المساعد الشخصي الرقمي

مشاهدة النسخة كاملة : ديوان الشاعر / سعد الحريـــــص


نــجــم
08-04-2011, 01:37 AM
ديوان / سعد الحريـــــص


ــــــــــــــــــــــــــــــــــ
اختر لنفسك
ــــــــــــــــــــــــــــــــــ


اختر لنفسك .. انا اخترت الطريق الطويل
بعض الخيارات ماتتـرك لنـا الاختيـار
اخترت احبك وشفتك قد مااقـدر جميـل
على حدود النظـر والعجـز والاقتـدار
كنت فعيوني على حد البهـا المستحيـل
فعين بدر الدجى وفعين شمـس النهـار
استكثر الحب فعيونك ولـو هـو قليـل
واستصغره في فؤادي لو جروحي كبـار
انحت من الصمت كلماتي وروحي تسيل
على الورق واشعل لك الدنيا حروف نار
مااقول كان لعيوني عن عيونـك بديـل
لكن مثلي اذا ماحـب .. حـب بقـرار
لو قلت للقلب لاهـب الهـوا لا تميـل
ما مال يمك ولو آخـر جـداه انكسـار
اختر لنفسك انا اخترت الطريق الطويـل
بعض الخيارات ماتتـرك لنـا الاختيـار

نــجــم
08-04-2011, 01:37 AM
ــــــــــــــــــــــــــــــــــ
العذر مكتوب
ــــــــــــــــــــــــــــــــــ


العذر مكتوب لاصـار الخطـى مقـري
اسف على ضحكتي اسف على احزانـي
خطـاي معـذور والا غلطتـي عـذري
ومرارة العـذر فـي قلبـي وبلسانـي
مدرى وش اللى ذكرته وضاق به صدري
مدرى وش اللـي نسيـت ولاتناسانـي
لبست انا ثـوب لا طولـي ولا قصـري
يا طيبة القلب .. وين القلـب ودانـي.؟
سنتين من عمرها مرت ومـن عمـري
سنتيـن احـس الزمـن فيهـا تعدانـي
سنتين مرت حياتـي مـن ورا ظهـري
والحب سجنـي ومسجونـي وسجانـي
والشعر مطرود من قلبي ومـن فكـري
سنتين ماني بأنـا مانـي بحـد ثانـي
غنيت للنـاس والدنيـا علـى خبـري
والشعر في دفتـري مغـرور وانسانـي
غنيـت للحـب يـوم عيونهـا تغـري
يـوم الوفـا والكـلام الطيـب ألحانـي
غنيـت للدمـع يـوم أن البكـا كبـري
واليوم أنا اكبر من دموعـي وحرمانـي
اليوم ماعاد يمدي اللـي جـرح يبـري
مليت من كثـرة خطاياهـم وغفرانـي
مليت أنا الشعر مل الشعر من شعـري
مليت انا الحـب مـل الحـب وجدانـي
ليه أنكسر بالعيوةن اللي تبـي كسـري
ليـه اتغـرب ورا حزنـي وكتمـانـي
العيـن ماتستحـي والوجـه مايـذري
ماعاد يجزي هل المعـروف بإحسانـي
لو هي عليّه عزيز النفس من صغـري
ما أشاور القلب فـي كرهـي لعدوانـي
إن رحت ياكثرهـم وإن جيـت ياكثـري
ضاقت بي عيونهم لـو كنـت وحدانـي
تعبت وازريت .. ما مليت مـن صبـري
ليت الذي راح منـي كثـر مـا جانـي
أحيان ودي أطيـح مـن التعـب وازري
وتشيلنـي عزتـي وسلـوم جدانـي..

