ديوان الشاعره / الراسيه

[نــجــم]

ديوان الشاعره / الراسيه


السلام عليكم

صباح / مساء الشعر العذب
ديوان هذه المرة عن شاعره رائعه و راقيه في قصائدها
هي الشاعره الراسيه
شاعره سعودية
كاتبه من الطراز الاول ، كتبت في عدد من المطبوعات الشعبيه
تعتبر الشاعرة الراسية من أفضل الشاعرات المتواجدات
بالساحة الشعبية ولها مشاركات عديدة
في الإعلام المقروء والمسموع
وقد أقامت العديد من الأمسيات الناجحة داخل السعودية وخارجها .
اسجل اعجابي بهذه الشاعرة المبدعه
واترككم مع قصائدهااا ..

[نــجــم]

لفتة الأعناق
:



الا ياللي تحسبني ورى الشهره ابي انساق
............... انا ما انسقت للشهره ولا شهرتك تغويني!!
:
انا حواء وساقتني على تفاحتك الأشواق
................ ونا ديتك تطعمها 00غريتك وانت تغريني
:
خرجنا للسعير وحتت غصون القصيد اوراق
................ ثمرها جمرة بثت رماد الذاكره فيني
:
لبست من الورق ثوبا يعزز رغبة المشتاق
................ يداري ما يداري من ثمره ان صح تخميني
:
سترنا ما فضحنا وكل ستر يغوي الخفاق
................... تثنينا على عود ثنيته وانثنى ليني
:
انا ما غرني حب الظهور ولفتة الأعناق
.................... ولكن00غرني وقت طموحه ما يساويني
:
غرور الشعر ماهمن ولاهميت له بعتاق
................... ولا همتني الشهره 00وقلب مايداريني
:
حلفت اني ما ازيد اليوم واحد واخلف العشاق
................. حلفت ان فاتني ركبه لامول ليل ياعيني
:
حلفت ان الهوى كذب فعين الراسيه ما لاق
................. حلفت وما حلفت اني اخالف صدق تكويني
:
حلفت ان الشعر فيني مثل قطعة جليد وراق
................ حلفت اني حويت الصدق في شعري ويحويني
:
حلفت اني مع عمري اعيش فلحظتين اسباق
............. حلفت ان ما سبقت العمر لأدفن وانت تبكيني
:
امانه خلني والروح اطوق ظهرها بعناق
................... امانه خلني احيا وعبد الحب يرثيني
:
انا ماودي الشهره واكره ضيها البراق
................ واذا منك بغيت الجد ترى شهرتك تكفيني

[نــجــم]

بنت الفقير


من يذوب في غروره صفاته يا أمير
:::::::::::::::::::::::: طق صدرك للمراجل وذوب والديه


من رحم في ساعة الذنب تجريح الضمير
:::::::::::::::::::::::: يرحمه رب يلبي لعبده مطلبيه


ما ارفع حجاجي باأصلك وانا بنت الفقير
:::::::::::::::::::::::: ساعة الهلكه لفتنا وكلن له يديه


علمو



















علمو





















علمو





















علمو من لا تعلم ترى مالي خشير
:::::::::::::::::::::::: النزاهه في يميني وانا بنت النزيه


ما احني الهامه لعبد وانا ذنبي كبير
:::::::::::::::::::::::: ولو سجدت اسجد لرب يلبي داعييه


ياولد شيخ القبيله ترى فراشي حصير
:::::::::::::::::::::::: والدي لاأمسيت جنبه ثنى لي ساعديه


لا تلحفت بحراير ولا شفت الحرير
:::::::::::::::::::::::: ولا لبست الذهب الأحمر ولاني برتجيه


زينتي ياشيخ ما هي من زكاة الوزير
:::::::::::::::::::::::: ولا ثمنها في زمنا ريال ولا جنيه


زينتي من ربي اللي شفا عبد ضرير
:::::::::::::::::::::::: نعمة ينعم بها اللي هنيه وسعديه


ما اتباهى في جمالي على الجمع الغفير
:::::::::::::::::::::::: لكنن روحي جميله! وشكلي ما عليه!!


ما عرضت السلعه اللي لها شانن خطير
:::::::::::::::::::::::: ولا تغطرست بجمالي على هذي وذيه


ولا نسيت اليوم سلمي0وعرفي 0والسعير!!
:::::::::::::::::::::::: لعنبو من ضاع عرفه ويلعن شاهديه!!!

