المساعد الشخصي الرقمي

مشاهدة النسخة كاملة : ديوان / علي بن حمري القحطاني


فادي الشلاحي
24-04-2011, 12:39 AM
بسم الله الرحمن الرحيم

السلام عليكم ورحمه الله و بركاته

اخواني .. اخواتي اعضاء نحبكم الكرام


http://alajman.net/up/uploads/5352a19c6f.jpg


من منا لايعرف ((.. رايه الشعر ..)) الشاعر الكبير ((.. علي بن حمري (http://www.n7bkm.com/vb/f89/a-42134.html)الإحبابي ..))

يسرني ان اقدم لكم من خلال هذه الصفحات ديوان الشاعر

و إليكم ديوانه الشعري

.

.

.



((.. اجلي همومي ..))

عييت ياقلب قلـت عيونهـا نجلـى
طعني ونا صاحبك هالنـاس كاحتهـا

ان حصلت رزق لاسمحى ولا خجلى
وان حدها الوقت تسمع بـس بحتهـا

لـذا .. انـا ياسعـد ماعشتهـا لجلـى
امشي على كيفها وسعـى لراحتهـا

ما انزل قفار الديار ولا اتبع الهجلى
وعانـد عنادهـا وسمـح سماحتهـا

وانا ادري اني اطمنها وهـي وجلـى
ارعود ترعد بهـا وبـروق لاحتهـا

مسكينه النفس تجلى شـئ مايجلـى
تنسى ضلوعي حجر والهـم ناحتهـا

فادي الشلاحي
24-04-2011, 12:39 AM
((.. السهر ..))

السهـر والليـل والدمعـات وعيـون الشقـاوي
والعنـا والهـم والحرمـان والنفـس الحزيـنـه

والقمر والشمـس والقطبيـن والنجـم السمـاوي
والرعـد والبـرق والهمـال والسيـل ودنيـنـه

والوعـد والعـذر والسجـات وجيـاع الهقـاوي
والغـلا والصـد والاحـلام والعمـر وسنيـنـه

والدفـا والبـرد وابيـات القصايـد والاغـانـي
والبيـوت الطيـن واحـلام القـراوه بالمديـنـه

كلهـا مريتهـا فيـك انـت ياعـذب الحـراوي
عقبهـا مـر الهـوى مختـال يسفهـه عاذلينـه

الهـوى ماهـو بيـوم ويـوم ماقلبـك هـواوي
عاشقك لـو صـب لـك دمـه ومولـك ونينـه

والله ان يصبر لها قلب(ن)على وصلـك فـداوي
دامك اغلى من تربع فـي وسـط قلبـه وعينـه

مايجوز مـن الحديـث الا حديـث وقـول راوي
ومايسر من الغلـى الا غالـي (ن)يتبـع حنينـه

حن لي دامي نسيت السيف والبشـت الحسـاوي
سرت في وقتي كـذا والعمـر تقضبنـي يدينـه

كيف بقسى ونت حبـك ماخذ(ن)حالـي رهـاوي
وان زعلت ازعل على الهزله ولا ازعل ع السمينه

ونت قسمـه مايمـد الا علـى الكفـو الحيـاوي
مايمد الا علـى مـن الطيـب ينبـع مـن يمينـه

لوتكاثرتـك حمـدت الله وعتـقـت الـدعـاوي
اشكـره وستغفـره ومــد حبـلـي وستعيـنـه

لانك اغلى من غلـى الـي بيننـا دم وعـزاوي
شفتك اقرب مـن قريب(ن)حـال مابينـي وبينـه

الزمـن والنـاس والهـراج وكبـار الحـكـاوي
جيت ومليت الفـارغ وصـرت للخاطـر ظنينـه

لوسمحت اظهر لهم خل اللـذي زرعـه سنـاوي
لين شافك يدري ان المـاء علـى زرعـه غبينـه

بس انا لي حاجة(ن)تنعد مـن ظمـن الرجـاوي
لاتطري لي السفر طاري السفـر دينـي ودينـه

لوسمحـت تغيـر الموضـوع لعيـون الشقـاوي
والسهـر والليـل والدمعـات والنفـس الحزينـه

فادي الشلاحي
24-04-2011, 12:40 AM
((.. القذافي ..))

ولاغيرك اللي يفرج الضيـق والكربـي
عليـك يتعايـن مجهـد الحـال وتعينـه

يابعدك على عيني وانـا منـك ياقربـي
وسبحـان مـن مفتـاح الارزاق بيدينـه

فلا أشكي من الحاجه 00ولانيب مغتربي.
ولااشكي جفاء من ياخذ الليل مـن عينـه

انا اشوف واسمع فعلة الرابـي المربـي
موخّر (بني عمه)00 مقدّم (نساوينـه) !

نوايا بحر (سرت )و(طرابلسه الغربـي)
وتخطيط غلمانـه 00ودفعـة ملايينـه !!

يفكر فكر جامي 00ويفعل فعـل صربـه
مسمّينـه أذنابـه وحنـا مسمينـه

جحدنا معمـر فـي مواقيـف لوكربـي
بعد مـا ومـر ريغـن بـدرسٍ لتلقينـه

ركب طايرات الحرب طيارهـا الحربـي
وعـزّوه فـي بنتـه 00وزادو نياشينـه

وهومادرى إن الموت من فوق متدربـي
بدل موتته ربـي كتـب كسـر قرنينـه

كسرنا الحظر حولك وجيناك يا(عِرّبـي)
جميلة ولـي العهـد فـي ذمتـك دينـه

وقفنا معك في شكل اخوّه 00وذي قربـي
اثاري ذوي قربك 00 وخوّتـك تخمينـه

جزاته تبيـه يمـوت ياصنعـة الغربـي
عسى انت وحثالة شعبك افـدا حذايينـه

هذا ابعد على شاربك يا اجرب بني جربي
تحسّبِنه موسـى الصـدر ولاّ شياعينـه

هذا اللي يساوي الف من ضربك وضربي
ولاضـاع لبـن سعـود حـقٍ محقينـه

لو الحل فى الرشاش والقاذف (ألاربـي)
فرضنا عليك الحل والمـوت فـي حينـه

ولاخان العروبه خاين الـزاد والشربـي
فلاهـي غريبـه منـه وحـده وثنتيـنـه

فادي الشلاحي
24-04-2011, 12:41 AM
((.. الله يذكرك الشهاده ..))