نــجــم
08-04-2011, 01:38 AM
ــــــــــــــــــــــــــــــــــ
صمتي وجعني
ــــــــــــــــــــــــــــــــــ


بالله ياراعـي المناقـيـد دعـنـي
مانيـب تاجـر والقصايـد بضاعـه
حـرام اعـوَد واتبـع اللـي تبعنـي
وحرام اقول ازريت عقب استطاعـه
سكت لين اونست صمتـي وجعنـي
وجمال شعري زاد صمتـي بشاعـه
والشر سيف(ن) ماقطعته .. قطعنـي
والخير في قلبـي شعـور وقناعـه
والطيـش يامـا للمكاسـب دفعنـي
والصبر في بعض المواقـف دناعـه
وان قلت .. انا باقول .. واقول واعني
بالقول طلت اللي يعسـر الشجاعـه
انـا نفعـت الشعـر لـو مانفعنـي
ماخلف هذا الجوع غيـر المجاعـه
شعري شعوري صانعـه ماصنعنـي
الشعر عنـدي روح قبـل الصناعـه
عندي تساوى مدحهـم لـي ولعنـي
جمع(ن) عسى مايجتمع له جماعـه
كان النسـب عـن الـردا مارفعنـي
ساويت في طيب النسب والوضاعـه
وان كان قلب اللـي احبـه وسعنـي
ماهمني ضيـق الزمـن واتساعـه

نــجــم
08-04-2011, 01:38 AM
ــــــــــــــــــــــــــــــــــ
جيت هارب
ــــــــــــــــــــــــــــــــــ


جيت هارب تطاردني الهجوس
وكـل شـيٍّ جميـل ٍ كبّنـي
يا حبيبي وانا خوفي ضروس
أطو رمشـك علـي وخبّنـي
ريح عينك ملت عيني طعوس
والبكا في حشـاك يصبّنـي
كم تعذبت في فهـم النفـوس
من كرهنـي يقـول يحبّنـي
وكم حلمٍ تغربلـه الهجـوس
وانت حلمٍ طفى ثـم شبّنـي

نــجــم
08-04-2011, 01:38 AM
ــــــــــــــــــــــــــــــــــ
اطاحة فأمريكـا عمـاره
ــــــــــــــــــــــــــــــــــ


أنفض كلامك عن غباره
صمتك فقلبك له رنيـن
قلبك ماكـان إلا مغـاره
ترسم بها جرحٍ حزيـن
رسمٍ نقشته في حجـاره
يشبه رسـوم الأوليـن
ياوجهٍ أخجل من وقـاره
حلو النبا سمح الجبيـن
ربح الزمن هذا خسـاره
والخافيـه باكـر تبيـن
طاحة فأمريكـا عمـاره
هزت ديـار المسلميـن
منها بدت حرب الحضاره
حـربٍ تـروع الآمنيـن
ماتاسع الجرح العبـاره
ويضيق فالصدر الآنيـن
أصعب من الموت أنتظاره
والأصعب العيش المهين

نــجــم
08-04-2011, 01:39 AM
ــــــــــــــــــــــــــــــــــ
الكتابة نوح
ــــــــــــــــــــــــــــــــــ


توجعت فـي صمتـي لأن الكتابـة نـوح
نسيت القلـم والا القلـم صعـب ينسانـي
ما بين أفضحك مستور والا أسترك مفضوح
بكى دفتري يـا قاهـر الصمـت وابكانـي
أبيعك بليلة غـاب عنهـا القمـر للبـوح
ويشريك مـن نظراتهـم طـول كتمانـي
أعلي جروحك فـوق لا طيحـوك جـروح
وانزلك وإن ضاق الفضاء فيـك وجدانـي
أنا من معاذيرك وأنا المخطـي المسمـوح
ومن قبـل تخطـي طالتـك يـد غفرانـي
خطاك البحر يا عذب منك الخطـأ مملـوح
خطاي إنـي الغرقـان والمـوج يجفانـي
لك الضحك ما دام الليالي عتـب ومـزوح
ولي الدمع لا غابوا عـن العيـن خلانـي
كتبتك وكني نازعك مـن حشـاي الـروح
قريتـك ولكـن الـورق فيـك مـلانـي

نــجــم
08-04-2011, 01:39 AM
ــــــــــــــــــــــــــــــــــ
حبيبي لاتعاتبني
ــــــــــــــــــــــــــــــــــ


أنادي لك وأنا لو تاقف جروحي علـى الأبـواب
أبسهر مع سوالفنـا وابنسـى بالسهـر ليلـك
أنا مليت عذري واعذري يـا أجمـل الأحبـاب
تعـب دمعـي ينـادي للبكـا ويـرد منديـلـك
ذكرتك والحشا نصفه عرب ساحل ونصف أعراب
تماكنت المراكب قلـت أببحـر وامكنـت خيلـك
هنيّك يا الصحاري وإن ضميتي ما يموت تـراب
هنيّك لو يموت الطين مـا هـد الظمـا حيلـك
هنيّك يا السحايب وإن بكيتي ما لحقـك عتـاب
وأنا للدمع فينـي مثـل لـلأرض فـي سيلـك
أحبك والسما تمطر أحبـك والجـروح أعشـاب
أحبك يا سحابـة روّحـت والأرض تبكـي لـك