[نــجــم]

التحدي





يمين الله يمين الله لأعلمك التحدي كيف ؟
:::::::::: واعلمك القصيد شلون يخضع لي وانا بنيه


واعلمك السما وشلون تمطر والليالي صيف
:::::::::: واعلمك المذاهب الأربعه وتبيت النيه


انا بقولها لك جد00ترى ما ينفعك ياحيف
:::::::::: واذا انك انس ياعمي تراني ساس جنيه


انا ما ارد لك شوري وشوري مثل حد السيف
:::::::::: اليا منه بتر يبتر بوقت السلم والهيه


يقولون السما زرقا وانا اقول البحر والسيف!!
:::::::::: بهم نفس الزراق اللي نشوفه بالسما زيه


يقولون الفضا واسع وانا اقول المدى ما شيف
:::::::::: اجل وشلون لا شافو فضاهم للمدى فيه!!


مداي اكبر من وجيه بها كذب ونفاق وزيف
:::::::::: وصداي ارحب من نفوس الرجال وكل نشميه


امد الكف واراهن واعرف صيغة التعريف
:::::::::: مدام ان الوجيه السود والكفين مقريه


وضوحي مثل عين الشمس ما يحتاج للتوصيف
:::::::::: واعرف ان الجهامه عن وجيه القوم مطويه


ترى هذا قصيدي جاك بلا غش ولاتحريف
:::::::::: واذا منك لمست سهيل 00تعال وصافح يديه

[نــجــم]

العطش المتورط بالحلال





اما تموت لظماي00او تشربن كلي
................. والا نتلاقى وكلن يشرب الثاني

كم ليلة ما رشفت الماي ياخلي؟؟
................. يبسن حنايا الضلوع وجيت شفقاني

اهرجك لا متى ياصاحبي0000 قلي؟؟
................. الى متى الموت لا شفتك تغشاني

ياعلقم الحب لا عز الشهد من00لي؟؟
................. وياهمي اللي يهز اعماق وجداني

جيت العب الحب هلي بي وانا اهلي
.............. جيت ارمس شوي واسمع صوتك الحاني

واضحيت واثر الليالي سيفها سلي
................. يامسرع الوقت كنه رعشة اجفاني

وهمست لي بالغرام وصحت لك علي
................. علي ترى الهمس يامضنوني اشقاني

تكفى دخيلك ترى حرم اللقاحلي
................. تعال00غن القصايد بس علشاني

تعال زل الهوى من رعشتي زلي
................. زل الهوى ما تحمل سكرة اعياني

ياخل والله لو انك شارب ذلي
................. يموت قلبك عطش ما يموت رياني

تعااااااال اشرب ظماك0اواشربن كلي
................. خلنا نتلاقى وكلن يرشف الثاني

[نــجــم]

أمي بعد المرض





اماه من ضيم المرض لا تونين
يون قلبي من ونينك ويرتاع

يكفخ بصدري خافقي يوم تشكين
كفخة طوير فالسما فرخها ضاع

اماه دمي ناشف فالشرايين
ليت المرض فيني واسليك الأوجاع

اسهر وكل الخلق ياماه ممسين
اصطفقت نجوم السما في ثرى القاع

يالعنبو حمى تخليك تبكين
ويالعنبو حظ من البين مطواع

افداك انا بالروح ذالحين ذالحين
واحط قلبي تحت رجليك وانصاع

[نــجــم]

بايع شعب الجزيره على شعب العراق





جيت كنك شحة الماي ما بليت ريق
ورحت كنك زاد يوم ولاذقنا مذاق

من ورى عوج الحنايا على قلبي تويق
كنك اللي يفرج الضيق يوم الكون ضاق

التويت بجمرة العشق واشتب الحريق
لين ذاب الثلج الأبيض وراق الموت راق

حالي اللي من عنا الحب ما سر الصديق
شارب كاس التلاقي وافكر بالفراق

يرجفن سهم بقلبي غدا جرحه عميق
رمية من يد (شيخ) كسب رهن السباق

واهنيك في خفوق غدا دمه يريق
واهنيك في عيونن بكت يوم التلاق

آه ياسيد الرجاجيل وش عندي يليق
كان قلبي ماخذنه ولا حل الوفاق

لامتى وانا على الجال مطروح غريق
لا متى ودموع عيني تهامل للعناق

ارحمن يالله عسى القلب من نومه يفيق
ارحم اللي من فراقك على قبره يساق

ارحم اللي مايبي الجاه والأصل العريق
بايع شعب الجزيره على شعب العراق

ما غفت عيني ولا ذقت طعما للمليق
اشهد ان بعدك عذاب وذل ما يطاق

آه ياشحة مزون لها لون البريق
ارعدت فوق الحنايا ولا ذقنا مذاق

[نــجــم]

الى نصائب قبر والدي !!