الله يذكرك الشهـاده كـان تذكـر مانسيـت
اسمي ودقة هاتفي وصوتي الحزيـن ونبرتـه

مافاتك الا ساع ما قفيت عـن عينـي بكيـت
فاتك تشوف الي صباح العيـد ذكـى عبرتـه

تبغاني اردد عليك الـي كتبتـه بيـت بيـت
عن بكـره ابيـه الشعـر ولا ابيـه وبكرتـه

قمت اتوجد بعد مـا روحـت لكنـي هديـت
ذكرت من قال الحيا لاقفـى تحـرم سبرتـه

أكيد تذكر ساعة الفرقـى ترانـي ماخطيـت
لكن لقيت ان التفاهم صعب وصعـب دبرتـه

كنت اسالك ليه الغموض يحيط بك وذا نويت
ياقو عذرك والي اقوى منـه معنـى حكرتـه

دامك قدرت تغيب ليه تجي ونا تـوي بديـت
اجبـرك ياكسـر بقلبـي ماتجبـر كسرتـه

حتى ولو مره من المـرات زليـت ونسيـت
منته بتعذر واحـد خوفـه يقـاس بحضرتـه

يامشتكيني للجفى ونا علـى وصلـك شكيـت
ياما ربطني في رجا الامال ومحـل مكرتـه

ليلة ضياعك او وداعك المهـم انـي غديـت
كني بدوي في خـلا قيـل وهجـت بكرتـه

انا ياماضي ماضى من الي حصل منك اكتفيت
بالله يكفـي ميت(ن)بلشـت يديـك بدفنـتـه

ياحسرتي ماكنت اظنك في غرامك باب بيـت
من يملك المفتاح ماريح(ن)تزعزع حضرتـه

القلب ماهو لك ابد ،، قلبي ليا منـي ظميـت
ثم(ن) سقاني واحـد مثلـي غرامـه كبرتـه

يولع ظلوعـي ولا ادفـى بقربـه ماحييـت
احيى وموت من الغلى ولا غـرام الزكرتـه

فادي الشلاحي
24-04-2011, 12:42 AM
((.. الهبوب ..))

أربّــك يالهـبـوب أتذكّريـنـه ؟
بِـنـا ولاّ ّ تـرانــا ذاكـريـنـه

وهـو فـي حاجـةً لأدنـاة هـبّـه
تهِـبّـه لـيـن تغـشـاه السكيـنـه

أمـانـه علّـمـي لــه ياهبـايـب
عـن امحبيـنـه ألـلـي فاقديـنـه

أنا والشعـر ننشـد عـن علومـه؟
وثالثنـا سـهـر عيـنـي وعيـنـه

وراه أبطـا؟ ولاجـاء مِنـه نـابـي
علـيّ أبـطـاه ياثقـلـه وشيـنـه

لعلّـك تسألينـه عــن غيـابـه
وقولي بـه خديـن أجفـا خدينـه ؟

ورب البـيـت مايـومـاً نسيـتـه
ولو ينسـى الولـد مـن والدينـه !!

ونسيانـي أشـد بعكـس عِـرّفـي
ولاتركـب علـى أسمـي منتسينـه

ولـكـن للـغـيـاب أمـبـرراتـه
على بنـد القضـا ,, والعـذر دينـه

معلمنـي الـزمـان أن التـجـارب
تعـرّضـك الهزيـلـه والسميـنـه

كلاني الشيب حتـى فـي رموشـي
تقـول الرمـش ديـن ومقتضينـه !

ياسُرعـك ياليالـي حسـبـي الله ..
قطفتـي مـن ثـلاثـي وردتيـنـه

لو إنه يمـدي أللـي راح يرجـع ؟
ما خُلّقـت كلمـة (أمبيّـح كنينـه) !

لابُـد الحاضـريـن أن قالـهـا الله
تعرف إن ذا ألاسـد وإن ذا عرينـه

وأنا زودي ونقصـي ذنـب نفسـي
مافـي بطنـي فضـل لحـداً بعينـه

وكسبـي للمدايـح ؟ مـن يميـنـي
لذا الرجّـال وزنـه فـي يمينـه !!

ماني تاجـر لـو أن أبـوي تاجـر
أنـا طينـه واهـل ألامـوال طينـه

يجـي يومـاً معـي مالكنـز غلـه
ويومـاً لانـي أفقـر مـن (أمينـه)

فـلا قـل الحـلال يـهـد بـاسـي
ولاكُـثـره يجـيـب الطمأنـيـنـه

(تيـامـن) ياأولـيَـد ولا(تيـاسـر)
ترى السوق الشيوخ (متوجرينـه) !

وجنّـب عـن جـبـالً ماتـطـاول
مافيـهـا ياحلـيـلـه ياعـويـنـه

أذا قلـت الشعـر فيـكـم كـبـاره
فحنـا المـجـد كـلـه كابريـنـه

وأنا ماذم فى الليـل جـاب راسـك
ولاربّـعـك قُــرى ولاّ مـديـنـه

لكنـك قمـت تاخـذهـا تعنّـصـر
وقـول العنصـري دايــم يديـنـه

أُكلّلك طيـر وتّـرك طيـر وأفلـح
بحبّك قبـل مـا يُعّجـن طحينـه ..

