ديوان الشاعر بدر عواد الحويفي الحربي

[نــجــم]

ديوان الشاعر بدر عواد الحويفي الحربي


الشاعر بد بن عواد الحويفي من الشعار البارزين على مستوى الخليج العربي

شاعر ابدع له اسلوبه الفذ شاعر يحب الطير والقنص حتى انه كتب كثير من القصائد عن الطير والقنص

والربيع والبر .

وسوف نطلعكم على قصائدة والتى حصلنا عليها واسمحوا لنا عن القصوور


حربي ولي من فهرس المجد نبراس





سمعت لي كلمه وانـا رجـل حسـاس

كلمـة شجيـع لسـان فـارس حكايـا


ووجهت لـه كلمـه بهـا سـم نـداس

اشتالهـا بـيـن الضـلـوع الحنـايـا


عـن لابـة بـأفعالهـا ترفـع الـراس

دنيـا وديـن ومعـجـزات ومـزايـا


حربي ولي من فهرس المجـد نبـراس

وسلـوم مـن خيـرة سلـوم النحايـا


رغمن على اللي مايبينـا مـن النـاس

ضعاف العقول اللـي جداهـم زرايـا


كذبـان خلـق الله بلاعيـم الانـجـاس

اللـي بهـم تحـت الملابـس كـوايـا


مـا مجدنـا حبـر مزيـف بقرطـاس

تمليـه رغبـات النـفـوس الغبـايـا


يـوم اليديـن تمـد وتحـد الأضـراس

نــرد مــردود الـبـراء للبـرايـا


تشهد لنا عوص النجايـب والافـراس

وشلـف تعلـق بالخصـيـم الهـوايـا


ما نرمي الا لابـس الـدرع والطـاس

اللـي تـذرى بـه خـدور الشـوايـا


وحزنا مناهـل نجـد بالعـزم والبـاس

ماجاتنـا بعـروض مــال وهـدايـا


سقنا الشيوخ اللي على الخيـل فـراس

اللـي يعـشـون السـبـاع القـوايـا


زحول الرجال اللي لهم بالفخر سـاس

حمايـة السـاقـه سـهـوم المنـايـا


علـى النقـا يـوم ان الاريـاق يبـاس

علـى ظهـور معـربـات السبـايـا


ماهي سوالف كـل مبغـض وهـلاس

علـى صحـون مـن الفواكـه ملايـا


اليا شبع راد البخـت طـب مـا قـاس

سيفـه لسـانـه والغـمـاد الشفـايـا


ما أوجس سموم ولا شكى ضيم الاتعاس

بظـلال حكـم محكمـيـن القضـايـا


اللـي تفـوق مجدهـم كـل الأجنـاس

بالسيـف الأحـدب رادعيـن الخطايـا


سواعـد الإسـلام قــاده وحــراس

ويخشـى مهابتهـم غشيـش النـوايـا


سـادوا بحكـم الله وقطـاع الأنفـاس

اللـي يخلـي عظـم الأعـوج شظايـا



ملـوك يفـوق قياسهـم كـل مقيـاس

وعمـت مكارمهـم شعـوب ورعايـا

ال السعود اللي بهم عطـف وإحسـاس

ومن محكـم الفرقـان معهـم وصايـا


تخضع لهم روس بهـا زوم وعطـاس

ونفـوس مـن وضـع العدالـة طنايـا


ولولا العدالـة تـردع العـي بركـاس

تجـاوز المغـرور سـور الحجـايـا


الله يعـز اللـي لـلإسـلام حــراس

اللـي علـى التوحيـد فيهـم حمـايـا


اللي لهم فـي قمـة المجـد مجـلاس

ورفرف علمهـم فـوق مـدن وقرايـا


راياتهـم تلفـح علـى روس الأقـواس

رمـز الجلالـة فـوق عـال البنـايـا


قيادنـا لـصـار للحـبـل مـسـاس

وحنـا بخدمتهـم جـنـود وسـرايـا

[نــجــم]

لا تازن الرجال






لا تـازن الرجـال لاشفـت زولـه

وزن الرجال أعقولها يا فتـى الجـود


دلايـل الـرجـال فعـلـه وقـولـه

تحكم عليـه بمنطقـه علـم موكـود


ما ينفـع الرجـال جسمـه وطولـه

لا صار ما يدري عن النقص والـزود


كسب المعالي مـا يجـي بالسهولـه

يصعب على اللي ما يجامل على الكود


المجـد عشـاق الكسـل مـا ينولـه

دربه على اللي يجهل الطيب مسـدود


وحفظ الشرف مبدأ صفات الرجولـه

والمتزن ما هـو علـى درب منقـود


ومرافق الجهـال يـا بـن الحمولـه

نقص ٍعلى السمعـه وتعقيـد وعقـود


كـل ٍجليسـه يقتـدي فـي فعـولـه

المعتدل واللي عـن الخيـر مصـدود


ومع الأسف بعض العقـول معزولـه

مـا تقـل بالدنيـا لهـم رب معبـود


ما خافوا المولـى وطاعـوا رسولـه

اللـي لـه العبـاد خشـاع وسجـود


مـا حسبـوا يـوم ٍحسابـه وهولـه

يشيب راس اللي هاك اليـوم مولـود


يطـرق منافيـذ الخوافـق ذهـولـه

يوم الحساب اللي به العبـد موعـود


بأخـر نفـس لانوخـت بـه ذلولـه

يـوم التفاهـم بيـن ناشـد ومنشـود


عند الضريح أخـر محطـة نزولـه

النفس تصعد والجسـد مرتـع الـدود


يأهل العقـول المبصـرات احسبولـه

ترى الحياة بلا عمـل مـا بهـا فـود


اعمل عمل واطلـب مـن الله قبولـه

منهج طريق الخير واضـح ومحمـود


دامـك نشيـط وكـل شـي ٍتنـولـه

ترى السفر له حد والعمـر محـدود

[نــجــم]

