ديوان الاميره البندري << حزن يتدفق

[نــجــم]

أمومة الأميرة البندري (http://www.n7bkm.com/vb/f89/a-12789.html)بنت عبدالعزيز
حنان تفجر حزنا ً على ابنها سعود..
تفجر قصائد.. تفجر حبا ً لاينتهي
ترسمه لوحات فنية
شاعرية مرهفة
وتقول :


"(( يا سعود ))"

يا سعود كل ٍ بالشعر قام ينعاك
ويبين اخصال ٍ لشخصك حميدة

بالعون حنا كننا ما عرفناك
كل ٍ يسافر يم دار ٍ بعيدة

امنول ٍ يا سعود سلواي جمعاك
تشيل عني كل بلوى شديدة

أنت رحلت و والي العرش ناداك
عساه لك مشتاق صفوة عبيدة

عساه يوم الحشر يا سعود يرعاك
يثقل موازينك ولاجرك يزيده

واليوم انا يا سعود سلواي طرياك
أتابع أخبارك بوسط الجريدة

[نــجــم]

"(( الدمع غار ))"

ليت المنايا وقفت عنك يا سعود
خلتك لين أوريتني في ضريحي

ياليتني حطيت أنا عنك بالعود
وأنت معافا يا جنيني صحيحي

أنت الصديق الصادق الود يا سعود
وأنت الطبيب لقلبي اللي جريحي

أنا أشهد أني عقب فرقاك مقرود
ما أنلام أنا لو كان أصفق و أصيحي

والله لصيحك لين أجاورك يا سعود
والقلب ينحيب والجوارح تصيحي

[نــجــم]

"(( يا عزوتي ليه ؟! ))"

اللي رحل عني بلحظة وأنا أرجيه
وأدعي بعال الصوت مالي مجيبي

لو ينفدا بالروح والله لفديه
أفديه باللي لي بعيد وقريبي

كل ٍ يداوي جرحه اللي سطى فيه
وأنا جروحي كاميه ما تطيبي

يا سعود عني رحت ياعزوتي ليه ؟
خليتني يا سعود قلبي صويبي

أمشي مع المخلوق واللي بي أخفيه
وأسهر طوال الليل وانحب نحيبي

[نــجــم]

"(( جرحي على سعود ))"

إن جيت للبيت قام الفكر يلعب بي
وإن رحت للخرج صاب القلب ولواي

ما عاد أميز وأعرف الجد واللعبي
غديت مثل الخلوج أمشي على فالي

يا سعود هذي تدابير الولي ربي
والعبد ماله عن اللي دبر الوالي

جرحي على سعود ما ينفع به الطبي
وشلون أبسلى وهو دايم على بالي

أحس صوته يناديني وأنا ألبي
يقول يمه نسيتي شبلك الغالي

وِشلون أبنساك وانته ساكن ٍ قلبي
أنته حبيبي وزولك دايم قبالي

[نــجــم]

"(( لين اجتمعتوا ))"

لين اجتمعتوا لدت العين لسعود
قامت تلفت وين قرة نظرها

وين الكريم اللي سلك سكة الجود
كم واحد ٍ نفسه كسيرة جبرها

أضحك وأنا قلبي من الحزن ملهود
وأغضى أذل العين تنثر دررها

رضيت بالمقسوم وأيامي السود
وكتمت نيران ٍ تطاير شررها

أبي رضا رب ٍ كريم ٍ وماجود
علام مافي برها مع بحرها

لعل تجمعني بهم خير معبود
في جنة الفردوس نقطف ثمرها

[نــجــم]

"(( يافهد ))"

كل ماقلت أبا أسلى زاد قلبي جروح
قام يصفق خفوقي مثل صفق الهوى

أتصبّر ودمعي بالذي بي يبوح
لو بغى القلب ينسى يافهد ماقوى

بالنهار أتجمل والصدر به يفوح
مثل بركان يغلي بأنفجاره نوى

لي ضوى الليل أصلي عند ربي وأنوح
مثل مقروص الأفعى لي صرخ والتوى

عقب مظنون عيني يافهد وين أروح
ليتني مت قبله أو قضينا سوى

[نــجــم]

"(( أصفق عليك الكف ))"



أصفق عليك الكف ياسعود وأنوح
مثل الخلوج اللي تردا جهدها

تثور من حزن يحوج الحشا حوج
وقل الجهد ماتنثني منه يدها

طاحت عقب ماقوموها على لوح
خلوج طاول سقمها من ولدها

مثلي وأنا حزني على لبة الروح
جدد على النفس الحزينة نكدها

[نــجــم]

"(( ليتني ))"

من يلوم العين لو هلت دموع
من يلوم القلب لو صفق وصاح

لي حبيب ٍ راح ماطرّى الرجوع
ليتني ودعت زوله يوم راح

آه من قلب ٍ كفخ بين الضلوع
مثل كفخ الطير مكسور الجناح

ليتني وسط الخلا وأعطش وأجوع
ولاسمعت اللي نعى هاك الصباح

ساهرة ياسعود والعالم هجوع
ليت منهو مات قبلك وأستراح

[نــجــم]

الأميرة البندري بنت عبدالعزيز رحمها الله


"(( أنتي الحياة ))"

ياليتني بينك وبين المضرة
من غزة الشوكة إلا سكرة الموت

أو ليت شاورني القدر بس مره
ولبى مطالب رغبتي قبل ما أفوت

أو ليتي لجرة مواطيك جرة
أحمي قدم رجلك مثل جزمة البوت

أو ليت بيديني السعد والمسرة
وأحكم عليها عنك مالحظة تفوت

يفداك عمر ٍ منك يشعر بعمره
أنتي الحياة لنفسي وردة الصوت

[يارا العامرية]

صح لسانها ملآين .. واشكرك نجم ع ايرادك ..
الله يعطيك العافية ..
تقديري ,,

[نــجــم]

شاكر لك مرورك الجميل ..

احترامي وتقديري ,,

[سلطانة]

http://www.halauae.com/uploads/images/alsaher-3814931317.gif

[العنيــــدهـ]

صح لسان شاعرتها
ولاهنت ع الاختيار الرائع
يعطيك العافيه
!..❥

[نــجــم]

صح لسان شاعرتها
ولاهنت ع الاختيار الرائع
يعطيك العافيه
!..❥
شاكر لك مرورك الجميل ..

احترامي وتقديري ,,

[نــجــم]

http://www.halauae.com/uploads/images/alsaher-3814931317.gif
شاكر لك مرورك الجميل ..

احترامي وتقديري ,,