فلالـك عنـدنـا علـبـه وجـربـه
ولا لــك ببعديـنـه .. وقربيـنـه

عدانـا عقلـهـا يسـبـق غضبـنـا
زعلـنـا كنـهـم مستصعبيـنـه !!

وأنـت تسـوق نفسـك للمهـالـك
مثل شخصـاً يـدوّر مـن يهينـه ؟

أذا اتحاكـا خبـل يسّمعـه واعـي
(هـذا معـك الشِعـار مطبقينـه) !

أرائـك عكس,,وأوضاعـك تتعـب
وكلامك كل أبوه ( أشجار زينه ) ..

فلا يُذّ كـر شجـر زينـه يضلّـل !
ولاعصفـورةً عـلـى غصيـنـه !

تصوعـك ذيّ وألاخـرى تروعـك
وألاخرى غير ,,, تفطنهـا الفطينـه

ولا أردى مـن كلامـاً ماينـفّـذ ...
سـوى متكلّـمـه ,, ومنفّذيـنـه !

ياعنـك إن الصمـايـل والشـدايـد
(ياعيشة عز)...(ياموتـه هوينـه ) !

صدق راعـي المثـل يـوم ايتمثّـل
مايُضّرب بوظهـر علـى بطينـه !

اذا الساحه مـرض فـا انـا دواهـا
وأنا لو بحر ؟ : ما أرضابك سفينه !!

لو أنك راس : ما وطيـت هامـه ..
ولايُسـرا الولـد تسّـبِـق يميـنـه

ولوحتـى رضينـا فـي كلامـك ؟
ماتلقى مـن ورانـا إلا الغبينـه 00!

أذا فـي ذكـر ولاّ كثـر ؟ فـزنـا
معـك ياكـل علمـاً كاسبيـنـه ...

واذا زودتـهـا ننّـبِـش مـلـفّـك
مـن أول بيّـنـه لآخــر دفيـنـه

تبي ترضي (مره ) وازعلـت لابـه
رجـالاً تجعـل القاسـي عجيـنـه

رست فى أرض الجنوب أكبر سلاسل
جـبـال ماكـنـه وأرض مكيـنـه

فخلـك عـاد تعجـز فـي نـوابـغ
شعـر وافعـال وأحـبـالً متيـنـه

لـو أنـك يالجنـوب أثقـل عليهـم
مـن أللـي كانهـم متوقعيـنـه ...

وأنا من رووس قـوم ومـن قبيلـه
آلآد مضيـم كــلاً ضايميـنـه ...

تعـود إلنـا القبـايـل والمسـايـل
لنـا الغصـن الخضـر والياسمينـه

أنـا أتحـداك تلقـى عـبـد فيـنـا
ولاحتـى مـن الخـفـرات قيـنـه

ولايُـذكـر بقـحـطـان نـزايــع
لـنـا جــداً جميـعـا ملتقيـنـه

ولافينـا دخـوول ,, ولا عـلايـق
(ولاموقـع قِدمـنـا مشتريـنـه) !!

نحـب المـوت لعيـون الكـرامـه
مثل حب الضنا شوفـة ضنينـه !!!

فادي الشلاحي
24-04-2011, 12:43 AM
((.. تبقى ..))


تبقى ملك صدري واعيش بطاعتـك
شفني لك أقرب شخص في حاشيّتك

وأنـا وقلبـي وألغـرام أتباعتـك
حسّناك وصلي ..وألتجافي سيّتـك

ياكثـر ياهـوش ألغـلا فرّاعتـك
لومانـي بذنبـك فأنـا ضحيّـتـك

إزهل علـي مفهومـك وقناعتـك
وعليك أبزهـل عطفـك وحنيّتـك

جبّيتني وصلـك قضـى قطاعتـك
وصرفـت دينارينـك وروبيّـتـك

وبثّيتنـي موجـات عبـر إذاعتـك
أيجابك أضّفـى رونـق لسلّبيّتـك

وأذهلّتنـي فـي فنـك وبراعتـك
مُعّجب بمزحـك واحتـرم جدّيّتـك

طمّنتنـي 00ألله يخفّـف راعـتـك
ساعة شِربت ألوعد مـن خمّريّتـك

بطّـل مُحبّينـك ووقّـف ساعتـك
ولاتنتظـر ردي عـلـى هديّـتـك

ما يكفـي انـي ميّـتٍ بشياعتـك
(شيعة) جروحك في غلا (سنّيّتـك)

هبيـت فينـي ضيعـةٍ بضياعتـك
وحبّك معيّـد بـي وأنـا عيديّتـك

زودٍ علـى جمالـك وسناعـتـك
وزودٍ على طيب أصّلـك وربيّتـك

ماجابني حُـب أهّلـك وجماعتـك
إلا تسلّطـن راسـك وحميّـتـك !

تضيق بي واركض على وساعتـك
لعلّي أغنـم بعـض مـن حُرّيتـك

إن غبت داعيت ألجروح وداعتـك
ولاصرت أحبك وش لي بدعيّتـك

وإن عدّمت زبنت خوف قضاعتـك
في وجه صبـرٍ يحتمِـل جريّتـك

ياقلـب جمّلنـي وهـاك اوداعتـك
ألدمع أمانـه 00وألبكـاء وصيّتـك

ألربع(قُل) وبنـت بقعـاء صاعتـك
حتى خذيت امن ألوجـع (حذيّتـك)

وأقّليّلـيـن ألمعـرفـه لاباعـتـك
لاينطفـي جمـرك تحـت برّيّتـك

ياكثّرهـم كُثّـراه فـي شباعـتـك
وياقلّهـم قـلاّه فــي زريّـتـك

واذا أسّتوى خُسّرانـك وطماعتـك
قلت (إمس) ياراسي تحت كوفيّتك !