ياللي في غيابي تكلمت





يا رجل ياللـي فـي غيابـي تكلمـت

علمك علـي بالـي ورمـزك فهمتـه


ياللـي بحجـه مستحيلـه توهـمـت

حولت حظـك وسـط بيـر وهدمتـه


سيلك تدفـق مـن شفـاك وتخرمـت

ليتك عن اللـي مـا استحقـه ردمتـه


وأن كان هادف لك هدف يوم هاجمـت

العقـل شـوري والتزامـك بصمتـه


وكان الجهل سيطـر عليـك وتقدمـت

ماظـن يثبـت قولـك اللـي زعمتـه


وأن ضعت مع طيش الطواري وهايمت

بركـت للحـق المصيـب وغرمتـه


غادي وخيّـل لـك خيالـك ورهمـت

وسم الحنيش لـو تلحسـه ماجغمتـه


غروك نـاسٍ مـن نسمهـم تسممـت

واللي عطى الله لـو تبـي ماحرمتـه


انصحـك وإلا ماعلـي لوتقحـمـت

دام أحتمـل زلـت رفيقـي حشمتـه


ونصيحتي وجهة نظـر مـا تغيشمـت

شبحي بعيـد ومـن غـدا ماغشمتـه


شبحـي بعيـد ولاأستعديـت نظمـت

والشوك لاجاء فـي طريقـي دقمتـه


وليـا بغيـت أهـدي هديـه وقسمـت

ماهـس بالميـزان قـسـمٍ قسمـتـه


أنـا ليـا منـي بالأوضـاع ساهمـت

أصـوّر الواقـع نـظـر لارسمـتـه


ماني غشيـم مـن التجـارب تعلمـت

وأن مـال ميـزان القريحـه حكمتـه


لامعنت بأسلوب المعانـي وخاصمـت

خصمي بجـزلات المعانـي خصمتـه


بلحـام سكـرت الملاحـم ولحـمـت

وعلـى منافيـذ المـلاحـم برمـتـه


لاسقت طـاروق القريحـه وصممـت

حذفي علـي اللـي يستحقـه رجمتـه


وبعض الكلام أخير من رده الصمـت

وأن جاء من الجاهل غلـط ماجرمتـه


وعن بعض مانسمع ويهـرج تشيمـت

وسلم الرجال أهل السلـوم احترمتـه


ولو كل ماثـارت عجاجـه تحيزمـت

تهت الطريـق وكـل عايـر صدمتـه


مهما حصل بأسلوب عقلـي تحكمـت

ورأي الحكيـم المعتـدل مـا لطمتـه


لوكان به نـاسٍ توجـه لـي الشمـت

مهمـا يقـال بغيبتـي مـا حلمـتـه


بعض الكـلام اليـا سمعتـه تلطمـت

وفيض المجالس ما أزعجتنـي نغمتـه


طبعي علي تأديب الأخـلاق داومـت

ومن ضاع عن درب السنع ما دعمتـه


لابس حرامي من شفا السيل وأحرمت

والعلـم بالقلـب المفـتـح حزمـتـه


وحقيقـة الواقـع بـهـا ماتحلـمـت

مـن مصـدرٍ ماثـوق سـر وكتمتـه


ان شافهـا وإلا نصيـتـه وسلـمـت

وحددت لـه مرسـام حـد ووسمتـه


ودليـتـه اليـمّـه وبالله تعصـمـت

الا أن تراجع صاحبـي عـن وهمتـه


ظنـه ظنيـن اليـا قريتـه وترجمـت

بالحـق وإسنـاد الوثايـق هزمـتـه


وأن ضاق صدره من كلامي تبسمـت

وأن مد لي كف الرضـا مـا شتمتـه


ماني سفيه اليا أحترك عـود برعمـت

واللـي مجنـب سيرتـي ماعزمـتـه


وان دار دولاب الهواجيـس وأبرمـت

معناي عن نقـد العـوارف عصمتـه


مابعت في سوق الضغايـن ولاسمـت

مـأخطي ومن ميّـل عليّـه خزمتـه


ماأفطر علي تشويه الأوضاع لاصمت

وراس الصديع اليا أعترضني حجمتـه


وبسلوم لزمـات الرياجيـل لازمـت

أسيـر مـع سلـم الرجـال ولزمتـه


وليـا سفهـت التافـهـه ماتنـدمـت

وماعـون خـلاق المشاكـل خدمتـه


وأنـا مـع اللـي يفتهمهـا تفاهمـت

ومن لاتطـرق منهجـي مـا زهمتـه


وأن حدني حـادي قوامـه وقاومـت

سبحت مع مـوج البحـر واقتحمتـه


جهـزت نفسـي للعبـور وتولـمـت

عمق البحر لوهـاج موجـه دحمتـه


وجهتها بيضـاء صريحـه وحكمـت

أحكمت مضمـون الجـواب ونظمتـه


تم الجـواب اللـي نضمتـه وتممـت

والوصل مـن راع البريـد استلمتـه


وصدرتها بأسلوب هـادي وترجمـت

ومن لاظلم نفسـه حشـا مـا ظلمتـه


أدخل علي الله بالخطـأ مـا تذممـت

وحق العبـاد وقدرهـم مـا هضمتـه


وجـو الصداقـه ماسهجتـه ولغمـت

معرض عن الغايب ولا أكـل لحمتـه


ودام أمتلك نفسي عن الظلـم حرمـت

لوكـان تجذبنـي لشخـص أتهمـتـه


لبستهـا ثـوب المناعـه وسجـمـت

وأرجي عسى الجاهل يوطي رضمتـه

[نــجــم]

