ديوان الشاعر : رشيد الزلامي

[نــجــم]

ديوان الشاعر : رشيد الزلامي


http://n7bkm.net/upfiles/aKd01085.jpg




يا كثر هرج العرب ياصعب تحليلـه
الا على من عرف معنـاه واهدافـه
وانا اعرف العلم لكن ما معي حيلـه
وشلون اعدل سنام الثـور واكتافـه
ليا جاك خبلاً يحـط العلـم ويشيلـه
وليا سمع شاعراً غنـى علـى قافـه
يصدقونـه ليـا سمعـوا تهاويـلـه
وهوه كذوباً هيم والصدق مـا حافـه
وان سمع طاري العزيمه قال منهي له
وقام يتلفت وشال البشـت باطرافـه
ضاري على المهزله ويعيش بالحيله
لكن عند اللوازم عـاش مـن شافـه
ولو تنصحه قال يا دنيا من انتي لـه
متمرغاً في فـراش ابليـس ولحافـه
وابليس في مرقب الغاوين يومي لـه
ومشاركه كـل مرباعـه ومصيافـه
له في طريق الخطا تسعيـن تحويلـه
لو تاصفه كذبوك النـاس باوصافـه
ومن كان هذي سواته وش تسوي له
خله يغـرف البحـر كلـه بمغرافـه
لكن لا تسمع اخباره وتصغـي لـه
يجلس صنم وان ذلف عساه مذلافـه

[نــجــم]

مرثيه في معالي الامير محمد بن احمدالسديري




اليوم ياعين الشقـا ليـش تبكيـن=يبكي الحزين وعبرته وش تفيـده
والله ما ألومـك لوبقيتـي تهليـن=دمـعً يـداوي الحـزن ولايزيـده
هذا القضاء والقدر مافيه تظنيـن=يطوي من التاريخ صفحـه جديـده
صفحة شرف هزت قلوب الملايين=توجد بها كـل الصفـات الحميـده
صفحة شرف حنا لهـا مستحقيـن=تبقـى لنـا والله فعـل مايـريـده
راضين بامر مكون الكون راضين=حيث انـه المالـك وحنـا عبيـده
كم راحلً من بين قومـن مقيميـن=ومع دورة الايام شـدوا شديـده
هذا الصحيح انا على الدرب ماشين=ولا وكـاد انـا فقـدنـا فقـيـده
شخصية تعرف على العسر والليـن=سجل لها الماضي مواقـف عديـده
في صالح الدنيا وفي صالح الديـن=ونفس تموت بمثل هـذا iiشهيـده
وابوزيد حبه في قلـوب المحبيـن=بقلوب كل الناس ضخـمً رصيـده
مرحوم ياريف الضعاف المساكيـن=زومـان شيـال الحمـول المكيـده
ريف الضيوف اللي من البعد لافين=وعز الصديق وضد منهو ضديـده
العام ياعين الشقـا وش تخبريـن=أبعث له أسراري من أرض بعيـده
واشكي له الغربه وبعـد المحبيـن=وظروف عشت ابها حيـاةً زهيـده
مشاكلً تكـوي كبـود البعاريـن=يذوب منها القلب لو هـو حديـده
ويرد لـي رد الرجـال الحكيميـن=ويحل موضوعي ببيـت القصيـده
وكنا على عهد الوفا منـه مرهيـن=وحل القضاء المحتوم دون الوعيده
اليوم ياعين الشقـا ليـش تبكيـن=محمد رحل مع درب خالد عضيـده
ندعوا لهم دعـوة حجيـج ملبيـن=بجنة عدن لاهل الصفات الحميـده
واليوم ياشعر النبط عنـك عازيـن=عفناك لـو عشنـا حيـاة مديـده
اختل وزنـك مابقـا لـك موازيـن=تراك طيرن طايـرن مـن جريـده
يالله ياقابـل صــلاة المصلـيـن=تجبر عزانا في النفـوس الشهيـده

[نــجــم]

يامعالج الجرح صبري واصلا ً ماده = وعلاج قبل امس زاد الجرح ماسرّه
احرجتني في سؤال مااعرف ابعاده = والناس للناس محتاجه ومظـطرّه
اخفض جناحك ترى دنياك حداده = وترى سليمان قبلك خاطـب الذرّه
وجرحي ترى مايبي دكتور وعياده = يحتاج قلب رحيم ونــظرة حــــــره
وان كان جرحي بقى والطب مافاده = اعود وانصــحك ياقلبي مـية مرّه
لا عــاد تحلم بشي فـات مـيعاده = قد ايش تبكي وكبدك ليه مـحترّه
اصـبر على ماقـضاه الله وماراده = يكفيك فعل الزمن بمحمد الــدرّه
ويكفي من الوقت خمس عقود وزياده = ماعاد خلــت بكبدك قـطرة مـرّه
وان قلت انا في زمان فات لي عاده = دارت رحــاة الزمـان وجتك مفـترّه
ريح ضميرك وخل الوقت وجهاده = لعل خـير الزمــان يفـك مــن شـرّه
اما يقـــوم الجمل شقران بشداده = والا تـهب الهبوب وتقتل الجــرّه