فادي الشلاحي
24-04-2011, 12:44 AM
((.. حطه على الصامت ..))

أنـا ودي أعايـدك واشــوف مـالـك ود
واخاف أتصل وتصد 00 وتفرّح الشامت !؟!

ياغالـي إذا دقـيـت ولانـويـت تــرد
بسيطه : لازاد الدق حطه علـى الصامـت

تبي الجِد خايف لاتهـور معـك مـن جـد
هذي العين لا لدّت 00وذي النفس لاشامـت

وش اللي يحدك تسمع الناس حِـد وحِـد ؟
بضاعـة جلاليـبٍ لابيعـة ولا نسـامـت

تبي نفترق؟ حاضر..تبـي نتفـق ؟ لابـد
اعرّف الطيور اللـي علـى نيّتـك حامـت

ولانـي بطايـح فـي فراشـي ولامنـهـد
جـروح المفـارق لا اقعدتلـي ولاقامـت

ياكثر التعـب والضيـق والبهذلـه والصـد
عوين النظر لا حـب 00والـروح لاهـامت

إذن أعتذاري يفرحِـك يـا جميـل القـد ؟
ياكم عن أسفك تجلّت النفـس وتسامـت !!

فادي الشلاحي
24-04-2011, 12:45 AM
((.. سيدي سلطان ..))




ولايــعــن الــــراس ويــســوق الــقـــدم
إلا مـســيــرً فـــــوق رووس الـطـايـلــه

عـلـى ضعـيـف الــراس مـافــاد الـزهــم
لـــو تـزهـمـه بـسّـمـه وبـســم العـايـلـه

وأذا فعـلـنـا الـطـيــب رفــــرف يـاعـلــم
هــــذي وقـوعـاتــه ,,, وذي دلايــلـــــه

عـلـيــك أمــــان الله ومــــد أم الـشـحــم
أنّـــا حـزامــك فـــى الـلـيـالـي الـمـايـلـه

أمـنـحـريــن الــبـــل عـــــدوان الـغــنــم
سكّيـنـهـم مـــن كــــل حــمــراً سـايـلــه

أحــــدً لــمــا طــــرّوه قــالــو والـنــعــم
وأحــدً لا قـيـل أسـمـه يفـشـل قـايـلـــــه

الكـفـو لــه فــي هـاتـفـي أســـم ورقـــم
وألـــلاش مـالــي رقـــم فـــي موبـايـلـه

لاصــار مــال الـرجـل لـــون ولا طـعــم
ولايـــعـــرف الـحــايــلــه والـشــايــلــه

بـهـيـمـةً يـنـعــد مــــن جــيــز الـبــهــم
لــــو أمــطـــرت مـاسُـيـلــت مـسـايـلــه

فــــــلا كُــــــل لاً لا ولا نـــعـــم نـــعـــم
ولاي أحــــــب أحـــايـــل الـمـتـحـايـلــه

والسالـفـه لاجبتـهـا مـــا أقـســم قـســم
الــجـــزل لاتـشــتــك فــــــي جــزايــلــه

فـألاحـتـرام أبـــرز صــفــات الـمـحـتـرم
فـــي وقـتـنــا ألــلــي تُـحـتــرم قـلايـلــه

وإن صــــارت الخطـوات أكثـر ماللـقـم
فالله غــنــي وأرزاق ربـــــي ضـايــلــه

فـقـط لاجــاء الـطـاري وحـنّـن ورتـــزم
فالقـاع أعسـه 00 والسحـاب أخايـلـه

مـعــمــةً مـاتـحـتـهــا عـــمـــه وعــــــم
مـــا تـمِّــن الـمِـرسـل عــلــى رسـايـلــه

كـبـر الطـمـوح ايـطــوّل أجـــال الـهـمـم
وقــــل الـطـمــوح يـحـطّــم المـتـفـايـلـه

(قلـب ولسـان الرجـل ) والبـاقـي رسم
كنـزيـن فــي ذا الـخـزنـه المتشـايـلــــه

ورب مــكــه,,والــمــديــنــه,,والــحــرم
مـا شـور فـي عليـا .. ولارّضـى عايلـه

يــا قـلّـة ألاصـحـاب فــي وقــت الـلــزم
فــي سـاعــةً فـيـهـا الـوقــوع أمكـايـلـه

الله يـــزيـــد أرزاق شـــاكـــرّة الــنِــعــم
والخـاسـر ألـلــي مـــا شـكــر فضـايـلـه

وألـلـي يحـفـر الـقـاع ويـحُــط الـلـغـم!!
يـطـيـح فــــي شــــره وفــــي عـمـايـلـه

زلاّت ألألــســن مــاوراهـــا إلا الــنـــدم
والـحــق يـبـنــي الـطـايــح المتـهـايـلـه

لـولا السـلـوم وحشـمـة أرجــال الشـيـم
يـسـود جـهـل أهــل الـصــدور الغـايـلـه

مـا كـل حــيً حــي 00لــو جــر النـسـم
وش لــــي بــحــيً مـيّــتــه فـعـايـلــه

وأذا عــزمــت أتــطــاول الـنـجـمـات رُم
إلــكــل ظــلــعً يـتّـعِــب الــرقّــاي لـــــه

وأذا جهـلـت بـعِـرف رجــلً مــا ؟ فـكــم
شخـصـاً تعـرّفـه عِـــرف مـــن زمـايـلـه

ومـن قـال أنـا فـاهـم وخـلـق الله غـشـم
بــكــره يـشـوفــون الــعــرب نـثـايـلـه !

