت الحكومه لو تأمن قلبي الدامي
و اذا امّنت لك قلبي تعال و غرقه بالدم
فديتك لو تعذبني عذاب ٍ حارق ٍ حامي
قسم بالله لاضحك لك و اقلّك انبسط يا عم
ابيك اتقطع عروقي و ابيك اتكسر اعظامي
مدام اني احبك موت لا تبالي ولا تهتم
فديتك من شعر راسك الين تقول يا اقدامي
فديت القلب و جروحه لو انه ممتلي بالهم
فديتك لو تقول احلى الكلام و تشفي آلامي
فديتك لو تقول ( اذلف يزينك ساكت و منطم )
تبي الزبده ؟ انا كلي من الرفرف لصدامي
فدى اللي رزته والله تشابه رزة ال bm

[يارا العامرية]

قصيدة التداول


ازدحام بصالة الاسهم على شان التداول
و الجموع مجمّعه و الناس في حط ٍ و شلّي
في توتر مثل لاعب مستعد يشوت فاول
و ايتمنى قبل يلعب ليت ذا الحارس يجلّي
اما انا يا زين حالي بعت الاسهم للعواذل
لاني اصلا فالحقيقه مكتتب في قلب خلّي
وجّه اسهم صوب قلبي من عيونه يوم خايل
و اشهد ان السهم هذا معمي ٍ قلبي و كلي
قلت له يا حي هذا الطول يا حي الجدايل
قال شكرا قال مرسي مرحبا باللي يهلّي
قلت له طالبك طلبه لا تعذبني و حاول
قول احبك بس مره و خل هالدنيا تولي
لا تفكر ثم تسكت // لا تعاند // لا تجامل
لا تسوي لي عبيط و فوق هذا ما تقلّي
داري انك // داري اني // داري انك // منت قايل
بس ابنطر وش وراي و هذا انا جالس محلّي
وش ورا رجال جالس عند محبوبه يغازل
ما وراه الا المآسي و الهموم اللي تعلّي
جيت لك تارك همومي تارك ٍ حتى التداول
ما بغيت الا الغرام اللي يهلي ما يولي
ما ابي سهم ( المكيرش ) و ( المصافي ) ولاّ ( زامل )
يكفي اني في شعوري مكتتب في قلب خلي

[يارا العامرية]

قصيدة اسير الحرف


بكتب قصيده / بس مدري وش اكتب
بين الوله و الحزن محتار حيران
متشتت ٍٍ فكري اشخبط و أشطب
مره حزين و مره مشتاق ولهان
الفكر بالمشرق و انا حول مغرب
بعيد عني بالاماكن و الازمان
بعد المسافه بين حايل و يثرب
عفوا / و قصدي بين حايل و جيزان
ليت القصايد ويّا الافكار تشرب
لاشرب انا منها ولو كنت رويان
مير البلا بالشعر يحتاج نتعب
اتعب الين اصير ميت و هلكان
حاولت اسوقه مثل ما اسوق مركب
حاولت اجر الحرف مع جر الالحان
حاولت اخلي كل شعري مرتب
من دون اي احساس او روح شفقان
حاولت لكن / اثرني كلت مقلب
الشعر ما يكتب على دان يو دان
توّي عرفت ان الشعر شي متعب
ما ينكتب الا اذا فيك وجدان
ماتكتبه دامك على احساس يكذب
مام تكتبه الا على شي ينبان
اذكر زمان ٍ كان قلبي معذب
و الهم عانقني و عانقت الاحزان
و اخذت لي دفتر و لي نيّه اكتب
و ارسم و في فكري تصاوير و الوان
ثم ساقني حرفي على الكيف يلعب
و اصبحت اسير الحرف و الحرف سجان

[يارا العامرية]