نــجــم
08-04-2011, 01:39 AM
ــــــــــــــــــــــــــــــــــ
سكت .. والشعر يصرخ
ــــــــــــــــــــــــــــــــــ


خطا..خطا..صح..لكن صح ماهو صحيح
حسبتها الف مره.. والف تطلـع خطـا
الصمت شاهد على قبر الكـلام الذبيـح
كانت عيونك فشق بندق وشعري قطـا
سكت..والشعر يصرخ والقصايد تصيـح
والقلب عاري وانا صمتي فراش وغطـا
لوبعض الايـام مرتنـي بوجـهٍ فليـح
جتني الليالي تشيل الجرح حتـى سطـا
ياليتني قبل اعرف اركض تعلمت اطيـح
لاجل اتقي شر عثراتي واعـاف الوطـا
ياليتني قبل اعرف اتعب عرفت استريح
عشان ماتوجع دروبـي ثقيـل الخطـا
جيتك جريح الكلام وكان صمتك جريـح
بين المجاريح ماحاجة دخـول أو سطـا
تدري وش اللي عجبني فيك غير المديح
تنسى التفاصيل في كذبك وتنسى العطـا
خطاي مايستره صمتك وعذري شحيـح
وخطاك ماتدمحه وحشتك عقـب البطـا
هذا انت ناسي من انت ومابقى للصحيح
الا اني ارجع وانا جيتـك وهـذا خطـا

نــجــم
08-04-2011, 01:39 AM
ــــــــــــــــــــــــــــــــــ
لاحرام اكرهك
ــــــــــــــــــــــــــــــــــ


لا حرام أكرهك وانت الحـلال الحـرام
ليـه احملـك ذنـب الحـب وذنوبـي
ليه أجي كارهٍ نصفي وصوتـي هـدام
احفر عيوب غيـري وادفـن عيوبـي
ليه أناديك حلم العمـر تحـت الظـلام
وانت وجـهٍ تلاشـى فيـه عذروبـي
عيبك إنك تشب النـار بـرد وسـلام
ما تقول احرقـي يـا نـار محبوبـي
ما حيا الصدق فيك إلا بمـوت الكـلام
ولا رضيت الشروق إلا على غروبـي
قبل اعرف السهر من قبل اعرف المنام
كنت أحبـك وأحـب الليـل ودروبـي
جيت أبكرهك طاح القلب عشب وحمام
والتوى طفل يبكي فـي طـرف ثوبـي

نــجــم
08-04-2011, 01:39 AM
ــــــــــــــــــــــــــــــــــ
هبت جنوب
ــــــــــــــــــــــــــــــــــ


هبـت جنـوب وطـاح بـرد المكاتيـب
وياكثـر ماهـب الجـنـوب وذكـرتـه
يملي حضوري من حضوره وانا أغيـب
ويامـا غيابـي فـي غيابـه حضرتـه
إن جاء مطر صارت له ضلوعي شعيب .
وإن راح ريـحٍ طيـر الـلـى بـذرتـه
جنبت لو مالـي عـن الدمـع تجنيـب
من ويـن ماهـج بجروحـي شعرتـه
واصمتي اللـى صـار بعيونـه عيـب
واجرحي اللـى لـو فضحنـي سترتـه
لـي صاحـب يملـي كفوفـه تراحيـب
لولا الحيـا مـن ضحكتـه ماعتبرتـه
وياصاحبـي ماهـي علـيّ مقاضـيـب
عذروبـي انـك ذخـري اللـى ذخرتـه
عذروبـي أنـك شوهتـك الاكـاذيـب
عذروبـي انـك جـاك طيـب ونكرتـه
إن جيتنـي بـفـراق زود العـذرايـب
اجيـك انـا مـن زود صبـر صبرتـه
للطيـر جنحـان وريـش ومخالـيـب
لكـن يضيـع صيدتـه فـي غبـرتـه
من جزم نفسي يوم..صار الردى طيـب
حلمـي قبـل لايكسـرونـه كسـرتـه
ومن راح منـي قلـت ياعلـه مصيـب
دورت لـه عـذر كـريـم وعـذرتـه
للـي يبـي بعـدي انـا مانـي قريـب
هوماربحـنـي والا انــا ماخسـرتـه
قلبـي خويـي مـا لقلبـي معـازيـب
اللـى حقرنـي مــن رداه احتقـرتـه
رغم الجـروح اللـى بقلبـي معاطيـب
حبيـت كفيـن الـزمـان وشكـرتـه