يا رجل لا تنقل نبا كل نقال



يا رجل لا تنقـل نبـا كـل نقـال

به ناس حتى الميت مـا يتركونـه


والقيل عندي لـه مفاتيـح وأقفـال

معناي ما كـل العـرب يفهمونـه


ولا أقول أنا زايد على كل رجـال

كم واحدٍ ما يقصر العـرف دونـه


خص الرجال اللي يجيدون الأمثال

البيت عـن معنـاه مـا ينقصونـه


أخص لي ناسٍ يحوسون الأقـوال

البيت لو هـو معتـدل يكسرونـه


لو هم كبار أعمار بالعرف جهـال

ومن عمي قلبـه ماتفيـده عيونـه


وان شفت لي شخص خيالي وخيال

ما اشفق عليه ولا تدخـل بشونـه


ينبيه عن حظه تواريـخ الأجيـال

يجهل خبـر والنـاس مايجهلونـه


يشوف نفسه وين ما مثلـه أمثـال

ترميه بأحضـان الجهالـة ظنونـه


والناس تعرف بالطبايـع والأفعـال

واللـي تعـزه سمعتـه يمدحونـه


والماء يجيبه عذب ويجيبه احثـال

والكون به من كـل كايـن نمونـه

[نــجــم]

الله مـن قلب هجوسه تمله




الله مـن قلـب هجـوسـه تمـلـه

مـل الغضـا لمبهـرات المباهيـر


وشوف البراري والفضا ولعـة لـه

لا شفـت بالمنشـا مـزون مزابيـر


يا موتـري ريحتـك القيـض كلـه

أبيـك لا قامـت تطـول المشاويـر


لابـد لـك لا بـرّد الوقـت تـلـه

يحن ماطورك علـى ساقـة الطيـر


في ماقـعِِ بعـض العـرب مايدلـه

مدهـل لفتخـان الرجـال المناعيـر


نبـي لنـا معهـم وناسـه وفـلـه

مع درب مسهاج الوسـوم المباكيـر


ليا أصبحت روس النـوازي مطلـه

عقب الجليد نكّسـر الثلـج تكسيـر


ثم أصبح القرناس من عقـب طلـه

يوجس بجلـده مثـل دق المساميـر


واستطلعوا خطو أشقـر عـادة لـه

حرش الكفوف يمزّر الخرب تمزيـر


والبارحة حل المساء قد حصـل لـه

عشاء خفيف من ابرق الريش تنسير


لا فرعوه وشافهـن وأدرجـن لـه

و أدلج و راع الجمس كفه علي القير


وتضايقن عقب الفضا وأحضرن لـه

وسلط علي وحـده وذْلـكّ مخاميـر


وليا المشبـب عندهـم مزهـب لـه

باللي ندبهـا طيّـر الريـش تطييـر


والخرب طقـه مـا تعـدى محلـه

والثالثـة فـرّت ولا عينـت خيـر


بطيارهـا شفنـا غـيـاره وخـلـه

زمّـت وحوّلهـا ولـي المقـاديـر


أعلق بها اللي عوقهـن سهمـة لـه

شيهان عـوق ملوعـات المعاشيـر


ملموم مثل الصـول طولـه بجلـه

أجرد يصخّر شرد البـرق تصخيـر


وكل ركـض للـي بوجهـه يشلـه

تزارقوهـن بالـحـدود البواتـيـر


أكبودهـم عقـب القـرايـا مغـلـه

تسع الشهور نقـزر الوقـت تقزيـر


وركبوا وقالوا تبّـع الجمـس ظلـه

لاما نقول أوقـف كفيـت العواثيـر


نبـى لنـا خـد مهـامـل امـزلـه

مادوجـت فيهـا الغنـم والمظاهيـر


تلقـى بهـا زرق المعـارف محلـه

بيض الدواغـر متعبـات المداويـر


هذا هوى اللي قـزّر القيـض كلـه

ماشاف غيـر القوبعـة والعصافيـر

[نــجــم]

يـ المنتقد



يـالمنتقد مالك علـى النـاس مدخـال

شوري توقع واقصر الحبـل للعـوج


راجع ضميرك قبل أحطك على البـال

إن كان ما راسك عن الشور مصنـوج


ما دام مكنونـي ورا عجـم الأقفـال

ترى الهروج الفاضية ما لهـا حـوج


حنا عـرب مـا همنـا نقـد الأنـذال

نحمـى كرامتنـا ولا نقبـل الـعـوج


أجواد مـا ننقـص للأجـواد مكيـال

أهل النقاء ماهـي سواليـف وهـروج


ياللي تحيّـل والدهـر فيـك محتـال

هاك الزمان اللي به الوجـه مسهـوج


ايام فيها عشـت فـي خـوف وإذلال

مثل المريعي يسبـر الحـوم ويلـوج


واليوم مـا مثلـك ولا صـار رجـال

وعندك لتحريـف السواليـف كتلـوج


عن جيلنا الحاضر وعن ماض الأجيال

تخفاك عادات العرب وأنت مرجـوج


و إن طعتني تعرض عن القيل والقـال

تراك مهمـا غـرك الـزود مفلـوج


انعم بظـل اللـي لنـا درع واظـلال

اللي يقـودون السفينـة مـع المـوج


قيـاد رايتـنـا صنـاديـد الأبـطـال

أهل السيوف اللي بها السـم ممـزوج


عيال الحرار اللي بها تضرب أمثـال

وإلا أنت لو يضرب بك الوصف فروج

[نــجــم]