رحلت ولكنك لم تمنحني الا خمس سنوات من عمري اقضيها معك
لذا كان من الواجب علي ان اناجيك بهذه القصيده بعدما00



دريت اني وحيد بالملا محدن اباغيني
............اخايل في غيابك لهفة المطرود للخوه



يبه اعلم انه لن يوصلني صدى لقصيدتي تدري ليه لأنك رحلت قبل كتابة هذه القصيده بعشرين سنه؟؟؟؟؟



اعزائي النداويه اهديكم هذه القصيده التي عمرها اكثر من خمس سنوات واتمنى ان تنال على استحسانكم00



تخايلي بروق ياعلي قامت تخاويني
.............. تحايلني على المسرى بليل تنطفي ضوه
:
هموم سحبها تمطر ويرعد جوها فيني
....................هلا بالحزن لامنه لفاني صادق نوه
:
نصيتك وادري انك راحل منته مماليني
............... وغترني حظي الخاين بكونن ضاق بي جوه
:
بغيتك يايبه عونن اذا ضاقت تسليني
................. تداويني من جروحن بظهري جات من قوه
:
ودريت اني وحيد بالملا محدن اباغيني
.................. اخايل في غيابك لهفة المطرود للخوه
:
وسريت بعاتم دمعه على خدي يباريني
............ اجر الآآآآآآآآآه من جرحن بقلبي ماشفى توه
:
اهوجس كيف يادنيا مع حظي تعاديني
................... رمادك ماخفى جمرن لهيبه ماكنن جوه
:
على جال الرماد اشكي قريب جا يبكيني
..................... قريب لكنن بيني وبينه يا يبه هوه
:
نساني وسط بيد القيض وشمس القيض تصليني
....................ياليته يايبه داوى جروحي ليته ولوه
:
ياليته ماخذا مني وعودا لو يخليني
................. ياويلي من لظا بعدن ترك في ضامري اوه
:
صرخ في داخلي جرحن صياحه ماينسيني
.................. يجوز بشرعكم قتلي واذا جاز الشرع سوه
:

[نــجــم]

وين يام وين قحطان ومره !




(آآآآآآآه يابخوت)
ضاقت الدنيا الوسيعه في عيوني
واصبحت عندي مثل مثقال ذره

ياصباح الدمع الاسود ياشجوني
بالقدر آمنت في خيره وشره

اشهدان ها.. صدق ماخابت ظنوني
شفت في وقت الضحى كل المجره

واعدوني واعدوني واعدوني
جعل مايبقى لهم ف الارض جره

جعل قوم جاو من دونه ودوني
ماتشوف عيونهم لحظة مسره

هيضوني لعنبوهم هيضوني
بالقصيد اللي غدا فالكبد حره

كل ماواعدت ربع خالفوني
مابقى فالخرج من حلفي مبره

وين ما وجهت يامكثر طعوني
كنها جيش تمركز في مقره

آه يا(بخوت) صوبه ماخذوني
وين يام ووين قحطانن ومره

وين فزعة ربعي اللي مانسوني
وينها بقولها الفين مره

ضاقت فياض الوسيعه وابهتوني
واصبحت عندي مثل مثقال ذره

ياصباح الدمع الاسود ياعيوني
بالقدر آمنت في خيره وشره

[نــجــم]

كذا والا كذا - ترسي السفينه





،،،،،،،،،،،،،، اسئله؟؟؟؟؟؟؟،،،،،،،،،،،،،،


قبل اودي صاحبي في الف سكة وانتفاضه
..................ودي اسأل من سرى بالليل لأطراف المدينه



منهو اللي كل ما غردت يبدي لي امتعاضه
..................منهو اللي كل ما صفقت يصفقني بعينه



منهو اللي لا صدع صوتي يبالغ فأنتهاضه
...................منهو اللي يوم وقف وقف بحلق الضغينه



منهو اللي هاضته دنياي والا الشعر هاضه
...................منهو اللي زعزعه صمت الشفاه من السكينه



منهو اللي فالشدايد ماتحدث عن بياضه
................... منهو اللي يعرف الفزعه ولا ندى جبينه




