ديـــوان سعد اليابسي المطيري

[نــجــم]

الـسـلام علـيـكم ورحـمة الله وبــركاته

اقــدم لـكــم بـعـض من قـصـائـد سـعد اليـابسي المـطيري

[نــجــم]

شايب ومجبور على الولد ينخاه = ليا شاف في بعض المعاني قصوره
ينخا الله اللي خالقه ثم ينخاه = ومقدمين اللي على الارض نـــــــوره
ولا خير في جيل نضرهم تعداه = ان كان ما جاء في المسابق اطيوره
والطير لابده من الوكر مجناه = الساس الاول منجبه من اوكوره
طير محاذيف المسابيق يمناه = وصقر ليا منه صقر مع صقوره
هذاك نبديبه ونفخر بمبـــــــــــــــــداه = ليا همه الوالد على كل اموره
لامه وابوه اللي مشو في غذاياه = لين استقل العمر واكمل شعوره
اهدوا عليه وناظرين لهداياه = يبون تالي العمر لذة اسروره
اليا قصر شوفه وضعفت حظاياه = والحيل فاتر والحنا في ظهوره
والموت قافينا وحنا ضحاياه = ولابد دوراته علينا تدوره
والله من دهر سهاج مطاياه = وجيل ورا جيل تقافة اعصوره
نمشي السفر واللي على الدرب نلقاه = ولابد ما زاروه اهلنا نزوره
وين القرون اللي بذرهم لحقناه = مع كل تالي الليل تصقع انجوره
وين الابطال اهل السيوف المحلاه = تاكل عشاها من سباع النموره
وين الكرام اهل البيوت المبناه = للضيف ماسد العشا عن فطوره
الدرب واحد ماش غيره مجاجاه = اليوم راحوا ساكنين القبوره
اقفوا كما وردٍ تحول على ماه = عسى ملافيهم جنانٍ وحوره
يقولها اللي جابها من خفاياه = اكفاه مر إليالها مع شهوره
يالله تامرنا على الصبر يالله = لو جيت ابصبر ماش نفسٍ صبوره
والله من يوم عظيم وعدناه = ميعادنا يوم البعث والنشوره
ميعاد كل الخلق يوم الملاقاه = يوم اللقا اللي فيه هول ومروعه
وكلٍ على ما قدمتله مناياه = محصور عمله بين عدله وزوره
اما سعيد الحظ ولا مشقاه = ثنتين قدامه ضلامه ونوره
والمسعد اللي تاخذ الصحف يمناه = يقرا كتابه والخلايق احضوره
اليا عطاه الله من الرزق ماشاه = رحمه من الله والذنوب مغفوره
واللي شماله ضيع الدرب واخطاه = يقلاه هم وفي كبوده حروره
هذا الصحيح اللي مشى الدرب نقفاه = وما فات راح وما تبقى نبوره

[نــجــم]

ياحميد شب النار للمستفيدين = والنجر جيبه والدلال العذابي
واحمس لهم بن ٍ من السوق شارين = وبالهيل هيلها بليا حسابي
هي الهوا للي على الكيف ضارين = مهيل ٍ فنجالها للشرابي
تونس اللي من عناهم شقيين = تبري الضرم عن الكبود اللهابي
ويالله ياقابل نخايا الملبين = اللي نصوا بيتك يبون الثوابي
ياقابلٍ دين السجود المصلين = خشٌاع لله يدرسون الكتابي
عوض الشواوي اللي على الوقت جافين = ياعايض الوادي المحل من سحابي
برقه من المنشا يهيض المخيلين = ليا سمك مزنه يشاذ الهضابي
وخيل بهجانه وسيله ودادين = سيله وربانه من المزن ذابي
يجذب علينا اللي ورا نجد ناحين = من دونهم تزمي جبال ومغابي
ورا ثلاث امن القبايل مطيفين = والمزن خابي دونهم بالحجابي
عن دارهم مثل الربوط المساجين = اللي عليهم مركزات الحرابي
ربعي مطير اللي على العسر واللين = ينفسون الكرب عند النشابي
تدهل مجالسهم رجال ٍ شجيعين = على الغلا شيـيـبهم والشبابي
وياحميد ما حنا عن الولف ناسين = كود الضما ينسا بليا شرابي
ما دام انا حي ٍ وهم بعد حيين = والا ترا الدنيا مداها الذهابي
نمشي ولاحنا عن الغيب دارين = ما علمن بغيبهن الليالي
ما شين مع دربن له الخلق ماشين = قدامنا اللي يتعبون الركابي
بني هلال اللي فنوا والسلاطين = اللي على الدنيا هواهم رغابي
ومن قبلهم راحت الوف الملايين = اهل الدروع معلقين الجنابي
راحوا وخلوها وهم غير راضين = وكلٍ بعمله ساجلله كتابي
والموت مخلوق له اول وتالين = على النبي قدامنا والصحابي
وصلوا على هادي البشر كامل الدين = على نبين صادق الحق جابي