طواري




يا مل قلب دق بـه كـل طـاري

طواريٍ بأقصـى الضمايـر تتلـه


وشفق على شوف الفضا والبراري

لا صار معه مشبـبٍ مسنـد لـه


خطو أبلج لملاقف الصيد ضـاري

جدع الضريبة بالسهم عـادةٍ لـه


قـرم بوجهـه للمـروة شـواري

رايـه سديـد وكـل درب يدلـه


ماهو حضيبـي مزاجـه تجـاري

ليا عقـدت الـراي عـود يفلـه


أول نهارك يعجبك ما أنـت داري

مار البـلا تالـي نهـارك تملـه


أبا امدح الطيب ولانـي مـداري

واللاش لا خايف ولا حاسب لـه


الفرق باللي ياصلـون المحـاري

وإلا الردي شرهات مثلـي تزلـه


أبي خـويٍ ضـاريٍ بالمسـاري

ماهو مهيـنٍ يرقـد الليـل كلـه


ومعنا قطامـي يصيـد الحبـاري

لحّاق لا كوبر له الخـرب شلـه


خطو أشقر جثل من الريش عاري

افحـج مخاليبـه سـوات الأهلـه


به دق ريش مثـل دق الخـزاري

مهـدف وراء مناكبـه مستقـلـه


منخر وبوز فيـه عـدة مـواري

يحتار به راع النظر لا فطن لـه


مهـوب كفـاخ طفـوق زعـاري

طلعه حقاق ان شافهن ساوقن لـه


لا شافهـن متطـاولات المـذاري

عقد وحق الطلـع والسيـر تلـه


يحول اللي طار منهـن إجبـاري

ذباح للي يـوم هـد سجـدن لـه


يا زين طلعه بالضحى والعصاري

لا من خشنات الغلب خيشـن لـه


هذيـك والله منوتـي واختيـاري

لو كل من يطلب لزوم حصل لـه


لو إن حظي مع مزاجـي يبـاري

سجلت له صفحة وفـا بالمجلـه


ما لي هدف بالسوق بايع وشـاري

قلبي ذعاذيـع الهـوا ولعـة لـه


انا غرامي مع فجوج الصحـاري

وشوف الرجوم النايفات المطلـه


لا شفت بالريضان نقع وخبـاري

راح الزعل والبسط حـل بمحلـه


بأرض بها للصيد عينـه واثـاري

فيه القطـا تلقـى فروقـه محلـه


مهاملٍ تـردم شجرهـا الـذواري

نبـي لنـا فيهـا وناسـه وفـلـه


يا زيـن شبـة نارنـا بالغـداري

والكيف ابو صالح جلس وارتجلّه


والماء مفوح في نظيف الغضاري

وصفر يجاذبهن على جـال ملـه


وصاحب لهن تقول ماخذ حـذاري

وفنجالهن يجلى عن الكبـد علّـه


واللي على مثلي من الناس زاري

لا سامع قولـه ولا مصغـي لـه


وافخر بحبي للصقـاره وأمـاري

ورزقي على اللي كون الكون كله

[نــجــم]