ليه اخاف الموت والموت الحمر حنا حياضه
................... نارد حياض المنايا والعدو نبتر يمينه




صاحبي ياصاحبي بالله وش هذي الفضاضه
................... علم الجاهل كذا00والاكذا00ترسي السفينه




علم اللي كل مافيهم من الدنيا استعاضه
................... علم اللي يذبحون الصدق ماسمعوا ونينه




علم اللي لاهرج ماغير يبدي لي اعتراضه
................ والله ان يبطي 00ويبطي 00لين يصبح لي رهينه

[نــجــم]

(بيت الشعر)





بيت الشعر عنك مانويت بالتوبه
ولانويت أبتعد عن حمر الأطعاسي

أستهوي الضو بوجه البيت مشبوبه
وأستهوي البن يحمس وسط محماسي

وأشفق لشوف الغضى يبس ومحطوبه
وشوف الدلال الصفر يبري تعوماسي

وأفرح بقرم(ن)يكر النار في ثوبه
وريحة غضاها يرد الروح لأنفاسي

وأسعد بشوف الحلال وحزة غروبه
الى ضوت للعشا تقرع بالأجراسي

والبل تبغي العشا ترغي ومشعوبه
والراعي اللي مع الحيران محتاسي

يازين شوفة نجوم الليل مصحوبه
مع بدرها اللي ينور عتم الأعماسي

ينعش فؤادي نسيم البر وهبوبه
وريح الخزامى الياهبت بنسناسي

والمهره اللي عسفها العود بسلوبه
من دون سرج ركبها عالي الساسي

وشيهانة للقنص تطلع ومطلوبه
تطلع بعيد وغلاها ماله قياسي

بنت البدو شيخة فطنه ورعبوبه
تعوذ من كل شيطان وخناسي

الى لفا الضيف مثل البرق لهلوبه
سيف تصاقل فملعب كل الأجناسي

ماعمرها جات مخزومه ومغلوبه
غندورة والعقل أنفوذه سياسي

مرغوبة حيل ايوالله مرغوبه
من مجلس النشامى فيه جلاسي

يا نار أكلي حطب00 ماعندناتوبه
حنا بدو دايم نمسي فالأطعاسي

[نــجــم]

اشرب من البحر هذي زبدة أخباري





الوعد باكر اليامن هزك الطاري
........... وترياقك المر مره من معاليقه

الوعد باكر وحانت لحظة ابحاري
................ الله يعوض خفوق قل توفيقه

اشرب من البحر هذي زبدة اخباري
............ ولي مع الليل لاخان بمواثيقه

لاغرك الصبح ليل البارحه عاري
......... والغيم الابيض زمانن مابلع ريقه

اعكف على الشعر ردد جملة اشعاري
.............. وصل نذرته حرام حل تفريقه

يطول فيك المدى ماتلحق اعذاري
............. الله خلقنا ويفرق في مخاليقه

ودعتك الله بعينن رمشها ساري
............. الحر لامن كفخ ماسبقه يعيقه

يامضرم النار منت الصادق الضاري
...........0.ودعتك الله بقلب ماهوى الضيقه

الفارس اللي لفاني بيح اسراري
.......... اموت واظمأ لشوف الجمره تريقه

اموت لاذاب ثلجه من لظى ناري
............ بدرا لمع بالظلام وحل توثيقه

الوعد باكر يجيبك صوت جهاري
............. لاغرب القرب صوتك عز تشريقه

الوعد باكر وباكر مالكم طاري
........... وترياقي العذب عذبات معاليقه

[نــجــم]

زند الرجوله !!





تثير بي الجنون وانتثرلك شوق ياجدي
بي المحاني واحترق كلي على شانك


على زند الرجوله واقفه ياشيخ من قدي؟
0زهيت بميزة ذلت شموخك لي وعصيانك


ابا اصوغ القصايد لك بلاحد ولاردي
وابا اسوق الركايب لك تهز ركاب وجدانك


سيوفك كلها( حكلى) واناعيوني لهاحدي
ورى ماتسنن سيوفك وتطلق صهوة حصانك ؟


ابتحداك ياجدي وابيك اليوم متحدي! 0
على جمع الملا ف ظنك من اللي يكسب رهانك ؟


انا غندورة ماللغرور فداخلي حدي !
وعلى عرش العناد اطلب تمرجحني بميزانك


انا جامح ولا صخيت لأطلق فارس سدي
0ولازعزع شعاع النفس يالمجنون هجرانك !!