نــجــم
08-04-2011, 01:40 AM
ــــــــــــــــــــــــــــــــــ
البيت القديم
ــــــــــــــــــــــــــــــــــ


على حد الكلام وممتلي صـدري مطـر وسيـول
وقفت ولا معي غير الورق في صدقـي وخوفـي
وقفت وقلت اقول ؟ وكل ما فيني صرخ بي قـول
وانا وإن جيت اقول اللي ابقوله بحـرث حتوفـي
ابكتب لي قصيدة لا ظلال ولا لها جرة ولا مدلول
واخاف من الكلام يخونني واخـاف لـو يوفـي
ابرسم في الرمال الناعمه خطوه بـدون إرجـول
تسولف للهبايب عـن ذهـاب العمـر ونكوفـي
زماني يزرع في عيني دموع ولا جنى المحصول
أحسبنّـي بكيتـه والحصـى والرمـل مذروفـي
ضميت ومد لي بعض السراب بكفـه المشلـول
ورويت من العطش وأثر الجفاف يبلـل طروفـي
ندهني في عيوني من مهف الشمس صوت وزول
على حد النظر خيايلتهـم ليـن انحنـى شوفـي
وهبّت من شمال وقلـت هـذا بردهـا مرسـول
وحطبت من الضلوع وقمت اشب النار لضيوفـي
هلا باللي لفاني من ورى دربي مـن المجهـول
ابغنّي واطرد النسيان الأسـود واضـرب دفوفـي
في قلبي صمت ليل وخوف خطوة وارتعاش حجول
في قلبي ضحكها وأنفاسهـا ودمـوع معروفـي
في قلبي دبك خيل وهمهمـة فرسانهـا وطبـول
في قلبي برد ليلة وصفها مـا يمـدي وصوفـي
بدا (.....) على اطراف الليالي والحديـث يطـول
وهي في عمرها ليله قمرهـا يوجـع حروفـي
هي من خوفها ذاب الكلام في ريقهـا المعسـول
وانا اجمّع كلامي وارفـع اللـي طـاح بكفوفـي
ومرّينا علـى البيـت القديـم وبابهـا مقفـول
انا والليـل وجـروح السنيـن وطـوّل وقوفـي
روت عيني من غيوم الظلام ونورهـا المقتـول
وانا وإن قمت ابسند شمسها طاحت بها كتوفـي
رقيت اطول همومي لين شفته بالحشـا مذلـول
وابرقـا لا دريـت ان السمـا تتشـوّق لنوفـي
وفي ارض المحال الممحله ما ينبـت المعقـول
وانا راعي مشاعر والهموم تنـام فـي جوفـي
انا ما جيت ابعدل منعوج جيت اعـوج المعـدول
واشب النار بأطراف القصايـد واشهـر سيوفـي
الا يا جرح يا جـرح القصيـدة والظمـا مبلـول
عجز فيك الكلام وكذبتـي مـا تستـر حلوفـي

نــجــم
08-04-2011, 01:40 AM
ــــــــــــــــــــــــــــــــــ
سكر الليل ..وملح الايام
ــــــــــــــــــــــــــــــــــ


بعد عامين جيت وصوتـك حطـام
كنـك اللـي يذكرنـي بـروحـي
شدّ عنك البحر يـا شـط الأوهـام
وألف ساحل يرحب فـي نزوحـي
إنكسر حلم!! لكـن تجبـر أحـلام
لا أنت موتي ولا أنت أقصى طموحي
كنت للقلب.. صرت لحبـر الأقـلام
صرت للناس, وأوراقي , وبوحـي
سكر الليـل كنـت وملـح الأيـام
صرت حزني, وتنهيـدي, ونوحـي
سافر الورد.. من صيف أول العـام
مثل ما سافـرت منـك جروحـي
مـال صوتـي إذا راودنـي لجـام
مـال هـذا الفضـا.. إلا جموحـي
يا النوارس وصوتـك ملـح وألام
البحر راح عـن شاطيـه روحـي