[نــجــم]

لاوالله الا شدوا البدو ياعبيد = يولعون بكل قلبٍ معنا
شدوا على صوب اليمن مشيهم سيد = بأموار حمٌلٍ والمواتر مشنا
يبون من وادى الدواسر الى الزيد = للديره اللي ما ربو فيها اهلنا
حتى الربوع اللي رعوا من ورا فيد = الوقت يجلي والسنين يحدنا
وقلوبنا تقلا من الهم حقيد = ويالله ياعاف الذنوب اعف عنا
من يوم قالوا مالنا في الوطن عيد = القلب حزن والعيون اذرفنا
ويالله ياللي بالعطا مكرمن زيد = من المزون الغر تسقي وطنا
تسقي الوداي اللي على حارفٍ حيد = اللي على اول غرسهن ماطلعنا
تسقيه من وسمن له المزن شهيد = على الحضوب ونجد شام ويمنا
وتجعل على اللي تمٌل الرزق شحيد = سيلٍ على سيلٍ رجوعه ظفنا
وجر الخيال وحار للمزن صريد = وقرت هبوبه والمزون امطرنا
ويريع اللي يم الافلاج فريد = واللي برجعه يم بيشه تعنا
ربعي مطير اللي على الفعل وريد = حمايةٍ دون الزبين المجنا
نيرانهم توقد الى ليلهم هيد = وتشعم الى من الفجور اظهرنا
ودلالهم تحظى على الجمر ركيد = ونجورهم طول الليالي اعولنا
والرزق ماياتي على باب حسيد = الخالق الله والمخاليق حنا
حنا نقول وغافل القلب ياعبيد = لابد من بيتٍ لحوده تبنا
ليا تفصخنا من اللبس جريد = للنزله اللي بعدها مارحلنا
ماشي علينا بالسرا كايدٍ كيد = عزيبنا يظوي بنا عند اهلنا

[نــجــم]

شدوا بسلفانٍ ضعنهم مقاطير = يازين قود اضعانهم بالحمالي
يبون صيفٍ من عشيره الى النير = قفيرةٍ تقلى من النزل خالي
براي ابو مسعد جموع طوابير = بالراي والله خادمٍ بالقتالي
راعي دلالٍ كالفات مباهير = يلفي على فنجالها كل غالي
نيرانهم تشذا البروق النواهير = ونجور مع طول الليالي تلالي
حرايرٍ تجنا لها من مواكير = ورجال تنزل في منازل رجالي
والجود ما يطلع بليا مخاسير = ما طالعٍ جودٍ بليا فعالي
مع شق ابو سحاب صقر المناعير = اذا وصل بالشد كرب الحبالي
ما ينثني دون الحمول الجواهير = الا جمالٍ ضاريه بالرحالي
وايامنا فيها ورود ومصادير = تمشي علينا دايرات الليالي
تمشي علينا مثل ممشى الجنازير = تقفي على اولنا وتلحق بتالي
يقول من مرت عليه التعابير = على كذا ما بين مر وحالي

[نــجــم]

يابو سلف عسى الحيا يسقي الاوطان = أليا سقى دارٍ لدارٍ يسوقي
عسى سحاب المزن يمطرن بعزلان = واهل الهوى يومي لهم بالبروقي
رجعه سديد وذابل المزن ربان = جرار براقه ومزونه دروقي
ان جاء الخبر والا الدير منه رجعان = سيل على غربيها والشروقي
ويالله ياجزل العطيه ومنان = خلاق منته للعباد مخلوقي
انك تعين اللي على الصبر كنان = منك العطا يرجا وزين الوفوقي
واعقل علينا اللي على الحق عوان = من يوم ساروا ما ادعوا بالفروقي
يبون حيٍ من ورا نجد سكان = وطويق ضلعه دونهم والعروقي
يابعدهم للي على الهجن شفقان = ستين ليله والركايب تسوقي

[نــجــم]