[نــجــم]

البارحه والناس غافين وهجوع = جتني هجوسي ورداً سارياتي
والليل طال وخط الارسال مقطوع =ياليل ياطولك متى الصبح ياتي
قزرت ساعاتك على ثومة الكوع=مالي نديم الا الثلاث الخواتي
صفر الدلال اللي بها الهيل مشموع=باشكال وارناقا معه لايقاتي
واصبحت من كثر الهواجيس مفجوع=وافكار قلبي شرداً سارحاتي
ياسائلاً تسأل ترى الصوت مسموع=وما نشر بالصفحه قريته بذاتي
سويت لي مشروع من غير مشروع=والزمتني بالرد دون شهواتـي
اكيد عندك يا فتى الجود موضوع=والا مسوي بك زمانك سواتـي
مسقيك من علقات الايام قرطوع=وتسمع صراعي فيه ومغامراتي
فان كان هذا الامر بالشكل والنوع=خل الامر لمكون الكايناتي
ساير زمانك كان لك قلب وضلوع=وارج الفرج بايامك المقبلاتي
وان كان ما طاعتك خلك لها طوع=ما انته بضاربها برمح الزناتـي
اما سوالك ما جوابه بممنوع=ولو للحياه اسرارها الخافياتـي
اجاوبك لو ما معي منك منفوع=تحب تعرف كيف قصة حياتـي
حياة ذيباً عايش الفقر والجوع=ليله يبات وليلة ما يباتـي
اعيش عيشة ذيب والراس مرفوع=وان قلّ مالـي عزّ نفسي غناتـي

[نــجــم]

الله على اللي شوحتـه تقطـع الـدار=يوصل غريب الـدار ديـرة ربوعـه
أبيـه والله ميـر مغليـن الاسعـار=والبنك ماادلـه ولااعـرف فروعـه
وذي حالة الدنيـا لهـا ادوار وادوار=يومـن تواصلنـا ويومـن قطوعـه
وكـل البشـر فيهـم فقـارا وتجـار=ونفوس تتحمل والاخـرى جزوعـه
وحتى بنـوك النقـد تعجـز وتنهـار=ماهوب انا عجزي بعاد(ن) رموعـه
بس المهم ودون توضيـح الاسـرار=وضعي ووضع الجيب شكله ونوعـه
شريت لي جيب(ن)عسى ابـوه للنـار=بانـت عذاريبـه مـن اول اسبوعـه
مزعج مع الصحراء ومزعج مع القار=ومن يركبـه لازم يسكـر سموعـه
مثل الشبح ماينقصـه غيـر طيـار=شكله وتصميمـه وممشـاه روعـه
من خف دمه مابقـى فيـه مسمـار=ولايركبـون عيـال الانـذال نوعـه
مايركبـون الا سفـاري وفكـسـار=آخر زمان(ن) جعل بقعـا تصوعـه
خلا رجـال المرجلـه مالهـم كـار=الذيـخ لـو يبكـي مسحنـا دموعـه
الذيـخ يشبـع فالفضايـل والاسـوار=والذيـب مايـدرى بفقـره وجوعـه
وقت(ن) يخلي صاحي الفكـر يحتـار=ويشوف من هول الدهـر مايروعـه
تلقى الفقير وفزعتـه خمسـة انفـار=وتلقى الغني كـل الجماعـه فزوعـه
ياعاشق الدنيـا تـرى مالهـا جـار=كما واحد(ن) في حبها طـار شوعـه
اليوم تضحك لـه وتعطيـه الانـذار=وبكـره تلحويهـا محانـي ضلوعـه
خلك علـى صكـات الايـام صبـار=ويوم(ن) يفوتـك لاتمنـى رجوعـه
اقفى على مافيه مـن خيـر واشـرار=نجم(ن) هوى مايندرى عـن طلوعـه
وماهي على كيفـك تمنـى وتختـار=ابعد على المخلوق من حـب كوعـه
يخبرك من ذاق المتاعـب والامـرار=وحـاول ولاجالـه زمانـه بطوعـه
ومرت به الدنيا على بعض الاقطـار=في رحلة(ن) ماغيرت مـن طبوعـه
والله ماواطن عيشـة الـذل والعـار=مـادام لـي شيمـه ونفـس قنوعـه
وقرش(ن) عزيز افضل من الفين دينار=من مصدر(ن) للذل يعلـن خضوعـه
ولو الوساده من صلافيـح الاحجـار=للراس اخير مـن التـرف والميوعـه

[نــجــم]