هوى بالي




ياللي طلبتـم نبـذة مـن قصيـدي

عن واقع المعقول لا انقص ولا أزيد


أنـا غرامـي وانبساطـي وعيـدي

تفريعة القرناس بأرض بهـا صيـد


لا شطب الصيحان روس الزبيـدي

والعشـب جالـه بالمثانـي عناقيـد


والبـدو مايبـدي لهـم بالشـديـدي

تسعين ليله مـا حكـوا بالمواريـد


ضيـق بهـم در الغنـم والجميـدي

مايشربـون الا حليـب المجـاديـد


والبل وبرها طار وأبـدل جديـدي

ورودم على الفطر سوات المجاليـد


من فضل ربي كـل يـوم تزيـدي

قامـت عشايرهـا تسـن المفاريـد


والفجر تسمـع للطيـور أتغريـدي

ليل الشتاء طولـه عليهـن سراميـد


هذيـك والله منوتـي ياعضـيـدي

لا جابها الله من صـدوق المواعيـد


ماكفـه الديّـر لرجـم المفـيـدي

وذوب على خشم الخدار ومشاحيـد


مجهود من نـو الجبـاه السديـدي

وحصل لها قبـل العقـارب تماديـد


غثوه على روس الشجر والهضيدي

وسـاق وتساقـى للنفـود وتخاديـد


وفيض على فيحان ريـف المعيـدي

نبي لنـا بشعـاف لوقـه مطاريـد


علـى أوسـوق مقربـات البعيـدي

من فوقهن يازيـن مـزح الأواليـد


لا فـرع النـادر وطلعـه وكيـدي

وحول على جول الحباري تقل حيد


وسلط على الخرب النشيط العنيـدي

حاسه وداسـه والحبـاري ملابيـد


يقضي بها الصقـار يـوم جديـدي

في ساعـة مابـه وجيـه مقاريـد


هذا هـوى بالـي وهـذا رصيـدي

سوق النظر بين السهـال الجراهيـد


لوكان من طرد الولـع مـأستفيـدي

فتقٍ بقلبـي واعـذروا يـالأجاويـد


نومي تحت طل النجـوم الجليـدي

عنـدي كنـب ومنجـد زل نتجيـد


لو لامني خطـو الغشيـم البليـدي

طـرد الولـع مابـه عليـه مناقيـد


و شوف الفياض المخضرة يالحميدي

وشمة ذعاذيع الهـوا عندنـا عيـد


وللكيف ذوق ولاستمـاع النشيـدي

لا قلطـوا رسـلان وإلا بغـاديـد


ثنتيـن هيـل وثالثتهـن عـويـدي

وكلٍ على ما تطلب النفـس وتريـد


وقدوعهن من طلع هدب الجريـدي

أحسن نمونه من نما شـرع الغيـد


وسوالفٍ مـا قيـل فيهـا جحيـدي

بالصيد لا نمـه ولا هـي هرابيـد


ساعـات نقضيهـا ويـومٍ سعيـدي

ولا دامت الدنيا لعامـر وابـا زيـد


الـدايـم الله والفـنـا للعـبـيـدي

والرزق عند منـزل الـدر بالديـد


محيي الهشيم اللي عروقه هميـدي

رزاق ما تحت الصخور الجلاميـد


والله يدبرنـا علـى مـا يـريـدي

وصلوا على اللي وحد الدين توحيد

[نــجــم]

اللـي فقدنـا مـن نبـات ونواويـر




اللـي فقدنـا مـن نبـات ونواويـر

ماهو على المولى صعيـب رجوعـه


الله مـن قلـب هجوسـه طوابـيـر

ميعادهـن بيـن العتيـم وهجـوعـه


قالـوا تفكـر قلـت عنـدي تفاكيـر

أشوف شـئ مـن خطانـا وقوعـه


قلـت الحقيقـة يالوجيـه المسافيـر

قلبـي ليـان وشـاف شـئ يروعـه


شفت الجفاف مكسر القشـع تكسيـر

والنفس ماهي من قضاء الله جزوعـه


وادي الرمة جوه عجـاج ومعاصيـر

يبسـت جراجيبـه وماتـت قشوعـه


حمضه عليه مـن السوافـي عثاميـر

يا باعث الأمـوات تبعـث جذوعـه


مدهـل مجاهيـم تــلاد ومغاتـيـر

وحمـر مرابيهـا هدايـد افـروعـه


يـوم الوسـوم تنثـر الوسـم تنثيـر

والعشـب ينبـت ماتكامـل اسبوعـه


ويوم القلوب نظـاف مايقـف الخيـر

يطيـح وسـم ولا تقـطـع تبـوعـه


واليوم وبل الغيـث مثـل الطباشيـر

قامـت تلـوث بالمنـاقـع انقـوعـه


الشكـوى لله صـار بالجـو تغييـر

دايـم كتـام وغيـر الجـو نـوعـه


واصل الخطا منـا تهـاون وتقصيـر

قليـل مـن يحسـن لربـه ركوعـه


نشقى ورى الدنيا وهي مابهـا خيـر

والمـوت يدنـي للنفـوس البشوعـه


وعنـد المحاسـب ماتفيـد المعاذيـر

ينشف جما العاصي وتطفي شموعـه


واللي غناته سحت وامـوال تزويـر

لـه ساعـة مـاذاق حلـوه يزوعـه


يـدري بهـا لـودعـوه الحفافـيـر

والقبر ضكه مـع محانـي ضلوعـه


فـي ساعـة مابـه تقـدم وتأخـيـر

يفقد بها الرحـال مجالـس ربوعـه


وعن ماعمـل مالـه مفـر ومعابيـر

ما ينفعـه جمعـه وهيبـة جموعـه


قدامـه الجنـة وقدمـه زمهـريـر

والله يعلـم ويـن يكتـب نجـوعـه


يـارب تهدينـا علـى حسـن تدبيـر

نطلب عظيم الشان خوفـه وطوعـه


يالله يــارازق عــوج المناقـيـر

ياكافـل رزق النـفـوس القنـوعـه


يامـن بتقديـره تـكـون المقـاديـر

ياسمـع الداعـي وخالـق سموعـه


تزيـل شـدات السنيـن المعاسـيـر

يامن لـك المسلـم يوجـه خشوعـه


تمدنـا يـارب رحـمـه وتيسـيـر

غيـث يعـم المملكـة فـي نفوعـه


يارب من قل المطـر نشفـت البيـر

نشف الثرى والدرع ماتـت زروعـه


ومات الخشاش وضاق في عشه الطير

يشكي علـى رب السمـوات جوعـه


والبـل مصارفهـا نخالـه وشعيـر

واحوارها بالشبـك تـذرف دموعـه


مثل السجين يلـوح بيـن المواصيـر

والا البهايـم للمـقـدر خضـوعـه


حاطت عليه اذنـوب نـاس مباصيـر

حاله صخيـف وحنـة أمـه تلوعـه


ذنـب الأوادم لـه عواقـب وتأثيـر

والعمـر فتـرة والحيـاة مخدوعـه


وحنـا بشـر مالله خلقنـا تصاويـر

واللـي يخـاف الله يطبـق شروعـه


والله محذرنـا عـن الكـذب تحذيـر

والحسـد والغيبـة وكبـر وميوعـه

[نــجــم]