نــجــم
08-04-2011, 01:40 AM
ــــــــــــــــــــــــــــــــــ
لاسمك .. تبسّمت
ــــــــــــــــــــــــــــــــــ


وينك نحل صوتي من الحزن والصم
يا ضحكة الدنيا وضحـك الليالـي
باسمك بكى صوتي وباسمك تبسّمت
للي بقى للحب منـك وبقـى لـي
شفني على كثر الجفا مـا تعلّمـت
لو ما ورا فرقـاك هـذا وصالـي
شفني ذكرتك همت بك كثر ما همت
ما ضاق بك قلبي ولا ضاق بالـي
عن كل عين ما لها دمعتك صمـت
يا عيد قلبي حاجبـك هـو هلالـي
انا حرمني منـك وقتـي وحرّمـت
عقبك اعشق عيونهن يـا حلالـي

نــجــم
08-04-2011, 01:40 AM
ــــــــــــــــــــــــــــــــــ
هذا طريقي
ــــــــــــــــــــــــــــــــــ


هذا طريقي واعرف انه طريقك وجيـت
وانتي بعيدة وانا عـوّدت قبـل السـلام
لو التعب في طريقك كثر ماني مشيـت
ما رحت راجيك لو جيتك ومالي مـرام
لو ما دريتي انا يكفينـي انـي دريـت
احيان ما يشعر القايـل بطعـم الكـلام
لك مني انساك وانهيها وانا مـا بديـت
ما احد يشيل بعيونه نـور يـم الظـلام
كان الجفا جرح بيشيب الزمن ما شفيت
ما طاب جرحي ولو مني يطيب الغـرام
كان الجفا صح ما اخطيتي وانا ما خطيت
ما هو بسلم العرب عيبه ولا هو حـرام
كاني لقيت بعيون الليـل دمـع وبكيـت
مصيري ألقى ورى حبك عيوني وانـام

نــجــم
08-04-2011, 01:40 AM
ــــــــــــــــــــــــــــــــــ
حزين وغريب
ــــــــــــــــــــــــــــــــــ


حزين مثلي وأنا مثلك حزين وغريـب
لاياعسى شمس من مثلك ماهي غاربه
الدرب واحد وأحس انك بعيـد وقريـب
بعيد قلبـك لـو الخطـوات متقاربـه
ما قلت لي شي لكن كان صمتك رهيب
وكان بعيونك كـلام أقـراه وأحتاربـه
لوقلت لي والله ليعثرردي النفس طيـب
تركت لك هاالجمل حبله على غاربـه
ياذيـب يـا بـارز النابيـن يـاذيـب
الطير حول على صيدك وثـم طاربـه
ماهوب ذنب الليالي والزمن ياعريـب
هذا زمـان بـه المستعربـه عاربـه
هذا زمان به الهقـوات دايـم تخيـب
وشلون لاصارت الهقـوات متضاربـه
من لانفعته وهو عندك كريم وحبيـب
كرهك إذا دارت الدنيا ماهـو ضاربـه
يا معيب العيب راعي العيب ما يستعيب
قول اخربت قول من مبطي وهي خاربه
شيقول مثلي ليا ضاق الكلام الرحيـب
في لحيته لاسكت وإن قال في شاربـه

نــجــم
08-04-2011, 01:41 AM
ــــــــــــــــــــــــــــــــــ
تفرق الغيم
ــــــــــــــــــــــــــــــــــ


تفرق الغيم عن راسي وانا مـا شربـت
مابـل قلبـي بمـاه ولا ارتـوى وابلـه
قد شدني لمع برقـه بالسمـا وانجذبـت
ظميان والروح من كثـر الظمـا ذابلـه
ياحارس التيه انت بصفحتي وش كتبـت
اللي قضيت العمـر كلـه وانـا اعابلـه
لو مايقولـون عليـت البكـا وانتحبـت
بس بيقولون مجنون .. الهـوى هابلـه
البارحه كنت احس انـي كثيـر اقتربـت
واليـوم ابعـد وياخوفـي مـن القابلـه
ابطلب العـذر سامحنـي حبيبـي تعبـت
واببتعد عنك لـو نفسـي مهـي قابلـه
عاشرت انا الصدق في دربي واظني كذبت
مره .. وطاح القمـر فالليلـه الحابلـه
ما اقول انا الشعر لكني اقول ان ذهبـت
بيذكر الشعر في النسيان من غـاب لـه