الشعر ماني مقترح دستوره=ولاني وكيل أدم على مذخوره
ولكن من شيٍ يحز بنفسي=هاضت به افكاري وهي مجبوره
شعر النبط شفته بوسط الشارع=يمشي ويسحب رجله المكسوره
وما شاهدت عيني عرفت اسبابه=زان الزمان وبانت المصروره
الشعر سارت هيبته ماطيه=تشاوتوه الربع مثل الكوره
يشوته الفارس وجاه الحارس=ينقز على رجله ويلطم زوره
واهدافهم يا للأسف مكشوفه=اغراض شخصيه وصوت وصوره
يستخدمون الشعر لبسط حاجه=وش هالبشر منهيةٍ مأموره
إما هذم رَجلٍ بدون مبرر=او يمدحه مدحٍ يمس شعوره
مدحه بوجهه يعتبر مسبه=إذا كان يعرف مستواه ودوره
ولا تهيض عمنا متغزل=واعطى الجهاز الحر من ميسوره
يصف بنات الناس وصفٍ خاطيء=وداوم بحلقٍ كنه الماصوره
ثم قال أنا شاعر وجاك محدر=يعدّ حاله ناجحٍ من دوره
هو ما درى ان الشعر مضلومٍ به=وإنه بشر وصحته محظوره
يا من ظلمت الشعر خاف من الله=خله يعيش وحالته مستوره
يا الربع كلمة شعر تبغى شاعر=مثل السديري يوم غاص بحوره
وابن ربيعه والخلاوي راشد=ولا عبيد العلي يوم عصوره
ومثل القضاه ومحسن الهزاني=وابن شريم اليا رفع باكوره
وابن حميد وشالح القحطاني=ولاهي عن اهل المعرفه مقصوره
ولاني مجامل مع هذا والثاني=اعدّ شعار النبط وابحوره
واللي ما هو قنعان ينشد عني=يزورني للبحث ولا زوره
وعندي اللقاء كلٍ يجرب حظه=ولاني وكيل أدم على مذخوره

[نــجــم]

البارحه يوم الثــريــا تــويــقــــي=يـــــوم كــــلٍ في لــذيـذ الكــرى راق

وقفت لين الشوف جاله بريــقـــي=مثل السراب اللي على البعد لـــهــــاق

أخيل برق صوب واد العقــيــقـــي=ماشــفت مـثلــه يفـضح الـليـل بــــراق

عساه يسقي دار ذاك الفريــقـــي=لو رغبتي مـا عـــاد بــاقٍ لــهــا بــاق

وذيك الدير ماني عليها شفيــقـي=تطيب منها النفـــس وتضـيـق الاخــلاق

قزرت عمري في بحرها غريقــي=متـحـمـل ٍ كــل المتـاعـــب والارهــــاق

لين انكشف وجه العدو والصديقي=والرفقــه اللــي حـبـلها رمــث ودقــاق

ولا كلفت نفسٍ بــمــا لا تـطـيـقـــي=تبينت لــي كــنها شــمــس الإشـــــراق

وانا ليا شفـــت الجفا من رفيقي=وصــار الامـل حــبر ٍ علـى بيض الاوراق

قابلت غلــطــاته بوجـــهٍ طليــقــي=ونظرت لــه نــــظرة مـــحب ٍ ومشتـــاق

أعطيه حتى من منامه يـــفيــقــي=لا كلمته سمّــــعت ولا خــــاطرٍ ضــــاق

حتى يعرف اني رفيقٍ حــقيـقــي=وليا انحرف ماهو على باب الارزاق

يروح في دربه وانا في طريقــي=من خلـــقت الدنيا بها جمـع وافــراق

علي بيبان الفرج ما تـضيـقـــــي=أسوقـــها في كــل ديــره وتنســاق

وابعد عن اللي رفقته ما تليــقــي=مـــاني علــى جنبه معلــّق بمـــعــلاق

ياكثر مالي في الدير من صديقي=لا بــــارت العــمله وشحّـــن الاســـواق

صـداقـةٍ تبنا بســاس ٍ وثيــقـــي=لا عقربٍ تلــدغ ولا مــــوس حـــــلاق

[نــجــم]

ياهن ابن هن ماوالله ارداك =ومااردى نصيب اللي يسوي سواتك
ومااردى نصيب اللي من البعد ينصاك=يبا العشا ويشوف بعض احركاتك
تحلق الشارب من الدين ياذاك =ودك تخدع المومنين بصلاتك
لكن وش تكسب بدينك ودنياك=لا صار ترك الواجبه من صفاتك
لا صار ضيف الله تلقيه علباك=باقي علومك خشها في عباتك
الجود مافقّرك والبخل مااغناك=ولا تحسب انك مت من موت شاتك
الخاتمه من يوم هاذي سواياك=بالله لا تعطي عتابه بناتك
تكثر بنا الرديان مثلك وشرواك=وتروح تشمتنا الرجال بشماتك

[نــجــم]