انااسمي الراسيه ياللي على السادات متعدي 00
ولو طرفي دنا لمثلك يحطم شامل اركانك


انا اسمي الراسيه غصبا على من كان هو ضدي؟؟
00وابي تعرف ترى ساسي يزعزع ساس جدرانك


نثرت اغلى سيوف الموت تسجد لك على خدي
ابي ترفع لي الهامه واعلي ف الملا شانك


انا ودي اسوق الهجن لعيونك وما ودي
00اخاف ضعونهم تشغل عن الشعار شيطانك


انا من جدي احيا بك واحيا فيك من جدي
واموت ان ولعت ذروة جناني ذروة جنانك


ابا اسرح جنون العشق00 اشد خطامها شدي
0واشب اقصا ضلوعي لك وابحرقهم على شانك

[نــجــم]

البركان الثائر يعارضني






قام عجمي(ن) مافعله باللحوني
الشري بأعيون عدوانه يذره


كل كائد عند ابن عمش يهوني
غاص غبات البحر ثم جاب دره


من رجال(ن)تنثني دون الظعوني
ومن فزع للراسيه لله دره


والقبايل مثل همال المزوني
من سهل صنعاء ايلين جبال حره


اخذي العنوان والا التيلفوني
قلتها وانتي يابنت العم حره


فزعتي ماهيب كشار السنوني
فزعتي فيها المسره والمضره

للذين يبهتون ويظلموني
الله الخلاق ماشي(ن) يغره

كانها بالدين سددنا الديوني
وكانها بالجاه مره لاتشره

السهر شوفيه بأطراف الجفوني
ناصحش مبحوح صوته لو يجره

طي حالش مثل طيات الشنوني
راسيه وانتي على رايش مصره

وقلبش اللي من بعض ناس امغبوني
الصبر حلوه يجي من بعد مره

مانشيل الرأس من فوق المتوني
وكل قلب(ن) ماكشفنا ويش سره

فزعتي ماهيب كشار السنوني
فزعتي فيها المسره والمضره

[نــجــم]

أحس إنه غبي




رحت ادور في وجيه عداي للخوه صديق
لين ضاقت بي يميني .. ومليت تعبي

أحسبني لاتعزويت بلقالي رفيق
لارفيق .. ولاعدو.. ولاحتى صبي

آه ياثقل الخطاوي على ذاك الطريق
طحت من طولي على الدرب الأمحق بركبي

للزمن مبدا ومبداي ما أظنه يفيق
لعنبو مبدأ الصراحه احس انه غبي

البحر تحت السفينه وهي شبة حريق
والسما تمطر وذا الغيم مافاد لهبي

والحياة وفلسفتها وفزعات الفريق
علموني كيف الأجناب تطمع في عنبي

(يامضاوي يامضاوي) يازفرات الشهيق
ماحدن غيرك اليا راح يبكيه هدبي

من خلق وجه الليالي وانا مالي شقيق
غير حزنن لالفاني تلقاني يحبي

قمت البي لالمحته واذا اقفا اضيق
ضيقة اللي شايف الضيم في وجه أعربي

ولالفاني فز قلبي مثل فزة عشيق
جا يرحب بي وانا اموووت لاقال ارحبي

ارحبي يالعنبو الموت فعيون الغريق
يهبي شعرن يخذلك وانا حي يهبي

الشعر لوهو مقيد بفكه لك طليق
والرسن بيديك وانتي تمني واطلبي

اقسمي باللي خلقني وبالبيت العتيق
والا فريها على ( مصر) وحياة النبي

اني بحضرة جنابك اذا جيتي اليق
والا فضيها.. وقولي قطيعه وش تبي؟؟

وأهجريني يضرب الحب والجرح العميق
هجرة اللي ماوفا لي ولا طال شنبي

احسبني لاتعزويت بلقالي رفيق
لارفيق.. ولاعدو ..ولاحتى صبي

من عرفت الدمع الأسود وانا حزني صديق
لعنبو حزنن اليا طحت ماوقا ركبي

[نــجــم]

مليون بالميه




مليت وأنا أنتظر ودي وماودي
مليت من كثر ما أحدك على الجيه

يافاهيا والهجر ماهوب من جدي
تو الهجر تو مابانت مواريه

يوم أمطر الحب قلبك واقف ضدي
زعزع نفوذ الغلا وأشعل محانيه

راح الغلا لعنبو جدك على جدي
يالعنبو الحب واللي يجيب طاريه

حدن عليك الزمان وحدني حدي
الين ضاقت وسيعات الخلا فيه

بتعود الأيام كان الضيف ماشدي
وبذكرك طال عمرك كان أنا حيه!!