طـفـنـا ,, وشفنا,,وتّعـضـنـا ,,وفّـتـهــم
قــلــبً لــقــا فــــى الـتـجـربـه دوايــلــه

حـيـاتـنـا تُـحّـســب كــــذا: لــنــا لــهــم
الــغــش فـيـهــا طــــوّرت وسـايــلــه

ياسـيـدي سلـطـان مـــن طـيــب الـكـلـم
لـــك مـــن ضـمـيـري عـذبــه iوزلايـلــه

ماوصـلـت ألاعــراب سـاســك والـعـجـم
الـجــد مــقــرن 00 والـمـعـنّـز وايــلــه

تفـهـم وغـيـرك جـعــل عـمــره مـافـهـم
الـعـلــم لــــك مــواخــره وأوايــلــه

أطـول طويـل أهــل العـطـا حـولـك قــزم
بـــــدري عــلـــى كـفّـيـنــه وطــوايــلــه

أجــنــوبــك الله خـالـقـنــهــا لــلــدحـــم
وعـظـام راســك هــي سـبـب صمـايـلـه

مـدّت يـديـك أتـوسّـم ألـلـي مــا أنـوسـم
وســمً تشـوفـه فــي أرقـبــة الحـايـلـه

يامـدح أبوالطيـب ووصـف أبـن الجـهـم
كــرمــك شـيــخــان الــكـــرم سـلايــلــه

الـوقـت هجـنـه ســود,, وخيـولـه دُهــم
فــى الـصـدر تسـعـى عُـرّبـه وأصـايـلـه

لـمــا غلـبـنـي الـضـيــق وأزداد ألالــــم
والــدمـــع ألازرق مـطّـلـقــاً سـبـايــلــه

فلومـا عليـك أشكـي مـن الحـال السـقـم
فغيـرك بـمـوت ولا سِـمـع شـكـواي لــه

تلـزمـنـي الـخــوه مـعــك يـــوم ألــتــزم
بـــــك يـامـغـرقـنـي بــحـــر جـمـايــلــه

ياسيـدي مــن رحــت مــن نـجـد أنـعـدم
مـالـقـاع وزنـــه 00وأكـثــرت عـلايـلـه

عــــوّد عـلـيــه أرب يـحــيــه الــوســـم
تـنـبــت ورود 00وتـنـتـشـي خـمـايـلــه

انت الحيا ,, وانت الضيا ,, وانت العزم
يـــاوّل أســـم فـــي كـاسـبـيـن الـنـايـلـه

تـرنــي بـوجــه الله ووجـهــك مـالـعــدم
الــقِـــل خــيــلــه صــايــلاتــاً جــايــلــه

فـيـك أنــت ياسلـطـان ظـنــي والـعـشـم
لـلـظــن قــدحــه ,, والـعـشــم فـتـايـلــه

الله يـطــوّل عـمــر جــالــي كــــل هــــم
مــدام حــي أغـنـاي لــه وأبـكـاي لــه

لـوفـيـه مـثـلـه كـــان سـقـنـاهـا شــمــم
لاحــــــووول لامــثــلــه ولا مـثــايــلــه

يـطّـرونـه الـجُــلاس لاطـــروو الــكــرم
لـــبّــــا طـــواريــــه ولـــبــــا قــايــلـــه

حتـى المـكـان الـلـي يـجـي بــه يـزدحـم
أسـمــه فـقــط لا مـــر ســـوّى ضـايـلـه

سـيــدي وسـيّــد سـادتــي مـنــذ الـقــدم
مــن عـهــد شيـبـانـه وعـصــر اوايـلــه

العـزف عـزفـه ..والـوتـر لــه.. والنـغـم
وصوت الكمنجه لـه وصـوت النـاي لـه

مـاتـنـزف ألاشـعــار مـــن راس الـقـلــم
الـنــزف مـــن جـوفــي ومـــن دخـايـلـه

لــوأنــت يـاسـلـطــان ســـــراً مـاكُــتــم
وش يحجـبـك يـانـور شـمـس القايـلـه؟

وأذا فصـلـت أللـحـم مــن فــوق العـظـم
فـالـحــال لــــك دقــــه ولــــك جـلايـلــه

وإن شفـت فـى الجـوال صورتـك أبتسـم
لـــو إن قـبــر أخــــوي تــــوّي هـايـلــه

أنت الذرى,,وأنت القرى ,,وأنت الشكـم
وأنــت الرجـا,,وأنـت الحـجـاة الحـايـلـه

ياكـثـر مــا امـلـك مــن بيـوتـك يالنـظـم
وعجـزت لأملـك بيـت وأسـتـر عايـلـه

أبنيـه فـي حلمـي وأذا أصبـحـت أنـهـدم
يـاجــوع قـلـبـي لـــه ويـاضـمـاي لــــه

مـــالاً بــــدون أرجــــال زرعً مــاصُــرِم
الـشـمـس فـوقــه والـهـبــوب أتـمـايـلـه

ورجـــلاً بـلـيــا مــــال ســيــفً مـنـثـلـم
لــوإنـــه مُـــقّـــدم ربـــعـــه وقـبـايــلــه

فـخـوي أبوخـالـد مـايـفـرك لـــه خـشــم
ولايــــوريــــه الــــزمـــــن نــكــايــلـــه

وخــوي ابوخـالـد مــن الـوقـت ايحـشـم
ومـــن فـرســة أذيـابــه ومـــن ثعـايـلـه

وخـــوي أبـوخـالـد مايخـطـيـه ألــدســم
ألـــشـــد شــــــده والـــنِـــزل نــزايــلــه

يـاسـيـدي بــالــروح نــخــدم وانــخــدم
الـعــمــر دونـــــك عـــاقـــلاً رحــايــلــه