الزلامي كيف رمح الهوى صابه = والهوى ماصابنامن على اولنا
ياهل البيت الخضرسكرو بابه =سكروبيبانكم ياعرب عنا
وامسكواورع الهوى اللي بلشنابه=كل ماجينامن الزام قابلنا
هزرمش العين والاضحك نابه=ضحكة ٍمنهاالنجوم يتهاونا
امسكوه ببيتكم قبل نبلابه=وأن طلع لاتامنون العتب منا
لايكلمناولايطلع الجابه=لوصباح الخيركنه يلعنا
مايخاف الله ولايرحم اصحابه=جاهلا ًبعيونه السوديفتنا
اتمناحرب مدفع ودبابه=والعيون السودعنّا يصدنا
بس ياهل الورع متنامن اسبابه=مايردالموت لاانتم ولاحنا
ورعكم يلعب ودنياه لعابه=مادرى انا قدلعبناوهونا
مالقينافي طريق الهوى ثابه=زتنافي بحرالاهوال واهملنا
الهوى عله ولاتوجد اطبابه=دايما ًراعيه مفتون ومعنا
ودنابيت الهوى نقطع اطنابه=ونطلب الوالي عسى العفويشملنا

[نــجــم]

الوقـت يامقـسـى عـنـاه وعـذابـه "
" حطـاب ليـل ولـه معاويـن وفـزوع


احد (ن) منـه يمكـن يعالـج صوابـه "
" واحد (ن) يموت بعلته مـوت جربـوع


يروح مثـل مقـاط محـد (ن) درابـه "
" لاحبـل يرقـى ولاصـوت مسـمـوع


بغـى يجيـب رشـاه ورشـاه جـابـه "
" مـن عالـي الشفـه على ضربـه الـكـوع


هـذاه مقـاط اللـى ارشـاه التـوابـه "
" واصبح مثل للناس فـي كـل موضـوع


قصـه مـقـاط وقصـتـى ماتشـابـه "
" اسباب وقـت وكـل قصـه لهـا نـوع


مقـاط صفـى فـي زمانـه حسـابـه "
" وانا بلشت في وقـت طامـع ومطمـوع


كم واحـد (ن) وقـت اللـزوم تهقابـه "
" واليـا نصيتـه غيـر الطبـع بطبـوع


والصاحب اللى صحبتـه ضحـك نابـه "
" يبينى ابقى لـه علـى الـدوم مـزروع


ان شـاف وجهـي قـال يامرحبـابـه "
" وان غبت ينسانى علـى راس الاسبـوع


واليـا نسانـى منهـو حظـره جنابـه "
" انسـاه واجعـل دونـه الخـط مقطـوع


وعيب (ن) عليـه كـان طقيـت بابـه "
" لونى امسي بالخـلا ميـت (ن) جـوع


من خلـقـه الدنـيـا تـجـوع الذيـابـه "
" بس المهـم تعيـش والـراس مرفـوع


وتكسـب بعـز النفـس قـدر ورحابـه "
" وتمشى على خط (ن) سليم (ن) ومشروع

[نــجــم]

ياموزع النعم خل النعم لاصحابه=ماينعطي غير للي يستحقونـــــــه
النعم ينعطي لرجلٍ فاتحٍ بابـــه=للضيف وليا بغوه بحال يلقونـــــــه
اللي بوقت اللزوم يبـيـن مضرابــه=سيف تحده لزومه مايحدونـــــــــــه
والاالردي لاتقول ونعم يظرى بـــه=يرهي على نعم وهوه قاصر ٍ دونـــه
ليا قلت له نعم قام يفتـل أشنابه=يحسبك صادق ما يدري نعم وشلونه
يطمع بشيٍ يموت الخبل ما جابه=ثم قال أنا جبت نعم اللي يقولونــــه
بعض البشر يحلمون احلام كذابه = ومن لاعرف قدر نفسه عدّ طبلونــــــه
يجيك مسرع مايدري ويش يبلابه = من قلة العرف ما يمشي علىهونـــه
اما على الاقربين اشتال مشعابه=والابعرض المقفي سلّ مسنونــــــــــه
تناول الغايبين و كثروا أحزابـــه=اللي على قلة الخيره يدفونــــــــــــه
واهل العقول سكتوا ماقالوا الجابه=لا ينقصونه بشي ولا يزيدونــــــــــــه
قالوا هذا فيه عاهة وابتلشنا بـه=والا هذا فيه شي ٍ ما يعرفونـــــــــــــه
وخلوه يسرح ويمرح خاب من جابه=ما نومس اللي من الصغر يترجونــــــــه

[نــجــم]