يوم أطلق الريح قلبي جيت متعدي
تصدع بوجه الشمال وتدفن الميه

أرتد ذودك وذودي عنك أرتدي
وأقفت تدرهم مجاهيمك على الفيه

ياااامخبلك كيف عقب الصد متحدي
خسااااارتك راجحه مليوووون بالميه

أربق جنون الكبر تمسي على ردي
خل الليالي تغني جنونها ليه

قد لي سنه والوجع ثوبه على قدي
بشق جيب الوجع وأصبر على الكيه

ياكود طفل الوفا يستر على سدي
وأقول ولى زمانك لعنبو بيه

[نــجــم]

خوار الذاكره





مشاريه العتب .. في داخل عيونك سوالف ليل
أحس بزفرة أنفاسك .. على غيابي تعاتبني

أحس أني من أشوفك.. من أشوفك.. قليلة حيل
وكل أشواق هاالدنيا.. اذا شفتك.. تشربني

حبيبي..كل مافيني ..من أحساس الغراااام يميل
مثل غصنن ثنته الريح ومال..ومال.. وأتعبني

تخور الذاكره..وأشبك حروف أسمك مع التهليل
وأتمتم..في حروف أسمك ..حبيبي لاتعذبني

وأحس بصدق نبضاتك..قريبه من خفوقي حيل
واليامنهاأختفت نبضه.. من النبضات ترعبني

تبعثرني.. ولا أبالغ..أنا أتبعثر من التسبيل
بمعنىأصح..أبعلنها..أبدويها.. تذوبني

ويظهر في قواميسي ..كلااااام ما أظنه قيل
واليا منك تهجيته ..على شفاهي ..يأنبني

أتووووووه فعالمك طفلن.. يتووووه فعالم التقبيل
وأغيب ..وليت هاالغيبه ..عن اللقيا تتوبني

أعود وأحسب ذنوبي .. وأراجع خطوة التسجيل
وأتوبك.. قبل هاالكادر..وأخاف الذنب يغلبني

حبيبي.. بعترف .. لحظه..أنا ماني ثماااار نخيل
أنا مثل النخل بااااااسق ..وشموووخ النخل.. يعجبني !!!

[نــجــم]

العالم الثاني





بنفيك من عالمي للعالم الثاني
وأياااااااك تمشي على الجره وتتبعها

في ذمتي ماربح منهو تحداني
والشرهه اللي تجي من دارك اقطعها

نذر علي ما اصافح كف عدواني
كف تهين البنادم ما أطاوعها

عزيت نفسي وعمر أبليس ما أغواني
والحمد لله احشم النفس وأرفعها

بعض الحكي ماتمره طبلة آذاني
أعز أذني عن الزله ولا أسمعها

حتيش لاصرت يا أبن الناس قوماني
ياجعل عين بكت تبكي مدامعها

عشرين عام ترى ما احتجت لأخواني
ياجعل (نجلاء) على الفردوس مرجعها

الطيب ورثي وطيبي طيب جداني
أن أثمر الطيب.. والا.. باتجرعها

أصلي عن الناس يابن الناس اغناني
وسود الليالي تراها تمر ما أسرعها

وان مر بي غالي والا تعداني
أضحك.. وأقول النفوس السود مقلعها!!

وان غابت الشمس ما تشرق علشاني
وان أشرقت في غيابك قلت: ما اروعها

وان سقت ذودي على دارك ووداني
قسمت باللي خلقها اني لاودعها

ولو أن كل الأوادم (تيك) تجفاني
وانا على حق ذا من طيب منبعها

من جد أبنفيك..رح للعالم الثاني
واياك تمشي على الجره وتتبعها

في ذمتي..ماربح منهو تحداني!!
والشرهه اللي تجي من مالك أقطعها

[نــجــم]

وين أقفي بس وين !