وألـلــي يـحـسّـب خـوّتــك شـــرم بـــرم
نـلـغـي عـــرب سـاتــه ونـلـغـي نـايـلـه

نـقــراء عـلـيـه الـزلـزلـه وأيـــلآ فــهــم
كــــــــلام ربً مــحّــكــمـــاً نـــزايـــلـــه

بـعـيـد لـــي بيـتـيـن مـــن قـبــل آخـتـــــم
عــن شـكــة الـقـاصـر وعـــن جهـايـلـه

مــــــا كــــــل لاً لا ولا نـــعـــم نـــعــــم
ولاي أحــــــب أحـــايـــل الـمـتـحـايـلــه

ولا يــجــي فــــوق الـمـهــم إلا ألاهــــم
واشـــد مـــن غُــــب الـبـحــر هـوايـلــه

والسالـفـه لاجبتـهـا مـــا أقـســم قـســم
الــجـــزل لاتـشــتــك فــــــي جــزايــلــه

فادي الشلاحي
24-04-2011, 12:45 AM
((.. خلك سمح ..))

ليا جتك عوجا في طريقك فخلـك سمـح
ترفع وروس اعـداك فلقـا ..ومنكويـه

تعلم مـن الايـام واكتـب عليهـا وامـح
بني نبـح ماتفعـل فعايـل بنـي عويـه

وجيه الليالـي ياسنـادي عبـوس قمـح
توارد علي من شـدة الضيـق منطويـه

وانا يوم أحق الشـوف فيهـا بليـا لمـح
تقول انهـا مـن ثومـة القلـب مشتويـه

علي الحرام اني عن اهل السعاده طمـح
بعد ماقضى الصيف ونوينا على الضويـه

ياعطاف بين الرمش واخوه رمح ..ورمح
لهـا زرقـة والـروح منهالهـا دويــه

بخيل الخطايا طايـح فـي كريـم الدمـح
ثقـة نفـس ماتلـوي ولا هـي بمنلويـه

وجودي عليكم وجد من يزرعـون القمـح
كلا الطير مرزقها وراحت وهـي خويـه

وألا ياوجودي00 من وجود جمح بي جمح
توجاد اخو نوره على (وليد بـن شويـه)

فادي الشلاحي
24-04-2011, 12:46 AM
((.. الذاهن ..))

الذاهن اللي كـل ماغطـوا صحـى
جرحه ينـدي والبلا راوس بـه

لاجّر صوته عن بني عمـه نحـى
يجر صوته فـوق ظلـع راس بـه

كنه يتـلّ علـى عروقـه لا بحـى
سده وهاجوسه طواه وحـاس بـه

تقول من كثر الهواجيـس اللحـى
سود الليالي غيـرت لحسـاس بـه

ليت المواجع حب ونشد في الرحى
والشعـر والله ماتبيـع مكاسـبـه

ماني بخبل ٍعن مواقيفـه شحـى
ولا يدرجـهـا .. بغـيـر مناسـبـه

صاحب صحيبي بس يذبحني السحى
بعض الرجال الشعر ماينقـاس بـه

سلم على اللي لا دحى الصامل دحى
اللي علومه مثـل الالـه الحاسبـه

هرجه صحيح مع كريميـن اللحـى
الطيـب ناجـح والفسالـه راسبـه

ياوليد واللي مابعـد كتـب انمحـى
واللي يـدوس العلـم لاينـداس بـه

وش فيه يزعل يوم قلت احذر وحى
يزعله شعري كيـف لـو بناسبـه

على العموم اذا لقـى ثـوره جحـى
قلـه يبيعـه بيعـة البـلاّس بــه

هرج الملقم مثل صكـات الضحـى
اظـن هالجملـه عليـه مناسـبـه

فادي الشلاحي
24-04-2011, 12:46 AM
((.. السكون ..))

السكون يشدنـي والليـل يذبحنـي بـراده
ساعة فيهاالهجوس يدق باب الصدر بيـده

دقة منها عروق القلب ريم في حمـاده
ذيره صوت النفس من صدر صياد يصيده

دلنـي للفـازع القطـاع وركبنـي شـداده
لين وردني على حوض الضعيفه والشديـده

صحت ياجرح السنين الماضيات اشهد شهاده
فزعتك يوم الكلام يعـاد وفكـارك جديـده

حدني من الضيق تكفى لاتلقينـي السعـاده
السعاده يابعد راسي من افـلاس القصيـده

كل مازدت العنى سلمـت للحبـر القيـاده
مثل ماسلمت قلبي في الهوى كف الفريـده

مهرة تحمى على خيالهـا هـز الطـراده
كنها تربى على ضرب الحديده في الحديـده

خالها عوق الخصيم وعشق لبـاس القـلاده
وربعها روس الرجال الي يلبـون النجيـده

بنت شيخ مايورث مـن وراه الا العقـاده
مات ماجاله ولـد والبنـت خلوهـا عقيـده

ان بغت تثبـت جدارتهـا بقلبـي والسيـاده
تبتعد وتشوف ماتبقى من افكـاري شريـده

اتحدا جمرها في خاطـري يصبـح رمـاده
والهوى نفحته من صله ونا شوقـي وقيـده

ماذكر انها قد عطت قلبي من الـذه مـراده
طاهره مادوجـت بيـن الرفيـده والرفيـده

ان طروها قلت ياعيني تعـذرش الوسـاده
ون تهيت اشكر الحظ ومساعيـه الحميـده

ليتها ياليتهـا تفتـي المجاهـد فـي جهـاده
عن مقام دونه الدنيا على عينـه زهيـده

والله انهـا كـل ماغابـت تغيبنـي زيـاده
ضاعت افكاري ولا ركبت لي جمله مفيـده

والسبب ليل سكن جوه وذعذعني بـراده
لين وردني على حوض الضعيفه والشديـده

فادي الشلاحي
24-04-2011, 12:47 AM
((.. الشمس ما غابت ..))