انا ويش اسوي في زمانى يابن نماس= زماناّ مغامر والثقه فيه تخدعني

يحاول يوقفني على شفه من ياس= وعيت دروباّ تاسع الناس تاسعني

اخذبي على درب الشقاء والعناء مرواس= ولاباقي الا في المهامه يضيعني

تحملت من جور الليالي بدون قياس= ولو حملها ميل على المتن واوجعني

وصبرا ّ على الشده شجاعه وقوه باس= لكن الضروف القاسيه ماتطاوعني

ليا اجتمعت الثنتين حاجه وشيمه راس= وهذي تنزلني وهذيك ترفعني

رفعت النظر والله عطاني نظر واحساس= وهي ميزه في كل الاحوال تنفعني

ولو كان بين الصم والبكم لي مجلاس=هذا مايكلمني والاخر مايسمعني

حياه التجارب علمتني وانا حساس=وخلتني اعرف نظره العين وش تعني

وانا لو بدت لي حاجه عند بعض ناس= اريد الكلام وعزه النفس تمنعني

[نــجــم]

البخل طبع مستحيل علاجة = والجود طب لكل الأمراض وعلاج

جيت الرفيق اللي بشوش حجاجة =اللي بحزات الرخاء مثل هداج

قال العلوم وقلت طلاب حاجة =حاجة يسر ماهي تكاليف واحراج

ان كلفت يكفي العذر والمواجه =وان كان جت من يسر صاحبك محتاج

واومى براسه مثل راس الدجاجة = وهز المتون وراح وجهه كما الصاج

واقفيت من عنده مطفي سراجه = ولي حاجة ماعطيتها كل هراج

عرض العلوم لغير اهلها سماجة = والصاحب الطيب له الدرب ينعاج

وكم ضيقة ياتي بعدها انفراجة =ياليت كل اصحابنا مثل سهاج

الصاحب اللي مايعكر مزاجة = ولا حطله كثر المعاذير منهاج

ولا الردي صيده يضيع بعجاجة = ماتسبقه في سرعة الروغ ميراج

[نــجــم]

قصيده لرشيد بن زيد الزلامي

عندما كان في احد الدول العربيه

وقد حصل بينه وبين احد الاشخاص

خلاف وفي هذه المناسبه قال الزلامي

هذه القصيده
الله من قلب به النار تشــــتب=هبت وشبت واســـتمرت شبوبه

قلبٍ غدى للهم ما رد ومشــرب=وما ضاع من هم العرب راح صوبه

همٍ على ربع وهمٍ على غب=باليوم والســــاعه همومه تلوبه

والله من عينآ تصب العبر صب=صب القلـــيب اللي تدالج غروبه

يا عبيد انا ما نيب ضبٍ ولد ضب=يصبر لما يســـمع وينفخ ذروبه

انا عتـــــيبيآ عريبٍ معرب=لي ما قفٍ كل الجميع شهدو به


من سب داري قـلتله كب ثم كب=وارخصت روحي دون داري جلوبه

لو أنسجن بسبابها واتـــــعذب=صبرت من شان الوطن للــعقوبه

والسجن ما هو عيب شئ مجرب=يعلم المسجون ما هي ذنــــوبه

يلومني خبلٍ إلا ما تــــغرب=ينسى الوطن خسروا هله يوم جو به

فوده مع الضفران صفر مـكعب = فطـــــيس قلب و لذة النوم دوبه

وانا على كل الجنوب اتقلـــب=ما ذقت حلو النوم يوم اهــتنوا به

اقنب قنيب الذيب في راس مرقب=من حر ما به قام ينهش جـــنوبه

يحيني الغربي عـــصير إلاهب=وريح الديار الطاهره في هـبوبه

ريحة هواها مكسبي يوم نــكسب =اخير من ريح البحر والرطـــوبه

عسى السحاب اللي من العصر ينصب=هلت هماليله وهبت انصــــوبه

يسقى وطن راعي العقال المقصب=نجد العزيز وغرب نجد وجــنوبه

ياديرتي ما تقبل الشتم والـــسب=يا منبع الإسلام دار الــــعروبه

يفوز مذهبها على كل مذهـــب=وعلى مقلبت المذاهب عــــقوبه

يحكم بشرع الله وبالـسيف الأرقب=ولا شق فيها طالب الحـــق ثوبه

[نــجــم]

قالوا تعلمت قلـت عنـاد وفراسـة = أعاند النفـس والدنيـا وأصارعهـا
ودرست في مدرسة من شيبت راسه = دنيا العنا اللي قصيفـات مطامعهـا
تلميذهـا دايـم تكتـب بقرطـاسـه = وتعطيه جملة دروس مـا يضيعهـا
والله عطانا نظر وشعـور حساسـة = ناخذ علوم المعرفة مـن مراجعهـا
ونساير الوقـت ونقيسـه بمقياسـه = ونمشي مع النفس بالواقع ونقنعهـا
وترى حياة الفتى مهما قوى باسـه = محفوفة بالخطـر والمـوت تابعهـا
من مبتدى العمر لاما يلفظ أنفاسـه = يمر فـي مرحلـة تكثـر زوابعهـا
أول حياة الفتـى تدريـب ودراسـة = تكثر ظروف الحياة وينشغـل iiمعهـا
وثاني حياة الفتى مشوار وعساسـة = مسيرة في عجاج الوقـت يقطعهـا
وآخر حياة الفتى يرجع على ساسـه = النقطة اللـي بـدا منهـا يراجعهـا
يرجع لسن الهرم ويضيـع الطاسـة = ويمشي مع الأرض ويخطط شوارعها
واليا تلاقت متونه وارتخـى راسـة = ضاعت جميع العلوم اللـي يجمعهـا