يـ اهل النياق




يـاهل النياق اللي عليهن تصكون

من فضلكم لا تسجنـون البهايـم


مافيه داعـي للبهايـم تحبسـون

خلو عطايـا الله تـذّب الخرايـم


اما عطوهـا حقهـا لا تشحـون

ولا اتركوهـا مالكـم بالظلايـم


بحقوقها اللي وافيـه لا تعيـون

الله عطاهـا للصحـاري قوايـم


والبل بها شجعان نجد يتعـزوون

اللي وراهـا يجدعـون العمايـم


مقدارها عند المناعير مضمـون

يوم أنهـا بيـن القبايـل غنايـم


ليت الذي تحت المقابر يشوفـون

اللي عن البل جاهـدوا بالعزايـم


اللي بميدان المعـارك يهوشـون

يوم الرمك تعطي هجوم وهزايـم


هذا وانا مالي على الناس قانـون

وجهة نظر ما افرض عليهم لزايم


واللي عطوها حقها ما يلامـون

بعنايـة البـل مالحقهـم لوايـم

[نــجــم]

قصيدة مزاين إبل قبيلة حرب




يامرحبـا والمجتمـع زان جـوه

برحاب محفل حرب جتنا الوفودي


حضر الأمير اللي يشرف سمـوه

مشعل ولد عبدالعزيـز السعـودي


رجل الشهامة والكـرم والمـروه

ليثٍ تسلسل من عرين الأسـودي


ابن الحكيم اللي خذا الحكـم قـوه

وطوع عداه بمرهفـات الحـدودي


بالشرع يحكـم والمنافـق عـدوه

حكمه على الدين الحنيف محدودي


نجمٍ على روس الطواغيت سـوه

باعه على باع المخالـف يـزودي


فيه الشجاعة والذكـاء والجـروه

مسعاه في كل الأمـور محمـودي


حكمه حكم توحيـد ماهـو ممـوه

في طاعة المعبود يبـذل جهـودي


خلى عصاة النـاس تذعـن لنـوه

الحضر واللي يركزون العمـودي


عقب الحزازة والجهـل والعتـوه

كلٍ مسك حده شجـاع وشـرودي


تصادقـوا مابيـن جيـرة وخـوه

إخوان بالملـة وضـد الحقـودي


زال الظلام وولـع النـور ضـوه

والدين قـدوة للنظـام السعـودي


دينٍ على التوحيـد ماهـو مشـوه

عليـه رأي المسلميـن معقـودي


منهاجنـا السنـة ونهـج النـبـوه

وعصر الجهل ولى عسى مايعودي


هذا كـلام الشاعـر اللـي تفـوه

قلت الحقيقة والعوارف شهـودي


قدمتهـا عـن لابتـي والسـمـوه

بالمحفل اللي في محيط النفـودي


شاركت معهم والمواقـف حمـوه

ربعي بني عمي اسنادي عضودي

[نــجــم]

القصيدة الثانية بالمزاين



بسم الذي يعلـم خفيـات الأسـرار

محيي العظـام الباليـات السمايـل


اللي حمل موسى على موج الأبحار

وانجاه من كيـد النفـوس الغلايـل


وبسم القبيلة مرحبا سـر وجهـار

باللي لفونـا مـن جميـع القبايـل


تقديـر للـي زاروا الحفـل زوار

وهـذي حقيقـة للصداقـة دلايـل


وأكرر الترحيـب تقديـر تكـرار

إعداد مايمطـر حقـوق المخايـل


محفل قبايلنـا لنـا رمـز وشعـار

ومن سيرة الأمجـاد نملـك نفايـل


سجل لنا تاريـخ الأجـداد مقـدار

بأفعال منبعهـا الشـرف ولجمايـل


هذا وأبا آخذ لي مع الوضع مشوار

من ضمـن شعـارٍ تجيـد المثايـل


بالمحفل اللي عبرت عنه الأفكـار

وشعاره البـل والعمـوق السلايـل


سفن الصحاري بالمضامي والأسفار

قبل المصانع وأختـراع الوسايـل


سجل لها لتاريـخ بالمجـد تذكـار

وبأيام غـزوات الصحابـة زمايـل


على الرحايل حرروا مدن وديـار

باجهاد طيشان الجهـل والظلايـل


البل لهـا شيمـة وقيمـة ومقـدار

ثـروة سلفنـا والجـدود الأوايـل


تقري بها المحتاج والضيف والجار

قوت البيـوت وللمسافـر رحايـل


ويوم القبايل بينها عنـف وأشـرار

البـل ضحاياهـا رجـال الفعايـل


معها جنبها بالصحـاري والأقفـار

وفرسانها فوق المهـار الأصايـل


واليوم ياشاري بها طـب واختـار

بالسـوق تلقـى دقهـا والجلايـل


طب وتخير بالجلب نـوق وابكـار

وفحول نقـوة مابهـن قـول قايـل


ويمكن بعضها قيمتـه ربـع مليـار

صعبة على الشخص الفقير الكمايل

[نــجــم]