الشمـس ماغابـت غيـاب الطبيـعـه
الشمـس غابـت يـوم غابـت لياليـك

والادمـي ؟ مـاكـل شــئ يطيـعـه
والعمر يشربـه الدهـر بيـن اياديـك

ياصاحبـي بعـض المواقـف فضيعـه
لوماتجاريهـا عـن الطيـب تنحـيـك

اغيـب وجمـوع الليـالـي هزيـعـه
واعـود ماتذكـر ولانــي بناسـيـك

واشتـاق لذيـاب الجـروح الوجيـعـه
واحن وارزم واشـرب الريـح وبكيـك

والي حصل سرٍ حمـى الله وديعـه
واللـي درى يـدري ولاهـو مداريـك

ونفسي على نفسـي حريصـه منيعـه
وشلون تبغاني البـس الـذل وارضيـك

واسمـي علـّي اهـم مـن كـل بيعـه
ليا حميت اسمي عـن الهـون يحميـك

وكانك ذكرت وهـزك الشـوق ريعـه
واشتقت لي .. يمديك ،، يمديك ،، يمديك !!

فادي الشلاحي
24-04-2011, 12:47 AM
((.. الطير ..))

الطير ابو ريشٍ حمر اواجهه في كل ريـع
ولا يعوّد مـن الطمـان الا محبيـن الرفـاع

اذا التوى يعني التوى وذا نزع ينـزع نزيـع
كنه يقيس بعرض جنحانـه مسافـة الارتفـاع

يكفيك لامنه نوى الهده علـى الصيـده شنيـع
واذا نظرت لصيدته تقـول ذي صيـدة سبـاع

الحر ضربة مخلبـه يفتتـه ضـرب الدريـع
اذا نزل ثم ارتفـع يبلـع صعيـب الابتـلاع

لله درك ياصقـر قـدت الطلايـع للطلـيـع
مالله خلقك الا عزيز ورافع الراس وشجـاع

اذا توسدت السما سمت النجـوم مـن البديـع
وان كان سمت النجم ابوقلبيـن ماظنـي يبـاع

لكن تعـال نقيسهـا بيـن المظلـع والظليـع
بينك وبين النجم ابـو قلبيـن شبريـن وذارع

جعلت فيني حاجة في خاطري تقرع قريع
ماعاد عديت المحـال بخطوتيـن المستطـاع

وان بيحت الايام سرٍ مـن ورا سـد منيـع
الساتر الله والعمـر محـدود والدنيـا متـاع

اشد حيلي واحتزم واشري مـع العالـم وابيـع
ولاتهـّدك يالحصـون الا مراجيـم الـقـلاع

ولا بعد وقفّـت للايـام فـي موقـف هزيـل
من فتّحت عيني ونا اعـرف الثنيـة والربـاع

وان جات فاازهلها علي ابو التبيـع ابـن التبيـع
احوفها كله لاجل عينـك يابـو سودٍ وسـاع

يامن بروقك في الحشا لااقبلت لي تلمع لميـع
ويهل رعادك وتروى من مـدودك كـل قـاع

ماقلت احبك غير انا في اللي تقولـه مستطيـع
الا فديتك لك على روحي كما الحق المشـاع

ياغلى دروبي دامني ماشيك حتى لـو اضيـع
ماألذ من درب الضياع الا دروبـك يالضيـاع

وداعتك سرّي معك واحفظ على سـر الوديـع
وارفق على حالي لاحدتني المقاديـر الهـزاع

ياروض قلبي ياخزام الروح يافصـل الربيـع
ياقمة الاسلـوب يـا استـاذ فـن الاستمـاع

لولاك ماكان القصيـد يقـول وايدينـي تطيـع
وارسمك في شعرٍ خذا منك ومن عذبك طباع

ولولاك ماقلت اسهري ياعين واضعف ياشجيع
ولا عرفت ان العذول يغاض والعاشق يطـاع

ولولاك ماعشت الحياة بعكس نظرتهم جميـع
ولولاك ماكان الشقى من جيت فض الاجتماع

غيرك اذا دور غلا في داخلي يلقى ضريـع
لاهوب لايغني ولا يسمن على عودٍ رعـاع

والحزن سيله لاورد تنبت له جروحي ظليـع
وانا ادري ان السيل لابد يتحدر فـي الفـراع

يومي عرفت بخطة الايام من راس صديـع
يلعب بتسعه بالهجوم ويلعـب بلاعـب دفـاع

يحدنـي وان حدنـي للمـوت لقيتـه قظـيـع
ولا يحسب اني على الدنيـا شديـد الاندفـاع

الذيب جوعه لو يحده عنـد رعيـان القطيـع
ماصادوا الرعيان من بـد الذيـاب الا الجيـاع

جر السوالف كلها حتى تجيبـك كـل ريـع
ولايعـود مـن الطمـان الا محبيـن الرفـاع

نــجــم
24-04-2011, 12:47 AM
يعطيك الف الف عافيه

موضوع رااائع

وجهود أروع

فادي الشلاحي
24-04-2011, 12:48 AM
((.. غلطه نحو ..))


ابعتـذر وانـا ادري انـه مايفيـد الاعـتـذار
لكن لوانك في مكانـي كانـك الحيـن امعـذور


متردد انطق كلمتين فـي ضميـري مـن نهـار
مخطي وسامحني عسى ذنبي من الصد امغفور


اخـاف تتركنـي بلاميعـاد وايامـي قـصـار
مدري غيابك من زعل والا غلا والا غـرور!!!