[نــجــم]

أليا جهلت انشد ترى مابها عيب = لا تنخدع للجهل وأنت السبايـب
عيب الفتى مافية شك ولاريــب = ترك الفروض وقطع وصل القرايب
والعيب ترك ملازمات المواجيب = وتبع الردى ومجالسة كل خايب
فالتجربة برهان مافية تكذيــب = واليا جهلت انشد من القوم شايب
ولا قول يوجد شايب يعلم الغيب = الغيب يعلم به مدير الهبايــب
لاشك يوجد شايب له تجاريــب = ومن الدهر شاف الفكر والعجايب
بيض النواصي جبهته كلها شيب = من كثر ما مرت علية المصايب
قد صارع الدنيا على الخبث والطيب = فالغوص وإلا فوق عوص النجايـب

[نــجــم]

وهذه قصيدة وجهها الشاعر الزلامي إلى معالي الامير / محمد السديري تشرح موضوعاً لم يفهمه السديري
اكتب ويكتبلي وانا اقول حتى ايش = حبراً على قرطاس ماهوب كافي
والوضع ماهو قابلاً للمطاريش = يا امير بشرني عساها عوافي
سجيت يوم غصون قلبي مواريش = واليوم يا فرز الوغى شاب قافي
وعروق قلبي يالسديري معاطيش = امشي وانا مقفي واعاين خلافي
رافقت حجاج الهنود الدراويش = وسريت مسرى الذيب رجلي وحافي
وطال المسير وصار بالجو تشويش = متى على الله يصبح الجوّ صافي
شياّ يخدش ثومة القلب تخديش = وسره يعود الى القلوب النظافي
يكفيك لايح كلمتي دون تفتيش = وعندك خبر ما قال صقر النصافي
مادام انا قلبي جزوعا ليا نيش = حساس من كلمه سريع العيافي
ارضاً خلا لو مابها لقمة العيش = اخير من رزق عليه اختلافي
والرمز يكفي الحر والخاتمه ويش = اقبل تحياتي وانا شاب قافي





ولما كان معاليه تخفى عليه الدوافع والظروف التي كانت وراء ارسال قصيده الزلامي السابقه فقد كان يتوقع ان تكون غزلية ورد رحمة الله على هذا الاساس :



يا طير ياللي بالسما تنفض الريش = ياللي تهز اطراف ريشك خفافي
ياللي نهضت الصبح وقت المغابيش = وقت الصباح وكلاً ابصر وشافي
اعطيك سراً مخزنه بالنشانيش = وانحر رشيد ولك بداره ملافي
رشيد من ربع عداة مداغيش = وصل سلامي للعديم السنافي
قله عرفت اهل القلوب المغاشيش = اللي عصوا باللي ثمانه رهافي
زين الصباح منقش الخد تنقيش = عين العنود اللي ترب الشعافي
برقاً يفوتك لو مزونه مراهيش = لا تستخيل امطار سحب مقافي
العام قلت ازهم هل الخيل والجيش = اهل البيوت موسعين الرفافي
ليا غدا فعل المراجل تناويش = افعالهم مثل الفنر بالكشافي
وقلوبهم للضيف دايم هشاهيش = وعدوهم سقوه سمّاً زعافي
دور مع الاجواد ضافي العكاريش = وابعد عن اهل الكيد والستر ضافي
رزقاً ورا الانذال جوع وعراميش = والشرب منهم يالزلامي عيافي
اجزم وشم واعرض وبعد عن الهيش = ما فيه كود الشوك مثل الشلافي
فيه العقارب والافاعي محانيش = والفعل وسط قلوب الشرار خافي
وليا عصوا مالك بنجد مهاويش = شرعاً وسيفاً للشريعه لحافي
راحت سنين الخيل مع حزّب الجيش = وهذي سنيناً يالزلامي عجافي
رشيد اهل خلك ترى عندهم طيش = ويفرقون اهل القلوب الولافي

[نــجــم]

فعلاً من بلش يستشير ، وإذا أراد أن يستشير فلا بد ان يستشير رجلاً بحكمة الامير الاحل / محمد الاحمد السديري رحمة الله والزلامي نقلت اليه بعض الاخبار التي شتت تفكيره فلجأ إلى معاليه بهذه القصيدة :