قصيدة بقيق


سلام يالشجعان يا اهل المهابه
يا منقذين الدار و بكل توفيق
سلام مني عد وبل السحابه
و عداد ما نكتب قصيد و طواريق
هيه انت يا ارهابي يا وجه الكآبه
لا تحسب ان الدار هذي صناديق
ولا تحسب انك عايش ٍ وسط غابه
ابك انت جيت و ناوي الشر ل( بقيق )
دار ٍ سكن فيها اسود و ذيابه
ما يرحمون اللي نواياه تفريق
شفنا جعلنا الشر يشكي عذابه
يصبح على هم ٍ و يمسي على ضيق
لا من تجمعنا و عصبنا العصابه
محد ٍ يوقفنا ولا جيش الاغريق
و اللي يقول انه و أنه ؟ عقابه
نصيد راسه مثل صيد الغرانيق
رح للذي خلا حياتك سرابه
اللي خبص راسك و لفقه تلفيق
قل له كلامي دون ذوق و ذرابه
( يا هيه يالاهبل .. ترى هذي بقيق )

[يارا العامرية]

قصيدة دار السعود


( سارعي للمجد و العلياء ) يا دار السعود
مجدي خالق سمانا و افرحي ذاليوم عيد
( و ارفعي الخفاق الاخضر ) لين يوصل للرعود
( يحمل النور المسطر ) يحمل النور المديد
( رددي الله اكبر ) عد تربان النفود
يا بلاد الدين و الايمان و الشرع المجيد
( موطني قد عشت فخر المسلمين ) من الجدود
عاش عبدالله ملكنا عاش سلطان العضيد
كلنا شعب ٍ موحد ما يفرقنا حقود
كلنا عبدالله و سلطان بالعهد الجديد
لو يقولون العواذل من اكاذيب و جحود
كلنا قمنا نردد بالوفا ذاك النشيد
سارعي يا دار عبدالله بلا حد و حدود
مجدي خالق سمانا مجدي رب العبيد
( سارعي للمجد و العلياء ) يا دار السعود
و افرحي ذاليوم عيد و باكر افراحك تزيد

[يارا العامرية]

قصيدة الفهد


الفهد راح و تركنا و صارت ايامي مآسي
و الخبر هاللي سمعته يذبح القلب و يحوسه
السعوديه حزينه و العرب جتنا تواسي
صار هالعالم حزين و صارت الدنيا امعكوسه
آه يا فهد القلوب و عزتي يا تاج راسي
كيف تتركنا كذا من دون ما راسك نبوسه
آه يا رجل ٍ يخاشر بالغلا اهلي و ناسي
آه ياقرم ٍ تحزم للحياه و شد قوسه
كل حكي ٍ ما تقوله ماهو ابحكي ٍ سياسي
و كل ديره ما تجيها تصبح ابدونك عبوسه
و كل أمر ما توده اشهد انه حيل قاسي
و كل شخص ٍ ما تحبه تصبح ايامه يؤوسه
الفراغ اللي تركته وسط امه من كراسي
لو نعده بالمتر والله ما نقدر نقوسه
يا فهد رحت و تركت ايامنا تصبح مآسي
ليت ترجع بس لحظه عالاقل راسك نبوسه

[يارا العامرية]

قصيدة الرسول


الله اكبر و ارفعوا الرايات من فوق الخيول
جهزوا ذيك البيارق و استعدوا يا بشر
ما سمعتوا بالبقر يوم انها تسب الرسول ؟
ما خلصنا من القرود و جاتنا ذيك البقر
يرسمون المصطفى في ظنهم حنا خبول
يوم خبوا هالجريمه في ستارة ( راي حر )
أي حريّه ؟ وربي ما تجي وسط العقول
و احترام الراي الآخر ( هذا اصلا مو عذر )
( لا إله الا رب الكون و المعنى يقول
ان حنا مسلمين و ديننا عز و فخر )
علموهم اننا ما نندرج صوب النزول
و الكرامه ما نخليها ولا حتى شبر
ما نبي منتجهم اللي كلها زبده و فول
راس مالي حبة ٍ من بين حبات التمر
علموهم حذروهم لا يسبون الرسول
ولا تدرون ؟ اتركوهم .. وش يفهم ذالبقر