و طـــــــــيري




و طيري اللي لـأبرق الريش جذاب

بالقـاع وان طـارت يخيـب تعبهـا


لا شافهن في جانب الروض ما هاب

حول على اللي نفضـت لـه غلبهـا


بالكف ما يكفـخ وللصيـد قصـاب

كم خارمٍ منـه أقرشـت لا ضربهـا


غدى وأنا اومي له على راس مرقاب

طلعـه ورى بـرقٍ بعيـدٍ طلبـهـا


بيني وبينه زولت قـور واهضـاب

هف وهفـا بـأرضٍ قليـل عربهـا


ونخيت صدقاني عريبيـن الأنسـاب

وكـلٍ تحيـزم وأستـعـد لطلبـهـا


وراحوا على الحروة يرمّون الأسباب

في ديـرةٍ بالقيـض تابـس اقربهـا


وجوني وعزوني عن الطير حطـاب

وأستقنعت نفسـي وهـون غضبهـا


قالـوا لقينـا جثتـه بيـن الأطنـاب

تلعب بـه الورعـان جملـة لعبهـا


لا جاء القدر مال الفتى عنه مجنـاب

يا مـا فجـع نـاسٍ ونـاسٍ نكبهـا


وياما خذا طيـرٍ تدرايـه الأجنـاب

وإلا الطيور تمـوت ماحـدٍ حسبهـا


مثل الخريشا وأبـن حثليـن عقـاب

لا طار عن بيض المفـارع سلبهـا


يوم الفعول برمح وسيوف وحـراب

ومشوكٍ يشظـى العظـام وعصبهـا


هاذي علومي ياعزيزين الأصحـاب

في طيرتي واللي جرى مـن سببهـا

[نــجــم]

القيـض راح




القيـض راح وبـردن الليـالـي

والطير عقب القرنسة كمّل الريش


والمزن بالمنشأ غدا لـه ظلالـي

وتراكمت غر المزون المراهيـش


وتذكر الصقار وقت مضـى لـي

ايـام جالـي بالغبيـة مغابـيـش


يوم الحباري حوزهـن بالدحالـي

إليا فرع النادر طلبهـن مخاييـش


والخرب بادناهن يصير الموالـي

يوجس براسه للشجاعـة نغاميـش


خرب مغفـل ماحسـب للتوالـي

طقيق حنكانه سـوات القراقيـش


وجاه اشقر جوفه من النسر خالي

جزام صيـاده يقـض النشانيـش


له بالطيور البرق فعـل ومدالـي

ضربه عطب ماهو مسوح وتناويش


ذاك الزمان اللي به المـر حالـي

يوم الصقارة تنعش القلب وتعيـش


واليوم لو نقنص جنوب وشمالـي

صرنا على ما قيل مثل القراريـش


ما شوف والله للصقـارة مجالـي

نقفي ونقبل يالحميدي على ويـش


مهمـا تجاوزنـا فيـاح السهالـي

غير الدجاجة ما لقينـا عراميـش


ما شوف غير القوبعة والكحالـي

وزرق الثعال اللي سواة القرافيش


عزي لحالـك يازميلـي وحالـي

بارض الرحيل نفتش القشع تفتيش


والله يلولا الطيـر بالقلـب غالـي

اني لاجوز من العنا والمطاريـش


لاكان حب الطير شـارك عيالـي

ولو ما تسلى بالولع كيف اباعيـش


والله ماني عن غلا الطيـر سالـي

لو نعلفه من بارد الخبز والعيـش


لوكان للخـارج نشـد الرحالـي

وندفع على شانه ضريبة وبخشيش

[نــجــم]

مساجله بين شاعرنا بدر الحويفي وطيره غنام


فـ يقول شاعرنا :




الخرب ياغنام ماهوب كروان

تبرك عليه ولايهمك صفيـره


الخرب عابي لك قنابل بخزان

يبي على خشمك يفك الذخيره


غرك فعولك يوم نقنص لفيحان

اثرك جيد لاقضبت الكسيـره



فـ رد الطير غنام على شاعرنا وقال :


انته وراك تذمنـي يابـو سلمـان

والله لاعوضك كان حصلت غيـره


وانا الحقيقه يـوم هديـت غلطـان

جيته مع البومه واثرهـا خطيـره


مامقصدي خايف من الخرب طقعان

لكـن ماجيتـه بعـرف وبصيـره


خربٍ نشيط وله اسبوعين بشمـان

مليان من قطف الخزامى مصيـره

[نــجــم]