يا ونتي يا ما بصدري من الضيق = من حسة لا جت بداخل ضميري
كنيتها في مغلقات الصناديق = لين انكسر منها الضليع القصيري
قالوا قدرت الصبر ما فيه تبريق = قلت اه من يقدر على الصبر غيري
مير انتهى واليا انكفى الميّ ما حيق = سود الليالي عرقلت خط سيري
والله لو اشرب ماي سحب غداريق = ما ظنتي يبرد ظماي الغديري
ولو اشرب الذوب المصفّى على الريق = زاد السعير اللي بكبدي سعيري
خط لفاني حرّق القلب تحريق = امحق بشاره جبتها يا بشيري
انا على عهدٍ واظنّ العهد بيق = اخر زمان وكل شيء يصيري
راحوا هل النمات مثل الزواريق = يسعون عدواني بقرقا عشيري
الله يجازي من سعى بالتفاريق = عن جنة الفردوس بالزمهريري
يا راكب اللي مع خطاة الطواريق = ينوز نوز الجافل المستذيري
من وارده مالوعوه السواويق = ولا داج للعبري وشال الاجيري
اخر طراز مغلق الفن تغليق = اسبق من الاصوات عبر الاثيري
هافٍ يهيف بمجرهد الرقاريق = يطوي الفيافي طي سلك الحريري
عجل ليا دنَّي وعجل ليا سيق = والطير ما يمديه قدمه يطيري
عليه مندوب ليا نشف الريق = قرم ليا سال العرق بالنظيري
داس الخطر من دون عهد ومواثيق = يوم ان ولد اللاش فكره يحيري
خذلي كتاب منسق القيل تنسيق = مكتوم ما يقراه غير السديري
محمد الاحمد مهدي الصعافيق = ليا عدوا اهل الطيب قاضي واميري
وان حلّق الدخان بالجو تحليق = امير في قود السرايا خبيري
وان صار بالجرعات كنّه وتشريق = قاضي يحل العسر حلاً يسيري
وان جو وبيبان المنازل مغاليق = ريفاً لهشّال الخلا والقصيري
وسلم عليه وشلق الهرج تشليق = واشرح له الموضوع حالي خطيري
يعطيك راياً ما عطوه المطافيق = وانا بلشت ومن بلش يستشيري
وتراي بادي لك على الرجم ومويق = عطشان شفقان لشوف السديري







وردّ معاليه بهذه القصيده معلناً تضامنه التام مع ضحايا المحبه :


ونيت ونات ونات تحش المعاليق = يشيب منها راس طفل صغيري
ونيتها وانا بروس الشواهيق = في راس مرقاباً طويل عسيري
وزاد الونين وصفق القلب تصفيق = وصار الونين لجرح قلبي خشيري
وفزيت انا لاهل القلوب المحاريق = مثل الزلامي يوم جاه النذيري
العلم جابه لي ردي التوافيق = وقلبه من اللوعات غادي كسيري
ادمن بقلبه لابسات المخانيق = المترفات مشيّدات الحجيري
عزاه للي من عيال مطاليق = متمشكل بين الكمي والمغيري
غيم عداك يدفق الوبل تدفيق = لا تستخيله يامروي الشطيري
خلك ورا مران وانته بتشريق = ومظنون عينك يم وادي الجريري
حدوه عنك البايهين المدانيق = لا بليس منهم بالنمايم وزيري
اهل النمايم مخلفين العشاشيق = دايم على الاصحاب شرّاً شريري
والبوق عند ملهفات السماحيق = عفراً تهزّ اجسامها بالمسيري
اختر حمول الخيل يوم المساويق = اهل الفعايل بالنهار الكبيري
مروين عطشان الغلب بالمزاريق = شلفاً تلظى بالنهار الضريري
من فوق قبٍ كنهن المشاريق = عز القصير الخايف المستجيري
من نسلهم دور ليا صرت عشيق = اختر بنات مذللين النحيري
يو الطراد تفهق الجمع تفهيق = كم طاح قدم نحورهم من عثيري
ان ساعت من عند ربّ المخاليق = اقطف ثمر مالاق روضاً مطيري
تلقى زهور الورد فوق الزماليق = عقب المطر يفوح منها العبيري
اعطيك راياً يطلعك من صعافيق = من صدّ عدّه بالمودّه غريري
ان مامشى برضاه يتعب ليا سيق = واحذر يغرّك كل زولاّ غريري
رشيد قلبي دايماً به تخافيق = بين الضلوع ولا لقاله مطيري
يكفخ كفيخ موحشاً به تخافيق = خطراً يصرّم محكمات المريري
على حبيبٍ مبسمه ما بعد ذيق = ليا ناموا المخلوق همّه سميري
طفلاً وداده فتق القلب تفتيق = ونثرت من زرق الدموع الغزيري
عين العنود ان ذيروه التفافيق = شكت وهجّت من فياض الظفيري
وغصون قلبي بالمودّه مواريق = وارجي يصادف نشر خلي نشيري
الله جمّاع القلوب المشافيق = عقب اللقا يعقوب فتح بصيري
رشيد شوفاتي لخلّي تراميق = ينصاب لو شافه طلال الظفيري
وانا معك بالمال والحال بالضيق = والسيف عندي مغمداً بالجفيري