المسا بارد.. وجمرك ما يدفي
والليالي سود.. ودروبي صعيبه

والقراح اللي حسبت انه يكفي
شحت أيدين تجيبه من قليبه

يبست شفاهي.. وحظي مايوفي
والغدير ان ما سقاني ويش أبيبه؟

ليلة كان اللقا ماهو بشفي
جا يعاتبني على قلة نصيبه

كل ماونيت منه قال قفي
وين اقفي بس..؟ ياكبر المصيبه

البلا ماكل موجوع يخفي
خاصة لاجت جروحه من حبيبه

والوسايد دمعها عيا يجفي
والشتاعيا سحابه عن شعيبه

يوم ذقت المر قال:القلب عفي
آآآآه والدنيا ظواهرها غريبه

الشتا قارس .. وقربك ما يدفي
والليالي سود ودروبك مريبه

[نــجــم]

تعود الزلات





حت الغلا.. وأستنزف القلب تصريح
ذابت معاليق الغلا.. والغلا ساح

تعودوا الهفات. قوم مجاريح
تعودوا الزلات من كل جراح

ياطير ياللي عذبتك الملاويح
والجو: شعف . وبرق . وأمطار. ورياح

ياطير بشر من يريد التفاريح
انك علي أبعد من الصين لرماح

ياطير وش حد العيون الذوابيح
تبكي خبر موت الشهامه ب(صياح)!!

يوم الظمأ يسقي عيون التماسيح
أبتلت أرياق العذارى ل(مزاح)!!

ويوم الوله له في حناياي تلويح
صار الهجر مابين مضوى ومسراح

لاغرتك دنيا الفرح والتمازيح
فالقلب كنه بين أصابعك مسباح!!

ياورد.صار الشرب منك شلافيح
ياعزتي للهيل 0والبن لافاح

يومه ورد داري أركاب مشاويح
أسقيتها لين الظمأ منها أنزاح

حنا نصون أهل الوجيه المفاليح
ومن صاننا لو عاند الوقت ماطاح

نسرح اللي بايع الحب تسريح
عندي الكرامه رفرفت مثل الأرواح

رااااااح الغلا 0يكفيك ياطير تلميح
أرخصت نفسك والعوض فيك وضاح!!

[نــجــم]

حمد بن راجح






بسم خلاقي اببدا بذو النعم رب الجلاله
صاحب افضال ومكارم كاسية كل البريه

العظيم اللي كريم الطيب من جوده وفاله
والله انه فالسما والخير ياتينا هنيه

الشعر اسرج خيوله والقلم فلة عقاله
والمعاني من خفوقي والنظم شغلة ايديه

والقصيد علوم طيب تحتوي علم بحاله
سردها لو ان يطول ماتحوطه الأبجديه

والشكاله غير والله . غير عن معنى الشكاله
الشكاله في ( حمد راجح ) مواريها قويه

اصل وفصل ومبادي والعلا فخر يناله
عزوة للي تعزوا وانتخى يطلب خويه

وصله للشامخ المعروف واسرد هالرساله
قول بنه ماورد مثله ولابه حد زيه

الكريم اللي عطت يمناه واخفت عن شماله
السخي اللي يحب الجود ويدينه نديه

لاعطا مدة كريم حالف يفني حلاله
كن مابين الحلال وبينه حروب وقضيه

اشهد انه عند عينه صاغر قيمة رياله
مومن ان الله وهب له وهبة عظمى جليه

فاتح بيته سبيل وتارك ماله سباله
لانصاه الضيف لافي ماسأل سبة مجيه

وان شكى ضيفه سنينه او تشكى من لياله
فز ( ابو راجح ) بكبره يابخت من صار فيه

ينهض لضيفه ويفزع قبل لايحط البياله
وقبل لايرتد طرفه يخجله طيب العطيه

كل صعب يجيه مقدور من الخالق سهاله
باذن ربي الطيب عنده والعلوم الأجوديه

أبشر أبشر كلمة له دايم تختم مقاله
قبل لاتطلب عطيتك واستمع لي لو شويه

لو يجور الوقت مره او يطول في الأماله
لاتعداني فديتك دون ماتميل عليه

وكان ماتقدر تجيني والزمن عقد حباله
جيتك لبيتك أخ فزاع مايطلب جزيه

قلت ابمدح طيب كف غرق الكل بهماله
غيمة من عند ربي بالعطايا موسميه

جعلني ما ابكي عليه وجعلني ما ابكي عياله
وجعل روحي دون روحه دام ذا الدنيا مديه

وقلت انا هذي الشكاله. غير عن معنى الشكاله
الشكاله في ( الفهيدي ) غير عن كل البريه

[يارا العامرية]

صح لســآنها ولآهنت نجم ع ايرااادك ..
تقديري ,,

[صعبة المنال]

نجم
أج ــمل وأرق باقات ورودى
لموضوعك الرائع واختيارك الجميل
وصح لسان من قالها وطاب منقولك
كل الود والتقدير
دمت برضى من الرح ــمن
لك خالص احترامي وتقديري

[نــجــم]

نجم
أج ــمل وأرق باقات ورودى
لموضوعك الرائع واختيارك الجميل
وصح لسان من قالها وطاب منقولك
كل الود والتقدير
دمت برضى من الرح ــمن
لك خالص احترامي وتقديري
شاكر لك مرورك الجميل ..