انا انكسرت برغبتـي والضـؤ لـولا الانكسـار
مابانلك بين الزوايـا المضلمـه موجـات نـور


ياسيدي تشبـه علامـات الرخـاء والازدهـار
من يوم عرفك ما خبرت الحظ يمشي في دبـور



الله مااكبر عاطفـة قلبـك ولاسبـع البحـار
اسف انا عندي خطـأ فالنحـو لاسبع البحـور


يااجمل صباح ابن ندى وافضل خيار الاختيـار
يانعمة يؤمـن بهـا مؤمـن ويجحدهـا كفـور


نهار وجهـك ضلله ليـل علـى متـن الوقـار
حتى هوت من عيني الدنيـا مماليـك وقصـور


وبقيت في عين الرجاء فرحه ودمعـه وانتظـار
وسكنت في وادي الضباء ياضبي لومانت بعفور


وانـا ماحـدك للقصا يعنـي اذا صارالـقـرار
فرقا بكيت امن الندم والضيق من بعض الامور


حر حفضت امن السماء ماتنزل الواطي حـرار
ولا عليهـم زود وافييـن المبـادي والشـبـور


هزيمـة مـن عقبها يأتـي ثلاثـيـن انتـصـار
افضل ولانصربعده الحـظ خايـب وامحسـور


تقدر تخلينـي بليا وصـل مــن دون اعتـبـار
وانا اقدر ابكي لين اعايد عبرة تبـري الصـدور


ابعتـذر لـك سالفتنـا كـل ابوهـا باختصـار
اني انا مخطي ولا جاء منك ياالغالـي قصـور

فادي الشلاحي
24-04-2011, 12:49 AM
((.. ماني بعبد أبوك ..))

ماني بعبد أبـوك لاتامـر ولاتنهـى علـي
رجال واطلق من شواربك القصار ام الردا

البارحه جدك يحلب العنـز ويـرب الدلـي
واليوم جيت تـدور لعليـاك فينـي لا بـدا

يحرم علي معاشر الخثـرات لا وانـا علـي
ان كان مااخلي لوقعي فيك يالخايـب صـدا

ابوك،، انا من لابةٍ مثل السحاب المنزلي
ان صب يحيي قاعها وان مد ماجا لـه مـدا

يوم الليالي العابسات ام المسوايـح الخلـي
بااطرف بيوت الربع لو مابه عشا نلقى غـدا

يوم القبايل قوم والرجال يذبـح فـي طلـي
كانو عيال العـود وافيـن الخبـر والمبتـدا

ويوم الحروب فيود وردنا على الموت الجلي
ماحر مـن صفقنـا قرنيـن مـاردوا هـدا

ويوم الفخر بالذود ولا الخيل والعـد الملـي
فيها خذينا الاوله والحيـن ماراحـت سـد ا

قحطان ربعي لاتعدون العـدد والعـد لـي
من وادي الاحساء الى نجران لاابهـا للهـدا

يالازهري يالازهري عاين علـي ولّـد لـي
ماقد خبرنا واحدٍ منكم علومـه فـي قـدا

عـز الله انـك ماتجمـل يالدقيـق الممتلـي
من كان ابوه العيب سموه الرجاجيل الـردا

فادي الشلاحي
24-04-2011, 12:49 AM
((.. من رمى الضلع ..))



صاحبي وش يضر الحال لا قالـوا
كلمة الشين بيـن النـاس منقولـه


خلهم يوم صاعوا البـر وأكتالـوا
ما لقوا من حمـار البـر مفقولـه


كل ما مالت الدنيا علـي مـا لـوا
و كـل ميلـه بحيـل الله معدولـه


أختبوا في ضلوعي ليـل وأغتالـوا
قلب شاعر وطار السرب من حوله


لو يقولون فينـي للأسـف طالـوا
من رمى الضلع ما يخطيه من هوله


أسمعوا ما يهـد الحيـل وأنهالـوا
شاعرٍ مشلح القمـه علـى طولـه


شاعرٍ ما يخول أشبـاه مـا خالـوا
التميّـز ضـروريٍ علـى قـولـه


لين ساق القصيد العذب مـا والـوا
غير طاعت قصيده وأجمل فصولـه


وساع ماأنشى قصيده راحوا تماولوا
فـي سحابه..وبراقه..وهملـولـه


ليتهم يوم راحوا شرق مـا سالـوا
حاسدٍ موّل الدعـوى علـى مولـه


صاحبي والجروح بقلبـي اتشالـوا
جرح مهبول مـن كفيـن مهبولـه


كان ما أحتلت وألا كان ما أحتالـوا
ما أنت مسئول ولا الناس مسئولـه


غلطتي .. يوم أصدق كل ما قالـوا
كنت أصدقه لكـن كنـت ما أقولـه

ليتني همك
24-04-2011, 12:52 AM
كلام من درر



يا سلام ع احساس كبير


وخيال كبير



يا سبحان الله




بسم الله عليك يا علي بن حمري القحطاني


والف شكر لك اخي الحبيب طرحك المميز

فادي الشلاحي
24-04-2011, 12:53 AM
مشكور على مروركً وتشريفكًٌَُ

يارا العامرية
24-04-2011, 06:19 PM
صح لسسسسآنه .. ولآهنت ع ايرادك ..
تقديري ~

فادي الشلاحي
24-04-2011, 06:29 PM
مشكوره على مروركً وتشريفكًٌَُ

سلطانة
04-05-2011, 09:33 PM
http://www.halauae.com/uploads/images/alsaher-3814931317.gif

فادي الشلاحي
05-05-2011, 06:20 AM
مشكوره على مرورك وتشريفكً

العنيــــدهـ
10-05-2011, 11:51 AM
سسسلمت يمناك على رووعة الإيراد
يعطيك العافيه
!..❥

فادي الشلاحي
10-05-2011, 01:53 PM
مشكوره على مرورك وتشريفكً

,,