[نــجــم]

إلتحق الشاعر رشيد الزلامي بالجيش الكويتي وفي يوم من الأيام كان

هو مع عدد من زملائه في ساعات العمل وكان رشيد الزلامي على مكتبه

ويتصفح مجلة على غلافها صورة الملك فهد بن عبدالعزيز عندما كان أميراً

وكان زميله الكويتي ينتظر أن ينتهي رشيد الزلامي من تصفح المجلة ليقرأها

وأطال رشيد تمعنه لصورة الأمير فهد بن عبدالعزيز

و قال له زميله باللهجة العامية ( ماشبعت من شو فتك لمعزبك)

فغضب رشيد الزلامي وأدخل المجلة بدرج الطاولة وقال برد قاسي

مافيه مجلة ، فقال زميله هذه الابيات



حنا بدارٍ مددلهة صدر من ضاق == بلّغ سلامي للزلامي و قــلـّه

ياعابد الصورة على بيض الأوراق == دارك عرفناها وعلتك عله

إن كان حبه محرق ٍ قلبك إحراق == شد الرحال ودرب عمك تدله







فرد عليه رشيد الزلامي فقال


أنتم بدار مدلهة صدر من ضاق == وانا تخيّل صورته مخلص ٍله

ماتعرفونه يارديين الأعماق == هذا فهد ذخر الفهد في محله

اللي لياشطت و يبسن الأرياق == وأنته و انا و معزبك تحت ظله

واهل الحسد ماهم على باب الأرزاق == رزقي على كوّن الكون كله

وحنّا سعوديين ياشرس الا خلاق == أحرار ماعشنا بعيشة مذله

رجالنا لو هو على مكسر الساق == حب الكرامه والو فا عادة ٍ له

[سما الحمايل]

http://store1.up-00.com/Mar11/afG42576.gif
انتظر بوح فكرك ونبض قلمك..http://store1.up-00.com/Mar11/fPP42576.gif
الله يعطيك الف الف عافيه..http://store1.up-00.com/Mar11/9sa42576.gif


كنت هنا..
سما الحمايل..
http://store1.up-00.com/Mar11/cjk42576.gif


http://www.t1111t.com/vb/images/smilies/m-64.gif

[نجمة الصباح]

http://smiles.al-wed.com/smiles/13/flowers_221.gif


شكرا لك
والله يعطيك العافية
http://smiles.al-wed.com/smiles/13/flowers_221.gif

[نــجــم]

http://smiles.al-wed.com/smiles/13/flowers_221.gif



شكرا لك
والله يعطيك العافية

http://smiles.al-wed.com/smiles/13/flowers_221.gif

اسعدني حضورك ..

تقديري ..

[نــجــم]

http://store1.up-00.com/mar11/afg42576.gif

انتظر بوح فكرك ونبض قلمك..http://store1.up-00.com/mar11/fpp42576.gif
الله يعطيك الف الف عافيه..http://store1.up-00.com/mar11/9sa42576.gif


كنت هنا..
سما الحمايل..
http://store1.up-00.com/mar11/cjk42576.gif



:m-64:

اسعدني حضورك ..

تقديري ..

[يارا العامرية]

صح لسان شاعرها
ولاهنت ع الإختيار الرائع
يعطيك العافيه

[نــجــم]

اسعدني حضورك ..

تقديري ..

[صعبة المنال]

مبــــدع ,, صح لســـآنه
وتسلم يمناك والله يعطيك العافية
تقديري

[نــجــم]

اسعدني حضورك ..

تقديري ..

[اساور وأغصان]

http://www.r-mbd3.com/vb/uploaded/3998_11194182334.gif (http://www.r77r.com/vb/ext.php?ref=http%3A%2F%2Fwww.libyanyouths.com%2Fvb %2Ft18404.html)
اشكرك لروعة الطرح القيم
لاتحرمنا مواضيعك جديدة

[نــجــم]

اسعدني حضورك ..

تقديري ..

[سلطانة]

http://www.halauae.com/uploads/images/alsaher-3814931317.gif

[العنيــــدهـ]

صح لسان شاعرها
ولاهنت ع الاختيار الرائع
يعطيك العافيه
!..❥

[نــجــم]

صح لسان شاعرها
ولاهنت ع الاختيار الرائع
يعطيك العافيه
!..❥
شاكر لك مرورك الجميل ..

احترامي وتقديري ,,

[نــجــم]

http://www.halauae.com/uploads/images/alsaher-3814931317.gif
شاكر لك مرورك الجميل ..

احترامي وتقديري ,,