يالله ياللي ماخلق شي خافيك = يعالم ٍ برزاقنا والمسيره
ترزق جميع اللي مشى في مراضيك = ويخاف من يومٍ ثبات مصيره
يمساوي ٍ بالموت والحق مرضيك = ياما رحل قدامنا من عشيره
لا والي ٍ غيرك ولا الحكم واليك = والي وحاكم للسما والجزيره
ياخالق ٍ كل المخاليق ترجيك = وعينك على كل الخلايق نضيره
ينخاك عبدك واقفٍ بين اياديك = اول ما ينخا من عطاياك خيره
والثانيه عطنا الحيا من مناشيك = اللي تخيل به مزوون ٍ صبيره
اليا جا من المنشا تعاقب تلاعيك = خيل على دار ٍ وساقه لديره
وقلنا كريم ٍ له سبحان منشيك = سبحان والي ٍ كل شي ٍ دبيره
يسقيك يادار ٍ بك الغرس يسقيك = يالين سيل القاع يكبر غديره
من عقب ربعي سيسوك وبنو فيك = المسفرين اهل الوجيه النويره
حطوا مكاينهم وقامت سواقيك = وكل ٍ نثر حبه على حيد بيره
يبون من جزل العطا والرجى فيك = والمسعد اللي من عذابك تجيره
في يوم لا ينفع ولدٍ مع ابناخيك = بين الجنان وبين نار ٍ سعيره
نتليك ياحي ٍ ضعن قدم نبكيك = تفرقت سلفانهم عقب جيره
للسيل ياودٍ ضعنهم نزل فيك = اللي لهم مبدا الشجاعات ضيره
واصبح خلا ماكنهم دوجوا فيك = ياسٌعد من ربي نقاه ونصيره

[نــجــم]

ياربعنا ياللي خوال وبني عم = لا تنكسون لكل راي ٍ عديمي
ترى التقاطع بين الانساب حرم = وراعيه يلقى ف المجالس ذميمي
وترى التراحم بينكم يبعد الهم = ويبعد عن المسلم بليس الرجيمي
يازين مجلاس الجماعه ليا التم = اللي على الجاهل نباهم حليمي
حلقه رجال في المجالس تكلم = يسعون درب الخير والله كريمي
في بيت من يحمى بعيدٍ عن الذم = ماهو بغير اليوم واللي قديمي
وعسى عميل الخير للربع يسلم = اللي ربيع لضيفهم واليتيمي
اللي ليا جات اللوازم تلزم = من دون ربعه يرتكي للخصيمي
يورد حبال العاطشه روهج الجم = ومصدارها عقب الروى للمحيمي
ودنياك لو عزز بناها تحطم = لا خير في دنيا خضرها هشيمي
تنافسوها قدمنا جيلهم كم = واللي نزل فيها رحل والمقيمي
شربوا قراح ومن بعد حلوها سم = ولحدٍ سلم من سم بقعا سليمي
وهذي مقادير من الله تقسم = ولا للبشر عن ماكتب له قسيمي
وصلوا على هادي البشر قافنا تم = شفيعنا يوم النهار العضيمي

[نــجــم]

سلام ياربع ٍ يحبون الصديق ليا لفاهم = سو المعادي والحريب ليا تساقوا من عداهم
الحق موفينه لهم والا علاهم = هذي عوايدهم على دور السنين
والثانيه ربعي ليا جات القصيه = الحظ زين ولا هقاويهم رديه
نمشي بشرع الله وامانه مانطيع الجاهليه = ولا ناخذ المسلم بدين المخربين
هبت هبايب وازلفتنا من خطرها = تومي الفنون الخضر وتهزع ثمرها
يوم استمرت واستجلت من بحرها = خفت مضاربها على الحيد المتين
قلته وانا مزحوم يوم النو شرق = ازمل خياله من بحوره ثم فرق
وانا ايد اللي عن لزومه ما تدرق = والقوم ف اللزمات ف الميه ثمين

[فادي الشلاحي]

تسلم يمينك على هذا الطرحً الراقي

[يارا العامرية]

صح لسآن شآعرهآ وصح اختيآرك الرآئع ..
عافاك المولى وأسسسسعدك ..
تقديري ,,

[نــجــم]

تسلم يمينك على هذا الطرحً الراقي
يسعدني ويشرفني مرورك العطر

تقديري لكـ

[نــجــم]

صح لسآن شآعرهآ وصح اختيآرك الرآئع ..

عافاك المولى وأسسسسعدك ..

تقديري ,,

يسعدني ويشرفني مرورك العطر

تقديري لكـ

[العنيــــدهـ]

صح لسان شاعرها
تسسسلم يمناك على رووعة الإنتقاء
يعطيك العافيه
✿

[منادي]

صح لسان الشاعر سعد المطيري
اشكرك نجم على الديوان الرائع .. الله يعطيك 1000 عافيه
و
تحية اعجاب لمن يستحق الاعجاب
منادي

[نــجــم]

يسعدني ويشرفني مرورك العطر

تقديري لكـ

[نــجــم]

صح لسان الشاعر سعد المطيري
اشكرك نجم على الديوان الرائع .. الله يعطيك 1000 عافيه
و
تحية اعجاب لمن يستحق الاعجاب
منادي
يسعدني ويشرفني مرورك العطر

تقديري لكـ

[سلطانة]

http://www.halauae.com/uploads/images/alsaher-3814931317.gif

[نــجــم]

يسعدني ويشرفني مرورك العطر

تقديري لكـ