احترامي وتقديري ,,

[نــجــم]

صح لســآنها ولآهنت نجم ع ايرااادك ..


تقديري ,,

شاكر لك مرورك الجميل ..

احترامي وتقديري ,,

[العنيــــدهـ]

سسسلمت يمناك على رووعة الإيراد
يعطيك العافيه
!..❥

[نــجــم]

يسعدني ويشرفني مرورك العطر

تقديري لكـ

[فادي الشلاحي]

سسسلمت يمناك على رووعة الإيراد
يعطيك العافيه
,,

[نــجــم]

يسعدني ويشرفني مرورك العطر

تقديري لكـ

[احاسيس مشتاقه]

ديوان رائع
صح لسان الشاعره
ويعطيك الف عافيه على النقل

[نــجــم]

يسعدني ويشرفني مرورك العطر

تقديري لكـ

[واثق الخطوه]

الله يعطيك العافيه

[نــجــم]

يسعدني ويشرفني مرورك العطر

تقديري لكـ

[منادي]

صح لسان الشاعره الراسيه
اشكرك نجم على التنسيق الرائع
الله يعطيك 1000 عافيه
و
تحية اعجاب لمن يستحق الاعجاب
منادي

[نــجــم]

يسعدني ويشرفني مرورك العطر

تقديري لكـ

[๚ פـگآيـۃ ڦـڷپـے ▪▪]

صح آلله لسآنه..
يسلموآ على آلآنتقآء ذوق والله..
http://www.lamst-a.com/vb/images/smilies/kitty%20(120).gif

[نــجــم]

يسعدني ويشرفني مرورك العطر

تقديري لكـ

[سموالذات]

شكراً على النقل

[نــجــم]

يسعدني ويشرفني مرورك العطر

تقديري لكـ

[الدلوٍوٍعه]

شاعره لها صيتها
صح لسانها ولاهنت يانجم ع الديووان الرائع
يعطيك العافيه

[نــجــم]

يسعدني ويشرفني مرورك العطر

تقديري لكـ

[نجمة الصباح]

http://smiles.al-wed.com/smiles/13/flowers_221.gif
شكرا لك
والله يعطيك العافية
http://smiles.al-wed.com/smiles/13/flowers_221.gif

[نــجــم]

يسعدني ويشرفني مرورك العطر

تقديري لكـ

[شبيه اللول]

ســلمت يداكـ ..ع الطرح ..
لاتحرمنا من جديدك المميز ..
مودتي

[نــجــم]

يسعدني ويشرفني مرورك العطر

تقديري لكـ

[أمـــيرة الـــورد]

http://www.osrah.net/forum/uploaded/1763/51266881541.gif

صح لسان شاعرها ولاهان ناقلها
وبيض الله وجهك على هالقصيدة
تسلم يمينك
مودتي وأمتناني ،،،
http://www.osrah.net/forum/uploaded/1763/41266881541.gif



http://forum.mu4arab.com/images/smilies/smilie14.gif

[ليتني همك]

نجم
تسلم يمينك ع المجهود الرائع
والف شكر لك لي طرحك شخصيه رائعه في الشعر العربي
كل الشكر لك ولي هذا الطرح الرئع

[نــجــم]

نجم
تسلم يمينك ع المجهود الرائع
والف شكر لك لي طرحك شخصيه رائعه في الشعر العربي
كل الشكر لك ولي هذا الطرح الرئع

يسعدني ويشرفني مرورك العطر

تقديري لكـ

[نــجــم]

http://www.osrah.net/forum/uploaded/1763/51266881541.gif


صح لسان شاعرها ولاهان ناقلها
وبيض الله وجهك على هالقصيدة
تسلم يمينك
مودتي وأمتناني ،،،
http://www.osrah.net/forum/uploaded/1763/41266881541.gif




http://forum.mu4arab.com/images/smilies/smilie14.gif

يسعدني ويشرفني مرورك العطر

تقديري لكـ