يـ ابو فهد





يـ. ابو فهد قلبي تقل فيـه لحـام

كنه براس التـاج تكـوى عروقـه


بأسباب طيرٍ مات والنـاس صيـام

بـ. أخر شهر تسعه طوينا سبوقه


النادر اللي يعجب العين لـ. حـام

يا زين تنجيمه وما احلـى خفوقـه


صيروم لا حوّل على الخرب جزام

وإن طار وأقفى عن نويـه يعوقـه


عز الله أني ضايـقٍ عقـب غنـام

ألحق على القلب المولـع حروقـه


إن ماحصل لي سجةٍ مثلي العـام

أخذ بهـا بيـن الصقاقيـر روقـه


لـ. كان مدري عن مقادير الأيـام

يالله عسى حظي تساعـف وفوقـه


انا غرامي شقـة النـور مجهـام

الفجر لـ. أقفى الليل نوره يسوقه


لـ. طاب نوم اللي إليا نام ما قـام

أكبر ضحى ياكل غـداه وريوقـه


يسهر على البيلوت وفنون الأنغـام

وكشف البروق اللامعه مايشوقـه


ما لايعه لكم الصحـاري بالأقـدام

ولا أحفت ذعاذيع الهبايب رموقـه


ماهو بمثلـي بيـن عايـل ولـوام

من شان نفسي للصقـاره عشوقـه


قلبي لشرسات القرانيـس مريـام

اللي لهن بيض الدواغـر علوقـه


هذا غرامي لو تجي لي بـالأولام

مالي هدف وش باع وشلون سوقه


إليا قطعت البتـر وعـروق لـزام

ضاعت همومٍ بالضميـر مخنوقـه


في ديرةٍ مابـه مـزارع ومرسـام

بين الخرم والهوج وإشعاف لوقـه


مع ربعةٍ نقـوة شغاميـم وحشـام

وخويهم يحشـم ويعطـى حقوقـه


كل ابلجٍ يعجب مقامـه إليـا قـام

مستارثٍ طيب النبا مـن عموقـه


ماهـو لغـاويٍ ولا هـو بشـتـام

صدره وسيع وزين الأخلاق ذوقـه

[نــجــم]

أنا على المقناص قلبي يرّفي


أنـا علـى المقنـاص قلبـي يرفّـي

فتـره ونرجـع يـمّ أهلنـا مناكيـف


بديـار لفـروق الحـبـارى تلـفّـي

جنوب من حزم الجلاميـد وطريـف


الطير هـو غايـة غرامـي وشفّـي

اقـدره تقديـر الأجـواد للضـيـف


من كبر قـدره شايلـه فـوق كفّـي

وأرعاه تسع شهور بالقيظ والصيـف


وأدللـ.ـه لشفـت ريشـه مصفّـي

على الدعو واخفف النسـر تخفيـف


نقلـه يشرفنـي وشـوفـه يكـفّـي

عن شوف ناس ما تعرف المعاريـف


لـ. شفت لـي نّـوٍ بروقـه ترفّـي

نويـت أجهـز موتـري للتكالـيـف


القيـظ كـلـه جـالـسٍ ومتعـفّـي

وبرد المكيف نشـف الـدم تنشيـف


متـى سمـوم القيـظ عنّـا تقـفّـي

وسهيل قبل يعمّد الفجـر قـد شيـف


والنـار يصلـح شبـهـا للتـدفّـي

والبرد نوجس من نسيمـه هفاهيـف


وقمنـا لعزبتنـا نشيـل ونضـفّـي

ونكمل الناقـص ونمـلأ المطاريـف


واللي نشيـل مـن اللـوازم مكفّـي

ومكتفيـن العفـش بالحبـل تكتيـف


ويمكـن اليـا جينـا البقالـة نوفّـي

حاجات نشريهـا كمالـة مصاريـف


والصبح مـن حـزم أبرقيـه مقفّـي

صوب المعظم والهضـاب المقاييـف


بديار جعـل أشجارهـا مـا تجفّـي

تعلهـا غـرّ المـزون المـراديـف


في رفقة اللـي نارهـم مـا تطفّـي

على الشرف والجود ربـعٍ مواليـف


مجلاس طلقيـن الشـوارب بصفّـي

على الدلال اللي بهن ساخن الكيـف


خويّهـم مـا أوجـس كـلامٍ يحفّـي

غير المـزوح الطيبـه والسواليـف


عقـال وزن عقولهـم مـا يخـفّـي

و لا هم على الفاضي خفاف وملاقيف

[يارا العامرية]

صح لسان شاعرها
ولاهنت ع الإختيار الرائع
يعطيك العافيه

[نــجــم]

اسعدني حضورك ..

تقديري ..

[صعبة المنال]

مبــــدع ,, صح لســـآنه
وتسلم يمناك والله يعطيك العافية
تقديري

[نــجــم]

اسعدني حضورك ..

تقديري ..

[اساور وأغصان]

http://www.r-mbd3.com/vb/uploaded/3998_11194182334.gif (http://www.r77r.com/vb/ext.php?ref=http%3A%2F%2Fwww.libyanyouths.com%2Fvb %2Ft18404.html)
اشكرك لروعة الطرح القيم
لاتحرمنا مواضيعك جديدة

[نــجــم]

اسعدني حضورك ..

تقديري ..

[العنيــــدهـ]

صح لسان الشاعر الحربي
ولاهنت ع الاختيار الرائع
يعطيك العافيه
!..❥

[نــجــم]

شاكر لك مرورك الجميل ..

احترامي وتقديري ,,

[سلطانة]

http://www.halauae.com/uploads/images/alsaher-3814931317.gif

[نــجــم]

يسعدني ويشرفني مرورك العطر

تقديري لكـ

[دانــه]

صح لسان الشاعر ولاهنت يانجم ع أيرااااد الديوووان الرااائع
يعطيك العافيه .. :m-49:

[نــجــم]

يسعدني ويشرفني مرورك العطر

تقديري لكـ

[فادي الشلاحي]

تسلمً يمينكً علىً هذا الطرحً الراقيً

[نــجــم]

يسعدني ويشرفني مرورك العطر

تقديري لكـ

[شبيه اللول]

اقف احتراما لك ولقلمك الذي يحمل بداخله كل معاني الروح الصادقه
دمت بحب
في نتظار جديدك

[شبيه اللول]

اقف احتراما لك ولقلمك الذي يحمل بداخله كل معاني الروح الصادقه
دمت بحب
في نتظار جديدك

[نــجــم]

يسعدني ويشرفني مرورك العطر

تقديري لكـ

[نداء الشمري]

احسنت لاهنت ع النقل

[نــجــم]

يسعدني ويشرفني مرورك العطر

تقديري لكـ