نــجــم
08-04-2011, 01:41 AM
ــــــــــــــــــــــــــــــــــ
ليله مالها وصف
ــــــــــــــــــــــــــــــــــ


مريت فينا ليلـة مالهـا وصـف
في وصفها ضاقت علـي العبـارة
رحبه جميله ناعمه جوهـا تـرف
مثلك حبيبي واسعدتنـي الزيـاره
فعيونك التحنان وفقلبـك العطـف
رغم السنين وفي سلامك حـراره
نظرتك حب وبسمتك كلهـا لطـف
يلوق لك ثـوب البهـا والطهـاره
من جرحك الأول إلى جرحك الألف
قصيدتـي بيـن الألـم والمـراره
واللي كتب فرقاك ما جاز لي حرف
عقبك ولا قلت افدحي يا خسـاره
اقول في نفسي ورجلي على جرف
إمـا عمـار القلـب والا دمـاره
لا طاب لك جرح ولا منقطع نـزف
والوقت مر وحان رفـع الستـاره

نــجــم
08-04-2011, 01:41 AM
ــــــــــــــــــــــــــــــــــ
وحيد انا
ــــــــــــــــــــــــــــــــــ


وحيد أنا في الطريق اللـي يغربنـي
وحيد حتي من النسيـان وظلالـي
يابنت وش لـي بقـرب ٍ مايقربنـي
القرب قرب القلوب وبعدي اشوالـي
الصمت موحش وأنا شاعر ويرعبني
والصمت مثل الوطا ماهو بمنزالـي
أنا ابتدعت الكـلام اللـي يعذبنـي
ولونت ضحك القلوب بلون غربالـي
وأنا لبست السكوت اللـي يناسبنـي
وجها الكلام وسكت في عيون عذالي
دام الغيـاب أفغيابـي مايغربـنـي
عنك وأنا أزريت لاغيبك عن بالـي
تركت خلفي قلوب النـاس ترقبنـي
تركت أنا كل شي وجيتـك لحالـي

نــجــم
08-04-2011, 01:41 AM
ــــــــــــــــــــــــــــــــــ
الصمت سجن الاحاسيس
ــــــــــــــــــــــــــــــــــ


البارحه غنيت يـا حـادي العيـس
واليوم صمتك عن عيوني حدانـي
اليوم تلعب بي ريـاح الهواجيـس
ولادري عشانك ضيقتي أو عشاني
ما بين لوعات الجفا والوساويـس
البرد ساكـن فارتعـاش المحانـي
وانا حبيس الصمت سجن الاحاسيس
ضاق الزمان ولا وسعنـي مكانـي
والنور طعمه في عيون المحابيـس
مرٍ مثـل طعـم الكـلام بلسانـي
متى بشعري يزهـرنّ الكراريـس
ومتـى بقلبـي يمطـرن الأغانـي
ليت الشعر ماهو كـلام براطيـس
ليـت القصايـد بالدفاتـر مبانـي
والله ليفرق شعر من يرجي الكيس
عن شعر من ينحت صخور المعاني
ويبان فرقي باختـلاف المقاييـس
حتى تحس بصدق وش كثر اعانـي
والا الأماني راس مـال المفاليـس
عزي لمن كانـت جـداه الأمانـي

نــجــم
08-04-2011, 01:41 AM
ــــــــــــــــــــــــــــــــــ
غابت الشمس
ــــــــــــــــــــــــــــــــــ