[يارا العامرية]

قصيدة قصيده جديده


اليوم مالي خاطر اكتب قصيده
خلاص انا عزلت مانيب رايق
الصدر ضايق و الفكر صك قيده
من جد مالي خلق مانيب فايق
ما عاد ابي شعر و معاني فريده
مدام خلي صدره اليوم ضايق
عزمت انا اترك كل معنى اجيده
بترك شعوري ينقلع للخلايق
بطعن خفوق الشعر و اقطع وريده
بشعل وسط بيت القصيده حرايق
بترك شعوري في عمود الجريده
نقط / نقط / شاعر وماهوب لايق
لا صرت ضايق حيل ما اكتب قصيده
و الحين انا من جد / من جد ضايق
ضايق / و كاتب لي قصيده جديده
وشلون اجل لو كنت بالحيل رايق ؟

[يارا العامرية]

قصيدة صفحتين و كتاب


ما خلقنا غير رب الكون من ماي و تراب
و الهموم تروح و اصلا كل ابونا ميتين
ما نوقف و العمر ماشي على درب الضباب
ما نشوف اللي يقابنا و حنا سايرين
يا وليفي لا تظن اني بعاتبك بعتاب
ولا تظن اني بروح و خاطري ماهو حزين
ولا تظن اني برحيلي يعني قلبي منك طاب
ولا تظن اني برحيلي عنك يعني مستهين
انت تعرف كبر قدرك شامخ ٍ فوق السحاب
و ان حبك لاعب ٍ في حسبتي في كل حين
من عرفتك و الضمير بداخلي لك ذاب ذاب
و اتجهت لدرب عمري ما مشيته من سنين
قلبي المقفول جيتك فاتحه لك باب باب
صرت واحد انكتب اسمه بصفحة ( عاشقين )
لكن الايام خلت حبنا مثل السراب
كل ما قربت يبعد يختفي ثم ٍ يبين
لين جات الريح هدت حبنا مثل الخراب
خلته من قصر شامخ لين يصبح بيت طين
هذا شي ٍ كاتبه رب السحايب و الهضاب
ما نقول الا يا ربي مير زينها و تزين
و السموحه يا وليفي اني بعلن انسحاب
برجع لدنياي و انسى اني عاشق حرف عين
و انت روح و دربك اخضر ما يعكره الضباب
ايه روح و جعل دربك منفرش بالياسمين
يا وليفي كلنا اصلا عباره عن كتاب
فيه صفحات ٍ كثار و مالنا الا صفحتين
صفحة ٍ مكتوب فيها ( انخلقنا من تراب )
و صفحه بنقرا عليها ( كل ابونا ميتين )

[يارا العامرية]

قصيدة قمر


بشتري لك نجوم ان كان فيها نجوم
ولا تدرين ؟ لا لا .. بشتري لك قمر
بشتري لك بروق و بشتري لك غيوم
كود يمطر هواك بقلب مابه مطر
جيت لك بالمحبه فوق راسك احوم
قمت المح ولكن ما وصلك الخبر
قمت اسوق القصايد قبل كل ٍ يقوم
قمت ابدّع و ابدّع لجل لفتة نظر
ثم مرت سنه من دون أية علوم
ما وصلني كلام ٍ ينشرح بالصدر
كل يومين افكر و انجرح كل يوم
و الفرح في حياتي مرة ٍ بالشهر
في منامي و ربي اني ازريت انوم
كل ما نمت جاني حلم يكوي الظهر
لعنبو حلم شفته دون كل الحلوم
هاض قلبي كثير و جيت لك منكسر
جيتك الحين ابحكي قصتي عالعموم
من بدايات طق طق لين آخر سطر
جيت اقول الحقيقه جيت افضفض هموم
جيت ابرتاح نومي دون هم و سهر
جيتك اطلبك طلبه مالها باللزوم
كان فكر ضميرك في كلامي و اقر
قولي اني احبك دون كل القروم
و ابشري بالامانه .. تامريني امر
برفعك فوووق فوق الين ذيك النجوم
و بجعلك وسط عيني تطلعين القمر