غابت الشمس وإلا الحزن له مغربه
وين أبغرب وأنا حزني غروبه ثقيـل
مجدبه ياجروحي والسماء معشبـه
ساكنه والهوى ميل جريـد النخيـل
بارده ياحروفـي والدفـاء موهبـه
بارده مثل برد الخـوف والمستحيـل
صوتٍ أبعيد في قلبي ياليـت أقربـه
وبين قلبي ومابيني طريـقٍ طويـل
ليت حزني مثل حزن البشر وأكتبـه
وليت دمعي مثل دمع العيون ويسيل
أشهد أني ردي حـظ وردي تجربـه
وأشهد أني على بعض المشاعر بخيل
أيه مذنب في هالدنيا وهـي مذنبـه
من دفا حلمي الطيب لبـرد الرحيـل
عذري اللي متعبنّـي وأنـا متعبـه
مال قلبي على بعض الهقاوي دليـل
كل طيرٍ له اللـي بالسمـاء يجذبـه
وكل غصنٍ تجوز له الهبايب يميـل
صرت أقول الكلام المـر وأستعذبـه
صرت أخاف الدفاء لوني وحيدٍ نحيل
كم صبرت وليال الصبـر مستغربـه
لين قلة حلاة الصبر لو هـو جميـل
الزمن صعب والنسيان يـا مصعبـه
والدفاتر نشيّلهـا الهمـوم وتشيـل

نــجــم
08-04-2011, 01:42 AM
ــــــــــــــــــــــــــــــــــ
مشي السحابة
ــــــــــــــــــــــــــــــــــ


صحيح أحبك وأنـت والله تنحـب
لكن هذاك احرق فـؤادي وأذابـه
وش غيّر الدنيا وهي جدّها لعـب
وبدّل بشمس الضحك ليل الكآبه ؟
لا اقبل عليّ بضحكةٍ تسرق اللـب
فتحت له قلبـي وشرّعـت بابـه
مشي السحابه لا تريّث ولا خـب
سبحان من خلّى النقيض يتشابـه
لا والذي غيره حشا مـا لنـا رب
كنها مشى والأرض تحته سحابـه
لو ما تثنّى ما دريت الهوى هـب
تـرفٍ يميّلـه الغنـج والذرابـه
تفاح فتنـه فـي محيّـاه وعنـب
أجوع له واضما ضماه وشرابـه
لي عضّ عنّابه وجمر الغضى شبّ
في شفّته قلب البعيد اكتـوى بـه
عين اشقرٍ ما طار صيده ولا طب
ضاقت عليه من الرعاب الرحابـه
حرٍ يذبّ الصيد مـن مخلبـه ذب
في نظرته عز وجمـال ومهابـه
إليا شلع كنّه حجر والسمـا جـب
يهوي بها كن الصعـود انجذابـه
والليل كنّ الليل في شعـر يصـبّ
شلال من فوق المتون انسكابـه
والكلمه اللي بالهوى ما لها طـب
لا انت بسما حبه ولا فـي ترابـه

نــجــم
08-04-2011, 01:42 AM
ــــــــــــــــــــــــــــــــــ
ياحلو صوتك
ــــــــــــــــــــــــــــــــــ


يا حلو صوتك يجي دايم حزيـن وصـدوق
يسكـن بـه البـرد ويبلـل ثيابـه بكـاك
مليان بالود واحسـاس الحبيـب الشفـوق
حنـون مـن أول عيونـك لآخـر مـداك
مليت ظلما الفراق وكان صوتـك شـروق
يا شين بعدك ويا كثر الجفـا فـي جفـاك
بيني وبينك تعـب بينـي وبينـك فـروق
دونك مشاويـري البيضـا وحزنـي وراك
إن طوّلت في عيونـي ممحـلات البـروق
والله لأضحك رضا لو ما اضحكت لي سماك
ظماي يترك على صـدر الليالـي حـروق
وإلا انت تظما ويا برد الظما فـي ظمـاك
شحيح انا فيك لو جفت في دمـي عـروق
اشح في ماك وزروعك واشـح بحصـاك
اقول ابشرب وشحـي فيـك عيـا يـذوق
مرارة النفس فينـي مـا غواهـا غـلاك
هذا قصيدي بكف الريح مـا لـه حقـوق
يا ما ويا ما اخذ منـي ويـا مـا عطـاك
والله لو هو بكره النفـس لألحـق لحـوق
لكنه أنهـى حيـاة الحـزن حيـن ابتـداك

نــجــم
08-04-2011, 01:43 AM
ــــــــــــــــــــــــــــــــــ
رميت الورد
ــــــــــــــــــــــــــــــــــ

.....!!! رميت الورد !!!.....
(رميت الورد .. طفيت الشمع)
مضى عامين
مامر بكلامي دمع
ولا مريتي بعيوني
يا انتي
اي حزن اللي تركتي لي
واي احساس
ياكل الارض
في قلبي .. وكل الناس
وش اللي فيك ماينحب
وش اللي ينكره واكره
تغيب الشمس وتشرق شمس
وبكره لو يجي بكره يصبح امس
مثل ماكان في يوم من ايامنا بكره
وترا اللي حب مايكره
اقول اسمك وينبت للمعاني قلب
وتحضرني اغاني حب
وقول الدنيا لسى بخير
اساميهم تجي وتروح
واسمك مايفارقني
يجي مثل البحر
ويروح مثل الروح
انا ماخترتك احاسيسي
والا خترتي تحبيني
يقلون المشاعر
في سماها طيور
وانا اقول القلوب اشجار
ومن متي كان الشجر يختار
رميت الورد طفيت الشمع
مضي عامين مامر بكلامي دمع

نــجــم
08-04-2011, 01:43 AM
ــــــــــــــــــــــــــــــــــ
لوحة قديمة
ــــــــــــــــــــــــــــــــــ

لوحة قديمة .. حيل
معلقة بجدار
فيها صور ..
فيها صور وغبار :
يدفن ملامحها
وكتابة ممسوحة
وخطوط مجروحة
شدتني هاللوحة ..
بألوانها الصفرا
وقرّبت أنا باقرا
مكتوب فيها فوق
(( لاتنسوا الأسرى ))
ويصرخ بقلبي صوت !!
حزين .. حتى الموت !!
مرت ثمان سنين
من واحد وتسعين
مرت ثمان سنين
وكم مثلها في العمر !!
وكم في الليالي صبر !!
وما زالوا الأسرى
وما زالت اللوحة
تشبه قضيتهم
معلقة بجدار
فيها صور وغبار
يدفن ملامحهم
...
...
يارب ياجبار
يارب رجعهم

نــجــم
08-04-2011, 01:43 AM
ــــــــــــــــــــــــــــــــــ
المطر
ــــــــــــــــــــــــــــــــــ

في ليلة
... والمطر يسبل
..... مطر بلل بحر ليلة
ليلة من بلل والريح مبتلة
.... بها حتى الكلام ابتل
احس ان الغيوم هموم مزن ..... طاح
واحس ان الهموم غيوم حزن ...... لاح
واحس ان المطر
.... لو مايبلل قلوبنا
يغسل شقاء الارواح
واحس الوقت مايمهل
ولا باقي
كثر ماراح ....
واذا كنتي تحبين وتخافين
تعالي نهيم في دنيا المطر والغيم
ولكنك ..... تخافيين ........وتخاافين .... وتخاافين
وعندك شيء تخفينه ؟؟؟؟؟
وانا احب المطر وانت تخافينه !!!!!!
ولا ادري وش سبب خوفك
ولاظنك بعد تدرين .
...
تخافين المطر .... لايبلل ثيابك
تخافين الرعد ..... لايرعب احبابك
تخافين ان لمع البرق في عيونك ..... بان ماتخفين
ابركض في المطر وابتل ....
واذا ارعبك المطر ليلة .....
انا ارعبني الجفاف سنين ....

بنت السعوديه
08-04-2011, 01:44 AM
سلمت يمينك يعطيك ربي الف عافيه

اسمى التحايا

يارا العامرية
08-04-2011, 01:59 AM
صح لسـآنه وتسسلم يمنــآك والله يعطيك العــآفية ..
تقديري ,,

نــجــم
08-04-2011, 02:24 AM
صح لسـآنه وتسسلم يمنــآك والله يعطيك العــآفية ..
تقديري ,,
يسعدني ويشرفني مرورك العطر

تقديري لكـ

نــجــم
08-04-2011, 02:24 AM
سلمت يمينك يعطيك ربي الف عافيه

اسمى التحايا
يسعدني ويشرفني مرورك العطر

تقديري لكـ

صعبة المنال
08-04-2011, 02:12 PM
نجم
أج ــمل وأرق باقات ورودى
لموضوعك الجميل
كل الود والتقدير
دمت برضى من الرح ــمن
لك خالص احترامي وتقديري

نــجــم
08-04-2011, 07:22 PM
يسعدني ويشرفني مرورك العطر

تقديري لكـ