[يارا العامرية]

قصيدة سلام الجرح


فمان الله يا جارح فمانه
فمانه روح لا اتفكر تجيني
دخيلك لا تعذبني امانه
مدام الدمع بخدودي و عيني
تجيني تجرح القلب ابهوانه
تمد ايديك و اتصافح يديني
تبلغني تحيات الخيانه
سلام الجرح و الطعنات فيني
خلاص ارحل معاد ابغى مهانه
خلاص ارحل ولا اتكدر سنيني
ترى مالك وسط قلبي مكانه
و ما تسوى بنان اصبع يميني
و قلبك خاين و طبعك لعانه
و انا قلبي على حالي حزيني
يبان الصدق لو تحجب بيانه
كما لو بان شعره في عجيني
خلاص القلب لا تقلق زمانه
و روح ارحل ترى الضيقات فيني
عشان القلب روح ارحل عشانه
فمان الجرح و الطعن الغبيني

[نــجــم]

شكراً على الطرح ,,

تقديري ..

[العنيــــدهـ]

صح لسسسان الشاعر
وسسسلمت يميناك على رووعة الإنتقاء
يعطيك العافيه
!..❥

[سلطانة]

http://www.halauae.com/uploads/images/alsaher-1d103c1a60.gif

[نجمة الصباح]

http://img105.herosh.com/2010/12/30/417522652.gif (http://www.lylmd.com/vb)


شكرا لك
مجهود رائع
والله يعطيك العافيه
http://img105.herosh.com/2010/12/30/417522652.gif (http://www.lylmd.com/vb)

[أمـــيرة الـــورد]

http://www.osrah.net/forum/uploaded/1763/51266881541.gif

ديوان راقي ورائع
تسلم يمينك
مودتي وأمتناني ،،،
http://www.osrah.net/forum/uploaded/1763/41266881541.gif



http://forum.mu4arab.com/images/smilies/smilie14.gif

[احاسيس مشتاقه]

صح لسان الشاعر
ويعطيك العافيه

[شبيه اللول]

.
.

سلمت يمنأك على مآْحملتيه لنأ اشكرك جزيل الشكر على هذا الطرح
وانتظر جديدك القادم بشغف
لروحك الجوري
http://upload.wikimedia.org/wikipedia/commons/thumb/b/b3/Red_Rosa_damascena_%D9%88%D8%B1%D8%AF_%D8%AC%D9%88 %D8%B1%D9%8A.JPG/300px-Red_Rosa_damascena_%D9%88%D8%B1%D8%AF_%D8%AC%D9%88 %D8%B1%D9%8A.JPG

[كاتم العـبرات]

ديوان رائع


سلمت ولاهنت


دمت بود

[يارا العامرية]

شاكرة لكم روعة حضوركم ..
تقديري ,,
http://www.lamst-a.com/vb/images/icons/rose.gif

[غلا العتيبي]

تسلم يمينك ع النقل الرائع

[يارا العامرية]

شاكرة لك روعة حضورك ..
تقديري ,,
:m-49:

[فادي الشلاحي]

تسلمًٌَ يمينكًََ علىٍ هذا الطرحَُ,,

[يارا العامرية]

شاكرة لك روعة حضورك ..
تقديري ,,

[دانــه]

صح لسسسان الشاعر
وسسسلمت يمناك على رووعة الإنتقاء
يعطيك العافيه ع الديووان الراائع ...

[يارا العامرية]

شاكرة لك روعة حضورك ..
تقديري ,,
:m-49: